(1)

L-Artikolu 325 tat-Trattat dwar il-Funzjonament tal-Unjoni Ewropea (TFUE) jirrikjedi li l-Unjoni u l-Istati Membri jiġġieldu l-frodi u kull attività illegali oħra li taffettwa l-interessi finanzjarji tal-Unjoni. Jenħtieġ li l-Unjoni tappoġġa l-attivitajiet f’dawk l-oqsma.

(2)

Appoġġ li ngħata qabel għal tali attivitajiet permezz tad-Deċiżjoni Nru 804/2004/KE tal-Parlament Ewropew u tal-Kunsill (3) (il-programm Erkole), emendata u estiża bid-Deċiżjoni Nru 878/2007/KE tal-Parlament Ewropew u tal-Kunsill (4) (il-programm Erkole II), imħassra u sostitwita bir-Regolament (UE) Nru 250/2014 tal-Parlament Ewropew u tal-Kunsill (5) (il-programm Erkole III), għamilha possibbli li jissaħħu l-attivitajiet imwettqa mill-Unjoni u l-Istati Membri fil-ġlieda kontra l-frodi, il-korruzzjoni u kull attività illegali oħra li taffettwa l-interessi finanzjarji tal-Unjoni.

(3)

Il-leġiżlazzjoni tal-Unjoni li tistabbilixxi regoli għall-Fond Agrikolu Ewropew ta’ Garanzija, il-Fond Agrikolu Ewropew għall-Iżvilupp Rurali, il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Ewropew għall-Affarijiet Marittimi u s-Sajd, il-Fond għall-Ażil, il-Migrazzjoni u l-Integrazzjoni u l-istrument għal appoġġ finanzjarju għall-kooperazzjoni tal-pulizija, il-prevenzjoni u l-ġlieda kontra l-kriminalità, u l-ġestjoni tal-kriżijiet, il-Fond għal Għajnuna Ewropea għall-Persuni l-Aktar fil-Bżonn, kif ukoll għall-assistenza ta’ qabel l-adeżjoni rigward il-perijodu ta’ programmazzjoni 2014-2020 u ‘l quddiem, tipprevedi obbligazzjoni fuq l-Istati Membri, il-pajjiżi kandidati u kandidati potenzjali li jirrapportaw irregolaritajiet u frodi li jaffettwaw l-interessi finanzjarji tal-Unjoni. Is-Sistema ta’ Ġestjoni tal-Irregolaritajiet (IMS) hija għodda elettronika sigura ta’ komunikazzjoni li tiffaċilita l-issodisfar tal-obbligu mill-Istati Membri, kif ukoll mill-pajjiżi kandidati u kandidati potenzjali li jirrappurtaw l-irregolaritajiet li jiskopru, u li tappoġġa wkoll il-ġestjoni u l-analiżi tal-irregolaritajiet.

(4)

Filwaqt li l-importanza tal-ħidma mwettqa mill-Kummissjoni fil-kuntest tal-prevenzjoni tal-frodi hija indiskutibbli, l-importanza, inter alia, tal-implimentazzjoni tas-Sistema ta’ Informazzjoni Kontra l-Frodi (AFIS), kif ukoll tal-istrateġiji kontra l-frodi fil-livell nazzjonali jenħtieġ li tiġi wkoll rikonoxxuta bis-sħiħ.

(5)

Ir-Regolament tal-Kunsill (KE) Nru 515/97 (6) u d-Deċiżjoni tal-Kunsill 2009/917/ĠAI (7) jipprevedu li l-Unjoni għandha tappoġġa l-għajnuna reċiproka bejn l-awtoritajiet amministrattivi tal-Istati Membri u l-kooperazzjoni bejn dawn tal-aħħar u l-Kummissjoni, sabiex tiġi żgurata l-applikazzjoni korretta tal-liġi dwar materji doganali u agrikoli.

(6)

Dak l-appoġġ jingħata lil għadd ta’ attivitajiet operazzjonali. Dawn jinkludu l-AFIS), pjattaforma tat-teknoloġija tal-informazzjoni li tikkonsisti minn sett ta’ applikazzjonijiet imħaddma skont sistema komuni ta’ informazzjoni ġestita mill-Kummissjoni. I hija wkoll mħaddma taħt il-pjattaforma tal-AFIS. Is-sistema ta’ informazzjoni komuni teħtieġ finanzjament stabbli u prevedibbli matul is-snin sabiex tiġi żgurata s-sostenibbiltà tagħha.

(7)

Il-pjattaforma AFIS fiha diversi sistemi ta’ informazzjoni, inkluż is-Sistema ta’ Informazzjoni Doganali. Is-Sistema ta’ Informazzjoni Doganali hija sistema ta’ informazzjoni awtomatizzata li għandha l-għan li tassisti lill-Istati Membri fil-prevenzjoni, l-investigazzjoni u l-prosekuzzjoni ta’ operazzjonijiet li jkunu qed jiksru l-leġiżlazzjoni doganali jew agrikola, billi żżid, permezz ta’ disseminazzjoni aktar rapida ta’ informazzjoni, l-effettività tal-kooperazzjoni u tal-proċeduri ta’ kontroll tal-amministrazzjonijiet doganali tagħhom li l-missjoni tagħhom tkopri tali operazzjonijiet. L-infrastruttura unika tas-Sistema ta’ Informazzjoni Doganali tkopri kemm il-kooperazzjoni amministrattivi u l-kooperazzjoni tal-pulizija abbażi tal-Pilastru preċedenti tal-Unjoni, Ġustizzja u Affarijiet Interni. Id-dimensjoni tal-kooperazzjoni tal-pulizija tas-Sistema ta’ Informazzjoni Doganali teknikament ma tistax tkun diżassoċjata mid-dimensjoni amministrattiva tagħha billi t-tnejn huma mħaddma taħt sistema ta’ teknoloġija tal-informazzjoni komuni. Meta wieħed iqis li s-Sistema ta’ Informazzjoni Doganali nnifisha hija biss waħda minn diversi sistemi ta’ informazzjoni mħaddma taħt il-pjattaforma tal-l-AFIS u li l-għadd ta’ każijiet ta’ kooperazzjoni tal-pulizija huwa inqas mill-għadd ta’ każijiet ta’ kooperazzjoni amministrattiva fis-Sistema ta’ Informazzjoni Doganali, id-dimensjoni tal-kooperazzjoni tal-pulizija tal-pjattaforma tal-AFIS hija meqjusa bħala anċillari għad-dimensjoni amministrattiva tagħha.

(8)

Bil-għan li jiżdiedu s-sinerġiji u l-flessibbiltà baġitarja, u li tiġi ssimplifikata l-ġestjoni, l-appoġġ tal-Unjoni fl-oqsma tal-protezzjoni tal-interessi finanzjarji tal-Unjoni, tar-rappurtar ta’ irregolaritajiet, u tal-assistenza amministrattiva reċiproka u tal-kooperazzjoni f’materji doganali u agrikoli jenħtieġ li jingħaqad flimkien u jiġi integrat f’programm uniku, il-Programm tal-Unjoni Kontra l-Frodi (“il-Programm”). Jenħtieġ li l -Programm jiġi stabbilit għal perjodu ta’ seba’ snin sabiex it-tul tiegħu jiġi allinjat ma’ dak tal-qafas finanzjarju pluriennali stipulat fir-Regolament tal-Kunsill (UE, Euratom)2020/2093 (8).

(9)

Il-Programm għalhekk jenħtieġ li jinkludi komponent simili għall-programm Erkole III, it-tieni komponent li jiżgura l-finanzjament tal-IMS, u t-tielet komponent li jiffinanzja l-attivitajiet fil-kompitu tal-Kummissjoni skont ir-Regolament (KE) Nru 515/97, inkluż il-pjattaforma AFIS.

(10)

Jenħtieġ li l-Programm jiffaċilita l-kooperazzjoni fost l-awtoritajiet rilevanti tal-Istati Membri u bejn l-Istati Membri, il-Kummissjoni u korpi rilevanti oħra tal-Unjoni, inkluż l–Uffiċċju tal-Prosekutur Pubbliku Ewropew (UPPE), fejn xieraq, fir-rigward ta’ dawk l-Istati Membri li jipparteċipaw f’kooperazzjoni msaħħa skont ir-Regolament tal-Kunsill (UE) 2017/1939 (9), sabiex tiġi żgurata protezzjoni effettiva tal-interessi finanzjarji tal-Unjoni, kif ukoll l-applikazzjoni korretta tal-liġi dwar materji doganali u agrikoli, mingħajr ma jiġu affettwati r-responsabbiltajiet tal-Istati Membri, u sabiex ikun żgurat l-użu aktar effettiv tar-riżorsi b’mod aktar effettiv milli jista’ jsir fil-livell nazzjonali. L-azzjoni fil-livell tal-Unjoni hija meħtieġa u ġustifikata peress li tgħin lill-Istati Membri biex kollettivament jipproteġu l-interessi finanzjarji tal-Unjoni u tinkoraġġixxi l-użu ta’ strutturi komuni tal-Unjoni sabiex jiżdiedu l-kooperazzjoni u l-iskambju ta’ informazzjoni bejn l-awtoritajiet kompetenti, filwaqt li tappoġġa r-rappurtar ta’ data dwar irregolaritajiet u dwar każijiet ta’ frodi.

(11)

Barra minn hekk, l-appoġġ għall-protezzjoni tal-interessi finanzjarji tal-Unjoni jenħtieġ li jindirizza l-aspetti kollha tal-baġit tal-Unjoni, kemm fuq in-naħa tad-dħul kif ukoll fuq in-naħa tal-infiq. F’dan il-kuntest, jenħtieġ li jiġi kkunsidrat b’mod xieraq il-fatt li l-Programm huwa l-uniku programm tal-Unjoni li jipproteġi speċifikament l-infiq tal-baġit tal-Unjoni.

(12)

Dan ir-Regolament jistabbilixxi pakkett finanzjarju għall-Programm, li għandu jikkostitwixxi l-ammont ta’ referenza primarja, fis-sens l-punt 18 tal-Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f’materji baġitarji u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta’ riżorsi proprji ġodda (10), għall-Parlament Ewropew u l-Kunsill matul il-proċedura baġitarja annwali.

(13)

Ir-Regolament (UE, Euratom) 2018/1046 tal-Parlament Ewropew u tal-Kunsill (11) (ir-Regolament Finanzjarju) japplika għal dan il-Programm. Ir-Regolament Finanzjarju jistabbilixxi regoli dwar l-implimentazzjoni tal-baġit tal-Unjoni, inkluż ir-regoli dwar għotjiet, premjijiet, akkwist, ġestjoni indiretta, strumenti finanzjarji, garanziji baġitarji, assistenza finanzjarja u r-rimborż ta’ esperti esterni. Ir-regoli adottati abbażi tal-Artikolu 322 TFUE jinkludu wkoll reġim ġenerali ta’ kondizzjonalità għall-protezzjoni tal-baġit tal-Unjoni.

(14)

It-tipi ta’ finanzjament u l-metodi ta’ implimentazzjoni skont dan ir-Regolament jenħtieġ li jintgħażlu abbażi tal-kapaċità tagħhom li jiksbu l-objettivi speċifiċi tal-azzjonijiet u li jagħtu riżultati, filwaqt li b’mod partikolari jitqiesu l-kostijiet tal-kontrolli, il-piż amministrattiv u r-riskju ta’ nuqqas ta’ konformità mistenni. F’dan ir-rigward, jenħtieġ li jitqiesu l-użu ta’ somom f’daqqa, rati fissi u kostijiet unitarji, kif ukoll finanzjament mhux marbut ma’ kostijiet kif imsemmi fl-Artikolu 125(1) tar-Regolament Finanzjarju.

(15)

Dan ir-Regolament jenħtieġ li jipprovdi lista indikattiva tal-azzjonijiet li għandhom jiġu ffinanzjati sabiex tkun żgurata l-kontinwità fil-finanzjament tal-azzjonijiet kollha fil-kompitu tal-Kummissjoni skont ir-Regolament (KE) Nru 515/97, inkluż tal-pjattaforma AFIS.

(16)

Jenħtieġ li l-azzjonijiet jkunu eliġibbli abbażi tal-kapaċità tagħhom li jiksbu l-objettivi speċifiċi tal-Programm. L-objettivi speċifiċi tal-Programm jenħtieġ li jinkludu l-forniment ta’ assistenza teknika speċjali lill-awtoritajiet kompetenti tal-Istati Membri, bħal pereżempju permezz tal-forniment ta’ għarfien speċifiku, tagħmir speċjalizzat u teknikament avvanzat u għodod effettivi tal-IT; permezz tal-iżgurar tal-appoġġ meħtieġ għall-investigazzjonijiet u l-faċilitazzjoni tagħhom, b’mod partikolari billi jinħolqu skwadri ta’ investigazzjoni konġunti u operazzjonijiet transfruntiera; jew billi jissaħħu l-iskambji tal-persunal għal proġetti speċifiċi. Barra minn hekk, l-azzjonijiet eliġibbli jenħtieġ li jinkludu wkoll l-organizzazzjoni ta’ taħriġ speċjalizzat immirat u workshops dwar l-analiżi tar-riskju u, fejn xieraq, konferenzi u studji ukoll.

(17)

Ix-xiri ta’ tagħmir permezz tal-istrument tal-Unjoni għal appoġġ finanzjarju għal tagħmir ta’ kontroll doganali stabbilit minn Regolament tal-Parlament Ewropew u tal-Kunsill li jistabbilixxi, bħala parti mill-Fond għall-Ġestjoni Integrata tal-Fruntieri, l-istrument għal appoġġ finanzjarju għal tagħmir ta’ kontroll doganali ikollu impatt pożittiv fuq il-ġlieda kontra l-frodi li taffettwa l-interessi finanzjarji tal-Unjoni. Skont dak l-istrument ikun hemm obbligu li tiġi evitata kwalunkwe duplikazzjoni fl-appoġġ tal-Unjoni. Jenħtieġ li l-Programm jiżgura bl-istess mod li tiġi evitata kwalunkwe duplikazzjoni fl-appoġġ tal-Unjoni u, jenħtieġ li, fil-prinċipju, jiffoka l-appoġġ tiegħu lejn l-akkwist ta’ tipi ta’ tagħmir li ma jaqgħux fil-kamp ta’ applikazzjoni tal-istrument tal-Unjoni għal appoġġ finanzjarju tal-Unjoni għal tagħmir ta’ kontroll doganali, jew għal tagħmir li l-benefiċjarji tiegħu huma awtoritajiet li mhumiex dawk taħt il-mira tal-istrument tal-Unjoni għal appoġġ finanzjarju għal tagħmir ta’ kontroll doganali. Barra minn hekk, għandu jiġi żgurat li t-tagħmir iffinanzjat ikun xieraq għall-iskopijiet ta’ kontribut għall-protezzjoni tal-interess finanzjarju tal-Unjoni.

(18)

Jenħtieġ li l-Programm ikun miftuħ għal parteċipazzjoni mill-membri tal-Assoċjazzjoni Ewropea tal-Kummerċ Ħieles li huma membri taż-Żona Ekonomika Ewropea (ŻEE). Jenħtieġ li jkun miftuħ ukoll għal parteċipazzjoni mill-pajjiżi aderenti, il-pajjiżi kandidati u l-pajjiżi kandidati potenzjali, kif ukoll il-pajjiżi tal-Politika Ewropea tal-Viċinat, f’konformità mal-prinċipji ġenerali u t-termini u l-kondizzjonijiet ġenerali għall-parteċipazzjoni ta’ dawk il-pajjiżi fil-programmi tal-Unjoni stabbiliti fil-ftehimiet qafas rispettivi u fid-deċiżjonijiet tal-Kunsill ta’ Assoċjazzjoni, jew f’arranġamenti simili. Jenħtieġ li l-Programm ikun miftuħ ukoll għal pajjiżi terzi oħra sakemm dawn jidħlu fi ftehim speċifiku li jkopri l-kondizzjonijiet speċifiċi tal-parteċipazzjoni tagħhom fi programmi tal-Unjoni.

(19)

Filwaqt li jitqiesu l-evalwazzjonijiet preċedenti tal-programmi Erkole u sabiex jissaħħaħ il-Programm, jenħtieġ li l-parteċipazzjoni tal-entitajiet stabbiliti f’pajjiż terz li ma jkunx assoċjat ma’ dan il-Programm tkun possibbli fuq bażi eċċezzjonali.

(20)

B’mod partikolari, jenħtieġ li titħeġġeġ il-parteċipazzjoni ta’ entitajiet stabbiliti f’pajjiżi terzi li għandhom fis-seħħ ftehim ta’ assoċjazzjoni mal-Unjoni, bil-għan li tissaħħaħ il-protezzjoni tal-interessi finanzjarji tal-Unjoni permezz tal-kooperazzjoni b’rabta mad-dwana u permezz tal-iskambju tal-aħjar prattiki, partikularment fir-rigward tal-ġlieda kontra l-frodi, il-korruzzjoni u kontra attivitajiet illegali oħra li jaffettwaw l-interessi finanzjarji tal-Unjoni u fir-rigward tal-indirizzar tal-isfidi relatati ma’ żviluppi teknoloġiċi ġodda.

(21)

Jenħtieġ li l-Programm jiġi implimentat b’kont meħud tar-rakkomandazzjonijiet u l-miżuri elenkati fil-komunikazzjoni tal-Kummissjoni tas-6 ta’ Ġunju 2013 bit-titlu “L-intensifikar tal-ġlieda kontra l-kuntrabandu tas-sigaretti u forom oħra ta’ kummerċ illegali fil-prodotti tat-tabakk — Strateġija komprensiva tal-UE”, kif ukoll ir-rapport ta’ progress tat-12 ta’ Mejju 2017 dwar l-implimentazzjoni ta’ dik il-komunikazzjoni.

(22)

L-Unjoni rratifikat il-Protokoll biex jiġi Eliminat il-Kummerċ Illeċitu tal-Prodotti tat-Tabakk tal-Konvenzjoni ta’ Qafas tal-Organizzazzjoni Dinjija tas-Saħħa dwar il-Kontroll fuq it-Tabakk (il-“Protokoll”) fl-2016. Il-Protokoll iservi biex jipproteġi l-interessi finanzjarji tal-Unjoni sa fejn jirrigwarda l-ġlieda kontra l-kummerċ illeċitu transfruntiera tal-prodotti tat-tabakk, li jikkawża telf fid-dħul. Jenħtieġ li l-Programm jappoġġja lis-Segretarjat tal-Konvenzjoni ta’ Qafas tal-Organizzazzjoni Dinjija tas-Saħħa dwar il-Kontroll fuq it-Tabakk fil-funzjonijiet tiegħu relatati ma’ dan il-Protokoll. Jenħtieġ li jappoġġja wkoll attivitajiet oħra organizzati mis-Segretarjat b’konnessjoni mal-ġlieda kontra l-kummerċ illeċitu tal-prodotti tat-tabakk.

(23)

F’konformità mar-Regolament Finanzjarju u r-Regolament (UE, Euratom) Nru 883/2013 tal-Parlament Ewropew u tal-Kunsill (12), u mar-Regolamenti tal-Kunsill (Euratom, KE) Nru 2988/95 (13), (Euratom, KE) Nru 2185/96 (14) u (UE) 2017/1939, l-interessi finanzjarji tal-Unjoni għandhom jiġu protetti permezz ta’ miżuri proporzjonati, inkluż miżuri relatati mal-prevenzjoni, id-detezzjoni, il-korrezzjoni u l-investigazzjoni ta’ irregolaritajiet, inkluż il-frodi, mal-irkupru ta’ fondi mitlufa, imħallsa bi żball jew użati b’mod mhux korrett u fejn xieraq, mal-impożizzjoni ta’ penali amministrattivi. B’mod partikolari, f’konformità mar-Regolamenti (Euratom, KE) Nru 2185/96 u (UE, Euratom) Nru 883/2013, l-Uffiċċju Ewropew Kontra l-Frodi (OLAF) għandu s-setgħa li jwettaq investigazzjonijiet amministrattivi, inkluż verifiki u spezzjonijiet fuq il-post, bil-għan li jiġi stabbilit jekk kienx hemm frodi, korruzzjoni jew kwalunkwe attività illegali oħra li taffettwa l-interessi finanzjarji tal-Unjoni. L- UPPE għandu s-setgħa, f’konformità mar-Regolament (UE) 2017/1939, li jinvestiga u jressaq għall-prosekuzzjoni reati kriminali li jaffetwaw l-interessi finanzjarji tal-Unjoni, kif previst fid-Direttiva (UE) 2017/1371 tal-Parlament Ewropew u tal-Kunsill (15). F’konformità mar-Regolament Finanzjarju, kwalunkwe persuna jew entità li tirċievi fondi mill-Unjoni għandha tikkoopera bis-sħiħ fil-protezzjoni tal-interessi finanzjarji tal-Unjoni, tagħti d-drittijiet u l-aċċess neċessarji lill-Kummissjoni, lill-OLAF, lill-Qorti Ewropea tal-Awdituri u, fir-rigward ta’ dawk l-Istati Membri li jipparteċipaw fil-kooperazzjoni msaħħa skont ir-Regolament (UE) 2017/1939, lill-UPPE, u tiżgura li kwalunkwe parti terza involuta fl-implimentazzjoni ta’ fondi tal-Unjoni tagħti drittijiet ekwivalenti.

(24)

Il-pajjiżi terzi li huma membri taż-Żona Ekonomika Ewropea (ŻEE) jistgħu jipparteċipaw fil-programmi tal-Unjoni fil-qafas tal-kooperazzjoni stabbilita skont il-Ftehim dwar iż-Żona Ekonomika Ewropea (16), li jipprevedi l-implimentazzjoni tal-programmi abbażi ta’ deċiżjoni adottata skont dak il-Ftehim. Pajjiżi terzi jistgħu wkoll jipparteċipaw abbażi ta’ strumenti ġuridiċi oħrajn. Jenħtieġ li tiġi introdotta dispożizzjoni speċifika f’dan ir-Regolament li tirrikjedi li pajjiżi terzi jagħtu d-drittijiet u l-aċċess meħtieġa lill-uffiċjal awtorizzanti responsabbli, lill-OLAF u lill-Qorti tal-Awdituri biex jeżerċitaw b’mod komprensiv il-kompetenzi rispettivi tagħhom.

(25)

Skont id-Deċiżjoni tal-Kunsill 2013/755/UE (17), persuni u entitajiet stabbiliti f’pajjiżi u territorji extra-Ewropej huma eliġibbli għal finanzjament soġġett għar-regoli u l-objettivi tal-Programm u għall-arranġamenti possibbli applikabbli għall-Istat Membru li magħhom il-pajjiż jew it-territorju extra-Ewropew rilevanti jkun marbut.

(26)

Sabiex jiġu żgurati kondizzjonijiet uniformi għall-implimentazzjoni tal-Programm, jenħtieġ li jiġu kkonferiti setgħat ta’ implimentazzjoni lill-Kummissjoni. Jenħtieġ li l-Kummissjoni tadotta programmi ta’ ħidma li jistipulaw, inter alia, il-prijoritajiet u l-kriterji ta’ evalwazzjoni għall-għotjiet għall-azzjonijiet.

(27)

Jenħtieġ li dan ir-Regolament jiddetermina r-rata massima possibbli ta’ kofinanzjament għall-għotjiet.

(28)

Skont il-paragrafi 22 u 23 tal-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (18), jenħtieġ li dan il-Programm jiġi evalwat abbażi tal-informazzjoni miġbura f’konformità ma’ rekwiżiti speċifiċi ta’ monitoraġġ, filwaqt li jiġi evitat piż amministrattiv, b’mod partikolari fuq l-Istati Membri, kif ukoll regolamentazzjoni żejda. Dawk ir-rekwiżiti, fejn xieraq, jenħtieġ li jinkludu indikaturi li jistgħu jitkejlu bħala bażi għall-evalwazzjoni tal-effetti tal-Programm fuq il-post. L-evalwazzjoni għandha titwettaq fil-ħin u b’mod indipendenti u oġġettiv.

(29)

Is-setgħa ta’ adozzjoni ta’ atti f’konformità mal-Artikolu 290 TFUE jenħtieġ li tiġi delegata lill-Kummissjoni fir-rigward tal-emendar tal-lista ta’ indikaturi biex jitkejjel kemm intlaħqu l-objettivi ġenerali u speċifiċi tal-Programm fejn dan jitqies li huwa neċessarju, kif ukoll biex jiġi ssupplimentat dan ir-Regolament b’dispożizzjonijiet dwar l-istabbiliment ta’ qafas ta’ monitoraġġ u ta’ evalwazzjoni. Huwa partikularment importanti li matul il-ħidma preparatorja tagħha, il-Kummissjoni twettaq konsultazzjonijiet xierqa, inkluż fil-livell tal-esperti, u li dawk il-konsultazzjonijiet isiru f’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet. B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jkunu qed jittrattaw it-tħejjija ta’ atti delegati.

(30)

Peress li l-objettivi ta’ dan ir-Regolament ma jistgħux jinkisbu b’mod suffiċjenti mill-Istati Membri minħabba n-natura transfruntiera tal-kwistjonijiet involuti, iżda pjuttost jistgħu jinkisbu aħjar fil-livell tal-Unjoni minħabba l-valur aġġunt tal-Unjoni, l-Unjoni tista’ tadotta miżuri f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jintlaħqu dawk l-objettivi.

(31)

L-Artikolu 42a(1) u (2) tar-Regolament (KE) Nru 515/97 huwa l-bażi ġuridika għall-finanzjament tal-AFIS. Jenħtieġ li dan ir-Regolament jissostitwixxi dik il-bażi ġuridika b’ oħra ġdida. Għaldaqstant jenħtieġ li l-Artikolu 42a(1) u (2) tar-Regolament (KE) Nru 515/97 jitħassru.

(32)

Ir-Regolament (UE) Nru 250/2014 li jistabbilixxi l-programm Erkole III kopra l-perijodu mill-1 ta’ Jannar 2014 sal-31 ta’ Diċembru 2020. Jenħtieġ li dan ir-Regolament jipprevedi segwitu għall-programm Erkole III, li jibda mill-1 ta’ Jannar 2021. Għaldaqstant ir-Regolament (UE) Nru 250/2014 jenħtieġ li jitħassar.

(33)

Filwaqt li jirrifletti l-importanza tal-indirizzar tat-tibdil fil-klima f’konformità mal-impenji tal-Unjoni għall-implimentazzjoni tal-Ftehim ta’ Pariġi adottat fil-kuntest tal-Konvenzjoni Qafas tan-Nazzjonijiet Uniti dwar it-Tibdil fil-Klima u tal-Għanijiet ta’ Żvilupp Sostenibbli tan-Nazzjonijiet Uniti, il-Programm huwa maħsub li jikkontribwixxi sabiex l-azzjonijiet klimatiċi jiġu integrati u biex tinkiseb il-mira ġenerali li 30 % tal-baġit tal-Unjoni jappoġġja l-objettivi klimatiċi.

(34)

F’konformità mal-Artikolu 193(2) tar-Regolament Finanzjarju, tista’ tingħata għotja għal azzjoni li tkun diġà bdiet, dment li l-applikant ikun jista’ juri l-ħtieġa li l-azzjoni tinbeda qabel l-iffirmar tal-ftehim ta’ għotja. Madankollu, il-kostijiet imġarrba qabel id-data tal-preżentazzjoni tal-applikazzjoni għall-għotja mhumiex eliġibbli, ħlief f’każijiet eċċezzjonali debitament ġustifikati. Sabiex jiġi evitat kwalunkwe tfixkil fl-appoġġ tal-Unjoni li jista’ jippreġudika l-interessi tal-Unjoni, jenħtieġ li jkun possibbli li fid-deċiżjoni ta’ finanzjament jiġu previsti, matul perijodu ta’ żmien limitat fil-bidu tal-qafas finanzjarju pluriennali 2021-2027, u f’każijiet debitament ġustifikati biss, l-eliġibbiltà tal-attivitajiet u l-kostijiet mill-bidu tas-sena finanzjarja 2021, anke jekk dawn ġew implimentati u mġarrba qabel il-preżentazzjoni tal-applikazzjoni għall-għotja.

(35)

Sabiex tiġi żgurata kontinwità fl-għoti ta’ appoġġ fil-qasam ta’ politika rilevanti u biex tkun possibbli l-implimentazzjoni tal-Programm mill-bidu tal-qafas finanzjarju pluriennali 2021-2027, dan ir-Regolament jenħtieġ li jidħol fis-seħħ b’urġenza u jenħtieġ li japplika, b’effett retroattiv, mill-1 ta’ Jannar 2021,