Dolaí leictreonacha bóthair — comhoiriúnacht idir tíortha

ACHOIMRE AR:

Treoir 2004/52/CE — maidir le hidir-inoibritheacht chóras leictreonach na ndolaí bóthair in AE

ACHOIMRE

CAD A DHÉANTAR SA TREOIR?

Leagtar síos inti na coinníollacha lena áirithiú go mbeidh córais leictreonacha dolaí bóthair san Aontas Eorpach (AE) comhoiriúnach lena chéile agus gur féidir feidhmiú ina measc. Tá feidhm aici maidir le bailiú leictreonach gach cineál táillí ar bhóithre, ar tholláin, ar dhroichid agus ar bháid farantóireachta.

PRÍOMHPHOINTÍ

• Cuirtear sainordú ar fáil faoin reachtaíocht seo i dtaobh sheirbhís dolaí leictreonacha na hEorpa (EETS) a bhunú d’fhonn dolaí nó táillí a bhailiú.
• I gcás gach córais bailiúcháin leictreonaigh dolaí arna thabhairt isteach ar an 1 Eanáir 2007 nó ina dhiaidh sin, ní mór dó leas a bhaint as córas suite satailíte, cumarsáid mhóibíleach faoin gcaighdeán GSM*-GPRS* nó teicneolaíocht micreathonn 5.8GHz.
• Ní mór d’oibreoirí EETS trealamh ar bord atá comhoiriúnach le gach córas náisiúnta dolaí leictreonacha a chur ar fáil d’aon tiománaithe ar spéis leo é sin.
• Tá tíortha AE ina bhfuil córais dolaí á spreagadh lena áirithiú gurb amhlaidh, faoin 1 Eanáir 2007, go mbeidh ar a laghad 50 % den trácht a bhaineann leas astu in ann é sin a dhéanamh ar bhonn leictreonach.
• Cuimsítear iad seo a leanas i seirbhís dolaí leictreonacha na hEorpa:
  • sraith chonarthach rialacha lena gceadaítear do gach oibreoir agus/nó eisitheoir an tseirbhís a chur ar fáil;
  • sraith caighdeán agus ceanglas teicniúil;
  • conradh síntiúis aonair idir na cliaint, na hoibreoirí agus/nó na heisitheoirí faoina dtugtar rochtain ar an líonra iomlán.
• Ní dhéanann an reachtaíocht aon difear do chumas na n-údarás náisiúnta dolaí a ghearradh ar chineálacha áirithe feithiclí, do leibhéal na ndolaí sin ná don úsáid a bhaintear astu.
• Is é an Coimisiún Eorpach, le cúnamh ó Choiste Dola Leictreonaigh, a réitíonn na saincheisteanna teicniúla, na saincheisteanna nós imeachta agus na saincheisteanna dlí atá i gceist.
• Níl feidhm ag an reachtaíocht maidir leo seo a leanas:
  • córais neamhleictreonacha dolaí bóthair;
  • córais leictreonacha dolaí bóthair nach dteastaíonn trealamh ar bord ina leith;
  • córais bheaga dolaí bóthair, a bhaineann le bóithre áitiúla.

CÉN UAIR ATÁ TOSACH FEIDHME NA TREORACH?

Cuireadh an treoir i bhfeidhm an 20 Bealtaine 2004. Bhí ar thíortha AE í a ionchorprú sa dlí náisiúnta faoin 19 Samhain 2005.

CÚLRA

• Praghsáil agus íocaíocht leictreonach
• “The European Electronic Toll Service (EETS)” — bróisiúr

PRÍOMHTHÉARMAÍ

* Córas domhanda do chumarsáid mhóibíleach (GSM): caighdeán teileachumarsáide i gcomhair líonraí digiteacha ceallacha arna n-úsáid ag fóin phóca.

* Radaisheirbhís Ghinearálta Phaicéad (GPRS): cineál seirbhíse cumarsáide gan sreang ar bhonn paicéad trínar féidir le fóin phóca agus ríomhairí ceangal leanúnach a bheith acu leis an idirlíon.

GNÍOMH

Treoir 2004/52/CE ó Pharlaimint na hEorpa agus ón gComhairle an 29 Aibreán 2004 maidir le hidir-inoibritheacht chóras leictreonach na ndolaí bóthair sa Chomhphobal (IO L 166, 30.4.2004, lgh. 124-143)

Rinneadh leasuithe comhleanúnacha ar Threoir 2004/52/CE a ionchorprú sa téacs bunaidh. Níl de luach ar an leagan comhdhlúite seo ach luach doiciméadach amháin.

GNÍOMHARTHA GAOLMHARA

Cinneadh 2009/750/CE ón gCoimisiún an 6 Deireadh Fómhair 2009 maidir le sainmhíniú Sheirbhís Dolaí Leictreonacha na hEorpa agus a heilimintí teicniúla (a bhfuil fógra tugtha ina leith faoi dhoiciméad C(2009) 7547) (IO L 268, 13.10.2009, lgh. 11-29)

Nuashonraithe 08.03.2016