ARRANĠAMENT

bejn l-Unjoni Ewropea u r-Repubblika tal-Islanda, il-Prinċipat tal-Liechtenstein, ir-Renju tan-Norveġja u l-Konfederazzjoni Svizzera dwar il-parteċipazzjoni ta’ dawk l-Istati fix-xogħol tal-kumitati li jassistu lill-Kummissjoni Ewropea fl-eżerċizzju tal-poteri eżekuttivi tagħha fir-rigward tal-implimentazzjoni, applikazzjoni u żvilupp tal-acquis ta’ Schengen

L-UNJONI EWROPEA,

u

IR-REPUBBLIKA TAL-ISLANDA,

minn hawn ’il quddiem imsejħa "l-Islanda",

IL-PRINĊIPAT TA’ LIECHTENSTEIN,

minn hawn ’il quddiem “Liechtenstein”,

IR-RENJU TAN-NORVEĠJA,

minn hawn ’il quddiem "in-Norveġja", u

Il-KONFEDERAZZJONI SVIZZERA,

minn hawn il-quddiem "l-Isvizzera",

Flimkien minn hawnhekk ’il quddiem imsejħa l-“Istati Assoċjati",

WARA LI KKUNSIDRAW il-Ftehim konkluż fit-18 ta’ Mejju 1999 mill-Kunsill tal-Unjoni Ewropea u r-Repubblika tal-Islanda u r-Renju tan-Norveġja li jikkonċerna l-assoċjazzjoni ta’ dawn l-Istati mal-implimentazzjoni, l-applikazzjoni u l-iżvilupp tal-acquis ta’ Schengen, minn hawn ’il quddiem imsejjaħ il-“Ftehim ta' Assoċjazzjoni mal-Islanda u man-Norveġja”,

WARA LI KKUNSIDRAW il-Ftehim iffirmat fis-26 ta’ Ottubru 2004, l-Unjoni Ewropea, il-Komunità Ewropea u l-Konfederazzjoni Svizzera dwar l-assoċjazzjoni tal-Konfederazzjoni Svizzera mal-implimentazzjoni, l-applikazzjoni u l-iżvilupp tal-acquis ta’ Schengen, minn issa ’l quddiem il-“Ftehim ta’ Assoċjazzjoni mal-Isvizzera",

WARA LI KKUNSIDRAW il-Protokoll iffirmat fit-28 ta’ Frar 2008 bejn l-Unjoni Ewropea, il-Komunità Ewropea, il-Konfederazzjoni Svizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein fil-Ftehim bejn l-Unjoni Ewropea, il-Komunità Ewropea u l-Konfederazzjoni Svizzera dwar l-assoċjazzjoni tal-Konfederazzoni Svizzera mal-implimentazzjoni, l-applikazzjoni u l-iżvilupp tal-acquis ta’ Schengen, minn hawn ’il quddiem “il-Protokoll ta’ Assoċjazzjoni mal-Liechtenstein”,

WARA LI KKUNSIDRAW il-Ftehim fil-forma ta’ skambju ta’ ittri konkluż fit-18 ta’ Mejju 1999 bejn il-Kunsill tal-Unjoni Ewropea u r-Repubblika tal-Islanda u r-Renju tan-Norveġja li jikkonċerna l-kumitati li jassistu lill-Kummissjoni Ewropea fl-eżerċizzju tal-poteri eżekuttivi tagħha,

WARA LI KKUNSIDRAW il-Ftehim fil-forma ta’ skambju ta’ ittri ffirmat fis-26 ta’ Ottubru 2004 bejn il-Kunsill tal-Unjoni Ewropea u l-Konfederazzjoni Svizzera dwar il-kumitati li jassistu lill-Kummissjoni Ewropea fl-eżerċizzju tal-poteri eżekuttivi tagħha,

WARA LI KKUNSIDRAW id-Dikjarazzjoni mal-Protokoll ta’ Assoċjazzjoni mal-Liechtenstein iffirmat fit-28 ta’ Frar 2008 dwar il-partiċipazzjoni fil-kumitati li jassistu lill-Kummissjoni Ewropea fl-eżerċizzju tal-poteri eżekuttivi tagħha,

BILLI KKUNSIDRAW LI l-atti jew il-miżuri l-ġodda tal-acquis ta’ Schengen addottati mill-Kummissjoni Ewropea, minn hawn ’il quddiem imsejħa l-"Kummissjoni", fl-eżerċizzju tal-poteri eżekuttivi tagħha, li għalihom il-proċeduri msemmija f’dan l-Arranġament ġew applikati, għandhom jiġu applikati simultanjament għall-Unjoni Ewropea u l-Istati Membri kkonċernati tagħha u għall-Istati Assoċjati,

BILLI KKUNSIDRAW il-bżonn li jiżguraw l-applikazzjoni u l-implimentazzjoni uniformi tal-atti jew miżuri l-ġodda tal-acquis ta’ Schengen li jirrikjedi l-partiċipazzjoni tal-Istati Assoċjati fix-xogħol tal-kumitati li jassistu lill-Kummissjoni fl-eżerċizzju tal-poteri eżekuttivi tagħha fejn id-deċiżjonijiet dwar l-atti jew miżuri li jikkostitwixxu żvilupp tal-acquis ta’ Schengen jittieħdu,

BILLI l-Ftehimiet ta’ Assoċjazzjoni ma jindirizzawx ir-regoli dettaljati tal-partiċipazzjoni tal-Istati Assoċjati fix-xogħol tal-kumitati li jassistu lill-Kummissjoni fl-eżerċizzju tal-poteri eżekuttivi tagħha fejn jittieħdu d-deċiżjonijiet dwar l-atti jew miżuri jikkostitwixxu żvilupp tal-acquis ta’ Schengen,

BILLI l-partiċepazzjoni tar-Repubblika tal-Islanda, tar-Renju tan-Norveġja u l-Prinċipat tal-Liechtenstein fil-Kumitat li jassisti lill-Kummissjoni fl-eżerċizzju tal-poteri eżekuttivi tagħha stabbiliti bid-Direttiva 95/46/KE tal-Parlament Ewropew u tal-Kunsill ta’ l-24 ta’ Ottubru, 1995 dwar il-protezzjoni ta’ individwi fir-rigward ta’ l-ipproċessar ta’ data personali u dwar il-moviment liberu ta’ dik id-data (1) hi stipulata fil-Ftehim dwar iż-Żona Ekonomika Ewropea, filwaqt li l-parteċipazzjoni tal-Konfederazzjoni Svizzera f’dan il-Kumitat hi mniżżla fl-iskambju tal-ittri annessi mal-Ftehim ta’ Assoċjazzjoni mal-Isvizzera,

FTIEHMU KIF ĠEJ:

Artikolu 1

Dan l-Arranġament japplika għall-atti jew miżuri li jemendaw jew jibnu fuq l-acquis ta’ Schengen addottat mill-Kummissjoni fl-eżerċizzju tal-poteri eżekuttivi tagħha fir-rigward tal-implimentazzjoni, l-applikazzjoni u l-iżvilupp tal-acquis ta’ Schengen.

Artikolu 2

1.   L-Istati Assoċjati għandhom ikunu assoċjati max-xogħol tal-kumitati li jassistu lill-Kummissjoni fl-eżerċizzju tal-poteri tagħha fir-rigward tal-implimentazzjoni, l-applikazzjoni u l-iżvilupp tal-acquis ta’ Schengen, minn hawn ’il quddiem imsejħa l-“kumitati tal-Komitoloġija ta’ Schengen”, imsemmija fl-Anness ta’ dan l-Arranġament.

2.   Meta att ġdid li jemenda jew jibni fuq l-acquis ta’ Schengen jistabbilixxi kumitat ġdid li jassisti lill-Kummissjoni fl-eżerċizzju tal-poteri eżekuttivi tagħha, l-Istati Assoċjati għandhom ikunu assoċjati max-xogħol ta’ dan il-kumitat mid-data tad-dħul fis-seħħ tal-att li jistabbilixxi lill-kumitat.

3.   Il-lista tal-kumitati tal-Komitoloġija ta’ Schengen għandha tiġi aġġornata regolarment mill-Kummissjoni u għandha tkun ippubblikata f’Il-Ġurnal Uffiċjali tal-Unjoni Ewropea.

Artikolu 3

1.   Ir-rappreżentanti tal-Istati Assoċjati għandhom ikunu assoċjati max-xogħol tal-kumitati tal-Komitoloġija ta’ Schengen kif spjegat f'dan l-Artikolu.

2.   Fil-kumitat tal-Komitoloġija ta’ Schengen, l-Istati Assoċjati għandhom ikollhom l-opportunità:

—	li jispjegaw il-problemi li jiltaqgħu magħhom rigward att jew miżura partikolari dwar l-implimentazzjoni, l-applikazzjoni jew l-żvilupp tal-acquis ta’ Schengen jew li jirreaġixxu għall-problemi li jiltaqgħu magħhom delegazzjonijiet oħra;

—	biex jesprimu rwieħhom fuq kwalunkwe kwistjoni li tirrigwarda l-abbozzar u l-iżvilupp ta' disposizzjonijiet li jikkonċernawhom jew l-implimentazzjoni tagħhom.

3.   L-Istati Assoċjati għandhom ikollhom id-dritt li jagħmlu suġġerimenti lill-kumitati tal-Komitoloġija ta’ Schengen. Wara diskussjoni, il-Kummissjoni tista’ tikkunsidra suġġerimenti bħal dawn bl-għan li tagħmel proposta jew tieħu inizjattiva.

4.   L-Istati Assoċjati m’għandhomx jipparteċipaw fil-votazzjoni tal-kumitati tal-Komitoloġija ta’ Schengen u għandhom jirtiraw meta l-Kumitat jgħaddi għall-vot.

5.   Meta jiġu msejħa l-laqgħat tal-kumitati tal-Komitoloġija ta’ Schengen, l-Istati Assoċjati għandhom jirċievu l-aġenda, il-miżuri abbozzati li fuqhom huma mitluba li jagħtu l-opinjoni u kull dokument ta' ħidma relevanti ieħor fl-istess żmien bħall-Istati Membri tal-UE.

6.   Il-prinċipji u l-kundizzjonijiet li jirrigwardaw l-aċċess pubbliku għad-dokumenti tal-kumitati tal-Komitoloġija ta’ Schengen għandhom ikunu l-istess bħal dawk li japplikaw għad-dokumenti tal-Kummissjoni (2).

7.   Għall-finijiet tal-applikazzjoni ta' dan l-Arranġament u meta jiġu stabbiliti l-aspetti proċedurali tal-kumitati tal-Komitoloġija ta’ Schengen, għandha ssir referenza għal dan l-Artikolu.

Artikolu 4

Meta jiġu abbozzati proposti li jemendaw jew jibnu fuq dispożizzjonijiet tal-acquis ta’ Schengen, il-Kummissjoni għandha tfittex informalment parir minn esperti tal-Istati Assoċjati bl-istess mod bħalma tfittex pariri minn esperti tal-Istati Membri tal-Unjoni Ewropea, minn hawn ’il quddiem imsejħa “Stati Membri”, sabiex jiġu mfassla l-proposti tagħha.

Artikolu 5

1.   L-adozzjoni ta’ atti ġodda jew miżuri li jikkostitwixxu żvilupp tal-acquis ta’ Schengen għandhom jiġu riżervati għall-istituzzjonijiet kompetenti tal-Unjoni Ewropea (3).

Suġġett għall-paragrafu 3,

—	dawk l-atti jew miżuri għandhom jidħlu fis-seħħ b’mod simultanju għall-Unjoni Ewropea u l-Istati Membri tagħha kkonċernati u l-Istati Assoċjati, sakemm dawk l-atti jew miżuri ma jipprovdux espliċitament mod ieħor.

—	l-aċċettazzjoni minn kull wieħed mill-Istati Assoċjati ta’ dawk l-atti jew miżuri toħloq drittijiet u obbligi bejn l-Istati Assoċjati minn naħa waħda, l-Unjoni Ewropea u dawk l-Istati Membri tagħha li huma marbutin b’dawk l-atti u miżuri, min-naħa l-oħra.

2.   L-adozzjoni tal-atti jew miżuri li hemm riferenza għalihom fil-paragrafu 1 li jkunu ġew applikati għalihom il-proċeduri stipulati f'dan l-Arranġament, għandhom jiġu nnotifikati lill-Istati Assoċjati.

L-adozzjoni ta’ atti jew miżuri msemmija fil-paragrafu 1 għandhom jiġu kkomunikati lill-Istati Assoċjati mis-Segretarjat Ġenerali tal-Kummissjoni, b’referenza għal dan l-Artikolu, jekk l-adozzjoni ta’ dawn l-atti jew miżuri hi notifikata lill-Istati Membri.

Jekk l-adozzjoni tal-atti jew miżuri msemmija fil-paragrafu 1 mhix notifikata lill-Istati Membri mis-Segretarjat Ġenerali tal-Kummissjoni, l-adozzjoni ta’ dawn l-atti jew miżuri għandha tiġi kkomunikata lill-Istati Assoċjati mid-Direttorat Ġenerali tal-Kummissjoni responsabbli għall-adozzjoni tal-atti jew miżuri kkonċernati, imsemmija f’dan l-Artikolu.

3.   Kull Stat Assoċjat għandu jiddeċiedi indipendentement jekk hux se jaċċetta l-kontenut tal-atti jew miżuri msemmija fil-paragrafu 1 u jekk hux se jimplimentahom fl-ordni legali interna tiegħu. Dawn id-deċiżjonijiet għandhom jiġu nnotifikati lill-Kummissjoni fi żmien 30 ġurnata mill-komunikazzjoni mill-Kummissjoni tal-atti jew miżuri kkonċernati.

Għall-aċċettazzjoni mill-Istati Assoċjati tal-atti u l-miżuri msemmija fil-paragrafu 1 u għall-konsegwenzi meta ma jkunux aċċettati, għandhom japplikaw id-dispożizzjonijiet li ġejjin:

—	L-Islanda u n-Norveġja — l-Artikolu 8 tal-Ftehim ta’ Assoċjazzjoni mal-Islanda u man-Norveġja;

—	L-Isvizzera — l-Artikolu 7 tal-Ftehim ta’ Assoċjazzjoni mal-Isvizzera;

—	Liechtenstein — l-Artikolu 5 tal-Protokoll ta’ Assoċjazzjoni mal-Liechtenstein.

Artikolu 6

1.   Fir-rigward tal-ispejjeż amministrattivi assoċjati mal-implimentazzjoni ta’ dan l-Arranġament, l-Istati Assoċjati għandhom jagħmlu kontribuzzjoni annwali lill-baġit ġenerali tal-Unjoni Ewropea skont il-persentaġġ tal-prodott gross domestiku ta’ pajjiżhom fir-rigward tal-prodott gross domestiku tal-Istati partiċipanti kollha ta’ ammont ta’ EUR 500 000, suġġett għal aġġustament annwali li jirrifletti r-rata ta’ inflazzjoni fl-Unjoni Ewropea.

L-ammont ta’ EUR 500 000 għandu jiġi aġġustat permezz ta’ skambju ta’ ittri jekk dan ikun meħtieġ mill-evoluzzjoni tan-numru tal-kumitati tal-Komitoloġija ta’ Schengen li fihom l-Istati Assoċjati jippartiċipaw jew mill-frekwenza tal-laqgħat.

2.   L-ispejjeż tal-ivvjaġġar tar-rappreżentanti li se jipparteċipaw fil-laqgħat ta’ dawn il-kumitati tal-Komitoloġija ta’ Schengen m’għandhomx jiġu rimborsati.

Artikolu 7

1.   Is-Segretarju Ġenerali tal-Kunsill tal-Unjoni Ewropea għandu jservi bħala depożitarju ta' dan l-Arranġament.

2.   L-Unjoni Ewropea u l-Istati Assoċjati għandhom japprovaw dan l-Arranġament skont il-proċeduri tagħhom stess.

3.   Id-dħul fis-seħħ ta’ dan l-Arranġament jeħtieġ l-approvazzjoni tal-Unjoni Ewropea u ta' mill-anqas Stat Assoċjat ieħor.

4.   Dan l-Arranġament għandu jidħol fis-seħħ bejn l-Unjoni Ewropea u l-Istat Assoċjat ikkonċernat fl-ewwel ġurnata tat-tieni xahar wara d-depożitu tal-istrument rispettiv ta’ approvazzjoni jew ratifika mad-depożitarju.

5.   Fir-rigward tal-Liechtenstein, dan l-Arranġament jidħol fis-seħħ biss ladarba l-Protokoll ta’ Assoċjazzjoni mal-Liechtenstin jidħol fis-seħħ.

Artikolu 8

1.   Fir-rigward tan-Norveġja u l-Islanda, dan l-Arranġament għandu jiġi terminat meta l-Ftehim ta’ Assoċjazzjoni rispettiv mal-Islanda u n-Norveġja jiġi terminat.

2.   Fir-rigward tal-Isvizzera, dan l-Arranġament għandu jiġi terminat meta l-Ftehim ta’ Assoċjazzjoni mal-Isvizzera jiġi terminat.

3.   Fir-rigward tal-Liechtenstein, dan l-Arranġament għandu jiġi terminat meta l-Ftehim ta’ Assoċjazzjoni mal-Liechtenstein jiġi terminat.

4.   Id-depożitarju għandu jiġi nnotifikat bit-terminazzjoni.

Artikolu 9

Dan l-Arranġament u d-Dikjarazzjoni Konġunta huma mfassla f’test oriġinali waħdani bil-lingwa Bulgara, Ċeka, Daniża, Olandiża, Ingliża, Estonjana, Finlandiża, Franċiża, Ġermaniża, Griega, Ungeriża, Taljana, Latvjana, Litwana, Maltija, Pollakka, Portugiża, Rumena, Slovakka, Slovena, Spanjola, Żvediża, Islandiża u Norveġiża, b’kull test ugwalment awtentiku.

---

(1)  ĠU L 281, 23.11.1995, p. 31. (MT: Edizzjoni Speċjali bil-Malti: Kap 13, Vol 015, p. 355).

(2)  Ir-Regolament (KE) Nru 1049/2001 tal-Parlament Ewropew u tal-Kunsill tat-30 ta' Mejju 2001 dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni (ĠU L 145, tal-31.5.2001, p. 43).

(3)  Fiż-żmien tal-iffirmar ta’ dan l-Arranġament dawn l-atti jew miżuri huma adottati mill-Kummissjoni skont ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13) jew huma adottati skont l-Artikolu 5a tad-Deċiżjoni tal-Kunsill 1999/468/KE tat-28 ta’ Ġunju 1999 li tipprovdi l-proċeduri għall-eżerċizzju tal-poteri tal-implimentazzjoni konferiti fuq il-Kummissjoni (ĠU L 184, 17.7.1999, p. 23) kif l-aħħar emendat mid-Deċiżjoni tal-Kunsill 2006/512/KE tas-17 ta’ Lulju 2006 (ĠU L 200, 22.7.2006, p. 11).

DIKJARAZZJONI KONĠUNTA MILL-PARTIJIET KONTRAENTI DWAR L-ASSOĊJAZZJONI SPEĊIFIKA MAL-IMPLIMENTAZZJONI, APPLIKAZZJONI U ŻVILUPP TAL-ACQUIS TA’ SCHENGEN

Il-Partijiet Kontraenti jiddikjaraw b’mod konġunt li l-assoċjazzjoni speċifika tar-Repubblika tal-Islanda, il-Prinċipat tal-Liechtenstein, ir-Renju tan-Norveġja u l-Konfederazzjoni Svizzera mal-implimentazzjoni, l-applikazzjoni u l-iżvilupp tal-acquis ta’ Schengen m’għandhiex tiġi meqjusa bħala preċedent legali jew politiku għal kull qasam ta’ kooperazzjoni ieħor bejn l-Unjoni Ewropea u dawk l-Istati.