EUR-Lex Access to European Union law
This document is an excerpt from the EUR-Lex website
Document C_202404666
Opinion of the European Economic and Social Committee – Communication from the Commission to the European Parliament, the Council, the European Economic and Social Committee and the Committee of the Regions Towards an ambitious Industrial Carbon Management for the EU (COM(2024) 62 final)
Opinjoni tal-Kumitat Ekonomiku u Soċjali Ewropew — Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni Lejn Ġestjoni Industrijali tal-Karbonju ambizzjuża għall-UE (COM(2024) 62 final)
Opinjoni tal-Kumitat Ekonomiku u Soċjali Ewropew — Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni Lejn Ġestjoni Industrijali tal-Karbonju ambizzjuża għall-UE (COM(2024) 62 final)
EESC 2024/00878
ĠU C, C/2024/4666, 9.8.2024, ELI: http://data.europa.eu/eli/C/2024/4666/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
Il-Ġurnal Uffiċjali |
MT Is-serje C |
C/2024/4666 |
9.8.2024 |
Opinjoni tal-Kumitat Ekonomiku u Soċjali Ewropew
Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni Lejn Ġestjoni Industrijali tal-Karbonju ambizzjuża għall-UE
(COM(2024) 62 final)
(C/2024/4666)
Relatur:
Gonçalo LOBO XAVIERKorelatur:
Jean-Michel POURTEAU
Konsultazzjoni |
Kummissjoni Ewropea, 27.3.2024 |
Bażi legali |
Artikolu 304 tat-Trattat dwar il-Funzjonament tal-Unjoni Ewropea |
Sezzjoni kompetenti |
Kummissjoni Konsultattiva dwar il-Bidliet Industrijali |
Adozzjoni fis-sezzjoni |
15.5.2024 |
Adozzjoni fis-sessjoni plenarja |
30.5.2024 |
Sessjoni plenarja Nru |
588 |
Riżultat tal-votazzjoni (favur/kontra/astensjonijiet) |
193/4/2 |
1. Konklużjonijiet u rakkomandazzjonijiet
1.1. |
Il-Kumitat Ekonomiku u Soċjali Ewropew (KESE) jemmen li l-Istrateġija għall-Ġestjoni Industrijali tal-Karbonju hija, b’mod ġenerali, dokument milqugħ b’sodisfazzjon kbir kif ukoll ibbilanċjat li jkopri ħafna elementi li huma kruċjali biex il-qbid u l-ħżin tal-karbonju (CCS) u l-qbid u l-użu tal-karbonju (CCU) jiġu applikati fuq skala industrijali fl-UE. Dan l-approċċ għall-istabbiliment ta’ regoli dwar il-ħżin, il-loġistika u t-trasport, l-infrastruttura u r-regolazzjoni/s-suq għall-ġestjoni tal-karbonju matul dan id-deċennju sabiex jinbnew il-pedamenti għal suq uniku fil-karbonju, huwa ġġustifikat bis-sħiħ. |
1.2. |
Il-KESE jiġbed l-attenzjoni dwar il-ħtieġa li jintlaħqu l-miri fattibbli għall-kapaċità ta’ ħżin ta’ CO2 fl-Ewropa: 50 miljun tunnellata sal-2030, 250 miljun tunnellata sal-2040, u 450 miljun tunnellata sal-2050. Fil-fehma tal-KESE, l-UE għandha tieħu passi effiċjenti biex tiżgura biżżejjed kapaċità ta’ ħżin ta’ CO2 f’ħafna Stati Membri, għall-ġid tal-komunità kollha. Din hija r-raġuni għaliex il-KESE jaqbel li kull Stat Membru għandu jipprovdi ħarsa ġenerali tas-siti ġeoloġiċi tiegħu adatti għall-ħżin tal-karbonju sabiex jiġu indirizzati aħjar l-isfidi inkwistjoni. |
1.3. |
Il-KESE jaqbel li għandu jkun hemm komunikazzjoni aħjar dwar il-miri, flimkien ma’ aġġornament effiċjenti tad-data meħtieġa għal proċess effettiv tat-teħid tad-deċiżjonijiet. Hemm diversi miri għall-volumi ta’ CO2 li għandhom jinqabdu, jinħażnu u/jew jintużaw mill-ġdid (stadji importanti tal-2030, l-2040, u l-2050). Il-KESE jissuġġerixxi li jkun hemm aġġornamenti regolari dwar l-iżviluppi f’dan il-qasam, dwar il-livelli ta’ tħejjija teknoloġika, kif ukoll dwar il-kapaċità ta’ ħżin ta’ CO2. Dan se jippermetti li l-ekosistema kollha tiġi integrata aħjar. |
1.4. |
Il-KESE jaqbel bis-sħiħ li l-iżvilupp tal-Ewropa għandu jkun ibbażat ukoll fuq proċess nadif ta’ riindustrijalizzazzjoni. Il-ġestjoni industrijali tal-karbonju għandha titqies bħala opportunità oħra għall-Istati Membri biex itejbu l-kwalità tal-impjiegi u jagħtu spinta lit-tkabbir b’mod sostenibbli. Il-KESE jiġbed l-attenzjoni dwar il-ħtieġa li l-istrateġiji għall-ġestjoni tal-karbonju jitfasslu apposta għal setturi industrijali speċifiċi (bħal dawk tal-impjanti tal-enerġija, l-azzar, is-siment u l-kimika), waqt li jitqiesu l-profili tal-emissjonijiet uniċi u r-rekwiżiti teknoloġiċi tagħhom. Għal dan l-għan, hija meħtieġa kollaborazzjoni kif ukoll strateġija ta’ sħubija sabiex titrawwem il-kooperazzjoni bejn l-istituzzjonijiet tar-riċerka, l-akkademja u organizzazzjonijiet pubbliċi u privati oħra u b’hekk jiġu sfruttati l-għarfien espert u r-riżorsi. |
1.5. |
Il-KESE jsostni li huwa fundamentali wkoll li jiġu identifikati l-ostakli li jfixklu l-implimentazzjoni effettiva tal-prattiki eżistenti tal-ġestjoni tal-karbonju f’ambjenti industrijali, sabiex il-bidliet jiġu implimentati faċilment u biex jiġu definiti l-istrateġiji. |
1.6. |
Għall-KESE, jidher ċar li l-UE teħtieġ strateġija industrijali għall-karbonju li mhux biss timplimenta l-Patt Ekoloġiku iżda tiżgura wkoll impjiegi ta’ kwalità u tranżizzjoni ġusta għall-ħaddiema, kif ukoll tidentifika skarsezzi potenzjali ta’ ħaddiema u ħiliet. Għal dan l-għan, bl-istess mod huwa meħtieġ li jitkompla l-investiment fit-taħriġ mill-ġdid u fit-titjib tal-ħiliet tal-forza tax-xogħol, b’objettiv doppju: l-ewwel nett, li tiżdied l-attraenza tal-karriera fl-industrija; it-tieni, li dan jiġi kkombinat ma’ għarfien sostenibbli sabiex jinħoloq proċess ta’ kwalità għolja u sikur u biex l-intrapriżi tal-industrija jsiru aktar kompetittivi u sostenibbli. L-Istati Membri għandhom jaħdmu mal-imsieħba soċjali biex jivvalutaw l-impatt fuq l-impjieg. |
1.7. |
Il-KESE japprova l-azzjoni tal-Kummissjoni li tappoġġja proġetti ta’ infrastruttura transfruntiera għat-trasport tas-CO2. Huwa importanti li jiġu mmappjati l-konnessjonijiet fiżiċi u tal-fluss tad-data bejn il-pajjiżi. |
1.8. |
Il-KESE jirrakkomanda li jkun hemm pjan ta’ investiment ċar li jiddeskrivi kull sors ta’ finanzjament għall-iżvilupp tat-teknoloġiji tas-CCS/CCU. Kwalunkwe finanzjament pubbliku għandu jkollu mekkaniżmu ta’ kundizzjonalità soċjali mmirat lejn il-ħolqien u ż-żamma ta’ impjiegi ta’ kwalità. |
1.9. |
Il-KESE jemmen li l-proġetti ta’ tnaqqis tal-karbonju għandhom jinvolvu kemm l-assorbiment tal-karbonju kif ukoll l-evitar tal-karbonju. Madankollu, iqis li l-evitar tal-karbonju bħalissa mhuwiex appoġġjat biżżejjed fil-livell tal-UE, waqt li l-investimenti f’soluzzjonijiet għall-evitar tal-karbonju diġà taw riżultati ta’ suċċess fl-utilitajiet, it-trasport u t-tisħin. Għalhekk, il-KESE jirrakkomanda li tiġi stabbilita skema ta’ krediti ġdida, separata, imfassla tajjeb, b’integrità għolja u robusta għall-evitar tal-karbonju b’metodoloġiji adatti li għad iridu jiġu żviluppati. Il-KESE jqis li l-krediti mill-evitar tal-karbonju joffru inċentivi għad-dekarbonizzazzjoni u jipprovdu finanzjament għal proġetti b’emissjonijiet żero. Fl-istess ħin, il-KESE jiġbed l-attenzjoni għall-fatt li l-kwoti tas-sistema tal-UE għall-iskambju ta’ kwoti tal-emissjonijiet (ETS) m’għandhomx jintużaw bħala “krediti”, peress li dan jista’ jdgħajjef in-natura tas-sistema tal-UE għall-iskambju tal-karbonju li attwalment hija bbażata fuq is-suq. |
1.10. |
Il-KESE jħoss li għandu jiġi nnotat ukoll li, minħabba l-prezzijiet tas-suq tal-karbonju, l-evitar tal-emissjonijiet tal-karbonju jista’ jkun sors ta’ introjtu addizzjonali. Emittenti ta’ emissjonijiet baxxi bi krediti tal-karbonju żejda jistgħu jbigħu emissjonijiet “mhux użati” lil emittenti ta’ emissjonijiet għoljin. Dan il-mekkaniżmu tas-suq għalhekk jagħmilha possibbli li jinħarġu krediti tal-karbonju bħala forma ta’ finanzjament għal proġetti futuri b’emissjonijiet baxxi. |
1.11. |
Fl-aħħar nett, hemm proġetti tas-CCS/CCU li huma mmirati b’mod ċar lejn l-assorbiment tal-karbonju. L-evitar tal-karbonju huwa perkors ieħor għad-dekarbonizzazzjoni u l-KESE jemmen li dan huwa rilevanti ħafna. Il-KESE jappella għal approċċ bilanċjat u raġonevoli li jista’ jieħu l-aħjar minn żewġ dinjiet komplementari: l-evitar tal-karbonju u l-assorbiment tal-karbonju. |
2. Kummenti ġenerali
2.1. |
Fi żmien ta’ tibdil kbir u sfidi ewlenin, ma’ hemm l-ebda dubju li l-Ewropa teħtieġ politika b’saħħitha biex tgħin lill-industrija tagħha tirkupra. Il-pjani suċċessivi ta’ riindustrijalizzazzjoni ma rnexxielhomx jilħqu l-għanijiet tagħhom u issa l-Ewropa qed tiffaċċja sitwazzjoni kritika li, meta titqies flimkien mal-objettivi u l-miri tal-istrateġija tal-Patt Ekoloġiku tal-UE, tirrikjedi rispons immedjat. |
2.2. |
Il-ħtieġa li tittieħed azzjoni hija saħansitra aktar urġenti fid-dawl tar-rekwiżiti tat-tranżizzjoni doppja ekoloġika u diġitali, inkluża d-dimensjoni soċjali tagħha; l-industrija u l-politika Ewropea issa jeħtieġ jgħaqqdu l-innovazzjoni, il-prestazzjoni u l-kompetittività mas-sostenibbiltà. Il-miri ġew definiti, u l-Patt Klimatiku Ewropew li tnieda mill-Kummissjoni Ewropea bħala parti mill-Patt Ekoloġiku Ewropew għandu l-għan li jgħin lill-UE tilħaq il-mira tagħha li ssir newtrali għall-klima sal-2050. |
2.3. |
L-isfida hija waħda reali: l-attivitajiet industrijali jikkontribwixxu b’mod sinifikanti għall-emissjonijiet tal-karbonju f’livell globali, u l-UE hija waħda miċ-ċentri industrijali prinċipali. Għal dan l-għan, minkejja l-isforzi li saru s’issa biex jitnaqqsu l-emissjonijiet tal-karbonju, l-industrija għandha rwol ewlieni fil-proċess u huma meħtieġa sforzi estremi biex jintlaħqu l-miri proposti mill-UE. |
2.4. |
Hemm diversi miri għall-volumi ta’ CO2 li għandhom jinqabdu, jinħażnu u/jew jintużaw mill-ġdid (stadji importanti tal-2030, l-2040, u l-2050). Il-KESE jissuġġerixxi li jkun hemm aġġornamenti regolari dwar l-iżviluppi f’dan il-qasam, dwar il-livelli ta’ tħejjija teknoloġika, kif ukoll dwar il-kapaċità ta’ ħżin ta’ CO2. |
2.5. |
Għandha tingħata attenzjoni partikolari dwar il-ħtieġa li jintlaħqu l-miri fattibbli għall-kapaċità ta’ ħżin ta’ CO2 annwali fl-Ewropa: 50 miljun tunnellata sal-2030, 250 miljun tunnellata sal-2040, u 450 miljun tunnellata sal-2050. Fil-fehma tal-KESE, l-UE għandha tieħu passi effiċjenti biex tiżgura biżżejjed kapaċità ta’ ħżin ta’ CO2 f’ħafna Stati Membri. Din hija r-raġuni għaliex il-KESE jaqbel li kull Stat Membru għandu jipprovdi ħarsa ġenerali tas-siti ġeoloġiċi tiegħu adatti għall-ħżin tal-karbonju. |
2.6. |
Il-qbid tal-karbonju huwa għodda meħtieġa biex jintlaħqu l-miri klimatiċi tal-Ewropa u biex tinżamm il-kompetittività industrijali. Fl-istess ħin, huwa essenzjali li l-ambitu tal-użu tas-CCS ma jiġix estiż iżżejjed u li jkun immirat lejn l-aktar setturi diffiċli biex jitrażżnu. Dan huwa meħtieġ biex jiġi evitat l-intrappolament f’użu fit-tul tal-fjuwils fossili meta jkunu jeżistu alternattivi fi kwantitajiet biżżejjed biex jissodisfaw id-domanda. F’ħafna każijiet, l-elettrifikazzjoni, il-miżuri tal-effiċjenza enerġetika u l-fjuwils rinnovabbli huma opzjonijiet aktar kosteffettivi għad-dekarbonizzazzjoni. L-użu tas-CCS jeħtieġ investiment u enerġija. Għalhekk jenħtieġ li t-tranżizzjoni lil hinn mill-fjuwils fossili fil-proċessi industrijali tkun l-għażla prestabbilita, u l-qbid tal-karbonju jkun immirat lejn dawk l-użi fejn l-alternattivi ma jkunux vijabbli. |
2.7. |
Sabiex l-affarijiet isiru, il-KESE jappella għal approċċ ibbilanċjat, waqt li jitqiesu wkoll l-iżviluppi fil-proċess u d-data miġbura fil-qafas tal-politiki attwali. Fl-istess ħin, huwa assolutament meħtieġ isir rieżami tal-politiki eżistenti tal-UE relatati mal-ġestjoni tal-karbonju fis-setturi industrijali, inklużi skemi għall-iskambju ta’ kwoti tal-emissjonijiet u mekkaniżmi tal-ipprezzar tal-karbonju. Huwa essenzjali wkoll li jiġu identifikati ostakli li jipperikolaw l-implimentazzjoni effettiva tal-prattiki attwali tal-ġestjoni tal-karbonju f’ambjenti industrijali. |
2.8. |
Sabiex l-industrija kompetittiva tiġi kkombinata mas-sostenibbiltà huma meħtieġa riżorsi umani edukati, bi tmexxija b’saħħitha u alleanzi b’saħħithom (ħaddiema, kumpaniji, imsieħba soċjali b’mod ġenerali). Il-KESE tkellem ħafna dwar il-ħtieġa li jitkompla l-investiment fit-taħriġ mill-ġdid u fit-titjib tal-ħiliet tal-forza tax-xogħol, b’objettivi doppji: l-ewwel nett, li tiżdied l-attraenza tal-karriera fl-industrija; it-tieni, li dan jiġi kkombinat ma’ għarfien sostenibbli sabiex l-intrapriżi tal-industrija jsiru aktar kompetittivi u sostenibbli. |
2.9. |
Huwa naturali li l-ekosistema kollha tkun involuta fit-tfassil tal-istrateġiji u l-miżuri għall-implimentazzjoni ta’ ġestjoni industrijali ambizzjuża tal-karbonju fl-UE. Is-soċjetà ċivili organizzata tista’ u jeħtiġilha tkun involuta. |
2.10. |
Il-KESE jemmen li t-tmexxija bl-eżempju hija importanti ħafna u għalhekk jappella għal komunikazzjoni u kondiviżjoni tal-għarfien aħjar, b’enfasi fuq eżempji ta’ inizjattivi ta’ ġestjoni tal-karbonju li rnexxew fl-UE. |
2.11. |
Bl-istess raġunament, l-UE jeħtiġilha tinkoraġġixxi u tippromovi proġetti ta’ riċerka u żvilupp dwar teknoloġiji tal-qbid, l-użu u l-ħżin tal-karbonju ffukati fuq l-industrija, bl-għan li jsiru aktar kosteffettivi u skalabbli. |
2.12. |
Il-KESE jiġbed l-attenzjoni wkoll dwar il-ħtieġa li l-istrateġiji għall-ġestjoni tal-karbonju jitfasslu apposta għal setturi industrijali speċifiċi, fid-dawl tal-profili tal-emissjonijiet uniċi u r-rekwiżiti teknoloġiċi speċifiċi tagħhom. Għal dan l-għan, hija meħtieġa kollaborazzjoni kif ukoll strateġija ta’ sħubija sabiex titrawwem il-kollaborazzjoni bejn l-istituzzjonijiet tar-riċerka, l-akkademja u organizzazzjonijiet pubbliċi u privati oħra sabiex jiġu sfruttati l-għarfien espert u r-riżorsi. |
2.13. |
Il-KESE jemmen li kull Stat Membru għandu jsawwar l-istrateġija proprja tiegħu allinjata mal-prinċipji tal-UE, iżda l-UE għandha tikkoordina biex tara jekk hemmx livell adatt ta’ impenn u jridu jiġu kondiviżi l-prattiki tajbin. |
3. Kummenti speċifiċi
3.1. |
Il-Patt Ekoloġiku tal-UE stabbilixxa miri ambizzjużi biex jitnaqqsu l-emissjonijiet tal-gassijiet serra: - 55 % sal-2030, u n-newtralità klimatika sal-2050. Sabiex jintlaħqu dawn l-għanijiet, speċjalment għall-emissjonijiet tas-CO2, it-teknoloġiji magħrufa bħala CCS (qbid u ħżin tal-karbonju) u CCU (qbid u użu tal-karbonju) għandhom jintużaw biex jindirizzaw l-emissjonijiet “diffiċli biex jitrażżnu”, jiġifieri fejn it-tnaqqis tal-emissjonijiet permezz tal-effiċjenza enerġetika u tal-effiċjenza tal-proċess ma jkunx biżżejjed biex jintlaħqu l-miri ta’ mitigazzjoni. |
3.2. |
Huwa meħtieġ li ssir distinzjoni ċara fir-regolament bejn is-CO2 li joriġina minn fjuwils fossili (jiġifieri CO2 li xi darba kien fl-art f’depożiti ta’ faħam, gass naturali jew żejt) u CO2 bijoġeniku (jiġifieri CO2 diġà fl-atmosfera u sekwestrat fil-bijomassa permezz tal-fotosintesi). Il-qbid tas-CO2 ibbażat fuq il-fossili jista’ jwassal biex l-emissjonijiet jiġu evitati, iżda l-qbid tas-CO2 bijoġeniku jista’ jiġġenera impatt pożittiv nett reali għall-klima permezz tat-tneħħija permanenti tal-karbonju permezz ta’ bjar teknoloġiċi u tneħħija fit-tul permezz tal-użu fi prodotti bħall-polimeri; dan jista’ jipprovdi wkoll sors sostenibbli ta’ CO2 għal kimiċi, polimeri u fjuwils. |
3.3. |
Għandu jiġi nnotatat li, minbarra l-formazzjonijiet ġeoloġiċi, jista’ jkun hemm teknoloġiji oħra li jipprovdu ħżin permanenti tal-karbonju, bħall-mineralizzazzjoni. |
3.4. |
Minbarra l-ħżin, is-CO2 huwa materja prima kruċjali li hija meħtieġa, pereżempju, fl-industrija kimika u fil-produzzjoni tax-xarbiet. Parti importanti minn strateġija Ewropea għall-ġestjoni tal-karbonju għandha tkun li tissostitwixxi d-domanda industrijali tas-CO2 b’sorsi ċirkolari u sostenibbli. L-użu tal-karbonju ċirkolari għandu jiġi inċentivat. |
3.5. |
Filwaqt li l-qbid u l-ħżin tas-CO2 ibbażat fuq il-fossili diġà huwa rikonoxxut fid-Direttiva dwar l-Iskema għall-Iskambju ta’ Kwoti tal-Emissjonijiet (ETS), bħalissa ma hemm l-ebda inċentiv għall-qbid tas-CO2 bijoġeniku. Għalhekk, l-istabbiliment ta’ inċentivi għall-qbid, il-ħżin u l-użu tas-CO2 bijoġeniku għandu jkun prijorità. Għażla waħda hija li l-qbid tas-CO2 bijoġeniku jintrabat mal-ETS billi, pereżempju, jiġu ġġenerati kwoti ġodda permezz tal-assorbimenti. |
3.6. |
Bosta industriji tal-manifattura għandhom emissjonijiet tas-CO2: impjanti tal-enerġija taż-żejt u tal-gass, impjanti tal-enerġija li jaħdmu bil-faħam/linjite, impjanti li jipproduċu l-ħadid u l-azzar, impjanti li jagħmlu s-siment, l-industrija kimika, impjanti tal-enerġija tal-bijomassa u li jaħdmu bl-iskart, u impjanti tal-fertilizzanti. Minkejja li bħalissa qed jaħdmu fuq proċessi ġodda mingħajr karbonju, dawn is-setturi (li jiġġeneraw 20 % tal-emissjonijiet globali tas-CO2 fl-UE) se jiddependu ħafna mit-teknoloġiji tal-assorbiment tal-karbonju biex inaqqsu drastikament l-emissjonijiet tas-CO2 tagħhom. Id-dekarbonizzazzjoni tal-industrija mhijiex meħtieġa biss għall-ġlieda kontra t-tisħin globali, iżda wkoll pass kruċjali lejn l-eliminazzjoni gradwali tad-dipendenza tagħna mill-fjuwils fossili. |
3.7. |
Fil-proċess tas-CCS, is-CO2 jiġi sseparat minn sorsi industrijali u wara jiġi separat permezz ta’ diversi sottoteknoloġiji: assorbiment, adsorbiment, membrani, ċikli ta’ temperatura għolja (high temperature looping) u, aktar reċentement, qbid dirett mill-arja (fejn is-CO2 jiġi separat direttament mill-arja). Is-CO2 imbagħad jiġi kkompressat biex jiġi ttrasportat lejn postijiet oħra, l-aktar permezz ta’ pipelines iżda possibbilment ukoll permezz ta’ trakkijiet, ferroviji jew vapuri. L-aħħar pass huwa l-ħżin f’siti ġeoloġiċi fuq l-art u lil hinn mill-kosta: f’formazzjonijiet salmastri (pereżempju fi Sleipner tan-Norveġja fil-Baħar tat-Tramuntana, sa mill-1996) jew f’saffi tal-faħam li ma jistgħux jiġu estratti. Il-monitoraġġ ta’ kif id-dijossidu tal-karbonju jaġixxi fl-istrata ġeoloġiċi huwa mbagħad essenzjali biex tiġi żgurata l-permanenza ta’ din il-forma ta’ tnaqqis tal-emissjonijiet. |
3.8. |
L-ewwel stadji tal-proċess tas-CCU huma l-istess bħal dawk tas-CCS, iżda l-għan aħħari mhuwiex li s-CO2 jinħażen b’mod permanenti. Minflok, id-diossidu tal-karbonju maqbud jiġi kkonvertit f’sustanzi jew prodotti ta’ valur bħalma huma: sustanzi kimiċi u materjali polimeriċi (plastik, konkrit), alkoħols, u idrokarburi u derivattivi. Minħabba l-potenzjal konsiderevoli marbut mas-CCU, hemm interess dejjem akbar f’diversi oqsma relatati (eż. jista’ jikkostitwixxi lieva għad-dekarbonizzazzjoni tas-setturi tal-avjazzjoni u tat-tbaħħir bi fjuwils sintetiċi). |
3.9. |
Fir-rigward tal-introduzzjoni tal-infrastruttura tat-trasport, għandhom jiġu definiti regoli dwar is-saħħa u s-sikurezza relatati mal-kundizzjonijiet tax-xogħol speċifiċi għal dan il-qasam, u għandu jissaħħaħ id-djalogu kostruttiv bejn l-imsieħba soċjali. |
3.10. |
Il-ħolqien ta’ impjiegi ġodda fit-teknoloġiji tas-CCS/CCU se jirrikjedi taħriġ adegwat permezz tal-edukazzjoni u t-taħriġ vokazzjonali (VET) u t-titjib tal-ħiliet tal-ħaddiema, l-inġiniera, kif ukoll skemi ta’ taħriġ nazzjonali. |
3.11. |
Sabiex jiġu implimentati dawn il-proġetti tas-CCS/CCU, il-partijiet ikkonċernati kollha għandhom ikunu involuti minn kmieni fil-proċess: industrijalisti, awtoritajiet pubbliċi, soċjetà ċivili, NGOs u unions. Dan se jkun kruċjali għall-aċċettazzjoni soċjali. Se jkun meħtieġ li dawk li jfasslu l-politika fil-livell lokali u nazzjonali jitlaqqgħu flimkien man-negozji u atturi tas-soċjetà bħat-trade unions, l-NGOs ambjentali u r-rappreżentanti tal-komunitajiet lokali, sabiex jipparteċipaw fi djalogu trasparenti dwar l-interessi u l-benefiċċji tal-proġetti tas-CCS/CCU. Tali bidla fi ħdan il-kumpaniji industrijali affettwati mis-CCS/CCU titlob tranżizzjoni ġusta fejn ħadd ma jitħalla jibqa’ lura. Id-djalogu soċjali rispettuż mal-unions għandu jiżgura li jiġi offrut taħriġ adatt lill-ħaddiema li jeħtieġu taħriġ mill-ġdid. |
3.12. |
Il-KESE jemmen li l-kampanji ta’ sensibilizzazzjoni tal-pubbliku jeħtieġ jiżguraw li n-nies jifhmu x’inhuma l-konsegwenzi iżda wkoll li jikkondividu l-għarfien u jipprovdu ħarsa ġenerali tal-emissjonijiet tas-CO2 attwali. |
3.13. |
Il-KESE jinnota n-nuqqas ta’ approċċ effiċjenti fl-użu tal-enerġija għat-teknoloġiji tal-qbid tal-karbonju. Fil-fatt il-kost ta’ dan il-proċess intensiv fl-enerġija ma għandux jiġix sottovalutat u għandu jiġi allinjat mal-Pjan REPowerEU. |
3.14. |
L-iskema attwali tal-UE għall-iskambju ta’ kwoti tal-emissjonijiet għandha l-għan li tnaqqas l-emissjonijiet kollha billi tkejjilhom. Fit-teknoloġiji tas-CCU, il-karbonju maqbud jerġa’ jintuża, u għalhekk ma għandux jingħadd darbtejn (l-ewwel bħala emissjoni inizjali, imbagħad meta jiġi rilaxxat mill-ġdid fi proċess ġdid). |
4. Qafas finanzjarju
4.1. |
Bħalissa l-ispejjeż tas-CCS/CCU huma kbar, u għan-negozji mhumiex vijabbli mingħajr krediti tat-taxxa, finanzjament pubbliku jew self. It-tnaqqis fl-ispejjeż jista’ jinkiseb meta t-teknoloġiji jiġu implimentati b’mod wiesa’ u ladarba jiġu introdotti l-infrastrutturi tat-trasport (pipelines). L-istimi tal-kostijiet ivarjaw ħafna bl-inċertezza tal-prezz futur tas-CO2. |
4.2. |
Il-finanzjament allokat għas-CCS/CCU għandu jiġi ttikkettat bħala tali fid-dettall u jitqiegħed f’perspettiva fir-rigward tal-finanzjament ġenerali għall-Pjan Industrijali tal-Patt Ekoloġiku. |
4.3. |
Stimi inizjali tal-ispejjeż biex jintlaħqu l-miri tal-2030 jinkludu: investiment ta’ EUR 3 biljun meħtieġ għall-iżvilupp ta’ siti tal-ħżin; bejn EUR 6 u 9 biljun meħtieġa għall-infrastruttura tat-trasport; u bejn EUR 13 sa 103/tunnellata meħtieġa għall-qbid tas-CO2 fl-lokalità tas-sors (1). Il-KESE jirrakkomanda li jkun hemm pjan ta’ investiment ċar li jiddeskrivi kull sors ta’ finanzjament għall-iżvilupp tat-teknoloġiji tas-CCS/CCU. Kwalunkwe finanzjament pubbliku għandu jkollu mekkaniżmu ta’ kundizzjonalità soċjali mmirat lejn il-ħolqien u ż-żamma ta’ impjiegi ta’ kwalità. Għalhekk, il-KESE jilqa’ kwalunkwe skema li tista’ tiggwida l-innovazzjoni u r-riżorsi lejn din il-bidla kritika. Dan jinkludi:
|
4.4. |
Kwistjoni partikolari tal-finanzjament għas-CCS/CCU huwa li jkun meħtieġ biex ikopri partijiet differenti tal-katina tal-valur kollha: is-sors tal-emissjonijiet, il-qbid, it-trasport, il-ħżin u l-użu. Kwistjoni oħra hija l-argument tal-vijabbiltà għal dawn il-proċessi, skont il-prezz tal-karbonju fl-ETS tal-UE. |
4.5. |
Il-biċċa l-kbira tal-investiment meħtieġ biex jiġu implimentati dawn it-teknoloġiji ġodda u nodfa għall-qbid u l-użu mill-ġdid tal-karbonju huwa mistenni li jiġi mis-settur privat fis-snin li ġejjin. Madankollu, il-finanzjament Ewropew u tal-Istati Membri jrid jkollu rwol kritiku biex jingrana l-investiment privat u biex jattira ħafna proġetti innovattivi. |
5. L-iskambju ta’ kwoti tal-karbonju u l-evitar tal-karbonju
5.1. |
Il-KESE jemmen li s-Sistema tal-UE għall-iskambju ta’ kwoti tal-emissjonijiet (ETS) u s-swieq internazzjonali tal-karbonju jista’ jkollhom rwol ewlieni fit-tnaqqis kosteffettiv tal-emissjonijiet globali tal-gassijiet serra. Reċentement, l-EU ETS taħt il-pakkett “lesti għall-mira ta’ 55 %” issaħħet biex tkopri setturi ekonomiċi addizzjonali, inklużi l-bini, it-trasport bit-triq, it-trasport marittimu u l-avjazzjoni. L-Artikolu 6 tal-Ftehim ta’ Pariġi diġà jipprovdi bażi ġuridika għall-użu tas-swieq internazzjonali tal-karbonju, permezz tal-użu ta’ skambju internazzjonali tal-kwoti tal-emissjonijiet b’konformità ma’ regoli robusti tal-kontabbiltà. Il-ġestjoni industrijali tal-karbonju għandha tibbenefika minn tali mekkaniżmi tal-ipprezzar tal-karbonju u n-negozjar. |
5.2. |
Il-KESE jinnota li hemm diversi inizjattivi leġiżlattivi li jistgħu jintużaw biex jappoġġjaw azzjonijiet settorjali li jikkontribwixxu għall-assorbiment tal-karbonju u l-evitar tal-karbonju. Eżempju tajjeb huwa r-Regolament dwar l-Assorbiment tal-Karbonju u l-Kultivazzjoni Karbonika, li jistabbilixxi l-ewwel qafas volontarju għall-UE kollha għaċ-ċertifikazzjoni tal-assorbiment tal-karbonju, tal-kultivazzjoni karbonika u tal-ħżin tal-karbonju fil-prodotti ġġenerati fl-Ewropa. B’rabta mat-trasport, bħalissa l-UE qed tiddiskuti mekkaniżmu armonizzat biex jitqiesu l-emissjonijiet ta’ gassijiet serra mis-servizzi tat-trasport permezz tar-Regolament CountEmissionsEU; dan għandu jiġi kkunsidrat ukoll. |
5.3. |
Il-KESE jemmen li l-proġetti ta’ tnaqqis tal-karbonju għandhom jinvolvu kemm l-assorbiment tal-karbonju kif ukoll l-evitar tal-karbonju. Madankollu, jemmen li l-evitar tal-karbonju bħalissa mhuwiex appoġġjat biżżejjed fil-livell tal-UE, waqt li l-investimenti f’soluzzjonijiet għall-evitar tal-karbonju diġà taw riżultati ta’ suċċess fl-utilitajiet, it-trasport u t-tisħin. Għalhekk, il-KESE jirrakkomanda li tiġi stabbilita skema ta’ krediti ġdida, separata, imfassla tajjeb, b’integrità għolja u robusta għall-evitar tal-karbonju b’metodoloġiji adatti li għad iridu jiġu żviluppati. Il-KESE jqis li l-krediti mill-evitar tal-karbonju joffru inċentivi għad-dekarbonizzazzjoni u jipprovdu finanzjament għal proġetti b’emissjonijiet żero. Fl-istess ħin, il-KESE jiġbed l-attenzjoni għall-fatt li l-kwoti tal-ETS ma jridux jintużaw bħala “krediti”, peress li dan jista’ jdgħajjef in-natura tas-sistema tal-UE għall-iskambju tal-karbonju li attwalment hija bbażata fuq is-suq. |
5.4. |
Il-KESE jqis li għandu jiġi nnotat ukoll li, minħabba l-prezzijiet tas-suq tal-karbonju, l-evitar tal-emissjonijiet tal-karbonju jista’ jkun sors ta’ introjtu addizzjonali. Emittenti ta’ emissjonijiet baxxi bi krediti tal-karbonju żejda jistgħu jbigħu emissjonijiet “mhux użati” lil emittenti ta’ emissjonijiet għoljin. Dan il-mekkaniżmu tas-suq jagħmilha possibbli li jinħarġu krediti tal-karbonju bħala forma ta’ finanzjament għal proġetti futuri b’emissjonijiet baxxi. |
5.5. |
Barra minn hekk, fl-ETS bħalissa hemm inċentivi (għadd imnaqqas ta’ kwoti bla ħlas u prezzijiet għoljin tal-karbonju) għal emittenti ta’ emissjonijiet għoljin biex inaqqsu l-emissjonijiet tagħhom. Madankollu, ir-regoli għall-iskambju ta’ krediti tal-karbonju fost il-kumpaniji għadhom mhumiex magħrufa sew: ir-regoli huma ċari u t-trasferiment tas-sjieda huwa faċli. Dawn ir-regoli għandhom jiġu estiżi sabiex jinkoraġġixxu lill-emittenti ta’ emissjonijiet baxxi biex ikomplu jnaqqsu l-emissjonijiet tagħhom u jirċievu finanzjament għat-tnaqqis fl-emissjonijiet. Għandha tiġi promossa l-kjarifika. |
5.6. |
Il-KESE jqis li l-finanzjament tal-UE u tal-Istati Membri għandu jkollu rwol biex jingrana l-investiment privat u biex jattira ħafna proġetti innovattivi tas-CCS/CCU u tat-tnaqqis u l-evitar tal-karbonju. |
Brussell, it-30 ta’ Mejju 2024
Il-President
tal-Kumitat Ekonomiku u Soċjali Ewropew
Oliver RÖPKE
(1) Il-Komunikazzjoni tal-Kummissjoni COM(2024) 62, il-paragrafu 5.1; Investiment u finanzjament, paġna 19.
ELI: http://data.europa.eu/eli/C/2024/4666/oj
ISSN 1977-0987 (electronic edition)