1.   Għall-fini tas-sitt subparagrafu tal-Artikolu 3c(6) tad-Direttiva 2003/87/KE, l-operatur tal-inġenji tal-ajru kummerċjali għandu jistabbilixxi, jiddokumenta, jimplimenta u jżomm proċedura bil-miktub sabiex jimmonitorja kwalunkwe ammont ta’ karburant tal-avjazzjoni eliġibbli użat għat-titjiriet subsoniċi, u għandu jirrapporta l-ammonti ta’ karburanti tal-avjazzjoni eliġibbli mitluba bħala entrata ta’ memo separata fir-rapport annwali tiegħu dwar l-emissjonijiet.

2.   Għall-fini tal-paragrafu 1 ta’ dan l-Artikolu, l-operatur tal-inġenji tal-ajru għandu jiżgura li kwalunkwe ammont ta’ karburant tal-avjazzjoni eliġibbli mitlub jiġi ċċertifikat f’konformità mal-Artikolu 30 tad-Direttiva (UE) 2018/2001. L-operatur tal-inġenji tal-ajru jista’ juża d-data rreġistrata fil-bażi tad-data tal-Unjoni stabbilita f’konformità mal-Artikolu 28(2) tad-Direttiva (UE) 2018/2001.

3.   Għall-karburanti tal-avjazzjoni mħallta, l-operatur ta’ inġenju tal-ajru jista’ jew jassumi n-nuqqas ta’ bijokarburant tal-avjazzjoni eliġibbli u japplika frazzjoni fossili prestabbilita ta’ 100 %, jew jiddetermina frazzjoni eliġibbli f’konformità mal-paragrafi 4 jew 5. L-operatur tal-inġenji tal-ajru jista’ jirrapporta wkoll karburant tal-avjazzjoni eliġibbli mhux imħallat bi frazzjoni eliġibbli ta’ 100 %.

4.   Meta l-karburanti tal-avjazzjoni eliġibbli jkunu fiżikament imħallta ma’ karburanti fossili u jiġu kkonsenjati lill-inġenju tal-ajru f’lottijiet li jistgħu jiġu identifikati fiżikament, l-operatur tal-inġenji tal-ajru jista’ jibbaża l-istima tal-kontenut eliġibbli fuq bilanċ tal-massa tal-karburanti fossili u tal-karburanti tal-avjazzjoni eliġibbli mixtrija.

Barra minn hekk, l-operatur tal-inġenji tal-ajru għandu jipprovdi evidenza għas-sodisfazzjon tal-awtorità kompetenti li l-karburant tal-avjazzjoni eliġibbli huwa attribwit għat-titjira immedjatament wara l-ippumpjar ta’ dik it-titjira.

Meta jitwettqu diversi titjiriet sussegwenti mingħajr l-ippumpjar tal-karburant bejn dawn it-titjiriet, l-operatur tal-inġenji tal-ajru għandu jaqsam l-ammont ta’ karburant tal-avjazzjoni eliġibbli u jassenjah għal dawn it-titjiriet b’mod proporzjonali għall-emissjonijiet minn dawk it-titjiriet ikkalkolati bl-użu tal-fattur ta’ emissjoni preliminari.

5.   Meta karburant tal-avjazzjoni eliġibbli ma jkunx jista’ jiġi attribwit fiżikament f’ajrudrom għal titjira speċifika, l-operatur tal-inġenji tal-ajru għandu jattribwixxi karburanti tal-avjazzjoni eliġibbli lit-titjiriet tiegħu li għalihom il-kwoti għandhom jiġu ċeduti f’konformità mal-Artikolu 12(3) tad-Direttiva 2003/87/KE b’mod proporzjonali għall-emissjonijiet minn dawk it-titjiriet li jitilqu minn dak l-ajrudrom ikkalkulati bl-użu tal-fattur ta’ emissjoni preliminari.

L-operatur tal-inġenji tal-ajru jista’ jiddetermina l-frazzjoni eliġibbli bl-użu ta’ rekords tax-xiri tal-karburant tal-avjazzjoni eliġibbli ta’ kontenut ta’ enerġija ekwivalenti, dment li l-operatur tal-inġenji tal-ajru jipprovdi evidenza għas-sodisfazzjon tal-awtorità kompetenti li l-karburant tal-avjazzjoni eliġibbli jkun ġie kkonsenjat lis-sistema ta’ riforniment tal-karburant tal-ajrudrom tat-tluq fil-perjodu ta’ rapportar jew 3 xhur qabel il-bidu, jew 3 xhur wara t-tmiem, ta’ dak il-perjodu ta’ rapportar.

6.   Għall-fini tal-paragrafi 4 u 5 ta’ dan l-Artikolu, l-operatur tal-inġenji tal-ajru għandu jipprovdi evidenza għas-sodisfazzjon tal-awtorità kompetenti li:

(a)

l-ammont totali ta’ karburant tal-avjazzjoni eliġibbli mitlub ma jaqbiżx l-użu totali tal-karburant ta’ dak l-operatur tal-inġenji tal-ajru għal titjiriet li għalihom għandhom jiġu ċeduti kwoti skont l-Artikolu 12(3) tad-Direttiva 2003/87/KE, li joriġinaw mill-ajrudrom li fih jiġi pprovdut il-karburant tal-avjazzjoni eliġibbli;

(b)

l-ammont ta’ karburant tal-avjazzjoni eliġibbli għal titjiriet li għalihom il-kwoti għandhom jiġu ċeduti skont l-Artikolu 12(3) tad-Direttiva 2003/87/KE ma jaqbiżx il-kwantità totali ta’ karburant tal-avjazzjoni eliġibbli mixtri li minnu titnaqqas il-kwantità totali ta’ karburant tal-avjazzjoni eliġibbli mibjugħ lil partijiet terzi;

(c)

il-frazzjoni eliġibbli tal-karburant tal-avjazzjoni eliġibbli attribwit għal titjiriet aggregati għal kull par ajrudromi ma taqbiżx il-limitu massimu ta’ taħlit għal dak il-karburant tal-avjazzjoni eliġibbli kif iċċertifikat skont standard internazzjonali rikonoxxut, jekk tapplika tali limitazzjoni;

(d)	ma hemm l-ebda għadd doppju tal-istess kwantità ta’ karburant tal-avjazzjoni eliġibbli, b’mod partikolari li l-karburant tal-avjazzjoni eliġibbli mixtri ma huwiex iddikjarat li intuża f’rapport preċedenti jew minn xi ħadd ieħor, jew f’sistema oħra.

Għall-fini tal-punti (a) sa (c) tal-ewwel subparagrafu, kwalunkwe karburant li jifdal fit-tankijiet wara titjira u qabel l-ippumpjar huwa preżunt li jkun 100 % karburant fossili.

Għall-fini li tintwera l-konformità mar-rekwiżiti msemmija fil-punt (d) tal-ewwel subparagrafu ta’ dan il-paragrafu u fejn applikabbli, l-operatur tal-inġenji tal-ajru jista’ juża d-data rrekordjata fil-bażi tad-data tal-Unjoni stabbilita f’konformità mal-Artikolu 28(2) tad-Direttiva (UE) 2018/2001.

7.   Meta l-fattur ta’ emissjoni ta’ karburant tal-avjazzjoni eliġibbli jkun żero, il-fattur ta’ emissjoni ta’ kull karburant tal-avjazzjoni mħallat għandu jiġi kkalkolat u rrapportat bħala l-fattur ta’ emissjoni preliminari mmultiplikat bil-frazzjoni fossili tal-karburant.”;

1.   L-Artikolu 11, l-Artikolu 12(2), l-Artikolu 13 u l-Artikolu 14, l-Artikolu 15(1) u (2), u l-Artikolu 16 għandhom japplikaw. Għal dak il-fini:

(a)	kwalunkwe referenza għal operatur jew operatur tal-inġenji tal-ajru għandha tiġi interpretata daqslikieku kienet referenza għall-entità regolata;

(b)	kwalunkwe referenza għal attività tal-avjazzjoni għandha tiġi interpretata daqslikieku kienet referenza għall-attività tal-entità regolata.

2.   Mhux aktar tard minn 4 xhur qabel ma entità regolata tibda l-attività koperta mill-Anness III tad-Direttiva 2003/87/KE, hija għandha tippreżenta lill-awtorità kompetenti pjan ta’ monitoraġġ għall-approvazzjoni, sakemm l-awtorità kompetenti ma tkunx stabbiliet limitu ta’ żmien alternattiv għal din il-preżentazzjoni.

Il-pjan ta’ monitoraġġ għandu jikkonsisti minn dokumentazzjoni dettaljata, kompluta u trasparenti tal-metodoloġija ta’ monitoraġġ ta’ entità regolata speċifika u għandu jinkludi tal-inqas l-elementi stabbiliti fl-Anness I.

Flimkien mal-pjan ta’ monitoraġġ, l-entità regolata għandha tippreżenta r-riżultati ta’ valutazzjoni tar-riskju li tipprovdi evidenza li l-attivitajiet u l-proċeduri ta’ kontroll proposti għall-attivitajiet ta’ kontroll huma proporzjonati mar-riskji inerenti u r-riskji ta’ kontroll identifikati.

3.   F’konformità mal-Artikolu 15, il-modifiki sinifikanti għall-pjan ta’ monitoraġġ ta’ entità regolata jinkludu:

(a)	bidliet fil-kategorija tal-entità regolata fejn dawn il-bidliet jeħtieġu bidla fil-metodoloġija ta’ monitoraġġ jew iwasslu għal bidla fil-livell ta’ materjalità applikabbli skont l-Artikolu 23 tar-Regolament ta’ Implimentazzjoni (UE) 2018/2067;

(b)	minkejja l-Artikolu 75n, bidliet dwar jekk l-entità regolata titqiesx bħala ‘entità regolata b’emissjonijiet baxxi’;

(c)	bidla fil-livell applikat;

(d)	l-introduzzjoni ta’ flussi ta’ karburant ġodda;

(e)	bidla fil-kategorizzazzjoni ta’ flussi ta’ karburant — bejn flussi ta’ karburant kbar jew de-minimis fejn tali bidla teħtieġ bidla fil-metodoloġija ta’ monitoraġġ;

(f)	bidla fil-valur prestabbilit għal fattur ta’ kalkolu, fejn il-valur għandu jiġi stabbilit fil-pjan ta’ monitoraġġ;

(g)	bidla fil-valur prestabbilit għall-fattur tal-ambitu;

(h)	l-introduzzjoni ta’ metodi ġodda jew bidliet għal metodi eżistenti relatati mat-teħid ta’ kampjuni, analiżi jew kalibrazzjoni, fejn dan għandu impatt dirett fuq l-akkuratezza tad-data dwar l-emissjonijiet.

1.   Fejn entità regolata ssostni li l-applikazzjoni ta’ metodoloġija speċifika ta’ monitoraġġ timplika kostijiet irraġonevoli, l-awtorità kompetenti għandha tivvaluta jekk il-kostijiet humiex irraġonevoli, billi tikkunsidra l-ġustifikazzjoni tal-entità regolata.

L-awtorità kompetenti għandha tikkunsidra l-kostijiet irraġonevoli fejn l-istima tal-kost taqbeż il-benefiċċju. Għal dak il-għan, il-benefiċċju għandu jiġi kkalkolat billi fattur ta’ titjib jiġi mmultiplikat bi prezz ta’ referenza ta’ EUR 60 għal kull kwota. Il-kostijiet għandhom jinkludu perjodu ta’ deprezzament xieraq ibbażat fuq il-ħajja ekonomika tat-tagħmir.

2.   Minkejja l-paragrafu 1, l-entità regolata għandha tikkunsidra l-kostijiet tal-applikazzjoni ta’ metodoloġija ta’ monitoraġġ speċifika mġarrba mill-konsumaturi tal-flussi tal-karburant rilaxxati, inkluż mill-konsumaturi aħħarin. Għall-finijiet ta’ dan is-subparagrafu, l-entità regolata tista’ tapplika stimi konservattivi tal-kostijiet.

Għall-monitoraġġ u għar-rapportar tal-emissjonijiet storiċi għas-sena 2024 f’konformità mal-Artikolu 30f(4) tad-Direttiva 2003/87/KE, l-Istati Membri jistgħu jeżentaw lill-entitajiet regolati milli jiġġustifikaw li metodoloġija speċifika ta’ monitoraġġ iġġarrab kostijiet irraġonevoli.

3.   Meta tkun qiegħda tivvaluta n-natura irraġonevoli tal-kostijiet rigward l-għażla tal-livelli għall-ammonti ta’ karburant rilaxxati tal-entità regolata, l-awtorità kompetenti għandha tuża bħala l-fattur ta’ titjib imsemmi fil-paragrafu 1 id-differenza bejn l-inċertezza li attwalment tkun intlaħqet u l-livell limitu ta’ inċertezza tal-livell li jkun jista’ jintlaħaq bit-titjib immultiplikat bl-emissjonijiet medji annwali kkawżati minn dak il-fluss ta’ karburant matul it-3 snin l-iżjed riċenti.

Fin-nuqqas ta’ tali data dwar l-emissjonijiet annwali medji maħluqa minn dak il-fluss ta’ karburant matul l-aktar 3 snin riċenti, l-entità regolata għandha tipprovdi stima konservattiva tal-emissjonijiet annwali medji, bl-esklużjoni tas-CO2 li jinħoloq mill-bijomassa. Għall-istrumenti tal-kejl taħt il-kontroll metroloġiku legali nazzjonali, l-inċertezza li tintlaħaq attwalment tista’ tiġi sostitwita bl-iżball massimu permissibbli waqt it-tħaddim li jkun permess mil-leġiżlazzjoni nazzjonali rilevanti.

Għall-fini ta’ dan il-paragrafu, għandu japplika l-Artikolu 38(5), sakemm l-informazzjoni rilevanti dwar il-kriterji ta’ sostenibbiltà u l-iffrankar tal-emissjonijiet tal-gassijiet serra tal-bijokarburanti, il-bijolikwidi u l-karburanti tal-bijomassa użati għall-kombustjoni tkun disponibbli għall-entità regolata.

4.   Meta tiġi vvalutata n-natura irraġonevoli tal-kostijiet fir-rigward tal-għażla tal-livelli għad-determinazzjoni tal-fattur tal-ambitu tal-entità regolata u fir-rigward ta’ miżuri li jżidu l-kwalità tad-data tal-emissjonijiet irrapportati iżda mingħajr impatt dirett fuq l-akkuratezza tad-data dwar l-ammonti ta’ karburant rilaxxati, l-awtorità kompetenti għandha tuża fattur ta’ titjib ta’ 1 % tal-emissjonijiet annwali medji tal-flussi tal-karburant rispettivi fit-tliet perjodi ta’ rapportar l-aktar riċenti. Il-miżuri li jżidu l-kwalità tal-emissjonijiet irrapportati iżda mingħajr impatt dirett fuq l-akkuratezza tad-data dwar l-ammonti ta’ karburant rilaxxati jistgħu jinkludu:

(a)	bidla minn valuri prestabbiliti għal analiżijiet sabiex jiġu ddeterminati l-fatturi tal-kalkolu;

(b)	żieda fl-għadd ta’ analiżijiet għal kull fluss ta’ karburant;

(c)

fejn il-kompitu speċifiku tal-kejl ma jaqax taħt kontroll metroloġiku legali nazzjonali, is-sostituzzjoni ta’ strumenti tal-kejl bi strumenti li jikkonformaw ma’ rekwiżiti rilevanti ta’ kontroll metroloġiku legali tal-Istat Membru f’applikazzjonijiet simili, jew għal strumenti tal-kejl li jilħqu r-regoli nazzjonali adottati skont id-Direttiva 2014/31/UE tal-Parlament Ewropew u tal-Kunsill (*4) jew id-Direttiva 2014/32/UE;

(d)	it-tqassir tal-intervalli ta’ kalibrazzjoni u manutenzjoni tal-istrumenti tal-kejl;

(e)	it-titjib ta’ attivitajiet ta’ fluss ta’ data u attivitajiet ta’ kontroll li jnaqqsu r-riskju inerenti jew ta’ kontroll b’mod sinifikanti;

(f)	entitajiet regolati li jaqilbu għal identifikazzjoni aktar akkurata tal-fattur tal-ambitu.

5.   Ma għandux jiġi kkunsidrat li l-miżuri relatati mat-titjib tal-metodoloġija ta’ monitoraġġ ta’ entità regolata jġarrbu kostijiet irraġonevoli sa ammont akkumulat ta’ EUR 4 000 għal kull perjodu ta’ rapportar. Għall-entitajiet regolati b’emissjonijiet baxxi dak il-livell limitu għandu jkun ta’ EUR 1 000 għal kull perjodu ta’ rapportar.

1.   Għall-fini tal-monitoraġġ tal-emissjonijiet u d-determinazzjoni tar-rekwiżiti minimi għal-livelli għall-fatturi ta’ kalkolu relatati, kull entità regolata għandha tiddetermina l-kategorija tagħha skont il-paragrafu 2, u, fejn rilevanti, ta’ kull fluss ta’ karburant skont il-paragrafu 3.

2.   L-entità regolata għandha tikklassifika lilha nnifisha f’waħda mill-kategoriji li ġejjin:

(a)	entità tal-kategorija A, fejn mill-2027 sal-2030 l-emissjonijiet annwali medji vverifikati fis-sentejn ta’ qabel il-perjodu ta’ rapportar, bl-esklużjoni tas-CO2 li jirriżulta mill-bijomassa, ikunu daqs jew inqas minn 50 000 tunnellata ta’ CO2(e);

(b)	entità tal-kategorija B, fejn mill-2027 sal-2030 l-emissjonijiet annwali medji vverifikati fis-sentejn ta’ qabel il-perjodu ta’ rapportar, bl-esklużjoni tas-CO2 li jirriżulta mill-bijomassa, ikunu aktar minn 50 000 tunnellata ta’ CO2(e).

Mill-2031 ’il quddiem, l-entitajiet tal-kategoriji A u B imsemmija fil-punti (a) u (b) tal-ewwel subparagrafu għandhom jiġu ddeterminati abbażi tal-emissjonijiet annwali medji vverifikati fil-perjodu ta’ negozjar immedjatament qabel il-perjodu ta’ negozjar attwali.

B’deroga mill-Artikolu 14(2), l-awtorità kompetenti tista’ tippermetti lill-entità regolata ma timmodifikax il-pjan ta’ monitoraġġ meta, abbażi ta’ emissjonijiet ivverifikati, jinqabeż il-limitu għall-klassifikazzjoni tal-entità regolata msemmi fl-ewwel subparagrafu, iżda l-entità regolata turi għas-sodisfazzjon tal-awtorità kompetenti li dan il-limitu ma jkunx diġà inqabeż matul l-aħħar ħames perjodi ta’ rapportar u ma jerġax jinqabeż f’perjodi ta’ rapportar sussegwenti.

3.   L-entità regolata għandha tikklassifika kull fluss ta’ karburant f’waħda mill-kategoriji li ġejjin:

(a)	flussi ta’ karburant de minimis, fejn il-flussi ta’ karburant magħżula mill-entità regolata flimkien jammontaw għal inqas minn 1 000 tunnellata ta’ CO2 fossili fis-sena;

(b)	flussi ta’ karburant maġġuri, fejn il-flussi ta’ karburant ma jaqgħux taħt il-kategoriji msemmija fil-punt (a).

B’deroga mill-Artikolu 14(2), l-awtorità kompetenti tista’ tippermetti lill-entità regolata ma timmodifikax il-pjan ta’ monitoraġġ fejn, abbażi ta’ emissjonijiet ivverifikati, jinqabeż il-limitu għall-klassifikazzjoni ta’ sors ta’ karburant bħala sors ta’ karburant de minimis imsemmi fl-ewwel subparagrafu, iżda l-entità regolata turi għas-sodisfazzjon tal-awtorità kompetenti li dan il-limitu ma jkunx diġà inqabeż matul l-aħħar ħames perjodi ta’ rapportar u ma jerġax jinqabeż f’perjodi ta’ rapportar sussegwenti.

4.   Meta l-emissjonijiet annwali medji vverifikati użati sabiex tiġi ddeterminata l-kategorija tal-entità regolata kif imsemmi fil-paragrafu 2 ma jkunux disponibbli jew ma jibqgħux rappreżentattivi għall-fini tal-paragrafu 2, l-entità regolata għandha tuża stima konservattiva tal-emissjonijiet medji annwali, bl-esklużjoni tas-CO2 li jirriżulta mill-bijomassa, biex tiġi ddeterminata l-kategorija tal-entità regolata.

5.   Għall-fini ta’ dan l-Artikolu, għandu japplika l-Artikolu 38(5).

1.   Meta, għal raġunijiet tekniċi, ma jkunx temporanjament fattibbli li jiġi applikat il-pjan ta’ monitoraġġ kif approvat mill-awtorità kompetenti, l-entità regolata kkonċernata għandha tapplika l-ogħla livell li jista’ jintlaħaq, jew, ħlief għall-fattur tal-ambitu, approċċ konservattiv mingħajr livelli jekk ma tkunx tista’ tinkiseb l-applikazzjoni ta’ livell, sakemm jiġu rrestawrati l-kundizzjonijiet għall-applikazzjoni tal-livell approvat fil-pjan ta’ monitoraġġ.

L-entità regolata għandha tieħu l-miżuri kollha meħtieġa sabiex tippermetti t-tkomplija fil-pront tal-applikazzjoni tal-pjan ta’ monitoraġġ kif approvat mill-awtorità kompetenti.

2.   L-entità regolata kkonċernata għandha tinnotifika lill-awtorità kompetenti dwar il-bidla temporanja msemmija fil-paragrafu 1 għall-metodoloġija ta’ monitoraġġ mingħajr dewmien żejjed, u tispeċifika:

(a)	ir-raġunijiet għad-devjazzjoni mill-pjan ta’ monitoraġġ kif approvat mill-awtorità kompetenti;

(b)	id-dettalji tal-metodoloġija ta’ monitoraġġ interim li qed tuża l-entità regolata sabiex tiddetermina l-emissjonijiet sakemm il-kundizzjonijiet għall-applikazzjoni tal-pjan ta’ monitoraġġ kif approvat mill-awtorità kompetenti jkunu ġew irrestawrati;

(c)	il-miżuri li l-entità regolata tkun qed tieħu sabiex tirrestawra l-kundizzjonijiet għall-applikazzjoni tal-pjan ta’ monitoraġġ kif approvat mill-awtorità kompetenti;

(d)	il-mument mistenni meta l-applikazzjoni tal-pjan ta’ monitoraġġ kif approvat mill-awtorità kompetenti tkun se tiġi rrestawrata.

1.   Meta tiddefinixxi l-livelli rilevanti għall-flussi ta’ karburant ewlenin, sabiex tiddetermina l-ammonti ta’ karburant rilaxxati u kull fattur ta’ kalkolu, kull entità regolata għandha tapplika dan li ġej:

(a)	mill-inqas il-livelli elenkati fl-Anness V, f’każ ta’ entità tal-kategorija A, jew fejn ikun meħtieġ fattur ta’ kalkolu għal fluss ta’ karburant li jkun karburant standard kummerċjali;

(b)	f’każijiet oħra għajr dawk imsemmija fil-punt (a), l-ogħla livell kif iddefinit fl-Anness IIa.

Madankollu, għall-ammonti ta’ karburant rilaxxati u għall-fatturi ta’ kalkolu ta’ flussi ta’ karburant ewlenin, l-entità regolata tista’ tapplika livell sa żewġ livelli aktar baxx milli meħtieġ f’konformità mal-ewwel subparagrafu, b’minimu tal-livell 1, meta turi għas-sodisfazzjon tal-awtorità kompetenti li l-livell meħtieġ f’konformità mal-ewwel subparagrafu, jew fejn applikabbli l-ogħla livell li jmiss, ma huwiex teknikament fattibbli jew iwassal għal kostijiet irraġonevoli.

2.   Għall-flussi ta’ karburant de minimis, l-entità regolata tista’ tiddetermina l-ammonti ta’ karburant rilaxxati u kull fattur ta’ kalkolu billi juża stimi konservattivi minflok ma tuża livelli, sakemm livell definit ikun jista’ jintlaħaq mingħajr sforz addizzjonali.

Għall-flussi ta’ karburant imsemmija fl-ewwel subparagrafu, l-entità regolata tista’ tiddetermina l-ammonti ta’ karburant rilaxxati abbażi ta’ fatturi jew rekords tax-xiri, sakemm livell definit ma jkunx jista’ jintlaħaq mingħajr sforz addizzjonali.

3.   Meta l-awtorità kompetenti tkun ippermettiet l-użu ta’ fatturi ta’ emissjoni espressi bħala t CO2/t jew t CO2/Nm3 għall-karburanti, il-fattur ta’ konverżjoni ta’ unità jista’ jiġi mmonitorjat bl-użu ta’ stima konservattiva minflok bl-użu ta’ livelli, sakemm livell definit ma jkunx jista’ jintlaħaq mingħajr sforz addizzjonali.

1.   Meta tiddefinixxi l-livelli rilevanti għall-flussi ta’ karburant, sabiex tiddetermina l-fattur tal-ambitu, kull entità regolata għandha tapplika l-ogħla livell kif iddefinit fl-Anness IIa.

Madankollu, l-entità regolata tista’ tapplika livell wieħed aktar baxx minn dak meħtieġ f’konformità mal-ewwel subparagrafu meta turi għas-sodisfazzjon tal-awtorità kompetenti li l-livell meħtieġ f’konformità mal-ewwel subparagrafu ma huwiex teknikament fattibbli, iwassal għal kostijiet irraġonevoli, jew li l-metodi elenkati fl-Artikolu 75l(2), il-punti (a) sa (d), ma humiex disponibbli.

Jekk it-tieni subparagrafu ma jkunx applikabbli, l-entità regolata tista’ tapplika livell li jkun żewġ livelli aktar baxx minn dak meħtieġ f’konformità mal-ewwel subparagrafu, b’minimu tal-livell 1, meta turi għas-sodisfazzjon tal-awtorità kompetenti li l-livell meħtieġ f’konformità mal-ewwel subparagrafu ma huwiex teknikament fattibbli, iwassal għal kostijiet irraġonevoli, jew li, abbażi ta’ valutazzjoni simplifikata tal-inċertezza, il-metodi stabbiliti f’livelli aktar baxxi jwasslu għal determinazzjoni aktar akkurata dwar jekk il-karburant jintużax għall-kombustjoni f’setturi koperti mill-Anness III tad-Direttiva 2003/87/KE.

Fejn, għal fluss ta’ karburant, l-entità regolata tuża aktar minn metodu wieħed elenkat fl-Artikolu 75l(2), (3) u (4), għandha tkun meħtieġa li turi li l-kundizzjonijiet ta’ dan il-paragrafu huma ssodisfati biss fir-rigward tas-sehem tal-ammont ta’ karburant rilaxxat li għalih jintalab il-metodu tal-livell inferjuri.

2.   Għall-flussi ta’ karburant de minimis, l-entità regolata ma għandhiex tkun meħtieġa turi li l-kundizzjonijiet fil-paragrafu 1 huma ssodisfati, sakemm ma jkunx jista’ jinkiseb livell definit mingħajr sforz addizzjonali.

1.   L-entità regolata għandha tiddetermina l-ammonti ta’ karburant rilaxxati ta’ fluss ta’ karburant b’wieħed mill-modi li ġejjin:

(a)

meta l-entitajiet regolati u l-flussi ta’ karburant koperti jikkorrispondu għal entitajiet b’obbligi ta’ rapportar skont, u prodotti tal-enerġija soġġetti għal, leġiżlazzjoni nazzjonali li tittrasponi d-Direttivi 2003/96/KE u (UE) 2020/262, abbażi tal-metodi ta’ kejl użati għall-finijiet ta’ dawk l-atti meta dawk il-metodi jkunu bbażati fuq il-kontroll metroloġiku nazzjonali;

(b)	abbażi tal-aggregazzjoni tal-kejl tal-kwantitajiet fil-punt fejn il-flussi ta’ karburant jiġu rilaxxat għall-konsum;

(c)	abbażi ta’ kejl kontinwu fil-punt fejn il-flussi ta’ karburant jiġu rilaxxati għall-konsum.

Madankollu, l-awtoritajiet kompetenti jistgħu jirrikjedu li l-entitajiet regolati jużaw biss, fejn applikabbli, il-metodu msemmi fl-ewwel subparagrafu, il-punt (a).

2.   Fejn id-determinazzjoni tal-ammonti ta’ karburant rilaxxati għas-sena kalendarja sħiħa ma tkunx teknikament fattibbli jew tista’ timplika kostijiet irraġonevoli, l-entità regolata tista’ tagħżel il-jum l-iżjed xieraq li jkun imiss sabiex tissepara sena ta’ rapportar mis-sena ta’ wara, u tirrikonċilja skont kif ikun xieraq mas-sena kalendarja meħtieġa. Id-devjazzjonijiet involuti għal fluss ta’ karburant wieħed jew aktar għandhom jiġu ddokumentati fil-pjan ta’ monitoraġġ, irreġistrati b’mod ċar, jifformaw il-bażi ta’ valur rappreżentattiv għas-sena kalendarja, u jiġu kkunsidrati b’mod konsistenti b’rabta mas-sena li jkun imiss. Il-Kummissjoni tista’ tipprovdi l-linji gwida rilevanti.

Meta jiġu ddeterminati l-ammonti ta’ karburant rilaxxati f’konformità mal-paragrafu 1, il-punti (b) u (c) ta’ dan l-Artikolu, għandhom japplikaw l-Artikoli 28 u 29, bl-eċċezzjoni tal-Artikolu 28(2), it-tieni subparagrafu, it-tieni sentenza u t-tielet subparafu. Għal dak il-fini, kwalunkwe referenza għall-operatur jew għall-installazzjoni għandha tiġi interpretata daqslikieku kienet referenza għall-entità regolata.

L-entità regolata tista’ tissimplifika l-valutazzjoni tal-inċertezza billi tassumi li l-iżbalji massimi permissibbli speċifikati għall-istrument tal-kejl fis-servizz għandhom jitqiesu bħala l-inċertezza matul il-perjodu kollu ta’ rapportar kif meħtieġ mid-definizzjonijiet tal-livelli fl-Anness IIa.

3.   B’deroga mill-Artikolu 75h, meta jintuża l-metodu msemmi fil-punt (a) tal-paragrafu 1 ta’ dan l-Artikolu, l-entità regolata tista’ tiddetermina l-ammonti ta’ karburant rilaxxati mingħajr ma tuża l-livelli. L-awtoritajiet kompetenti għandhom jirrapportaw lill-Kummissjoni sat-30 ta’ Ġunju 2026 dwar l-applikazzjoni prattika u l-livelli ta’ inċertezza tal-metodu msemmi f’dak il-punt.

1.   Għandhom japplikaw l-Artikolu 30, l-Artikolu 31(1), (2) u (3) u l-Artikoli 32, 33, 34, u 35. Għal dak il-fini:

(a)	kwalunkwe referenza għal operatur għandha tiġi interpretata daqslikieku kienet referenza għall-entità regolata;

(b)	kwalunkwe referenza għal data dwar attività għandha tiġi interpretata daqslikieku kienet referenza għall-ammonti ta’ karburant rilaxxati;

(c)	kwalunkwe referenza għal karburanti jew materjali għandha tiġi interpretata daqslikieku kienet referenza għall-karburanti kif definit fl-Artikolu 3(af) tad-Direttiva 2003/87/KE;

(d)	kwalunkwe referenza għall-Anness II għandha tiġi interpretata daqslikieku kienet referenza għall-Anness IIa.

2.   L-awtorità kompetenti tista’ titlob lill-entità regolata tiddetermina l-fattur ta’ konverżjoni ta’ unità u l-fattur ta’ emissjoni tal-karburanti kif definit fl-Artikolu 3(af) tad-Direttiva 2003/87/KE bl-użu tal-istess livelli kif meħtieġ għall-karburanti kummerċjali standard dment li, fil-livell nazzjonali jew reġjonali, xi wieħed mill-parametri li ġejjin juri intervall ta’ kunfidenza ta’ 95 % ta’:

(a)	inqas minn 2 % għall-valur kalorifiku nett;

(b)	inqas minn 2 % għall-fattur ta’ emissjoni, fejn l-ammonti ta’ karburant rilaxxat jiġu espressi bħala kontenut ta’ enerġija.

Qabel l-applikazzjoni ta’ din id-deroga, l-awtorità kompetenti għandha tippreżenta għall-approvazzjoni tal-Kummissjoni sommarju tal-metodu u tas-sorsi tad-data użati biex jiġi ddeterminat jekk waħda minn dawn il-kundizzjonijiet ġietx issodisfata fl-aħħar 3 snin u biex jiġi żgurat li l-valuri użati jkunu konsistenti mal-valuri medji użati mill-operaturi fil-livell nazzjonali jew reġjonali korrispondenti. L-awtorità kompetenti tista’ tiġbor jew titlob tali evidenza. Mill-inqas kull 3 snin hija għandha tirrieżamina l-valuri użati u tinnotifika lill-Kummissjoni jekk ikun hemm xi tibdil sinifikanti, filwaqt li tqis il-medja tal-valuri użati mill-operaturi fil-livell nazzjonali jew reġjonali korrispondenti.

Il-Kummissjoni tista’ tirrieżamina regolarment ir-rilevanza ta’ din id-dispożizzjoni u l-kundizzjonijiet stabbiliti f’dan il-paragrafu fid-dawl tal-iżviluppi fis-suq tal-karburanti u l-proċessi Ewropej ta’ standardizzazzjoni.

1.   Fejn l-ammonti ta’ karburant rilaxxati ta’ fluss ta’ karburant jintużaw biss għall-kombustjoni f’setturi koperti mill-Anness III tad-Direttiva 2003/87/KE, il-fattur tal-ambitu għandu jiġi stabbilit għal 1.

Fejn l-ammonti ta’ karburant rilaxxati ta’ fluss ta’ karburant jintużaw biss għall-kombustjoni f’setturi koperti mill-Kapitoli II u III tad-Direttiva 2003/87/KE, bl-eċċezzjoni ta’ installazzjonijiet esklużi skont l-Artikolu 27a ta’ dik id-Direttiva, il-fattur tal-ambitu għandu jiġi stabbilit għal żero, dment li l-entità regolata turi li l-għadd doppju msemmi fl-Artikolu 30f(5) tad-Direttiva 2003/87/KE ġie evitat.

L-entità regolata għandha tiddetermina fattur tal-ambitu għal kull fluss ta’ karburant jew billi tapplika l-metodi msemmija fil-paragrafu 2, jew valur prestabbilit f’konformità mal-paragrafu 3, skont il-livell applikabbli.

2.   L-entità regolata għandha tiddetermina l-fattur tal-ambitu abbażi ta’ wieħed jew aktar mill-metodi li ġejjin, f’konformità mar-rekwiżiti tal-livell applikabbli kif stabbilit fl-Anness IIa ta’ dan ir-Regolament:

(a)	metodi bbażati fuq id-distinzjoni fiżika tal-flussi ta’ karburant, inklużi metodi bbażati fuq id-distinzjoni tar-reġjun ġeografiku jew ibbażati fuq l-użu ta’ strumenti tal-kejl separati;

(b)	metodi bbażati fuq il-proprjetajiet kimiċi tal-karburanti, li jippermettu lill-entitajiet regolati juru li l-karburant rilevanti jista’ jintuża biss għall-kombustjoni f’setturi speċifiċi, minħabba raġunijiet legali, tekniċi jew ekonomiċi;

(c)	l-użu ta’ markatur fiskali f’konformità mad-Direttiva tal-Kunsill 95/60/KE (*5);

(d)	l-użu tar-rapport annwali vverifikat dwar l-emissjonijiet imsemmi fl-Artikolu 68(1);

(e)	katina ta’ arranġamenti kuntrattwali u fatturi traċċabbli (“katina ta’ kustodja”), li tirrappreżenta l-katina kollha tal-provvista mill-entità regolata sal-konsumaturi, inklużi l-konsumaturi aħħarin;

(f)	l-użu ta’ markaturi jew kuluri nazzjonali (kuluranti) għall-karburanti, abbażi tal-leġiżlazzjoni nazzjonali;

(g)

metodi indiretti li jippermettu differenzjazzjoni akkurata tal-użi aħħarin tal-karburanti fiż-żmien meta jiġu rilaxxati għall-konsum, bħal profili ta’ konsum speċifiċi għas-settur, firxiet tipiċi ta’ kapaċità tal-livelli ta’ konsum tal-karburant tal-konsumaturi, u livelli ta’ pressjoni bħal dawk tal-karburanti gassużi, dment li l-użu ta’ dak il-metodu jiġi approvat mill-awtorità kompetenti. Il-Kummissjoni tista’ tipprovdi linji gwida dwar metodi indiretti applikabbli.

3.   Fejn soġġett għal-livelli meħtieġa, l-applikazzjoni tal-metodi elenkati fil-paragrafu 2 ma tkunx teknikament fattibbli jew timplika kostijiet mhux raġonevoli, l-entità regolata tista’ tuża valur prestabbilit ta’ 1.

4.   B’deroga mill-paragrafu 3, l-entità regolata tista’ tapplika valur prestabbilit inqas minn 1, dment li:

(a)	għall-finijiet tar-rapportar tal-emissjonijiet fis-snin ta’ rapportar 2024 sa 2026, l-entità regolata turi għas-sodisfazzjon tal-awtorità kompetenti li l-użu ta’ valuri prestabbiliti inqas minn 1 iwassal għal determinazzjoni aktar akkurata tal-emissjonijiet, jew

(b)

għall-finijiet tar-rapportar tal-emissjonijiet fis-snin ta’ rapportar mill-1 ta’ Jannar 2027, l-entità regolata turi għas-sodisfazzjon tal-awtorità kompetenti li l-użu ta’ valuri prestabbiliti inqas minn 1 iwassal għal determinazzjoni aktar akkurata tal-emissjonijiet u li mill-inqas waħda mill-kundizzjonijiet li ġejjin tiġi ssodisfata: (i) il-fluss tal-karburant huwa fluss ta’ karburant de minimis; (ii) il-valur prestabbilit għall-fluss ta’ karburant ma huwiex inqas minn 0,95 għall-użi tal-karburant f’setturi koperti mill-Anness III tad-Direttiva 2003/87/KE jew mhux ogħla minn 0,05 għall-użi tal-karburant f’setturi mhux koperti minn dak l-Anness.

5.   Fejn, għal fluss ta’ karburant, l-entità regolata tuża aktar minn metodu wieħed elenkat fil-paragrafi 2, 3 u 4, hija għandha tiddetermina l-fattur tal-ambitu bħala l-medja ponderata tal-fatturi differenti tal-kamp ta’ applikazzjoni li jirriżultaw mill-użu ta’ kull metodu. Għal kull metodu użat, l-entità regolata għandha tippreżenta informazzjoni dwar it-tip ta’ metodu, il-fattur tal-ambitu assoċjat, l-ammont ta’ karburant rilaxxat u l-kodiċi mill-format komuni ta’ rapportar għas-sistemi nazzjonali ta’ inventarju tal-gassijiet serra, kif approvat mill-korpi rispettivi tal-Konvenzjoni Qafas tan-Nazzjonijiet Uniti dwar it-Tibdil fil-Klima dwar it-tibdil fil-Klima (il-kodiċi tal-Format ta’ Rapportar Komuni (CDF)), fil-livell ta’ dettall disponibbli.

6.   B’deroga mill-paragrafu 1 ta’ dan l-Artikolu u mill-Artikolu 75i, Stat Membru jista’ jirrikjedi li l-entitajiet regolati jużaw metodu speċifiku msemmi fil-paragrafu 2 ta’ dan l-Artikolu jew valur prestabbilit għal ċertu tip ta’ karburant jew f’ċertu reġjun fit-territorju tagħhom. L-użu ta’ valuri prestabbiliti fil-livell nazzjonali għandu jkun soġġett għall-approvazzjoni tal-Kummissjoni.

Meta tapprova l-valur prestabbilit f’konformità mal-ewwel subparagrafu, il-Kummissjoni għandha tikkunsidra l-livell xieraq ta’ armonizzazzjoni tal-metodoloġiji bejn l-Istati Membri, il-bilanċ bejn l-akkuratezza, l-effiċjenza amministrattiva u l-implikazzjonijiet ta’ trasferiment tal-kost għall-konsumaturi, kif ukoll ir-riskju possibbli ta’ evażjoni tal-obbligi skont il-Kapitolu IVa tad-Direttiva 2003/87/KE.

Kwalunkwe valur prestabbilit għall-fluss nazzjonali ta’ karburant użat skont dan il-paragrafu ma għandux ikun anqas minn 0,95 għall-użi tal-karburant fis-setturi koperti mill-Anness III tad-Direttiva 2003/87/KE jew mhux ogħla minn 0,05 għall-użi tal-karburant f’setturi mhux koperti minn dak l-Anness.

7.   L-entità regolata għandha tispeċifika l-metodi applikati jew il-valuri prestabbiliti fil-pjan ta’ monitoraġġ.

1.   Għandhom japplikaw l-Artikolu 38 u l-Artikolu 39, bl-eċċezzjoni tal-paragrafi 2 u 2a. Għal dak il-fini:

(a)	kwalunkwe referenza għal operatur għandha tiġi interpretata daqslikieku kienet referenza għall-entità regolata;

(b)	kwalunkwe referenza għal data dwar attività għandha tiġi interpretata daqslikieku kienet referenza għall-ammonti ta’ karburant rilaxxati;

(c)	kwalunkwe referenza għall-flussi minn sorsi għandha tiġi interpretata daqslikieku kienet referenza għall-flussi ta’ karburant;

(d)	kwalunkwe referenza għall-Anness II għandha tiġi interpretata daqslikieku kienet referenza għall-Anness IIa;

(e)	kwalunkwe referenza għall-paragrafu 39(2) għandha tiġi interpretata bħala referenza għall-paragrafu 3 ta’ dan l-Artikolu.

2.   Fejn ikun applikabbli l-Artikolu 38(5), għandhom jitqiesu d-derogi ta’ limitu f’konformità mar-raba’ subparagrafu tal-Artikolu 29(1) tad-Direttiva (UE) 2018/2001, dment li l-entità regolata tista’ turi l-evidenza rilevanti għas-sodisfazzjon tal-awtorità kompetenti. Il-Kummissjoni tista’ tipprovdi linji gwida dwar kif għandhom jiġu applikati aktar dawn id-derogi tal-limiti.

3.   Fejn, suġġett għal-livell meħtieġ, l-entità regolata għandha twettaq analiżijiet sabiex tiddetermina l-frazzjoni tal-bijomassa, hija għandha tagħmel dan abbażi ta’ metodu standard rilevanti u l-metodi analitiċi fih, dment li l-użu ta’ dak il-metodu standard u analitiku jiġi approvat mill-awtorità kompetenti.

Fejn, suġġett għal-livell meħtieġ, l-entità regolata għandha twettaq analiżijiet sabiex tiddetermina l-frazzjoni tal-bijomassa, iżda l-applikazzjoni tal-ewwel subparagrafu ma tkunx teknikament fattibbli jew timplika kostijiet irraġonevoli, l-entità regolata għandha tippreżenta metodu ta’ stima alternattiv sabiex tiddetermina l-frazzjoni tal-bijomassa lill-awtorità kompetenti għall-approvazzjoni.

1.   L-awtorità kompetenti tista’ tikkunsidra entità regolata bħala entità regolata b’emissjonijiet baxxi meta tiġi ssodisfata tal-inqas waħda mill-kundizzjonijiet li ġejjin:

(a)	mill-2027 sal-2030, l-emissjonijiet annwali medji vverifikati fis-sentejn ta’ qabel il-perjodu ta’ rapportar, bl-esklużjoni tas-CO2 li jirriżulta mill-bijomassa, kienu inqas minn 1 000 tunnellata ta’ CO2 fis-sena;

(b)

mill-2031, l-emissjonijiet annwali medji ta’ dik l-entità regolata rrapportati fir-rapporti verifikati dwar l-emissjonijiet matul il-perjodu ta’ negozjar immedjatament qabel il-perjodu ta’ negozjar attwali, bl-esklużjoni tas-CO2 li jirriżulta mill-bijomassa, kienu inqas minn 1 000 tunnellata ta’ CO2 fis-sena;

(c)

meta l-emissjonijiet annwali medji msemmija fil-punt (a) ma jkunux disponibbli jew ma jibqgħux rappreżentattivi għall-fini tal-punt (a), iżda l-emissjonijiet annwali ta’ dik l-entità regolata għall-5 snin li ġejjin, bl-esklużjoni tas-CO2 li jirriżulta mill-bijomassa, se jkunu, abbażi ta’ metodu ta’ stima konservattiv, inqas minn 1 000 tunnellata ta’ CO2(e) fis-sena.

Għall-fini ta’ dan il-paragrafu, għandu japplika l-Artikolu 38(5).

2.   L-entità regolata b’emissjonijiet baxxi ma għandhiex tkun meħtieġa tippreżenta d-dokumenti ta’ sostenn imsemmija fit-tielet subparagrafu tal-Artikolu 12(1).

3.   B’deroga mill-Artikolu 75j, l-entità regolata b’emissjonijiet baxxi tista’ tiddetermina l-ammont ta’ karburant rilaxxat bl-użu ta’ rekords ta’ xiri disponibbli u ddokumentati u stimi ta’ tibdil fl-istokk.

4.   B’deroga mill-Artikoli 75h, l-entità regolata b’emissjonijiet baxxi tista’ tapplika bħala minimu l-livell wieħed għall-finijiet tad-determinazzjoni tal-ammonti ta’ karburant rilaxxati u l-fatturi ta’ kalkolu għall-flussi kollha ta’ karburant, sakemm ma tkunx tista’ tinkiseb akkuratezza ogħla mingħajr sforz addizzjonali għall-entità regolata.

5.   Għall-fini tad-determinazzjoni tal-fatturi ta’ kalkolu abbażi ta’ analiżijiet f’konformità mal-Artikolu 32, l-entità regolata b’emissjonijiet baxxi tista’ tuża kwalunkwe laboratorju li jkun teknikament kompetenti u kapaċi jiġġenera riżultati teknikament validi bl-użu tal-proċeduri analitiċi rilevanti u jipprovdi evidenza għal miżuri ta’ garanzija tal-kwalità kif imsemmi fl-Artikolu 34(3).

6.   Fejn entità regolata b’emissjonijiet baxxi soġġetta għal monitoraġġ simplifikat taqbeż il-livell limitu msemmi fil-paragrafu 2 fi kwalunkwe sena kalendarja, din l-entità regolata għandha tinnotifika lill-awtorità kompetenti dwar dan mingħajr dewmien żejjed.

L-entità regolata għandha, mingħajr dewmien żejjed, tippreżenta modifika sinifikanti tal-pjan ta’ monitoraġġ skont it-tifsira tal-Artikolu 15(3), il-punt (b), lill-awtorità kompetenti għall-approvazzjoni.

Madankollu, l-awtorità kompetenti għandha tippermetti li l-entità regolata tkompli l-monitoraġġ issimplifikat dment li dik l-entità regolata turi b’sodisfazzjon għall-awtorità kompetenti li l-livell limitu msemmi fil-paragrafu 2 ma jkunx inqabeż fil-ħames perjodi ta’ rapportar li jkunu għaddew u ma jkunx se jinqabeż għal darb’oħra mill-perjodu ta’ rapportar ta’ wara ’l quddiem.

1.   Mill-2026, l-entità regolata għandha tippreżenta lill-awtorità kompetenti sat-30 ta’ April ta’ kull sena rapport dwar l-emissjonijiet li jkopri l-emissjonijiet annwali fil-perjodu tar-rapportar u li huwa vverifikat f’konformità mar-Regolament ta’ Implimentazzjoni (UE) 2018/2067.

Fl-2025, l-entità regolata għandha tippreżenta lill-awtorità kompetenti sat-30 ta’ April rapport dwar l-emissjonijiet li jkopri l-emissjonijiet annwali fl-2024. L-awtoritajiet kompetenti għandhom jiżguraw li l-informazzjoni pprovduta f’dak ir-rapport f’konformità mar-rekwiżiti ta’ dan ir-Regolament.

Madankollu, l-awtoritajiet kompetenti jistgħu jirrikjedu li l-entitajiet regolati jippreżentaw ir-rapporti annwali dwar l-emissjonijiet imsemmija f’dan il-paragrafu qabel it-30 ta’ April, dment li r-rapport jiġi ppreżentat mhux aktar kmieni minn xahar wieħed wara l-iskadenza stabbilita fl-Artikolu 68(1).

2.   Ir-rapporti annwali dwar l-emissjonijiet imsemmija fil-paragrafu 1 għandhom mill-inqas jinkludu l-informazzjoni mniżżla fl-Anness X.

1.   Kull entità regolata għandha tivverifika regolarment jekk il-metodoloġija ta’ monitoraġġ applikata tistax tittejjeb.

L-entitajiet regolati għandhom jippreżentaw lill-awtorità kompetenti għall-approvazzjoni rapport li jkun jinkludi l-informazzjoni msemmija fil-paragrafi 2 jew 3, fejn xieraq, sal-iskadenzi li ġejjin:

(a)	għal entità tal-kategorija A, sal-31 ta’ Lulju kull 5 snin;

(b)	għal entità tal-kategorija B, sal-31 ta’ Lulju kull 3 snin;

(c)	għal kwalunkwe entità regolata li qed tuża l-fattur tal-ambitu prestabbilit kif imsemmi fl-Artikolu 75l(3) u (4), sal-31 ta’ Lulju 2026.

Madankollu, l-awtorità kompetenti tista’ tistabbilixxi data alternattiva għall-preżentazzjoni tar-rapport, iżda mhux aktar tard mit-30 ta’ Settembru tal-istess sena u tista’ tapprova, flimkien mal-pjan ta’ monitoraġġ jew ir-rapport tat-titjib, estensjoni tal-iskadenza applikabbli skont it-tieni subparagrafu, jekk l-entità regolata tipprovdi evidenza għas-sodisfazzjon tal-awtorità kompetenti meta tippreżenta pjan ta’ monitoraġġ f’konformità mal-Artikolu 75b jew man-notifika tal-aġġornamenti f’konformità ma’ dak l-Artikolu, jew meta tippreżenta rapport ta’ titjib f’konformità ma’ dan l-Artikolu, li r-raġunijiet għal kostijiet irraġonevoli jew għal miżuri ta’ titjib li ma humiex teknikament fattibbli se jibqgħu validi għal perjodu ta’ żmien itwal. L-estensjoni għandha tqis in-numru ta’ snin li għalihom l-entità regolata tipprovdi evidenza. Il-perjodu ta’ żmien totali bejn ir-rapporti dwar it-titjib ma għandux jaqbeż 4 snin għal entità regolata tal-kategorija B jew 5 snin għal entità regolata tal-kategorija A.

2.   Fejn entità regolata ma tapplikax għall-flussi ta’ karburant ewlenin mill-inqas il-livelli meħtieġa skont l-ewwel subparagrafu tal-Artikolu 75h(1) u skont l-Artikolu 75i(1), l-entità regolata għandha tipprovdi ġustifikazzjoni għaliex l-applikazzjoni tal-livelli meħtieġa ma hijiex teknikament fattibbli jew tista’ timplika kostijiet irraġonevoli.

Madankollu, fejn tinstab evidenza li l-miżuri meħtieġa għall-ilħiq ta’ dawk il-livelli jkunu saru teknikament vijabbli u ma jkunux għadhom jimplikaw kostijiet irraġonevoli, l-entità regolata għandha tinnotifika lill-awtorità kompetenti dwar modifiki xierqa tal-pjan ta’ monitoraġġ f’konformità mal-Artikolu 75b, u tippreżenta proposti għall-implimentazzjoni tal-miżuri relatati u l-iskeda taż-żmien tagħha.

3.   Meta l-entità regolata tapplika l-fattur tal-ambitu prestabbilit kif imsemmi fl-Artikolu 75l(3) u (4), l-entità regolata għandha tipprovdi ġustifikazzjoni dwar għaliex ma huwiex teknikament fattibbli jew jista’ jimplika kostijiet irraġonevoli biex jiġi applikat kwalunkwe metodu ieħor imsemmi fl-Artikolu 75l(2) għal fluss wieħed jew aktar ta’ karburant ewlieni jew de minimis.

Madankollu, fejn tinstab evidenza, għal dawk il-flussi ta’ karburant, li l-applikazzjoni ta’ kwalunkwe metodu ieħor imsemmi fl-Artikolu 75l(2) saret teknikament fattibbli u ma għadhiex timplika kostijiet irraġonevoli, l-entità regolata għandha tinnotifika lill-awtorità kompetenti bil-modifiki xierqa tal-pjan ta’ monitoraġġ f’konformità mal-Artikolu 75b u tippreżenta proposti għall-implimentazzjoni tal-miżuri relatati u l-iskeda ta’ żmien tiegħu.

4.   Fejn ir-rapport ta’ verifika stabbilit f’konformità mar-Regolament ta’ Implimentazzjoni (UE) 2018/2067 jiddikjara nuqqasijiet ta’ konformità jew rakkomandazzjonijiet għal titjib pendenti, f’konformità mal-Artikoli 27, 29 u 30 ta’ dak ir-Regolament ta’ Implimentazzjoni, l-entità regolata għandha tippreżenta lill-awtorità kompetenti rapport għall-approvazzjoni sal-31 ta’ Lulju tas-sena li fiha dak ir-rapport ta’ verifika jinħareġ mill-verifikatur. Dak ir-rapport għandu jiddeskrivi kif u meta l-entità regolata tkun irrettifikat jew tippjana li tirrettifika n-nuqqasijiet ta’ konformità identifikati mill-verifikatur u li timplimenta t-titjib irrakkomandat.

L-awtorità kompetenti tista’ tistabbilixxi data alternattiva għall-preżentazzjoni tar-rapport kif imsemmi f’dan il-paragrafu, iżda mhux iktar tard mit-30 ta’ Settembru tal-istess sena. Fejn applikabbli, rapport bħal dan jista’ jiġi kkombinat mar-rapport imsemmi fil-paragrafu 1 ta’ dan l-Artikolu.

Fejn titjib irrakkomandat ma jkunx se jwassal għal titjib tal-metodoloġija ta’ monitoraġġ, l-entità regolata għandha tipprovdi ġustifikazzjoni sabiex tispjega għaliex dak huwa l-każ. Fejn it-titjib irrakkomandat ikun se jwassal għal kostijiet irraġonevoli, l-entità regolata għandha tipprovdi evidenza tan-natura irraġonevoli tal-kostijiet.

5.   Il-paragrafu 4 ta’ dan l-Artikolu ma għandux japplika fejn l-entità regolata tkun diġà solviet in-nuqqasijiet ta’ konformità u r-rakkomandazzjonijiet kollha għat-titjib u ppreżentat modifiki relatati tal-pjan ta’ monitoraġġ lill-awtorità kompetenti għall-approvazzjoni f’konformità mal-Artikolu 75b ta’ dan ir-Regolament qabel id-data stabbilita skont il-paragrafu 4 ta’ dan l-Artikolu.

1.   L-awtorità kompetenti għandha tagħmel stima konservattiva tal-emissjonijiet ta’ entità regolata, filwaqt li tqis l-implikazzjonijiet tat-trasferiment tal-kost għall-konsumaturi, fi kwalunkwe waħda mis-sitwazzjonijiet li ġejjin:

(a)	ma jkun ġie ppreżentat l-ebda rapport annwali vverifikat dwar l-emissjonijiet mill-entità regolata sal-iskadenza meħtieġa skont l-Artikolu 75p;

(b)	ir-rapport annwali vverifikat dwar l-emissjonijiet imsemmi fl-Artikolu 75p ma jkunx konformi ma’ dan ir-Regolament;

(c)	ir-rapport annwali dwar l-emissjonijiet ta’ entità regolata ma jkunx ġie vverifikat f’konformità mar-Regolament ta’ Implimentazzjoni (UE) 2018/2067.

2.   Fejn verifikatur ikun iddikjara, fir-rapport ta’ verifika skont ir-Regolament ta’ Implimentazzjoni (UE) 2018/2067, l-eżistenza ta’ dikjarazzjonijiet skorretti mhux materjali li ma jkunux ġew ikkoreġuti mill-entità regolata qabel il-ħruġ tar-rapport ta’ verifika, l-awtorità kompetenti għandha tivvaluta dawk id-dikjarazzjonijiet skorretti, u, fejn xieraq, tagħmel stima konservattiva tal-emissjonijiet tal-entità regolata, filwaqt li tqis l-implikazzjonijiet tat-trasferiment tal-kost għall-konsumaturi. L-awtorità kompetenti għandha tgħarraf lill-entità regolata jekk ikunux meħtieġa korrezzjonijiet, u liema huma dawn il-korrezzjonijiet, fir-rapport annwali dwar l-emissjonijiet. L-entità regolata għandha tagħmel dik l-informazzjoni disponibbli għall-verifikatur.

3.   L-Istati Membri għandhom jistabbilixxu skambju effiċjenti ta’ informazzjoni bejn l-awtoritajiet kompetenti responsabbli għall-approvazzjoni ta’ pjanijiet ta’ monitoraġġ u l-awtoritajiet kompetenti responsabbli għall-aċċettazzjoni ta’ rapporti annwali dwar l-emissjonijiet.

1.   L-Istati Membri għandhom jiffaċilitaw l-iskambji effiċjenti ta’ informazzjoni li jippermettu lill-entitajiet regolati jiddeterminaw l-użu aħħari tal-karburant rilaxxat għall-konsum.

2.   Kull operatur għandu, flimkien mar-rapport ivverifikat dwar l-emissjonijiet tiegħu f’konformità mal-Artikolu 68(1), jippreżenta informazzjoni f’konformità mal-Anness Xa. L-Istati Membri jistgħu jirrikjedu li l-operaturi jagħmlu l-informazzjoni rilevanti elenkata fl-Anness Xa disponibbli għall-entità regolata kkonċernata qabel il-31 ta’ Marzu tas-sena ta’ rapportar.

3.   Kull entità regolata għandha, flimkien mar-rapport ivverifikat dwar l-emissjonijiet tagħha f’konformità mal-Artikolu 75p(1), tippreżenta informazzjoni dwar il-konsumaturi tal-karburanti li tkun irrilaxxat għall-konsum kif elenkat fl-Anness Xb.

4.   Kull entità regolata li tirrilaxxa l-karburant għall-kombustjoni, f’setturi koperti mill-Kapitolu III tad-Direttiva 2003/87/KE, għandha tiddetermina l-emissjonijiet tagħha fir-rapport imsemmi fl-Artikolu 75p(1) ta’ dan ir-Regolament billi tuża l-informazzjoni mir-rapporti tal-operatur ippreżentati f’konformità mal-Anness Xa ta’ dan ir-Regolament u billi tnaqqas l-ammonti rilevanti ta’ karburanti imsemmija f’dawk ir-rapporti. L-ammonti ta’ karburanti miksuba iżda mhux użati fl-istess sena jistgħu jitnaqqsu biss jekk ir-rapport ivverifikat dwar l-emissjonijiet tal-operatur tas-sena ta’ wara s-sena ta’ rapportar jikkonferma li dawn intużaw għall-attivitajiet imsemmija fl-Anness I tad-Direttiva 2003/87/KE. Inkella, id-differenza għandha tiġi riflessa fir-rapporti vverifikati dwar l-emissjonijiet tal-entità regolata ta’ dik is-sena.

5.   Meta l-ammonti ta’ karburanti użati jitnaqqsu fis-sena ta’ wara s-sena ta’ rapportar, it-tnaqqis għandu jiġi stabbilit fil-forma ta’ tnaqqis assolut tal-emissjonijiet, derivat mill-multiplikazzjoni tal-ammont ta’ karburanti użati mill-operatur bil-fattur ta’ emissjoni korrispondenti fil-pjan ta’ monitoraġġ tal-entità regolata.

6.   Meta l-entità regolata ma tkunx tista’ tistabbilixxi li l-karburanti rilaxxati għall-konsum jintużaw għall-kombustjoni f’setturi soġġetti għall-Kapitolu III tad-Direttiva 2003/87/KE, il-paragrafi 4 u 5 ma għandhomx japplikaw.

7.   L-Istati Membri jistgħu jirrikjedu li d-dispożizzjonijiet ta’ dan l-Artikolu li jikkonċernaw lill-operaturi jiġu applikati wkoll mill-operaturi tal-inġenji tal-ajru.

1.   Sabiex jiġu żgurati l-monitoraġġ u r-rapportar akkurati tal-emissjonijiet koperti mill-Kapitolu IVa tad-Direttiva 2003/87/KE, l-Istati Membri għandhom jistabbilixxu miżuri kontra l-frodi u jiddeterminaw il-penali li għandhom jiġu imposti f’każ ta’ frodi li jkunu proporzjonati għall-fini tagħhom u li jkollhom effett ta’ deterrent adegwat.

2.   Minbarra l-obbligi stabbiliti skont l-Artikolu 10, l-awtoritajiet kompetenti maħtura skont l-Artikolu 18 tad-Direttiva 2003/87/KE, għandhom jikkooperaw u jiskambjaw informazzjoni mal-awtoritajiet kompetenti inkarigati mis-superviżjoni skont il-leġiżlazzjoni nazzjonali li tittrasponi d-Direttivi 2003/96/KE u (UE) 2020/262, fejn rilevanti, għall-finijiet ta’ dan ir-Regolament, inkluż l-identifikazzjoni ta’ ksur u l-impożizzjoni ta’ penali msemmija fil-paragrafu 1 jew ta’ miżuri korrettivi oħra f’konformità mal-Artikolu 16 tad-Direttiva 2003/87/KE.

“ANNESS IIa

Definizzjonijiet tal-livelli għall-metodoloġiji bbażati fuq il-kalkolu relatati ma’ entitajiet regolati

1.   DEFINIZZJONI TAL-LIVELLI GĦALL-AMMONTI TA’ KARBURANT RILAXXATI

Il-limiti ta’ inċertezza fit-Tabella 1 għandhom japplikaw għal-livelli rilevanti għar-rekwiżiti tal-ammonti ta’ karburant rilaxxati f’konformità mal-Artikolu 28(1), il-punt (a), u l-Artikolu 29(2), l-ewwel subparagrafu. Il-livelli limitu ta’ inċertezza għandhom jiġu interpretati bħala l-inċertezzi massimi permissibbli għad-determinazzjoni ta’ flussi ta’ karburant tul perjodu ta’ rapportar.

Tabella 1

Livelli għall-ammonti ta’ karburant rilaxxati (inċertezza massima permissibbli għal kull livell)

Tip ta’ fluss ta’ karburant

Parametru li għalih tiġi applikata l-inċertezza

Livell 1

Livell 2

Livell 3

Livell 4

Kombustjoni ta’ karburanti

Karburanti standard kummerċjali	Ammont ta’ karburant [t] jew [Nm3] jew [TJ]	±7,5  %	±5  %	±2,5  %	±1,5  %
Karburanti gassużi u likwidi oħra	Ammont ta’ karburant [t] jew [Nm3] jew [TJ]	±7,5  %	±5  %	±2,5  %	±1,5  %
Karburanti solidi	Ammont ta’ karburant [t] jew [TJ]	±7,5  %	±5  %	±2,5  %	±1,5  %

2.   DEFINIZZJONI TAL-LIVELLI GĦALL-FATTURI TA’ KALKOLU U L-FATTUR TAL-AMBITU

L-entitajiet regolati għandhom jimmonitorjaw l-emissjonijiet tas-CO2 mit-tipi kollha ta’ karburanti rilaxxati għall-konsum fis-setturi elenkati fl-Anness III tad-Direttiva 2003/87/KE jew inklużi fis-sistema tal-Unjoni skont l-Artikolu 30j ta’ dik id-Direttiva bl-użu tad-definizzjonijiet tal-livelli stabbiliti f’din it-taqsima.

2.1.   Livelli għall-fatturi ta’ emissjoni

Fejn frazzjoni ta’ bijomassa tiġi ddeterminata għal karburant imħallat, il-livelli ddefiniti għandhom jirrigwardaw il-fattur ta’ emissjoni preliminari. Għall-karburanti fossili, il-livelli għandhom jirrigwardaw il-fattur ta’ emissjoni.

Livell 1: L-entità regolata għandha tapplika wieħed minn dawn li ġejjin:

(a)	il-fatturi standard elenkati fit-taqsima 1 tal-Anness VI;

(b)	valuri kostanti oħrajn f’konformità mal-Artikolu 31(1), il-punt (e), fejn ma jkun hemm l-ebda valur applikabbli fit-taqsima 1 tal-Anness VI.

Livell 2a: L-entità regolata għandha tapplika fatturi ta’ emissjoni speċifiċi għall-pajjiż għall-karburant rispettiv f’konformità mal-Artikolu 31(1), il-punti (b) u (c).

Livell 2b: L-entità regolata għandha tikseb fatturi ta’ emissjoni għall-karburant abbażi tal-valur kalorifiku nett għal tipi speċifiċi ta’ faħam, flimkien ma’ korrelazzjoni empirika kif iddeterminat mill-inqas darba fis-sena f’konformità mal-Artikoli 32 sa 35 u 75m.

L-entità regolata għandha tiżgura li l-korrelazzjoni tissodisfa r-rekwiżiti tal-prattiki tajba tal-inġinerija u li tiġi applikata biss għal valuri tal-proxy li jaqgħu fil-firxa li għaliha tkun ġiet stabbilita.

Livell 3: L-entità regolata għandha tapplika wieħed minn dawn li ġejjin:

(a)	determinazzjoni tal-fattur ta’ emissjoni f’konformità mad-dispożizzjonijiet rilevanti tal-Artikoli 32 sa 35;

(b)

il-korrelazzjoni empirika kif speċifikata għal-Livell 2b, fejn l-entità regolata turi għas-sodisfazzjon tal-awtorità kompetenti li l-inċertezza tal-korrelazzjoni empirika ma taqbiżx 1/3 tal-valur tal-inċertezza li l-entità regolata għandha taderixxi miegħu fir-rigward tad-determinazzjoni tal-ammonti ta’ karburant rilaxxati tal-karburant rilevanti.

2.2.   Livelli għall-fattur ta’ konverżjoni ta’ unità

Livell 1: L-entità regolata għandha tapplika wieħed minn dawn li ġejjin:

(a)	il-fatturi standard elenkati fit-taqsima 1 tal-Anness VI;

(b)	valuri kostanti oħrajn f’konformità mal-Artikolu 31(1), il-punt (e), fejn ma jkun hemm l-ebda valur applikabbli fit-taqsima 1 tal-Anness VI.

Livell 2a: L-entità regolata għandha tapplika fatturi speċifiċi għall-pajjiż għall-karburant rispettiv f’konformità mal-Artikolu 31(1), il-punt (b) jew (c).

Livell 2b: Għall-karburanti li jinbiegħu b’mod kummerċjali għandu jintuża l-fattur ta’ konverżjoni ta’ unità kif derivat mir-reġistri tax-xiri għall-karburant rispettiv, dment li jkun ġie dderivat abbażi ta’ standards nazzjonali jew internazzjonali aċċettati.

Livell 3: L-entità regolata għandha tiddetermina l-fattur ta’ konverżjoni ta’ unità f’konformità mal-Artikoli 32 sa 35.

2.3.   Livelli għall-frazzjoni tal-bijomassa

Livell 1: L-entità regolata għandha tapplika valur applikabbli ppubblikat mill-awtorità kompetenti jew il-Kummissjoni, jew valuri f’konformità mal-Artikolu 31(1).

Livell 2: L-entità regolata għandha tapplika metodu ta’ stima approvat f’konformità mal-Artikolu 75m(3), it-tieni subparagrafu.

Livell 3a: L-entità regolata għandha tapplika analiżijiet f’konformità mal-Artikolu 75m(3), l-ewwel subparagrafu, u f’konformità mal-Artikoli 32 sa 35.

Fejn entità regolata tassumi frazzjoni ta’ fossili ta’ 100 % f’konformità mal-Artikolu 39(1), l-ebda livell ma għandu jiġi assenjat għall-frazzjoni tal-bijomassa.

Livell 3b: Għall-karburanti li joriġinaw minn proċess ta’ produzzjoni bi flussi ta’ input definiti u traċċabbli, l-entità regolata tista’ tibbaża l-istima fuq bilanċ tal-massa tal-karbonju fossili u tal-bijomassa li jidħol u joħroġ mill-proċess, bħas-sistema ta’ bilanċ tal-massa f’konformità mal-Artikolu 30(1) tad-Direttiva (UE) 2018/2001.

2.4.   Livelli għall-fattur tal-ambitu

Livell 1: L-entità regolata għandha tapplika valur prestabbilit f’konformità mal-Artikolu 75l(3) jew (4).

Livell 2: L-entità regolata għandha tapplika metodi f’konformità mal-Artikolu 75l(2), il-punti (e) sa (g).

Livell 3: L-entità regolata għandha tapplika metodi f’konformità mal-Artikolu 75l(2), il-punti (a) sa (d).

“ANNESS IX

Data u informazzjoni minimi li għandhom jinżammu f’konformità mal-Artikolu 67(1)

L-operaturi, l-operaturi tal-inġenji tal-ajru u l-entitajiet regolati għandhom iżommu tal-inqas dan li ġej:

1.   ELEMENTI KOMUNI GĦALL-INSTALLAZZJONIJIET, GĦALL-OPERATURI TAL-INĠENJI TAL-AJRU U GĦALL-ENTITAJIET REGOLATI

(1)	Il-pjan ta’ monitoraġġ approvat mill-awtorità kompetenti;

(2)	Dokumenti li jiġġustifikaw l-għażla tal-metodoloġija ta’ monitoraġġ u d-dokumenti li jiġġustifikaw bidliet temporali jew mhux temporali ta’ metodoloġiji ta’ monitoraġġ u, fejn applikabbli, ta’ livelli li ġew approvati mill-awtorità kompetenti;

(3)	L-aġġornamenti rilevanti kollha tal-pjanijiet ta’ monitoraġġ innotifikati lill-awtorità kompetenti f’konformità mal-Artikolu 15, u t-tweġibiet tal-awtorità kompetenti;

(4)	Il-proċeduri kollha bil-miktub imsemmija fil-pjan ta’ monitoraġġ, inkluż il-pjan ta’ kampjunar fejn rilevanti, il-proċeduri għall-attivitajiet ta’ fluss ta’ data u l-proċeduri għall-attivitajiet ta’ kontroll;

(5)	Lista tal-verżjonijiet tal-pjan ta’ monitoraġġ kollha użati u l-proċeduri kollha relatati;

(6)	Dokumentazzjoni tar-responsabbiltajiet b’rabta mal-monitoraġġ u r-rapportar;

(7)	Il-valutazzjoni tar-riskju mwettqa mill-operatur, mill-operatur tal-inġenji tal-ajru jew mill-entità regolata, fejn applikabbli;

(8)	Ir-rapporti ta’ titjib f’konformità mal-Artikolu 69;

(9)	Ir-rapport annwali dwar l-emissjonijiet ivverifikat;

(10)	Ir-rapport ta’ verifika;

(11)	Kwalunkwe informazzjoni oħra li tiġi identifikata li hija meħtieġa għall-verifika tar-rapport annwali dwar l-emissjonijiet.

2.   ELEMENTI SPEĊIFIĊI GĦAL INSTALLAZZJONIJIET TA’ SORSI STAZZJONARJI

(1)	Il-permess għal emissjonijiet tal-gassijiet serra, u kwalunkwe aġġornamenti tiegħu;

(2)	Kwalunkwe valutazzjoni tal-inċertezzi, fejn applikabbli;

(3)

Għall-metodoloġiji bbażati fuq kalkolu applikati fl-installazzjonijiet: (a) id-data tal-attivitajiet użata għal kwalunkwe kalkolu tal-emissjonijiet għal kull fluss minn sors, ikkategorizzata skont il-proċess u t-tip ta’ karburant jew materjal; (b) lista tal-valuri prestabbiliti kollha użati bħala fatturi ta’ kalkolu, fejn applikabbli; (c) is-sett sħiħ ta’ riżultati ta’ kampjunar u analiżi għad-determinazzjoni tal-fatturi ta’ kalkolu; (d) dokumentazzjoni dwar il-proċeduri ineffettivi kollha kkoreġuti u l-azzjoni korrettiva meħuda f’konformità mal-Artikolu 64; (e) kwalunkwe riżultat tal-kalibrazzjoni u l-manutenzjoni ta’ strumenti tal-kejl.

(4)

Għall-metodoloġiji bbażati fuq il-kejl fl-installazzjonijiet, l-elementi addizzjonali li ġejjin: (a) dokumentazzjoni li tiġġustifika l-għażla ta’ metodoloġija bbażata fuq il-kejl; (b) id-data użata għall-analiżi ta’ inċertezza ta’ emissjonijiet minn kull sors ta’ emissjoni, ikkategorizzata skont il-proċess; (c) id-data użata għall-kalkoli ta’ korroborazzjoni u r-riżultati tal-kalkoli; (d) deskrizzjoni teknika dettaljata tas-sistema ta’ kejl kontinwu inkluża d-dokumentazzjoni tal-approvazzjoni min-naħa tal-awtorità kompetenti; (e) data mhux ipproċessata u aggregata mis-sistema ta’ kejl kontinwu, inkluża dokumentazzjoni dwar it-tibdil matul iż-żmien, ir-reġistru dwar it-testijiet, il-ħinijiet ta’ nuqqas ta’ disponibbiltà tas-sistema (down-times), il-kalibrazzjonijiet, l-għoti ta’ service u l-manutenzjoni; (f) dokumentazzjoni ta’ kwalunkwe tibdil tas-sistema ta’ kejl kontinwu; (g) kwalunkwe riżultat tal-kalibrazzjoni u l-manutenzjoni ta’ strumenti tal-kejl; (h) fejn applikabbli, il-mudell tal-bilanċ tal-massa jew l-enerġija użat għall-fini li tiġi ddeterminata data ta’ sostituzzjoni f’konformità mal-Artikolu 45(4) u s-suppożizzjonijiet sottostanti;

(5)

Fejn tiġi applikata metodoloġija alternattiva kif imsemmi fl-Artikolu 22, id-data kollha meħtieġa għad-determinazzjoni tal-emissjonijiet għas-sorsi ta’ emissjoni u l-flussi minn sorsi li għalihom dik il-metodoloġija tiġi applikata, kif ukoll id-data proxy għad-data tal-attività, il-fatturi ta’ kalkolu u parametri oħra li jkollhom jiġu rrapportati taħt approċċ ta’ livelli;

(6)

Għall-produzzjoni tal-aluminju primarju, l-elementi addizzjonali li ġejjin: (a) dokumentazzjoni tar-riżultati minn kampanji ta’ kejl għad-determinazzjoni tal-fatturi ta’ emissjoni speċifiċi għall-installazzjoni għal CF4 u C2F6; (b) dokumentazzjoni tar-riżultati tad-determinazzjoni tal-effiċjenza tal-ġbir għall-emissjonijiet li jaħarbu; (c) id-data rilevanti kollha dwar il-produzzjoni tal-aluminju primarju, il-frekwenza tal-effett tal-anodu u d-data dwar id-dewmien jew il-vultaġġ żejjed;

(7)

Għall-qbid tas-CO2, attivitajiet ta’ trasport u ħżin ġeoloġiku, fejn applikabbli, l-elementi addizzjonali li ġejjin: (a) dokumentazzjoni tal-ammont ta’ CO2 injettat fil-kumpless ta’ ħżin minn installazzjonijiet li jkunu qegħdin iwettqu ħżin ġeoloġiku ta’ CO2; (b) data dwar pressjonijiet u temperaturi aggregata b’mod rappreżentattiv minn network tat-trasport; (c) kopja tal-permess għall-ħżin, inkluż il-pjan ta’ monitoraġġ approvat, skont l-Artikolu 9 tad-Direttiva 2009/31/KE; (d) ir-rapporti ppreżentati f’konformità mal-Artikolu 14 tad-Direttiva 2009/31/KE; (e) rapporti dwar ir-riżultati tal-ispezzjonijiet imwettqa f’konformità mal-Artikolu 15 tad-Direttiva 2009/31/KE; (f) dokumentazzjoni dwar miżuri korrettivi meħuda f’konformità mal-Artikolu 16 tad-Direttiva 2009/31/KE.

3.   ELEMENTI SPEĊIFIĊI GĦALL-ATTIVITAJIET TAL-AVJAZZJONI

(1)	Lista ta’ inġenji tal-ajru li jkunu proprjetà tal-operatur, li jinkrew mingħand jew lil parti oħra, u l-evidenza meħtieġa għall-kompletezza ta’ dik il-lista; għal kull inġenju tal-ajru d-data meta dan jiżdied mal-flotta jew jitneħħa mill-flotta tal-operatur tal-inġenji tal-ajru;

(2)	Lista ta’ titjiriet koperti f’kull perjodu ta’ rapportar li tinkludi, għal kull titjira, id-deżinjatur tal-ICAO taż-żewġ ajrudromi, u l-evidenza meħtieġa għall-kompletezza ta’ dik il-lista;

(3)	Data rilevanti użata għad-determinazzjoni tal-konsum u l-emissjonijiet ta’ karburant;

(4)

Dokumentazzjoni dwar il-metodoloġija għal nuqqasijiet fid-data fejn applikabbli, in-numru ta’ titjiriet fejn seħħew in-nuqqasijiet fid-data, id-data użata biex jingħalqu n-nuqqasijiet fid-data, fejn seħħew, u, fejn in-numru ta’ titjireit bin-nuqqasijiet fid-data qabżu l-5 % tat-titjiriet li ġew irrappurtati, ir-raġunijiet għan-nuqqasijiet fid-data kif ukoll id-dokumentazzjoni tal-azzjonijiet rimedjali meħuda.

4.   ELEMENTI SPEĊIFIĊI GĦAL ENTITAJIET REGOLATI

(1)	Lista tal-flussi ta’ karburant f’kull perjodu ta’ rapportar u l-evidenza meħtieġa għall-kompletezza ta’ dik il-lista, inkluża l-kategorizzazzjoni tal-flussi ta’ karburant;

(2)	il-mezzi li permezz tagħhom il-karburanti kif definiti fl-Artikolu 3, il-punt (af), tad-Direttiva 2003/87/KE jiġu rilaxxati għall-konsum u fejn disponibbli, it-tipi ta’ konsumaturi intermedji, fejn dan ma jikkawżax piż amministrattiv sproporzjonat;

(3)	it-tip ta’ użu aħħari, inkluż il-kodiċi CRF rilevanti tas-setturi aħħarin li fihom jiġi kkonsmat il-karburant kif definit fl-Artikolu 3, il-punt (af), tad-Direttiva 2003/87/KE, fil-livell ta’ aggregazzjoni disponibbli;

(4)	id-data rilevanti użata għad-determinazzjoni tal-ammonti ta’ karburant rilaxxati għal kull fluss ta’ karburant;

(5)	lista tal-valuri prestabbiliti użati u l-fatturi ta’ kalkolu, fejn applikabbli;

(6)	il-fattur tal-ambitu għal kull fluss ta’ karburant, inkluża identifikazzjoni ta’ kull settur tal-konsum aħħari u d-data sottostanti rilevanti kollha għal din l-identifikazzjoni;

(7)	il-livelli applikabbli inklużi l-ġustifikazzjonijiet għad-devjazzjoni mil-livelli meħtieġa;

(8)	is-sett sħiħ ta’ riżultati ta’ kampjunar u analiżi għad-determinazzjoni tal-fatturi ta’ kalkolu;

(9)	dokumentazzjoni dwar il-proċeduri ineffettivi kollha kkoreġuti u l-azzjoni korrettiva meħuda f’konformità mal-Artikolu 64;

(10)	kwalunkwe riżultat tal-kalibrazzjoni u l-manutenzjoni ta’ strumenti tal-kejl;

(11)	lista ta’ installazzjonijiet li għalihom jiġi rilaxxat il-karburant kif definit fl-Artikolu 3(af) tad-Direttiva 2003/87/KE għall-konsum, inklużi l-ismijiet, l-indirizz u n-numru tal-permess u l-ammonti ta’ karburant rilaxxati pprovduti lil dawk l-installazzjonijiet għall-perjodi ta’ rapportar.

“ANNESS Xa

Rapporti dwar il-fornituri tal-karburant u l-użu tal-karburant ta’ installazzjonijiet stazzjonarji u, fejn rilevanti, l-operaturi tal-inġenji tal-ajru u l-kumpaniji tat-tbaħħir

Flimkien mal-informazzjoni li tinsab fir-rapport annwali dwar l-emissjonijiet skont l-Anness X ta’ dan ir-Regolament, l-operatur għandu jippreżenta rapport bl-informazzjoni li ġejja għal kull karburant mixtri kif definit fl-Artikolu 3(af) tad-Direttiva 2003/87/KE:

(a)

l-isem, l-indirizz u n-numru uniku tal-permess tal-fornitur tal-karburant li huwa rreġistrat bħala entità regolata. F’każijiet fejn il-fornitur tal-karburant ma jkunx entità regolata, l-operaturi għandhom jippreżentaw, fejn disponibbli, lista tal-fornituri kollha tal-karburanti, mill-fornituri diretti tal-karburanti sal-entità regolata, inkluż l-isem, l-indirizz u n-numru uniku tal-permess tagħhom;

(b)	it-tipi u l-ammonti ta’ karburanti miksuba minn kull fornitur imsemmi fil-punt (a) matul il-perjodu tar-rapportar rilevanti;

(c)	l-ammont ta’ karburant użat għall-attivitajiet imsemmija fl-Anness I tad-Direttiva 2003/87/KE minn kull fornitur tal-karburant matul il-perjodu tar-rapportar rilevanti.

ANNESS Xb

Rapporti dwar il-karburanti rilaxxati minn entitajiet regolati

Flimkien mal-informazzjoni li tinsab fir-rapport annwali dwar l-emissjonijiet skont l-Anness X ta’ dan ir-Regolament, l-entità regolata għandha tippreżenta rapport bl-informazzjoni li ġejja għal kull karburant mixtri kif definit fl-Artikolu 3, il-punt (af) tad-Direttiva 2003/87/KE:

(a)

l-isem, l-indirizz u n-numru uniku tal-permess tal-operatur u, fejn rilevanti, tal-operatur tal-inġenji tal-ajru u tal-kumpanija tat-tbaħħir, li għalihom jiġi rilaxxat il-karburant. F’każijiet oħra fejn il-karburant ikun maħsub għall-użu aħħari f’setturi koperti mill-Anness I tad-Direttiva 2003/87/KE, l-entità regolata għandha tippreżenta, fejn disponibbli, lista tal-konsumaturi kollha tal-karburanti, mix-xerrej dirett sal-operatur, inkluż l-isem, l-indirizz u n-numru uniku tal-permess tagħhom, fejn dan ma jikkawżax piż amministrattiv sproporzjonat;

(b)	it-tipi u l-ammonti ta’ karburanti mibjugħa lil kull xerrej imsemmija fil-punt (a) matul il-perjodu tar-rapportar rilevanti.

(c)	l-ammont ta’ karburant użat għall-attivitajiet imsemmija fl-Anness I tad-Direttiva 2003/87/KE għal kull xerrej imsemmi fil-punt (a) matul il-perjodu tar-rapportar rilevanti.