20.6.2015   

MT

Il-Ġurnal Uffiċjali tal-Unjoni Ewropea

L 156/2

(1)

Ir-Regolament tal-Kummissjoni (KE) Nru 1881/2006 (2) jistipula l-livelli massimi permessi ta' okratossina A u ta' aflatossini fl-ikel. Il-prodotti tal-ikel biss li jikkonformaw mal-livell massimu jistgħu jitqiegħdu fis-suq tal-Unjoni.

(2)

Ir-Regolament (KE) Nru 882/2004 jistipula li l-Istati Membri huma obbligati li jiżguraw li l-kontrolli uffiċjali jitwettqu b'mod regolari, abbażi ta' riskju u bi frekwenza xierqa sabiex jinkisbu l-għanijiet tar-Regolament, li huma fost l-oħrajn il-prevenzjoni, l-eliminazzjoni jew it-tnaqqis tar-riskji għall-bnedmin u għall-annimali sa livelli aċċettabbli.

(3)

L-Artikolu 23 tar-Regolament (KE) Nru 882/2004 jistipula li jistgħu jiġu approvati kontrolli speċifiċi ta' qabel l-esportazzjoni, imwettqa minn pajjiż terz fuq l-ikel u l-għalf qabel l-esportazzjoni lejn l-Unjoni Ewropea, sabiex jiġi vverifikat li l-prodotti esportati jissodisfaw ir-rekwiżiti tal-Unjoni.

(4)

Din l-approvazzjoni tista' tingħata biss lil pajjiż terz jekk verifika tal-Unjoni Ewropea tkun uriet li l-ikel jew l-għalf esportat lejn l-Unjoni Ewropea jkun jissodisfa r-rekwiżiti tal-Unjoni jew rekwiżiti ekwivalenti u li l-kontrolli mwettqa fil-pajjiż terz qabel il-bgħit jitqiesu effettivi u effiċjenti biżżejjed biex jissostitwixxu jew inaqqsu l-kontrolli tad-dokumenti, tal-identità u dawk fiżiċi stipulati fil-liġi tal-UE.

(5)

F'April tal-2005, l-Istati Uniti tal-Amerka (minn hawn 'il quddiem imsejħin “l-Istati Uniti”) ressqu applikazzjoni lill-Kummissjoni biex jiksbu approvazzjoni tal-kontrolli ta' qabel l-esportazzjoni mwettqa mill-awtoritajiet kompetenti tal-Istati Uniti fuq il-kontaminazzjoni tal-karawett mill-aflatossini, intiż għall-esportazzjoni lejn l-Unjoni.

(6)

Wara verifika li wettaq l-Uffiċċju Alimentari u Veterinarju (FVO) tal-Kummissjoni, l-approvazzjoni ta' dawk il-kontrolli ta' qabel l-esportazzjoni li jimmiraw għall-iżgurar tal-konformità mal-livelli massimi ta' aflatossini stipulati fil-liġi tal-Unjoni ngħatat bid-Deċiżjoni tal-Kummissjoni 2008/47/KE (3).

(7)

Fit-8 ta' Ottubru 2007, il-Kanada ressqet applikazzjoni lill-Kummissjoni biex tikseb approvazzjoni tal-kontrolli ta' qabel l-esportazzjoni mwettqa mill-awtoritajiet kompetenti tal-Kanada fuq il-kontaminazzjoni mill-okratossina A fil-qamħ (komuni u durum) u fid-dqiq tal-qamħ maħsuba għall-esportazzjoni lejn l-Unjoni Ewropea.

(8)

Il-Kummissjoni vvalutat fid-dettall it-tagħrif ipprovdut mill-Kummissjoni Kanadiża għall-Qamħ, li hija l-awtorità kompetenti tal-Kanada li taħt ir-responsabbiltà tagħha jitwettqu l-kontrolli ta' qabel l-esportazzjoni, u kienet tal-fehma li l-garanziji mogħtija huma sodisfaċenti sabiex taċċetta l-applikazzjoni għall-approvazzjoni tal-kontrolli ta' qabel l-esportazzjoni fuq il-qamħ u fuq ċerti prodotti li ġejjin minnu għall-preżenza tal-okratossina A. Għalhekk, l-approvazzjoni ta' dawk il-kontrolli ta' qabel l-esportazzjoni li jimmiraw għall-iżgurar tal-konformità mal-livelli massimi ta' okratossina A stipulati fil-liġi tal-Unjoni ngħatat bir-Regolament ta' Implimentazzjoni tal-Kummissjoni (UE) Nru 844/2011 (4).

(9)

Fil-21 ta' Novembru 2012, l-Istati Uniti ressqu applikazzjoni lill-Kummissjoni biex jiksbu approvazzjoni tal-kontrolli ta' qabel l-esportazzjoni mwettqa mill-awtoritajiet kompetenti tal-Istati Uniti tal-Amerka fuq il-kontaminazzjoni tal-lewż mill-aflatossini, intiż għall-esportazzjoni lejn l-Unjoni.

(10)

Wara verifika mwettqa mill-FVO tal-Kummissjoni u wara li evalwat fid-dettall it-tagħrif addizzjonali mogħti mill-Istati Uniti, il-Kummissjoni tqis li l-garanziji mogħtija huma sodisfaċenti u jiġġustifikaw l-approvazzjoni tal-kontrolli ta' qabel l-esportazzjoni. Għalhekk, jixraq li tingħata l-approvazzjoni tal-kontrolli ta' qabel l-esportazzjoni mwettqa li jimmiraw għall-iżgurar tal-konformità mal-livelli massimi ta' aflatossini stipulati fil-liġi tal-Unjoni.

(11)

Jixraq li l-approvazzjonijiet kollha tal-kontrolli ta' qabel l-esportazzjoni li jitwettqu minn ċerti pajjiżi terzi fir-rigward tal-preżenza ta' mikotossini fl-ikel ikunu f'Regolament wieħed sabiex tiġi ssimplifikata l-leġiżlazzjoni u sabiex jiġi żgurat approċċ uniformi. Għalhekk, id-Deċiżjoni 2008/47/KE u r-Regolament ta' Implimentazzjoni (UE) Nru 844/2011 għandhom jiġu sostitwiti u r-regoli li hemm f'dawk l-atti għandhom jiġu amalgamati ma' dan ir-Regolament ta' Implimentazzjoni. Madankollu, ġew introdotti xi bidliet żgħar sabiex id-dispożizzjonijiet jiġu allinjati fir-rigward tal-frekwenza tal-kontrolli u sabiex id-dispożizzjonijiet jiġu aġġornati biex jirriflettu l-bidliet fil-kodiċijiet tan-Nomenklatura Magħquda (NM).

(12)

F'konformità mal-Artikolu 16(2) tar-Regolament (KE) Nru 882/2004, jeħtieġ li l-Istati Membri jaġġustaw il-frekwenza tal-kontrolli fiżiċi fuq l-importazzjonijiet mar-riskju assoċjat ma' kategoriji differenti tal-ikel filwaqt li jqisu, fost affarijiet oħra, il-garanziji mogħtija mill-awtoritajiet kompetenti tal-pajjiż terz ta' oriġini tal-ikel inkwistjoni. Il-kontrolli sistematiċi ta' qabel l-esportazzjoni mwettqa taħt ir-responsabbiltà tal-awtorità kompetenti tal-pajjiż terz, f'konformità mal-approvazzjoni tal-Unjoni skont l-Artikolu 23 tar-Regolament (KE) Nru 882/2004, jipprovdu livell sodisfaċenti ta' garanziji b'rabta mal-kontaminazzjoni mill-mikotossini u għalhekk jippermettu lill-Istati Membri jnaqqsu l-frekwenza tal-kontrolli fiżiċi mwettqa fuq dawn il-prodotti bażiċi.

(13)

Il-frekwenza baxxa ta' kontroll stabbilita fl-Anness ta' dan ir-Regolament għandha tiġi segwita mill-Istati Membri li jimportaw bosta kunsinni tal-oġġetti tal-ikel ikkonċernati. L-Istati Membri li jimportaw biss numru limitat ta' kunsinni tal-oġġetti tal-ikel ikkonċernati għandhom jiżguraw frekwenza baxxa ta' kontrolli, mingħajr ma jkunu jistgħu jikkonformaw mal-frekwenza stabbilita tal-kontrolli.

(14)

Il-miżuri previsti f'dan ir-Regolament huma f'konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(a)

il-kontrolli ta' qabel l-esportazzjoni fir-rigward tal-aflatossini fil-karawett imniżżla fl-Anness I u prodotti fuq it-territorju tal-Istati Uniti;

(b)

il-kontrolli ta' qabel l-esportazzjoni fir-rigward tal-aflatossini fil-lewż imniżżla fl-Anness I u prodotti fit-territorju tal-Istati Uniti.

(a)

rapport li jkun fih ir-riżultati tat-teħid ta' kampjuni u tal-analiżi mwettqa f'konformità mad-dispożizzjonijiet tar-Regolament tal-Kummissjoni (KE) Nru 401/2006 (5), jew b'rekwiżiti ekwivalenti, minn laboratorju approvat għal dak il-għan mill-awtorità kompetenti;

(b)

ċertifikat skont il-mudell stabbilit fl-Anness II, li jkun imtela, ġie vverifikat u ġie ffirmat minn rappreżentant tal-awtorità kompetenti; iċ-ċertifikat ikun validu għal erba' xhur mid-data tal-ħruġ.