Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32019R2020

L-ekodisinn u t-tikkettar tal-enerġija — sorsi tad-dawl u tagħmir ta’ kontroll separat

Datatal-aħħarreviżjoni:
05/10/2021
Data tal-ħolqien inizjali:
18/01/2020
Awtur:
Uffiċċju tal-Pubblikazzjonijiet tal-Unjoni Ewropea
Entita(jiet) responsabbli:
Id-Direttorat Ġenerali għall-Enerġija

L-ekodisinn u t-tikkettar tal-enerġija — sorsi tad-dawl u tagħmir ta’ kontroll separat

 

SOMMARJU TA’:

Ir-Regolament (UE) 2019/2020 dwar ir-rekwiżiti tal-ekodisinn għas-sorsi tad-dawl u t-tagħmir ta’ kontroll separat

Ir-Regolament Delegat (UE) 2019/2015 dwar it-tikkettar tal-enerġija tas-sorsi tad-dawl

X’INHU L-GĦAN TAR-REGOLAMENTI?

  • Ir-Regolament (UE) 2019/2020 jistabbilixxi rekwiżiti tal-ekodisinn* għall-bejgħ jew għat-tħaddim tas-sorsi tad-dawl u tagħmir ta’ kontroll separat. Dan iħassar ir-Regolamenti (KE) Nru 244/2009, (KE) Nru 245/2009 u (UE) Nru 1194/2012.
  • Ir-Regolament Delegat (UE) 2019/2015 jistabbilixxi regoli dwar it-tikkettar tal-enerġija tas-sorsi tad-dawl. Dan jissupplimenta r-Regolament (UE) 2017/1369 dwar it-tikkettar tal-enerġija u jħassar ir-Regolament Delegat (UE) Nru 874/2012.

PUNTI EWLENIN

Sors tad-dawl huwa prodott li jaħdem bl-elettriku maħsub biex jemetti, jew li kapaċi jemetti, dawl bl-użu ta’ inkandexxenza, fluworexxenza, skariku ta’ intensità għolja jew dijodi li jemettu d-dawl inorganiċi jew organiċi u jinkludi ċerti sorsi tad-dawl tas-sodju bi pressjoni għolja.

Tagħmir ta’ kontroll huwa tagħmir li jaħdem mas-sorsi tad-dawl biex iħejji l-elettriku tal-mejnijiet għar-rekwiżit tal-elettriku tas-sors tad-dawl. Dan jista’ jinkludi t-trasformazzjoni tal-vultaġġ tal-provvista u tal-bidu, il-limitazzjoni tal-provvista tal-kurrent, il-prevenzjoni ta’ startjar kiesaħ, il-korrezzjoni tal-fattur ta’ potenza jew it-tnaqqis tal-interferenza tar-radju. Ma jinkludix il-provvisti tal-enerġija.

Ir-Regolament (UE) 2019/2020:

  • fl-Anness II jistipula d-data (l-1 ta’ Settembru 2021) meta jidħlu fis-seħħ ir-rekwiżiti tal-ekodisinn, li jkopru
    • l-effiċjenza fl-enerġija
    • informazzjoni dwar ir-rekwiżiti funzjonali
    • u t-tikkettar għall-professjonisti u għall-utenti finali;
  • jistabbilixxi eżenzjonijiet fl-Anness III għas-sorsi tad-dawl jew it-tagħmir ta’ kontroll maħsuba biex jitħaddmu
    • f’atmosferi potenzjalment splussivi
    • għall-użu f’każ ta’ emerġenza
    • f’installazzjonijiet ta’ mediċina radjoloġika u nukleari
    • fi jew fuq stabbilimenti militari jew tad-difiża ċivili, it-tagħmir, il-vetturi tal-art, it-tagħmir tal-baħar jew l-inġenji tal-ajru
    • fi jew fuq vetturi bil-mutur, il-karrijiet u s-sistemi tagħhom, it-tagħmir irmunkat, il-komponenti u unitajiet tekniċi separati
    • fi jew fuq makkinarju mobbli mhux tat-triq
    • fi jew fuq ċertu tagħmir maħsub li jiġi rmunkat
    • fi jew fuq inġenji tal-ajru tal-avjazzjoni ċivili
    • fid-dawl tal-vetturi ferrovjarji
    • fit-tagħmir tal-baħar
    • fl-apparat mediku;
  • jistabbilixxi eżenzjonijiet addizzjonali, bħal
    • displejs elettroniċi (eż. televiżjonijiet, moniters tal-kompjuter, notebooks, tablets, mowbajls u consoles tal-logħob)
    • sorsi tad-dawl u tagħmir ta’ kontroll separat fi prodotti li jaħdmu bil-batteriji, inklużi torċi, mowbajls b’dawl tat-torċa integrat, ġugarelli li jinkludu sorsi tad-dawl u lampi tal-iskrivanija li jaħdmu biss bil-batteriji
    • sorsi tad-dawl għall-ispettroskopija u applikazzjonijiet fotometriċi
    • sorsi tad-dawl u tagħmir ta’ kontroll separat fuq roti u vetturi oħrajn mhux bil-mutur
    • ċerti sorsi tad-dawl oħrajn elenkati fl-Anness III, li jridu jissodisfaw biss ir-rekwiżiti ta’ informazzjoni fir-regolament.

L-awtoritajiet nazzjonali għandhom japplikaw il-proċeduri ta’ verifika stabbiliti fl-Anness IV meta jwettqu l-verifiki tas-sorveljanza tas-suq.

Il-mudelli ta’ sorsi tad-dawl ta’ dijodi li jemettu d-dawl inorganiċi u organiċi għandu jsirilhom ittestjar tar-reżistenza biex jiġu vverifikati l-manutenzjoni tal-lumen u l-fattur ta’ sopravivenza tagħhom.

L-Anness VI jistabbilixxi parametri referenzjarji indikattivi għall-aspetti ambjentali meqjusa bħala sinifikanti u kwantifikabbli, abbażi tal-aħjar teknoloġija disponibbli.

Il-Kummissjoni Ewropea għandha tirrieżamina r-regolament fid-dawl tal-progress teknoloġiku u tivvaluta numru ta’ aspetti 5 snin wara d-dħul fis-seħħ tiegħu.

Skont ir-Regolament Delegat (UE) 2019/2015:

  • Il-fornituri ta’ sorsi tad-dawl għandhom jiżguraw li:
    • kull sors ta’ dawl ikollu tikketta stampata fuq l-imballaġġ, fil-format stabbilit fl-Anness III;
    • il-parametri tal-iskeda tal-informazzjoni tal-prodott u l-kontenut tad-dokumentazzjoni teknika, kif stabbilit fl-Annessi V u VI, jiddaħħlu fl-bażi tad-data tal-prodotti;
    • fuq talba minn negozjanti, l-iskedi tal-informazzjoni tal-prodott jitqiegħdu għad-dispożizzjoni f’għamla stampata;
    • reklamar viżwali u kwalunkwe materjal promozzjonali tekniku, inkluż materjal promozzjonali tekniku fuq l-internet, jinkludi l-klassi tal-effiċjenza enerġetika tal-mudell tas-sors ta’ dawl u l-firxa ta’ klassijiet ta’ effiċjenza enerġetika disponibbli fuq it-tikketta, skont l-Anness VII u l-Anness VIII;
    • tikketta elettronika fil-format u li tinkludi l-informazzjoni, kif stabbilit fl-Anness III, titqiegħed għad-dispożizzjoni tan-negozjanti għal kull mudell ta’ sors ta’ dawl;
    • skeda tal-informazzjoni tal-prodott elettroniku, kif stabbilit fl-Anness V, titqiegħed għad-dispożizzjoni tan-negozjanti għal kull mudell ta’ sors ta’ dawl;
    • fuq talba minn negozjanti, huma pprovduti tikketti tal-prodott riklassifikati* stampati bħala stiker tal-istess daqs bħal dik li diġà teżisti.
  • In-negozjanti għandhom jiżguraw li:
    • fil-punt tal-bejgħ, kull sors ta’ dawl ikollu t-tikketta tal-klassi tal-enerġija f’post li tidher b’mod ċar ipprovduta mill-fornituri;
    • fil-każ ta’ bejgħ mill-bogħod, huma pprovduti t-tikketta u l-iskeda tal-informazzjoni tal-prodott;
    • kwalunkwe reklamar viżwali jew materjal promozzjonali tekniku, inkluż l-internet, jinkludi l-klassi tal-effiċjenza enerġetika tal-mudell tas-sors ta’ dawl u l-firxa ta’ klassijiet ta’ effiċjenza enerġetika disponibbli fuq it-tikketta;
    • it-tikketti eżistenti fuq is-sorsi tad-dawl fil-punti tal-bejgħ huma koperti mit-tikketti riklassifikati, mhux aktar tard minn 18-il xahar wara d-data tal-applikazzjoni tar-regolament.
  • Meta fornitur ta’ servizzi ta’ hosting tal-internet jippermetti l-bejgħ ta’ sorsi tad-dawl mis-sit tal-internet tiegħu, il-fornitur ta’ servizzi għandu jippermetti l-wiri tat-tikketta elettronika u l-iskeda elettronika tal-informazzjoni tal-prodott ipprovduta min-negozjant u għandu jinforma lin-negozjant dwar l-obbligu li jurihom.
  • Ir-Regolament Delegat (UE) 2021/340 jemenda r-Regolament Delegat (UE) 2019/2015 billi:
    • jissostitwixxi d-definizzjoni ta’ prodott kontenenti*;
    • jeħtieġ li l-valuri tal-parametri inklużi fl-iskeda ta’ informazzjoni dwar il-prodott, kif stabbilit fl-Anness V tar-Regolament (UE) 2019/2015, jiddaħħlu fil-parti pubblika tal-bażi tad-data dwar il-prodotti (tapplika mill-1 ta’ Marzu 2022);
    • jippermetti lin-negozjanti, fuq talba, jużaw tikketti stampati għal riklassifikazzjoni ta’ prodotti fil-forma ta’ stiker, tal-istess daqs bħal dik li diġà teżisti;
    • jippermetti lill-fornituri, meta jqiegħdu sors tad-dawl fis-suq, biex jipprovduh bit-tikketta eżistenti sal-31 ta’ Awwissu 2021 u bit-tikketta riklassifikata mill-1 ta’ Settembru 2021 — Il-fornitur jista’ jagħżel li diġà jipprovdi sorsi tad-dawl imqiegħda fis-suq matul il-perjodu mill-1 ta’ Lulju sal-31 ta’ Awwissu 2021 bit-tikketta riklassifikata, jekk ma jkun tqiegħed fis-suq l-ebda sors tad-dawl li jappartjeni għall-istess mudell jew mudelli ekwivalenti qabel l-1 ta’ Lulju 2021: f’dak il-każ, in-negozjant ma għandux joffri dawk is-sorsi tad-dawl għall-bejgħ qabel l-1 ta’ Settembru 2021;
    • jippermetti li t-tikketti eżistenti fuq is-sorsi tad-dawl fil-punti tal-bejgħ jiġu sostitwiti bit-tikketti riklassifikati b’tali mod li jkopru t-tikketta eżistenti, inkluż meta jiġu stampati fuq jew mehmuża mal-pakkett, fi żmien 18-il xahar wara d-data tal-applikazzjoni tar-Regolament (UE) 2019/2015, u t-tikketti riklassifikati ma jintwerewx qabel dik id-data.

MINN META JAPPLIKAW IR-REGOLAMENTI?

It-tnejn ilhom applikaw mill-1 ta’ Settembru 2021.

SFOND

TERMINI EWLENIN

Ekodisinn: politika biex ittejjeb, permezz ta’ disinn aħjar, il-prestazzjoni ambjentali tal-prodotti matul iċ-ċiklu tal-ħajja tagħhom, speċjalment l-effiċjenza fl-enerġija tagħhom.
Tikketti tal-prodotti riklassifikati: tikketti tal-effiċjenza fl-enerġija li ġew riklassifikati, sabiex il-prodotti li qabel kienu jvarjaw minn “A+++” sa “G” ġew sostitwiti b’“A” sa “G” biex jibbilanċjaw in-numru għoli tal-klassijiet l-aktar effiċjenti fl-enerġija.
Prodott kontenenti: prodott li fih sors tad-dawl wieħed jew aktar, tagħmir ta’ kontroll separat jew it-tnejn. Eżempji ta’ prodotti kontenenti huma luminarji li jistgħu jiżżarmaw biex tkun tista’ ssir il-verifika separata tas-sors(i) tad-dawl li jkun fihom, apparat domestiku li jkun fih sors(i) tad-dawl, għamara (xkafef, mirja, vetrini) li fiha sors(i) tad-dawl. Jekk prodott kontenenti ma jkunx jista’ jiżżarma għall-verifika tas-sors tad-dawl u tat-tagħmir ta’ kontroll separat, il-prodott kontenenti kollu għandu jitqies bħala sors tad-dawl.

DOKUMENTI EWLENIN

Ir-Regolament tal-Kummissjoni (UE) 2019/2020 tal-1 ta’ Ottubru 2019 li jistabbilixxi r-rekwiżiti tal-ekodisinn għas-sorsi tad-dawl u t-tagħmir ta’ kontroll separat skont id-Direttiva 2009/125/KE tal-Parlament Ewropew u tal-Kunsill u li jħassar ir-Regolamenti tal-Kummissjoni (KE) Nru 244/2009, (KE) Nru 245/2009 u (UE) Nru 1194/2012 (ĠU L 315, 5.12.2019, pp. 209-240)

L-emendi suċċessivi għar-Regolament (UE) 2019/2020 ġew inkorporati fit-test oriġinali. Din il-verżjoni konsolidata għandha biss valur dokumentarju.

Ir-Regolament Delegat tal-Kummissjoni (UE) 2019/2015 tal-11 ta’ Marzu 2019 li jissupplimenta r-Regolament (UE) 2017/1369 tal-Parlament Ewropew u tal-Kunsill fir-rigward tat-tikkettar tal-enerġija tas-sorsi tad-dawl u li jħassar ir-Regolament Delegat tal-Kummissjoni (UE) Nru 874/2012 (ĠU L 315, 5.12.2019, pp. 68-101)

Ara l-verżjoni konsolidata.

DOKUMENTI RELATATI

Ir-Regolament (UE) 2017/1369 tal-Parlament Ewropew u tal-Kunsill tal-4 ta’ Lulju 2017 għall-iffissar ta’ qafas għat-tikkettar tal-enerġija u li jirrevoka d-Direttiva 2010/30/UE (ĠU L 198, 28.7.2017, pp. 1-23)

Ara l-verżjoni konsolidata.

Id-Direttiva 2009/125/KE tal-Parlament Ewropew u tal-Kunsill tal-21 ta’ Ottubru 2009 li tistabbilixxi qafas għall-iffissar ta’ rekwiżiti għall-ekodisinn għal prodotti relatati mal-enerġija (ĠU L 285, 31.10.2009, pp. 10-35)

Ara l-verżjoni konsolidata.

l-aħħar aġġornament 05.10.2021

Fuq