Comhar Eorpach níos dlúithe maidir le faireachas muirí

PRÍOMHPHOINTÍ

Tá CISE ar cheann de phríomhchuspóirí straitéiseacha Bheartas Muirí Lánpháirtithe AE. Is cuid thábhachtach é an CISE freisin den Straitéis um Shlándáil Mhuirí.

Cad is CISE Muirí ann?

Is éard is CISE Muirí ann ná próiseas deonach comhoibrithe a chuireann le córais agus le hardáin reatha mhalartaithe agus chomhroinnte faisnéise. Ba cheart don idir-inoibritheacht fheabhsaithe idir na córais agus na hardáin sin barr feabhais a chur ar mhalartú faisnéise i measc na n-údarás faireachais, rud a chuirfidh le feasacht mhuirí níos fearr. Thairis sin, féachtar go príomha le CISE Muirí cur le sábháilteacht, le slándáil agus le cosaint chomhshaoil i réimsí muirí AE.

Cad iad na sochair a bhaineann leis?

• is féidir an t-eolas agus an fheasacht staide mhuirí níos mó a úsáid chun tabhairt faoi oibríochtaí faireachais níos comhordaithe agus níos freagartha;
• laghdú mór ar iarrachtaí bailiúcháin sonraí;
• laghduithe ar chostais riaracháin agus oibríochtúla na ngníomhaíochtaí faireachais mhuirí.

Mórghníomhartha ar leibhéal AE:

Cuireadh roinnt córais ar bun chun freastal ar réimsí dhifriúla beartais, córais a thrasnaíonn earnálacha difriúla. Áirítear leis na córais sin:

• SafeSeaNet, a chuireann seirbhísí comhtháite muirí ar fáil chun faireachas a dhéanamh ar thrácht (feasacht staide) agus chun a chinntiú go gcuirtear reachtaíocht AE i bhfeidhm;
• Comhchóras Cumarsáide agus Faisnéise Éigeandála, lena ndéantar éascaíocht ar an gcumarsáid le linn teagmhas agus tubaistí muirí;
• Córas Faireacháin Árthaí, córas faireacháin satailít-bhunaithe a úsáidtear chun sonraí a chur ar fáil do na húdaráis iascaigh maidir le suíomh, le cúrsa agus le luas árthaí;
• Líonra um Fhaireachas Muirí, ar féidir é a úsáid chun faisnéis oibríochtúil mhuirí agus seirbhísí oibríochtúla muirí a mhalartú, amhail suíomhanna árthaí, rianú, sonraí aitheantais, comhrá nó íomhánna;
• An Córas Eorpach um Fhaireachas ar Theorainneacha (EUROSUR), córas ilchuspóireach chun imirce neamhdhlíthiúil agus coireacht thrasteorann a chosc ag teorainneacha seachtracha AE;
• An Ghníomhaireacht Eorpach chun Teorainneacha Seachtracha a Bhainistiú - Frontex, a chuireann bainistiú Eorpach teorainneacha chun cinn agus a dhéanann é a chomhordú agus a fhorbairt;
• Fuinneoga Aonair Náisiúnta, a chuireann ardáin náisiúnta mhalartaithe faisnéise ar fáil chun faisnéis a bhaineann le hárthaí a thuairisciú agus a chomhroinnt. Tá siad nasctha leis an gcóras faisnéise agus malartaithe mhuirí AE.

Cad iad réimsí tosaíochta an chomhair bhreise thrasteorann agus thrasearnála?

• suíomhanna na n-árthaí agus na n-aerárthaí patróil a chomhroinnt go leanúnach chun a chinntiú go bhfreagrófar chomh tapa agus is féidir le hoibríochtaí olltharrthála agus/nó le teagmhais eile ar muir;
• uirlisí comhoibrithe chun géarchéimeanna trasteorann a bhainistiú;
• sonraí a chur le chéile agus faisnéis a mhalartú faoi árthaí amhrasacha in uiscí AE;
• cláir náisiúnta na mbád áineasa, ionas gur féidir iarratais ar fhaisnéis idir na tíortha AE a phróiseáil ar bhonn ríomhairithe.

Tá bearta éagsúla breise molta ag an gCoimisiún freisin. Mar shampla, tá sé beartaithe aige:

• lámhleabhar neamhcheangailteach CISE Mhuirí a fhorbairt faoi dheireadh na bliana 2016 ina shonrófar moltaí dea-chleachtais agus faisnéis faoi conas CISE a chur i bhfeidhm;
• bearta tacaíochta chun caighdeáin a fhorbairt, a chothabháil agus a scaipeadh lena ligtear do chórais fhaireachais mhuirí bheith idir-inoibritheach.
• leanúint d’athbhreithniú a dhéanamh ar an reachtaíocht reatha earnála ar leibhéal AE chun aon bhacainní dlíthiúla ar chomhroinnt thrasearnála faisnéise a bhaint, agus comhlíonadh na gceanglas ábhartha maidir le cosaint sonraí á chinntiú.

Chomh maith leis sin, seolfaidh an Coimisiún próiseas athbhreithnithe faoin mbliain 2018 chun cur i bhfeidhm CISE Mhuirí a mheas agus chun a fháil amach an gá beart breise a dhéanamh.

Féach Faireachas comhtháite muirí ar láithreán gréasáin an Choimisiúin Eorpaigh chun tuilleadh faisnéise a fháil.