Foghlaim don aistriú glas agus don fhorbairt inbhuanaithe — Moladh

PRÍOMHPHOINTÍ

• Cuirtear béim ar ról na scoileanna, an ardoideachais agus institiúidí oideachais agus oiliúna eile maidir le haistriú glas rathúil, cóir agus uilechuimsitheach a bhaint amach i roinnt príomhghnéithe de chuid an Aontais Eorpaigh (AE) agus i ndoiciméid bheartais idirnáisiúnta lena n áirítear:
  • an Comhaontú Glas don Eoraip;
  • Straitéis bhithéagsúlachta an Aontais do 2030;
  • an tionscnamh maidir le limistéar Eorpach oideachais;
  • an straitéis Eorpach d’ollscoileanna;
  • an clár oibre scileanna don Eoraip;
  • Straitéis Eagraíocht Oideachais, Eolaíochta agus Chultúir na Náisiún Aontaithe — Oideachas le haghaidh forbairt inbhuanaithe le haghaidh 2030.
• Tá doiciméad inmheánach oibre de chuid an Choimisiúin Eorpaigh ag gabháil leis an moladh a fheidhmíonn mar lámhleabhar do chleachtóirí, agus soláthraítear ann samplaí dea-cleachtais ábhartha ó gach cearn den Eoraip.
• Creat tagartha le haghaidh inniúlachtaí inbhuanaitheachta is ea GreenComp. Soláthraítear ann bonn coiteann d’fhoghlaimeoirí agus treoir chun solúbthacht a mhéadú, rud a chuireann sainmhíniú comhaontaithe inbhuanaitheachta chun cinn mar réimse inniúlachta.

Príomh-mholtaí

Moltar plean oibre sa mholadh do Bhallstáit AE chun tacú le foghlaim agus teagasc don aistriú glas agus don fhorbairt inbhuanaithe i ngach céim den oideachas agus den oiliúint. Áirítear ar na príomh-mholtaí:

• tús áite a thabhairt don aistriú glas agus don fhorbairt inbhuanaithe i mbeartais agus i gcláir oideachais agus oiliúna;
• deis a thabhairt do gach foghlaimeoir foghlaim faoin ngéarchéim agus faoi inbhuanaitheacht san oideachas foirmiúil agus san oideachas neamhfhoirmiúil araon (amhail gníomhaíochtaí seach-churaclaim agus obair na hóige);
• cistí náisiúnta agus AE a shlógadh chun infheistíocht a dhéanamh i dtrealamh, acmhainní agus bonneagar glas agus inbhuanaithe;
• cuidiú le hoideoirí a gcuid eolais agus scileanna a fhorbairt chun teagasc faoin ngéarchéim aeráide agus faoin inbhuanaitheacht;
• timpeallachtaí foghlama tacaíochta a chruthú le haghaidh inbhuanaitheachta ina gcumhdaítear gníomhaíochtaí agus oibríochtaí uile institiúide oideachais agus teagasc agus foghlaim a bheidh praiticiúil, idirdhisciplíneach agus ábhartha d’ábhair imní áitiúla a éascú;
• páirt ghníomhach a thabhairt do scoláirí agus do bhaill foirne, d’údaráis áitiúla, d’eagraíochtaí óige agus don phobal taighde agus nuálaíochta maidir le foghlaim faoin inbhuanaitheacht.

Ról an Choimisiúin

Cuideoidh an Coimisiún leis an moladh a chur chun feidhme trí:

• piarfhoghlaim agus malartú maidir le hinbhuanaitheacht san oideachas, lena n áirítear trí:
  • an creat straitéiseach le haghaidh comhar Eorpach san oideachas agus san oiliúint i dtreo an limistéir Eorpaigh oideachais agus thairis sin (2021–2030),
  • Grúpa Oibre tiomnaithe AE maidir leis an ábhar sin;
• acmhainní a fhorbairt d’oideoirí agus do lucht ceaptha beartais, lena n áirítear cúrsa ar líne d’oideoirí maidir le tionscnaimh um inbhuanaitheacht na scoile ar an ardán nua Eorpach um oideachas scoile;
• leanúint leis an ngné ghlas i gclár Erasmus+ agus i gclár an Chóir Dlúthpháirtíochta Eorpaigh a neartú.

Maoiniú

Tá tacaíocht airgeadais ar fáil trí Erasmus+, Fís Eorpach agus cláir eile AE um maoiniú.