Teorainneacha astaíochtaí agus rialacha cineálcheadaithe le haghaidh innealra soghluaiste neamhbhóthair

PRÍOMHPHOINTÍ

Cumhdaítear le hinnealra soghluaiste neamhbhóthair (ISNB) réimse leathan innealra a úsáidtear de ghnáth lasmuigh den bhóthar, mar shampla:

• trealamh beag garraíodóireachta agus trealamh láimhe (lomairí faiche, sábha slabhracha, etc.);
• innealra tógála (tochaltóirí, lódóirí, ollscartairí, etc.);
• innealra talmhaíochta agus feirmeoireachta (buainteoirí, cartairí, etc.);
• cairr iarnróid, innill féinghluaiste agus soithí uiscebhealaigh intíre

Níl feidhm ag an rialachán maidir le hinnill le haghaidh roinnt feidhmeanna sonracha, lena n-áirítear iad sin le haghaidh iad seo a leanas:

• innealra suite;
• soithí farraige a bhfuil deimhniú muirí bailí nó deimhniú sábháilteachta bailí acu;
• feithiclí áineasa, seachas mótair shneachta, feithiclí uile-thír-raoin agus feithiclí taobh le taobh;
• feithiclí agus innealra a úsáidtear go heisiach nó a bhfuil sé beartaithe iad a úsáid go heisiach i gcomórtais.

Cineálcheadú

• Leagtar amach sa rialachán na nósanna imeachta is éigean do mhonaróirí inneall a leanúint d’fhonn cineálcheadú¹ a fháil dá n-innill.
• Is ceanglas é cineálcheadú do mhonaróirí chun a n-innill a chur ar mhargadh an Aontais Eorpaigh (AE).
• Ní mór do mhonaróirí a iarratas ar leithligh do gach cineál inneall nó aicme inneall² a thíolacadh chuig údarás ceadúcháin Ballstát AE.
• Eisítear cineálcheadú le haghaidh ré neamhtheoranta.
• Féadfaidh an tAontas a chinneadh go bhfuil rialacháin idirnáisiúnta nó rialacháin tíre neamh-AE coibhéiseach leis na coinníollacha agus na nósanna imeachta maidir le cineálcheadú AE.
• Ceanglaítear ar údaráis náisiúnta comhoibriú go héifeachtúil lena chéile agus leis an gCoimisiún Eorpach, agus sonraí agus faisnéis a bhaineann le cineálcheaduithe AE a mhalartú trí Chóras Faisnéise an Mhargaidh Inmheánaigh (IMI).

Astaíochtaí sceite

• Ní mór do dhearadh, tógáil agus cóimeáil na gcineálacha inneall agus na n-aicmí inneall cloí leis na ceanglais atá leagtha síos sa rialachán.
• Níor cheart go sáródh cineálacha inneall ná aicmí inneall na teorainneacha astaíochtaí sceite ó na dátaí atá leagtha amach sa rialachán chun na hinnill sin a chur ar an margadh.

Forálacha idirthréimhseacha áirithe i Rialachán (AE) 2016/1628 a chur siar

• Mar thoradh ar an gcur isteach a rinne an ráig COVID-19 tá moill sa slabhra soláthair maidir le páirteanna agus comhpháirteanna criticiúla, rud a d’fhág go raibh stoic inneall agus táirgí neamhchríochnaithe ag monaróirí. Ciallaíonn sé sin nach mbeidh go leor monaróirí inneall agus innealra in ann na spriocdhátaí a leagtar amach i Rialachán (AE) 2016/1628 a chomhlíonadh gan damáiste tromchúiseach eacnamaíoch a dhéanamh.
• Leasaítear Rialachán (AE) 2016/1628 le Rialachán (AE) 2020/1040 agus leathnaítear leis na spriocdhátaí faoi 12 mhí le haghaidh innealra soghluaiste neamhbhóthair agus tarracóirí atá feistithe le hinnill trasdula, lena gcomhlíontar caighdeáin níos luaithe. Níl feidhm ag an leathnú sin maidir le hinnill trasdula a chumhdaítear leis na dátaí a shonraítear sa dara, sa tríú agus sa cheathrú fomhír d’Airteagal 58(5) de Rialachán (AE) 2016/1628.