SEJĦA GĦAL KANDIDATURI

Direttur Ġenerali tat-Traduzzjoni (Gradi AD15 — AD16) fi ħdan il-Qorti tal-Ġustizzja tal-Unjoni Ewropea

(2010/C 307 A/01)

Il-pożizzjoni ta' Direttur Ġenerali tat-Traduzzjoni (Gradi AD15 — AD16) fi ħdan il-Qorti tal-Ġustizzja tal-Unjoni Ewropea fil-Lussemburgu tinsab vakanti. Din il-pożizzjoni ser timtela skont l-Artikolu 29(2) tar-Regolamenti tal-Persunal tal-Komunitajiet Ewropej.

NATURA TAL-FUNZJONIJIET U KUNDIZZJONIJIET MEĦTIEĠA

Id-Direttur Ġenerali tat-Traduzzjoni jaqa' taħt l-awtorità tar-Reġistratur u huwa responsabbli għad-Direttorat Ġenerali tat-Traduzzjoni. Dan id-direttorat ġenerali jiżgura s-servizz ta' traduzzjoni legali tal-Qorti tal-Ġustizzja tal-Unjoni Ewropea u jikkontribwixxi għall-osservanza tas-sistema lingwistika tat-tliet qrati li jifformaw din l-istituzzjoni, kemm fir-rigward tat-trattament tal-kawżi u kif ukoll fir-rigward tal-pubblikazzjoni tal-ġurisprudenza. Dan id-direttorat ġenerali huwa kkostitwit minn madwar 900 persuna, li iktar minn 600 minnhom huma ġuristi lingwisti (1), u juża s-servizzi ta' numru ekwivalenti ta' tradutturi esterni.

Id-Direttur Ġenerali tat-Traduzzjoni għandu jkollu l-kapaċitajiet neċessarji sabiex jamministra entità amministrattiva kbira li hija meħtieġa tadatta ruħha għall-iżvilupp tas-sistema ġudizzjarja u tevolvi fil-kuntest tat-tkabbir futur tal-Unjoni Ewropea. Huwa għandu juri sens tajjeb ħafna tal-organizzazzjoni u għandu jkun kapaċi jadatta l-istruttura tad-Direttorat Ġenerali għal sfidi ġodda. Huwa għandu jkollu wkoll sens tajjeb ħafna ta' relazzjonijiet umani u kapaċitajiet ta' konvinzjoni u ta' motivazzjoni fir-rigward tal-kollaboraturi tiegħu. Huwa jkun responsabbli sabiex jimmotiva u jikkoordina l-azzjoni tal-kapijiet tat-tnejn u għoxrin diviżjoni lingwistika u tal-erba' diviżjonijiet funzjonali tad-Direttorat Ġenerali, u kif ukoll sabiex jikkoopera b'mod effikaċi mad-diretturi ġenerali l-oħra u mal-kapijiet tad-dipartimenti tal-istituzzjoni.

Barra minn hekk, sabiex ilaħħaq mal-volum ta' xogħol li dejjem qiegħed jiżdied, żieda li ma tistax tiġi assorbita bis-sempliċi tkabbir fin-numru tal-persunal, huwa mistenni li jittieħdu l-miżuri kollha sabiex ikompli jittejjeb il-livell għoli ta' produttività diġà milħuq mid-Direttorat Ġenerali. Sabiex jintlaħaq dan il-għan, huma neċessarji, b'mod partikolari, titjib kostanti fl-organizzazzjoni u fil-metodi ta' xogħol, u użu ġeneralizzat ta' teknoloġiji ġodda. Id-Direttur Ġenerali tat-Traduzzjoni għandu juri interess kbir ħafna f'affarijiet tal-informatika u fl-użu ta' teknoloġiji ġodda.

Barra minn hekk, l-amministrazzjoni tas-servizz għandha tkun ispirata mill-kunsiderazzjoni permanenti li l-metodi tad-Direttorat Ġenerali jiġu adattati għall-ħtiġijiet tax-xogħol ġudizzjarju u li l-kwalità tat-traduzzjonijiet tinżamm f'livell għoli.

Għaldaqstant, il-persuna li tokkupa din il-pożizzjoni għandha jkollha konoxxenza u esperjenza professjonali vasti fejn tidħol l-amministrazzjoni ta' entità speċjalizzata fil-qasam tat-traduzzjoni u għandha tkun kapaċi taġixxi fid-dawl tal-organizzazzjoni u tal-funzjonament tal-Qorti tal-Ġustizzja.

Fid-dawl tal-kuntest li fih ser ikun qiegħed jaħdem, id-Direttur Ġenerali tat-Traduzzjoni għandu jkollu taħriġ legali komplet attestat b'diploma ta' livell universitarju u għandu juri konoxxenza approfondita ta' lingwa uffiċjali tal-Unjoni Ewropea u konoxxenza tajba ħafna ta' żewġ lingwi uffiċjali oħra tal-Unjoni. Minħabba l-ħtiġijiet tas-servizz, huwa għandu jkollu konoxxenza tajba ħafna tal-Franċiż u konoxxenza tajba tal-Ingliż.

PREŻENTAZZJONI TA' KANDIDATURI

Il-kandidaturi għal din il-pożizzjoni għandhom ikunu indirizzati lir-Reġistratur tal-Qorti tal-Ġustizzja u għandhom jintbagħtu biss permezz ta' posta elettronika fl-indirizz elettroniku DG.DGT@curia.europa.eu sa mhux iktar tard mill-4 ta' Diċembru 2010. Mal-kandidaturi għandhom jintbagħtu curriculum vitae ddettaljat u kull dokument utli ieħor. Mal-att tal-kandidatura tagħhom, il-kandidati għandhom jannettu wkoll nota ta' mhux iktar minn ħames paġni fejn jispjegaw il-proġetti tagħhom għas-servizz, u fejn jindikaw x'jikkwalifikahom, fil-fehma tagħhom, għall-pożizzjoni vakanti.

Il-Lussemburgu, is-26 ta' Ottubru 2010.

(1)  Informazzjoni addizzjonali dwar il-Qorti tal-Ġustizzja tal-Unjoni Ewropea kif ukoll dwar id-Direttorat Ġenerali tat-Traduzzjoni hija disponibbli fuq is-sit Internet tal-istituzzjoni (www.curia.europa.eu).