Il-programm NER 300 — iż-żieda tat-teknoloġiji b’livell baxx ta’ karbonju

 

SOMMARJU TA’:

Deċiżjoni tal-Kummissjoni 2010/670/UE li tistabbilixxi l-kriterji u l-miżuri għall-finanzjament ta’ proġetti kummerċjali ta’ dimostrazzjoni li l-għan tagħhom huwa l-qbid u l-ħżin ġeoloġiku ta’ CO₂, f’kundizzjonijiet ta’ sigurtà għall-ambjent, kif ukoll ta’ proġetti ta’ dimostrazzjoni ta’ teknoloġiji innovattivi ta’ enerġija rinnovabbli, fl-ambitu tal-iskema għall-iskambju ta’ kwoti ta’ emissjonijiet ta’ gassijiet serra fi ħdan l-UE

X’INHU L-GĦAN TAD-DEĊIŻJONI?

In-NER 300* id-deċiżjoni tistabbilixxi r-regoli u l-kundizzjonijet li taħthom l-Unjoni Ewropea (UE) tiffinanzja proġetti innovattivi ta’ dimostrazzjoni ta’ livell baxx tal-karbonju biex taqbad u taħżen b’mod ġeoloġiku gassijiet tad-dijossidu tal-karbonju (CO₂). Dawn huma magħrufin bħala proġetti tal-qbid u l-ħżin tal-karbonju (CCS) u sorsi tal-enerġija rinnovabbli (RES).

Id-deċiżjoni ġiet emendata darbtejn:

• Id-Deċiżjoni tal-Kummissjoni (UE) 2015/191 estendiet il-limiti taż-żmien għad-deċiżjoni tal-investiment finali u d-data tad-dħul fis-seħħ minħabba l-kriżi ekonomika (ara l-Artikoli 9 u 11(1)).
• Id-Deċiżjoni tal-Kummissjoni (UE) 2017/2172 ippermettiet li fondi mhux distribwiti min-NER 300 jgħaddu għal strumenti finanzjarji oħra (InnovFin EDP u l-istrumenti tad-dejn il-Faċilità Nikkollegaw l-Ewropa).

PUNTI EWLENIN

• Il-proġetti CCS eliġibbli jiffokaw fuq il-ġenerazzjoni tal-enerġija u diversi applikazzjonijiet industrijali, bħal raffineriji u l-produzzjoni tal-ħadid u tal-azzar.
• Il-proġetti RES eliġibbli jkopru l-bijoenerġija, l-enerġija mix-xemx, il-fotovoltajka, l-enerġija mir-riħ, l-enerġija mill-oċeani u l-idro-enerġija (elettriku ġġenerat mill-moviment tal-ilma) u n-netwerks intelliġenti tal-enerġija (netwerks tal-enerġija mmodernizzati li jimmonitorjaw il-flussi tal-enerġija b’mod awtomatiku).
• L-ewwel sejħa għal proposti, li saret f’Diċembru 2012, poġġiet €1.1 biljun disponibbli għal 20 proġett tal-enerġija rinnovabbli. Dawn kienu se jibdew joperaw f’Diċembru 2016, skadenza li kienet estiża bid-Deċiżjoni (UE) 2015/191 sa Diċembru 2019, inkluż perjodu ta’ konċessjoni ta’ sena.
• It-tieni ċiklu, organizzat f’Lulju 2014, ta EUR 1 biljun lil 18-il proġett RES u proġett wieħed CCS. Oriġinarjament dawn kellhom jibdew joperaw sat-30 ta’ Ġunju 2018, iżda din l-iskadenza kienet estiża bid-Deċiżjoni (UE) 2015/191 sa Ġunju 2021, inkluż perjodu ta’ konċessjoni ta’ sena. Minħabba t-tfaqqiegħa tal-COVID-19, id-dati tad-dħul fis-seħħ ġew estiżi ulterjorment fuq bażi ta’ proġett bi proġett, u l-aħħar data hija Lulju 2022.
• Ebda sejħiet ulterjuri għal proposti NER 300 ma huma ppjanati. Il-Kummissjoni Ewropea issa qed tiffoka fuq il-proġetti diġà magħżula għall-finanzjament u qed timmonitorja l-progress tagħhom.
• Sal-15 ta’ Lulju kull sena, l-Istati Membri tal-UE għandhom jissottomettu rapport lill-Kummissjoni dwar l-istat tal-implimentazzjoni tal-proġetti għaddejjin. Dan se jkun fih informazzjoni dwar l-ammont ta’ CO₂ maħżun jew l-enerġija nadifa prodotta, l-iżborż tal-finanzjament u d-dettalji ta’ kwalunkwe problema sinjifikanti.
• Fondi li ma ntefqux minn proġetti rtirati taħt it-tieni sejħa NER 300 jgħaddu fil-Fond ta’ Innovazzjoni.

META TAPPLIKA D-DEĊIŻJONI?

Ilha tapplika mill-5 ta’ Novembru 2010.

SFOND

Għal aktar informazzjoni, ara:

• Il-Programm NER (il-Kummissjoni Ewropea).
• Fond għall-Innovazzjoni (il-Kummissjoni Ewropea)

TERMINI EWLENIN

DOKUMENTI EWLENIN

Id-Deċiżjoni tal-Kummissjoni 2010/670/UE tat-3 ta’ Novembru 2010 li tistabbilixxi l-kriterji u l-miżuri għall-finanzjament ta’ proġetti kummerċjali ta’ dimostrazzjoni li l-għan tagħhom huwa l-qbid u l-ħżin ġeoloġiku ta’ CO₂, f’kundizzjonijiet ta’ sigurtà għall-ambjent, kif ukoll ta’ proġetti ta’ dimostrazzjoni ta’ teknoloġiji innovattivi ta’ enerġija rinnovabbli, fl-ambitu tal-iskema għall-iskambju ta’ kwoti ta’ emissjonijiet ta’ gassijiet serra ġewwa l-Komunità stabbilita bid-Direttiva 2003/87/KE tal-Parlament Ewropew u tal-Kunsill (ĠU L 290 of 6.11.2010, pp. 39-48)

L-emendi suċċessivi għad-Deċiżjoni 2010/670/UE ġew inkorporati fit-test oriġinali. Din il-verżjoni kkonsolidata għandha valur dokumentarju biss.

DOKUMENTI RELATATI

Ir-Regolament Delegat tal-Kummissjoni (UE) 2019/856 tas-26 ta’ Frar 2019 li jissupplementa d-Direttiva 2003/87/KE tal-Parlament Ewropew u tal-Kunsill f’dak li għandu x’jaqsam mal-operat tal-Fond għall-innovazzjoni (ĠU L 140, 28.5.2019, pp. 6-17)

Id-Direttiva 2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi skema ta’ skambju ta’ kwoti ta’ emissjonijiet ta’ gassijiet serra fi ħdan il-Komunità u li temenda d-Direttiva tal-Kunsill 96/61/KE (ĠU L 275, 25.10.2003, pp. 32-46)

Ara l-verżjoni konsolidata.

l-aħħar aġġornament 13.07.2021