29.6.2018   

MT

Il-Ġurnal Uffiċjali tal-Unjoni Ewropea

L 164/44

(1)

Fis-27 ta' April 2009, wara rakkomandazzjoni mill-Kummissjoni, il-Kunsill iddeċieda, bid-Deċiżjoni 2009/414/KE (1), f'konformità mal-Artikolu 126(6) tat-Trattat, li kien jeżisti defiċit eċċessiv fi Franza. Il-Kunsill innota li d-defiċit pubbliku nnotifikat għall-2008 kien ta' 3,2 % tal-PDG, u għalhekk aktar mill-valur referenzjarju tat-Trattat ta' 3 % tal-PDG. Id-dejn gross pubbliku, li kien ilu aktar mill-valur referenzjarju tat-Trattat ta' 60 % tal-PDG mill-2003, kien ippjanat li jilħaq 66,7 % tal-PDG fl-2008.

(2)

Fl-istess data, f'konformità mal-Artikolu 126(7) tat-Trattat u l-Artikolu 3(4) tar-Regolament (KE) Nru 1467/97 (2), il-Kunsill, abbażi ta' rakkomandazzjoni mill-Kummissjoni, ħareġ rakkomandazzjoni lil Franza bl-għan li s-sitwazzjoni tad-defiċit eċċessiv tinġieb fi tmiemha sa mhux aktar tard mill-2012. Il-Kunsill iffissa wkoll is-27 ta' Ottubru 2009 bħala d-data ta' skadenza għal azzjoni effettiva.

(3)

Fit-2 ta' Diċembru 2009, il-Kunsill indirizza rakkomandazzjoni ġdida lil Franza, abbażi tal-Artikolu 126(7) tat-Trattat, li estendiet l-iskadenza għall-korrezzjoni tad-defiċit eċċessiv sal-2013. Il-Kunsill qies li Franza kienet ħadet azzjoni effettiva, iżda li kienu ġraw avvenimenti ekonomiċi negattivi mhux mistennija li kellhom konsegwenzi sfavorevoli kbar għall-finanzi pubbliċi..

(4)

Fil-21 ta' Ġunju 2013, abbażi tal-Artikolu 126(7) tat-Trattat, il-Kunsill indirizza rakkomandazzjoni ġdida lil Franza, li estendiet l-iskadenza għall-korrezzjoni tad-defiċit eċċessiv sal-2015. Il-Kunsill ikkunsidra li l-evidenza disponibbli ma kinitx tippermetti konklużjoni li ma ttieħdet l-ebda azzjoni effettiva, iżda li kienu ġraw avvenimenti ekonomiċi negattivi mhux mistennija li kellhom konsegwenzi sfavorevoli kbar għall-finanzi pubbliċi.

(5)

Fl-10 ta' Marzu 2015, il-Kunsill skont l-Artikolu 126(7) tat-Trattat, ħareġ rakkomandazzjoni ġdida lil Franza bil-ħsieb li s-sitwazzjoni ta' defiċit eċċessiv tinġieb fi tmiemha sal-2017. Il-Kunsill stabbilixxa id-data ta' skadenza tal-10 ta' Ġunju 2015 sa meta Franza kellha tirrapporta fid-dettall dwar l-azzjoni li tittieħed.

(6)

Fl-1 ta' Lulju 2015, il-Kummissjoni kkonkludiet li l-miri tad-defiċit nominali għal Franza kienu mistennija li jintlaħqu kemm fl-2015 kif ukoll fl-2016, filwaqt li l-isforz fiskali previst, skont il-parametri kollha, kien projettat li jkun inqas minn dawk rakkomandati fl-2015 u fl-2016. Għaldaqstant, skont il-metodoloġija għall-valutazzjoni tal-azzjoni effettiva, il-Kummissjoni kkunsidrat li l-proċedura kellha tiġi sospiża.

(7)

F'konformità mal-Artikolu 4 tal-Protokoll dwar il-proċedura ta' defiċit eċċessiv anness mat-Trattati, il-Kummissjoni tipprovdi d-data għall-implimentazzjoni tal-proċedura. Bħala parti mill-applikazzjoni ta' dan il-Protokoll, l-Istati Membri għandhom jinnotifikaw id-data dwar id-defiċit u d-dejn pubbliċi kif ukoll varjabbli assoċjati oħra darbtejn fis-sena, jiġifieri qabel l-1 ta' April u qabel l-1 ta' Ottubru, f'konformità mal-Artikolu 3 tar-Regolament tal-Kunsill (KE) Nru 479/2009 (3).

(8)

Il-Kunsill jieħu deċiżjoni biex jabroga deċiżjoni dwar l-eżistenza ta' defiċit eċċessiv abbażi tad-data notifikata. Barra minn hekk, jenħtieġ li tali deċiżjoni tiġi abrogata biss jekk il-previżjonijiet tal-Kummissjoni jindikaw li d-defiċit ma jkunx ser jaqbeż il-valur referenzjarju tat-Trattat ta' 3 % tal-PDG tul il-perjodu ta' previżjoni.

(9)

Id-data pprovduta mill-Kummissjoni (Eurostat) skont l-Artikolu 14 tar-Regolament (KE) Nru 479/2009, wara n-notifika ta' April 2018 minn Franza, il-Programm ta' Stabbiltà tal-2018 u l-previżjoni tar-rebbiegħa 2018 tal-Kummissjoni tiġġustifika l-konklużjonijiet li ġejjin:

(10)

F'konformità mal-Artikolu 126(12) tat-Trattat, Deċiżjoni tal-Kunsill dwar l-eżistenza ta' defiċit eċċessiv għandha tiġi abrogata meta d-defiċit eċċessiv fl-Istat Membru kkonċernat, fil-fehma tal-Kunsill, ikun ġie kkoreġut.

(11)

Fil-fehma tal-Kunsill, id-defiċit eċċessiv fi Franza ġie kkoreġut u għalhekk jenħtieġ li d-Deċiżjoni 2009/414/KE tiġi abrogata.

(12)

Mill-2018, is-sena ta' wara dik li fiha saret il-korrezzjoni tad-defiċit eċċessiv, Franza hija soġġetta għall-parti preventiva tal-Patt ta' Stabbiltà u Tkabbir, u jenħtieġ li timxi lejn l-objettiv fuq terminu medju tagħha b'pass xieraq, inkluż billi tirrispetta l-parametru referenzjarju tan-nefqa, u li tikkonforma mal-kriterju tad-dejn skont l-Artikolu 2(1a) tar-Regolament (KE) Nru 1467/97,