Il-programm Ewropa Diġitali huwa programm iffinanzjat mill-Unjoni Ewropea (UE) li jibda mill-1 ta’ Jannar 2021 sal-31 ta’ Diċembru 2027, li l-għan tiegħu huwa li jwassal it-teknoloġija diġitali lin-negozji, liċ-ċittadini u lill-amministrazzjonijiet pubbliċi. Għandu l-għan li:

itejjeb il-kompetittività tal-UE fl-ekonomija diġitali globali;
jikkontribwixxi biex inaqqas id-distakk diġitali madwar l-UE u jirrinforza l-awtonomija strateġika tagħha;
isaħħaħ u jippromwovi l-kapaċitajiet Ewropej f’oqsma diġitali teknoloġiċi ewlenin permezz ta’ skjerament fuq skala kbira.

Ir-regoli u d-dettalji tal-programm huma stabbiliti fir-Regolament (UE) 2021/694. Allokazzjoni indikattiva ta’ aktar minn EUR 7.5 biljun bil-prezzijiet tal-2021 ġiet allokata għall-programm, li huwa implimentat prinċipalment taħt ġestjoni diretta mill-Kummissjoni Ewropea. Il-programm jinvolvi l-kofinanzjament minn Stati Membri u, meta jkun meħtieġ, mis-settur privat. Għotjiet taħt ċertu programm jistgħu jkopru sa 100 % tan-nefqa eleġibbli.

Hemm ħames objettivi speċifiċi li huma maħsuba biex isaħħu l-kapaċitajiet tal-Ewropa f’oqsma diġitali teknoloġiċi ewlenin fis-settur privat u f’oqsma ta’ interess pubbliku:

computing ta’ prestazzjoni għolja,
intelliġenza artifiċjali,
ċibersigurtà u fiduċja,
ħiliet diġitali avvanzati, u
skjerament u l-aħjar użu tal-kapaċità u l-interoperabilità diġitali.

ARA WKOLL