Dikjarazzjonijiet finanzjarji tal-kumpaniji komparabbli u ċari madwar l-UE

PUNTI EWLENIN

• Il-leġiżlazzjoni tapplika għal kumpaniji tat-tip ta’ responsabbiltà limitata fl-Unjoni Ewropea (UE).
• Il-leġiżlazzjoni tiddefinixxi u tiddistingwi bejn kumpaniji mikro, żgħar, medji u kbar, abbażi:
  • tal-karta tal-bilanċ tagħhom;
  • tal-fatturat nett;
  • tal-għadd medju ta’ impjegati matul sena finanzjarja.
• Għal kull waħda mill-kategoriji li ġejjin, hija tistabbilixxi tliet limiti, li tnejn minnhom ma jistgħux jinqabżu:
  • mikroimpriżi: karta tal-bilanċ (EUR 350 000), fatturat nett (EUR 700 000), impjegati (10);
  • impriżi żgħar: karta tal-bilanċ (EUR 4 miljun), fatturat nett (EUR 8 miljun), impjegati (50);
  • impriżi medji: karta tal-bilanċ (EUR 20 miljun), fatturat nett (EUR 40 miljun), impjegati (250).
• Impriżi kbar jeċċedu tal-inqas tnejn mit-tliet kriterji li ġejjin: karta tal-bilanċ (EUR 20 miljun), fatturat nett (EUR 40 miljun), impjegati (250).
• Att delegat, id-Direttiva (UE) 2023/2775. Li magħha jridu jikkonformaw l-Istati Membri sal-24 ta’ Diċembru 2024, jaġġusta l-kriterji tad-daqs kif ġej:
  • mikroimpriżi: karta tal-bilanċ (EUR 450 000), fatturat nett (EUR 900 000), impjegati (10);
  • impriżi żgħar karta tal-bilanċ (EUR 5 miljuni, jew sa EUR 7.5 miljuni skont id-diskrezzjoni tal-Istat Membru), fatturat nett (EUR 10 miljuni, jew sa EUR 15-il miljun), impjegati (50).
  • impriżi medji: karta tal-bilanċ (EUR 25 miljun), fatturat nett (EUR 50 miljun), impjegati (250).
  • impriżi kbar jeċċedu tal-inqas tnejn mit-tliet kriterji li ġejjin: karta tal-bilanċ (EUR 25 miljun), fatturat nett (EUR 50 miljun), impjegati (250).

Bl-istess mod, id-direttiva tistabbilixxi regoli għal gruppi ta’ kumpaniji (li jkunu magħmula minn impriża omm u impriża sussidjarja) ta’ daqsijiet differenti.

• Id-dikjarazzjonijiet finanzjarji annwali għandhom:
  • jinkludu, bħala minimu, il-karta tal-bilanċ, il-kont tal-qligħ u t-telf u n-noti għad-dikjarazzjonijiet finanzjarji¹;
  • jagħtu stampa veru u ġusta tal-assi, il-passivi, il-pożizzjoni finanzjarja u l-qligħ u t-telf tal-kumpanija;
  • jiġu ppubblikati minn kull kumpanija fir-reġistru tan-negozju nazzjonali rilevanti.
• Id-direttiva tistabbilixxi prinċipji ġenerali għar-rappurtar finanzjarju, bħall-applikazzjoni konsistenti tal-politiki tal-kontabilità u bażijiet ta’ kalkolu minn sena għal oħra.
• Regoli dettaljati jkopru l-preżentazzjoni tal-karti tal-bilanċ, il-kontijiet tal-qligħ u t-telf u n-noti għad-dikjarazzjonijiet finanzjarji, kif ukoll rapporti ta’ ġestjoni, informazzjoni mhux finanzjarja, governanza korporattiva u dikjarazzjonijiet konsolidati.
• L-obbligi jistgħu jvarjaw skont id-daqs tal-kumpanija u d-direttiva tippermetti eżenzjonijiet jew simplifikazzjonijiet f’ħafna oqsma għall-mikroimpriżi u l-SMEs. Huwa f’idejn kull Stat Membru tal-UE li jiddeċiedi dwar il-portata ta’ dawn l-eżenzjonijiet u s-simplifikazzjonijiet.
• Id-dikjarazzjonijiet finanzjarji ta’ entitajiet ta’ interess pubbliku u impriżi medji u kbar għandhom jiġu awditjati minn awditur statutorju wieħed jew aktar.
• Kumpaniji kbar involuti fl-estrazzjoni ta’ minerali, żejt, gass naturali jew materjali oħra jew involuti fil-qtugħ tas-siġar f’foresti primarji² għandhom jippubblikaw id-dettalji ta’ pagamenti ogħla minn EUR 100 000 fit-total li għamlu lill-gvernijiet fi kwalunkwe sena finanzjarja.
• Mit-22 ta’ Ġunju 2023, il-Kapitolu 10a tad-Direttiva 2013/34/UE rigward l-iżvelar tal-informazzjoni tat-taxxa fuq id-dħul minn gruppi multinazzjonali b’introjtu kkonsolidat annwali ta’ aktar minn EUR 750 miljun:beda japplika.
  • il-kumpaniji omm ta’ tali gruppi huma mitluba jiddikjaraw, f’rapport speċifiku ppubblikat fuq is-sit web tagħhom, l-introjtu tagħhom, il-profitti li għamlu, it-taxxa korporattiva fuq id-dħul li ħallsu u l-għadd ta’ impjegati għal kull Stat Membru, u għal kull pajjiż mhux tal-UE li ma jikkooperax mal-UE fuq kwistjonijiet fiskali jew li ma jissodisfax l-istandards imma li huwa impenjat biex jirriforma;
  • Ir-reġistri tan-negozji jipprovdu wkoll aċċess pubbliku għal dawn ir-rapporti;
  • Gruppi multinazzjonali ta’ pajjiżi mhux tal-UE li jagħmlu negozju fl-UE huma meħtieġa jirrappurtaw b’mod simili.
• Regoli dwar rapportar tas-sostenibbilità korporattiva jeħtieġu li impriżi żgħar, medji u kbar (esklużi mikroimpriżi) elenkati fuq is-swieq regolati tal-UE, flimkien ma’ impriżi kbar u impriżi omm ta’ gruppi kbar, li jinkludu fir-rapporti ta’ ġestjoni tagħhom informazzjoni relatata mal-impatt tal-kumpanija fuq kwistjonijiet ta’ sostenibbilità (bħal drittijiet ambjentali, drittijiet soċjali, drittijiet tal-bniedem u fattturi ta’ governanza) flimkien ma’ informazzjoni neċessarja għall-komprensjoni ta’ kif aspetti ta’ sostenibbilità jaffettwaw l-iżvilupp, prestazzjoni u pożizzjoni tagħhom. L-applikazzjoni ta’ dawn ir-regoli ser jidħlu gradwalment (ara hawn taħt). Fl-annessi u appendiċi tiegħu, ir-Regolament delegat (UE) 2023/2772 jissettja regoli dettaljati fir-rigward ta’ standards tal-UE fuq rapportar dwar sostenibbilità li għandhom jintużaw minn kumpaniji biex iwettqu r-rapportar dwar sostenibbilità tagħhom, skont l-iskeda li tinsab fid-Direttiva (UE) 2022/2464.
• Id-Direttiva (UE) li temenda 2023/2864 iddaħħal artikolu li jikkonċerna l-aċċessibbiltà tal-informazzjoni li trid tkun ippubblikata taħt id-Direttiva 2013/34/UE dwar il-punt tal-aċċess singolu tal-UE (ESAP) stabbilit taħt ir-Regolament (UE) 2023/2859 — ara s-sommarju, L-ESAP ser jipprovdi aċċess għall-informazzjoni pubblika finanzjarja u relatata ma’ sostenibbilità dwar kumpaniji tal-UE u prodotti ta’ investiment tal-UE. Mill-10 ra’ Jannar 2028, meta jagħmlu pubbliku r-rapporti u dikjarazzjonijiet varji tagħhom (pereżempju r-rapporti tal-attività, dikjarazzjonijiet annwali u konsolidati finanzjarji tagħhom u ta’ awditu, rapporti tal-assikgurazzjoni u ta’ sostenibbilità), il-kumpaniji ser ikollhom jissottomettu dawn ir-rapporti u dikjarazzjonijiet fl-istess ħin lill-entità ta’ ġbir maħsuba għalhekk għall-iskop li jsiru aċċessibbli fuq l-ESAP.

Revoka

• Id-Direttiva 2013/34/UE tirrevoka d-direttivi preċedenti dwar il-kontabilità (id-Direttivi 78/660/KEE u 83/349/KEE) u temenda d-Direttiva 2006/43/KE (ara s-sommarju).