This document is an excerpt from the EUR-Lex website
Document 32024D0990
Council Decision (EU) 2024/990 of 20 March 2024 on the position to be taken on behalf of the European Union within the International Maritime Organization during the 81st session of the Marine Environment Protection Committee and the 108th session of the Maritime Safety Committee on the adoption of amendments to the International Convention for the Prevention of Pollution from Ships (MARPOL), to the International Convention for the Safety of Life at Sea (SOLAS), to the International Code of Safety for Ships Using Gases or other Low-flashpoint Fuels (IGF Code), to the International Code of the Enhanced Programme of Inspections during Surveys of Bulk Carriers and Oil Tankers, 2011 (2011 ESP Code), to the International Life-Saving Appliance (LSA) Code, to the International Code for Fire Safety Systems (FSS Code) and to the Seafarers’ Training, Certification and Watchkeeping (STCW) Code
Deċiżjoni tal-Kunsill (UE) 2024/990 tal-20 ta’ Marzu 2024 dwar il-pożizzjoni li għandha tittieħed f’isem l-Unjoni Ewropea fl-Organizzazzjoni Marittima Internazzjonali matul il-81 sessjoni tal-Kumitat tal-Protezzjoni tal-Ambjent tal-Baħar u l-108 sessjoni tal-Kumitat tas-Sikurezza Marittima dwar l-adozzjoni ta’ emendi għall-Konvenzjoni Internazzjonali għall-Prevenzjoni tat-Tniġġis mill-Vapuri (MARPOL), għall-Konvenzjoni Internazzjonali għas-Salvagwardja tal-Ħajja Umana fuq il-Baħar (SOLAS), għall-Kodiċi Internazzjonali tas-Sikurezza għall-Vapuri li jużaw Gassijiet jew Karburanti b’Punt ta’ Fjammabilità Baxx (il-Kodiċi IGF), għall-Kodiċi Internazzjonali dwar il-Programm Imtejjeb ta’ Spezzjonijiet waqt il-Kontrolli ta’ Bastimenti ta’ Tagħbija bl-Ingrossa u Tankers taż-Żejt, 2011 (il-Kodiċi ESP tal-2011), għall-Kodiċi Internazzjonali tal-Apparat għas-Salvataġġ tal-Ħajja (LSA), għall-Kodiċi Internazzjonali għas-Sistemi tas-Sikurezza kontra n-Nirien (il-Kodiċi FSS) u għall-Kodiċi tat-Taħriġ, Ċertifikazzjoni u Għassa tal-Baħħara (STCW)
Deċiżjoni tal-Kunsill (UE) 2024/990 tal-20 ta’ Marzu 2024 dwar il-pożizzjoni li għandha tittieħed f’isem l-Unjoni Ewropea fl-Organizzazzjoni Marittima Internazzjonali matul il-81 sessjoni tal-Kumitat tal-Protezzjoni tal-Ambjent tal-Baħar u l-108 sessjoni tal-Kumitat tas-Sikurezza Marittima dwar l-adozzjoni ta’ emendi għall-Konvenzjoni Internazzjonali għall-Prevenzjoni tat-Tniġġis mill-Vapuri (MARPOL), għall-Konvenzjoni Internazzjonali għas-Salvagwardja tal-Ħajja Umana fuq il-Baħar (SOLAS), għall-Kodiċi Internazzjonali tas-Sikurezza għall-Vapuri li jużaw Gassijiet jew Karburanti b’Punt ta’ Fjammabilità Baxx (il-Kodiċi IGF), għall-Kodiċi Internazzjonali dwar il-Programm Imtejjeb ta’ Spezzjonijiet waqt il-Kontrolli ta’ Bastimenti ta’ Tagħbija bl-Ingrossa u Tankers taż-Żejt, 2011 (il-Kodiċi ESP tal-2011), għall-Kodiċi Internazzjonali tal-Apparat għas-Salvataġġ tal-Ħajja (LSA), għall-Kodiċi Internazzjonali għas-Sistemi tas-Sikurezza kontra n-Nirien (il-Kodiċi FSS) u għall-Kodiċi tat-Taħriġ, Ċertifikazzjoni u Għassa tal-Baħħara (STCW)
ST/7326/2024/INIT
ĠU L, 2024/990, 26.3.2024, ELI: http://data.europa.eu/eli/dec/2024/990/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
Il-Ġurnal Uffiċjali |
MT Serje L |
2024/990 |
26.3.2024 |
DEĊIŻJONI TAL-KUNSILL (UE) 2024/990
tal-20 ta’ Marzu 2024
dwar il-pożizzjoni li għandha tittieħed f’isem l-Unjoni Ewropea fl-Organizzazzjoni Marittima Internazzjonali matul il-81 sessjoni tal-Kumitat tal-Protezzjoni tal-Ambjent tal-Baħar u l-108 sessjoni tal-Kumitat tas-Sikurezza Marittima dwar l-adozzjoni ta’ emendi għall-Konvenzjoni Internazzjonali għall-Prevenzjoni tat-Tniġġis mill-Vapuri (MARPOL), għall-Konvenzjoni Internazzjonali għas-Salvagwardja tal-Ħajja Umana fuq il-Baħar (SOLAS), għall-Kodiċi Internazzjonali tas-Sikurezza għall-Vapuri li jużaw Gassijiet jew Karburanti b’Punt ta’ Fjammabilità Baxx (il-Kodiċi IGF), għall-Kodiċi Internazzjonali dwar il-Programm Imtejjeb ta’ Spezzjonijiet waqt il-Kontrolli ta’ Bastimenti ta’ Tagħbija bl-Ingrossa u Tankers taż-Żejt, 2011 (il-Kodiċi ESP tal-2011), għall-Kodiċi Internazzjonali tal-Apparat għas-Salvataġġ tal-Ħajja (LSA), għall-Kodiċi Internazzjonali għas-Sistemi tas-Sikurezza kontra n-Nirien (il-Kodiċi FSS) u għall-Kodiċi tat-Taħriġ, Ċertifikazzjoni u Għassa tal-Baħħara (STCW)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 100(2), flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1) |
Jenħtieġ li l-għan tal-azzjoni tal-Unjoni fis-settur tat-trasport marittimu jkun li tipproteġi l-ambjent tal-baħar u saħħet il-bniedem u li ttejjeb is-sikurezza marittima. |
(2) |
Il-Kumitat tal-Protezzjoni tal-Ambjent tal-Baħar tal-Organizzazzjoni Marittima Internazzjonali (OMI) huwa mistenni li jadotta, matul il-81 sessjoni tiegħu mit-18 ta’ Marzu sat-22 ta’ Marzu 2024 (“MEPC 81”), emendi għall-Artikolu V tal-Protokoll I tal-Konvenzjoni Internazzjonali għall-Prevenzjoni tat-Tniġġis mill-Vapuri (MARPOL) u għall-Anness VI tal-MARPOL dwar fjuwils b’punt ta’ fjammabilità baxx u kwistjonijiet oħra relatati maż-żejt tal-fjuwil, dwar l-aċċessibbiltà tad-data fil-Bażi tad-Data tal-OMI dwar il-Konsum tal-Fjuwil mill-Bastimenti (DCS tal-OMI), u dwar l-inklużjoni ta’ data dwar ix-xogħol tat-trasport, u dwar livell imtejjeb ta’ granularità fid-DCS tal-OMI. |
(3) |
Il-Kumitat tas-Sikurezza Marittima tal-OMI huwa mistenni li jadotta, matul il-108 sessjoni tiegħu mill-15 ta’ Mejju sal-24 ta’ Mejju 2024 (“MSC 108”), emendi għall-Kapitoli II-1, II-2 u V tal-Konvenzjoni Internazzjonali għas-Salvagwardja tal-Ħajja Umana fuq il-Baħar (SOLAS), 1974, għall-Kodiċi Internazzjonali tas-Sikurezza għall-Vapuri li jużaw Gassijiet jew Karburanti b’Punt ta’ Fjammabilità Baxx (il-“Kodiċi IGF”), għall-Kodiċi Internazzjonali dwar il-Programm Imtejjeb ta’ Spezzjonijiet waqt il-Kontrolli ta’ Bastimenti ta’ Tagħbija bl-Ingrossa u Tankers taż-Żejt, 2011 (il-“Kodiċi ESP tal-2011”), għall-Kodiċi Internazzjonali tal-Apparat għas-Salvataġġ tal-Ħajja (LSA)(il-“Kodiċi LSA”), għall-Kodiċi Internazzjonali għas-Sistemi tas-Sikurezza kontra n-Nirien (il-“Kodiċi FSS”), u għat-taqsima A-VI/1 tal-Kodiċi tat-Taħriġ, Ċertifikazzjoni u Għassa tal-Baħħara (il-“Kodiċi STCW”). |
(4) |
Huwa xieraq li tiġi stabbilita l-pożizzjoni li għandha tittieħed f’isem l-Unjoni matul l-MEPC 81, billi l-atti previsti jistgħu jinfluwenzaw b’mod deċiżiv il-kontenut tal-liġijiet tal-Unjoni, b’mod partikolari r-Regolamenti (UE) 2015/757 (1) u (UE) 2023/1805 (2) tal-Parlament Ewropew u tal-Kunsill, id-Direttivi 2002/59/KE (3), 2003/87/KE (4), 2009/16/KE (5), 2009/18/KE (6) u (UE) 2016/802 tal-Parlament Ewropew u tal-Kunsill (7), u d-Deċiżjoni (UE) 2015/1814 tal-Parlament Ewropew u tal-Kunsill (8). |
(5) |
Jenħtieġ li l-Unjoni tappoġġa l-emendi għall-Artikolu V tal-Protokoll I tal-MARPOL, peress illi huwa importanti li tiġi stabbilita sistema unika ta’ rapportar għat-telf tal-kontejners fuq il-baħar, sabiex jiġu evitati rekwiżiti ta’ sottomissjoni duplikati u biex tiġi evitata l-konfużjoni, li tgħin biex titnaqqas il-probabbiltà li t-telf ta’ kontejners ma jiġix irrappurtat. |
(6) |
L-Unjoni jenħtieġ li tappoġġa l-emendi tal-Anness VI tal-MARPOL dwar fjuwils b’punt ta’ fjammabilità baxx u kwistjonijiet oħra relatati maż-żejt tal-fjuwil, minħabba li dawk l-emendi ser isolvu r-rekwiżit għall-ittestjar u jinkludu informazzjoni dwar il-punt ta’ fjammabilità fin-nota ta’ kunsinna tal-bunker għal fjuwils b’punt baxx ta’ fjammabilità, li kien inkonsistenti mal-emendi reċenti għall-Kapitolu II-2 ta’ SOLAS adottati fil-106 sessjoni tal-Kumitat tas-Sigurtà Marittima. L-Unjoni jenħtieġ li tappoġġa wkoll l-emendi għall-Anness VI tal-MARPOL dwar l-aċċessibbiltà tad-data fil-Bażi tad-Data tad-DCS tal-OMI, u dwar l-inklużjoni ta’ data dwar ix-xogħol tat-trasport, u dwar livell imtejjeb ta’ granularità, fid-DCS tal-OMI, billi dawk l-emendi ser jottimizzaw l-użu tad-DCS tal-OMI għall-benefiċċju tat-tfassil tal-politika dwar id-dekarbonizzazzjoni tat-tbaħħir, u huma kompromess bejn aċċess usa’ għad-data tad-DCS tal-OMI u l-kontroll tagħha mis-Segretarjat tal-OMI. Minn naħa waħda, dawk l-emendi ser jagħtu lill-impriżi ta’ konsulenza analitiċi u lill-entitajiet ta’ riċerka aċċess għad-data tad-DCS tal-OMI soġġett għall-approvazzjoni tas-Segretarjat tal-OMI u, min-naħa l-oħra, dawn ser jipprovdu l-possibbiltà għal kwalunkwe kumpanija li tiżvela d-data tad-DCS tal-OMI tal-bastimenti tagħha lill-pubbliku ġenerali fuq bażi volontarja. |
(7) |
Huwa xieraq li tiġi stabbilita l-pożizzjoni li għandha tittieħed f’isem l-Unjoni matul l-MSC 108, peress li l-atti previsti jistgħu jinfluwenzaw b’mod deċiżiv il-kontenut tal-liġijiet tal-Unjoni, jiġifieri r-Regolament (UE) Nru 530/2012 tal-Parlament Ewropew u tal-Kunsill (9), id-Direttivi 2002/59/KE u 2009/18/KE, u d-Direttivi 2009/45/KE (10), 2014/90/UE (11) u (UE) 2022/993 (12) tal-Parlament Ewropew u tal-Kunsill. |
(8) |
Jenħtieġ li l-Unjoni tappoġġa l-emendi tal-Kapitoli II-1, II-2 u V tas-SOLAS, minħabba li dawk l-emendi ser iżidu b’mod sostanzjali s-sikurezza, filwaqt li jiżguraw li l-bastimenti l-ġodda kollha minbarra t-tankers, inklużi l-vapuri tal-passiġġieri, ta’ 20 000 tunnellaġġ gross u aktar għandhom tagħmir xieraq għall-irmunkar f’każ ta’ emerġenza, kif ukoll għat-titjib b’mod ġenerali tal-istandards tas-sikurezza kontra n-nirien tal-vapuri tal-passiġġieri, inklużi l-vapuri tal-passiġġieri roll-on/roll-off, u s-sikurezza tal-użu tal-fjuwil taż-żejt fil-vapuri tal-passiġġieri. Dawk l-emendi ser jissimplifikaw ukoll l-ipproċessar tar-rapporti dwar it-telf tal-kontejners sabiex jikkonformaw mal-obbligi regolatorji, jipprevedu rekwiżit ta’ rapportar mill-Istat tal-bandiera lill-OMI, iżidu s-sikurezza tan-navigazzjoni u jipprevjenu t-tniġġis. |
(9) |
Jenħtieġ li l-Unjoni tappoġġa l-emendi għall-Kodiċi IGF minħabba li ser itejbu s-sikurezza tal-bastimenti, inklużi l-vapuri tal-passiġġieri, permezz tal-gass naturali bħala fjuwil. |
(10) |
Jenħtieġ li l-Unjoni tappoġġa l-emendi għall-Kodiċi ESP tal-2011 minħabba li ser jimmodifikaw il-Proċeduri għall-approvazzjoni u ċ-ċertifikazzjoni ta’ ditta involuta fil-kejl tal-ħxuna tal-istrutturi tal-buq kif previst fl-annessi tal-emendi tal-2019 għall-Kodiċi ESP tal-2011, b’referenza għall-amministrazzjoni aktar milli b’referenza għal organizzazzjoni rikonoxxuta mill-amministrazzjoni. Dan ser jgħin biex tiġi ċċarata l-proċedura. |
(11) |
Jenħtieġ li l-Unjoni tappoġġa l-emendi għall-Kodiċi LSA, minħabba li dawn ser jippromwovu s-sikurezza marittima billi jirrevedu t-tnaqqis tal-veloċità tal-opri tal-baħar tas-sopravivenza u d-dgħajjes tas-salvataġġ għall-vapuri tal-passiġġieri, billi jiżguraw prestazzjoni xierqa fl-ilma tal-ġkieket tas-salvataġġ għas-sikurezza tal-baħħara, u billi jżidu l-istandards ta’ sikurezza tas-sistemi uniċi ta’ rilaxx u ta’ rbit b’ganċijiet tar-rilaxx fi stat ta’ tagħbija billi jneħħu l-eżenzjonijiet previsti fil-paragrafu 4.4.7.6.17 tal-Kodiċi LSA. |
(12) |
Jenħtieġ li l-Unjoni tappoġġa l-emendi għall-Kodiċi FSS, minħabba li ser jippreżentaw benefiċċji sinifikanti għas-sikurezza tal-ħajja fuq il-baħar billi jsaħħu s-sikurezza kontra n-nirien tal-vapuri tal-passiġġieri, u b’mod partikolari tal-vapuri tal-passiġġieri roll-on/roll-off. |
(13) |
Jenħtieġ li l-Unjoni tappoġġa l-emendi għat-Taqsima A-VI/1 tal-Kodiċi STCW, minħabba li dawn ser jiżguraw post tax-xogħol sikur għall-baħħara billi jinkludu, fit-Taqsima A-VI/1 dwar Rekwiżiti minimi obbligatorji għall-familjarizzazzjoni mas-sikurezza, taħriġ u struzzjoni bażiċi għall-baħħara kollha, kompetenza ġdida biex “Jingħata kontribut għall-prevenzjoni tal-bullying u tal-fastidju, u r-rispons għalihom, inklużi l-attakk sesswali u l-fastidju sesswali”. |
(14) |
L-Unjoni la hija Membru tal-OMI, u lanqas parti kontraenti għall-konvenzjonijiet u l-kodiċijiet rilevanti. Għaldaqstant, jenħtieġ li l-Kunsill jawtorizza lill-Istati Membri jesprimu l-pożizzjoni tal-Unjoni fl-MEPC 81 u fl-MSC 108. |
(15) |
Jenħtieġ li l-kamp ta’ applikazzjoni ta’ din id-Deċiżjoni jkun limitat għall-kontenut tal-emendi proposti, sa fejn ikunu jistgħu jaffettwaw regoli komuni tal-Unjoni u jaqgħu fil-kompetenza esklużiva tal-Unjoni. Jenħtieġ li din id-Deċiżjoni ma taffettwax id-diviżjoni tal-kompetenzi bejn l-Unjoni u l-Istati Membri, |
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni fil-81 sessjoni tal-Kumitat tal-Protezzjoni tal-Ambjent tal-Baħar tal-Organizzazzjoni Marittima Internazzjonali (OMI) għandha tkun li taqbel mal-adozzjoni tal-emendi:
(a) |
għall-Artikolu V tal-Protokoll I tal-Konvenzjoni Internazzjonali għall-Prevenzjoni tat-Tniġġis mill-Vapuri (MARPOL), kif stabbilit fl-Anness tad-dokument MEPC 81/3/1 tal-OMI; u |
(b) |
għall-Anness VI tal-MARPOL dwar il-fjuwils b’punt ta’ fjammabilità baxx u kwistjonijiet oħra relatati maż-żejt tal-fjuwil, dwar l-aċċessibbiltà tad-data fil-Bażi tad-Data tal-OMI dwar il-Konsum tal-Fjuwil mill-Bastimenti (DCS tal-OMI), u dwar l-inklużjoni ta’ data dwar ix-xogħol tat-trasport u dwar livell imtejjeb ta’ granularità fid-DCS tal-OMI, fir-rigward tar-Regolamenti 2, 14, 18 u 27, u l-Appendiċi I u IX, kif stabbilit fl-Anness tad-dokument MEPC 81/3/2 tal-OMI. |
Artikolu 2
Il-pożizzjoni li għandha tittieħed f’isem l-Unjoni fil-108 sessjoni tal-Kumitat tas-Sikurezza Marittima tal-OMI għandha tkun li taqbel mal-adozzjoni tal-emendi:
(a) |
għall-kapitoli II-1, II-2 u V tal-Konvenzjoni Internazzjonali għas-Salvagwardja tal-Ħajja Umana fuq il-Baħar (SOLAS), 1974, kif stabbilit fl-Annessi 1 u 2 tad-dokument MSC 108/3 tal-OMI; |
(b) |
għall-Kodiċi Internazzjonali tas-Sikurezza għall-Vapuri li jużaw Gassijiet jew Karburanti b’Punt ta’ Fjammabilità Baxx (il-Kodiċi IGF), kif stabbilit fl-Anness 3 tad-Dokument MSC 108/3 tal-OMI; |
(c) |
għall-Kodiċi Internazzjonali dwar il-Programm Imtejjeb ta’ Spezzjonijiet waqt il-Kontrolli ta’ Bastimenti ta’ Tagħbija bl-Ingrossa u Tankers taż-Żejt, 2011 (il-Kodiċi ESP tal-2011), kif stabbilit fl-Anness 5 tad-dokument MSC 108/3 tal-OMI; |
(d) |
għall-Kodiċi Internazzjonali tal-Apparat għas-Salvataġġ tal-Ħajja (LSA), kif stabbilit fl-Anness 6 tad-dokument MSC 108/3 tal-OMI; |
(e) |
għall-Kodiċi Internazzjonali għas-Sistemi tas-Sikurezza kontra n-Nirien (il-Kodiċi FSS) kif stabbilit fl-Anness 7 tad-dokument MSC 108/3 tal-OMI; u, |
(f) |
għat-taqsima A-VI/1 tal-Kodiċi tat-Taħriġ, Ċertifikazzjoni u Għassa tal-Baħħara (STCW) kif stabbilit fl-Anness tad-dokument MSC 108/3/2 tal-OMI. |
Artikolu 3
1. Il-pożizzjonijiet li għandhom jittieħdu f’isem l-Unjoni kif stabbilit fl-Artikoli 1 u 2 ikopru l-emendi kkonċernati sa fejn dawk l-emendi jaqgħu fil-kompetenza esklużiva tal-Unjoni u sa fejn kapaċi jaffettwaw ir-regoli komuni tal-Unjoni. Dawn għandhom jiġu espressi mill-Istati Membri, li huma lkoll membri tal-OMI, filwaqt li jaġixxu b’mod konġunt fl-interess tal-Unjoni.
2. Jista’ jintlaħaq qbil dwar bidliet minuri fil-pożizzjonijiet stabbiliti fl-Artikoli 1 u 2 mingħajr ma tittieħed deċiżjoni ulterjuri min-naħa tal-Kunsill.
Artikolu 4
L-Istati Membri huma b’dan awtorizzati li jagħtu l-kunsens tagħhom li jintrabtu, fl-interess tal-Unjoni, bl-emendi msemmija fl-Artikoli 1 u 2, sa fejn dawk l-emendi jaqgħu fil-kompetenza esklużiva tal-Unjoni.
Artikolu 5
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell, l-20 ta’ Marzu 2024.
Għall-Kunsill
Il-President
H. LAHBIB
(1) Ir-Regolament (UE) 2015/757 tal-Parlament Ewropew u tal-Kunsill tad-29 ta’ April 2015 dwar il-monitoraġġ, ir-rappurtar u l-verifika ta’ emissjonijiet ta’ gassijiet serra mit-trasport marittimu, u li jemenda d-Direttiva 2009/16/KE (ĠU L 123, 19.5.2015, p. 55).
(2) Ir-Regolament (UE) 2023/1805 tal-Parlament Ewropew u tal-Kunsill tat-13 ta’ Settembru 2023 dwar l-użu ta’ karburanti rinnovabbli u b’livell baxx ta’ emissjonijiet tal-karbonju fit-trasport marittimu, u li jemenda d-Direttiva 2009/16/KE (ĠU L 234, 22.9.2023, p. 48).
(3) Id-Direttiva 2002/59/KE tal-Parlament Ewropew u tal-Kunsill tas-27 ta’ Ġunju 2002 li tistabbilixxi sistema għall-monitoraġġ u l-informazzjoni dwar it-traffiku tal-bastimenti fil-Komunità u li tħassar id-Direttiva tal-Kunsill 93/75/KEE (ĠU L 208, 5.8.2002, p. 10).
(4) Id-Direttiva 2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi sistema għall-iskambju ta’ kwoti ta’ emissjonijiet ta’ gassijiet serra ġewwa l-Unjoni u li temenda d-Direttiva tal-Kunsill 96/61/KE (ĠU L 275, 25.10.2003, p. 32).
(5) Id-Direttiva 2009/16/KE tal-Parlament Ewropew u tal-Kunsill tat-23 ta’ April 2009 dwar il-kontroll tal-Istat tal-Port (ĠU L 131, 28.5.2009, p. 57).
(6) Id-Direttiva 2009/18/KE tal-Parlament Ewropew u tal-Kunsill tat-23 ta’ April 2009 li tistabbilixxi l-prinċipji fundamentali li jirregolaw l-investigazzjoni ta’ aċċidenti fis-settur tat-trasport marittimu u li temenda d-Direttiva tal-Kunsill 1999/35/KE u d-Direttiva 2002/59/KE tal-Parlament Ewropew u tal-Kunsill (ĠU L 131, 28.5.2009, p. 114).
(7) Id-Direttiva (UE) 2016/802 tal-Parlament Ewropew u tal-Kunsill tal-11 ta’ Mejju 2016 dwar tnaqqis tal-kontenut tal-kubrit f’ċerti karburanti likwidi (ĠU L 132, 21.5.2016, p. 58).
(8) Id-Deċiżjoni (UE) 2015/1814 tal-Parlament Ewropew u tal-Kunsill tas-6 ta’ Ottubru 2015 dwar l-istabbiliment u l-funzjonament ta’ riżerva tal-istabbiltà tas-suq għall-iskema ta’ negozjar tal-emissjonijiet tal-gassijiet serra tal-Unjoni u li temenda d-Direttiva 2003/87/KE (ĠU L 264, 9.10.2015, p. 1).
(9) Ir-Regolament (UE) Nru 530/2012 tal-Parlament Ewropew u tal-Kunsill tat-13 ta’ Ġunju 2012 dwar l-introduzzjoni aċċellerata ta’ rekwiżiti ta’ buq doppju jew ta’ disinn ekwivalenti għal tankers taż-żejt b’buq wieħed (ĠU L 172, 30.6.2012, p. 3).
(10) Id-Direttiva 2009/45/KE tal-Parlament Ewropew u tal-Kunsill tas-6 ta’ Mejju 2009 dwar regoli u standards ta’ sigurtà għal vapuri tal-passiġġieri (ĠU L 163, 25.6.2009, p. 1).
(11) Id-Direttiva 2014/90/UE tal-Parlament Ewropew u tal-Kunsill tat-23 ta’ Lulju 2014 dwar tagħmir tal-baħar u li tħassar id-Direttiva tal-Kunsill 96/98/KE (ĠU L 257, 28.8.2014, p. 146).
(12) Id-Direttiva (UE) 2022/993 tal-Parlament Ewropew u tal-Kunsill tal-8 ta’ Ġunju 2022 dwar il-livell minimu ta’ taħriġ tal-baħħara (ĠU L 169, 27.6.2022, p. 45).
ELI: http://data.europa.eu/eli/dec/2024/990/oj
ISSN 1977-074X (electronic edition)