(1)

L-aċċess faċli u strutturat għad-data huwa importanti sabiex dawk li jieħdu d-deċiżjonijiet, l-investituri professjonali u fil-livell tal-konsumatur, l-organizzazzjonijiet mhux governattivi, l-organizzazzjonijiet tas-soċjetà ċivili, l-organizzazzjonijiet soċjali u ambjentali, kif ukoll partijiet ikkonċernati oħra fl-ekonomija u fis-soċjetà jieħdu deċiżjonijiet dwar l-investiment sodi, informati u li huma responsabbli soċjalment u ambjentalment li jservu l-funzjonament effiċjenti tas-suq. Il-provvista ta’ sorsi affidabbli u sistematiċi ta’ informazzjoni hija bl-istess mod ta’ rilevanza partikolari għar-riċerkaturi u l-prattikanti fl-akkademja, li jinvolvu ruħhom f’riċerka empirika jew teoretika fis-swieq finanzjarji. L-iżgurar ta’ aċċess aktar faċli għall-informazzjoni pubblika, inkluż għall-informazzjoni mogħtija fuq bażi volontarja, huwa meħtieġ ukoll sabiex jiżdiedu l-opportunitajiet għat-tkabbir u l-viżibbiltà tal-intrapriżi żgħar u ta’ daqs medju (SMEs). L-introduzzjoni ta’ spazji komuni tal-Unjoni tad-data f’setturi kruċjali, inkluż is-settur finanzjarju, isservi l-fini li tipprovdi aċċess faċli għal sorsi affidabbli ta’ informazzjoni f’dawk is-setturi.

(2)

Fil-komunikazzjoni tagħha tal-24 ta’ Settembru 2020 bit-titolu “Unjoni tas-Swieq Kapitali għall-persuni u n-negozji - pjan ta’ azzjoni ġdid” (il-“Pjan ta’ Azzjoni għas-CMU”), il-Kummissjoni pproponiet li jitjieb l-aċċess pubbliku għall-informazzjoni finanzjarja u mhux finanzjarja tal-entitajiet billi jinħoloq punt ta’ aċċess uniku Ewropew (ESAP). Il-Komunikazzjoni tal-Kummissjoni tal-24 ta’ Settembru 2020 bit-titolu “Strateġija għall-finanzi diġitali għall-UE” (l-“Istrateġija għall-Finanzi Diġitali”) stabbiliet f’termini ġenerali kif l-Unjoni tista’ tippromwovi t-trasformazzjoni diġitali tal-finanzi fis-snin li ġejjin, u b’mod partikolari kif tippromwovi finanzjament immotivat mid-data. Sussegwentement, fil-komunikazzjoni tas-6 ta’ Lulju 2021 bit-titolu “Strateġija Mġedda għall-Finanzi Sostenibbli”, il-Kummissjoni qiegħdet il-finanzjament sostenibbli fil-qalba tas-sistema finanzjarja bħala mezz ewlieni sabiex tinkiseb it-tranżizzjoni ekoloġika tal-ekonomija tal-Unjoni, bħala parti mill-Patt Ekoloġiku Ewropew stabbilit fil-komunikazzjoni tal-Kummissjoni tal-11 ta’ Diċembru 2019.

(3)

Sabiex it-tranżizzjoni ekoloġika tal-ekonomija tal-Unjoni tirnexxi permezz ta’ finanzjament sostenibbli, huwa essenzjali li l-informazzjoni relatata mas-sostenibbiltà tan-negozji tkun faċilment aċċessibbli għall-investituri, sabiex ikunu infurmati aħjar meta jieħdu deċiżjonijiet dwar l-investimenti. Għal dawk il-finijiet, jeħtieġ li jitjieb l-aċċess pubbliku għall-informazzjoni finanzjarja u mhux finanzjarja ta’ entitajiet, bħal kumpaniji, negozji u istituzzjonijiet finanzjarji. Mezz effiċjenti kif dan isir fil-livell tal-Unjoni huwa li tiġi stabbilita pjattaforma ċentralizzata, l-ESAP, li tagħti aċċess pubbliku elettroniku għall-informazzjoni rilevanti kollha.

(4)

L-ESAP jenħtieġ li jipprovdi lill-pubbliku aċċess ċentralizzat faċli għall-informazzjoni dwar l-entitajiet u l-prodotti tagħhom li jsir pubbliku u huwa rilevanti fir-rigward tas-servizzi finanzjarji, is-swieq kapitali, is-sostenibbiltà u d-diversità, iżda jenħtieġ li jeskludi l-informazzjoni dwar il-kummerċjalizzazzjoni. Tali aċċess huwa meħtieġ sabiex tiġi ssodisfata d-domanda dejjem tikber għal prodotti finanzjarji investibbli u diversifikati li jaqgħu taħt il-kappa ambjentali, soċjali u ta’ governanza u sabiex il-kapital jiġi dirett lejn dawk il-prodotti. L-ESAP huwa maħsub biex ikun pjattaforma li tħares ’il quddiem li jenħtieġ li tippermetti l-inklużjoni ta’ informazzjoni pubblika ta’ rilevanza għas-servizzi finanzjarji, is-swieq kapitali, is-sostenibbiltà u d-diversità li tirriżulta minn atti leġiżlattivi futuri tal-Unjoni, bħal Direttiva tal-Parlament Ewropew u tal-Kunsill dwar id-diliġenza dovuta tas-sostenibbiltà korporattiva u li temenda d-Direttiva (UE) 2019/1937.

(5)

L-investituri, il-parteċipanti fis-suq, il-konsulenti, l-akkademja u l-pubbliku inġenerali jista’ jkollhom interess li jiksbu informazzjoni ta’ rilevanza għas-servizzi finanzjarji, is-swieq kapitali, is-sostenibbiltà u d-diversità, minbarra dik meħtieġa li ssir pubblika skont il-liġi tal-Unjoni, meta entità tagħmel dik l-informazzjoni aċċessibbli għall-pubbliku. SMEs b’mod partikolari jistgħu jkunu jridu jagħmlu aktar informazzjoni aċċessibbli għall-pubbliku sabiex isiru aktar viżibbli għal investituri potenzjali, u b’hekk iżidu u jiddiversifikaw l-opportunitajiet ta’ finanzjament. Barra minn hekk, il-parteċipanti fis-suq jistgħu jkunu jixtiequ jipprovdu aktar informazzjoni minn dik meħtieġa bil-liġi tal-Unjoni. Għalhekk, l-ESAP jenħtieġ li jipprovdi wkoll aċċess għall-informazzjoni rilevanti għas-servizzi finanzjarji u għas-swieq kapitali li tiġi ppubblikata fuq bażi volontarja minn kwalunkwe entità rregolata mil-liġi ta’ Stat Membru, meta tali entità tagħżel li tagħmel dik l-informazzjoni aċċessibbli fuq l-ESAP. Tali informazzjoni tista’ tiġi sottomessa fuq bażi volontarja ladarba jkunu ġew żgurati s-solidità u l-effiċjenza operazzjonali tal-ESAP, li fi kwalunkwe każ ikun wara l-preżentazzjoni tar-rapport tal-Kummissjoni lill-Parlament Ewropew u lill-Kunsill dwar l-implimentazzjoni, il-funzjonament u l-effettività tal-ESAP. L-informazzjoni sottomessa fuq bażi volontarja jenħtieġ li tiġi identifikata b’mod ċar bħala tali.

(6)

Informazzjoni sottomessa fuq bażi volontarja jenħtieġ li tkun uniformi fil-format u komparabbli fis-sustanza, il-valur, l-utilità u l-affidabbiltà għal dik sottomessa fuq bażi obbligatorja. Sabiex jiġu żgurati l-komparabbiltà u l-użabbiltà akbar tal-informazzjoni aċċessibbli fuq l-ESAP fuq bażi volontarja, l-Awtorità Superviżorja Ewropea (l-Awtorità Bankarja Ewropea) (EBA) stabbilita bir-Regolament (UE) Nru 1093/2010 tal-Parlament Ewropew u tal-Kunsill (3), l-Awtorità Superviżorja Ewropea (l-Awtorità Ewropea tal-Assigurazzjoni u l-Pensjonijiet tax-Xogħol) (EIOPA) stabbilita bir-Regolament (UE) Nru 1094/2010 tal-Parlament Ewropew u tal-Kunsill (4), u l-Awtorità Superviżorja Ewropea (l-Awtorità Ewropea tat-Titoli u s-Swieq) (ESMA) stabbilita bir-Regolament (UE) Nru 1095/2010 tal-Parlament Ewropew u tal-Kunsill (5) (magħrufa kollettivament bħala l-Awtoritajiet Superviżorji Ewropej jew l-“ASE”) jenħtieġ li, permezz tal-Kumitat Konġunt, jiżviluppaw abbozzi ta’ standards tekniċi ta’ implimentazzjoni li jispeċifikaw il-metadata li għandha takkumpanja dik l-informazzjoni u, meta applikabbli, il-formati jew il-mudelli li għandhom jintużaw għat-tfassil ta’ tali informazzjoni. Jenħtieġ li l-Kumitat Konġunt iqis ukoll l-istandards eżistenti fl-atti leġiżlattivi settorjali korrispondenti tal-Unjoni u b’mod partikolari kwalunkwe standard imfassal speċifikament għall-SMEs.

(7)

Jenħtieġ li l-ESAP ma joħloqx rekwiżiti ta’ divulgazzjoni ġodda f’termini ta’ kontenut, iżda minflok jenħtieġ li jibni fuq ir-rekwiżiti ta’ eżistenti stabbiliti mill-atti leġiżlattivi tal-Unjoni elenkati fl-Anness għal dan ir-Regolament. Huwa importanti li jiġi evitat rapportar doppju, sabiex tiġi evitata l-impożizzjoni ta’ kwalunkwe piż amministrattiv u finanzjarju addizzjonali fuq l-entitajiet, speċjalment fuq l-SMEs.

(8)

Jenħtieġ li tkun tista’ tiġi inkluża wkoll informazzjoni storika fuq l-ESAP sabiex jiżdiedu d-disponibbiltà u l-komparabbiltà tal-informazzjoni. Jenħtieġ li l-informazzjoni storika tkopri informazzjoni li tkun saret pubblika mhux qabel ħames snin li kienet meħtieġa li tiġi sottomessa lill-ESAP. Biex jiġu żgurati settijiet konsistenti u kompluti ta’ informazzjoni storika, il-kapaċità li l-informazzjoni storika ssir aċċessibbli fuq l-ESAP jenħtieġ li tibqa’ l-prerogattiva tal-korpi ta’ ġbir li huma korpi, uffiċji jew aġenziji tal-Unjoni.

(9)

Jenħtieġ li l-ESAP jiġi stabbilit b’perjodu ta’ żmien ambizzjuż, filwaqt li jittieħdu passi intermedji biex jiġu żgurati s-solidità u l-effiċjenza operazzjonali tiegħu. B’mod partikolari, jenħtieġ li jiġi allokat biżżejjed żmien għall-implimentazzjoni teknika tal-ESAP u għall-ġbir ta’ informazzjoni li għandu jiġi stabbilit fl-Istati Membri. Jenħtieġ li l-iżvilupp tal-ESAP ikollu fażi inizjali ta’ 12-il xahar, biex jagħti biżżejjed żmien lill-Istati Membri u lill-ESMA biex jistabbilixxu l-infrastruttura tal-IT u jittestjawha abbażi tal-ġbir ta’ għadd limitat ta’ flussi ta’ informazzjoni. Sussegwentement, l-iżvilupp tal-ESAP jenħtieġ li jinkorpora gradwalment, maż-żmien, għadd addizzjonali ta’ flussi ta’ informazzjoni u funzjonalitajiet b’pass li jippermetti l-iżvilupp sod u effiċjenti tal-ESAP. Il-funzjonament tal-ESAP jenħtieġ li jiġi vvalutat fuq bażi regolari matul l-implimentazzjoni u t-tħaddim tiegħu biex jippermetti kwalunkwe aġġustament biex jiġu ssodisfati l-ħtiġijiet tal-utenti tiegħu u biex tiġi żgurata l-effiċjenza teknika tiegħu.

(10)

L-informazzjoni li għandha ssir aċċessibbli għall-pubbliku fuq l-ESAP jenħtieġ li tinġabar mill-korpi ta’ ġbir iddeżinjati għall-fini tal-ġbir tal-informazzjoni li l-entitajiet huma meħtieġa jippubblikaw, jew mill-korpi ta’ ġbir iddeżinjati għall-ġbir tal-informazzjoni li hija sottomessa mill-entitajiet fuq bażi volontarja. Sabiex jiġi żgurat il-funzjonament sħiħ u kosteffettiv tal-ESAP, il-korpi ta’ ġbir jenħtieġ li jagħmlu l-informazzjoni disponibbli għall-ESAP b’mod awtomatizzat permezz ta’ interfaċċa unika għall-ipprogrammar tal-applikazzjonijiet (API). Jenħtieġ li l-korpi ta’ ġbir jibbażaw, sa fejn ikun possibbli, fuq il-proċeduri u l-infrastruttura eżistenti ta’ ġbir ta’ informazzjoni, fil-livell tal-Unjoni u dak nazzjonali, għat-trażmissjoni ta’ informazzjoni lill-ESAP mingħajr dewmien żejjed. Jenħtieġ li ma jkun hemm l-ebda obbligu li l-informazzjoni ssir aċċessibbli fuq l-ESAP qabel ma dik l-informazzjoni ssir pubblika skont l-atti leġiżlattivi settorjali tal-Unjoni applikabbli. Għall-fini li jagħmlu l-informazzjoni aċċessibbli fuq l-ESAP, il-korpi ta’ ġbir jenħtieġ li jaħżnu l-informazzjoni sottomessa mill-entitajiet jew iġġenerata mill-korpi ta’ ġbir infushom, sakemm ma jkunux diġà previsti mekkaniżmi alternattivi ta’ ħżin skont l-liġi tal-Unjoni. Jenħtieġ li l-korpi ta’ ġbir ma jkunux meħtieġa jibnu mekkaniżmi ta’ ħżin ġodda meta wieħed jista’ joqgħod fuq mekkaniżmi nazzjonali jew tal-Unjoni eżistenti għall-ħżin tal-informazzjoni. Jenħtieġ li l-Istati Membri jiddeżinjaw mill-inqas korp ta’ ġbir wieħed għall-ġbir ta’ informazzjoni sottomessa mill-entitajiet fuq bażi volontarja, li jista’ jkun l-istess bħal korpi li jiġbru l-informazzjoni sottomessa mill-entitajiet fuq bażi obbligatorja.

(11)

Għall-fini li jinkiseb funzjonament kosteffiċjenti, jenħtieġ li l-korpi ta’ ġbir ikunu jistgħu jiddelegaw il-kompiti tagħhom lil parti terza. Jenħtieġ li tali delega tkun soġġetta għal salvagwardji xierqa u jenħtieġ li ma tiġix eżerċitata sal-punt li l-korp ta’ ġbir isir sempliċiment “entità kaxxa tal-ittri”. Jenħtieġ li ma jkunx possibbli li jiġi ddelegat il-kompitu tat-teħid ta’ deċiżjoni diskrezzjonali li tirrifjuta jew tneħħi informazzjoni li tkun manifestament mhux xierqa, abbużiva jew barra mill-kamp ta’ applikazzjoni ta’ dan ir-Regolament. Madankollu, dak ma jipprekludix lil delegat milli jwettaq tali rifjut jew tneħħija f’konformità ma’ tali deċiżjoni diskrezzjonali meħuda mill-korp ta’ ġbir.

(12)

Sabiex l-informazzjoni ssir aċċessibbli pubblikament fuq l-ESAP biex tkun tista’ tintuża b’mod diġitali, jenħtieġ li l-entitajiet jagħmlu dik l-informazzjoni disponibbli f’format ta’ data li tista’ tiġi estratta jew, meta meħtieġ mil-liġi tal-Unjoni, f’format li jinqara mill-magni. Formati ta’ data li tista’ tiġi estratta mhux neċessarjament jirrikjedu li l-informazzjoni tkun strutturata b’tali mod li tinqara mill-magni, filwaqt li formati li jinqaraw mill-magni huma formati ta’ fajls strutturati b’mod li l-applikazzjonijiet tas-software ikunu jistgħu jidentifikaw, jagħrfu u jisiltu data speċifika faċilment, inklużi dikjarazzjonijiet individwali tal-fatti, u l-istruttura interna tad-data. Iż-żewġ formati jenħtieġ li jkunu miftuħa biex jippermettu l-aktar użu wiesa’ possibbli. Formati miftuħa jenħtieġ li jinftiehmu li jkunu indipendenti mill-pjattaforma u jkunu disponibbli għall-pubbliku mingħajr ebda restrizzjoni li timpedixxi l-użu mill-ġdid tal-informazzjoni li tinsab fihom. L-abbozzi ta’ standards tekniċi ta’ implimentazzjoni jenħtieġ li jitfasslu mill-ASE, permezz tal-Kumitat Konġunt, biex jiġu sottomessi lill-Kummissjoni, filwaqt li jispeċifikaw il-karatteristiċi tal-formati li jinqraw mill-magni u tal-formati ta’ data li tista’ tiġi estratta u jitqiesu kwalunkwe xejra teknoloġika jew standard teknoloġiku li qed jevolvu. Sabiex jiġi żgurat li l-entitajiet jissottomettu l-informazzjoni fil-format korrett u sabiex jindirizzaw kwistjonijiet tekniċi potenzjali li jiltaqgħu magħhom l-entitajiet, il-korpi ta’ ġbir jenħtieġ li jwettqu validazzjonijiet awtomatizzati f’konformità ma’ dan ir-Regolament u jipprovdu assistenza lill-entitajiet li jissottomettu informazzjoni, fejn meħtieġ.

(13)

L-entitajiet li jissottomettu l-informazzjoni u l-metadata lill-korpi ta’ ġbir jenħtieġ li jibqgħu responsabbli għall-preċiżjoni u l-kompletezza tal-informazzjoni fil-lingwa li fiha tkun sottomessa u għall-affidabbiltà ta’ tali informazzjoni u metadata. Skont il-prinċipji tal-minimizzazzjoni tad-data u l-protezzjoni tad-data, jenħtieġ li l-entitajiet jiżguraw li ma tiġi inkluża l-ebda data personali fl-informazzjoni sottomessa, ħlief meta dik id-data tikkostitwixxi element meħtieġ tal-informazzjoni dwar l-attivitajiet ekonomiċi tal-entitajiet, inkluż meta l-isem tal-entità jkun jikkorrispondi mal-isem tas-sid. Meta l-informazzjoni sottomessa tinkludi data personali, jenħtieġ li, fir-rigward tad-divulgazzjoni ta’ dik id-data personali, l-entitajiet jistgħu joqogħdu fuq waħda mir-raġunijiet legali tal-ipproċessar stabbiliti fir-Regolament (UE) 2016/679 tal-Parlament Ewropew u tal-Kunsill (6).

(14)

L-objettiv tal-ESMA huwa li tipproteġi l-interess pubbliku billi tikkontribwixxi għall-istabbiltà u l-effettività tas-sistema finanzjarja, għall-ekonomija tal-Unjoni, għaċ-ċittadini u għan-negozji tagħha. F’dak il-kuntest, l-ESMA tikkontribwixxi b’mod partikolari għall-iżgurar tal-integrità, it-trasparenza, l-effiċjenza u l-funzjonament ordnat tas-swieq finanzjarji. Fost oħrajn, għandha l-kompitu li ttejjeb il-protezzjoni tal-investituri. Għaldaqstant, l-ESMA jenħtieġ li tingħata l-kompitu li tistabbilixxi u topera l-ESAP.

(15)

Sabiex l-entitajiet u l-pubbliku jkunu jistgħu jidentifikaw il-korpi ta’ ġbir li jipprovdu informazzjoni lill-ESAP, l-ESMA jenħtieġ li tippubblika lista tal-korpi ta’ ġbir fuq is-sit web tagħha u żżomm dik il-lista aġġornata. Jekk ikun neċessarju li jsir tibdil għal dik il-lista, jenħtieġ li dawk il-bidliet isiru fl-iqsar żmien possibbli.

(16)

L-ESAP jista’ jkun suġġett għal ksur ta’ kunfidenzjalità u riskji dwar id-disponibbiltà proprja u dwar id-disponibbiltà tal-informazzjoni pproċessata fih. Dawk ir-riskji jinkludi inċidenti, żbalji u attakki deliberati u avvenimenti naturali, u jeħtieġ li jiġi rikonoxxut bħala riskji operazzjonali. L-ESMA u l-korpi ta’ ġbir jenħtieġ li jimplimentaw politiki xierqa u proporzjonati, inklużi rieżamijiet regolari, sabiex jiġi żgurat li l-ESAP jipproteġi l-informazzjoni pproċessata u l-funzjonijiet kif meħtieġ skont l-ogħla standards xierqa.

(17)

Sabiex jiġu ffaċilitati t-tiftix, is-sejba, l-irkupru u l-użu tad-data, l-ESMA jenħtieġ li tiżgura li l-ESAP joffri sett ta’ funzjonalitajiet, inklużi funzjoni ta’ tiftix, servizz ta’ traduzzjoni awtomatika u l-possibbiltà li tiġi estratta l-informazzjoni, kif ukoll funzjonijiet ta’ aċċessibbiltà elettronika mfassla għal persuni b’vista batuta u individwi b’diżabilitajiet u bi bżonnijiet ta’ aċċess. Il-funzjoni ta’ tiftix jenħtieġ li jiġu offruti fil-lingwi uffiċjali kollha tal-Unjoni u jibnu fuq mill-anqas il-metadata mogħtija skont l-atti leġiżlattivi tal-Unjoni elenkati fl-Anness ta’ dan ir-Regolament. L-interfaċċa tal-utent u l-funzjoni tat-tiftix fl-ESAP jenħtieġ li jitfasslu b’mod li jkun kemm jista’ jkun faċli biex jintuża, bi grad għoli ta’ komparabbiltà tad-data, u li jkopri firxa wiesgħa ta’ utenti potenzjali, bħal investituri professjonali u fil-livell tal-konsumatur, istituzzjonijiet akkademiċi u organizzazzjonijiet tas-soċjetà ċivili.

(18)

L-użu u l-użu mill-ġdid ta’ informazzjoni li hija aċċessibbli pubblikament fuq l-ESAP jistgħu jtejbu l-funzjonament tas-suq intern u jippromwovu l-iżvilupp ta’ servizzi ġodda li jikkombinaw u jagħmlu użu minn tali informazzjoni. Għalhekk, meta jkun ġustifikat għar-raġunijiet ta’ objettiv ta’ interess pubbliku, huwa meħtieġ li l-informazzjoni li tkun aċċessibbli fuq l-ESAP tkun tista’ tintuża u tintuża mill-ġdid għal finijiet oħrajn għajr dawk li għalihom tkun tfasslet l-informazzjoni. Tali użu u użu mill-ġdid ta’ informazzjoni jenħtieġ li, madankollu, ikunu suġġetti għal kundizzjonijiet oġġettivi u nondiskriminatorji. Barra minn hekk, jenħtieġ li japplikaw, meta xieraq, kundizzjonijiet li jikkorrispondu għal dawk stabbiliti f’liċenzji miftuħa u standard skont it-tifsira tad-Direttiva (UE) 2019/1024 tal-Parlament Ewropew u tal-Kunsill (7), li jippermettu li d-data u l-kontenut ikunu aċċessibbli, użati, modifikati u kondiviżi liberament minn kwalunkwe persuna għal kwalunkwe fini. L-entitajiet li jissottomettu l-informazzjoni tagħhom lil korp ta’ ġbir sabiex din tkun aċċessibbli fuq l-ESAP jenħtieġ li ma jillimitawx l-użu u l-użu mill-ġdid ta’ dik l-informazzjoni għal finijiet regolatorji u mhux kummerċjali abbażi ta’ dritt sui generis, mingħajr preġudizzju għal-liġi tal-Unjoni dwar id-drittijiet tal-awtur u drittijiet relatati oħra. La l-ESMA u lanqas il-korpi ta’ ġbir jenħtieġ li jġorru kwalunkwe responsabbiltà għall-aċċess, l-użu jew l-użu mill-ġdid tal-informazzjoni aċċessibbli fuq l-ESAP, mingħajr preġudizzju għall-prinċipji tar-responsabbiltà mhux kuntrattwali stabbiliti fl-Artikolu 340 tat-Trattat dwar il-Funzjonament tal-Unjoni Ewropea (TFUE).

(19)

L-informazzjoni disponibbli għall-ESAP jenħtieġ li tkun aċċessibbli għall-pubbliku fil-ħin. Għalhekk, l-informazzjoni mogħtija mill-korpi ta’ ġbir lill-ESAP jenħtieġ li tkun aċċessibbli fuq l-ESAP mingħajr dewmien żejjed u, fi kwalunkwe każ, fl-iqsar perjodu ta’ żmien possibli. Sabiex tiġi żgurata l-kwalità uniformi tal-informazzjoni, il-korpi ta’ ġbir jenħtieġ li jwettqu validazzjonijiet awtomatizzati u jirrifjutaw informazzjoni sottomessa li ma tikkonformax mar-rekwiżiti meħtieġa. Il-validazzjonijiet awtomatizzati jenħtieġ li ma jkunux relatati mal-kontenut tal-informazzjoni. Minbarra l-validazzjonijiet awtomatizzati, il-korpi ta’ ġbir jenħtieġ li jirrifjutaw jew ineħħu informazzjoni jekk jiddeterminaw, pereżempju wara li jirċievu informazzjoni mingħand parti kkonċernata, li din taqa’ barra mill-kamp ta’ applikazzjoni ta’ dan ir-Regolament, jew li tinkludi kontenut li jkun manifestament mhux xieraq jew abbużiv. Il-korpi ta’ ġbir mhumiex meħtieġa jivverifikaw manwalment jew awtomatikament jekk l-informazzjoni taqax barra mill-kamp ta’ applikazzjoni ta’ dan ir-Regolament jew jekk hijiex manifestament mhux xierqa jew abbużiva. L-entitajiet għandhom jibqgħu responsabbli għall-kontenut. Obbligi oħra li l-korpi ta’ ġbir jista’ jkollhom skont dispożizzjonijiet oħra tal-liġi tal-Unjoni jew nazzjonali jibqgħu mhux affettwati minn dan ir-Regolament.

(20)

L-ESAP jenħtieġ li jipprovdi lill-utenti b’aċċess għall-informazzjoni mingħajr ħlas u fuq bażi nondiskriminatorja, u jenħtieġ li jagħmilha possibbli għall-utenti li jfittxu, jaċċessaw u jniżżlu l-informazzjoni mill-ESAP. Madankollu, biex l-ESMA tiġi protetta minn piż finanzjarju eċċessiv b’rabta mal-kostijiet imġarrba b’riżultat li jiġu ssodisfati l-ħtiġijiet ta’ kwalunkwe utent intensiv, l-ESMA jenħtieġ li titħalla tiġġenera dħul. Għalhekk, b’deroga mill-prinċipju ġenerali li l-informazzjoni jenħtieġ li tkun aċċessibbli mingħajr ħlas, l-ESMA jenħtieġ li titħalla timponi tariffi għal servizzi speċifiċi, inkluż għal servizzi b’kostijiet ta’ manutenzjoni jew ta’ appoġġ għoljin minħabba tiftix għal volumi kbar ħafna ta’ informazzjoni, jew tniżżil ta’ dawn il-volumi ta’ informazzjoni, jew minħabba aċċess frekwenti ħafna għall-informazzjoni aċċessibbli fuq l-ESAP, b’mod partikolari jekk l-użu ta’ tali informazzjoni ikun għall-finijiet kummerċjali. Madankollu, kwalunkwe tariffa imposta jenħtieġ li ma taqbiżx il-kostijiet imġarrba mill-ESMA għall-forniment ta’ dawk is-servizzi speċifiċi. Kwalunkwe tariffa miġbura jenħtieġ li tiġi allokata għall-funzjonament ġenerali tal-ESAP. Xi utenti, inklużi l-akkademja u l-organizzazzjonijiet tas-soċjetà ċivili jenħtieġ li ma jkunux soġġetti għal kwalunkwe tariffa. Il-kalkolu tat-tariffi jenħtieġ li jkun trasparenti u bbażat fuq prinċipji ċari.

(21)

Sabiex tiġi promossa l-innovazzjoni mmotivata mid-data fil-finanzi, sabiex is-swieq kapitali jiġu megħjuna jintegraw fl-Unjoni, sabiex l-investimenti jiġu diretti lejn attivitajiet sostenibbli u sabiex iwasslu għal effiċjenzi għall-konsumaturi u n-negozji, l-ESAP jenħtieġ li jtejjeb l-aċċess għall-informazzjoni pubblika li tista’ tkun fiha data personali. Madankollu, l-ESAP jenħtieġ li jtejjeb biss l-aċċess għal dik id-data personali li tinsab f’informazzjoni li ssir pubblika skont obbligu legali jew, meta l-informazzjoni ssir pubblika b’mod volontarju, għal dik id-data personali li tiġi pproċessata għal raġunijiet legali skont ir-Regolament (UE) 2016/679. Għal kwalunkwe pproċessar ta’ data personali fil-kuntest ta’ informazzjoni aċċessibbli fuq l-ESAP, l-ESMA, fil-kapaċità tagħha bħala kontrollur tad-data tal-ESAP, u l-korpi ta’ ġbir jenħtieġ li jiżguraw il-konformità mar-Regolament (UE) 2016/679 u mar-Regolament (UE) 2018/1725 tal-Parlament Ewropew u tal-Kunsill (8). L-entitajiet sottomettenti jenħtieġ li jkunu responsabbli għall-identifikazzjoni tal-preżenza ta’ kwalunkwe data personali fl-informazzjoni sottomessa u għall-ipproċessar ta’ tali data personali abbażi ta’ waħda mir-raġunijiet legali għall-ipproċessar skont ir-Regolament (UE) 2016/679. Informazzjoni akkumpanjata minn metadata li tispeċifika li fiha data personali jenħtieġ li ma tinżammx minn korpi ta’ ġbir jew mill-ESAP għal kwalunkwe żmien aktar milli meħtieġ u fi kwalunkwe każ għal mhux aktar minn ħames snin, sakemm ma jkunx previst mod ieħor fl-atti leġiżlattivi tal-Unjoni elenkati fl-Anness ta’ dan ir-Regolament.

(22)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 u ta l-kummenti formali fid-19 ta’ Jannar 2022.

(23)

Il-Bank Ċentrali Ewropew pprovda l-opinjoni tiegħu fis-7 ta’ Ġunju 2022 (9).

(24)

Sabiex tinbena u tinżamm il-fiduċja pubblika fl-ESAP u sabiex kull entità tiġi protetta minn tibdil mhux dovut tal-informazzjoni tagħha, il-korpi ta’ ġbir jenħtieġ li jiżguraw l-integrità tad-data u l-kredibbiltà tas-sors tal-informazzjoni sottomessa mill-entitajiet. B’mod aktar partikolari, il-korpi ta’ ġbir jenħtieġ li jiżguraw livelli xierqa ta’ awtentiċità, disponibbiltà, integrità u nonripudju tal-informazzjoni sottomessa mill-entitajiet li għandha ssir disponibbli għall-ESAP u aċċessibbli fuqu. In-nonripudju tal-informazzjoni jfisser li l-entità jenħtieġ li tingħata assigurazzjoni raġonevoli li s-sottomissjoni tagħha tkun twasslet, u li r-riċevitur ikollu prova tal-identità tal-entità. Siġill elettroniku kwalifikat kif definit fir-Regolament (UE) Nru 910/2014 tal-Parlament Ewropew u tal-Kunsill (10) jista’ jintuża biex jintlaħqu dawk l-objettivi. Identifikatur speċifiku ta’ entità ġuridika, meta disponibbli, jenħtieġ li jkun attribut obbligatorju tal-informazzjoni sottomessa.

(25)

Sabiex l-informazzjoni fuq l-ESAP tkun komparabbli tul iż-żmien, l-utenti jenħtieġ li jkollhom aċċess ukoll għal informazzjoni tal-passat, inkluż informazzjoni storika. Sakemm ma jkunx previst mod ieħor fl-atti leġiżlattivi tal-Unjoni fl-Anness għal dan ir-Regolament, l-ESAP jenħtieġ li jipprovdi aċċess għall-informazzjoni għal perjodu ta’ żmien raġonevoli. Għal dak il-fini, l-ESMA jenħtieġ li tiżgura li data personali la tinżamm u lanqas issir aċċessibbli fuq l-ESAP għal kwalunkwe żmien aktar milli meħtieġ mil-liġi tal-Unjoni u, fi kwalunkwe każ, għal mhux aktar minn ħames snin, sakemm mhux previst mod ieħor fl-atti leġiżlattivi tal-Unjoni fil-kamp ta’ applikazzjoni ta’ dan ir-Regolament.

(26)

Il-korpi ta’ ġbir jenħtieġ li jinfurmaw lill-ESMA dwar kwalunkwe diffikultà prattika sostanzjali identifikata fir-rigward tat-twettiq tal-kompiti tagħhom. L-ESMA, f’kooperazzjoni mill-qrib mal-EBA u l-EIOPA, jenħtieġ li timmonitorja l-funzjonament tal-ESAP u tippubblika rapport annwali dwaru, bl-għan li tiżgura li l-problemi potenzjali jkunu trasparenti u li tkun tista’ tittieħed azzjoni xierqa meta jkun meħtieġ. It-tfassil tar-rapport annwali dwar il-funzjonament tal-ESAP mill-ESMA, f’kooperazzjoni mill-qrib mal-EBA u l-EIOPA, se jgħin ukoll biex jiġi żgurat li l-awtoritajiet kompetenti jkunu involuti u li partijiet ikkonċernati oħra jiġu kkonsultati permezz tat-task force, il-grupp jew il-kumitat ad hoc, kif xieraq, li għandu jiġi stabbilit mill-ESMA.

(27)

Minħabba r-rilevanza tar-rapport tal-Kummissjoni lill-Parlament Ewropew u lill-Kunsill dwar l-implimentazzjoni, il-funzjonament u l-effettività tal-ESAP għall-adozzjoni possibbli ta’ att delegat biex tiġi posposta l-inklużjoni fuq l-ESAP tal-informazzjoni li għaliha s-sottomissjoni lill-korpi ta’ ġbir mhix rekwiżita skont ir-Regolament fl-applikazzjoni tad-Direttiva (UE) 2023/2864 tal-Parlament Ewropew u tal-Kunsill (11) u r-Regolament (UE) 2023/2869 tal-Parlament Ewropew u tal-Kunsill (12), huwa importanti li l-Kummissjoni tuża r-rapporti annwali dwar il-funzjonament tal-ESAP imfassla mill-ESMA u twettaq konsultazzjonijiet xierqa mal-korpi ta’ ġbir u l-gruppi ta’ esperti rilevanti, b’mod partikolari l-Grupp Espert tal-Kumitat Ewropew tat-Titoli. Il-Parlament Ewropew u l-Kunsill jenħtieġ li, meta jqisu li jkun xieraq, jingħataw biżżejjed opportunità biex jiddiskutu r-rapport tal-Kummissjoni.

(28)

Sabiex, meta jkun meħtieġ, tiġi posposta l-inklużjoni fuq l-ESAP ta’ ċerta informazzjoni li jenħtieġ li ssir aċċessibbli fuq l-ESAP, jenħtieġ li tiġi delegata s-setgħa lill-Kummissjoni li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea fir-rigward tad-data li minnha dik l-informazzjoni jenħtieġ li tiġi sottomessa għall-aċċessibbiltà fuq l-ESAP. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (13). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(29)

Sabiex jiġi żgurat l-ipproċessar mingħajr xkiel tal-informazzjoni riċevuta jew imfassla mill-korpi ta’ ġbir u magħmula disponibbli għall-ESAP, huwa meħtieġ li jiġu stabbiliti ċerti rekwiżiti ċari u dettaljati li jispeċifikaw il-format u l-metadata ta’ dik l-informazzjoni u liema korpi ta’ ġbir jenħtieġ li jiġbruha. Sabiex tiġi żgurata l-kwalità tal-informazzjoni sottomessa lill-ESAP mill-korpi ta’ ġbir, huwa meħtieġ ukoll li jiġu ddefiniti l-karatteristiċi tal-validazzjonijiet awtomatizzati li għandhom jitwettqu fir-rigward ta’ kull oġġett ta’ informazzjoni sottomess mill-entitajiet lill-korpi ta’ ġbir, inklużi l-karatteristiċi tas-siġill elettroniku kwalifikat li jiġi mehmuż ma’ dik l-informazzjoni, meta meħtieġ mill-korpi ta’ ġbir. Sabiex jiġi żgurat l-użu u l-użu mill-ġdid tad-data dwar l-ESAP, għandha tiġi stabbilita lista tal-liċenzji standard miftuħa ddeżinjati. Sabiex jiġu ffaċilitati t-tiftix, is-sejba u l-irkupru tad-data fil-ħin, huwa meħtieġ ukoll li jiġu stabbiliti l-karatteristiċi tal-API u tal-metadata li għandha tiġi implimentata. Jenħtieġ li jiġu wkoll implimentati rekwiżiti addizzjonali fir-rigward ta’ funzjoni ta’ tiftix effiċjenti, bħall-identifikatur speċifiku ta’ entità ġuridika tal-entità, il-klassifikazzjoni tat-tip ta’ informazzjoni sottomessa mill-entità u d-daqs tal-entità skont il-kategorija. Għal dak il-għan, l-ASE, permezz tal-Kumitat Konġunt, jenħtieġ li jiżviluppaw abbozzi ta’ standards tekniċi ta’ implimentazzjoni. Meta jkunu qed jabbozzaw l-istandards tekniċi ta’ implimentazzjoni, l-ASE, permezz tal-Kumitat Konġunt, jenħtieġ li jikkonsultaw minn qabel mal-korpi ta’ ġbir u janalizzaw, b’mod partikolari, il-kostijiet u l-benefiċċji potenzjali assoċjati. Barra minn hekk, l-ESMA jenħtieġ li tkun tista’ tiżviluppa abbozzi ta’ standards tekniċi ta’ implimentazzjoni sabiex tiddetermina n-natura u l-firxa tas-servizzi speċifiċi li għalihom jistgħu jintalbu tariffi kif ukoll l-istruttura tat-tariffi assoċjata. Tali abbozzi ta’ standards tekniċi ta’ implimentazzjoni jippermetti aċċess globali u interoperabbli għall-informazzjoni tal-entitajiet. Fir-rigward tal-istandards tekniċi ta’ implimentazzjoni li jikkonċernaw l-informazzjoni dwar is-sostenibbiltà, jenħtieġ li l-ASE, permezz tal-Kumitat Konġunt, jikkomunikaw mal-EFRAG dwar l-iżvilupp ta’ tali abbozzi ta’ standards. Il-Kummissjoni jenħtieġ li tingħata s-setgħa li tadotta dawk l-istandards tekniċi ta’ implimentazzjoni permezz ta’ atti ta’ implimentazzjoni skont l-Artikolu 291 TFUE u f’konformità mal-Artikolu 15 tar-Regolament (UE) Nru 1093/2010, mal-Artikolu 15 tar-Regolament (UE) Nru 1094/2010 u mal-Artikolu 15 tar-Regolament (UE) Nru 1095/2010.

(30)

Minħabba li l-objettiv ta’ dan ir-Regolament, jiġifieri li jikkontribwixxi għall-integrazzjoni tas-servizzi finanzjarji u s-swieq kapitali tal-Unjoni billi jipprovdi aċċess ċentralizzat faċli għall-informazzjoni pubblika dwar l-entitajiet u l-prodotti tagħhom, ma jistax jintlaħaq b’mod suffiċjenti mill-Istati Membri iżda, minħabba l-iskala jew l-effetti tiegħu, jista’ jintlaħaq aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà, kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-objettivi.

(31)

L-ESAP huwa l-ewwel azzjoni fil-Pjan ta’ Azzjoni l-ġdid għas-CMU u twettiq konkret tal-Istrateġija għall-Finanzi Diġitali. Għalhekk, l-ESAP huwa proġett ewlieni ta’ interess Ewropew komuni fil-qasam tal-finanzi diġitali. Għal dik ir-raġuni, jenħtieġ li jintalab finanzjament kemm jista’ jkun mill-Programm Ewropa Diġitali stabbilit bir-Regolament (UE) 2021/694 tal-Parlament Ewropew u tal-Kunsill (14), b’mod partikolari matul l-istadji bikrija tal-iżvilupp tal-ESAP, f’konformità mal-ammonti ppreżentati fid-Dokument ta’ Ħidma tal-Persunal tal-Kummissjoni tal-25 ta’ Novembru 2021. Dawk il-fondi jiġu allokati lill-Kummissjoni matul l-iżvilupp bikri tal-ESAP, bil-ħsieb li jiġi żgurat li l-ESMA tkun is-sid aħħari ta’ kwalunkwe assi li tirriżulta. Wara li l-kontribuzzjoni mill-Programm Ewropa Diġitali tkun ġiet eżawrita, il-finanzjament tal-ESAP jenħtieġ li jsegwi l-mudell previst għall-finanzjament tal-ESMA sal-31 ta’ Diċembru 2027. Il-kontribuzzjonijiet tal-awtoritajiet kompetenti skont dak il-mudell ta’ finanzjament jenħtieġ li ma jaqbżux total ta’ EUR 6 968 000. L-allokazzjoni ta’ finanzjament mill-Istati Membri, madankollu, mhijiex kontinġenti fuq il-possibbiltà ta’ qbiż tal-istimi tal-kostijiet ippreżentati fid-Dokument ta’ Ħidma tal-Persunal tal-Kummissjoni tal-25 ta’ Novembru 2021. Il-finanzjament tal-ESAP wara Diċembru 2027 jenħtieġ li jiġi diskuss fil-proċedura baġitarja xierqa fil-kuntest tal-Qafas Finanzjarju Pluriennali li jmiss meta jiġi vvalutat jekk tkunx xierqa kontribuzzjoni akbar mill-baġit tal-Unjoni,

(1)

“entità” tfisser kwalunkwe persuna fiżika jew ġuridika:

(2)

“korp ta’ ġbir” tfisser korp tal-Unjoni, uffiċċju jew aġenzija jew korp, awtorità jew reġistru nazzjonali ddeżinjati bħala tali skont kwalunkwe wieħed mill-atti leġiżlattivi tal-Unjoni skont l-Artikolu 1(1), il-punt (a) jew iddeżinjati bħala tali minn Stat Membru f’konformità mal-Artikolu 3(2);

(3)

“format ta’ data li tista’ tiġi estratta” tfisser kwalunkwe format miftuħ kif definit fl-Artikolu 2, il-punt (14), tad-Direttiva (UE) 2019/1024 li jintuża b’mod wiesa’ jew li huwa meħtieġ bil-liġi, li jippermetti l-estrazzjoni ta’ data minn magna u li jista’ jinqara mill-bniedem;

(4)

“format li jinqara mill-magni” tfisser format li jinqara mill-magni kif definit fl-Artikolu 2, il-punt (13), tad-Direttiva (UE) 2019/1024;

(5)

“siġill elettroniku kwalifikat” tfisser siġill elettroniku kwalifikat kif definit fl-Artikolu 3, il-punt (27), tar-Regolament (UE) Nru 910/2014;

(6)

“interfaċċa għall-ipprogrammar tal-applikazzjonijiet” jew “API” tfisser sett ta’ funzjonijiet, proċeduri, definizzjonijiet u protokolli għall-komunikazzjoni bejn magna u oħra u l-iskambju ta’ data mingħajr xkiel;

(7)

“metadata” tfisser informazzjoni strutturata li tagħmilha aktar faċli sabiex tiġi rkuprata, użata jew immaniġġjata riżorsa ta’ informazzjoni, inkluż billi tiddeskrivi, tispjega jew tillokalizza s-sors ta’ dik l-informazzjoni;

(8)

“data personali” tfisser data personali kif definit fl-Artikolu 4, il-punt (1), tar-Regolament (UE) 2016/679;

(9)

“informazzjoni storika” tfisser l-informazzjoni msemmija fl-Artikolu 1(1), il-punt (a), li tkun saret pubblika mhux qabel ħames snin mid-data tal-applikazzjoni tar-rekwiżit li dik l-informazzjoni tiġi sottomessa lill-ESAP;

(10)

“Kumitat Konġunt” tfisser il-kumitat msemmi fl-Artikolu 54 tar-Regolament (UE) Nru 1093/2010, fl-Artikolu 54 tar-Regolament (UE) Nru 1094/2010 u fl-Artikolu 54 tar-Regolament (UE) Nru 1095/2010.