Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32012D0370

2012/370/UE: Deċiżjoni tal-Kunsill tat- 22 ta’ Ġunju 2012 li tirrevoka d-Deċiżjoni 2010/422/UE dwar l-eżistenza ta’ defiċit eċċessiv fil-Bulgarija

ĠU L 179, 11/07/2012, p. 19–20 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/dec/2012/370/oj

11.7.2012   

MT

Il-Ġurnal Uffiċjali tal-Unjoni Ewropea

L 179/19

DEĊIŻJONI TAL-KUNSILL

tat-22 ta’ Ġunju 2012

li tirrevoka d-Deċiżjoni 2010/422/UE dwar l-eżistenza ta’ defiċit eċċessiv fil-Bulgarija

(2012/370/UE)

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 126(12) tiegħu,

Wara li kkunsidra r-rakkomandazzjoni mill-Kummissjoni Ewropea,

Billi:

(1)

Fit-13 ta' Lulju 2010, permezz tad-Deċiżjoni 2010/422/UE (1), konsegwentement għal proposta mill-Kummissjoni f’konformità mal-Artikolu 126(6) tat-Trattat, il-Kunsill iddeċieda li fil-Bulgarija kien jeżisti defiċit eċċessiv. Il-Kunsill innota li d-defiċit pubbliku laħaq it-3,9 % tal-PDG fl-2009, u b’hekk ogħla mit-3% tal-valur ta' referenza tal-PDG skont it-Trattat, filwaqt li d-dejn gross tal-gvern ġenerali kien ta’ 14,8 % tal-PDG, li huwa ferm taħt is-60 % tal-valur ta' referenza tal-PDG skont it-Trattat (2).

(2)

Fit-13 ta' Lulju 2010, f’konformità mal-Artikolu 126(7) tat-Trattat u l-Artikolu 3(4) tar-Regolament tal-Kunsill (KE) 1467/97 tas-7 ta' Lulju 1997 dwar li titħaffef u tiġi ċċarata l-implimentazzjoni tal-proċedura ta’ defiċit eċċessiv (3), il-Kunsill, fuq il-bażi tar-rakkomandazzjoni tal-Kummissjoni, għamel rakkomandazzjoni indirizzata lill-Bulgarija bil-għan li s-sitwazzjoni tad-defiċit eċċessiv tinġieb fi tmiemha sa mhux aktar tard mill-2011. Ir-rakkomandazzjoni ġiet ippubblikata.

(3)

F’konformità mal-Artikolu 4 tal-Protokoll dwar il-proċedura ta’ defiċit eċċessiv anness mat-Trattati, il-Kummissjoni tipprovdi d-dejta għall-implimentazzjoni ta' din il-proċedura. Bħala parti mill-applikazzjoni ta’ dan il-Protokoll, l-Istati Membri għandhom jinnotifikaw dejta dwar defiċit u dejn tal-gvern u dwar fatturi varjabbli assoċjati oħra darbtejn fis-sena, jiġifieri qabel l-1 ta’ April u qabel l-1 ta' Ottubru, f’konformità mal-Artikolu 3 tar-Regolament tal-Kunsill (KE) Nru 479/2009 tal-25 ta’ Mejju 2009 dwar l-applikazzjoni tal-Protokoll dwar il-proċedura tal-iżbilanċ eċċessiv anness mat-Trattat li jistabilixxi l-Komunità Ewropea (4).

(4)

Meta jikkunsidra jekk deċiżjoni dwar l-eżistenza ta’ defiċit eċċessiv għandhiex tiġi revokata, il-Kunsill għandu jieħu deċiżjoni fuq il-bażi tad-dejta notifikata. Barra minn hekk, deċiżjoni dwar l-eżistenza ta’ defiċit eċċessiv għandha tiġi revokata biss jekk il-previżjonijiet tal-Kummissjoni jindikaw li d-defiċit mhux se jaqbeż il-limitu ta' 3 % tal-PDG tul taż-żmien previst (5).

(5)

Fuq il-bażi tad-dejta pprovduta mill-Kummissjoni (Eurostat) taħt l-Artikolu 14 tar-Regolament (KE) Nru 479/2009 wara n-notifka mill-Bulgarija qabel l-1 ta’ April 2012 u fuq il-bażi tal-previżjonijiet tar-rebbiegħa 2012 tas-servizzi tal-Kummissjoni, il-konklużjonijiet li ġejjin huma ġġustifikati:

—

Il-miri baġitarji b’mod konsistenti qabżu l-previżjonijiet fil-perjodu wara s-sena tad-defiċit eċċessiv. Id-defiċit tal-gvern ġenerali ġie mnaqqas għal 3,1 % tal-PDG fl-2010 u tnaqqas iżjed għal 2,1% tal-PDG fl-2011, meta mqabbel mal-miri stabbiliti inizjalment ta’ 3,8% u 2,5% rispettivament. Il-korrezzjoni tad-defiċit seħħet l-aktar bis-saħħa ta’ kontroll strett tat-tkabbir fl-infiq, anke permezz tal-iffriżar tal-pagi u tal-pensjonijiet tas-settur tal-amministrazzjoni pubblika, bir-riżultat li l-proporzjon tan-nefqa mal-PDG waqa’ b’5.5 punti perċentwali bejn l-2009 u l-2011. Il-Programm ta’ Konverġenza 2012 jipproġetta li d-defiċit ikompli jonqos għal 1,6% tal-PDG fl-2012 u għal 1,3% tal-PDG fl-2013. Fil-previżjonijiet tar-rebbiegħa 2012 tas-servizzi tal-Kummissjoni, id-defiċit tal-gvern ġenerali huwa pproġettat li jitjieb għal 1,9% tal-PDG fl-2012 u għal 1,7% tal-PDG fl-2013, bis-sostenn ta’ iffriżar kontinwat tal-pagi fis-settur tal-amministrazzjoni pubblika, kif ukoll ta’ titjib ċikliku fl-introjti.

—

Il-previżjonijiet tar-rebbiegħa 2012 tas-servizzi tal-Kummissjoni jipproġettaw bilanċ aġġustat ċiklikament wara tnaqqis ta’ miżuri ta’ darba biss u miżuri temporanji, ta’ 0,7 % fl-2012 u ta’ 0,8 % tal-PDG fl-2013, abbażi ta’ preżunzjoni ta’ ebda bidla fil-politika. Sadanittant, fl-2012 u fl-2013, ir-rata tat-tkabbir tan-nefqa tal-gvern wara tnaqqis tal-miżuri diskrezzjonali tal-introjti hija prevista li tibqa’ taħt il-valur referenzjali tar-rata tat-tkabbir potenzjali tal-PDG fuq terminu ta’ żmien medju, kif speċifikat fl-Artikolu 5(1) tar-Regolament (KE) Nru 1466/97 tas-7 ta’ Lulju 1997 dwar it-tisħiħ tas-sorveljanza ta' pożizzjonijiet ta' budget u s-sorveljanza u l-koordinazzjoni ta' politika ekonomika (6).

—

Il-previżjonijiet tar-rebbiegħa 2012 tas-servizzi tal-Kummissjoni jipproġettaw li d-dejn gross tal-gvern ġenerali jiżdied moderatament minn 16,3 % tal-PDG fl-2011 għal 18,5 % tal-PDG fl-2013. Din il-previżjoni tad-dejn ma tinkludix l-emissjoni possibbli ta’ strumenti ta’ dejn estern fl-2012 għall-iskop ta’ pre-finanzjament tal-ħlas lura ta’ bonds iddenominati bl-euro ta’ madwar 2 % tal-PDG f'Jannar 2013. Bl-istess mod, l-aħħar programm ta' konverġenza jipproġetta li l-proporzjon tad-dejn għandu jiżdied sa 18,4 % sal-2013.

(6)

F’konformità mal-Artikolu 126(12) tat-Trattat, deċiżjoni tal-Kunsill dwar l-eżistenza ta’ defiċit eċċessiv għandha tiġi revokata meta, fil-fehma tal-Kunsill, tkun saret korrezzjoni tad-defiċit eċċessiv fl-Istat Membru konċernat.

(7)

Fil-fehma tal-Kunsill, id-defiċit eċċessiv fil-Bulgarija ġie kkoreġut u d-Deċiżjoni 2010/422/UE għandha għalhekk tiġi revokata,

ADOTTA DIN ID-DEĊIŻJONI:

Artikolu 1

Minn valutazzjoni globali jsegwi li s-sitwazzjoni ta' defiċit eċċessiv fil-Bulgarija ġiet ikkorreġuta.

Artikolu 2

Id-Deċiżjoni 2010/422/UE hija b’dan revokata.

Artikolu 3

Din id-Deċiżjoni hija indirizzata lir-Repubblika tal-Bulgarija.

Magħmul fil-Lussemburgu, it-22 ta’ Ġunju 2012.

Għall-Kunsill

Il-President

V. SHIARLY

(1)  ĠU L 199, 31.7.2010, p. 26.

(2)  Id-defiċit u d-dejn tal-amministrazzjoni pubblika għall-2009 sussegwentament ġew riveduti u attwalment qegħdin 4,3 % tal-PDG u 14,6 % tal-PDG rispettivament.

(3)  ĠU L 209, 2.8.1997, p. 6.

(4)  ĠU L 145, 10.6.2009, p. 1.

(5)  Skont il-“Specifications on the implementation of the Stability and Growth Pact and Guidelines on the format and content of Stability and Convergence Programmes”, kif miftiehma mill-Kunsill fl-24 ta' Jannar 2012. Ara: http://ec.europa.eu/economy_finance/economic_governance/sgp/pdf/coc/code_of_conduct_en.pdf

(6)  ĠU L 209, 2.8.1997, p. 1.

Top