Emissjoni tal-ħoss fl-ambjent minn tagħmir għall-użu ta’ barra

 

SOMMARJU TA’:

Direttiva 2000/14/KE dwar l-emissjoni tal-ħoss fl-ambjent minn tagħmir għall-użu ta’ barra

X’INHU L-GĦAN TAD-DIRETTIVA?

Hija għandha l-għan li:

• ittejjeb il-kontroll tal-emissjonijiet tal-ħsejjes b’57 tip ta’ tagħmir għall-użu ta’ barra (Artikoli 12 u 13, Anness I), bħal:
  • kompressuri,
  • tagħmir għat-tagħbija u għat-tħaffir,
  • tipi differenti ta’ srieraq,
  • miksers, eċċ.;
• tippromwovi l-funzjonament bla xkiel tas-suq uniku tal-UE;
• ittejjeb is-saħħa u l-benessri taċ-ċittadini billi tnaqqas il-ħoss li joħroġ mit-tagħmir għall-użu ta’ barra.

Tħassar u tissostitwixxi 9 strumenti legali dwar l-emissjonijiet tal-ħsejjes għal kull tip ta’ impjant u tagħmir ta’ kostruzzjoni, kif ukoll id-Direttiva 84/538/KEE dwar magni li jaqtgħu l-ħaxix.

PUNTI EWLENIN

L-iskop tad-direttiva huwa maqsum f’erbgħa:

• li jiġu armonizzati l-istandards tal-emissjoni tal-istorbju;
• li jiġu armonizzati l-proċeduri tal-valutazzjoni* tal-konformità;
• li tarmonizza l-immarkartal-livell tal-ħoss;
• li tiġbor dejta dwar l-emissjonijiet tal-ħsejjes.

It-tipi ta’ tagħmir li ġejjin huma esklużi:

• aċċessorji mingħajr enerġija (għal għodda) li jitqiegħdu fis-suq jew jitqiegħdu fis-servizz* separatament (ħlief għal tagħmir għat-tkissir u għall-ġbir tal-konkrit li jinżamm fl-idejn);
• it-tagħmir kollu maħsub għat-trasport ta’ merkanzija jew ta’ persuni permezz ta’ triq pubblika jew bil-ferrovija jew bl-ajru jew fuq passaġġi fuq l-ilma;
• tagħmir iddisinjat u mibni għall-użu mill-pulizija jew militari.

Il-pajjiżi tal-UE huma responsabbli biex jivverifikaw li r-regoli stabbiliti mid-direttiva qed jiġu applikati. L-Annessi V sa VIII fihom id-diversi proċeduri ta’ valutazzjoni ta’ konformità li għandhom jintużaw.

Il-manifattur jew il-persuna li tqiegħed it-tagħmir fis-suq jew li jqiegħdu fis-servizz għandu jiżgura (Artikoli 4 u 8) li:

• huma fasslu “dikjarazzjoni ta’ konformità tal-KE” li tiċċertifika li kull oġġett ta’ tagħmir li jkollu l-marka CE jikkonforma mad-direttiva;
• huma waħħlu mmarkar li ma jitħassarx, li jinqara, ma’ kull tagħmir li jindika l-livell garantit tal-qawwa tal-ħoss.

Fejn pajjiż tal-UE jaċċerta li t-tagħmir ma jikkonformax ma’ dawn il-kundizzjonijiet, għandu jirtirah mis-suq jew jipprojbixxi l-użu tiegħu.

L-ittikkettar huwa obbligatorju għall-oġġetti kollha ta’ tagħmir koperti mid-direttiva u għandu jinkludi:

• il-marka CE tkun immarkata b’mod viżibbli, li jinqara u li ma jitħassarx ma’ kull oġġett ta’ tagħmir;
• dettalji tal-livell tal-qawwa tal-ħoss LWA* f’dB(A)* b’relazzjoni ma’ 1 pW*.

Il-limiti ta’ emissjoni ta’ ħoss stabbiliti għal ċerti tipi ta’ tagħmir involvew 2 stadji, sabiex in-negozji jkunu jistgħu jadattaw għar-regolamenti l-ġodda. Il-limiti ta’ emissjoni għall-istadju 1 daħlu fis-seħħ sentejn wara d-dħul fis-seħħ tad-direttiva u l-limiti aktar stretti daħlu fis-seħħ fl-2006.

Il-pajjiżi tal-UE jistgħu jistabbilixxu korpi notifikati li huma responsabbli għas-sorveljanza tal-limiti tal-emissjoni tal-ħoss applikabbli għat-tagħmir. Dawn il-kontrolli ta’ monitoraġġ japplikaw kemm għall-fażi tat-tfassil tat-tagħmir kif ukoll għall-fażi tal-produzzjoni tat-tagħmir Ta’ min jinnota, madankollu, li mhux meħtieġ li jiġi mmonitorjat id-disinn tat-tagħmir li huwa soġġett biss għall-immarkar obbligatorju.

Bil-għan li jiġi evalwat l-impatt tad-direttiva, ġiet stabbilita proċedura għall-ġbir tad-dejta tal-emissjoni tal-ħoss. Din l-informazzjoni sservi bħala l-bażi għall-klijenti biex jagħżlu tagħmir inqas storbjuż u biex ifasslu inċentivi ekonomiċi u għotjiet. Il-manifatturi jew ir-rappreżentanti awtorizzati tagħhom huma meħtieġa jibagħtu lill-awtoritajiet rilevanti fil-pajjiżi tal-UE, kif ukoll lill-Kummissjoni Ewropea, kopja tad-dikjarazzjoni tal-konformità tal-KE għal tagħmir imqiegħed fis-suq.

Id-direttiva għandha 24 artikolu u 10 annessi li jkopru:

• definizzjonijiet ta’ tagħmir;
• dikjarazzjoni tal-konformità tal-KE;
• metodu ta’ kejl tal-ħoss fl-arja emess minn tagħmir għall-użu ta’ barra;
• mudelli tal-marka CE tal-konformità u tal-indikazzjoni tal-livell garantit tal-qawwa tal-ħoss;
• kontroll intern tal-produzzjoni;
• kontroll intern tal-produzzjoni bl-evalwazzjoni tad-dokumentazzjoni teknika u l-iċċekkjar perjodiku;
• verifika unitarja;
• assigurazzjoni sħiħa tal-kwalità;
• kriterji minimi li għandhom jitqiesu mill-pajjiżi tal-UE għan-notifika tal-korpi (il-korpi notifikati msemmija hawn fuq);
• verifika unitarja - mudell ta’ ċertifikat ta’ konformità.

Reviżjonijiet possibbli għal-leġiżlazzjoni

Studju ta’ evalwazzjoni u valutazzjoni tal-impatt tad-Direttiva 2000/14/KE ilu għaddej minn Mejju 2017. Ir-riżultati tiegħu, kif ukoll l-istudji li tlestew qabel, se jintużaw mill-Kummissjoni bħala l-bażi għall-proċess ta’ reviżjoni li jmiss tal-leġiżlazzjoni tal-UE f’dan il-qasam. Tnediet konsultazzjoni pubblika f’Jannar 2018 u din damet sa April 2018.

MINN META TAPPLIKA D-DIRETTIVA?

Ilha tapplika mit-3 ta’ Jannar 2002 u kellha ssir liġi fil-pajjiżi tal-UE sat-3 ta’ Lulju 2001.

SFOND

Għal aktar informazzjoni, ara:

• Emissjoni tal-ħoss minn tagħmir għall-użu ta’ barra (Kummissjoni Ewropea).

TERMINI EWLENIN

DOKUMENT EWLIENI

Direttiva 2000/14/KE tal-Parlament Ewpopew u l-Kunsill tat-8 ta’ Mejju 2000 dwar l-approssimazzjoni tal-liġijiet ta’ l-Istati Membri dwar emissjoni tal-ħoss fl-ambjent minn tagħmir għall-użu ta’ barra (ĠU L 162, 3.7.2000, pp. 1-78)

Emendi suċċessivi għad-Direttiva 2000/14/KE ġew inkorporati fit-test oriġinali. Din il-verżjoni konsolidata hija ta’ valur dokumentarju biss.

DOKUMENTI RELATATI

Rakkomandazzjoni tal-Kummissjoni tas- 6 ta’ Awwissu 2003 dwar il-linji gwida dwar metodi ta’ kompjutazzjoni interim riveduti għal ħsejjes industrijali, ħsejjes tal-inġenji tal-ajru, ħsejjes tat-traffiku fit-toroq u ħsejjes tal-ferroviji u dejta dwar emissjoni relatata (ĠU L 212, 22.8.2003, pp. 49-64)

Direttiva 2002/49/KE tal-Parlament Ewropew u tal-Kunsill tal-25 ta’ Ġunju 2002 li tirrigwardja l-istudju u l-amministrazzjoni tal-ħsejjes ambjentali — Dikjarazzjoni mill-Kummissjoni fil-Kumitat ta’ Konċiljazzjoni dwar id-Direttiva relatata mal-valutazzjoni u l-ġestjoni ta’ ħoss ambjentali (ĠU L 189, 18.7.2002, pp. 12-25)

Ara l-verżjoni konsolidata.

l-aħħar aġġornament 19.07.2018