(1)

F’konformità mad-Direttiva tal-Kunsill 2006/112/KE (3), l-Istati Membri jridu jeżentaw mit-taxxa fuq il-valur miżjud (VAT) l-importazzjoni ta’ merkanzija minn, u l-provvista ta’ merkanzija u servizzi lil, l-Unjoni, il-Komunità Ewropea tal-Enerġija Atomika, il-Bank Ċentrali Ewropew jew il-Bank Ewropew tal-Investiment jew il-korpi stabbiliti mill-Unjoni li għalihom il-Protokoll (Nru 7) dwar il-privileġġi u l-immunitajiet tal-Unjoni Ewropea, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea (“il-Protokoll”), japplika, fil-limiti u taħt il-kondizzjonijiet tal-Protokoll u l-ftehimiet għall-implimentazzjoni tiegħu jew il-ftehimiet dwar il-kwartieri ġenerali, sakemm dan ma jwassalx għal distorsjoni tal-kompetizzjoni. Madankollu, dik l-eżenzjoni hija strettament limitata għal xiri li jsir għal użu uffiċjali u ma testendix għal sitwazzjonijiet fejn merkanzija u servizzi jinxtraw minn korpi tal-Unjoni sabiex jirrispondu għas-sitwazzjoni ta’ emerġenza kkawżata mill-pandemija tal-COVID-19, b’mod partikolari meta jkunu ser ikunu disponibbli mingħajr ħlas għall-Istati Membri jew partijiet terzi bħal awtoritajiet jew istituzzjonijiet nazzjonali.

(2)

Għalhekk, minħabba li għad hemm ħtieġa urġenti għall-adozzjoni ta’ miżuri sabiex tinħoloq ir-rieda li tittieħed azzjoni meta tiġi indirizzata l-kriżi sanitarja li għaddejja bħalissa, huwa neċessarju li tiġi żgurata eżenzjoni mill-VAT għax-xiri ta’ merkanzija u servizzi mill-Kummissjoni jew minn aġenzija jew korp stabbiliti skont il-liġi tal-Unjoni fit-twettiq tal-kompiti tagħhom, sabiex jirrispondu għall-pandemija tal-COVID-19. Dan jiżgura li l-miżuri meħuda taħt id-diversi inizjattivi tal-Unjoni f’dik is-sitwazzjoni ma jiġux imfixkla minn ammonti ta’ VAT li ma jistgħux jiġu rkuprati mill-istituzzjonijiet tal-Unjoni, jew mill-piż tal-konformità li jirriżulta mill-obbligi ta’ reġistrazzjoni għall-VAT.

(3)

Id-Direttiva tal-Kunsill (UE) 2020/2020 (4) mhijiex biżżejjed biex jintlaħaq l-objettiv li tissaħħaħ il-ġlieda kontra l-pandemija tal-COVID-19 peress li tippermetti biss, għal perijodu ta’ żmien limitat, l-applikazzjoni mill-Istati Membri ta’ rati mnaqqsa għall-provvista ta’ apparat mediku dijanjostiku in vitro tal-COVID-19 u servizzi marbuta mill-qrib ma’ tali apparat jew l-għoti ta’ eżenzjoni bil-possibbiltà ta’ tnaqqis tal-VAT imħallsa fl-istadju preċedenti fir-rigward tal-provvista ta’ vaċċini tal-COVID-19 u apparat mediku dijanjostiku in vitro, u servizzi marbuta mill-qrib ma’ tali vaċċini u apparat.

(4)

Għaldaqstant, jenħtieġ li d-Direttiva 2006/112/KE tiġi emendata skont dan.

(5)

Fid-dawl tal-pandemija attwali tal-COVID-19, il-miżuri li jistgħu jaqgħu taħt l-eżenzjoni l-ġdida biex jiġu indirizzati l-effetti tal-pandemija tal-COVID-19 diġà jinsabu għaddejjin, pereżempju taħt l-Istrument għall-Appoġġ ta’ Emerġenza stabbilit bir-Regolament tal-Kunsill (UE) 2020/521 (5). Kieku l-VAT kellha titħallas għal tranżazzjonijiet relatati ma’ tali miżuri, riżorsi ta’ valur jintilfu, u dan jirriżulta f’inqas merkanzija u servizzi pprovduti lill-Istati Membri proporzjonalment għall-ammont ta’ taxxa li trid titħallas. Għalhekk, sabiex isir l-aħjar użu mill-baġit tal-Unjoni fl-indirizzar tal-konsegwenzi serji ħafna tal-pandemija tal-COVID-19, jenħtieġ li l-eżenzjonijiet introdotti b’din id-Direttiva japplikaw, b’effett retroattiv, mill-1 ta’ Jannar 2021. Tali applikazzjoni retroattiva hija indispensabbli biex jiġi evitat li l-miżuri li qed jittieħdu biex jiġu indirizzati l-effetti tal-pandemija tal-COVID-19 jiġu mċaħħda mill-effett tagħhom. Kwalunkwe aġġustament meħtieġ fir-rigward ta’ tranżazzjonijiet intaxxati inizjalment jista’ jsir bl-użu ta’ mekkaniżmi ta’ korrezzjoni diġà fis-seħħ, pereżempju permezz ta’ dikjarazzjoni tal-VAT sussegwenti.

(6)

Fid-dawl tal-urġenza tas-sitwazzjoni relatata mal-pandemija tal-COVID-19, jenħtieġ li din id-Direttiva tidħol fis-seħħ fil-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea,

(1)

Ir-Regolament (UE) 2019/1241 jipprevedi l-istabbiliment tal-miżuri tekniċi għall-Baħar tat-Tramuntana.

(2)

Il-Belġju, id-Danimarka, il-Ġermanja, Franza, in-Netherlands u l-Iżvezja (il-Grupp ta’ Scheveningen) għandhom interess ta’ ġestjoni tas-sajd dirett fil-Baħar tat-Tramuntana. Fil-15 u d-19 ta’ Ottubru 2020, dawk l-Istati Membri ppreżentaw żewġ rakkomandazzjonijiet konġunti f’konformità mal-Artikolu 18(1) tar-Regolament (UE) Nru 1380/2013 tal-Parlament Ewropew u tal-Kunsill (2) u mal-Artikolu 15(3) tar-Regolament (UE) 2019/124, li jipproponu l-adozzjoni ta’ ċerti modifiki tad-dispożizzjonijiet attwali dwar il-kaxxa tal-barbun tat-tbajja’ u l-kaxxa tal-laċċ ikħal fil-Baħar tat-Tramuntana stabbiliti fl-Anness V tar-Regolament (UE) 2019/1241 permezz ta’ att delegat tal-Kummissjoni. Huma ppreżentaw verżjoni riveduta tar-rakkomandazzjoni konġunta dwar il-kaxxa tal-laċċ ikħal fit-2 ta’ Frar 2021. Iż-żewġ rakkomandazzjonijiet konġunti ntbagħtu minn dawk l-Istati Membri lill-kunsilli konsultattivi rilevanti għall-konsultazzjoni.

(3)

Minħabba li ż-żewġ rakkomandazzjonijiet konġunti jipproponu bidliet għall-Anness V tar-Regolament (UE) 2019/1241, dan ir-Regolament delegat jipprevedi l-miżuri rakkomandati mill-Istati Membri fir-rigward kemm tal-kaxxa tal-laċċ ikħal kif ukoll il-kaxxa tal-barbun tat-tbajja’.

(4)

Il-Kumitat Xjentifiku, Tekniku u Ekonomiku għas-Sajd (STECF) ivvaluta l-evidenza pprovduta mill-Istati Membri b’appoġġ għad-dispożizzjonijiet inklużi fiż-żewġ rakkomandazzjonijiet konġunti (3). Il-miżuri proposti ġew evalwati f’konformità mal-prinċipji stabbiliti fl-Artikolu 15(4) tar-Regolament (UE) 2019/1241.

(5)

Ir-rakkomandazzjoni konġunta ppreżentata mill-Istati Membri dwar il-kaxxa tal-barbun tat-tbajja’ ssuġġeriet l-introduzzjoni ta’ eżenzjoni speċifika għal bastimenti li s-saħħa tal-magna tagħhom taqbeż il-221 kW bl-użu tat-tartaruni Daniżi, diment li tali bastimenti jikkonformaw mad-daqsijiet tal-malja stabbiliti fil-punt 1.1 tal-Parti B tal-Anness V tar-Regolament (UE) 2019/1241. L-STECF analizza l-evidenza ppreżentata mill-Istati Membri u kkonkluda li, meta wieħed iqis l-għadd limitat ta’ bastimenti kkonċernati u l-impatt limitat li t-tartarun Daniż għandu fuq il-qiegħ, l-introduzzjoni tal-eżenzjoni speċifika għat-tartarun Daniż mhijiex mistennija li jkollha xi effett sinifikanti fuq il-livell ta’ protezzjoni fiż-żona. Għalhekk jenħtieġ li l-miżura proposta tiġi inkluża f’dan ir-Regolament.

(6)

Ir-rakkomandazzjoni konġunta dwar il-kaxxa tal-barbun tat-tbajja’ ssuġġeriet ukoll is-sostituzzjoni, fil-punt 2.2(c) tal-parti C tal-Anness V tar-Regolament (UE) 2019/1241, tat-terminu “xbieki tat-tkarkir tal-qiegħ” bit-terminu “xbieki tat-tkarkir tal-qiegħ bid-diriġenti”. L-STECF analizza l-evidenza ppreżentata mill-Istati membri u kkonkluda li l-bidla proposta x’aktarx li tneħħi kwalunkwe ambigwità fir-Regolament u tipprovdi livelli ta’ protezzjoni li huma mill-inqas ekwivalenti, u x’aktarx ogħla, għal dak li huwa attwalment preskritt fir-Regolament (UE) 2019/1241. Għalhekk jenħtieġ li l-miżura proposta tiġi inkluża f’dan ir-Regolament.

(7)

Ir-rakkomandazzjoni konġunta dwar il-kaxxa tal-barbun tat-tbajja’ ssuġġeriet ukoll massimu ta’ 24 m għat-tul tal-bastiment tat-tkarkir bit-travu li għandu jiġi inkluż, wara li japplika dan ir-Regolament, fil-lista ta’ bastimenti stabbilita fil-punt 2.4 tal-parti C tal-Anness V tar-Regolament (UE) 2019/1241. L-STECF analizza l-evidenza ppreżentata mill-Istati Membri u kkonkluda li din ir-restrizzjoni se tiżgura livelli ta’ protezzjoni li huma mill-inqas ekwivalenti għal dak li huwa attwalment preskritt fir-Regolament (UE) 2019/1241. Għalhekk jenħtieġ li l-miżura proposta tiġi inkluża f’dan ir-Regolament.

(8)

Ir-rakkomandazzjoni konġunta ppreżentata mill-Istati Membri dwar il-kaxxa tal-laċċ ikħal issuġġeriet li titkompla għal perjodu ta’ tliet snin il-prattika li titneħħa l-kaxxa tal-laċċ ikħal għall-bastimenti b’ċertu rkaptu mill-1 ta’ Lulju sal-31 ta’ Ottubru, kif previst bir-Regolament Delegat tal-Kummissjoni (UE) Nru 1395/2014 (4) għall-perjodu sal-31 ta’ Diċembru 2020. L-STECF analizza l-evidenza preżentata mill-Istati Membri dwar il-kaxxa tal-laċċ ikħal u kkonkluda li ma hemm l-ebda indikazzjoni li t-tneħħija tal-kaxxa tal-laċċ ikħal mill-2017 ikkawżat kwalunkwe ħsara fuq l-istokk tal-aringa. L-STECF ikkonkluda wkoll li huwa improbabbli li t-tneħħija tal-kaxxa tal-laċċ ikħal twassal għal livelli aktar baxxi ta’ protezzjoni minn dawk li hemm fis-seħħ bħalissa. Madankollu, l-STECF osserva li jeħtieġ aktar snin ta’ monitoraġġ sabiex tingħata prova li se jinżammu livelli ekwivalenti ta’ protezzjoni. L-STECF għalhekk issuġġerixxa li l-impatt tat-tneħħija jiġi evalwat mill-ġdid wara tliet snin ta’ monitoraġġ. L-Istati Membri impenjaw ruħhom li jimmonitorjaw l-impatt tat-tneħħija tal-kaxxa tal-laċċ ikħal matul dan il-perjodu billi jiġbru d-data stabbilita fir-rakkomandazzjoni konġunta tagħhom fir-rigward tal-qabdiet aċċessorji tal-aringi fis-sajd għal-laċċ ikħal. Din id-data se tiġi ppreżentata għall-evalwazzjoni mill-STECF. Għalhekk jenħtieġ li l-miżura proposta tiġi inkluża f’dan ir-Regolament.

(9)

Għalhekk jenħtieġ li r-Regolament (UE) 2019/1241 jiġi emendat skont dan.

(10)

Il-miżuri previsti f’dan ir-Regolament għandhom impatt dirett fuq l-ippjanar tal-istaġun tas-sajd tal-bastimenti tal-Unjoni u fuq l-attivitajiet ekonomiċi relatati, għalhekk jenħtieġ li dan ir-Regolament jidħol fis-seħħ minnufih wara l-pubblikazzjoni tiegħu,