Praghsanna ar tháirgí tomhaltóirí a chur in iúl

PRÍOMHPHOINTÍ

Treoir 98/6/CE

• Ní mór an praghas díola agus an praghas aonaid a léiriú ar bhealach soiléir, so-aitheanta agus soléite i gcás gach táirge a thairgeann trádálaithe do thomhaltóirí (i.e. ba cheart cáin bhreisluacha agus gach cáin eile a bheith san áireamh sa phraghas deiridh).
• Ní gá an praghas aonaid a chur in iúl más ionann agus an praghas díola é.
• Féadfaidh Ballstáit AE a chinneadh, áfach, gan na rialacha seo a chur i bhfeidhm maidir le:
  • táirgí a chuirtear ar fáil agus seirbhís á soláthar;
  • díolacháin ar ceant agus díolacháin saothar ealaíne agus seandachtaí.
• Maidir le táirgí a dhíoltar i mbulc, ní gá ach an praghas aonaid a thaispeáint.
• Ní mór fógraíocht ar bith ar a luaitear an praghas díola an praghas aonaid a thaispeáint freisin.
• Féadfaidh na Ballstáit:
  • an oibleagáid maidir le praghas aonaid na dtáirgí a shonrú a tharscaoileadh más rud é nach mbeadh an léiriú sin úsáideach nó go bhféadfadh mearbhall a bheith ann dá bharr;
  • liosta a tharraingt suas de tháirgí neamhbhia a bhfuil feidhm fós ag an oibleagáid an praghas aonaid a léiriú maidir leo i gcás tarscaoileadh den sórt sin.
• Rinneadh foráil sa treoir d’idirthréimhse nach raibh sé d’oibleagáid ar ghnólachtaí miondíola beaga praghas aonaid táirgí seachas na táirgí a dhíoltar ar an mórchóir a chur in iúl lena linn.
• Ní mór do Bhallstáit:
  • bearta iomchuí a dhéanamh chun gach duine lena mbaineann a chur ar an eolas nuair a bheidh an reachtaíocht sin ina dlí náisiúnta;
  • Córas pionós le haghaidh sáruithe ar na dlíthe náisiúnta arna nglacadh chun an Treoir seo a chur i bhfeidhm a leagan síos agus faisnéis a sholáthar ina leith.

Treoir (AE) 2019/2161

• Le Treoir Leasaitheach (AE) 2019/2161 tugtar isteach airteagal úr i dTreoir 98/6/CE maidir le faisnéis do thomhaltóirí faoi laghduithe ar phraghsanna. Ní mór fógra ar bith maidir le laghdú ar phraghsanna an praghas a bhí i bhfeidhm ag an trádálaí roimhe sin (praghas roimhe sin) a chur in iúl go soiléir. Ciallaíonn an praghas roimhe sin an praghas is ísle a bhí i bhfeidhm ag an trádálaí le linn tréimhse ama nach gairide ná 30 lá roimh an laghdú praghais a chur i bhfeidhm.
• Foráiltear leis an leasú do roghanna rialála le haghaidh na mBallstát maidir le hearraí ar dócha go dtiocfaidh meath orthu nó go rachaidh siad in éag go tapa (go háirithe bia), earraí atá ar díol ar feadh níos lú ná 30 lá agus earraí atá faoi réir laghduithe leanúnacha ar phraghsanna.
• Comhlánaíodh an ceanglas atá ar na Ballstáit faoi láthair pionóis éifeachtacha, chomhréireacha agus athchomhairleacha a thabhairt isteach i leith sáruithe ar rialacha náisiúnta maidir le praghais a chur in iúl le liosta critéar chun pionóis a fhorchur.