52010PC0597

[pic] | AN COIMISIÚN EORPACH |

An Bhruiséil 4.11.2010

COIM(2010) 597 leagan deireanach

2010/0298 (COD)

Togra le haghaidh

RIALACHÁIN Ó PHARLAIMINT NA hEORPA AGUS ÓN gCOMHAIRLE

lena leasaítear Rialachán (CE) Uimh. 648/2004 maidir le fosfáití agus comhdhúile eile fosfair a úsáid i nglantaigh níocháin tí

(Téacs atá ábhartha maidir leis an LEE)

SEC(2010) 1278 SEC(2010) 1277

MEABHRÁN MÍNIÚCHÁIN

Comhthéacs an Togra

Comhthéacs ginearálta

Baintear úsáid as fosfáití i nglantaigh chun dul i ngleic le cruas uisce chun go bhféadfar glanadh a dhéanamh go héifeachtach. Is í trípholafosfáit sóidiam (STPP) an fhosfáit is coitianta a úsáidtear i nglantaigh. Le STPP, i gcomhar le dromchlaghníomhaithe, bíonn glantaigh in ann feidhmiú go héifeachtúil i ndálaí níocháin ar bith.

Go sonrach, tá na feidhmeanna seo a leanas ag STPP i nglantaigh:

- leithlisiú éifeachtach a dhéanamh ar shalainn chruais (agus iad a choinneáil i dtuaslagán);

- screamhú ar shnáithíní a bhaint agus cosc a chur ar an screamhú sin;

- cur leis an bpróiseas níocháin;

- a bheith mar iompróir do chomhábhair eile glantaigh.

D'fhéadfadh go mbeadh drochthionchar ag fosfáití ó ghlantaigh ar an timpeallacht uisceach. Is é an t-ábhar imní is mó atá ann faoi fhosfáití go bhféadfadh barraíocht cothaitheach a bheith ann dá mbarr, rud a chuirfeadh borradh faoi fhás algaí agus foirmeacha níos airde den bheatha phlandúil, agus ar an gcaoi sin cuirfear cothromaíocht na n-orgánach as riocht ar bhealach neamh-inmhianaithe, feiniméan dá ngairtear eotrófú. Tá teacht ar chomhábhair eile bogtha uisce, ach tá siad teoranta ó thaobh na feidhmíochta de, go háirithe nuair a bhíonn tascanna dúshlánacha glantacháin i gceist.

Le Rialachán (CE) Uimh. 648/2004 maidir le glantaigh, déantar comhchuibhiú ar ghlantaigh a chur ar an margadh, ach ní dhéantar an comhchuibhiú sin ach i ndáil le lipéadú na nglantach agus le bithdhíghrádaitheacht na ndromchlaghníomhaithe atá iontu. Mar sin féin, i bhfianaise na n-ábhar imní maidir le heotrófú, ceanglaíodh ar an gCoimisiún le hAirteagal 16 den Rialachán " an úsáid a bhaintear as fosfáití a mheas, tuarascáil a chur isteach maidir lena n-úsáid, agus i gcás ina mbeadh údar maith leis, togra reachtach a thíolacadh d'fhonn deireadh a chur de réir a chéile le fosfáití nó d'fhonn iad a shrianadh d'fheidhmíochtaí sonracha ". Thíolaic an Coimisiún an tuarascáil in 2007 agus tháinig sé ar an tátal go raibh easpa eolais ann maidir leis an méadú san eotrófú a tharlaíonn de bharr na bhfostáití a bhíonn i nglantaigh, ach go raibh forbairt ghasta ag teacht ar staid an eolais[1]. Bhí an obair eolaíoch bhreise a rinneadh ina dhiaidh sin, chomh maith le faisnéis ar an tionchar eacnamaíoch agus sóisialta a bhainfeadh le srianta a d'fhéadfadh a bheith ann, mar bhunús le tuarascáil um measúnú tionchair ina ndéantar anailís ar roghanna éagsúla beartas chun aghaidh a thabhairt ar an úsáid a bhaintear as fosfáití i nglantaigh.

Forais agus cuspóirí an togra

Tá sé d'aidhm ag an togra Rialachán (CE) Uimh. 648/2004 maidir le glantaigh a leasú trí theorainn a thabhairt isteach ar chion na bhfosfáití agus ar chion na gcomhdhúl eile fosfair i nglantaigh níocháin tí d'fhonn an méid a chuireann glantaigh le heotrófú foriomlán uiscí dromchla an AE a laghdú, tar éis na dtátal a baineadh as na meastóireachtaí agus as an measúnú tionchair a rinne an Coimisiún de bhun Airteagal 16 de Rialachán (CE) Uimh. 648/2004.

Thairis sin, tar éis theacht i bhfeidhm Chonradh Liospóin, na forálacha sin de Rialachán (CE) Uimh. 648/2004 maidir leis an gcumhacht atá ag an gCoimisiúin gníomhartha neamhreachtacha a bhfuil feidhm ghinearálta acu a ghlacadh chun gnéithe neamhreachtacha áirithe den Rialachán sin a fhorlíonadh nó a leasú, caithfear iad a chur in oiriúint do cheanglais Airteagal 290 den Chonradh ar Fheidhmiú an Aontais Eorpaigh.

Is é atá mar chuspóir ginearálta ag an togra, ardleibhéal cosanta a áirithiú don chomhshaol i gcoinne an drochthionchair a d'fhéadfadh a bheith ag fosfáití agus ag comhdhúile eile fosfair i nglantaigh agus margadh inmheánach a fheidhmíonn go maith a áirithiú do ghlantaigh.

Comhsheasmhacht le beartais agus le cuspóirí eile an Aontais

Tá an togra seo ag teacht go huile agus go hiomlán le cuspóirí na Treorach Réime Uisce (Treoir 2000/60/CE) lena gceanglaítear ar na Ballstáit stádas maith ó thaobh na héiceolaíochta agus na ceimice a bhaint amach maidir le huisce dromchla faoi 2015 agus lena ceanglaítear fosta orthu cláir beart a ullmhú - e.g. pleananna bainistithe abhantracha - a bhféadfadh gníomhaíocht chostéifeachtach, chomhréireach agus éigeantach a bheith san áireamh leo, i gcás ina mbeidh údar leis, nó comhaontuithe deonacha chun teorainn a chur le fosfáití i nglantaigh chun dul i ngleic le fadhb an eotrófaithe ina gcríocha.

Go deimhin, chun an t-eotrófú a bhíonn mar thoradh ar shreafaí trasteorainneacha na bhfosfáití isteach i ndobharlaigh a chomhrac, chuir na Ballstáit lena mbaineann gníomhaíocht chomhordaithe ar bun i gcomhthéacs bainistithe abhantraí na Treorach Réime Uisce, nó trí straitéisí um chomhar réigiúnach, i limistéir íogaire éagsúla de chuid an AE, amhail an Mhuir Bhailt nó Abhantrach na Danóibe, ach is beag an dul chun cinn atá déanta go dtí seo. Mar sin, is beart comhlántach é an togra atá riachtanach má tá rath le bheith ar ghníomhaíochtaí an tionscnaimh um chomhar réigiúnach chun an fhadhb thrasteorann a bhaineann le heotrófú a chomhrac.

Comhlánaítear leis an togra chomh maith an Treoir maidir le Cóireáil Fuíolluisce Uirbigh, 91/271/CCE, a bhfuil sé d'aidhm aici teorainn a chur le tiúchan na gcothaitheach amhail fosfar agus nítrigin in uiscí dromchla chun gníomhú in éadan an eotrófaithe.

Comhairliúchán le páirtithe leasmhara agus measúnú TIONCHAIR

Comhairliúchán le páirtithe leasmhara, saineolas a bhailiú agus a úsáid

Chuir an Coimisiún roinnt staidéar ar bun chun a fháil amach an mbeadh bonn le srianta ar fhosfáití i nglantaigh chun eotrófú a laghdú san AE: WRc 2002[2], INIA eotrófú pan-Eorpach[3], tuarascáil a rinne conraitheoir seachtrach (RPA). Bunús a bhí sna staidéir sin do thuilleadh comhairliúcháin leis na Ballstáit, le lucht Tionscail [Tionscal Táirgeoirí Fosfáití na hEorpa (CEEP); An Comhlachas Idirnáisiúnta um Ghallúnacha, um Ghlantaigh agus um Tháirgí Cothaithe (A.I.S.E); Comhlachas Táirgeoirí Seoilítí na hEorpa (EUZEPA)] agus le hEagraíochtaí neamhrialtasacha comhshaoil [An Ciste Domhanda Fiadhúlra (WWF); le Biúró Eorpach na gCumann Tomhaltóirí (BEUC)] le linn cruinnithe den Mheitheal um Údaráis Inniúla atá freagrach as Rialachán na nGlantach a chur chun feidhme - dá ngairtear 'Meitheal na nGlantach - eadhon i mí na Samhna 2006, i mí Iúil 2007 agus i mí na Nollag 2007, i mí Iúil 2008, i mí Feabhra 2009 agus i mí na Samhna 2009.

Chuathas i gcomhairle go sonrach le déantóirí beaga agus meánmhéide glantach tríd an Líonra Fiontar Eorpach in 2009, chun léargas níos fearr a fháil ar an úsáid a bhaintear faoi láthair as fosfáití agus as roghanna malartacha eile nuair a bhíonn glantaigh á bhfoirmliú, agus ar an tionchar a bheadh ar na fiontair bheaga agus mheánmhéide sin dá gcuirfí srianta ar fhosfáití.

Measúnú tionchair

Rinneadh an anailís ar an tionchar a bheadh ag na roghanna éagsúla beartais agus aird á tabhairt ar thorthaí na hanailíse eolaíche ar an méid a chuireann fosfáití i nglantaigh le rioscaí an eotrófaithe san AE, mar aon le critéir na héifeachtachta agus na héifeachtúlachta (lena n-áirítear praiticiúlacht, an tionchar socheacnamaíoch agus inmhonatóireacht). Tháinig an chuid is mó den fhaisnéis ón staidéar a rinne an INIA ar na rioscaí eotrófaithe a ghabhann le fosfáití i nglantaigh agus ó thuarascáil an RPA i ndáil le seoilítí agus tógálaithe eile mar roghanna malartacha ar STPP, mar aon le barúlacha an Choiste Eolaíoch um Chineálacha Rioscaí Sláinte agus Comhshaoil (SCHER) maidir leis an meastóireacht ar na tuarascálacha sin, agus ó chomhairliúchán díreach eile leis na páirtithe leasmhara.

Rinneadh grinnscrúdú ar chúig cinn de roghanna beartais maidir leis an tionchar a bheadh acu:

- Rogha 1: Gan aon ghníomhaíocht ar leibhéal an AE, agus é a fhágáil faoi na Ballstáit gníomhú, sin nó gur i gcomhthéacs an chomhair réigiúnaigh a dhéanfaí an ghníomhaíocht sin (rogha na bonnlíne);

- Rogha 2: Gníomhaíocht dheonach ag lucht tionscail;

- Rogha 3: Toirmeasc iomlán ar fhosfáití i nglantaigh;

- Rogha 4: Srian/teorainn a chur le cion na bhfosfáití i nglantaigh níocháin;

- Rogha 5: Luachanna teorainneacha a leagan síos do chion na bhfosfáití i nglantaigh.

Léirítear sa mheastóireacht agus san anailís tionchair ar na roghanna go laghdófar an méid a chuireann fosfáití ó ghlantaigh le rioscaí an eotrófaithe in uiscí an AE má thugtar teorannú isteach ar leibhéal Eorpach ar an úsáid a bhaintear as fosfáití agus as comhdhúile eile fosfair i nglantaigh níocháin tí agus go laghdófar an costas a bhaineann le fosfar a bhaint do na gléasraí cóireála fuíolluisce. Is mó i bhfad méid na gcoigilteas a bheadh i gceist ná an costas a bhainfeadh le glantaigh níocháin tí a athfhoirmliú agus úsáid á baint as roghanna malartacha ar fhosfáití. I gcodarsnacht leis sin, ní fhéadfaí srianta ar fud an AE ar ghlantaigh miasniteoirí nó ar ghlantaigh institiúideacha agus ar ghlantaigh thionsclaíocha a bheith dlite faoi láthair mar nach bhféadfaidh na roghanna atá ar fáil na héilimh is teicniúla a bhaineann leis na feidhmíochtaí sin a shásamh i gcoitinne.

Eilimintí dlíthiúla an togra

Bunús dlí

Is é Airteagal 114 den Chonradh ar Fheidhmiú an Aontais Eorpaigh (CFAE) bunús dlí an togra. Is é atá mar chuspóir ag Airteagal 114 margadh inmheánach a bhunú agus ardleibhéal cosanta á áirithiú maidir le sláinte an duine agus maidir leis an gcomhshaol.

Prionsabal na coimhdeachta

Beidh feidhm ag prionsabal na coimhdeachta mar a leagtar amach in Airteagal 3(3) den Chonradh ar an Aontas Eorpach é, sa mhéid nach dtagann an togra faoi inniúlacht eisiach an Aontais.

Ní fhéadfaidh na Ballstáit an cuspóir maidir le teorainn a chur leis an méid a chuireann fosfáití ó ghlantaigh le rioscaí an eotrófaithe in uiscí an AE agus, ag an am céanna, margadh inmheánach a fheidhmíonn go maith a choimeád do ghlantaigh, a bhaint amach go sásúil ina n-aonar, agus is éifeachtaí, ar na cúiseanna seo a leanas, a bheidh gníomhaíocht ón AE leis na cuspóirí sin a bhaint amach:

- Ghlac roinnt Ballstát bearta náisiúnta chun teorainn a chur leis an úsáid a bhaintear as fosfáití agus/nó as comhdhúile eile fosfair, go príomha i nglantaigh níocháin tí, i gcomhréir le forálacha Airteagal 14 de Rialachán (CE) Uimh. 648/2004 agus luachanna scoite éagsúla i gceist. Níl aon sonraíocht theicniúil choiteann ar fud an Aontais ann. Ilroinntear margadh an AE do ghlantaigh níocháin leis sin.

- Is beag an dul chun cinn atá déanta go dtí seo maidir leis an gcomhar réigiúnach idir na Ballstáit sa Straitéis don Mhuir Bhailt agus in Abhantrach na Danóibe agus tá sé iarrtha arís agus arís eile ag na Ballstáit atá ag comhoibriú ar na straitéisí réigiúnacha seo go mbeadh bearta comhchuibhithe AE ann.

- I gcomhréir le prionsabal na coimhdeachta, beidh na Ballstáit in ann reachtaíocht náisiúnta a bhunú maidir le fosfáití i nglantaigh miasniteoirí uathoibreacha agus i nglantaigh ghairmiúla leis an dréacht-Rialachán, mar atá faoi láthair, ar choinníoll go mbeidh údar leis sin de bharr coinníollacha áirithe amhail rioscaí arda eotrófaithe nó dálaí uisce i gcríoch na mBallstát. Go dtí seo, is beag Ballstát a bhfuil teorannaithe i bhfeidhm acu maidir le fosfáití i nglantaigh miasniteoirí nó a bhfuil sé beartaithe acu na teorannaithe sin a thabhairt isteach agus is beag tionchar atá ar an margadh inmheánach do na glantaigh sin.

Prionsabal na comhréireachta

Ní théann an togra thar a bhfuil riachtanach chun na cuspóirí atá beartaithe a bhaint amach, i gcomhréir le prionsabal na comhréireachta, mar a leagtar amach in Airteagal 3(4) den Chonradh ar an Aontas Eorpach é.

Ós rud é gur beag roghanna malartacha teicniúla nó eacnamaíocha oiriúnacha atá ann faoi láthair ar fhosfáití i gcineálacha glantaigh seachas glantaigh níocháin, agus ós rud é gurb iad na glantaigh níocháin is mó a chuireann le hualach foriomlán na bhfosfáití ó ghlantaigh, ní theorannaítear leis an togra cion fosfáite na gcineálacha eile glantaigh.

Rogha ionstraimí

Roghnaíodh Rialachán mar ionstraim dlí mar go bhfuil sé d'aidhm aige cion na bhfosfáití agus na gcomhdhúl eile fosfair i nglantaigh níocháin tí a chomhchuibhiú. Leasaítear leis an Rialachán ar ghlantaigh atá ann cheana.

Príomhfhóralacha an togra

Leathnaítear leis an togra raon feidhme Rialachán (CE) Uimh. 648/2004 chun go bhféadfaí teorannú a thabhairt isteach ar chion na bhfosfáití agus ar chion na gcomhdhúl eile fosfair i nglantaigh (leasuithe ar Airteagal 1 agus ar Airteagal 4).

Ba cheart a thabhairt faoi deara go dtarlaíonn sé uaireanta go mbíonn comhdhúile eile ina mbíonn fosfar, go háirithe fosfónáití, sna roghanna malartacha ar fhosfáití i nglantaigh níocháin tí. Ní fhéadfar, mar sin, deireadh iomlán a chur le fosfar i nglantaigh. Ar an taobh eile, tá go leor fosfáití éagsúla agus go leor comhdhúl éagsúil a bhfuil fosfar iontu ann agus ní mór a áirithiú nach mbeidh sé furasta dul timpeall ar an toirmeasc atá beartaithe a chur ar fhosfáití. Bunaítear leis an dréacht-Rialachán, mar sin, teorainn fhoriomlán 0.5 % de réir meáchain maidir le cion an fhosfair i nglantaigh níocháin tí, lena gcumhdaítear gach fosfáit agus gach comhdhúil ina bhfuil fosfar. De thuras na huaire, go dtí go bhfaighfear roghanna malartacha inghlactha teicniúla agus eacnamaíocha ar fhosfáití do chineálacha eile glantaigh, ní chuirfear teorainn leis an togra, ach ar chion na bhfosfáití agus ar chion na gcomhdhúl eile fosfair i nglantaigh níocháin tí (Iarscríbhinn VIa nua atá beartaithe).

Maidir le glantaigh miasniteoirí uathoibreacha a bhfuil fosfáití iontu, tá sé beartaithe go gcuirfear de chúram ar an gCoimisiún athbhreithniú a dhéanamh ar an méid a chuireann na glantaigh sin le riosca an eotrófaithe laistigh de 5 bliana tar éis ghlacadh an ghnímh bheartaithe, tuarascáil a chur faoi bhráid Pharlaimint na hEorpa agus faoi bhráid na Comhairle (leasú ar Airteagal 16) agus má mheastar é sin a bheith iomchuí, srianta a mholadh maidir lena gcion fosfáite tríd an Iarscríbhinn VIa nua a chur in oiriúint don dul chun cinn teicniúil.

Déantar oiriúnú leis an togra freisin, ar fhorálacha reatha Rialachán (CE) Uimh. 648/2004 lena dtabharfar de chumhacht don Choimisiún na gníomhartha tarmligthe a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh (leasú ar Airteagal 13).

Ar deireadh, coinnítear leis an ngníomh atá beartaithe an fhoráil atá ann cheana lena gceadaítear do na Ballstáit rialacha náisiúnta a leagan síos chun teorainn a chur le cion na bhfosfáití agus le cion na gcomhdhúl eile fosfair i nglantaigh seachas glantaigh níocháin tí, má bhíonn údar leis sin ar fhorais chomhshaoil (Leasú ar Airteagal 14).

Impleacht Bhuiséadach

Ní bheidh aon impleacht ag an togra maidir le buiséad an Aontais Eorpaigh.

FAISNÉIS BHREISE

- BEIDH AN GNÍOMH A BHEARTAÍTEAR ÁBHARTHA MAIDIR LEIS AN LIMISTÉAR EORPACH EACNAMAÍOCH (LEE).

- Tá an togra faoi réir Chomhaontú na hEagraíochta Domhanda Trádála (WTO)-Bacainní Teicniúla ar an Trádáil(TBT) agus dá bhrí sin caithfear fógra a thabhairt don WTO faoi.

2010/0298 (COD)

Togra le haghaidh

RIALACHÁIN Ó PHARLAIMINT NA hEORPA AGUS ÓN gCOMHAIRLE

lena leasaítear Rialachán (CE) Uimh. 648/2004 maidir le fosfáití agus comhdhúile eile fosfair a úsáid i nglantaigh níocháin tí

(Téacs atá ábhartha maidir leis an LEE)

TÁ PARLAIMINT NA hEORPA AGUS COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 114 de,

Ag féachaint don togra ón gCoimisiún Eorpach,

Tar éis dóibh an dréachtghníomh reachtach a chur chuig na Parlaimintí náisiúnta,

Ag féachaint don tuairim ó Choiste Eacnamaíoch agus Sóisialta na hEorpa[4],

Ag féachaint don tuairim ó Choiste na Réigiún[5],

Ag gníomhú dóibh i gcomhréir leis an ngnáthnós imeachta reachtach,

De bharr an méid seo a leanas:

1. De bhun Airteagal 16 de Rialachán (CE) Uimh. 648/2004, tá meastóireacht déanta ag an gCoimisiún ar úsáid fosfáití i nglantaigh sa Tuarascáil don Chomhairle agus do Pharlaimint na hEorpa maidir le húsáid fosfáití[6]. Tar éis tuilleadh anailíse, is éard a bhain an Coimisiún as mar thátal, gur cheart úsáid fosfáití i nglantaigh níocháin tí a theorannú d'fhonn an méid a chuireann fosfáití ó ghlantaigh le rioscaí an eotrófaithe a laghdú agus d'fhonn an costas a bhaineann le fosfáití a bhaint i ngléasraí cóireála fuíolluisce a laghdú. Ba mhó an méid a shábháilfear ó thaobh costais ná an costas a bhainfidh le glantaigh níocháin tí a athfhoirmliú le roghanna malartacha eile ar fhosfáití.

2. Teastaíonn méideanna beaga de chomhdhúile eile fosfair, eadhon fosfónáití, le haghaidh roghanna malartacha ar ghlantaigh níocháin tí atá bunaithe ar fhosfáití, agus dá n-úsáidfí méideanna níos mó fosfónáití, d'fhéadfadh ábhar imní a bheith i gceist don chomhshaol.

3. Maidir leis an idirghníomh idir fosfáití agus comhdhúile eile fosfair, bíonn rogha chúramach ag teastáil maidir le scóip agus leibhéal an teorannaithe. Ba cheart go mbeadh an teorannú i bhfeidhm ar gach comhdhúil fosfair chun nach mbeifí taobh le comhdhúile eile fosfair a chur in áit na bhfosfáití teorannaithe. Ba cheart go mbeadh an teorannú don chion fosfair íseal go leor cosc éifeachtach a chur ar mhargaíocht foirmlithe um ghlantaigh níocháin tí atá bunaithe ar fhosfáití, agus ba cheart di a bheith ard go leor an t-íosmhéid fosfónáití atá riachtanach le haghaidh foirmlithe malartacha a cheadú.

4. Ós rud é nach féidir leis na Ballstáit cuspóirí na gníomhaíochta atá le déanamh, eadhon an méid a chuireann fosfáití ó ghlantaigh le rioscaí an eotrófaithe a laghdú agus an costas a bhaineann le fosfar a bhaint i ngléasraí cóireála fuíolluisce a laghdú, a bhaint amach go sásúil toisc nach bhféadfaidh tionchar a bheith ag bearta náisiúnta a bhfuil sonraíochtaí teicniúla difriúla acu ar cháilíocht an uisce a thrasnaíonn teorainneacha náisiúnta, agus go bhféadfar na cuspóirí sin a bhaint amach níos fearr dá bhrí sin ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta, mar atá leagtha amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta, mar atá leagtha amach san Airteagal sin, ní théann an Rialachán seo thar a bhfuil riachtanach chun an cuspóir sin a bhaint amach.

5. Ní hiomchuí na teorannaithe a bhaineann le húsáid fosfáití agus comhdhúile eile fosfair i nglantaigh níocháin tí a leathnú chuig glantaigh miasniteoirí uathoibríocha tí nó chuig glantaigh institiúideacha agus glantaigh tionsclaíocha, mar níl roghanna malartacha ar úsáid fosfáití sna glantaigh sin ar fáil go fóill a bheadh inghlactha go teicniúil agus ó thaobh na heacnamaíochta de.

6. Ba cheart sainmhíniú ar an rud is 'glanadh' ann a chur isteach go díreach i Rialachán (CE) Uimh. 648/2004 seachas tagairt a dhéanamh do chaighdeán ábhartha an ISO, ar mhaithe leis an tsoléiteacht.

7. Ba cheart go mbeadh sé de chumhacht ag an gCoimisiún gníomhartha tarmligthe a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh chun críche na hIarscríbhinní a ghabhann leis an Rialachán seo a leasú.

8. Ba cheart do na Ballstáit rialacha a leagan síos i leith na pionóis is infheidhme maidir le sáruithe ar an Rialachán seo agus ba cheart dóibh a áirithiú go ndéanfar na pionóis sin a chur i bhfeidhm. Ba cheart go mbeadh na pionóis sin éifeachtúil, comhréireach agus athchomhairleach.

9. Is iomchuí a fhoráil go ndéanfaí cur i bhfeidhm an teorannaithe a bhunaítear leis an Rialachán seo a chur siar d'fhonn a cheadú d'oibreoirí, go háirithe d'fhiontair bheaga agus mheánmhéide, glantaigh níocháin tí atá bunaithe ar fhosfáití a athfhoirmliú agus roghanna malartacha á n-úsáid acu le linn a ngnáth-thimthrialla athfhoirmlithe d'fhonn na costais a íoslaghdú.

10. Ba cheart, dá bhrí sin, Rialachán (CE) Uimh. 648/2004 a leasú dá réir sin.

TAR ÉIS AN RIALACHÁN SEO A GHLACADH:

Airteagal 1

Leasaítear Rialachán (CE) Uimh. 648/2004 mar a leanas:

11. In Airteagal 1(2), cuirtear an méid seo a leanas in ionad an tríú fleasc agus an ceathrú fleasc:

“- lipéadú breise ar ghlantaigh, ailléirginí cumhráin san áireamh;

- an fhaisnéis a chaithfidh na monaróirí a choimeád le cur ar fáil d'údaráis inniúla na mBallstát agus dá bpearsanra liachta;

- teorannuithe ar chion na bhfosfáití agus ar chion na gcomhdhúl eile fosfair i nglantaigh.”

12. Cuirtear an méid seo a leanas in ionad Airteagal 2, pointe 3:

“3. Ciallaíonn 'glanadh' an próiseas ina mbaintear an ithir amach ón bhfoshraith agus ina n-athraítear go riocht tuaslagáin nó chuig riocht spréite í.”

13. Cuirtear isteach an tAirteagal 4a seo a leanas:

"Airteagal 4a

Teorannuithe ar chion na bhfosfáití agus ar chion na gcomhdhúl eile fosfair

Na glantaigh atá liostaithe in Iarscríbhinn VIa agus nach gcomhlíonann na teorannuithe ar chion na bhfosfáití agus ar chion na gcomhdhúl eile fosfair a leagtar síos san Iarscríbhinn sin, ní chuirfear ar an margadh iad ón dáta a leagtar amach san Iarscríbhinn sin.”

14. In Airteagal 12, scriostar mír 3.

15. Cuirtear an méid seo a leanas in ionad Airteagal 13:

“Airteagal 13

Na hIarscríbhinní a Oiriúnú

1. Féadfaidh an Coimisiún, trí ghníomh tarmligthe i gcomhréir le hAirteagal 13a, 13b agus 13c, na leasuithe is gá a ghlacadh chun na hIarscríbhinní a chur in oiriúint don dul chun cinn eolaíoch agus teicniúil. Úsáidfidh an Coimisiún, aon uair is féidir, na Caighdeáin Eorpacha.

2. Féadfaidh an Coimisiún, trí ghníomh tarmligthe i gcomhréir le hAirteagal 13a, 13b agus 13c, leasuithe a ghlacadh ar na hIarscríbhinní a ghabhann leis an Rialachán seo maidir le glantaigh atá bunaithe ar thuaslagóirí.

3. I gcás ina mbeidh teorainneacha aonair tiúchana bunaithe ar riosca le haghaidh ailléirginí cumhráin bunaithe ag an gCoiste Eolaíoch um Chosmaidí agus Táirgí Neamhbhia (CECTN), déanfaidh an Coimisiún an teorainn 0.01 % a leagtar amach i Roinn A d'Iarscríbhinn VII a oiriúnú dá réir sin, i gcomhréir le hAirteagal 13a, 13b agus 13c.”

16. Cuirtear isteach na hAirteagail 13a, 13b agus 13c seo a leanas:

"Airteagal 13a

An tarmligean a fheidhmiú

1. Déanfar na cumhachtaí chun na gníomhartha tarmligthe dá dtagraítear in Airteagal 13 a ghlacadh a thabhairt don Choimisiún ar feadh tréimhse éiginnte ama.

2. A luaithe a ghlacfaidh sé gníomh tarmligthe, tabharfaidh an Coimisiún fógra go comhuaineach do Pharlaimint na hEorpa agus don Chomhairle.

3. Is faoi réir na gcoinníollacha a leagtar síos in Airteagal 13b agus in Airteagal 13c a thugtar na cumhachtaí don Choimisiún chun gníomhartha tarmligthe a ghlacadh.

Airteagal 13b

An tarmligean a chúlghairm

1. Féadfaidh Parlaimint na hEorpa nó an Chomhairle tarmligean na cumhachta dá dtagraítear in Airteagal 13 a chúlghairm tráth ar bith.

2. Maidir leis an institiúid a mbeidh tús curtha aici le nós imeachta inmheánach d'fhonn a chinneadh an ndéanfar tarmligean na cumhachta a chúlghairm nó nach ndéanfar, féachfaidh sí leis an institiúid eile agus leis an gCoimisiún a chur ar an eolas laistigh de thréimhse réasúnta sula ndéanfar an cinneadh deireanach, agus luafaidh sí na cumhachtaí tarmligthe a d'fhéadfadh a bheith faoi réir a gcúlghairme agus na cúiseanna a d'fhéadfadh a bheith leis an gcúlghairm sin.

3. Cuirfidh an cinneadh cúlghairme deireadh le tarmligean na gcumhachtaí a shonraítear sa chinneadh sin. Beidh éifeacht leis láithreach nó ar dháta níos déanaí arna sonrú ann. Ní dhéanfaidh sé difear do bhailíocht na ngníomhartha tarmligthe a bheidh i bhfeidhm cheana. Foilseofar in Iris Oifigiúil an Aontais Eorpaigh é.

Airteagal 13c

Agóidí maidir le gníomhartha tarmligthe

1. Féadfaidh Parlaimint na hEorpa nó an Chomhairle agóid a dhéanamh i gcoinne an ghnímh tarmligthe laistigh de thréimhse dhá mhí ón dáta a dtabharfar fógra. Ar thionscnamh Pharlaimint na hEorpa nó na Comhairle, déanfar fad míosa a chur leis an tréimhse sin.

2. Más rud é, ar dhul in éag don tréimhse sin, nach mbeidh agóid déanta ag Parlaimint na hEorpa ná ag an gComhairle i gcoinne an ghnímh tarmligthe, foilseofar in Iris Oifigiúil an Aontais Eorpaigh é agus tiocfaidh sé i bhfeidhm ar an dáta a shonrófar ann. Féadfar an gníomh tarmligthe a fhoilsiú in Iris Oifigiúil an Aontais Eorpaigh agus féadfaidh sé teacht i bhfeidhm sula rachaidh an tréimshe sin in éag, má tá Parlaimint na hEorpa agus an Chomhairle araon tar éis a chur in iúl don Choimisiún nach bhfuil rún acu agóid a dhéanamh.

3. Má dhéanann Parlaimint na hEorpa nó an Chomhairle agóid i gcoinne gnímh tarmligthe, ní thiocfaidh an gníomh sin i bhfeidhm. Luafaidh an institiúid a dhéanann agóid na cúiseanna atá leis an agóid i gcoinne an ghnímh tarmligthe.”

17. Cuirtear an méid seo a leanas in ionad an dara fomhír d'Airteagal 14:

“Féadfaidh na Ballstáit rialacha náisiúnta a choimeád nó a leagan síos maidir le srianta ar chion na bhfosfáití agus ar chion na gcomhdhúl eile fosfair i nglantaigh nach bhfuil aon srianta maidir leis an gcion leagtha amach dóibh in Iarscríbhinn VIa, i gcás ina mbeidh sé sin dlite ar fhorais chosaint na timpeallachta uiscí agus i gcás ina mbeidh roghanna malartacha eile ar fáil a bheadh inghlactha go teicniúil agus ó thaobh na heacnamaíochta de.”

18. Cuirtear an méid seo a leanas in ionad Airteagal 16:

“Airteagal 16

Tuarascáil

Faoin 31 Nollaig 2014, déanfaidh an Coimisiún measúnú ar an úsáid a bhaintear as fosfáití agus as comhdhúile eile fosfair i nglantaigh tí miasniteoirí uathoibreacha, agus cuirfidh sé tuarascáil faoi bhráid Pharlaimint na hEorpa agus faoi bhráid na Comhairle faoin úsáid sin, agus i gcás ina ndlífear é, déanfaidh sé togra reachtach a thíolacadh d'fhonn deireadh a chur de réir a chéile le fosfáití nó d'fhonn iad a shrianadh d'fheidhmíochtaí sonracha.

19. Cuirtear an méid seo a leanas in ionad Airteagal 18:

“Airteagal 18

Pionóis

Leagfaidh na Ballstáit síos na rialacha maidir leis na pionóis a bheidh infheidhme maidir le sáruithe ar an Rialachán seo, agus glacfaidh siad gach beart is gá lena áirithiú go gcuirfear chun feidhme iad. Caithfidh na pionóis dá bhforáiltear a bheith éifeachtach, comhréireach agus athchomhairleach. Tabharfaidh na Ballstáit fógra don Choimisiún gan mhoill faoi na forálacha sin agus faoi aon leasú a dhéanfar ina dhiaidh sin orthu.

Áireofar ar na rialacha sin bearta a cheadóidh d'údaráis inniúla na mBallstát coinsíneachtaí glantach a choinneáil nach gcomhlíonann an Rialachán seo.”

20. Déantar an téacs a leagtar amach san Iarscríbhinn a ghabhann leis an Rialachán seo a chur isteach mar Iarscríbhinn VIa.

21. I Roinn A d'Iarscríbhinn VII, scriostar an téacs seo a leanas:

"Má bhunaíonn CECTN teorainneacha tiúchana rioscabhunaithe ar leith do na hailléirginí cumhráin ina dhiaidh sin, molfaidh an Coimisiún na teorainneacha sin a ghlacadh chun ionad na teorann 0.01 % a luaitear thuas a thógáil. Maidir leis na bearta sin, atá ceaptha chun eilimintí neamhriachtanacha den Rialachán seo a leasú, glacfar iad i gcomhréir leis an nós imeachta rialúcháin lena ngabhann grinnscrúdú agus dá dtagraítear in Airteagal 12(3).”

Airteagal 2

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh .

Beidh feidhm ag pointí (1), (3), (7), (9) agus (10) d'Airteagal 1 ón 1 Eanáir 2013.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, […]

Thar ceann Pharlaimint na hEorpa Thar ceann na Comhairle

An tUachtarán An tUachtarán […] […]

IARSCRÍBHINN

“IARSCRÍBHINN VIa

TEORANNUITHE AR CHION NA bhFOSFÁITÍ AGUS AR CHION NA gCOMHDHÚL EILE FOSFAIR

Glantach | Teorannuithe | Dáta a dtiocfaidh an teorannú i bhfeidhm |

Glantaigh níocháin tí | Ní chuirfear ar an margadh iad má tá an cion iomlán fosfair atá ann cothrom le 0.5 %, nó níos mó ná sin, de réir meáchain. | 1 Eanáir 2013 |

”

[1] (COIM (2007) 234), ar fáil ag: http://ec.europa.eu/enterprise/chemicals/legislation/detergents/index_en.htm

[2] Fosfáití agus tógálaithe eile glantaigh. WRc (2002), Swindon, RA.

[3] Ar fáil ag:http://ec.europa.eu/enterprise/sectors/chemicals/files/docs/ceep_study_final_report_042009_en.pdf.

[4] IO C , , lch.

[5] IO C , , lch. .

[6] COIM (2007) 234 leagan deireanach.