(1)

L-Artikoli 168 u 168a tad-Direttiva 2006/112/KE jistabbilixxu d-dritt ta’ persuna taxxabbli li tnaqqas it-taxxa fuq il-valur miżjud (VAT) imposta fuq provvisti ta’ merkanzija u ta’ servizzi riċevuti minnha għall-iskopijiet tat-tranżazzjonijiet intaxxati tagħha. Il-punt (a) tal-Artikolu 26(1) ta’ dik id-Direttiva fih rekwiżit li tiġi ddikjarata l-VAT meta assi ta’ negozju jintuża għal finijiet privati ta’ persuni taxxabbli jew tal-persunal tagħhom jew, b’mod aktar ġenerali, għal finijiet oħra għajr dawk tan-negozju tagħhom.

(2)

Id-Deċiżjoni ta’ Implimentazzjoni tal-Kunsill (UE) 2018/1994 (2) awtorizzat lill-Kroazja, sal-31 ta’ Diċembru 2021, li tillimita għal 50 % id-dritt li tnaqqas il-VAT imħallsa fuq ix-xiri u l-kiri ta’ karozzi tal-passiġġieri speċifikati b’massimu ta’ tmien postijiet minbarra l-post tas-sewwieq, inkluż ix-xiri tal-oġġetti u s-servizzi kollha pprovduti b’rabta magħhom, meta dawk il-karozzi ma jintużawx kompletament għal skopijiet ta’ negozju. L-awtorizzazzjoni teħles ukoll lill-persuni taxxabbli milli jkollhom jittrattaw l-użu mhux marbut man-negozju tagħhom ta’ tali karozzi tal-passiġġieri bħala provvista ta’ servizzi għall-kunsiderazzjoni.

(3)

Permezz ta’ ittra rreġistrata mal-Kummissjoni fil-31 ta’ Marzu 2021, il-Kroazja talbet awtorizzazzjoni biex tkompli tapplika l-miżura speċjali li tidderoga mill-Artikolu 26(1), il-punt (a), u l-Artikolu 168 tad-Direttiva 2006/112/KE sabiex tillimita d-dritt ta’ tnaqqis fir-rigward tan-nefqa marbuta ma’ ċerti karozzi tal-passiġġieri li ma jintużawx biss għal skopijiet ta’ negozju (il-“miżura speċjali”).

(4)

Il-Kroazja tapplika l-Artikolu 168a(1) tad-Direttiva 2006/112/KE fir-rigward tal-VAT fuq in-nefqa relatata ma’ merkanzija ekonomika oħra li tifforma parti mill-assi tan-negozju skont l-Artikolu 168a(2) ta’ dik id-Direttiva. Għalhekk, id-Deċiżjoni ta’ Implimentazzjoni (UE) 2018/1994 kellha tinkludi referenza għall-Artikolu 168a tad-Direttiva 2006/112/KE.

(5)

F’konformità mal-Artikolu 395(2), it-tieni subparagrafu, tad-Direttiva 2006/112/KE, il-Kummissjoni, permezz ta’ ittra datata t-22 ta’ April 2021, għarrfet lill-Istati Membri l-oħrajn dwar it-talba li għamlet il-Kroazja. B’ittra datata t-23 ta’ April 2021, il-Kummissjoni nnotifikat lill-Kroazja li hija kellha t-tagħrif kollu meqjus minnha bħala meħtieġ sabiex tivvaluta t-talba.

(6)

Kif meħtieġ mill-Artikolu 6, it-tielet paragrafu tad-Deċiżjoni ta’ Implimentazzjoni (UE) 2018/1994, il-Kroazja ppreżentat rapport li jinkludi r-reviżjoni tal-perċentwal stabbilit għal-limitazzjoni tad-dritt għat-tnaqqis. Abbażi tal-informazzjoni disponibbli attwalment, il-Kroazja kkonfermat li l-limitu ta’ 50 % għadu ġustifikabbli u għadu xieraq.

(7)

Minħabba l-impatt pożittiv tal-miżura speċjali fuq il-piż amministrattiv kemm tal-kontribwenti kif ukoll tal-awtoritajiet tat-taxxa billi tissimplifika l-ġbir tal-VAT u tipprevjeni l-evażjoni tat-taxxa minħabba ż-żamma skorretta ta’ rekords, il-Kroazja għandha għalhekk tkun awtorizzata tkompli tapplika l-miżura speċjali. Jenħtieġ li l-estensjoni tal-miżuri speċjali jkollha limitu taż-żmien, sal-31 ta’ Diċembru 2024, biex tkun tista’ ssir evalwazzjoni tal-effettività tagħha u tal-perċentwal xieraq.

(8)

F’każ li l-Kroazja tqis li tkun meħtieġa estensjoni ulterjuri tal-miżura speċjali, jenħtieġ li tissottometti t-talba għal estensjoni akkumpanjata minn rapport li jinkludi rieżami tal-perċentwal applikat lill-Kummissjoni sal-31 ta’ Marzu 2024.

(9)

Il-miżura speċjali se jkollha effett negliġibbli fuq l-ammont globali tad-dħul mit-taxxa miġbur fl-istadju tal-konsum finali u mhux se jkollha effett negattiv fuq ir-riżorsi proprji tal-Unjoni li jinġabru mit-taxxa fuq il-VAT.

(10)

Għalhekk jenħtieġ li d-Deċiżjoni ta’ Implimentazzjoni (UE) 2018/1994 tiġi emendata skont dan,