“L-ilħna tat-tfal għandhom jingħataw aktar setgħa, u dan jista’ jħeġġeġ tfal oħra biex ma jaħbux il-problemi tagħhom” (Kontribut ta’ tifel/tifla mil-Litwanja)
IL-PROTEZZJONI TAT-TFAL FL-EWROPA U LIL HINN MINNHA, BĦALA PRIJORITÀ TAL-UE
F’ħafna aspetti, il-ħajja tat-tfal fl-Unjoni Ewropea u globalment tjiebet matul dawn l-aħħar deċennji. Dan huwa wkoll grazzi għal żieda fil-prosperità, kura tas-saħħa aħjar u aċċess imtejjeb għall-edukazzjoni. Hekk kif qed niffaċċjaw dinja li qed tinbidel malajr, mill-effetti negattivi tal-pandemija fuq it-tfal, l-inugwaljanzi, id-diskriminazzjoni, il-kunflitti jew it-tibdil fil-klima, u fid-dinja virtwali, ħadna azzjoni biex inkomplu niddefendu u nkomplu nsaħħu d-drittijiet u l-kwalità tal-ħajja tat-tfal fl-UE u lil hinn minnha. L-UE, is-sħab Ewropej u internazzjonali tagħha, u l-organizzazzjonijiet tas-soċjetà ċivili ħadmu flimkien biex ma jħallu l-ebda tifel u tifla lura hekk kif nindirizzaw dawn l-isfidi u nisfruttaw l-opportunitajiet tat-tranżizzjonijiet ekoloġiċi, diġitali u demografiċi.
Matul dawn l-aħħar snin, il-Kummissjoni stabbiliet qafas legali, ta’ politika u ta’ appoġġ robust u komprensiv b’impenji ċari biex iżżid il-protezzjoni, il-promozzjoni u t-twettiq tad-drittijiet tat-tfal, b’mod partikolari permezz tal-adozzjoni tal-istrateġija komprensiva tal-UE dwar id-drittijiet tat-tfal (“l-Istrateġija tal-UE”) u l-Garanzija Ewropea għat-Tfal f’Marzu 2021. Skont l-Istrateġija tal-UE, jiġu implimentati għadd ta’ miżuri flimkien mal-Istati Membri, inklużi miżuri kontra l-abbuż u l-isfruttament sesswali tat-tfal online u offline u azzjonijiet biex jiġu indirizzati l-faqar fost it-tfal u l-esklużjoni soċjoekonomika għat-tfal fil-bżonn, inklużi dawk bi sfond ta’ minoranza u migrazzjoni. Ittieħdu wkoll miżuri biex is-sistemi ġudizzjarji jiġu adattati aħjar għall-ħtiġijiet tat-tfal bħala vittmi, persuni suspettati, akkużati jew ikkundannati, xhieda jew bħala partijiet oħra fi proċedimenti legali. Barra minn hekk, il-Kummissjoni żviluppat miżuri biex ittejjeb is-saħħa u l-benesseri mentali tat-tfal. Il-parteċipazzjoni u l-konsultazzjoni sinifikanti tat-tfal, inkluż permezz tal-Pjattaforma għall-Parteċipazzjoni tat-Tfal kienet karatteristika distintiva tal-Istrateġija tal-UE, u qed issir prattika rikonoxxuta fl-UE u lil hinn minnha.
L-istrateġija tal-UE tinkludi wkoll dimensjoni esterna b’saħħitha bl-UE żżid il-ħidma tagħha biex tippromwovi, tipproteġi, tissodisfa u tirrispetta d-drittijiet tat-tfal globalment, teqred it-tħaddim tat-tfal, tiġġieled kontra ż-żwieġ tat-tfal, tinvesti b’mod konsiderevoli fl-edukazzjoni madwar id-dinja, u tipproteġi minn kull forma ta’ vjolenza, abbuż u negliġenza, inkluż fil-kuntest umanitarju. L-UE qed trawwem ukoll il-parteċipazzjoni tat-tfal u ż-żgħażagħ fil-livell globali permezz tal-Pjan ta’ Azzjoni għaż-Żgħażagħ fl-Azzjoni Esterna. Il-linji gwida tal-UE dwar it-tfal u l-konflitti armati qed jiġu riveduti biex jipprevjenu, jirrispondu u jtemmu prattiki dannużi kontra t-tfal affettwati minn konflitti armati.
Filwaqt li sar progress sinifikanti, il-vjolenza kontra t-tfal tibqa’ sfida kemm ġewwa kif ukoll barra l-UE, f’ħafna livelli. It-tmiem tal-forom kollha ta’ vjolenza kontra t-tfal, inkluż bl-iżvilupp u t-tisħiħ ta’ sistemi integrati għall-protezzjoni tat-tfal, huwa imperattiv kemm morali kif ukoll legali. Barra minn hekk, dan huwa investiment strateġiku fil-futur tas-soċjetajiet tagħna.
IL-PROTEZZJONI TAT-TFAL INVESTIMENT IMPERATTIV U STRATEĠIKU FIS-SOĊJETÀ
Il-vjolenza tista’ tieħu ħafna forom u tinkludi l-forom kollha ta’ vjolenza fiżika jew mentali, korriment jew abbuż, negliġenza jew trattament negliġenti, trattament ħażin jew sfruttament, inkluż abbuż sesswali, abbuż fiżiku, abbuż online, jew f’dinjiet virtwali. Tali vjolenza tinkludi l-vjolenza domestika, it-traffikar tal-bnedmin, l-abbuż sesswali, il-vjolenza abbażi tal-ġeneru, inkluż il-mutilazzjoni ġenitali femminili u ż-żwieġ tat-tfal, kif ukoll il-forom kollha ta’ bullying u ta’ piena korporali. It-tfal huma esposti wkoll għal diskriminazzjoni u intolleranza, inkluż fil-ħajja diġitali tagħhom. Fl-2021, 114 tifel u tifla kienu vittmi ta’ omiċidju intenzjonat madwar l-UE. Huwa stmat li 20 % tat-tfal fl-Ewropa jsofru xi forma ta’ abbuż sesswali matul it-tfulija tagħhom. Fi stħarriġ reċenti tal-vjolenza kontra n-nisa, sa 13,7 % tan-nisa adulti rrapportaw fil-livell nazzjonali li esperjenzaw vjolenza sesswali fit-tfulija, għalkemm dan is-sehem jista’ jkun saħansitra ogħla, peress li r-rati ta’ divulgazzjoni sfortunatament huma aktar baxxi mir-realtà. Huwa stmat li 190,000 tifla madwar l-UE huma f’riskju li jiġu soġġetti bil-forza għall-mutilazzjoni ġenitali. Is-suwiċidju huwa t-tieni kawża ewlenija ta’ mewt fost iż-żgħażagħ (15 sa 19-il sena). 13 % sa 29 % tat-tfal (ta’ 15-il sena) fi Stati Membri differenti irrappurtaw li ta’ spiss kienu vittmi ta’ bullying.
Il-vjolenza kontra t-tfal għandha wkoll spiża ekonomika stmata sa 8 % tal-PDG globali, li tammonta għal madwar EUR 6,5 triljun, peress li tnaqqas l-iżvilupp ekonomiku, żżid l-inugwaljanza soċjoekonomika, toħnoq it-tkabbir ekonomiku, u tnaqqas l-introjtu per capita. Billi jiġu ddedikati riżorsi għall-programmi tat-tfulija bikrija, dan jista’ jwassal għal redditu fuq l-investiment mill-inqas erba’ darbiet ogħla mill-infiq oriġinali. It-telf annwali tal-kapital uman minn disturbi mentali tat-tfal u ż-żgħażagħ huwa stmat għal EUR 54,2 biljun fl-Ewropa. L-iżvantaġġ soċjoekonomiku fit-tfulija jġarrab ukoll spejjeż kbar għas-soċjetajiet, li bħala medja jammontaw għal ekwivalenti ta’ 3,4% tal-PDG fl-UE. L-investiment fil-protezzjoni tat-tfal u l-prevenzjoni tal-vjolenza għalhekk iwassal ukoll għal redditi ekonomiċi għoljin u l-iffrankar tal-ispejjeż fit-tul.
It-tfal infushom jitolbu li jingħataw is-setgħa, u jitkellmu dwar il-kwistjonijiet tagħhom, ħajjithom. Huma detenturi tad-drittijiet u aġenti tal-bidla f’dan il-każ u issa huma elokwenti fis-sejħiet tagħhom lill-adulti għal azzjoni biex jirrispondu għall-ħtiġijiet tagħhom. Bħala esperti fi kwistjonijiet li jikkonċernawhom, it-tfal ġustament jitolbu “Xejn għalina mingħajrna”. F’konformità mal-Artikolu 12 tal-Konvenzjoni tan-NU dwar id-Drittijiet tat-Tfal (“il-Konvenzjoni tan-NU”) u l-Karta tad-Drittijiet Fundamentali tal-Unjoni Ewropea (“il-Karta”), l-ilħna u l-ħtiġijiet tat-tfal huma ċentrali għar-Rakkomandazzjoni dwar sistemi integrati għall-protezzjoni tat-tfal. Aktar minn 1,000 tifel u tifla ġew ikkonsultati dwar il-ħtiġijiet ta’ protezzjoni tagħhom permezz tal-Pjattaforma l-ġdida tal-UE għall-Parteċipazzjoni tat-Tfal.
LEJN SISTEMI INTEGRATI GĦALL-PROTEZZJONI TAT-TFAL
Il-protezzjoni tat-tfal minn kull forma ta’ vjolenza hija objettiv ewlieni tal-UE. Hija wkoll intrinsikament marbuta mal-prevenzjoni tal-vjolenza, biex jiġi żgurat il-benesseri tat-tfal u r-rispett tad-drittijiet tagħhom. L-Artikolu 3(3) tat-Trattat dwar l-Unjoni Ewropea (TUE) jistabbilixxi l-objettiv għall-Ujoni li tippromwovi l-protezzjoni tad-drittijiet tat-tfal. L-Artikolu 24 tal-Karta jipprevedi li t-tfal għandu jkollhom id-dritt għall-protezzjoni u l-kura meħtieġa għall-benesseri tagħhom, u li fl-azzjonijiet kollha relatati mat-tfal, kemm jekk jittieħdu minn awtoritajiet pubbliċi jew minn istituzzjonijiet privati, l-aħjar interessi tat-tfal iridu jkunu kunsiderazzjoni primarja. Il-protezzjoni tat-tfal hija wkoll objettiv ewlieni tal-Konvenzjoni tan-NU u tal-Aġenda 2030 għall-Iżvilupp Sostenibbli għal kull tifel u tifla biex jgħixu ħielsa mill-biża’, in-negliġenza, l-abbuż u l-isfruttament. L-istatistika enormi u l-evidenza tal-firxa wiesgħa ta’ abbuż, vjolenza u negliġenza tat-tfal madwar l-UE, inkluż l-impatt tal-pandemija, ir-riperkussjonijiet tal-gwerra ta’ aggressjoni kontra l-Ukrajna u żieda qawwija fil-kunflitti armati globali, huma sejħa għal azzjoni ulterjuri.
Il-Kummissjoni għalhekk tippreżenta Rakkomandazzjoni lill-Istati Membri biex ikomplu jiżviluppaw u jsaħħu s-sistemi tagħhom ta’ protezzjoni tat-tfal biex jagħmluhom aktar integrati biex jindirizzaw aħjar il-ħtiġijiet tat-tfal għall-protezzjoni minn kwalunkwe forma ta’ vjolenza u biex jippromwovu l-protezzjoni tat-tfal bħala prijorità globali tal-Unjoni.
Il-protezzjoni tat-tfal hija kwistjoni soċjali u transettorjali sħiħa. Ir-responsabbiltà għall-protezzjoni tat-tfal hija kondiviża fost firxa wiesgħa ta’ atturi, li jinkludu awtoritajiet pubbliċi, atturi privati, organizzazzjonijiet internazzjonali u tas-soċjetà ċivili. Il-varjetà wiesgħa ta’ għodod għad-dispożizzjoni tal-Istati Membri, u fil-livell tal-Unjoni (leġiżlazzjoni, politiki u finanzjament) u fil-livelli kollha ta’ governanza, tista’ tgħin biex is-sistemi ta’ protezzjoni tat-tfal isiru aktar integrati u robusti. Huma meħtieġa mekkaniżmi ta’ koordinazzjoni madwar l-Istati Membri biex jiġi żgurat rispons multidixxiplinari effettiv fil-ministeri kollha jew f’saffi differenti ta’ kompetenzi. Huwa essenzjali li kulħadd jassumi rwoli definiti b’mod ċar u jiżgura koordinazzjoni mill-qrib. Id-disponibbiltà u l-koordinazzjoni tar-riżorsi umani u finanzjarji huma wkoll sfida. Abbażi ta’ dan, huma meħtieġa b’mod ċar sistemi aktar effiċjenti u integrati għall-protezzjoni tat-tfal.
Approċċ sħiħ tas-soċjetà għall-protezzjoni tat-tfal huwa investiment tanġibbli u strateġiku fit-tul, anke fil-kuntest tas-soċjetà tal-lonġevità li qed tiżviluppa quddiem għajnejna. Dan se jikkontribwixxi b’mod sostanzjali għal soċjetajiet aktar ġusti, aktar ugwali u ġusti, mirfuda minn ekwità interġenerazzjonali u solidarjetà għall-ġenerazzjonijiet preżenti u futuri.
Filwaqt li tibni fuq l-appelli mill-Parlament Ewropew, il-Kunsill u l-Kumitat Ewropew tar-Reġjuni, ir-Rakkomandazzjoni ppreżentata mill-Kummissjoni lill-Istati Membri tafferma mill-ġdid l-impenn tal-Kummissjoni li ssaħħaħ il-protezzjoni tat-tfal madwar l-UE u lil hinn minnha. Hija tappoġġa u tappella lill-Istati Membri biex jivvalutaw, isaħħu u jintegraw is-sistemi tagħhom ta’ protezzjoni tat-tfal, billi jużaw l-aħjar prattiki u jużaw għodod fil-livell tal-UE bħal-leġiżlazzjoni, il-miżuri ta’ politika, u l-finanzjament. Il-Kummissjoni tistieden ukoll lill-Parlament Ewropew u lill-Kunsill biex iqisu din ir-Rakkomandazzjoni fid-deliberazzjonijiet futuri tagħhom, u lill-Kumitat tar-Reġjuni u lill-Kumitat Ekonomiku u Soċjali Ewropew biex jippromovu d-djalogu mal-awtoritajiet lokali u reġjonali u mas-soċjetà ċivili. F’dawk l-azzjonijiet kollha, l-aħjar interessi tat-tfal għandhom dejjem jibqgħu kunsiderazzjoni primarja.