Gwida għall-kandidati fil-proċeduri tal-għażla organizzati mill-Parlament Ewropew

1.

DAĦLA

Kif issir proċedura tal-għażla?

2.	STADJI TAL-PROĊEDURA TAL-GĦAŻLA

Ir-riċevuta tal-applikazzjonijiet

Eżaminazzjoni tal-kundizzjonijiet ġenerali

Eżaminazzjoni tal-kundizzjonijiet speċifiċi

Evalwazzjoni tal-kwalifiki

Testijiet

Lista ta' riżerva

3.	KIF TAPPLIKA?

Elementi ġenerali

Kif tibgħat il-fajl komplut?

Liema dokumenti ġustifikattivi għandek tehmeż mal-fajl?

Elementi ġenerali

Dokumenti ġustifikattivi għall-kundizzjonijiet ġenerali

Dokumenti ġustifikattivi għall-kundizzjonijiet speċifiċi u l-evalwazzjoni tal-kwalifiki

4.	KOMUNIKAZZJONI

5.	INFORMAZZJONI ĠENERALI

Opportunitajiet indaqs

Talbiet mill-kandidati għall-aċċess għall-informazzjoni li tikkonċernahom

Protezzjoni tad-data personali

Spejjeż tal-ivvjaġġar u ta' soġġorn

ANNESS I

ANNESS II

1.   DAĦLA

Kif issir proċedura tal-għażla?

Proċedura tal-għażla tinvolvi sensiela ta' stadji fejn il-kandidati jikkompetu bejniethom; din il-proċedura hija miftuħa għaċ-ċittadini kollha tal-Unjoni Ewropea li, sad-data tal-iskadenza stabbilita għat-tressiq tal-applikazzjonijiet, jissodisfaw il-kriterji meħtieġa, u tagħti ċans ekwu lill-kandidati kollha biex juru l-ħiliet tagħhom u tippermetti għażla bbażata fuq il-mertu, fir-rispett tal-prinċipju ta' trattament ugwali.

Il-kandidati li jgħaddu proċedura tal-għażla jitniżżlu f'lista ta' riżerva li se sservi ta' bażi għall-Parlament Ewropew sabiex jimla l-pożizzjoni li għaliha japplika dan l-avviż ta' reklutaġġ.

Għal kull proċedura tal-għażla se jinħatar kumitat tal-għażla magħmul minn membri li jirrappreżentaw l-amministrazzjoni u l-kumitat tal-persunal. Il-ħidmiet ta' dan il-kumitat tal-għażla huma sigrieti u jitwettqu skont l-Anness III tar-Regolamenti tal-Persunal għall-Uffiċjali.

Il-kandidati ma jistgħu taħt l-ebda ċirkostanza jagħmlu kuntatt dirett jew indirett mal-kumitat tal-għażla. L-Awtorità tal-Ħatra għandha d-dritt li teskludi kull kandidat li jmur kontra din l-istruzzjoni.

Il-kumitat tal-għażla jimxi b'mod strett mal-kriterji ta' ammissjoni msemmija fl-avviż ta' reklutaġġ biex jiddeċiedi jekk kandidat għandux jiġi ammess jew le għall-kompetizzjoni. Il-kandidati li kienu ammessi għal kompetizzjoni jew proċedura tal-għażla preċedenti mhux se jkunu awtomatikament eliġibbli.

Sabiex jagħżel l-aħjar kandidati, il-kumitat tal-għażla jqabbel il-prestazzjonijiet tal-kandidati sabiex jivvaluta l-ħiliet tagħhom biex iwettqu l-funzjonijiet deskritti fl-avviż. Għalhekk m'għandux biss jevalwa l-livell tal-għarfien, iżda wkoll jidentifika l-persuni l-aktar kkwalifikati abbażi tal-merti tagħhom.

Għall-informazzjoni, proċedura tal-għażla tista' ddum bejn 6 u 9 xhur, skont in-numru tal-kandidati.

2.   STADJI TAL-PROĊEDURA TAL-GĦAŻLA

Il-proċedura tal-għażla hija magħmula minn dawn l-istadji li ġejjin:

—	ir-riċevuta tal-applikazzjonijiet,

—	l-eżaminazzjoni tal-kundizzjonijiet ġenerali,

—	l-eżaminazzjoni tal-kundizzjonijiet speċifiċi,

—	l-evalwazzjoni tal-kwalifiki (ammissjoni għat-testijiet),

—	it-testijiet,

—	il-lista ta' riżerva.

Ir-riċevuta tal-applikazzjonijiet

Il-kandidati li jiddeċiedu li japplikaw għandhom jibagħtu fajl komplut tal-applikazzjoni, li jinkludi l-formola tal-applikazzjoni speċifika għall-avviż ta' reklutaġġ, mimlija, iffirmata u akkumpanjata mid-dokumenti ġustifikattivi kollha meħtieġa li jagħtu prova li huma jissodisfaw il-kundizzjonijiet ġenerali u speċifiċi speċifikati fl-avviż ta' reklutaġġ. Dawk il-kandidati li ma jagħmlux dan jiġu esklużi mill-kompetizzjoni. Dan il-fajl għandu jintbagħat bil-posta rreġistrata (il-kunsinna minn kumpanija privata tal-posta se titqies bħala ekwivalenti tal-posta rreġistrata. F'dan il-każ, id-data li tidher fil-formola tal-kunsinna se titqies bħala d-data tal-kunsinna) sad-data speċifikata fl-avviż. Ara t-taqsima C tal-avviż ta' reklutaġġ għall-indirizz u d-data tal-iskadenza għat-tressiq tal-applikazzjonijiet.

Eżaminazzjoni tal-kundizzjonijiet ġenerali

L-Unità tal-Kompetizzjonijiet u l-Proċeduri ta' Għażla se teżamina jekk l-applikazzjoni tistax tiġi aċċettata, jiġifieri jekk l-applikazzjoni intbagħtitx fil-forma u sad-data tal-iskadenza mitluba fl-avviż ta' reklutaġġ u jekk il-kundizzjonijiet ġenerali ta' ammissjoni ġewx sodisfati.

Konsegwentement, jiġu awtomatikament eliminati l-kandidati li:

—	jkunu bagħtu l-fajl tal-applikazzjoni tagħhom wara d-data tal-iskadenza, kif muri mit-timbru tal-posta jew mill-formola tal-kunsinna tal-kumpanija privata tal-posta,

—	ma bagħtux il-fajl tal-applikazzjoni tagħhom bil-posta rreġistrata jew permezz ta' kumpanija privata tal-posta,

—	ma użawx u/jew ma mlewx b'mod adegwat l-applikazzjoni speċifika għall-avviż ta' reklutaġġ,

—	ma ffirmawx l-applikazzjoni,

—	ma jissodisfawx il-kundizzjonijiet ġenerali ta' ammissjoni.

Il-kandidati jiġu infurmati individwalment b'dan ir-rifjut wara d-data tal-iskadenza għat-tressiq tal-applikazzjonijiet .

Il-lista tal-kandidati li jissodisfaw il-kundizzjonijiet ġenerali speċifikati fl-avviż ta' reklutaġġ hija stabbilita mill-awtorità tal-ħatra, imbagħad din il-lista tintbagħat flimkien mal-fajls lill-kumitat tal-għażla.

Eżaminazzjoni tal-kundizzjonijiet speċifiċi

Il-kumitat tal-għażla jeżamina l-applikazzjonijiet u jistabbilixxi l-lista tal-kandidati li jissodisfaw il-kundizzjonijiet ġenerali speċifikati fl-avviż ta' reklutaġġ. Huwa jibbaża esklużivament fuq l-indikazzjonijiet mogħtija fil-formola tal-applikazzjoni li jkunu appoġġati bid-dokumenti ġustifikattivi .

L-istudji, it-taħriġ, l-esperjenza professjonali u l-għarfien lingwistiku għandhom jiġu speċifikati fid-dettall fl-applikazzjoni, jiġifieri:

—	għall-istudji: id-dati tal-bidu u t-tmiem u d-deskrizzjoni tal-lawrja/i, kif ukoll is-suġġetti studjati;

—	għall-esperjenza professjonali eventwali: id-dati tal-bidu u t-tmiem tal-esperjenza kif ukoll dekrizzjoni preċiża tal-kompiti mwettqa.

Il-kandidati li jkunu ppubblikaw studji, artikli jew testijiet oħra marbuta mad-deskrizzjoni tal-funzjonijiet għandhom jinkluduhom fil-formola tal-applikazzjoni.

F'dan l-istadju huma esklużi l-kandidati li ma jissodisfawx il-kundizzjonijiet speċifiċi ta' ammissjoni speċifikati fl-avviż ta' reklutaġġ.

Kull kandidat jiġi infurmat b'ittra dwar id-deċiżjoni tal-kumitat tal-għażla jekk ġiex ammess jew le għall-proċedura.

Evalwazzjoni tal-kwalifiki

Sabiex jagħżel il-kandidati li jiġu mistiedna għat-testijiet, il-kumitat tal-għażla jipproċedi għall-evalwazzjoni tal-kwalifiki tal-kandidati ammessi (ara l-paragrafu ta' hawn taħt). Huwa jibbaża esklużivament fuq l-indikazzjonijiet mogħtija fl-applikazzjonijiet li huma appoġġati bid-dokumenti ġustifikattivi (ara l-punt 3 ta' hawn taħt). Il-kumitat tal-għażla jibbaża fuq il-kriterji li jkun stabbilixxa minn qabel filwaqt li jikkunsidra, b'mod speċjali, il-kwalifiki speċifikati fl-avviż ta' reklutaġġ fit-Taqsima B.2.

Kull kandidat jiġi infurmat b'ittra dwar id-deċiżjoni tal-kumitat tal-għażla jekk ġiex ammess jew le għat-testijiet.

Testijiet

It-testijiet kollha huma obbligatorji u eliminatorji. In-numru massimu ta' kandidati ammessi għat-testijiet huwa stabbilit fit-Taqsima B.2 tal-avviż ta' reklutaġġ.

Minħabba raġunijiet ta' organizzazzjoni, il-kandidati jistgħu jiġu mistiedna għat-testijiet kollha bil-miktub u orali. Madankollu, l-immarkar tat-testijiet isir fl-ordni li jidher fl-avviż ta' reklutaġġ. Konsegwentement, meta kandidat ma jiksibx il-marka minima meħtieġa f'wieħed mit-testijiet eliminatorji, il-kumitat tal-għażla mhux se jimmarka t-testijiet sussegwenti.

It-testijiet tal-kandidati li jaqtgħu qalbhom ma jiġux immarkati.

Lista ta' riżerva

In-numru massimu biss tal-kandidati stabbilit fit-Taqsima B.4 tal-avviż ta' reklutaġġ jiddaħħal fil-lista ta' riżerva.

Il-fatt li isem ta' kandidat ikun imniżżel fil-lista ta' riżerva jfisser li jista' jiġi mistieden minn wieħed mis-servizzi tal-istituzzjoni għal intervista, iżda dan ma jikkostitwixxi la dritt u lanqas garanzija ta' reklutaġġ mill-istituzzjoni.

3.   KIF TAPPLIKA?

Elementi ġenerali

Qabel tapplika għandek tiċċekkja sew jekk tissodisfax il-kundizzjonijiet kollha ta' ammissjoni, kemm dawk ġenerali kif ukoll dawk speċifiċi. Dan jimplika li għandek l-ewwel taqra l-avviż ta' reklutaġġ u din il-gwida u taċċetta t-termini.

Minkejja li dan l-avviż ta' reklutaġġ m'għandux limitu ta' età, għandek tinnota l-età tal-pensjoni stabbilita mir-Regolamenti tal-Persunal tal-Uffiċjali tal-Unjoni Ewropea (http://ec.europa.eu/civil_service/docs/toc100_en.pdf)

Il-kandidati huma mitluba jimlew il-formola tal-applikazzjoni (oriġinali jew kopja) speċifika għall-avviż ta' reklutaġġ u li tinsab fil-Ġurnal Uffiċjali ppubblikat mill-Uffiċċju tal-Publikazzjonijiet tal-Unjoni Ewropea.

Id-dokumenti li jintbagħtu wara d-data tal-iskadenza mhux se jiġu kkunsidrati.

Il-kandidati li għandhom diżabilità jew li jinsabu f'sitwazzjoni partikolari (pereżempju: tqala, treddigħ, stat ta' saħħa, trattament mediku, eċċ), li tista' tikkawża diffikultajiet waqt il-proċediment tat-testijiet, għandhom jindikawha fl-applikazzjoni u jagħtu kull informazzjoni utli sabiex tippermetti lill-amministrazzjoni biex, jekk ikun possibbli, tieħu l-miżuri kollha neċessarji. Fejn ikun xieraq, għandhom jehmżu mal-applikazzjoni tagħhom, fuq karta separata, preċiżjonijiet dwar id-dispożizzjonijiet li huma jqisu neċessarji biex jiffaċilitaw il-parteċipazzjoni tagħhom għat-testijiet.

Kif tibgħat il-fajl komplut?

1.	Imla u ffirma l-applikazzjoni speċifika għall-avviż ta' reklutaġġ,

2.	ehmeż lista nnumerata tad-dokumenti ġustifikattivi kollha mal-fajl tiegħek;

3.	ehmeż id-dokumenti ġustifikattivi kollha meħtieġa, li inti tkun innumerajt minn qabel,

4.	ibgħat il-fajl skont il-modalitajiet u qabel id-data tal-iskadenza fl-avviż ta' reklutaġġ.

Liema dokumenti ġustifikattivi għandek tehmeż mal-fajl?

Elementi ġenerali

Tibgħatx dokumenti oriġinali. Kopji mhux ċertifikati biss tad-dokumenti meħtieġa għandhom jiġu mehmuża. Ir-referenzi għal websajts ma jistgħux jitqiesu bħala dokumenti ġustifikattivi. Dokumenti pprintjati minn websajts mhux se jitqiesu bħala ċertifikati, iżda jistgħu jinhemżu bħala informazzjoni addizzjonali.

Niġbdulek l-attenzjoni għall-fatt li l-kandidati mniżżla fil-lista ta' riżerva li għalihom huwa offert impjieg, għandhom jippreżentaw l-oriġinali tad-dokumenti meħtieġa qabel ma jkunu jistgħu jiġu reklutati.

Curriculum vitæ mhuwiex meqjus bħala dokument ġustifikattiv.

Il-kandidati ma jistgħux jirreferu għal dokumenti, formoli tal-applikazzjonijiet jew dokumenti oħra mibgħuta waqt kompetizzjoni preċedenti (1).

L-ebda element tal-fajl ma jintbagħat lura lill-kandidati.

Dokumenti ġustifikattivi għall-kundizzjonijiet ġenerali

F'dan l-istadju l-ebda dokument mhuwa meħtieġ biex jiġġustifika li l-kandidati:

—	huma ċittadini ta' Stat Membru tal-Unjoni Ewropea,

—	igawdu d-drittijiet ċiviċi tagħhom,

—	issodisfaw kull obbligu impost mil-liġijiet ta' reklutaġġ applikabbli fil-qasam militari,

—	jipproduċu r-referenzi ta' karattru mitluba għat-twettiq tad-dmirijiet previsti.

Il-kandidati għandhom jiffirmaw il-formola tal-applikazzjoni. B'din il-firma, il-kandidati jiddikjaraw fuq l-unur tagħhom li jissodisfaw dawn il-kundizzjonijiet u li l-informazzjoni pprovduta hija vera u kompluta.

Dokumenti ġustifikattivi għall-kundizzjonijiet speċifiċi u l-evalwazzjoni tal-kwalifiki

Huwa f'idejn il-kandidati li jipprovdu lill-kumitat tal-għażla bl-informazzjoni u d-dokumenti kollha li jippermettu lill-kumitat biex jivverifika l-eżattezza tal-informazzjoni msemmija fil-formola tal-applikazzjoni.

Lawrji u/jew ċertifikati li jiċċertifikaw it-tlestija tal-istudji

Il-kandidati għandhom jipprovdu fotokopji tal-lawrji jew taċ-ċertifikati li jiċċertifikaw l-istudji tal-livell meħtieġ mill-avviż ta' reklutaġġ.

F'dan ir-rigward il-kumitat tal-għażla jqis l-istrutturi differenti tal-edukazzjoni tal-Istati Membri tal-Unjoni Ewropea.

Għal diplomi postsekondarji, għandha tinhemeż l-informazzjoni l-aktar dettaljata possibbli, speċjalment dwar id-dewmien tal-istudji u s-suġġetti studjati, sabiex il-kumitat tal-għażla jkun jista' jevalwa r-rilevanza tad-diplomi b'rabta mad-deskrizzjoni tal-funzjonijiet.

Fil-każ ta' taħriġ tekniku jew professjonali, jew kors ta' perfezzjonament jew speċjlalizzazzjoni, il-kandidati għandhom jindikaw jekk kienx kors full time jew part time jew kors ta' filgħaxija, kif ukoll is-suġġetti studjati u d-dewmien uffiċjali tal-korsijiet.

Esperjenza professjonali

L-esperjenza professjonali se titqies biss jekk tkun inkisbet wara l-kisba tal-lawrja jew taċ-ċertifikati meħtieġa. Id-dokumenti ġustifikattivi jeħtieġu jagħtu prova tad-dewmien u l-livell tal-esperjenza professjonali u d-deskrizzjoni tal-kompiti teħtieġ tkun dettaljata kemm jista' jkun sabiex il-kumitat tal-għażla jkun jista' jqis ir-rilevanza tal-esperjenza b'rabta mad-deskrizzjoni tal-funzjonijiet.

Il-perjodi kollha tal-attività professjonali kkonċernati għandhom ikunu koperti minn dokumenti ġustifikattivi, speċjalment:

—	ċertifikati minn impjegaturi preċedenti u mill-impjegatur attwali li jiġġustifikaw l-esperjenza professjonali mitluba għall-aċċess għall-proċedura tal-għażla;

—

jekk, minħabba raġunijiet ta' kunfidenzjalità, il-kandidati ma jistgħux jehmżu ċ-ċertifikati tal-impjiegi meħtieġa, huwa obbligatorju li, sabiex jissostitwixxu dawn iċ-ċertifikati, għandhom jipprovdu fotokopji tal-kuntratt tax-xogħol jew tal-ittra ta' reklutaġġ u/jew tal-ewwel u l-aħħar karta tal-paga;

—	għall-attivitajiet professjonali mhux imħallsa (indipendenti, professjonijiet liberali, eċċ), huma aċċettati bħala prova irċevuti jew formoli għall-ordnijiet li jagħtu dettalji dwar is-servizzi mogħtija, jew kull dokument ieħor ġustifikattiv uffiċjali rilevanti.

Għarfien lingwistiku

L-għarfien tal-lingwi meħtieġ għandu jkun iċċertifikat minn diploma, ċertifikat jew dikjarazzjoni fuq l-unur, fuq karta separata, li tispjega kif inkiseb l-għarfien ta' dawn il-lingwi.

Jekk, fi kwalunkwe stadju tal-proċedura, jiġi nnutat li l-indikazzjonijiet pprovduti fl-applikazzjoni ma jkunux eżatti, ma jkunux ikkonfermati mid-dokumenti mibgħuta jew ma jikkorrispondux għal kundizzjonijiet kollha ta' dan l-avviż ta' reklutaġġ, l-ammissjoni tal-kandidat tiġi ddikjarata nulla.

4.   KOMUNIKAZZJONI

Hija r-responsabilità tal-kandidati li jieħdu l-miżuri kollha sabiex l-applikazzjoni (oriġinali jew kopja) kkompletata kif xieraq u ffirmata, akkumpanjata mid-dokumenti ġustifikattivi kollha, tintbagħat bil-posta rreġistrata (2), qabel id-data tal-iskadenza. It-timbru tal-posta jitqies bħala prova.

B'kunsiderazzjoni taż-żmien li tieħu l-posta biex tasal fid-destinazzjoni tagħha, il-kandidat għandu jindirizza ittra, faks jew email (3) lill-Unità tal-kompetizzjonijiet jekk ma jirċevix ittra ta' stedina jew ittra li tinfurmah li ma ġiex ammess sad-data mogħtija fl-aħħar paragrafu tal-avviż ta' reklutaġġ.

F'kull korrispondenza relatata mal-applikazzjoni, il-kandidat għandu jikkwota l-isem mogħti f'dik l-applikazzjoni u n-numru tal-proċedura tal-għażla.

Kull korrispondenza indirizzata mill-Parlament Ewropew relatata ma' proċedura tal-għażla, inklużi l-konvokazzjonijiet għat-testijiet, tintbagħat bl-email lill-indirizz indikat mill-kandidat fl-applikazzjoni. Huwa f'idejn il-kandidat li jiċċekkja l-email tiegħu (inkluż il-fajl Spam) regolarment (tal-anqas darbtejn fil-ġimgħa) u li jinnotifika lill-Unità tal-Kompetizzjonijiet u l-Proċeduri ta' Għażla dwar bidla eventwali tal-informazzjoni personali tiegħu.

Għal kull komunikazzjoni dwar il-proċedura, jekk jogħġbok ibgħat email f'dan l-indirizz funzjonali: PE-168-S@ep.europa.eu

Jekk ma jibqax possibbli li tiċċekkja l-email tiegħek, hija r-responsabilità tiegħek li tinforma minnufih lill-Unità tal-Kompetizzjonijiet u l-Proċeduri ta' Għażla u li tagħtiha indirizz elettroniku ġdid.

Sabiex tiggarantixxi ċ-ċarezza u l-komprensjoni tat-testi ġenerali u l-korrispondenza mibgħuta lill-kandidati u rċevuta mingħandhom, il-konvokazzjonijiet għat-testijiet differenti, kif ukoll kull korrispondenza bejn l-Unità għall-kompetizzjoni u proċeduri tal-għażla u l-kandidati se jsiru biss bil-Ġermaniż, bl-Ingliż jew bil-Franċiż. L-ebda korrispondenza m'għandha ssir bil-lingwa prinċipali (lingwa 1) tal-kandidat.

Sabiex tinżamm l-indipendenza tal-kumitat tal-għażla, kull kuntatt, dirett jew indirett, tal-kandidati mal-kumitat tal-għażla huwa formalment ipprojbit u jista' jwassal għall-esklużjoni mill-proċedura.

Kull korrispondenza indirizzata lill-Kumitat tal-għażla, kif ukoll kull talba għall-informazzjoni jew korrispondenza relatata mal-proċediment tal-proċedura, għandha tkun indirizzata esklussivament lill-Unità tal-Kompetizzjonijiet u l-Proċeduri tal-għażla (3), li hija inkarigata mill-komunikazzjoni mal-kandidati sat-tmiem tal-proċedura tal-għażla.

5.   INFORMAZZJONI ĠENERALI

Opportunitajiet indaqs

Il-Parlament Ewropew jiżgura li jevita kull forma ta' diskriminazzjoni waqt il-proċedura tal-għażla.

Huwa japplika politika ta' opportunitajiet indaqs u jaċċetta l-applikazzjonijiet mingħajr ebda diskriminazzjoni, bħal pereżempju diskriminazzjoni bbażata fuq is-sess, ir-razza, il-kulur, l-oriġini etnika jew soċjali, il-karatteristiki ġenetiċi, il-lingwa, ir-reliġjon jew it-twemmin, l-opinjonijiet politiċi jew oħrajn, is-sħubija f'minoranza nazzjonali, il-proprjetà, it-twelid, id-diżabilità, l-età, l-orjentazzjoni sesswali, l-istat ċivili jew is-sitwazzjoni tal-familja.

Talbiet mill-kandidati għall-aċċess għall-informazzjoni li tikkonċernahom

Fil-kuntest tal-proċeduri tal-għażla, il-kandidati għandhom id-dritt speċifiku li jaċċedu, fil-kundizzjonijiet deskritti hawn taħt, għal ċerta informazzjoni li tikkonċernahom direttament jew individwalment. Għalhekk, il-Parlament Ewropew jista' jagħti lil kandidat, fuq talba tiegħu, din l-informazzjoni addizzjonali li ġejja:

(a)

il-kandidati li ma jkunux għaddew mit-testijiet bil-miktub u/jew ma kinux fost dawk li ġew mistiedna għat-test orali jistgħu jiksbu, fuq talba, kopja ta' dawn it-testijiet kif ukoll kopja tal-karta tal-evalwazzjoni individwali li tinkludi l-valutazzjonijiet mogħtija mill-kumitat tal-għażla. It-talba għandha ssir fi żmien xahar mid-data ta' meta intbagħtet l-ittra li tikkomunika d-deċiżjoni li temmet il-parteċipazzjoni fil-proċedura tal-għażla.

(b)

il-kandidati li ġew mistiedna għat-testijiet orali u li ma tniżżlux fil-lista ta' riżerva se jiġu infurmati bir-riżultati tagħhom fit-testijiet differenti wara l-istabbiliment tal-lista ta' riżerva mill-kumitat tal-għażla. Dawn il-kandidati jistgħu wkoll jiksbu kopja tat-testijiet tal-kitba tagħhom skont il-kundizzjonijiet speċifikati taħt a).

(c)	il-kandidati mniżżla fil-lista ta' riżerva huma infurmati biss bil-fatt li huma rnexxew fil-proċedura tal-għażla.

It-talbiet huma trattati b'kunsiderazzjoni tal-karattru sigriet tal-ħidmiet tal-kumitat tal-għażla previst mir-Regolamenti tal-Persunal (Anness III, Artikolu 6) u fir-rispett tar-regoli dwar il-protezzjoni tal-persuni fiżiċi rigward it-trattament tad-data personali.

Protezzjoni tad-data personali

Il-Parlament Ewropew, bħala l-korp responsabbli għall-organizzazzjoni tal-għażla, għandu jiżgura li d-data personali tal-kandidati tiġi trattata fir-rispett sħiħ tar-Regolament (KE) Nru 45/2001 tal-Parlament Ewropew u tal-Kunsill tat-18 ta' Diċembru 2000 dwar il-protezzjoni ta' individwu fir-rigward tal-ipproċessar ta' data personali mill-istituzzjonijiet u l-korpi tal-Komunità u dwar il-movement liberu ta' dik id-data (4), speċjalment rigward il-kunfidenzjalità u s-sigurtà tagħhom.

Spejjeż tal-ivvjaġġar u ta' soġġorn

Kontribuzzjoni għall-ispejjeż tal-ivvjaġġar u ta' soġġorn tingħata lill-kandidati mistiedna għat-testijiet. Huma jiġu infurmati bl-arranġamenti u bit-tariffi applikabbli waqt l-istedina tagħhom għat-testijiet.

L-indirizz mogħti mill-kandidati fil-formola tal-applikazzjoni huwa meqjuż bħala l-post li minnu l-kandidat jitlaq biex jattendi t-testijiet. F'dan ir-rigward, bidla tal-indirizz ikkomunikata mill-kandidat wara li l-Parlament Ewropew ikun bagħat l-istedina għat-testijiet ma tistax tiġi kkunsidrata, ħlief jekk il-Parlament iqis li ċ-ċirkostanzi msemmija mill-kandidat ikunu ekwivalenti għal force majeure jew ikun każ eċċezzjonali.

---

(1)  Dawn il-kundizzjonijiet japplikaw għall-kandidati kollha, inklużi l-uffiċjali u l-aġenti l-oħra tal-Unjoni Ewropea.

(2)  Il-kunsinna minn kumpanija privata tal-posta titqies bħala rreġistrata. F'dan il-każ, id-data li tidher fuq il-formola tal-kunsinna se tinżamm bħala prova.

(3)  Indirizz: Parlement européen, Unité concours et procédures de sélection — MON 04 S 010, Procédure de sélection PE/168/S, Rue Wiertz 60, 1047 Bruxelles/Brussel, Belgique/België.

Numru tal-faks: +32 22831717. Email: PE-168-S@ep.europa.eu

(4)  ĠU L 8, 12.1.2001, p. 1.