FTEHIM

Bejn l-Unjoni Ewropea, l-Islanda u n-Norveġja dwar l-applikazzjoni ta’ ċerti dispożizzjonijiet tad-Deċiżjoni tal-Kunsill 2008/615/ĠAI dwar it-titjib tal-Koperazzjoni transkonfinali, b'mod partikolari fil-ġlieda kontra t-terroriżmu u l-kriminalità transkonfinali, u tad-Deċiżjoni tal-Kunsill 2008/616/ĠAI dwar l-implimentazzjoni tad-Deċiżjoni 2008/615/ĠAI dwar it-titjib tal-koperazzjoni transkonfinali, b’mod partikolari fil-ġlieda kontra t-terroriżmu u l-kriminalità transkonfinali, kif ukoll tal-Anness tagħha

L-UNJONI EWROPEA,

minn naħa waħda, u

L-ISLANDA

u

N-NORVEĠJA,

min-naħa l-oħra,

minn hawn 'il quddiem imsejħa “il-Partijiet Kontraenti”,

FILWAQT LI JIXTIEQU jtejbu l-koperazzjoni tal-pulizija u dik ġudizzjarja bejn l-Istati Membri tal-Unjoni Ewropea u l-Islanda u n-Norveġja, mingħajr preġudizzju għad-dispożizzjonijiet ta’ protezzjoni tal-libertà individwali,

FILWAQT LI JQISU li r-relazzjonijiet attwali bejn il-Partijiet Kontraenti, b'mod partikolari l-Ftehim konkluż mill-Kunsill tal-Unjoni Ewropea u r-Repubblika tal-Islanda u r-Renju tan-Norveġja rigward l-assoċjazzjoni ta’ dawn tal-aħħar fl-implimentazzjoni, l-applikazzjoni u l-iżvilupp tal-acquis ta’ Schengen, juru koperazzjoni mill-qrib fil-ġlieda kontra l-kriminalità,

FILWAQT LI JIĠBDU L-ATTENZJONI lejn l-interess komuni tal-Partijiet Kontraenti fl-iżgurar li l-koperazzjoni tal-pulizija bejn l-Istati Membri tal-Unjoni Ewropea u l-Islanda u n-Norveġja titwettaq b'mod rapidu, effiċjenti u kompatibbli mal-prinċipji bażiċi tas-sistemi legali nazzjonali tagħhom, u f'konformità mad-drittijiet individwali u l-prinċipji tal-Konvenzjoni Ewropea għall-Protezzjoni tad-Drittijiet tal-Bniedem u l-Libertajiet Fundamentali, iffirmata f'Ruma fl-4 ta’ Novembru 1950,

FILWAQT LI JIRRIKONOXXU li d-Deċiżjoni Kwadru tal-Kunsill 2006/960/ĠAI tat-18 ta’ Diċembru 2006 dwar is-simplifikazzjoni tal-iskambju ta’ informazzjoni u intelligence bejn l-awtoritajiet tal-infurzar tal-liġi tal-Istati Membri tal-Unjoni Ewropea (1) diġà tistabbilixxi regoli li bihom l-awtoritajiet tal-infurzar tal-liġi tal-Istati Membri tal-Unjoni Ewropea u l-Islanda u n-Norveġja jistgħu jiskambjaw informazzjoni u intelligence malajr u effettivament għall-finijiet li jitwettqu investigazzjonijiet kriminali jew operazzjonijiet ta’ intelligence kriminali,

FILWAQT LI JIRRIKONOXXU li, sabiex tiġi stimolata l-koperazzjoni internazzjonali f'dan il-qasam, huwa ta’ importanza fundamentali li tkun tista' tiġi skambjata informazzjoni preċiża malajr u b'mod effiċjenti. L-għan huwa li jiġu introdotti proċeduri għall-promozzjoni ta’ mezzi rapidi, effiċjenti u rħas għall-iskambju ta’ data. Għall-użu konġunt ta’ din id-data, dawn il-proċeduri għandhom jistabbilixxu r-responsabbiltajiet rispettivi u jipprevedu garanziji adegwati rigward il-preċiżjoni u s-sigurtà tad-data waqt it-trasmissjoni u l-ħżin kif ukoll proċeduri għar-reġistrazzjoni tal-iskambju tad-data u restrizzjonijiet fuq l-użu tal-informazzjoni skambjata,

FILWAQT LI JQISU li l-Islanda u n-Norveġja esprimew ix-xewqa tagħhom li jidħlu fi ftehim li bih ikunu jistgħu japplikaw ċerti dispożizzjonijiet tad-Deċiżjoni tal-Kunsill 2008/615/ĠAI dwar it-titjib tal-koperazzjoni transkonfinali, b'mod partikolari fil-ġlieda kontra t-terroriżmu u l-kriminalità transkonfinali u d-Deċiżjoni tal-Kunsill 2008/616/ĠAI dwar l-implimentazjoni tad-Deċiżjoni 2008/615/ĠAI dwar it-titjib tal-koperazzjoni transkonfinali, b'mod partikolari fil-ġlieda kontra t-terroriżmu u l-kriminalità transkonfinali, u l-Anness tagħha, fir-relazzjonijiet tagħhom ma’ xulxin u mal-Istati Membri tal-Unjoni Ewropea,

FILWAQT LI JQISU li l-Unjoni Ewropea tqis ukoll li jeħtieġ li jikkonkludu ftehim bħal dan,

FILWAQT LI JIĠBDU L-ATTENZJONI li dan il-Ftehim fih dispożizzjonijiet li huma bbażati fuq id-dispożizzjonijiet ewlenin tad-Deċiżjoni 2008/615/ĠAI u tad-Deċiżjoni 2008/616/ĠAI, u tal-Anness tagħha, u huma mfasslin biex itejbu l-iskambju ta’ informazzjoni li bih l-Istati Membri tal-Unjoni Ewropea u l-Islanda u n-Norveġja jagħtu lil xulxin drittijiet ta’ aċċess għall-fajls kompjuterizzati tagħhom tal-analiżi tad-DNA, is-sistemi kompjuterizzati tagħhom ta’ identifikazzjoni dattiloskopika u d-data tagħhom dwar ir-reġistrazzjoni tal-vetturi. Fil-każ ta’ data mill-fajls nazzjonali dwar l-analiżi tad-DNA u s-sistemi kompjuterizzati ta’ identifikazzjoni dattiloskopika, sistema “hit/no hit” (ta' konkordanza - ebda konkordanza) għandha tippermetti lill-Istat li jkun qed iwettaq tfittxija biex, aktar tard, jitlob data personali mill-Istat li jamministra l-fajl u, fejn meħtieġ, biex jitlob aktar informazzjoni permezz ta’ proċeduri ta’ asistenza reċiproka, inklużi dawk adottati skont il-Deċiżjoni Kwadru 2006/960/ĠAI,

FILWAQT LI JQISU li dawn id-dispożizzjonijiet iħaffu b'mod konsiderevoli l-proċeduri eżistenti li jippermettu lill-Istati Membri, l-Islanda u n-Norveġja jiskopru jekk Stat ieħor, u jekk ikun il-każ, liema, għandu l-informazzjoni li huma jeħtieġu,

FILWAQT LI JQISU li t-tqabbil ta’ data transkonfinali ser jiftaħ dimensjoni ġdida fil-ġlieda kontra l-kriminalità. L-informazzjoni miksuba mit-tqabbil tad-data ser tiftaħ prospettivi investigattivi ġodda u b'hekk ikollha rwol kruċjali fl-assistenza lill-awtoritajiet tal-infurzar tal-liġi u lill-awtoritajiet ġudizzjarji tal-Istati,

FILWAQT LI JQISU li r-regoli huma bbażati fuq in-netwerking tal-bażi ta’ data nazzjonali tal-Istati,

FILWAQT LI JQISU li, suġġetti għal ċerti kondizzjonijiet, l-Istati għandhom ikunu jistgħu jipprovdu data personali u mhux personali sabiex itejbu l-iskambju ta’ informazzjoni bil-ħsieb tal-prevenzjoni ta’ reati kriminali u ż-żamma tal-ordni pubbliku u s-sigurtà b'rabta ma’ avvenimenti kbar b'dimensjoni transkonfinali,

FILWAQT LI JIRRIKONOXXU li minbarra t-titjib tal-iskambju ta’ informazzjoni, jeħtieġ li jiġu rregolati forom oħra ta’ koperazzjoni aktar mill-qrib bejn l-awtoritajiet tal-pulizija, b'mod partikolari permezz ta’ operazzjonijiet konġunti tas-sigurtà (p. eż. pattulji konġunti),

FILWAQT LI JQISU li koperazzjoni tal-pulizija u dik ġudizzjarja eqreb f'materji kriminali għandha timxi pass pass mar-rispett għad-drittijiet fundamentali, b'mod partikolari d-dritt għar-rispett tal-privatezza u għall-protezzjoni tad-data personali, li għandhom jiġu garantiti permezz ta’ arranġamenti speċjali għall-protezzjoni tad-data, li għandhom ikunu mfassla skont in-natura speċifika tal-forom differenti ta’ skambju ta’ data. Tali dispożizzjonijiet għall-protezzjoni tad-data għandhom jieħdu kont partikolari tan-natura speċifika tal-aċċesss transkonfinali online għall-bażi ta’ data. Peress li bl-aċċess online, mhuwiex possibbli għall-Istat li jkun qed jamministra l-fajl li jagħmel kontrolli minn qabel, għandha tiġi stabbilita sistema li tiżgura monitoraġġ ulterjuri,

FILWAQT LI JQISU li s-sistema “hit/no hit” (konkordanza - ebda konkordanza) tipprovdi struttura biex jitqabblu profili anonimi, fejn data personali addizzjonali tiġi skambjata biss wara konkordanza, il-provvista u r-riċeviment tad-data huma rregolati bil-liġi nazzjonali, inklużi r-regoli ta’ assistenza legali. Dan il-mekkaniżmu jiggarantixxi sistema adegwata ta’ protezzjoni tad-data, bl-intendiment li l-għoti ta’ data personali lil Stat ieħor jeħtieġ livell adegwat ta’ protezzjoni tad-data min-naħa tal-Istati riċeventi,

KONXJI TAL-iskambju komprensiv ta’ informazzjoni u data li jirriżulta minn koperazzjoni tal-pulizija u dik ġudizzjarja eqreb, dan il-Ftehim jimmira li jiggarantixxi livell adegwat ta’ protezzjoni tad-data. Huwa jirrispetta l-livell ta’ protezzjoni previst għall-ipproċessar tad-data personali fil-Konvenzjoni tal-Kunsill tal-Ewropa tat-28 ta’ Jannar 1981 għall-Protezzjoni tal-Individwi fir-rigward tal-Ipproċessar Awtomatiku tad-Data Personali, il-Protokoll Addizzjonali tat-8 ta’ Novembru 2001 għall-Konvenzjoni u l-prinċipji tar-Rakkomandazzjoni Nru R (87) 15 tal-Kunsill tal-Ewropa li Tirregola l-Użu ta’ Data Personali fis-Settur tal-Pulizija,

FILWAQT LI JIBBAŻAW RUĦHOM fuq il-fiduċja reċiproka tal-Istati Membri tal-Unjoni Ewropea u l-Islanda u n-Norveġja fl-istruttura u l-funzjonament tas-sistemi legali tagħhom,

FILWAQT LI JIRRIKONOXXU li d-dispożizzjonijiet ta’ kull ftehim bilaterali u multilaterali jibqgħu applikabbli għall-kwistjonijiet kollha koperti minn dan il-Ftehim,

IDDEĊIDEW LI JIKKONKLUDU DAN IL-FTEHIM:

Artikolu 1

Objettiv u fini

1.   Suġġett għad-dispożizzjonijiet ta’ dan il-Ftehim, il-kontenut tal-Artikoli 1-24, 25(1), 26-32 u 34 tad-Deċiżjoni tal-Kunsill 2008/615/ĠAI dwar it-titjib tal-koperazzjoni transkonfinali, b'mod partikolari fil-ġlieda kontra t-terroriżmu u l-kriminalità transkonfinali, għandu jkun applikabbli fir-relazzjonijiet bilaterali bejn l-Islanda jew in-Norveġja u kull wieħed mill-Istati Membri tal-Unjoni Ewropea u fir-relazzjonijiet bejn l-Islanda u n-Norveġja.

2.   Suġġett għad-dispożizzjonijiet ta’ dan il-Ftehim, il-kontenut tal-Artikoli 1-19 u 21 tad-Deċiżjoni tal-Kunsill 2008/616/ĠAI dwar l-implimentazzjoni tad-Deċiżjoni tal-Kunsill 2008/615/ĠAI dwar it-titjib tal-koperazzjoni transkonfinali, b'mod partikolari fil-ġlieda kontra t-terroriżmu u l-kriminalità transkonfinali, kif ukoll l-Anness tagħha minbarra l-punt 1 tal-Kapitolu 4 tagħha, għandhom ikunu applikabbli fir-relazzjonijiet imsemmijin fil-paragrafu 1.

3.   Id-dikjarazzjonijiet magħmulin mill-Istati Membri konformement mad-Deċiżjonijiet 2008/616/ĠAI u 2008/615/ĠAI għandhom ukoll ikunu applikabbli fir-relazzjonijiet tagħhom mal-Islanda u n-Norveġja.

Artikolu 2

Definizzjonijiet

Għall-finijiet ta’ dan il-Ftehim, għandhom japplikaw id-definizzjonijiet li ġejjin:

1.	“Partijiet Kontraenti” tfisser l-Unjoni Ewropea u l-Islanda u n-Norveġja.

2.	“Stat Membru” tfisser Stat Membru tal-Unjoni Ewropea.

3.	“Stat” tfisser Stat Membru, l-Islanda jew in-Norveġja.

Artikolu 3

Applikazzjoni u interpretazzjoni uniformi

1.   Sabiex jiksbu l-objettiv li jaslu għal applikazzjoni u interpretazzjoni kemm jista' jkun uniformi tad-dispożizzjonijiet imsemmijin fl-Artikolu 1, il-Partijiet Kontraenti għandhom jibqgħu jirrevedu b'mod kostanti l-iżvilupp tal-ġurisprudenza tal-Qorti tal-Ġustizzja tal-Unjoni Ewropea, kif ukoll l-iżvilupp tal-ġurisprudenza tal-qrati kompetenti tal-Islanda u tan-Norveġja fir-rigward ta’ tali dispożizzjonijiet. Għal dan l-għan għandu jiġi stabbilit mekkaniżmu li jiżgura l-iskambju reċiproku regolari ta’ tali ġurisprudenza.

2.   L-Islanda u n-Norveġja għandhom ikunu intitolati jippreżentaw noti jew osservazzjonijiet bil-miktub lill-Qorti tal-Ġustizzja f'każijiet fejn kwistjoni tkun ġiet irreferuta lilha minn qorti jew tribunal ta’ Stat Membru għal sentenza preliminari rigward l-interpretazzjoni ta’ xi dispożizzjoni msemmija fl-Artikolu 1.

Artikolu 4

Riżoluzzjoni ta’ disputi

Kwalunkwe disputa bejn l-Islanda jew in-Norveġja u Stat Membru rigward l-interpretazzjoni jew l-applikazzjoni ta’ dan il-Ftehim jew ta’ kwalunkwe waħda mid-dispożizzjonijiet imsemmijin fl-Artikolu 1 kif ukoll tal-emendi tagħhom tista' tiġi riferita minn Parti involuta fid-disputa għal laqgħa tar-rappreżentanti tal-gvernijiet tal-Istati Membri u tal-Islanda u n-Norveġja, bil-ħsieb li din tiġi riżolta rapidament.

Artikolu 5

Emendi

1.   Fejn ikun meħtieġ li jiġu emendati d-dispożizzjonijiet tad-Deċiżjoni 2008/615/ĠAI imsemmija fl-Artikolu 1(1), u/jew id-dispożizzjonijiet tad-Deċiżjoni 2008/616/ĠAI inkluż l-Anness tagħha, imsemmija fl-Artikolu 1(2), u fejn l-emenda tkun applikabbli għalihom, l-Unjoni Ewropea għandha tinforma mill-aktar fis possibbli lill-Islanda u lin-Norveġja u tilqa' kwalunkwe kumment eventwali tagħhom.

2.   L-Islanda u n-Norveġja għandhom jiġu notifikati bi kwalunkwe emenda tad-dispożizzjonijiet tad-Deċiżjoni 2008/615/ĠAI imsemmija fl-Artikolu 1(1), u bi kwalunkwe emenda tad-dispożizzjonijiet tad-Deċiżjoni 2008/616/ĠAI inkluż l-Anness tagħha, imsemmija fl-Artikolu 1(2), mid-depożitarju hekk kif tiġi adottata l-emenda.

L-Islanda u n-Norveġja għandhom jiddeċiedu indipendentement jekk jaċċettawx il-kontenut tal-emenda u jekk jimplimentawhiex fis-sistema ġuridika interna tagħhom. Dawn id-deċiżjonijiet għandhom jiġu notifikati lid-depożitarju fi żmien tliet xhur tan-notifika.

3.   Jekk il-kontenut tal-emenda ma jistax jorbot lill-Islanda jew lin-Norveġja għajr wara li jiġu sodisfatti esiġenzi kostituzzjonali, l-Islanda jew in-Norveġja għandha tinforma lid-depożitarju b'dan waqt in-notifika. L-Islanda u n-Norveġja għandhom jinformaw mingħajr dewmien u bil-miktub lid-depożitarju, u sa mhux aktar tard minn sitt xhur wara n-notifika, dwar is-sodisfazzjon tal-esiġenzi kostituzzjonali kollha. Mid-data ffissata għad-dħul fis-seħħ tal-emenda fir-rigward tal-Islanda u n-Norveġja u sa meta ssir in-notifika dwar is-sodisfazzjon tal-esiġenzi kostituzzjonali, l-Islanda u n-Norveġja għandhom japplikaw il-kontenut tal-att jew id-dispożizzjoni in kwistjoni, provviżorjament u safejn ikun possibbli.

4.   Jekk l-Islanda jew in-Norveġja, jew it-tnejn li huma, ma jaċċettawx l-emenda, dan il-Ftehim għandu jiġi sospiż mid-data prevista għall-implimentazzjoni tagħha mill-Istati Membri, għal perijodu ta’ sitt xhur fir-rigward tal-Istat jew Stati li ma aċċettawx l-emenda. Għandha tissejjaħ laqgħa tal-Partijiet Kontraenti sabiex tiġi eżaminata kull possibbiltà biex il-Ftehim ikun jista' jibqa' jiffunzjona, jekk meħtieġ billi tiġi kkunsidrata ekwivalenza tal-leġislazzjonijiet. Is-sospensjoni għandha tintemm hekk kif l-Istat jew l-Istati kkonċernati jinnotifikaw l-aċċettazzjoni tagħhom tal-emenda jew jekk il-Partijiet Kontraenti jiddeċiedu bejniethom li jerġgħu japplikaw dan il-Ftehim.

5.   Jekk, ladarba jkun skada l-perijodu ta’ sospensjoni ta’ sitt xhur, il-Partijiet Kontraenti ma jkunux aċċettaw li jerġgħu japplikawh, dan il-Ftehim għandu jieqaf milli japplika għall-Istat li ma jkunx aċċetta l-emenda.

6.   Il-paragrafi 4 u 5 ma japplikawx għall-emendi tal-Kapitoli 3, 4 u 5 tad-Deċiżjoni tal-Kunsill 2008/615/ĠAI jew tal-Artikolu 17 tad-Deċiżjoni 2008/616/ĠAI, li l-Islanda jew in-Norveġja jew it-tnejn li huma, ikunu indikaw lid-depożitarju li ma jistgħux jaċċetawhom u r-raġunijiet għal dan. F'dan il-każ, u mingħajr preġudizzju għall-Artikolu 10, il-kontenut tad-dispożizzjonijiet rilevanti fil-verżjoni tagħhom ta’ qabel ġew emendati, ikompli japplika bl-Istat jew l-Istati li jkunu pproċedew bl-emenda.

Artikolu 6

Reviżjoni

Il-Partijiet Kontraenti jaqblu li jwettqu reviżjoni komuni ta’ dan il-Ftehim sa mhux aktar tard minn ħames snin wara d-dħul fis-seħħ tiegħu. Ir-reviżjoni għandha tindirizza, b'mod partikolari, l-implimentazzjoni prattika, l-interpretazzjoni u l-iżvilupp tal-Ftehim u għandha tinkludi wkoll kwistjonijiet bħall-konsegwenzi tal-iżvilupp tal-Unjoni Ewropea rigward is-suġġett ta’ dan il-Ftehim.

Artikolu 7

Relazzjoni ma’ strumenti oħra

1.   L-Islanda u n-Norveġja jistgħu jkomplu japplikaw kull ftehim jew arranġamenti bilaterali jew multilaterali dwar koperazzjoni transkonfinali ma’ Stati Membri li jkunu fis-seħħ fid-data li fiha jiġi adottat dan il-Ftehim safejn tali ftehim jew dawn l-arranġamenti ma jkunux inkompatibbli mal-objettivi ta’ dan il-Ftehim. L-Islanda u n-Norveġja għandhom jinnotifikaw lid-depożitarju bi kwalunkwe tali ftehim jew arranġament li ser ikomplu japplikaw.

2.   L-Islanda u n-Norveġja jistgħu jikkonkludu jew idaħħlu fis-seħħ kull ftehim jew arranġamenti bilaterali jew multilaterali addizzjonali dwar koperazzjoni transkonfinali ma’ Stati Membri wara li jkun daħal fis-seħħ dan il-Ftehim safejn tali ftehim jew dawn l-arranġamenti jipprevedu l-estensjoni jew l-allargament tal-objettivi ta’ dan il-Ftehim. L-Islanda u n-Norveġja għandhom jinnotifikaw lid-depożitarju bi kwalunkwe ftehim jew arranġament ġdid fi żmien tliet xhur mill-iffirmar tiegħu jew, fil-każ ta’ strumenti li ġew iffirmati qabel id-dħul fis-seħħ tal-Ftehim, fi żmien tliet xhur mid-dħul fis-seħħ tagħhom.

3.   Kull ftehim jew l-arranġamenti msemmijin fil-paragrafi 1 u 2 ma jistgħux jinċidu fuq ir-relazzjonijiet ma’ Stati li mhumiex Parti għalihom.

4.   Dan il-Ftehim għandu jkun mingħajr preġudizzju għal kull ftehim eżistenti dwar l-assistenza legali jew ir-rikonoxximent reċiproku ta’ sentenzi tal-qrati.

Artikolu 8

Notifiki, dikjarazzjonijiet u dħul fis-seħħ

1.   Il-Partijiet Kontraenti għandhom jinnotifikaw lil xulxin bit-tlestija tal-proċeduri meħtieġa biex jesprimu l-kunsens tagħhom li jintrabtu b'dan il-Ftehim.

2.   L-Unjoni Ewropea tista' tagħti l-kunsens tagħha li tkun marbuta b'dan il-Ftehim anke jekk id-deċiżjonijiet previsti fl-Artikolu 25(2) tad-Deċiżjoni tal-Kunsill 2008/615/ĠAI ma jkunux għadhom ittieħdu mill-Istati Membri kollha li għalihom tapplika din id-dispożizzjoni.

3.   L-Artikolu 5(1) u (2) japplika provviżorjament mid-data tal-iffirmar ta’ dan il-Ftehim.

4.   Il-perijodu ta’ tliet xhur previst fl-aħħar sentenza tal-Artikolu 5(2) dwar emendi li jsiru wara l-iffirmar ta’ dan il-Ftehim iżda qabel id-dħul fis-seħħ tiegħu, jibda jgħodd mill-jum tad-dħul fis-seħħ ta’ dan il-Ftehim.

5.   Meta jagħtu n-notifika tagħhom skont il-paragrafu 1 jew, jekk hekk previst, fi kwalunkwe ħin ieħor, l-Islanda u n-Norveġja għandhom jagħmlu d-dikjarazzjonijiet previsti minn dan il-Ftehim.

6.   Dan il-Ftehim għandu jidħol fis-seħħ bejn l-Unjoni Ewropea u l-Islanda fl-ewwel jum tat-tielet xahar wara l-jum li fih is-Segretarju Ġenrali tal-Kunsill tal-Unjoni Ewropea jistabbilixxi li jkunu twettqu r-rekwiżiti formali kollha rigward l-espressjoni tal-kunsens mill-Unjoni Ewropea u l-Islanda, jew f'isimhom, li jintrabtu mill-Ftehim.

7.   Dan il-Ftehim għandu jidħol fis-seħħ bejn l-Unjoni Ewropea u n-Norveġja fl-ewwel jum tat-tielet xahar wara l-jum li fih is-Segretarju Ġenrali tal-Kunsill tal-Unjoni Ewropea jistabbilixxi li jkunu twettqu r-rekwiżiti formali kollha rigward l-espressjoni tal-kunsens mill-Unjoni Ewropea u n-Norveġja, jew f'isimhom, li jintrabtu mill-Ftehim.

8.   Mad-dħul fis-seħħ ta’ dan il-Ftehim fl-Unjoni Ewropea u l-Islanda u fl-Unjoni Ewropea u n-Norveġja, huwa jidħol ukoll fis-seħħ bejn l-Islanda u n-Norveġja.

9.   L-għoti ta’ data personali taħt dan il-Ftehim ma jistax iseħħ sakemm id-dispożizzjonijiet tal-Kapitolu 6 tad-Deċiżjoni 2008/615/ĠAI ma jiġux implimentati fil-liġijiet nazzjonali tal-Istati involuti f'tali għoti.

10.   Bil-ħsieb li jiġi vverifikat jekk dan hux il-każ tal-Islanda u n-Norveġja, għandha ssir żjara ta’ evalwazzjoni u jitwettqu serje ta’ testijiet f'konformità mal-kondizzjonijiet u l-arranġamenti maqbulin ma’ dawn l-Istati u li huma identiċi għal dawk li l-Istati Membri huma suġġetti għalihom bl-applikazzjoni tal-Kapitolu 4 tal-Anness għad-Deċiżjoni 2008/616/ĠAI.

Abbażi ta’ rapport ta’ evalwazzjoni globali, il-Kunsill, filwaqt li jaġixxi unanimament, għandu jiddetermina d-data/i minn meta l-Istati Membri jkunu jistgħu jibagħtu d-data personali tagħhom lill-Islanda u lin-Norveġja f'konformità ma’ dan il-Ftehim.

Artikolu 9

Adeżjoni

L-adeżjoni ta’ Stati Membri ġodda mal-Unjoni Ewropea għandha toħloq drittijiet u obbligi taħt dan il-Ftehim bejn dawk l-Istati Membri l-ġodda u l-Islanda u n-Norveġja.

Artikolu 10

Terminazzjoni

1.   Dan il-Ftehim jista' jiġi terminat fi kwalunkwe mument minn waħda mill-Partijiet Kontraenti. Fil-każ tat-tmiem mill-Islanda jew in-Norveġja, dan il-Ftehim għandu jibqa' fis-seħħ bejn l-Unjoni Ewropea u l-Istat li għalih ma jkunx ġie terminat. Fil-każ ta’ terminazzjoni mill-Unjoni Ewropea, il-Ftehim m'għandux jibqa' japplika.

2.   It-terminazzjoni ta’ dan il-Ftehim taħt il-paragrafu 1 għandha sseħħ b'effett sitt xhur wara li tkun ġiet ddepożitata n-notifika tat-terminazzjoni.

Artikolu 11

Depożitarju

1.   Is-Segretarjat Ġenerali tal-Kunsill tal-Unjoni Ewropea għandu jaġixxi bħala d-depożitarju ta’ dan il-Ftehim.

2.   Id-depożitarju għandu jippubblika l-informazzjoni dwar kwalunkwe notifika li ssir rigward dan il-Ftehim.

---

(1)  ĠU L 386, 29.12.2006, p. 89.