ANNESS I
DISPOŻIZZJONIJIET DWAR IL-KLASSIFIKAZZJONI TAL-VETTURI
1.Dispożizzjonijiet ġenerali
1.1.Kollettur tal-pedaġġi jeħtieġ li jippubblika l-korrispondenza bejn is-sett ta’ parametri tal-klassifikazzjoni tal-vetturi użat u l-klassijiet tiegħu tat-tariffi tal-vetturi għal kull skema ta’ tariffi applikata f’dominju tal-EETS taħt ir-responsabbiltà tiegħu mill-inqas tliet xhur qabel l-użu tal-iskema ta’ tariffi. Dan l-obbligu ma jirreferi għal ebda bidla li titwettaq mill-kollettur tal-pedaġġi f’tariffi speċifiċi fi ħdan skema ta’ tariffi.
1.2.Kollettur tal-pedaġġi jeħtieġ li jippubblika l-korrispondenza tal-klassijiet tiegħu tat-tariffi tal-vetturi mal-istruttura tiegħu tat-tariffi għal kull skema ta’ tariffi applikata f’dominju tal-EETS taħt ir-responsabbiltà tiegħu. Meta tinbidel il-korrispondenza, dan jeħtieġ li jaġġorna l-pubblikazzjoni minnufih.
2.Parametri tal-klassifikazzjoni tal-vetturi
2.1.Kollettur tal-pedaġġi jista’ juża parametri ta’ klassifikazzjoni tal-vetturi għal mill-inqas waħda mid-dispożizzjonijiet li ġejjin:
(a)kull parametru tal-klassifikazzjoni tal-vetturi li jista’ jitkejjel bit-tagħmir tiegħu mal-ġenb tat-triq;
(b)il-parametri tal-vetturi li huma elenkati fid-dokumenti tar-reġistrazzjoni tal-vetturi u standardizzati fil-klawżola 8.4 ta’ EN ISO 14906:2018;
Jekk jintuża OBE, l-OBE huwa meħtieġ biss bħala appoġġ għall-ħżin u t-trażmissjoni ta’ parametri possibbli tal-klassifikazzjoni tal-vetturi li jistgħu jiġu rkuprati mill-OBE permezz ta’ komunikazzjoni dedikata b’firxa qasira ta’ 5,8 GHz kif definit mill-istandards EN 15509:2014 u ETSI ES 200674-1 V2.4.1; għal skemi bbażati fuq il-GNSS, barra minn hekk, kull parametru tal-vetturi jista’ jiġi rkuprat mill-OBE billi jintuża CEN-DSRC kif definit minn EN ISO 12813:2019.
2.2.Meta jkun qed jiċċirkola f’dominju tal-pedaġġi, it-tagħmir abbord tal-vettura jeħtieġ li jkun kapaċi jikkomunika l-informazzjoni dwar l-istatus tat-tagħmir abbord u, fejn applikabbli, il-parametri għall-klassifikazzjoni tal-vettura tiegħu lit-tagħmir tal-monitoraġġ tad-dikjarazzjoni tal-pedaġġi tal-kollettur tal-pedaġġi, kif definit fl-Anness I tar-Regolament ta’ Implimentazzjoni tal-Kummissjoni
C (2019) 9080.
3.Skemi ġodda ta’ tariffi
3.1.Fejn skema ta’ tariffi li tkun għadha kemm ġiet introdotta tkun ibbażata fuq il-parametri tal-klassifikazzjoni tal-vetturi li diġà jintużaw f'tal-anqas dominju wieħed tal-EETS, il-fornituri tal-EETS jeħtieġ li jimplimentaw l-iskema l-ġdida ta’ tariffi sa mid-data tad-dħul fis-seħħ tagħha.
3.2.Fejn skema ġdida tat-tariffi tintroduċi parametru ġdid wieħed jew aktar tal-klassifikazzjoni tal-vetturi, jeħtieġ li tiġi segwita l-proċedura skont l-Artikolu 2.2 tar-Regolament Delegat.
ANNESS II
REKWIŻITI GĦALL-KOSTITWENTI TAL-INTEROPERABBILTÀ
1.Rekwiżiti ġenerali
1.1.Affidabbiltà u disponibbiltà
1.1.1.Il-monitoraġġ u l-manutenzjoni tal-komponenti fissi jew mobbli li jintużaw fl-EETS jeħtieġ li jiġu organizzati, imwettqa u kwantifikati b'tali mod li jkomplu jaħdmu skont il-kondizzjonijiet maħsuba.
1.1.2.Id-disinn tal-EETS għandu jippermetti lis-sistema tkompli taħdem jekk il-komponenti ma jaħdmux tajjeb jew ma jaħdmux għalkollox, possibbilment b’mod degradat, iżda bl-inqas tfixkil għall-utenti tal-EETS.
1.2.Kompatibbiltà teknika
Meta jkunu qed jinterfaċċjaw, il-karatteristiċi tekniċi tat-tagħmir tal-fornituri tal-EETS u tal-kolletturi tal-pedaġġi jeħtieġ li jkunu kompatibbli u konformi mad-dispożizzjonijiet stabbiliti fl-Anness I tar-Regolament ta’ Implimentazzjoni tal-Kummissjoni C (2019) 9080 .
1.3.Sigurtà/privatezza u protezzjoni tad-data personali
1.3.1.L-EETS jeħtieġ li jipprovdi karatteristiċi ta’ sigurtà b’rabta mal-protezzjoni tad-data maħżuna, ġestita u trasferita bejn il-partijiet ikkonċernati fl-ambjent tal-EETS. Il-karatteristiċi ta’ sigurtà għandhom jintegraw is-salvagwardji meħtieġa fl-ipproċessar sabiex jipproteġu d-drittijiet u l-interessi tal-partijiet ikkonċernati tal-EETS, u b’mod partikolari jipproteġuhom mir-riskji jew mill-ħsara kkawżati minn nuqqas ta’ disponibbiltà, kunfidenzjalità, integrità, awtentikazzjoni, nonripudju u protezzjoni minn aċċess mhux awtorizzat għal data tal-utenti f’ambjent Ewropew b’aktar minn utent wieħed, f’konformità mal-leġiżlazzjoni rilevanti dwar il-protezzjoni tal-individwi fir-rigward tal-ipproċessar ta’ data personali.
1.3.2.L-EETS jeħtieġ li jkun konformi mal-leġiżlazzjoni tal-UE dwar il-protezzjoni tad-data. B’mod partikolari, jeħtieġ li tiġi żgurata l-konformità mar-Regolament (UE) 2016/679 u mal-liġijiet, ir-regolamenti jew id-dispożizzjonijiet amministrattivi nazzjonali li jibdlu d-Direttiva 2002/58/KE f’liġi nazzjonali.
2.Rekwiżiti speċifiċi
2.1.Rekwiżiti tal-infrastruttura
2.1.1.L-infrastruttura tal-EETS jeħtieġ li tippermetti l-akkuratezza tad-data dwar id-dikjarazzjoni tal-pedaġġi biex tikkorrispondi mar-rekwiżiti tar-reġim tal-pedaġġi sabiex jiġi garantit trattament ugwali u ġust bejn l-utenti tal-EETS fir-rigward tal-pedaġġi u t-tariffi.
2.1.2.It-tagħmir abbord jeħtieġ li jippermetti lill-kolletturi tal-pedaġġi jidentifikaw il-fornitur tal-EETS responsabbli. It-tagħmir abbord jeħtieġ li jimmonitorja din l-informazzjoni b’mod regolari, jinvalida lilu nnifsu jekk tiġi skoperta irregolarità u, fejn possibbli, irid jinforma lill-fornitur tal-EETS bl-anomalija.
2.1.3.Fejn applikabbli, it-tagħmir tal-EETS jeħtieġ li jkun iddisinjat b’tali mod li l-kostitwenti tal-interoperabbiltà tiegħu jużaw standards maħruġa mill-Organizzazzjonijiet Ewropej tal-Istandardizzazzjoni.
2.1.4.It-tagħmir abbord jeħtieġ li jkun integrat b’mod sikur u sigur. L-immuntar tiegħu jrid ikun konformi mar-rekwiżiti għall-kamp viżiv ta’ quddiem tal-vettura.
2.1.5.Il-kolletturi tal-pedaġġi jeħtieġ li jinfurmaw lis-sewwieqa, permezz ta’ sinjalizzazzjoni jew mezzi oħra magħżula mill-Istati Membri, dwar ir-rekwiżit tal-ħlas ta’ pedaġġ jew tariffa għas-sewqan ta’ vettura f’dominju tal-EETS, u dwar it-toroq koperti minn dominju tal-EETS.
2.2.Rekwiżiti tat-tħaddim u l-ġestjoni
2.2.1.Il-kolletturi tal-pedaġġi u l-fornituri tal-EETS jeħtieġ li jistabbilixxu pjanijiet ta’ emerġenza sabiex jiġi evitat li jkun hemm xkiel gravi fil-fluss tat-traffiku f’każ li l-EETS ma jkunx disponibbli.
2.2.2.Fir-rigward tal-evalwazzjoni tal-prestazzjoni ta’ tagħmir abbord li juża teknoloġija ta’ pożizzjonament bis-satellita kif previst skont l-Artikolu 3.3 tad-Direttiva (UE) 2019/520, jistgħu jiġu applikati l-ispeċifikazzjonijiet tat-test ta’ konformità EGNOS/Galileo eCall.
ANNESS III
KRITERJI MINIMI TA’ ELIĠIBBILTÀ GĦALL-KORPI NOTIFIKATI
1.Għall-finijiet ta’ notifika, korp ta’ valutazzjoni tal-konformità, li hu korp intitolat li jwettaq jew jissorvelja l-proċedura ta’ valutazzjoni tal-konformità dwar l-ispeċifikazzjonijiet u l-idoneità għall-użu tal-kostitwenti tal-interoperabbiltà, jeħtieġ li jkun konformi mal-paragrafi 2 sa 11 ta’ dan l-Anness.
Il-korp jeħtieġ li jkun akkreditat skont ir-Regolament (KE) Nru 765/2008 għall-istandard Ewropew armonizzat għall-valutazzjoni tal-konformità dwar ir-rekwiżiti għall-korpi li jiċċertifikaw prodotti, proċessi u servizzi.
2.Il-korp jeħtieġ li jkun stabbilit skont il-liġi nazzjonali u għandu jkollu personalità ġuridika.
3.Il-korp jeħtieġ li jkun korp terz indipendenti mill-organizzazzjoni jew mill-prodott li jivvaluta.
Korp li jkun jappartjeni lil xi assoċjazzjoni kummerċjali jew federazzjoni professjonali li tkun tirrappreżenta intrapriżi involuti fid-disinn, il-manifattura, il-provvista, il-muntaġġ, l-użu jew il-manutenzjoni ta’ prodotti li huwa jivvaluta, jista’ jitqies bħala tali korp ta’ valutazzjoni tal-konformità jekk jintwerew l-indipendenza tiegħu u n-nuqqas ta’ kull konflitt ta’ interess min-naħa tiegħu.
4.Il-korp, l-ogħla livell tal-ġestjoni tiegħu jew il-persunal responsabbli biex iwettaq il-kompiti ta' valutazzjoni tal-konformità ma jistgħux ikunu d-disinjaturi, il-manifatturi, il-fornituri, l-installaturi, ix-xerrejja, is-sidien, l-utenti jew dawk li jwettqu l-manutenzjoni tal-prodotti li huma jivvalutaw, u lanqas għandhom ikunu r-rappreżentanti awtorizzati ta' kwalunkwe waħda minn dawk il-partijiet. Dan jeħtieġ li ma jipprekludix l-użu tal-prodotti vvalutati li huma neċessarji għall-operazzjonijiet tal-korp ta’ valutazzjoni tal-konformità jew l-użu ta' prodotti bħal dawn għal għanijiet personali.
Il-korp, l-ogħla livell tal-ġestjoni tiegħu jew il-persunal responsabbli biex iwettaq il-kompiti ta’ valutazzjoni tal-konformità jeħtieġ li ma jkunux direttament involuti fid-disinn, il-manifattura jew il-kostruzzjoni, il-kummerċjalizzazzjoni, l-installazzjoni, l-użu jew il-manutenzjoni ta’ dawk il-prodotti, u lanqas ma jridu jirrappreżentaw lill-partijiet li jwettqu dawk l-attivitajiet. Ma jridux jieħdu sehem fl-ebda attività li tista' toħloq kunflitt mal-indipendenza tal-ġudizzju jew l-integrità tagħhom b'rabta mal-attivitajiet ta' valutazzjoni tal-konformità li għalihom huma jkunu notifikati. B’mod partikolari, jeħtieġ li dan japplika għas-servizzi ta’ konsulenza.
Il-korpi ta' valutazzjoni tal-konformità jeħtieġ li jiżguraw li l-attivitajiet tas-sussidjarji jew is-sottokuntratturi tagħhom ma jaffettwawx il-kunfidenzjalità, l-oġġettività jew l-imparzjalità tal-attivitajiet ta' valutazzjoni tal-konformità tagħhom.
5.Il-korpi ta’ valutazzjoni tal-konformità u l-persunal tagħhom jeħtieġ li jwettqu l-attivitajiet ta' valutazzjoni tal-konformità bl-ogħla livell ta' integrità professjonali u l-kompetenza teknika meħtieġa fil-qasam speċifiku. Jeħtieġ ukoll li jkunu ħielsa minn kull pressjoni u persważjoni, b’mod partikolari dawk ta’ natura finanzjarja, li tista’ tinfluwenza l-ġudizzju tagħhom jew ir-riżultati tal-attivitajiet ta’ valutazzjoni tal-konformità tagħhom, speċjalment fir-rigward ta’ persuni jew gruppi ta’ persuni b’interess fir-riżultati ta’ dawk l-attivitajiet.
6.Il-korp jeħtieġ li jkun kapaċi jwettaq il-kompiti kollha ta’ valutazzjoni tal-konformità assenjati lilu bid-Direttiva 2019/520/UE u l-atti ta’ implimentazzjoni rilevanti, u li fir-rigward tagħhom ikun ġie notifikat, kemm jekk dawk il-kompiti jsiru mill-korp ta’ valutazzjoni tal-konformità stess kif ukoll jekk isiru f’ismu u taħt ir-responsabbiltà tiegħu.
F’kull żmien u għal kull proċedura ta’ valutazzjoni tal-konformità u għal kull tip jew kategorija ta’ prodotti li fir-rigward tagħhom ikun notifikat, il-korp ta’ valutazzjoni tal-konformità jeħtieġ li jkollu għad-dispożizzjoni tiegħu n-neċessitajiet li ġejjin:
(a)persunal b’għarfien tekniku u esperjenza biżżejjed u rilevanti biex iwettaq il-kompiti marbutin mal-valutazzjoni tal-konformità;
(b)deskrizzjonijiet ta' proċeduri li jirregolaw il-mod li bih titwettaq valutazzjoni tal-konformità, filwaqt li jiġu żgurati t-trasparenza u l-kapaċità ta' riproduzzjoni ta' dawk il-proċeduri. Jeħtieġ li jkollu politika u proċeduri stabbiliti li jiddistingwu bejn il-kompiti li jwettaq bħala korp notifikat u attivitajiet oħrajn; kif ukoll
(c)proċeduri għall-prestazzjoni ta' attivitajiet li jqisu d-daqs tal-impriża, is-settur li fih topera, l-istruttura tagħha, il-grad ta' kumplessità tat-teknoloġija tal-prodott ikkonċernat u n-natura ta' massa jew ta' serje tal-proċess ta' produzzjoni.
Għandu jkun kapaċi jwettaq il-kompiti tekniċi u amministrattivi konnessi mal-attivitajiet ta’ valutazzjoni tal-konformità b’mod xieraq u jeħtieġ li jkollu aċċess għat-tagħmir u l-faċilitajiet kollha meħtieġa.
7.Il-persunal responsabbli għat-twettiq tal-attivitajiet marbutin mal-valutazzjoni tal-konformità jeħtieġ li jkollu dawn li ġejjin:
(a)taħriġ tekniku u vokazzjonali xieraq li jkopri l-attivitajiet kollha ta’ valutazzjoni ta’ konformità li fir-rigward tagħhom ikun ġie notifikat il-korp ta’ valutazzjoni ta’ konformità;
(b)għarfien sodisfaċenti tar-rekwiżiti tal-valutazzjonijiet li jwettaq u awtorità suffiċjenti biex iwettaq dawk il-valutazzjonijiet;
(c)għarfien u fehim suffiċjenti tar-rekwiżiti essenzjali, tal-istandards applikabbli u tad-dispożizzjonijiet rilevanti tal-leġiżlazzjoni rilevanti tal-Unjoni dwar l-armonizzazzjoni u tar-regolamenti ta’ implimentazzjoni tagħha; kif ukoll
(d)il-kapaċità meħtieġa biex ifassal ċertifikati, rekords u rapporti li juru li l-valutazzjonijiet ikunu saru.
8.L-imparzjalità tal-korpi ta’ valutazzjoni tal-konformità, tal-maniġment superjuri u tal-persunal tal-valutazzjoni tagħhom jeħtieġ li tkun iggarantita.
Is-salarji tal-maniġment superjuri u tal-persunal li jwettaq il-valutazzjonijiet ma jistgħux jiddependu fuq l-għadd ta’ valutazzjonijiet li jitwettqu, u lanqas ma jistgħu jiddependu fuq ir-riżultati ta’ dawk il-valutazzjonijiet.
9.Il-korpi ta' valutazzjoni tal-konformità jeħtieġ li jipprovdu polza tal-assigurazzjoni ta' responsabbiltà sakemm ir-responsabbiltà ma titteħidx mill-Istat f'konformità mal-liġi nazzjonali, jew sakemm l-Istat Membru nnifsu ma jkunx direttament responsabbli għall-valutazzjoni tal-konformità.
10.Il-persunal tal-korp ta’ valutazzjoni tal-konformità jeħtieġ li jikkonforma mas-segretezza professjonali għall-informazzjoni kollha miksuba waqt it-twettiq tal-kompiti tiegħu skont id-Direttiva 2019/520/UE u mal-atti ta’ implimentazzjoni rilevanti jew ma’ kull liġi nazzjonali li tagħtiha effett. Madankollu, dan ma japplikax għall-awtoritajiet kompetenti tal-Istat Membru li fih jitwettqu l-attivitajiet tiegħu. Id-drittijiet ta’ proprjetà jeħtieġ li jiġu protetti.
11.Il-korpi ta’ valutazzjoni tal-konformità jeħtieġ li jipparteċipaw fl-attivitajiet ta’ standardizzazzjoni rilevanti u fl-attivitajiet tal-grupp ta’ koordinazzjoni tal-korp notifikat stabbilit skont il-leġiżlazzjoni rilevanti tal-UE, jew jiżguraw li l-persunal li jwettaq il-valutazzjoni jkun mgħarraf dwar dawn l-attivitajiet, u jridu japplikaw bħala gwida ġenerali d-deċiżjonijiet amministrattivi u d-dokumenti prodotti minn dak il-grupp.
