(1)

Is éard atá i gceist le comhordú bheartais eacnamaíocha de chuid na mBallstát laistigh den Aontas, mar a fhoráiltear dó leis an gConradh ar Fheidhmiú an Aontais Eorpaigh (CFAE), comhlíonadh na dtreoirphrionsabal arb iad praghsanna cobhsaí, airgeadas poiblí fónta agus dálaí airgeadaíochta fónta, agus comhardú inbhuanaithe na n-íocaíochtaí.

(2)

An Comhshocrú Cobhsaíochta agus Fáis,, arbh é a bhí ann i dtosach Rialacháin (CE) Uimh. 1466/97 (3) agus (CE) Uimh. 1467/97 (4) ón gComhairle agus an Rún ón gComhairle Eorpach an 17 Meitheamh 1997 (5), tá sé bunaithe ar chuspóir an airgeadais rialtais fhónta agus inbhuanaithe mar mhodh chun na dálaí a neartú a bhaineann le cobhsaíocht praghsanna agus le fás inbhuanaithe láidir cuimsitheach a bhfuil cobhsaíocht airgeadais mar bhonn taca leis, agus ar an gcaoi sin tacú le cuspóirí an Aontais maidir le fás agus fostaíocht atá inbhuanaithe a ghnóthú.

(3)

Is cuid den Seimeastar Eorpach é an creat rialachais fhioscaigh, a chuimsíonn freisin comhordú agus faireachas ar bheartais eacnamaíocha agus fostaíochta níos leithne na mBallstát, i gcomhréir le hAirteagail 121 agus 148 CFAE, lena n-áirítear Colún Eorpach na gCeart Sóisialta, agus na moltaí tírshonracha gaolmhara.

(4)

Tá rannpháirtíocht na bparlaimintí náisiúnta, na gcomhpháirtithe sóisialta, na n-eagraíochtaí sochaí sibhialta agus na bpáirtithe leasmhara ábhartha eile sa Seimeastar Eorpach ríthábhachtach chun úinéireacht náisiúnta beartas eacnamaíoch agus fioscach agus ceapadh beartais atá trédhearcach agus cuimsitheach a áirithiú.

(5)

Ba cheart creat rialachais eacnamaíoch an Aontais a oiriúnú chun ilchineálacht mhéadaithe na riochtaí fioscacha, na fiachais phoiblí agus na ndúshlán eacnamaíoch, chomh maith le leochaileachtaí eile ar fud na mBallstát a chur san áireamh níos fearr. Bhí an fhreagairt láidir bheartais ar phaindéim COVID-19 an-éifeachtach maidir le hiarmhairtí eacnamaíocha agus sóisialta na géarchéime a d’eascair as an bpaindéim sin a mhaolú, ach tháinig méadú suntasach ar chóimheasa fiachais sna hearnálacha príobháideacha agus poiblí mar thoradh air sin, rud a léirigh an tábhacht a bhaineann le cóimheasa fiachais agus easnaimh fiachais a laghdú go dtí leibhéil stuama ar bhealach réadúil, marthanach lena gcothófaí an fás de réir a chéile lena n-áiritheofar saoirse do bheartais fhrith-thimthriallacha agus aghaidh a thabhairt ar mhíchothromaíochtaí maicreacnamaíocha, agus aird chuí á tabhairt ar chuspóirí fostaíochta agus sóisialta. An tráth céanna, ba cheart creat rialachais eacnamaíoch an Aontais a oiriúnú chun cuidiú le haghaidh a thabhairt ar na dúshláin mheántéarmacha agus fhadtéarmacha atá roimh an Aontas, amhail aistriú cothrom digiteach agus glas a bhaint amach, lena n-áirítear na cuspóirí aeráide a leagtar amach i Rialachán (AE) 2021/1119 ó Pharlaimint na hEorpa agus ón gComhairle (6), slándáil fuinnimh a áirithiú, tacú le neamhspleáchas straitéiseach oscailte, aghaidh a thabhairt ar an athrú déimeagrafach, athléimneacht eacnamaíoch agus shóisialta agus cóineasú marthanach a neartú, agus an Compás Straitéiseach um Shlándáil agus Cosaint a chur chun feidhme, a bhfuil gá ag gach ceann acu le hathchóirithe agus ardleibhéil seasmhacha infheistíochta sna blianta amach romhainn.

(6)

Ba cheart le creat rialachais eacnamaíoch an Aontais airgeadas poiblí fónta agus inbhuanaithe agus fás inbhuanaithe agus uilechuimsitheach a chur chun cinn agus, dá bhrí sin, idirdhealú a dhéanamh idir na Ballstáit trína bhfiachas poiblí agus a ndúshláin eacnamaíocha a chur san áireamh agus conairí fioscacha ilbhliantúla tírshonracha a cheadú, agus faireachas iltaobhach éifeachtach á áirithiú agus prionsabal na córa comhionainne á urramú ag an am céanna.

(7)

Is gá leibhéal iomchuí infheistíochta poiblí a áirithiú chun príomhchuspóirí an athchóirithe ar an gcreat rialachais eacnamaíoch a leagtar síos sa Rialachán seo a bhaint amach agus chun aghaidh a thabhairt ar thosaíochtaí reatha an Aontais agus ar na tosaíochtaí a bheidh ann amach anseo. Le cur chun feidhme na n-ionstraimí maoiniúcháin amhail cistí an bheartais comhtháthaithe, lena gcuimsítear faoi láthair Ciste Forbraíochta Réigiúnaí na hEorpa (CFRE) agus an Ciste Comhtháthaithe a bunaíodh le Rialachán (AE) 2021/1058 ó Pharlaimint na hEorpa agus ón gComhairle (7), Ciste Sóisialta na hEorpa Plus (CSE+) a bunaíodh le Rialachán (AE) 2021/1057 ó Pharlaimint na hEorpa agus ón gComhairle (8) agus an Ciste um Aistriú Cóir (CUAC) a bunaíodh le Rialachán (AE) 2021/1056 ó Pharlaimint na hEorpa agus ón gComhairle (9), faoi Ionstraim Théarnaimh an Aontais Eorpaigh a bunaíodh le Rialachán (AE) 2020/2094 ón gComhairle (10), nó faoin Ionstraim Eorpach le haghaidh tacaíocht shealadach chun rioscaí dífhostaíochta a mhaolú i gcás éigeandála a bunaíodh le Rialachán (AE) 2020/672 ón gComhairle (11), d’fhéadfaí ceacht a fhoghlaim maidir le héifeachtacht agus éifeachtúlacht infheistíochtaí agus beartais fostaíochta a fheabhsú, agus maidir le hionstraim infheistíochta ar bith de chuid an Aontais lena dtabharfaí aghaidh ar thosaíochtaí comhchoiteanna an Aontais.

(8)

Leis an nós imeachta faireachais iltaobhaigh a leagtar amach in Airteagal 121(2), (3) agus (4) agus in Airteagal 148(4) CFAE, ba cheart faireachán a dhéanamh ar raon iomlán na bhforbairtí eacnamaíocha agus fostaíochta i ngach Ballstát agus san Aontas ina iomláine. Áirítear leis sin míchothromaíochtaí maicreacnamaíocha a bhrath agus míchothromaíochtaí iomarcacha a chosc agus a cheartú, a leagtar amach i Rialachán (AE) Uimh. 1174/2011 (12) agus (AE) Uimh. 1176/2011 (13) ó Pharlaimint na hEorpa agus ón gComhairle, faoi seach. Chun faireachán a dhéanamh ar na forbairtí eacnamaíocha agus fostaíochta sin, ba cheart do na Ballstáit faisnéis a thíolacadh i bhfoirm pleananna fioscach-struchtúracha meántéarmacha lena gcumhdaítear tréimhse 4 bliana nó 5 bliana, ag brath ar fhad rialta théarma reachtaíochta an Bhallstáit lena mbaineann. Mar chuid dá anailís chomhtháite ar fhorbairtí fostaíochta agus sóisialta i gcomhthéacs an tSeimeastair Eorpaigh, déanann an Coimisiún measúnú ar rioscaí don chóineasú sóisialta aníos sna Ballstáit agus déanann sé faireachán ar chur chun feidhme phrionsabail Cholún Eorpach na gCeart Sóisialta ar bhonn an Scórchláir Shóisialta agus phrionsabail an Chreata um Chóineasú Sóisialta.

(9)

Ba cheart rialacha mionsonraithe a leagan síos maidir le hinneachar, tíolacadh, measúnú, formhuiniú agus faireachán na bpleananna fioscach-struchtúracha meántéarmacha náisiúnta, chun airgeadas poiblí atá fónta agus inbhuanaithe agus fás inbhuanaithe cuimsitheach a chur chun cinn sna Ballstáit, agus an athléimneacht a chur chun cinn trí bhíthin athchóirithe agus infheistíochtaí, lena n-áirítear iad siúd a rannchuidíonn le tosaíochtaí comhchoiteanna an Aontais, agus cosc a chur ar easnaimh rialtais iomarcacha.

(10)

Sna pleananna fioscach-struchtúracha meántéarmacha náisiúnta ba cheart an beartas fioscach, na hathchóirithe struchtúracha agus na hinfheistíochtaí atá ag gach Ballstát a thabhairt le chéile. Ba cheart na pleananna sin a bheith ina mbunchloch i gcreat rialachais eacnamaíoch an Aontais. Ba cheart do gach Ballstát plean fioscach-struchtúrach meántéarmach a thíolacadh ina leagtar amach a chonair fhioscach chomh maith le hinfheistíochtaí agus athchóirithe poiblí tosaíochta lena n-áiritheofar le chéile laghdú marthanach de réir a chéile ar fhiachas agus fás inbhuanaithe cuimsitheach, agus beartas fioscach comh-thimthriallach á sheachaint. Ba cheart athchóirithe agus infheistíochtaí níos leithne a áireamh sna pleananna sin freisin, lena n-áirítear i ndáil le tosaíochtaí comhchoiteanna an Aontais, eadhon an t-aistriú glas, lena n-áirítear an Comhaontú Glas don Eoraip agus an t-aistriú chuig aeráidneodracht faoi 2050 i gcomhréir le Rialachán (AE) 2021/1119 agus trí bhíthin an mhéid seo a leanas: na pleananna náisiúnta fuinnimh agus aeráide a tíolacadh de bhun Rialachán (AE) 2018/1999 ó Pharlaimint na hEorpa agus ón gComhairle (14) a chur chun feidhme; an t-aistriú digiteach, lena n-áirítear Clár Beartais 2030 don Deacáid Dhigiteach a bunaíodh le Cinneadh (AE) 2022/2481 ó Pharlaimint na hEorpa agus ón gComhairle (15); athléimneacht shóisialta agus eacnamaíoch agus cur chun feidhme Cholún Eorpach na gCeart Sóisialta, lena n-áirítear na spriocanna gaolmhara maidir le fostaíocht, scileanna agus laghdú na bochtaineachta faoi 2030; slándáil fuinnimh; agus neartú cumas cosanta i gcás inarb infheidhme, lena n-áirítear an Compás Straitéiseach um Shlándáil agus Cosaint, nó gníomhartha Aontais dá éis a bheadh ábhartha i dtaca leis an tosaíochtaí sin. Le linn thréimhse oibríochta na Saoráide Téarnaimh agus Athléimneachta arna bunú le Rialachán (AE) 2021/241 ó Pharlaimint na hEorpa agus ón gComhairle (16), ba cheart aird chuí a thabhairt ar na gealltanais a rinneadh sna pleananna téarnaimh agus athléimneachta náisiúnta agus na pleananna fioscach-struchtúracha meántéarmacha náisiúnta á dtarraingt suas.

(11)

Déantar cistí an bheartais comhtháthaithe a shioncrónú freisin leis an Seimeastar Eorpach. Mar bheartas infheistíochta fadtéarmach bhuiséad an Aontais, ba cheart ba cheart aird chuí a thabhairt ar athchóirithe agus infheistíochtaí faoi na cistí sin freisin agus na pleananna fioscach-struchtúracha meántéarmacha náisiúnta á dtarraingt suas, chun comhsheasmhacht agus, i gcás inarb iomchuí, comhlántacht a áirithiú.

(12)

Sula ndéanfar plean fioscach-struchtúrach meántéarmach náisiúnta a thíolacadh, ba cheart idirphlé teicniúil a dhéanamh leis an gCoimisiún chun a áirithiú go bhfuil an Rialachán seo á chomhlíonadh. Ba cheart achoimre ar an idirphlé teicniúil sin a bheith san áireamh sa mheasúnú a dhéanfaidh an Coimisiún ar na pleananna fioscach-struchtúracha meántéarmacha náisiúnta. Ar bhonn moladh ón gCoimisiún, ba cheart don Chomhairle moladh a ghlacadh lena leagfar amach an chonair ghlanchaiteachais agus, de réir mar is iomchuí, na hathchóirithe agus na hinfheistíochtaí atá mar bhonn taca leis an síneadh a d’fhéadfaí a chur le tréimhse choigeartúcháin a fhormhuiniú.

(13)

Chun creat fioscach an Aontais a shimpliú agus trédhearcacht a mhéadú, ba cheart táscaire oibriúcháin aonair a bheadh bunaithe ar inbhuanaitheacht fiachais a bheith mar bhonn leis an gconair fhioscach a leagan amach agus le faireachas fioscach bliantúil a dhéanamh do gach Ballstát. Ba cheart an táscaire oibriúcháin aonair sin a bheith bunaithe ar ghlan-phríomhchaiteachas arna maoiniú go náisiúnta, is é sin le rá: caiteachas rialtais glan ar chaiteachas úis, ar bhearta lánroghnacha ioncaim, ar chaiteachas ar chláir Aontais arna meaitseáil go hiomlán le hioncam ó chistí an Aontais, ar chaiteachas náisiúnta lena ndéantar cláir arna gcistiú ag an Aontas a chómhaoiniú, agus ar ghnéithe timthriallacha den chaiteachas ar shochar dífhostaíochta. I gcomhréir leis na treoirphrionsabail atá á n-úsáid ag an gCoimisiún chun idirbhearta a aicmiú mar idirbhearta aonuaire agus bearta sealadacha eile, ba cheart na bearta aonuaire sin agus na bearta sealadacha eile sin a eisiamh ón táscaire glanchaiteachais freisin. Leis an táscaire sin, nach ndéanann oibriú cobhsaitheoirí uathoibríocha agus luaineachtaí caiteachais eile nach bhfuil faoi rialú díreach an rialtais difear dó, cuirtear saoirse ar fáil le haghaidh cobhsaíocht mhaicreacnamaíoch fhrith-thimthriallach.

(14)

Chun an t-idirphlé a dhíriú as a dtiocfaidh tíolacadh pleananna fioscach-struchtúracha meántéarmacha náisiúnta, ba cheart don Choimisiún conair lena gcumhdaítear tréimhse choigeartúcháin 4 bliana, a bhféadfaí síneadh suas le 3 bliana a chur leis, a tharchur chuig Ballstáit a bhfuil fiachas rialtais ghinearálta acu atá os cionn 60 % den OTI nó easnamh rialtais a sháraíonn 3 % den OTI, mar a leagtar amach in Airteagal 126(2) CFAE, i gcomhar le Prótacal (Uimh. 12) maidir leis an nós imeachta um easnamh iomarcach atá i gceangal leis an gConradh ar an Aontas Eorpach (CAE) agus le CFAE (‘Prótacal (Uimh. 12)’). Ba cheart an chonair sin a bheith rioscabhunaithe, tírshonrach agus bunaithe ar inbhuanaitheacht fiachais chun cur chuige níos réamhbhreathnaithí a áirithiú a bheidh oiriúnach do na dúshláin atá ann faoi láthair agus dóibh siúd a bheidh ann amach anseo.

(15)

Arna iarraidh sin do Bhallstát nach mó a fhiachas rialtais ná 60 % den OTI agus nach mó a easnamh rialtais ná 3 % den OTI, ba cheart don Choimisiún treoir tharchur chuig an Ballstát sin i bhfoirm faisnéis theicniúil.

(16)

Le linn na míosa roimh an spriocdháta faoina bhfuil an Coimisiún Eorpach le conair tagartha nó faisnéis theicniúil a tharchur chuig Ballstát, ba cheart an deis a bheith ag an mBallstát sin malartú teicniúil leis an gCoimisiún a iarraidh. Ba cheart, leis an malartú teicniúil sin, deis a bheith ann an fhaisnéis staidrimh is déanaí atá ar fáil agus ionchas eacnamaíoch agus fioscach an Bhallstáit lena mbaineann a phlé, agus cóir chomhionann á háirithiú idir na Ballstáit.

(17)

Is ar shonraí staidrimh arna soláthar ag Eurostat, atá freagrach, thar ceann an Choimisiúin, as cáilíocht na sonraí fioscacha a thiomsaítear i gcomhréir le Córas Eorpach na gCuntas Náisiúnta agus Réigiúnach a áirithiú, atá creat faireachais bhuiséadaigh iltaobhach an Aontais bunaithe. Tá Eurostat le creat a bhunú le haghaidh an tuairiscithe a dhéanfaidh na Ballstáit ar shonraí staidrimh maidir le cómhaoiniú náisiúnta clár arna gcistiú ag an Aontas agus atá riachtanach chun an Rialachán seo a chur chun feidhme agus nach bhfuil siad á mbailiú ag Eurostat i láthair na huaire. Go dtí go mbunófar an creat chun na sonraí sin a bhailiú agus a sholáthar, ba cheart gur ceadmhach do na Ballstáit dul i muinín meastachán. Is iad comhlachtaí staidrimh ábhartha an Aontais atá le formáid, raon feidhme, minicíocht agus uainiú sholáthar na sonraí sin ag na Ballstáit a chinneadh.

(18)

Leis an gconair thagartha, ba cheart a áirithiú, faoi dheireadh na tréimhse coigeartúcháin, go mbeidh fiachas rialtais ghinearálta ar chonair shochreidte anuas nó go bhfanfaidh sé ar leibhéil stuama, fiú i gcásanna díobhálacha. Ina theannta sin, ba cheart a áirithiú leis freisin go dtabharfar agus go gcoinneofar an t-easnamh ginearálta rialtais faoi bhun 3 % den OTI, agus é á chur san áireamh go bhféadfadh costais bhreise a bheith ar na Ballstáit tar éis dheireadh na tréimhse coigeartúcháin mar shampla costais a bhaineann le haosú déimeagrafach. Ar deireadh, ba cheart a áirithiú leis go bhfuiltear comhsheasmhach leis an gconair cheartaitheach faoi Rialachán (CE) Uimh. 1467/97 ón gComhairle.

(19)

Chun feabhas a chur ar an intuarthacht i dtoradh chreat faireachais bhuiséadaigh iltaobhach an Aontais agus chun an chóir chomhionann idir na Ballstáit a threisiú, ba cheart, leis an gconair thagartha, coimirce inbhuanaitheachta fiachais a chomhlíonadh ex ante. Leis an gcoimirce sin, ba cheart a áirithiú le linn chéim dheartha na bpleananna fioscach-struchtúracha meántéarmacha náisiúnta go dtiocfaidh laghdú ar an gcóimheas fiachais rialtais réamh-mheasta ar an meán bliantúil íosta. D’fheidhmeodh sin mar íoscheanglas le haghaidh na hiarrachta atá mar bhonn leis an gconair thagartha agus leis an gconair ghlanchaiteachais. Mar gheall ar chomhdhéanamh sonrach fhiachas rialtais na Gréige gan íoc, tá méid suntasach d’íocaíochtaí úis iarchurtha le teacht chun bheith dlite in 2033. Níor cheart, dá bhrí sin, an méadú eisceachtúil gaolmhar ar chóimheas an fiachais rialtais ghinearálta le OTI de chuid na Gréige a chur san áireamh agus an choimirce inbhuanaitheachta fiachais á cur i bhfeidhm.

(20)

Meastar gur leor na ceanglais rioscabhunaithe don chonair thagartha chun leibhéil easnaimh rialtais a thabhairt go mór faoi bhun an luach tagartha de 3 % den OTI. Mar sin féin, chun an creat faireachais bhuiséadaigh iltaobhach a dhéanamh níos láidre maidir le forbairtí neamhchinnte ar athróga macraifhioscacha, ba cheart foráil a dhéanamh leis an gconair thagartha freisin maidir le corrlach coiteann athléimneachta i gcoibhneas leis an luach tagartha easnaimh dá dtagraítear in Airteagal 126(2) CFAE i gcomhar le Prótacal (Uimh. 12) nó cóineasú i dtreo an luacha tagartha easnaimh sin. Leis an gcoimirce athléimneachta chomhchoiteann sin, ba cheart a áirithiú go gcuirfear neart le maoláin fhioscacha le haghaidh imthosca díobhálacha agus suaití, rud a d’éascódh cur i gcrích beartas frith-thimthriallach faoi chreat fioscach an Aontais.

(21)

I gcás na chéad phleananna fioscach-struchtúracha meántéarmacha náisiúnta, ba cheart inchreidteacht an laghdaithe ar an bhfiachas rialtais sa mheántéarma a bheith bunaithe ar an modheolaíocht a thuairiscítear i bhFaireachán an Choimisiúin ar Inbhuanaitheacht Fiachais, 2023. Ba cheart do mheitheal um anailís ar inbhuanaitheacht fiachais iniúchadh a dhéanamh ar fheabhsuithe modheolaíochta a d’fhéadfaí a dhéanamh, lena n-áirítear maidir le toimhdí bunúsacha. Ba cheart saineolaithe ó na Ballstáit, an Coimisiún agus an Banc Ceannais Eorpach a bheith ar an meitheal sin. Ba cheart don mheitheal sin cuireadh a thabhairt don Bhord Fioscach Eorpach agus don Sásra Cobhsaíochta Eorpach mar bhreathnóirí. Ba cheart deis a bheith ag coiste inniúil Pharlaimint na hEorpa a iarraidh ar an gCoimisiún a mhodheolaíocht a chur i láthair i gcomhthéacs an idirphlé eacnamaíoch a bhunaítear leis an Rialachán seo.

(22)

Chun a mheasúnú an bhfuil gá le tuilleadh coigeartuithe faoi dheireadh na tréimhse 4 bliana nó 5 bliana cur chun feidhme den phlean fioscach-struchtúrach meántéarmach náisiúnta, ba cheart don Choimisiún an scéal a athmheasúnú má tá fiachas rialtais an Bhallstáit fós os cionn 60 % den OTI nó má tá a easnamh rialtais níos airde ná 3 % den OTI, agus ba cheart dó conair thagartha nua a chur chun cinn.

(23)

Ba cheart do gach plean fioscach-struchtúrach meántéarmach náisiúnta a stádas a lua i gcomhthéacs nósanna imeachta náisiúnta, go háirithe cibé acu a cuireadh nó nár cuireadh an plean faoi bhráid na parlaiminte náisiúnta agus cibé acu a d’fhormheas nó nár fhormheas an pharlaimint náisiúnta é. Sa phlean fioscach-struchtúrach meántéarmach náisiúnta ba cheart a léiriú freisin cibé acu a bhí nó ní raibh deis ag an bparlaimint náisiúnta an moladh ón gComhairle maidir leis an bplean roimhe sin agus, i gcás inarb ábhartha, aon mholadh nó cinneadh eile ón gComhairle, nó aon rabhadh ón gCoimisiún, a phlé. Má tá sí ar fáil, ba cheart tuairim na hinstitiúide fioscaí neamhspleáiche a bunaíodh i gcomhréir le Treoir 2011/85/AE (17) ón gComhairle, a bheith i gceangal leis an bplean fioscach-struchtúrach meántéarmach náisiúnta a chuirfear faoi bhráid an Choimisiúin. Sula dtíolacfaidh an Ballstát an dara plean fioscach-struchtúrach meántéarmacha náisiúnta ina dhiaidh sin, ba cheart dó, i gcomhréir leis an gcreat náisiúnta, dul i mbun comhairliúcháin leis na comhpháirtithe sóisialta, le húdaráis réigiúnacha, le heagraíochtaí na sochaí sibhialta agus le páirtithe leasmhara náisiúnta ábhartha eile. Ba cheart faisnéis faoin gcomhairliúchán leis na parlaimintí náisiúnta agus faoin bpróiseas comhairliúcháin a áireamh sa phlean fioscach-struchtúrach meántéarmach náisiúnta. I bhfianaise an sceidil níos déine atá beartaithe chun na chéad phleananna fioscach-struchtúracha meántéarmacha náisiúnta a ullmhú, d’fheadfadh na Ballstáit comhairliúchán a dhéanamh roimh ré agus spriocdhátaí iomchuí acu.

(24)

I gcás rialtas nuacheaptha, ba cheart an deis a bheith ag Ballstát plean athbhreithnithe fioscach-struchtúrach meántéarmach náisiúnta a chur faoi bhráid an Choimisiúin. Má tá imthosca oibiachtúla ann a choisceann plean fioscach-struchtúrach meántéarmach náisiúnta a chur chun feidhme, ba cheart an deis a bheith ag Ballstát a iarraidh plean athbhreithnithe a chur faoi bhráid an Choimisiúin tráth nach déanaí ná 12 mhí roimh dheireadh an phlean reatha.

(25)

I gcás ina ndéanfaidh na Ballstáit toimhdí ina bpleananna fioscach-struchtúracha meántéarmacha náisiúnta atá éagsúil leis an gcreat réamh-mheastacháin fiachais meántéarmach rialtais, ba cheart dóibh na difríochtaí a mhíniú agus údar cuí a thabhairt leo ar bhealach trédhearcach agus bunaithe ar argóintí eacnamaíocha fónta san idirphlé teicniúil agus ina bpleananna fioscach-struchtúracha meántéarmacha náisiúnta.

(26)

I gcás ina measfaidh an Chomhairle nach gcomhlíonann plean athbhreithnithe fioscach-struchtúrach meántéarmach náisiúnta Ballstáit ceanglais an Rialacháin seo, ba cheart don Chomhairle, mar riail ghinearálta, an chonair thagartha bhunaidh a tharchuir an Coimisiún roimhe sin a mholadh mar an chonair ghlanchaiteachais.

(27)

Chun idirghníomhú cuí a cheadú idir creat comhchoiteann an Aontais agus na creataí buiséadacha náisiúnta, níor cheart don Choimisiún a mheasúnú ar chomhlíonadh a gcuid conairí glanchaiteachais faoi seach ag na Ballstáit mar atá socraithe ag an gComhairle a bhunú ach ar fhorbairtí glanchaiteachais amháin. Ba cheart na Ballstáit a bheith in ann a gcuspóirí buiséadacha náisiúnta a shocrú i dtéarmaí táscaire difriúil, mar shampla an comhardú struchtúrach má cheanglaíonn a gcreat buiséadach náisiúnta é sin.

(28)

I measúnú an Choimisiúin ar na pleananna fioscach-struchtúracha meántéarmacha náisiúnta ba cheart scrúdú a dhéanamh ar inchreidteacht na dtoimhdí maicreacnamaíocha agus fioscacha go háirithe, a mhéid a imíonn siad uathu siúd is bun leis an gconair thagartha. Go háirithe, ba cheart na réamh-mheastacháin fiachais a bhaineann le beartas gan athrú atá le cur san áireamh sa phlean a bheith inchomparáide le réamh-mheastacháin an Choimisiúin.

(29)

Chun cur chun feidhme na bpleananna fioscach-struchtúracha meántéarmacha náisiúnta a áirithiú, ba cheart don Choimisiún agus don Chomhairle faireachán a dhéanamh ar na hathchóirithe agus na hinfheistíochtaí a áirítear sna pleananna sin faoin Seimeastar Eorpach, bunaithe ar na tuarascálacha bliantúla ar dhul chun cinn a chuir na Ballstáit isteach, agus i gcomhréir le hAirteagail 121 agus 148 CFAE. Chuige sin, ba cheart dóibh dul i mbun idirphlé eacnamaíoch le Parlaimint na hEorpa.

(30)

Ba cheart do Pharlaimint na hEorpa a bheith páirteach go cuí, ar bhealach rialta agus struchtúrtha, sa Seimeastar Eorpach chun treisiú leis an trédhearcacht, leis an gcuntasacht agus leis an úinéireacht i leith na gcinntí arna nglacadh i gcomhthéacs an tSeimeastair Eorpaigh. Ba cheart d’Uachtarán na Comhairle agus don Choimisiún Parlaimint na hEorpa a chur ar an eolas go tráthrialta maidir le torthaí an fhaireachais iltaobhaigh de bhun an Rialacháin seo. Ba cheart don Choimisiún faisnéis atá le soláthar i gcomhthéacs an Rialacháin seo a ullmhú agus a tharchur chuig an gComhairle, agus ba cheart í a chur ar fáil do Pharlaimint na hEorpa gan moill mhíchuí.

(31)

Chun laghdú fiachais de réir a chéile a áirithiú, féadfar an tréimhse choigeartúcháin a fhadú 3 bliana ar a mhéad má chuireann an Ballstát bonn taca faoina phlean fioscach-struchtúrach meántéarmach náisiúnta le sraith athchóirithe agus infheistíochtaí infhíoraithe agus faoi cheangal ama a chuirfidh leis an bhfás agus an athléimneacht, i dteannta a chéile, mar riail ghinearálta; tacófar leo le hinbhuanaitheacht fhioscach; tabharfar aghaidh leo ar thosaíochtaí comhchoiteanna an Aontais; aghaidh a thabhairt ar mholtaí tírshonracha ábhartha faoin Seimeastar Eorpach, lena n-áirítear, i gcás inarb infheidhme, moltaí arna n-eisiúint faoin nós imeachta um míchothromaíochtaí maicreacnamaíocha, chomh maith le tosaíochtaí infheistíochta tírshonracha, gan laghdú ar leibhéal na hinfheistíochta poiblí arna maoiniú go náisiúnta thar thréimhse an phlean a bheith mar thoradh air, i gcomparáid leis an leibhéal meántéarmach roimh thús an phlean, agus raon feidhme agus scála na ndúshlán tírshonrach á gcur san áireamh.

(32)

Ba cheart do shraith na n-athchóirithe agus na n-infheistíochtaí atá mar bhonn taca le síneadh a chur leis an tréimhse choigeartúcháin, ba cheart di a bheith comhsheasmhach leis na gealltanais a áirítear i bPlean Téarnaimh agus Athléimneachta formheasta an Bhallstáit lena mbaineann le linn thréimhse oibríochta na Saoráide Téarnaimh agus Athléimneachta agus leis an gComhaontú Comhpháirtíochta a comhaontaíodh faoin gCreat Airgeadais Ilbhliantúil. I gcás ina n-áirítear athchóirithe agus infheistíochtaí uaillmhianacha sna Pleananna Téarnaimh agus Athléimneachta, go háirithe maidir leis an bhfás eacnamaíoch agus an inbhuanaitheacht fhioscach sa mheántéarma, ba cheart a mheas go gcomhlíonann siad na ceanglais maidir le síneadh a chur le tréimhse choigeartúcháin na gcéad phleananna fioscach-struchtúracha meántéarmacha náisiúnta.

(33)

Ba cheart an tacar athchóirithe agus infheistíochtaí a leagtar amach sna pleananna fioscach-struchtúracha meántéarmacha náisiúnta a ailíniú le tosaíochtaí comhchoiteanna an Aontais, lena n-áirítear an méid seo a leanas a bhaint amach: aistriú cóir glas agus digiteach, lena n-áirítear comhsheasmhacht le cuspóirí aeráide a leagtar amach i Rialachán (AE) 2021/1119; athléimneacht shóisialta agus eacnamaíoch, lena n-áirítear Colún Eorpach na gCeart Sóisialta; slándáil fuinnimh; agus, i gcás inar gá, cumais chosanta a neartú. Ba cheart don Choimisiún aird ar leith a thabhairt ar na tosaíochtaí sin ina mheasúnú ar na pleananna fioscach-struchtúracha meántéarmacha náisiúnta. Ba cheart an tsraith d'athchóirithe agus infheistíochtaí sin a bheith comhsheasmhach le cur chun feidhme na straitéisí náisiúnta a chinn an Ballstát lena mbaineann freisin chun aghaidh a thabhairt ar thosaíochtaí sin an Aontais.

(34)

Chun straitéisí comhdhlúthaithe fhioscaigh lena gcothófaí fás a spreagadh, ba cheart aird chuí a thabhairt ar thionchar na n-athchóirithe agus na n-infheistíochtaí, a luaithe a chuirfear chun feidhme iad faoi na pleananna fioscach-struchtúracha meántéarmacha náisiúnta, agus pleananna á gceapadh ina dhiaidh sin. Ba cheart aird ar leith a thabhairt ar an tionchar ar inbhuanaitheacht fhioscach trí ioncam poiblí, caiteachas agus fás ionchasach amach anseo, chomh maith leis an rannchuidiú le tosaíochtaí comhchoiteanna an Aontais, bunaithe ar fhianaise eacnamaíoch atá fónta agus sonraíbhunaithe.

(35)

I gcás nach gcomhlíonann Ballstát go sásúil, faoin spriocdháta sonraithe, an tsraith d’athchóirithe agus infheistíochtaí atá faoi cheangal ama atá mar bhonn taca leis an gconair ghlanchaiteachais níos céimsí arna leagan síos ag an gComhairle, ba cheart don Chomhairle, ar mholadh ón gCoimisiún, a bheith in ann a mholadh go ngiorrófar síneadh na tréimhse choigeartúcháin, is é sin le rá an iarracht bhliantúil coigeartúcháin a ghéarú, mura bhfuil imthosca oibiachtúla ann a fhágann nach féidir an cur chun feidhme a bhaint amach faoin spriocdháta tosaigh.

(36)

Ba cheart don Choimisiún cuntas rialúcháin a bhunú do gach Ballstát chun rian a choinneáil ar dhialltaí bliantúla agus carnacha aníos agus anuas i leith an ghlanchaiteachais arna bhreathnú ón gconair ghlanchaiteachais arna leagan síos ag an gComhairle. Níor cheart dialltaí a thaifeadadh sa chuntas rialúcháin fad is a fhanann clásail éalaithe gníomhachtaithe. I gcomhréir le hAirteagal 2(3) de Rialachán (CE) Uimh. 1467/97, agus an tuarascáil de bhun Airteagal 126(3) CFAE á hullmhú aige, ba cheart don Choimisiún an dul chun cinn i gcur chun feidhme na n-athchóirithe agus na n-infheistíochtaí a chur san áireamh mar thosca ábhartha, lena n-áirítear, go háirithe, beartais chun straitéis chomhchoiteann an Aontais um fhás agus um fhostaíocht a chur chun feidhme, agus aird ar leith a thabhairt ar ranníocaíochtaí airgeadais chun tosaíochtaí comhchoiteanna an Aontais a bhaint amach mar a leagtar síos sa Rialachán seo.

(37)

Is léir an inniúlacht atá ag institiúidí fioscacha neamhspleácha maidir le smacht fioscach a chothú agus creidiúnacht airgeadas poiblí na mBallstát a neartú. Chun úinéireacht náisiúnta a fheabhsú, ba cheart an ról comhairleach atá ag institiúidí fioscacha neamhspleácha a choinneáil i gcreat rialachais eacnamaíoch athchóirithe an Aontais, d’fhonn a n-acmhainneacht a fheabhsú de réir a chéile.

(38)

Ba cheart ról comhairleach níos suntasaí a bheith ag Bord Fioscach Eorpach atá buan agus níos neamhspleáiche i gcreat rialachais eacnamaíoch an Aontais. Ba cheart dó leanúint de mheastóireacht a dhéanamh ar chur chun feidhme an Chomhshocraithe Cobhsaíochta agus Fáis, measúnú a dhéanamh ar an staid fhioscach ionchasach don limistéar euro ina iomláine, agus comhairle a chur ar fáil don Choimisiún agus don Chomhairle, agus ról agus sainphribhléidí an Choimisiúin a bunaíodh in CAE agus in CFAE á n-urramú ag an am céanna. Ba cheart feabhas a chur lena neamhspleáchas agus a rochtain ar fhaisnéis. Ba cheart dul i gcomhairle leis an gComhairle agus le Parlaimint na hEorpa agus Cathaoirleach agus Comhaltaí an Bhoird á gceapadh. Leis na ceapacháin sin, ba cheart cothromaíocht iomchuí gheografach agus inscne a áirithiú, a mhéid is féidir.

(39)

Agus tuairim á tabhairt uaidh ag an gCoimisiún maidir leis na dréachtphleananna buiséadacha arna gcur i láthair de bhun Rialachán (AE) Uimh. 473/2013 ó Pharlaimint na hEorpa agus ón gComhairle (18), ba cheart dó measúnú a dhéanamh ar cibé acu atá nó nach bhfuil na dréachtphleananna buiséadacha i gcomhréir leis na conairí glanchaiteachais arna leagan síos ag an gComhairle de bhun an Rialacháin sin.

(40)

I gcás mór-shuaite don limistéar euro nó don Aontas ina iomláine, is gá clásal éalaithe ginearálta a bheith ann chun go mbeifear in ann plé le géar-shleabhcadh eacnamaíoch sa limistéar euro nó san Aontas ina iomláine trí ligean do dhiall ón gconair ghlanchaiteachais arna leagan síos ag an gComhairle ar choinníoll nach gcuirtear inbhuanaitheacht fhioscach i mbaol sa mheántéarma de dheasca an diallta sin. Tá gníomhachtú agus síneadh an chlásail éalaithe ghinearálta le bheith faoi réir moladh ón gComhairle, moladh ar cheart don Chomhairle féachaint lena ghlacadh laistigh de 4 seachtaine tar éis ghlacadh an mholta ón gCoimisiún. Ba cheart don Bhord Fioscach Eorpach tuairim a thabhairt maidir le síneadh a chur leis an gclásal éalaithe ghinearálta.

(41)

De bhreis ar an gclásal éalaithe ginearálta, ba cheart clásal éalaithe tírshonrach a bheith ann freisin chun go mbeifear in ann diall ón gconair ghlanchaiteachais arna leagan síos ag an gComhairle i gcás imthosca eisceachtúla, mar shampla teagmhais eisiginiúla dhothuartha, nach mbeadh smacht ag an mBallstát orthu, a mbeadh tionchar nach beag orthu ar airgeadas poiblí an Bhallstáit agus a mbeadh gá le bearta fioscacha frith-thimthriallacha ina n-aghaidh, ar choinníoll nach gcuirfear an inbhuanaitheacht fhioscach i mbaol leis an diall sin sa mheántéarma. Tá gníomhachtú agus síneadh na gclásal éalaithe tírshonrach le bheith faoi réir moladh ón gComhairle, moladh ar cheart don Chomhairle féachaint lena ghlacadh laistigh de 4 seachtaine tar éis ghlacadh an mholta ón gCoimisiún, agus aird á tabhairt ar an iarraidh ón mBallstát lena mbaineann an clásal éalaithe tírshonrach a ghníomhaíochtú nó a shíneadh.

(42)

Is cuid de phacáiste é an Rialachán seo ina gcuimsítear freisin Rialachán (AE) 2024/1264 ón gComhairle (19) agus Treoir (AE) 2024/1265 ón gComhairle (20). Le chéile, déanann na trí ghníomh reachtacha sin (dá ngairtear ‘an t-athchóiriú ar an gcreat rialachais eacnamaíoch’ anseo feasta) athchóiriú ar chreat rialachais eacnamaíoch an Aontais, lena gcorpraítear i ndlí an Aontais substaint Theideal III (Comhaontú Buiséadach) den Chonradh ar Chobhsaíocht, ar Chomhordú agus ar Rialachas san Aontas Eacnamaíoch agus Airgeadaíochta (21) an 2 Márta 2012 (‘CCCR’), i gcomhréir le hAirteagal 16 den Chonradh sin. Trí thógáil ar an taithí a fuarthas agus CCCR á chur chun feidhme ag na Ballstáit, coinnítear, leis an athchóiriú ar an gcreat rialachais eacnamaíoch, treoirlíne mheántéarmach an Chomhaontaithe Fhioscaigh mar uirlis chun smacht buiséadach agus cur chun cinn fáis a bhaint amach. Áirítear gné neartaithe thírshonrach san athchóiriú ar an gcreat rialachais eacnamaíoch a bhfuil mar aidhm aige úinéireacht náisiúnta a fheabhsú, lena n-áirítear trí ról comhairleach na n-institiúidí fioscacha neamhspleácha a choinneáil, rud a tharraingíonn go bunúsach ar phrionsabail choiteanna maidir le sásraí náisiúnta um cheartú fioscach de chuid an Chomhaontaithe Bhuiséadaigh a mhol an Coimisiún i dteachtaireacht an 20 Meitheamh 2012 uaidh i gcomhréir le hAirteagal 3(2) CCCR. Leagtar amach sa Rialachán seo an anailís ar chaiteachas atá glan ar bhearta lánroghnacha ioncaim don mheasúnú foriomlán ar chomhlíontacht a cheanglaítear leis an gComhaontú Buiséadach. Mar atá sa Chomhaontú Buiséadach, ní cheadaítear dialltaí sealadacha ón bplean meántéarmach ach amháin in imthosca eisceachtúla i gcomhréir leis an Rialachán seo agus i gcomhréir leis na forálacha maidir leis an gcuntas rialaithe. Mar atá sa Chomhaontú Buiséadach, i gcás dialltaí suntasacha ón bplean meántéarmach, ba cheart bearta a chur chun feidhme chun na dialltaí a cheartú ar feadh tréimhse shainithe. Déantar leis an athchóiriú ar an gcreat rialachais eacnamaíoch faireachas fioscach agus nósanna imeachta forfheidhmithe a neartú chun an gealltanas a chur i gcrích maidir le hairgeadas poiblí atá fónta agus inbhuanaithe agus fás inbhuanaithe agus cuimsitheach a chur chun cinn. Coinnítear, leis an athchóiriú ar an gcreat rialachais eacnamaíoch dá réir sin, na cuspóirí bunúsacha smachta bhuiséadaigh agus inbhuanaitheachta fiachais a leagtar amach sa Chomhaontú Buiséadach.

(43)

Chun cur chun feidhme éifeachtach agus faireachán iomchuí ar an Rialachán seo a áirithiú, ba cheart don Choimisiún treoraíocht thráthúil a sholáthar, tar éis dó tuairim a iarraidh ar an gCoiste Eacnamaíoch agus Airgeadais, maidir leis an bhfaisnéis atá le soláthar ag na Ballstáit ina bpleananna fioscach-struchtúracha meántéarmacha náisiúnta agus ina dtuarascálacha bliantúla ar dhul chun cinn. Ba cheart an treoraíocht sin a chur ar fáil go poiblí.

(44)

Ba cheart an faireachas iltaobhach a bheith bunaithe ar staidreamh ardcháilíochta neamhspleách, arna dtáirgeadh i gcomhréir leis na prionsabail a leagtar síos i Rialachán (CE) Uimh. 223/2009 ó Pharlaimint na hEorpa agus ón gComhairle (22).

(45)

Ós rud é nach féidir leis na Ballstáit cuspóirí an Rialacháin seo chun comhordú éifeachtach na mbeartas eacnamaíoch agus faireachas buiséadach iltaobhach a ghnóthú go leordhóthanach, agus gur fearr is féidir, de bharr fhairsinge nó éifeachtaí an chomhordaithe agus an fhaireachais, iad a ghnóthú ar leibhéal an Aontais, féadfaidh an tAontas bearta a ghlacadh i gcomhréir le prionsabal na coimhdeachta a leagtar amach in Airteagal 5 CAE. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(46)

I bhfianaise an spriocdháta atá ann cheana faoin gComhshocrú Cobhsaíochta agus Fáis, ba cheart an Rialachán seo a theacht i bhfeidhm mar ábhar práinne an lá tar éis lá a fhoilsithe in Iris Oifigiúil an Aontais Eorpaigh,