Bearta sriantacha i leith ISIL/Da’esh agus Al-Qaeda

PRÍOMHPHOINTÍ

Rialachán (CE) Uimh. 881/2002

• Ceanglaítear leis an rialachán go reofar na cistí agus na hacmhainní eacnamaíocha go léir ar le daoine, eintitis, comhlachtaí nó grúpaí atá liostaithe ina Iarscríbhinn I agus in Iarscríbhinn Ia iad, lena n–áirítear tríú páirtí a ghníomhaíonn thar a gceann, go díreach nó go hindíreach, agus na cistí agus na hacmhainní eacnamaíocha go léir atá faoina n–úinéireacht, atá á sealbhú acu nó atá á rialú acu, go díreach nó go hindíreach.
• Ní fhéadfar aon chistí nó acmhainní eacnamaíocha a chur ar fáil, go díreach nó go hindíreach, do dhaoine nádúrtha nó dlítheanacha, eintitis, comhlachtaí nó grúpaí atá liostaithe in Iarscríbhinn I ná iad a chur ar fáil chun tairbhe dóibh. Baineann an toirmeasc sin freisin le cistí agus acmhainní eacnamaíocha a úsáidtear chun óstáil idirlín agus seirbhísí gaolmhara sholáthar a úsáidtear chun tacú leis na daoine sin, chun airgead fuascailte a íoc nó chun trádáil dhíreach nó indíreach i dtáirgí ola, scaglanna modúlacha agus ábhar gaolmhar lena n–áirítear ceimiceáin agus bealaí, mar aon le hacmhainní nádúrtha eile.

Cinneadh (CBES) 2016/1693 agus Rialachán (AE) 2016/1686

I mí Mheán Fómhair 2016, ghlac Comhairle an Aontais Eorpaigh cinneadh agus rialachán lenar ceadaíodh don Aontas Eorpach, den chéad uair riamh, smachtbhannaí a chur i bhfeidhm ar bhonn uathrialaitheach ar ISIL or Al-Qaeda agus ar dhaoine aonair nó ar ghrúpaí, ar ghnóthais nó ar eintitis a thacaíonn leo. Roimhe sin, ní fhéadfaí smachtbhannaí a chur i bhfeidhm ach maidir le daoine agus eintitis atá liostaithe ag na Náisiúin Aontaithe nó ag Ballstáit AE ag gníomhú ina n–aonar. Rinneadh an dá ghníomh sin a leasú le himeacht ama agus déantar an méid seo a leanas leo:

• cuirtear toirmeasc ar sholáthar, díolachán, aistriú nó onnmhairiú díreach nó indíreach arm nó trealaimh mhíleata de gach cineál, lena n–áirítear
  • airm agus armlón,
  • feithiclí agus trealamh míleata,
  • trealamh paraimíleata agus páirteanna spártha;
• cuirtear cosc ar sholáthar agus cúnamh teicniúil, seirbhísí bróicéireachta agus seirbhísí eile a bhaineann le gníomhaíochtaí míleata agus le soláthar, monarú, cothabháil agus úsáid arm agus trealaimh mhíleata lena mbaineann;
• cuirtear cosc ar mhaoiniú nó ar chúnamh airgeadais a sholáthar a bhaineann le gníomhaíochtaí míleata, lena n–áirítear, go sonrach:
  • deontais, iasachtaí agus árachas creidmheasa onnmhairiúcháin,
  • árachas agus athárachas maidir le díolachán, soláthar, aistriú nó onnmhairiú arm agus trealaimh mhíleata lena mbaineann,
  • cúnamh teicniúil, seirbhísí bróicéireachta agus seirbhísí gaolmhara ar bith eile go díreach nó go hindíreach do dhuine aonair, do ghrúpa, do ghnóthas nó d’eintiteas;
• tugtar isteach toirmeasc taistil ar dhaoine aonair:
  • san Iarscríbhinn leis an gcinneadh leagtar amach an liosta de dhaoine aonair nach mór do na Ballstáit cosc a chur orthu iontráil ina gcríocha nó dul trína gcríocha;
  • féadfar an Iarscríbhinn a leasú le cinneadh d’aon ghuth ón gComhairle;
• tugtar isteach reo sócmhainní ar dhaoine aonair agus ar chuideachtaí a aithneofar go bhfuil baint acu le ISIL nó Al-Qaeda:
  • in Iarscríbhinn I a ghabhann leis an rialachán liostaítear na daoine aonair, na cuideachtaí, na heintitis agus na comhlachtaí a ndéantar a gcistí agus a n–acmhainní eacnamaíocha a reo (lena n–áirítear tríú páirtí a ghníomhaíonn thar a gceann nó ar ordú uathu),
  • ní bheidh cistí nó acmhainní eacnamaíocha ar bith ar fáil, go díreach nó go hindíreach, do na daoine, na cuideachtaí, na heintitis nó na comhlachtaí sin,
  • déanann an Chomhairle athbhreithniú ar Iarscríbhinn I ag eatraimh rialta agus gach 12 mhí ar a laghad.