Il-Fond Agrikolu Ewropew għall-Iżvilupp Rurali
SOMMARJU TA’:
Ir-Regolament (UE) Nru 1305/2013 — għajnuna għall-iżvilupp rurali
X’INHU L-GĦAN TAR-REGOLAMENT?
Ir-regolament:
- jistabbilixxi kif il-Fond Agrikolu Ewropew għall-Iżvilupp Rurali (FAEŻR) jikkontribwixxi għall-iżvilupp ta’ żoni rurali u tas-settur agrikolu għall-perjodu 2014-2020 biex ikun:
- reżiljenti, kompetittiv u innovattiv,
- ma jagħmilx ħsara lill-ambjent u jkun ibbilanċat biex ma jagħmilx ħsara ambjentali,
- soċjalment inklużiv;
- jistabbilixxi r-regoli li jmexxu l-għajnuna tal-Unjoni Ewropea (UE) għall-iżvilupp rurali, iffinanzjat mill-FAEŻR;
- jispjega l-objettivi tal-FAEŻR u kif jaħdem.
Kien emendat mir-Regolament (UE) 2017/2393, li introduċa serje ta’ modifikazzjonijiet tekniċi għall-ħames regolamenti relatati mal-Politika Agrikola Komuni (PAK):
Ġie emendat iktar mir-Regolament (UE) 2020/2220, li fost affarijiet oħra, jistabbilixxi r-regoli tranżitorji għall-implimentazzjoni tal-FEAŻR, inkluż riżorsi speċifiċi biex jgħinu l-irkupru tas-settur agrikolu tal-UE u ta’ żoni rurali wara l-pandemija tal-COVID-19.
PUNTI EWLENIN
Objettivi
Il-FAEŻR għandu l-għan li:
- jrawwem il-kompetittività fl-agrikoltura;
- jiżgura li r-riżorsi naturali huma ġestiti b’mod sostenibbli u li l-miżuri biex tiġi indirizzata l-bidla fil-klima jiġu implimentati b’mod effettiv;
- jikseb żvilupp bilanċjat territorjali ta’ żoni rurali fl-UE kollha, inkluż il-ħolqien u ż-żamma tal-impjiegi.
Prijoritajiet
L-UE tgħin azzjoni li tilħaq is-sitt oġġettivi prioritarji:
- it-trawwim tat-trasferiment tal-għarfien u l-innovazzjoni;
- it-titjib tal-vijabbiltà u l-kompetittività tat-tipi kollha ta’ agrikoltura u l-immaniġġjar sostenibbli tal-foresti;
- il-promozzjoni tal-organizzazzjoni tal-katina tal-ikel, inkluż l-ipproċessar u l-marketing ta’ prodotti agrikoli, il-benesseri tal-annimali u l-ġestjoni tar-riskju;
- ir-restawr, il-preservazzjoni u t-titjib tal-ekosistemi relatati mal-agrikoltura u l-forestrija;
- il-promozzjoni tal-effiċjenza tar-riżorsi u t-transizzjoni għal ekonomija b’livell baxx ta’ karbonju;
- il-promozzjoni tal-inklużjoni soċjali, it-tnaqqis tal-faqar u l-iżvilupp ekonomiku fiż-żoni rurali.
l-Istati Membri tal-UE u r-reġjuni jista’ wkoll jindirizzaw oqsma ta’ importanza partikolari fil-qasam tagħhom bħal:
- bdiewa żgħażagħ;
- irziezet żgħar;
- żoni muntanjużi;
- nisa fiż-żoni rurali;
- mitigazzjoni, adattament u bijodiversità tat-tibdil fil-klima.
Baġit
- Il-baġit tal-FAEŻR għall-perjodu kien stabbiliet għal €99.3 biljuni fl-2015. Mill-inqas 30 % ta’ dan irid jintuża għal miżuri li jieħdu ħsieb l-ambjent u jiġġieldu t-tibdil fil-klima u 5 % huwa riservat għall-istrateġiji ta’ żvilupp lokali.
- Ir-Regolament Delegat (UE) 2015/791 jirrevedi t-tqassim tal-baġit tal-għajnuna tal-UE għall-programmi tal-iżvilupp rurali (Anness I għar-Regolament (UE) Nru 1305/2013).
Emenda tal-2017 tar-Regolament
Ir-Regolament (UE) 2017/2393, li ilu japplika mill-1 ta’ Jannar 2018, jimmira li jissimplifika u jtejjeb l-aċċess tal-bdiewa għall-finanzjament taħt il-PAK. Fost affarijiet oħra, jintroduċi:
- għodda ġdida għall-istabbilizzazzjoni tad-dħul speċifiku għas-settur li tipprovdi kumpens lill-bdiewa milquta minn tnaqqis qawwi fid-dħul tagħhom;
- appoġġ għal kuntratti ta’ assigurazzjoni f’każijiet fejn aktar minn 20 % tal-produzzjoni annwali medja ta’ bidwi tinqered, pereżempju minħabba kundizzjonijiet ħżiena tat-temp.
Implimentazzjoni
Ir-regolament jitlob li l-politika għall-iżvilupp rurali tkun konsistenti ma’ politiki oħrajn f’dan il-qasam. Regoli u ftehimiet fil-livell tal-UE huma fis-seħħ biex jiżguraw li l-finanzjament tal-UE jintuża b’mod effettiv, u jimminimizza l-irduppjar u l-inkonsistenzi.
Il-pandemija tal-COVID-19
- Ir-Regolament Emendatorju (UE) 2020/872 jipprovdi assistenza għall-emerġenza temporanja f’każijiet ta’ eċċezzjoni lill-bdiewa u lill-intrapriżi żgħar u ta’ daqs medju (SMEs) attivi fl-ipproċessar, fil-marketing jew fl-iżvilupp ta’ prodotti agrikoli u tal-qoton taħt il-FAEŻR.
- L-Istati Membri jeħtieġ li jimmiraw l-għajnuna għal beneifiċjarji li huma l-iktar affettwati mill-kriżi tal-COVID-19 skont l-evidenza disponibbli u l-oġġettiv kif ukoll skont il-kriterji nondiskriminatorji tal-għażla
- L-appoġġ għandu jieħu l-forma ta’ ħlas ta’ ammont f’daqqa li għandu jitħallas sat-30 ta’ Ġunju 2021, ibbażat fuq applikazzjonijiet għal appoġġ approvati mill-awtorità nazzjonali kompetenti sal-31 ta’ Diċembru 2020.
- L-ammont massimu tal-għajnuna jeħtieġ li ma jaqbisx EUR 7,000 għal kull bidwi u EUR 50,000 għal kull SME.
Għajnuna temporanja eċċezzjonali
- Ir-Regolalment Emendatorju (UE) 2022/1033 jintroduċi l-possibilità għall-Istati Membri li jipprovdu għajnuna temporanja eċċezzjonali b’likwidità taħt il-FAEŻD għall-bdiewa u għall-SMEs bħala reazzjoni għall-impatt tal-invażjoni tar-Russja fuq l-Ukrajna. L-għajnuna tipprova tindirizza l-problemi li jpoġġu l-kontinwità tal-attivitajiet tal-bdiewa u tan-negozji żgħar li jipproċessaw prodotti agrikoli fir-riskju — żidiet sostanzjali fl-ispejjeż tal-input, b’mod partikolari għall-impriżi tal-għalf u tal-fertilizzant, kif ukoll għal spejjeż li żdiedu tal-enerġija.
- Il-bdiewa u l-SMEs ser ikunu kapaċi jirċievu għajnuna sa EUR 15,000 u EUR 100,000 rispettivament. Dan ser jitħallas sal-15 ta’ Ottubru 2023. Għaldaqstant l-Istati Membri ser ikollhom bżonn jissottomettu emenda għall-programm(i) ta’ żvilupp rurali tagħhom li jintroduċi din il-miżura ġdida.
Regoli trażizzjonali għas-snin 2021 u 2022
- Ir-Regolament Emendatorju (UE) 2020/2220 iħalli l-applikazzjoni kontinwa tar-regoli taħt il-qafas tal-PAK 2014-2020, u jassigura l-kontinwità tal-pagamenti lill-bdiewa u lil benefiċjarji oħra ta’ għajnuna mill-FAEŻD fl-2021 u 2022 sakemm il-qafas il-ġdid japplika mill-1 ta’ Jannar 2023.
- Barra minn hekk, għajnuna temporanja eċċezzjonali lill-bdiewa u lill-SMEs, partikolarment affettwati mill-kriżi tal-COVID-19 ser tindirizza l-problemi attwali tal-likwidità li qed jheddu l-kontinwità tal-biedja u tan-negozji żgħar li huma attivi fl-ipproċessar, fil-marketing jew fl-iżvilupp tal-prodotti agrikoli.
- L-ammont totali tal-għajnuna mill-UE għall-iżvilupp rurali mill-1 ta’ Jannar 2021 sal-31 ta’ Diċembru 2022 ser ikun massimu ta’ EUR 26,896,831,880 fi prezzijiet kurrenti, skont il-qafas finanzjarju pluriennali għas-snin 2021 sal-2027.
- Ammont ieħor ta’ EUR 8,070,486,840 fi prezzijiet kurrenti għandu jsir disponibbli bħala riżors addizzjonal taħt l-FAEŻD għall-irkupru tas-settur agrikolu tal-UE u ż-żoni rurali għas-snin 2021 u 2022. Ir-regolament jistabbilixxi regoli dettaljati dwar kif dawn il-fondi għandhom jiġu allokati għall-prijoritajiet, bħal żvilupp ekonomiku u soċjali, azzjoni għall-klima, il-benesseri tal-annimali, eċċ.
MINN META BEDA JAPPLIKA R-REGOLAMENT?
Ilu japplika mill-1 ta’ Jannar 2014.
SFOND
Il-FAEŻR huwa wieħed minn żewġ fondi tal-UE li jipprovdi flus għall-implimentazzjoni tal-PAK (l-ieħor huwa l-Fond Agrikolu Ewropew għall-Garanzija). Huwa jfittex li jinkoraġġixxi l-iżvilupp rurali madwar l-UE, billi jaħdem flimkien ma’ inizzjattivi oħra f’dan il-qasam biex l-użu effettiv tal-fondi tal-UE jiġi assigurat.
DOKUMENT PRINĊIPALI
Ir-Regolament (UE) Nru 1305/2013 tal-Parlament Ewropew u tal-Kunsill tas-17 ta’ Diċembru 2013 dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR) u li jħassar ir-Regolament tal-Kunsill (KE) Nru 1698/2005 (ĠU L 347, 20.12.2013, pp. 487-548).
Emendi suċċessivi għar-Regolament (UE) Nru 1305/2013 ġew inkorporati fit-test oriġinali. Din il-verżjoni konsolidata għandha valur dokumentarju biss.
DOKUMENTI RELATATI
Ir-Regolament Delegat tal-Kummissjoni (UE) Nru 807/2014 tal-11 ta’ Marzu 2014 li jissupplimenta r-Regolament (UE) Nru 1305/2013 tal-Parlament Ewropew u tal-Kunsill dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR) u jintroduċi dispożizzjonijiet tranżitorji (ĠU L 227, 31.7.2014, pp. 1-17).
Ara l-verżjoni konsolidata.
Ir-Regolament ta’ Implimentazzjoni tal-Kummissjoni (UE) Nru 808/2014 tas-17 ta’ Lulju 2014 li jistabbilixxi r-regoli għall-applikazzjoni tar-Regolament (UE) Nru 1305/2013 tal-Parlament Ewropew u tal-Kunsill dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR) (ĠU L 227, 31.7.2014, pp. 18-68).
Ara l-verżjoni konsolidata.
Ir-Regolament ta’ Implimentazzjoni tal-Kummissjoni (UE) Nru 809/2014 tas-17 ta’ Lulju 2014 li jistabbilixxi r-regoli għall-applikazzjoni tar-Regolament (UE) Nru 1306/2013 tal-Parlament Ewropew u tal-Kunsill fir-rigward tas-sistema integrata ta’ amministrazzjoni u kontroll, tal-miżuri tal-iżvilupp rurali u tal-kundizzjonalità (ĠU L 227, 31.7.2014, pp. 69-124).
Ara l-verżjoni konsolidata.
Ir-Regolament (UE) Nru 1303/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni u l-Fond Ewropew għall-Affarijiet Marittimi u s-Sajd u li jħassar ir-Regolament tal-Kunsill (KE) Nru 1083/2006 (ĠU L 347, 20.12.2013, pp. 320-469).
Ara l-verżjoni konsolidata.
Ir-Regolament (UE) Nru 1306/2013 tal-Parlament Ewropew u tal-Kunsill tas-17 ta’ Diċembru 2013 dwar il-finanzjament, il-ġestjoni u l-monitoraġġ tal-politika agrikola komuni u li jħassar ir-Regolamenti tal-Kunsill (KEE) Nru 352/78, (KE) Nru 165/94, (KE) Nru 2799/98, (KE) Nru 814/2000, (KE) Nru 1290/2005 u (KE) Nru 485/2008 (ĠU L 347, 20.12.2013, pp. 549-607).
Ara l-verżjoni konsolidata.
Ir-Regolament (UE) Nru 1307/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi regoli għal pagamenti diretti lill-bdiewa taħt skemi ta’ appoġġ fil-qafas tal-politika agrikola komuni u li jħassar ir-Regolament tal-Kunsill (KE) Nru 637/2008 u r-Regolament tal-Kunsill (KE) Nru 73/2009 (ĠU L 347, 20.12.2013, pp. 608-670).
Ara l-verżjoni konsolidata.
Ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (ĠU L 347, 20.12.2013, pp. 671-854).
Ara l-verżjoni konsolidata.
l-aħħar aġġornament 01.01.2023