IL-KUMMISSJONI EWROPEA

Brussell, 30.5.2018

COM(2018) 383 final

2018/0207(COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jistabbilixxi l-Programm dwar id-Drittijiet u l-Valuri

{SEC(2018) 274 final}
{SWD(2018) 290 final}
{SWD(2018) 291 final}

MEMORANDUM TA’ SPJEGAZZJONI

1.KUNTEST TAL-PROPOSTA

Din il-proposta tipprevedi data ta' applikazzjoni mill-1 ta' Jannar 2021 u hija ppreżentata għal Unjoni ta' 27 Stat Membru, b'konformità man-notifika mir-Renju Unit bl-intenzjoni tiegħu li jirtira mill-Unjoni Ewropea u l-Euratom fuq il-bażi tal-Artikolu 50 tat-Trattat tal-Unjoni Ewropea li waslet għand il-Kunsill Ewropew fid-29 ta' Marzu 2017.

·Raġunijiet u għanijiet

L-għan tal-Unjoni Ewropea huwa li tippromovi l-paċi, il-valuri tagħha u l-benessri tal-popli tagħha. L-Unjoni hija komunità tad-dritt, u l-valuri tagħha jikkostitwixxu l-bażi proprja tal-eżistenza tagħha. Dawn il-valuri huma mnaqqxa fit-Trattati tal-UE, fil-Karta tad-Drittijiet Fundamentali tal-UE u fil-Konvenzjoni tan-NU dwar id-Drittijiet ta’ Persuni b’Diżabbiltà.

B’mod partikolari, l-Artikolu 2 tat-Trattat dwar l-UE jiddikjara li “l-Unjoni hija bbażata fuq il-valuri tar-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem, inklużi d-drittijiet ta' persuni li jagħmlu parti minn minoranzi. Dawn il-valuri huma komuni għall-Istati Membri f’soċjetà fejn jipprevalu l-pluraliżmu, in-nondiskriminazzjoni, it-tolleranza, il-ġustizzja, is-solidarjetà u l-ugwaljanza bejn in-nisa u l-irġiel”. L-Artikolu 3 jkompli jispeċifika li “l-mira tal-Unjoni hija li tippromovi l-paċi, il-valuri tagħha u l-benessri tal-popli tagħha” u, fost oħrajn, “għandha tirrispetta r-rikkezza tad-diversità kulturali u lingwistika tagħha, u għandha tassigura li jitħares u jkun żviluppat il-wirt kulturali Ewropew”. Fuq dawn il-linji, id-dokument ta’ riflessjoni tal-Kummissjoni dwar il-ġejjieni tal-finanzi tal-UE 1   jiddikjara li “l-baġit tal-UE jappoġġa dan l-għan, b’ħidma flimkien mal-baġits nazzjonali u b’mod kumplimentari għal sforzi oħra fil-livell Ewropej u dak nazzjonali”.

Dawk il-valuri jinkludu b’mod partikolari d-drittijiet fundamentali, in-nondiskriminazzjoni u l-ugwaljanza, il-ġlieda kontra r-razziżmu u t-tolleranza, ir-rispett għad-dinjità umana, l-istat tad-dritt u l-indipendenza tal-ġudikatura, id-diversità kulturali, soċjetà ċivili vibranti, il-libertà tal-espressjoni u l-parteċipazzjoni taċ-ċittadini fil-ħajja demokratika.

Barra minn hekk, sens ta’ appartenenza għal wirt kulturali, memorja u kommemorazzjoni komuni huwa prekondizzjoni neċessarja għall-parteċipazzjoni f’komunità demokratika u għat-tneħħija tal-isterjotipi u tad-diviżjonijiet bejn l-Ewropej.

Din il-Kummissjoni stabbiliet Unjoni ta’ bidla demokratika bħala waħda mill-10 prijoritajiet politiċi tagħha u qed taħdem f’dak il-kuntest biex tinvolvi liċ-ċittadini fir-rigward ta’ dak li qed isir mill-UE u l-mod kif taħdem u biex tibni fiduċja fl-Unjoni.

Il-finanzi tal-UE jistgħu jipprovdu valur miżjud u jgħinu biex il-valuri Ewropej komuni jkunu sostnuti.

Biex tippromovi valuri u drittijiet Ewropej komuni, l-UE ġabret flimkien diversi strumenti f’taħlita ta’ linji politiċi ta’ leġiżlazzjoni, politiki u finanzjament. B’mod partikolari, il-programmi ta’ finanzjament li ġejjin urew attenzjoni soċjetali qawwija u huma marbuta b’mod ċar mal-valuri Ewropej: il-Programm ta’ Drittijiet, Ugwaljanza u Ċittadinanza, il-Programm Ewropa għaċ-Ċittadini u l-Programm Ġustizzja.

Dawn il-programmi wasslu għal progress reali fir-rigward tal-promozzjoni tal-valuri u l-implimentazzjoni tal-ġabra ta’ drittijiet li l-leġiżlazzjoni tal-UE tagħti lill-persuni fl-Unjoni.

Xi eżempji ta’ dan huma li l-persuni huma aktar konxji mid-drittijiet tagħhom, mill-kultura u l-istorja komuni tagħhom; hemm aktar nisa li qed jaħdmu; id-drittijiet tat-tfal ingħataw promozzjoni u protezzjoni; is-sistemi ġudizzjarji huma aktar effettivi u l-operaturi fil-qasam tal-ġustizzja jafu meta u kif japplikaw l-acquis tal-UE u b’kooperazzjoni transfruntiera li qed titkattar, hemm aktar parteċipazzjoni demokratika u ċivika fil-livell tal-Unjoni, u komprensjoni aktar fil-fond tal-memorji, kulturi u tradizzjonijiet differenti u rispett għalihom.

Skont il-liġi tal-Unjoni, il-persuni jistgħu joqogħdu fuq ġabra ta’ drittijiet, fuq sistema ta’ ġustizzja indipendenti u effettiva u fuq ir-rispett tal-istat tad-dritt. Permezz ta’ fondi apposta, l-UE wriet l-impenn sod tagħha li tiġġieled kontra l-vjolenza kontra n-nisa u t-tfal u kontra l-forom kollha ta’ diskriminazzjoni, filwaqt li tippromovi u tipproteġi d-drittijiet ta’ persuni b’diżabbiltà u tappoġġa soċjetà ċivili vibranti u b’saħħitha fl-UE.

Minkejja l-progress miksub fl-ambitu tal-programmi attwali, xorta għad hemm diversi lakuni fl-oqsma ta’ politika inkwistjoni u spuntaw sfidi ġodda li jridu jiġu ttrattati.

L-isfidi komuni li qed taffaċċja l-UE fir-rigward tal-ġustizzja, id-drittijiet u l-valuri huma tnejn:

–Il-vokazzjoni tal-Unjoni li tkun komunità msejsa fuq valuri u drittijiet kondiviżi, wirt storika u kulturali kondiviż u l-involviment tal-persuni qed issib il-bsaten fir-roti minn xi movimenti li qed ifeġġu li jpoġġu f’diffikultà l-idea ta’ soċjetajiet miftuħa, inklużivi, koeżivi u demokratiċi li fihom is-sehem ċiviku u t-tgawdija tad-drittijiet jagħmluha possibbli li jinbena mod tolleranti ta’ konvivenza.

–In-natura frammentata u r-riżorsi limitati tal-programmi attwali ta’ finanzjament mill-UE ddedikati għall-valuri, id-drittijiet, iċ-ċittadinanza u l-ġustizzja jillimitaw il-kapaċità tal-UE li twieġeb għal sfidi eżistenti u ġodda. “In-nuqqas tal-baġit tal-programmi li jissodisfa d-domanda” ġie identifikat minn dawk li wieġbu għall-konsultazzjoni pubblika bħala l-ostaklu ewlieni li jista’ jxekkel lill-programmi attwali milli jilħqu l-objettivi tagħhom.

Analiżi aktar dettaljata turi wkoll dan li ġej:

–Il-persuni għadhom mhux qed igawdu mija fil-mija mid-drittijiet tagħhom: l-inugwaljanzi u d-diskriminazzjoni fuq bażi ta’ sess, oriġini razzjali jew etnika, reliġjon jew twemmin, diżabbiltà, età jew orjentazzjoni sesswali għadhom jeżistu. Il-vjolenza għadha realtà fil-ħajja ta’ kuljum ta’ ħafna nisa, tfal u persuni oħrajn f’riskju.

–Għad hemm ħafna xi jsir biex ikun żgurat li ċ-ċittadini jkunu konxji mill-valuri tal-UE u mill-benefiċċji taċ-ċittadinanza tal-UE, u biex jitħeġġu livell ogħla ta’ parteċipazzjoni politika u soċjetali u komprensjoni aħjar tal-Unjoni, tal-istorja, il-wirt kulturali u d-diversità tagħha;

–Id-drittijiet li ġġib magħha ċ-ċittadinanza tal-UE — dwar il-moviment liberu, il-protezzjoni konsolari u d-drittijiet elettorali — għadhom mhumiex magħrufa u implimentati bis-sħiħ, u dan ixekkel il-parteċipazzjoni politika u soċjetali taċ-ċittadini.

–Il-kriżijiet ekonomiċi, l-inugwaljanzi u sfidi li jibqgħu jippersistu bħall-migrazzjoni waslu biex uħud ipoġġu f’dubju d-drittijiet fundamentali u l-valuri li l-Unjoni Ewropea hija msejsa fuqhom qegħdin jiġu ttestjati. F’xi każijiet l-istat tad-dritt, l-aċċess għall-ġustizzja, l-ispazju għas-soċjetà ċivili u l-indipendenza tal-ġudikatura qed jitpoġġew f’diffikultà wkoll.

–Il-kooperazzjoni ġudizzjarja f’materji ċivili u kriminali mhijiex biżżejjed u l-aċċess għall-ġustizzja fl-Istati Membri għadu diffiċli. L-għodod għall-ġbir tal-informazzjoni komparattiva dwar il-kwalità, l-indipendenza u l-effiċjenza tas-sistemi ġudizzjarji tal-Istati Membri jridu jittejbu. Ostaklu ewlieni għar-rikonoxximent reċiproku u għall-kooperazzjoni ġudizzjarja huwa n-nuqqas ta’ fiduċja fis-sistemi ġudizzjarji ta’ Stati Membri oħrajn.

Il-konsegwenzi jekk dawn l-isfidi ma jiġux indirizzati jistgħu jkunu serji billi l-fiduċja fid-demokrazija u l-appoġġ għaż-żamma tal-valuri u d-drittijiet fundamentali jistgħu jiddgħajfu.

Dawn l-isfidi huma komuni għall-Istati Membri kollha u għandhom dimensjonijiet transfruntiera. Filwaqt li azzjoni fil-livell nazzjonali hija importanti, l-Istati Membri waħidhom ma għandhomx biżżejjed influwenza biex jittrattaw dawn l-isfidi.

Il-promozzjoni u d-difiża tal-valuri u tad-drittijiet tal-UE għandhom implikazzjonijiet profondi fuq il-ħajja politika, soċjali, kulturali, ġudizzjarja u ekonomika tal-Unjoni u jikkontribwixxu biex l-UE jkollha impatt tanġibbli fuq il-ħajja ta’ kuljum tal-persuni. L-azzjoni fil-livell tal-UE f’dan il-qasam trid tkun sostnuta u msaħħa sabiex jiġu indirizzati l-lakuni persistenti u l-isfidi l-ġodda, u sabiex il-promozzjoni, il-protezzjoni effettiva u r-rispett tad-drittijiet u l-valuri jkunu żgurati; dan se jgħin biex jitlesta s-suq intern u titkattar il-prosperità u l-koeżjoni fl-UE. Se jippermetti wkoll li l-UE jkollha rwol ewlieni fid-difiża u fil-promozzjoni tal-valuri tagħha fil-livell globali u se jikkontribwixxi għall-Għanijiet ta’ Żvilupp Sostenibbli tan-NU.

Fid-dawl ta’ dak imsemmi hawn fuq, il-Programm il-ġdid ta’ finanzjament “Drittijiet u Valuri” se jkollu l-għan li jipproteġi u jippromovi d-drittijiet u l-valuri kif imnaqqxa fit-Trattati tal-UE u fil-Karta tad-Drittijiet Fundamentali tal-UE, inkluż billi jingħata appoġġ lill-organizzazzjonijiet tas-soċjetà ċivili sabiex is-soċjetajiet miftuħa, demokratiċi u inklużivi jiġu sostnuti.

Dan il-programm il-ġdid, flimkien mal-Programm Ġustizzja, se jkun parti minn Fond ġdid għall-Ġustizzja, id-Drittijiet u l-Valuri tal-baġit tal-UE, li se jgħin fis-sostenn ta’ soċjetajiet miftuħa, demokratiċi, pluralistiċi u inklużivi. Se jgħin ukoll biex il-persuni jingħataw is-setgħa billi jipproteġi u jippromovi d-drittijiet u l-valuri billi jkompli jiżviluppa spazju tal-ġustizzja tal-UE.

·Konsistenza mad-dispożizzjonijiet ta’ politika eżistenti

Il-Fond għall-Ġustizzja, id-Drittijiet u l-Valuri jikkontribwixxi b’mod dirett għal bosta prijoritajiet tal-Kummissjoni Ewropea 2 , b’mod partikolari l-ħolqien ta’ spazju ta’ ġustizzja u ta’ drittijiet fundamentali bbażat fuq fiduċja reċiproka, suq intern iktar profond u iktar ġust u Unjoni ta’ bidla demokratika, tkabbir u impjiegi.

Il-programm il-ġdid huwa konsistenti mal-Pilastru Ewropew tad-Drittijiet Soċjali, ipproklamat konġuntament mill-Parlament Ewropew, mill-Kunsill u mill-Kummissjoni fis-17 ta’ Novembru 2017. Il-Pilastru huwa dwar li ċ-ċittadini jingħataw drittijiet ġodda u aktar effettivi, u jissejjes fuq 20 prinċipju ewlieni inklużi fost l-oħrajn l-ugwaljanza bejn is-sessi, l-opportunitajiet indaqs, l-appoġġ għat-tfal jew l-inklużjoni ta’ persuni b’diżabbiltà.

Iċ-ċittadinanza hija qasam ta’ politika tajjeb għall-iżviluppar ta’ sinerġiji bejn il-programmi ta’ finanzjament attwali għall-edukazzjoni, il-kultura u ċ-ċittadinanza tal-UE. Sinerġiji aktar b’saħħithom bejn il-Programm Ewropa għaċ-Ċittadin u l-Programm ta’ Drittijiet, Ugwaljanza u Ċittadinanza jistgħu jinkisbu permezz ta’ kooperazzjoni tematika aktar mill-qrib, pereżempju fil-qasam tal-ġlieda kontra r-razziżmu, tal-ugwaljanza, tal-wirt kulturali, tal-kommemorazzjoni u tad-diversità kulturali. L-attivitajiet ta’ kommemorazzjoni, ta’ ġemellaġġ bejn il-bliet jew ta’ netwerks pan-Ewropej huma maħsuba biex iwessgħu l-perspettivi u jiżviluppaw sens ta’ appartenenza Ewropea u ta’ identità Ewropea.

·Konsistenza ma’ politiki oħra tal-Unjoni

Il-Fond għall-Ġustizzja, id-Drittijiet u l-Valuri u ż-żewġ programmi sottostanti ta’ finanzjament se jgħinu biex jissaħħu u jinżammu l-valuri tal-UE u r-rispett tal-istat tad-dritt u biex ikunu sostnuti s-soċjetajiet miftuħa, demokratiċi, inklużivi u kreattivi mistennija mill-Ewropej. Diġà skont ir-regoli attwali, l-Istati Membri huma meħtieġa juru li r-regoli u l-proċeduri tagħhom fir-rigward tal-ġestjoni finanzjarja tal-flejjes tal-UE huma robusti u li l-finanzjament huwa protett biżżejjed mill-abbuż jew mill-frodi. Hija biss ġudikatura indipendenti li tiddefendi l-istat tad-dritt u ċ-ċertezza legali fl-Istati Membri kollha li tista’ fl-aħħar mill-aħħar tiggarantixxi li flus mill-baġit tal-UE jkunu protetti biżżejjed.

Fuq il-bażi tal-Artikolu 322 tat-Trattat dwar il-Funzjonament tal-Unjoni Ewropea (TFUE), il-Kummissjoni pproponiet Regolament dwar il-protezzjoni tal-baġit tal-Unjoni f’każ ta’ nuqqasijiet ġeneralizzati fir-rigward tal-istat tad-dritt fl-Istati Membri. Ir-Regolament il-ġdid se jikkumplimenta l-istrumenti li għandhom l-għan li jżommu l-valuri komuni tal-UE, inkluż dan il-programm.

Il-Programm dwar id-Drittijiet u l-Valuri se jiffinanzja politiki li jittrattaw il-valuri u d-drittijiet, u fil-qalba tiegħu se jżomm il-ħajja u l-parteċipazzjoni tal-persuni. F’dan ir-rigward, se jkollu sinerġiji mill-qrib ma’ bosta politiki u mal-programmi ta’ finanzjament tagħhom. Is-sinerġiji li ġejjin ta’ min jenfasizzahom:

–Sinerġiji mal-politiki okkupazzjonali, soċjali u edukattivi

Il-Fond Soċjali Ewropew tal-ġejjieni se jkun element kostitwenti ewlieni tar-raggruppament “Ninvestu fil-Persuni u fil-Valuri”. Dan l-element kostitwenti se jipprovdi appoġġ liċ-ċittadini billi jinvesti: fil-kapital uman, fl-impjiegi (fost iż-żgħażagħ), fl-innovazzjoni soċjali, fl-akkwiżizzjoni ta’ ħiliet diġitali bażiċi, fl-integrazzjoni tal-migranti, fl-inklużjoni soċjali tal-persuni l-aktar fil-bżonn, u f’livell għoli ta’ protezzjoni tas-saħħa tal-bniedem. Se jiġu żviluppati jew imsaħħa sinerġiji potenzjali, b’mod partikolari fir-rigward tal-promozzjoni tal-ugwaljanza bejn is-sessi u tal-opportunitajiet indaqs għal gruppi sottorappreżentati bħar-Rom u tal-promozzjoni tal-ġustizzja soċjali, tal-valuri tal-UE u tar-rispett għad-drittijiet fundamentali.

Is-sinerġiji mal-programm Erasmus+ jistgħu jissaħħu, ġaladarba Erasmus+ jappoġġa wkoll gruppi żvantaġġati — bħal żgħażagħ b’diżabbiltà — biex ikollhom aċċess aħjar għall-edukazzjoni, jappoġġa azzjonijiet li għandhom l-għan li jiksbu inklużjoni soċjali aktar b’saħħitha u għandu l-għan li jippromovi l-valuri komuni bis-saħħa tal-edukazzjoni. Is-sinerġiji ma’ Ewropa Kreattiva li diġà jeżistu se jinżammu u se jissaħħu, b’mod partikolari fir-rigward tal-wirt kulturali u tad-diversità kulturali.

–Is-sinerġiji mal-politika esterni, il-politika għall-kooperazzjoni għall-iżvilupp u l-politika tat-tkabbir

Il-promozzjoni tal-valuri u tad-drittijiet fl-UE hija riflessa bil-promozzjoni tagħhom fil-livell globali, inkluż permezz tar-rabtiet mal-implimentazzjoni tal-Għanijiet ta’ Żvilupp Sostenibbli. F’dan ir-rigward, jeħtieġ li jiġu żviluppati sinerġiji partikolarment mal-azzjoni esterna tal-UE fuq livell multilaterali iżda anki fl-għajnuna għall-kooperazzjoni għall-iżvilupp u fil-politika tat-tkabbir, biex tiġi żgurata l-koerenza fil-promozzjoni tad-drittijiet tal-bniedem, l-istat tad-dritt, l-ugwaljanza bejn is-sessi, l-antidiskriminazzjoni u t-tolleranza.

–Sinerġiji mas-Suq Uniku

Il-Programm dwar is-Suq Uniku tal-ġejjieni se jipprovdi appoġġ liċ-ċittadini u lill-konsumaturi fis-suq intern, u b’hekk se jgħin fit-tisħiħ tad-drittijiet tagħhom u se jqawwilhom is-setgħa. F’dan ir-rigward, dan se jikkomplementa l-azzjonijiet iffinanzjati mill-Programm dwar id-Drittijiet u l-Valuri li għandu lenti qawwija fuq it-tisħiħ tal-għoti tas-setgħa lill-persuni.

Billi jiffinanzja attivitajiet li jinvolvu d-dritt tal-kumpaniji, id-dritt kuntrattwali u l-ġlieda kontra l-ħasil tal-flus, il-Programm dwar is-Suq Uniku tal-ġejjieni se jikkomplementa l-Programm Ġustizzja u se jikkontribwixxi b’mod dirett għall-implimentazzjoni tal-politika tal-UE fil-qasam tal-ġustizzja u fil-ħolqien ta’ spazju tal-ġustizzja tal-UE. L-istess jgħodd għall-politika tal-konsumatur.

–Sinerġiji mal-migrazzjoni, mal-ġestjoni tal-Fruntieri u mas-sigurtà

–Sinerġiji mal-politika ambjentali

Il-kopertura ta’ kwistjonijiet relatati mas-saħħa fil-Programm dwar id-Drittijiet u l-Valuri se tikkomplementa l-kopertura ta’ kwistjonijiet relatati mas-saħħa fl-ambitu tal-politika ambjentali tal-UE, inklużi miżuri b’dimensjoni ambjentali tas-saħħa fl-ambitu tar-Regolament LIFE 3 .

–Integrazzjoni tal-azzjoni klimatika

Il-proposta tal-Kummissjoni għall-Qafas Finanzjarju Pluriennali 2021-2027 tistabbilixxi għan aktar ambizzjuż għall-integrazzjoni tal-azzjoni klimatika fl-programmi kollha tal-UE, b’mira kumplessiva ta’ 25 % tan-nefqa tal-UE li tikkontribwixxi għall-objettivi tal-klima. Il-kontribut ta’ dan il-programm għall-kisba ta’ din il-mira kumplessiva se jkun intraċċat permezz ta’ sistema ta’ markatur tal-klima tal-UE f’livell xieraq ta’ diżaggregazzjoni, inkluż l-użu ta’ metodoloġiji aktar preċiżi meta dawn ikunu disponibbli. Il-Kummissjoni se tibqa’ tippreżenta l-informazzjoni b’mod annwali f’termini ta’ approprjazzjonijiet ta’ impenn fil-kuntest tal-abbozz tal-baġit annwali.

Il-Kummissjoni, sabiex tappoġġa l-użu sħiħ tal-potenzjal tal-programm li jikkontribwixxi għall-objettivi tal-klima, se tfittex li tidentifika l-azzjonijiet rilevanti matul il-proċess ta’ tħejjija għall-programm u ta’ implimentazzjoni, rieżami u evalwazzjoni tiegħu.

2.BAŻI ĠURIDIKA, SUSSIDJARJETÀ U PROPORZJONALITÀ

·Bażi ġuridika

Il-proposta hija bbażata fuq l-Artikoli 16(2), 19(2), 21(2), 24, 167(5) u 168 tat-Trattat dwar il-Funzjonament tal-Unjoni Ewropea (TFUE). Il-kombinazzjoni ta’ dawn l-artikoli flimkien hija meħtieġa sabiex ikomplu jiġu appoġġati politiki li huma żviluppati u implimentati fil-programmi attwali. Mhijiex maħsuba biex testendi l-attivitajiet għal oqsma politiċi ġodda. It-taħlit ta’ aktar minn Artikolu wieħed hija meħtieġa sabiex jinkisbu l-objettivi ġenerali tal-programm b’mod komprensiv u sabiex jiġi adottat approċċ simplifikat u aktar effiċjenti għall-finanzjament.

Skont l-Artikolu 16(2) TFUE, l-Unjoni għandha s-setgħa li tadotta miżuri relatati mal-protezzjoni tal-individwi fir-rigward tal-ipproċessar ta’ data personali mill-istituzzjonijiet, mill-korpi u mill-aġenziji tal-Unjoni u mill-Istati Membri meta jwettqu attivitajiet li jaqgħu taħt il-kamp ta’ applikazzjoni tad-dritt tal-Unjoni, u r-regoli relatati mal-moviment liberu ta’ din id-data. Din id-dispożizzjoni tat-Trattat hija bażi ġuridika għal din il-proposta.

L-Artikolu 19(2) jipprevedi l-adozzjoni ta’ miżuri ta’ inċentiv għall-appoġġ ta’ azzjoni mill-Istati Membri rigward il-ġlieda kontra d-diskriminazzjoni fuq il-bażi tas-sess, tar-razza jew tal-oriġini etnika, tar-reliġjon jew tat-twemmin, tad-diżabbiltà u tal-età jew tal-orjentazzjoni sesswali, inklużi attivitajiet li jippromovu l-ugwaljanza bejn in-nisa u l-irġiel u li jappoġġaw id-drittijiet tat-tfal. Din id-dispożizzjoni tat-Trattat hija bażi ġuridika għal din il-proposta.

L-Artikolu 21(2) TFUE jipprevedi miżuri tal-Unjoni li jiffaċilitaw l-eżerċitar tad-drittijiet taċ-ċittadini li jiċċaqilqu minn post għall-ieħor u li jirrisjedu liberament fit-territorju tal-Istati Membri. L-azzjonijiet li jinfurmaw liċ-ċittadini u lill-awtoritajiet dwar id-drittijiet għal protezzjoni diplomatika u konsulari u dwar id-drittijiet tal-vot tagħhom jistgħu jkunu koperti wkoll b’dan l-Artikolu billi fil-prattika dawn jiffaċilitaw l-eżerċizzju tad-dritt taċ-ċittadin li jiċċaqlaq minn post għall-ieħor u li jirrisjedi liberament.

L-involviment demokratiku, il-parteċipazzjoni ċivika u t-trawwim tas-soċjetà ċivili huma elementi kostitwenti essenzjali tal-kunċett taċ-ċittadinanza tal-UE u tad-dritt li ċ-ċittadini jiċċaqilqu minn post għall-ieħor u li jirrisjedu liberament fl-UE kif definit fl-Artikolu 21(1). F’dan ir-rigward, dawn jikkostitwixxu fatturi u faċilitaturi kruċjali tad-dritt li ċ-ċittadini jiċċaqilqu minn post għall-ieħor u li jirrisjedu liberament fl-UE.

L-Artikolu 24 TFUE jipprevedi għall-inizjattivi taċ-ċittadini fis-sens tal-Artikolu 11 TUE. Tal-ewwel hija bażi ġuridika għal din il-proposta sa fejn tipprevedi għall-finanzjament tal-appoġġ tekniku u organizzattiv għall-implimentazzjoni tar-Regolament [(UE) Nru 211/2011], u b’hekk tirfed l-eżerċitar min-naħa taċ-ċittadini tad-dritt tagħhom li jniedu u li jappoġġaw inizjattivi taċ-ċittadini Ewropej.

L-Artikolu 167 TFUE jinkariga lill-Unjoni biex tikkontribwixxi għall-fjoritura tal-kulturi tal-Istati Membri, filwaqt li tirrispetta d-diversità nazzjonali u reġjonali tagħhom u fl-istess waqt tirriżalta l-wirt kulturali komuni. L-azzjonijiet mill-Unjoni għandhom jinkoraġġixxu l-kooperazzjoni bejn l-Istati Membri u jissupplimentaw l-azzjonijiet tagħhom f’oqsma bħal, fost l-oħrajn, it-titjib tal-għarfien u t-tixrid tal-kultura u l-istorja tal-popli Ewropej u l-konservazzjoni u s-salvagwardja ta’ wirt kulturali ta’ sinifikat Ewropew. L-Artikolu 167(5) TFUE huwa għalhekk il-bażi ġuridika għal din il-proposta.

L-Artikolu 168 TFUE jipprevedi livell għoli ta’ protezzjoni tas-saħħa tal-bniedem u azzjoni tal-Unjoni li tikkomplementa l-politiki nazzjonali fil-prevenzjoni ta’ mard fiżiku u mentali u li l-prevenzjoni ta’ sorsi ta’ periklu għas-saħħa fiżika u mentali. Il-vjolenza, inkluża dik kontra t-tfal u n-nisa, tikkostitwixxi periklu għas-saħħa fiżika u mentali. It-tfal huma ċittadini vulnerabbli u jeħtieġu livell akbar ta’ protezzjoni kontra dawn il-perikli li spiss jinkludu theddid transfruntiera. Il-vjolenza kontra n-nisa tikkostitwixxi wkoll theddida serja għas-saħħa fiżika u mentali tal-vittmi, li jkollhom bżonn livell għoli ta’ protezzjoni. L-Artikolu 168 TFUE huwa għalhekk il-bażi ġuridika għal din il-proposta.

·Sussidjarjetà (għall-kompetenza mhux esklużiva)

Il-promozzjoni u l-protezzjoni tal-valuri jeħtieġu opportunitajiet ta’ netwerking u mekkaniżmi ta’ kooperazzjoni transnazzjonali. L-Istati Membri li jaġixxu għal rashom tipikament dan ma jistgħux jiksbuh.

F’ħafna oqsma, bħall-ugwaljanza u n-nondiskriminazzjoni jew iċ-ċittadinanza, l-individwi huma protetti mid-dritt u mil-leġiżlazzjoni tal-Unjoni iżda mhumiex konxji biżżejjed mid-drittijiet tagħhom. Huwa biss permezz tas-sensibilizzazzjoni, tal-kondiviżjoni tal-aqwa prattiki u tal-għoti ta’ taħriġ fil-livell tal-UE li se jkun possibbli li jintlaħqu l-persuni fl-Istati Membri kollha, li l-istrutturi / l-awtoritajiet amministrattivi jkunu infurmati u li jintbagħat messaġġ konsistenti. Fl-istess waqt, l-azzjoni fuq il-livell tal-UE tipproduċi ekonomiji ta’ skala, tiżgura l-kwalità tal-azzjonijiet u tiggarantixxi li l-Istati Membri jkollhom interpretazzjoni konsistenti u applikazzjoni koerenti tal-istrumenti leġiżlattivi fl-UE kollha.

Il-finanzjament fil-livell nazzjonali jew reġjonali għal attivitajiet li jippromovu l-parteċipazzjoni taċ-ċittadini tal-UE huwa limitat ħafna, u f’bosta pajjiżi tal-UE l-finanzjament għal attivitajiet ta’ kommemorazzjoni huwa saħansitra anqas. Anki meta l-benefiċjarji jirċievu finanzjament għal attivitajiet simili, is-sorsi alternattivi ta’ finanzjament ma jagħtux prijorità lill-promozzjoni taċ-ċittadinanza u tal-kommemorazzjoni fil-livell tal-UE. Il-kapaċità limitata jew ineżistenti tal-partijiet ikkonċernati li jwettqu proġetti simili mingħajr l-appoġġ tal-finanzjament tal-UE tenfasizza l-livell ta’ dipendenza tal-benefiċjarji fuq fondi bħal dawn.

·Proporzjonalità

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

·Evalwazzjonijiet retrospettivi/kontrolli tal-idoneità tal-leġiżlazzjoni eżistenti

L-evalwazzjoni ta’ nofs it-terminu tal-Programm ta’ Drittijiet, Ugwaljanza u Ċittadinanza turi li l-problemi u l-ixprunaturi sottostanti għall-objettiv ġenerali u għall-objettivi speċifiċi tal-programm għadhom rilevanti. Il-ħtiġijiet kumplessivi ta’ appoġġ identifikati fil-bidu tal-Programm REC ma ġewx issodisfati għalkollox u għadhom rilevanti. Kumplessivament, il-programm REC qiegħed jindirizza kif suppost il-gruppi rilevanti iżda fl-implimentazzjoni jenħtieġ li ssir analiżi aktar sistematika tal-ħtiġijiet tagħhom. Barra minn hekk, ġew identifikati wkoll kwistjonijiet li jirrigwardaw l-ekwità (id-distribuzzjoni tal-fondi bejn il-gruppi ta’ benefiċjarji, l-involviment tal-korpi tal-ugwaljanza, l-integrazzjoni tal-perspettiva tal-ġeneri, l-integrazzjoni tad-drittijiet tat-tfal u tad-drittijiet tal-persuni b’diżabbiltà) fil-programmazzjoni, fl-implimentazzjoni u fil-monitoraġġ. Apparti dan, koordinazzjoni u skambju ta’ informazzjoni bejn il-programmi u l-proġetti tal-UE jkunu strumentali sabiex ikun hemm aktar koerenza bejniethom.

Il-progress fl-implimentazzjoni tal-Programm REC kien sodisfaċenti f’termini ta’ implimentazzjoni finanzjarja u ta’ lħiq tal-attivitajiet tal-programm lill-parteċipanti. Minn analiżi ta’ dak li kiseb il-programm REC jirriżulta li l-gruppi li jipparteċipaw fl-attivitajiet iffinanzjati mill-programm issa għandhom komprensjoni aħjar tad-dritt u tal-politiki tal-Unjoni. Il-benefiċjarji taw valutazzjoni ġeneralment pożittiva tal-attivitajiet li ħadu sehem fihom minkejja li hemm lok għal titjib ta’ din is-sostenibbiltà. Il-firxa tal-attivitajiet ta’ komunikazzjoni li jippromovu l-programm REC fil-biċċa l-kbira kienet suċċess. Madankollu, hemm bżonn li l-isforzi jibqgħu jiżguraw li jintlaħqu l-applikanti potenzjali kollha f’kull Stat Membru. Kisba ewlenija tal-programm il-ġdid meta mqabbel ma’ programmi preċedenti, kienet it-tnaqqis fil-piż fuq il-benefiċjarji f’termini ta’ ħin u flus: il-benefiċjarji mistħarrġa rrapportaw li kemm it-tħejjija tal-proposti kif ukoll l-implimentazzjoni tal-attivitajiet saru anqas inkonvenjenti.

It-tipi ta’ miżuri ta’ implimentazzjoni (għotjiet operattivi, għotjiet ta’ azzjoni, għotjiet diretti u akkwisti) huma konformi mal-objettivi tal-programm u mal-ħtiġijiet tal-partijiet ikkonċernati eliġibbli għall-appoġġ. Ir-Regolament dwar il-finanzjament REC ipprovda flessibilità kbira fir-rigward ta’ sejħiet ristretti, b’mod speċjali f’dak li jirrigwarda l-implimentazzjoni ta’ kampanji ta’ sensibilizzazzjoni fuq skala kbira rigward il-protezzjoni tad-data u l-prevenzjoni tal-vjolenza. Il-benefiċjarji tal-programm kellhom dubji dwar l-effiċjenza tal-proċess tal-applikazzjoni, id-doveri u l-mekkaniżmi tar-rappurtar u l-implimentazzjoni. Is-simplifikazzjoni hija qasam fejn għad hemm lok għal titjib.

L-evalwazzjonijiet u l-istudji L-Ewropa għaċ-Ċittadini tal-aħħar 10 snin tal-programm, urew li l-programm kellu rwol importanti bħala l-uniku programm tal-UE mmirat direttament lejn iċ-ċittadini u li jinvolvihom permezz ta’ approċċ minn isfel għal fuq. L-evalwazzjoni ta’ nofs it-terminu tal-programm L-Ewropa għaċ-Ċittadini 2014-2020 uriet li l-objettivi tiegħu kienu u għadhom rilevanti għall-problemi li jridu jiġu indirizzati, jiġifieri li jagħti kontribut għal mod kif iċ-ċittadini jifhmu l-Unjoni, l-istorja komuni u d-diversità tagħha, u li jrawwem iċ-ċittadinanza Ewropea u li jtejjeb il-kundizzjonijiet għall-parteċipazzjoni ċivika u demokratika fil-livell tal-Unjoni. Dawn iż-żewġ linji mhumiex biss kumplimentari iżda wkoll ta’ appoġġ reċiproku minħabba l-konnessjoni bejn it-tagħlimiet miksuba mill-imgħoddi u l-pjanijiet magħmula għall-ġejjieni tal-Ewropa. L-għadd kbir ta’ parteċipanti diretti u indiretti milħuqa mill-Ewropa għaċ-Ċittadini juri li l-programm kien effettiv bi prezz relattivament baxx. Fl-istess waqt, id-domanda kbira mill-applikanti għall-għotjiet turi li hemm lok għal finanzjament addizzjonali dan intalab mill-partijiet ikkonċernati kkonsultati matul l-evalwazzjoni. Fir-rapport tiegħu ta’ Marzu 2017 dwar l-implimentazzjoni tal-programm L-Ewropa għaċ-Ċittadini 2014-2020, il-Parlament Ewropew esprima l-appoġġ qawwi tiegħu għall-programm u appella għal żieda baġitarja sostanzjali. L-Ewropa għaċ-Ċittadini wera l-valur miżjud tiegħu fil-livell tal-UE bis-saħħa tal-impatt tiegħu fuq il-parteċipanti u r-rwol tiegħu bħala programm li jikkomplementa programmi oħra ta’ finanzjament tal-UE u inizjattivi ta’ politika dwar l-edukazzjoni, il-kultura u ċ-ċittadinanza tal-UE. L-aspetti li ġew identifikati għal titjib jinkludu b’mod partikolari ż-żieda fil-viżibbiltà tal-programm, ir-reviżjoni tal-indikaturi tal-monitoraġġ u l-iżvilupp ta’ sinerġiji aktar b’saħħithom ma’ programmi u inizjattivi ta’ finanzjament rilevanti oħra tal-UE.

·Konsultazzjonijiet mal-partijiet ikkonċernati

L-istrateġija ta’ konsultazzjoni li kienet ta’ appoġġ għal din il-ħidma ta’ tħejjija għall-programm kienet tinkludi: (i) konsultazzjoni pubblika dwar il-valuri u l-mobbiltà u dwar il-proposta għall-qafas finanzjarju pluriennali ta’ wara l-2020; (ii) konsultazzjonijiet pubbliċi għall-evalwazzjoni ta’ nofs it-terminu tal-programmi attwali ta’ finanzjament; u (iii) diversi konsultazzjonijiet ad hoc li l-Kummissjoni organizzat fl-għamla ta’ diskussjonijiet madwar mejda mal-partijiet ikkonċernati, konferenzi u seminars.

Konsultazzjoni pubblika miftuħa dwar il-fondi tal-UE fil-qasam tal-valuri u l-mobbiltà

Saru konsultazzjonijiet fil-kuntest ta’ evalwazzjonijiet ta’ programmi finanzjarji eżistenti tal-UE li jkopru bosta oqsma ta’ politika u b’mod partikolari trattaw il-prestazzjoni kurrenti u l-isfidi tal-ġejjieni. L-għan tal-konsultazzjoni pubblika dwar il-fondi tal-UE fil-qasam tal-valuri u l-mobbiltà kien li jiġbor l-opinjonijiet tal-partijiet ikkonċernati kollha dwar kif jista’ jsir l-aħjar użu minn kull euro tal-baġit tal-UE. Il-konsultazzjoni pubblika dwar il-fondi tal-UE fil-qasam tal-valuri u l-mobbiltà kienet miftuħa mill-10 ta’ Jannar 2018 sad-9 ta’ Marzu 2018 fi 23 lingwa uffiċjali tal-UE.

B’rispons għall-konsultazzjoni pubblika online dwar il-fondi tal-UE fil-qasam tal-valuri u l-mobbiltà, il-Kummissjoni rċeviet total ta’ 1 839 tweġiba mill-Ewropa kollha. Minn dawn, 52 % waslu minn rispondenti b’esperjenza tal-Erasmus+ u 43 % waslu minn rispondenti b’esperjenza tal-Programm Ewropa Kreattiva.

Kien hemm minn tal-anqas tweġiba waħda minn kull Stat Membru. Il-pajjiż ta’ residenza bl-ikbar għadd ta’ kontributi kumplessivament kien il-Ġermanja (24,4 %), segwit minn Franza (8,7 %), mill-Belġju (7,7 %) u minn Spanja (5,4 %).

Mill-1 839 kontribut li ntbagħat permezz tal-kwestjonarju online, 65,2 % (1 199) saru minn organizzazzjonijiet u 34,8 % (640) minn individwi.

Firxa wiesgħa ta’ partijiet ikkonċernati esprimew l-opinjonijiet tagħhom: minn dawk l-1 199 kontribut mill-organizzazzjonijiet, 355 (19,3 %) saru minn organizzazzjonijiet mhux governattivi, pjattaformi jew netwerks, 270 (14,7 %) minn intrapriżi privati (prinċipalment minn mikronegozji u negozji żgħar) u 127 (6,9 %) minn riċerkaturi u akkademiċi.

Il-ġabra fil-qosor tal-analiżi ta’ hawn taħt tikkonċentra fuq ir-rispondenti b’esperjenza tal-programmi tal-UE li ġejjin:

1. Il-Programm “L-Ewropa għaċ-Ċittadini” u / jew

2. Il-Programm ta’ Drittijiet, Ugwaljanza u Ċittadinanza u / jew

3. Il-Programm Ewropa Kreattiva u / jew

4. Programm Ġustizzja.

Dawn ta’ hawn taħt huma wħud mir-riżultati prinċipali:

–Skont ir-rispondenti, “Nippromovu identità Ewropea u valuri komuni” u “Nippromovu d-drittijiet u l-ugwaljanza” huma sfidi politiċi komuni importanti (fost l-ewwel erba’ sfidi msemmija) li jridu jiġu indirizzati f’kull wieħed mill-erba’ programmi. “Nappoġġaw iċ-ċittadinanza attiva, il-parteċipazzjoni demokratika fis-soċjetà u l-istat tad-dritt” u “Nippromovu l-inklużjoni soċjali u l-ġustizzja” jidhru wkoll li huma sfidi importanti li jridu jiġu indirizzati fil-programmi rilevanti u, f’livell anqas, fil-programm Ewropa Kreattiva li għalih huma aktar importanti l-isfidi ekonomiċi u d-diversità kulturali.

–“Nappoġġaw l-innovazzjoni”, “Inrawmu d-diversità kulturali u l-wirt kulturali Ewropew”, “Nippromovu l-identità Ewropea u l-valuri komuni” tqiesu bħala politiki li jindirizzaw l-isfidi b’mod sħiħ jew b’mod pjuttost tajjeb minn nofs jew aktar tal-parteċipanti b’esperjenza fl-erba’ programmi kkonċernati. Apparti dan, 52 % tar-rispondenti b’esperjenza fil-programm Ewropa Kreattiva jqisu li l-politika “Nappoġġaw il-kompetittività tas-setturi kulturali u kreattivi Ewropej” tindirizza l-isfidi b’mod sħiħ jew b’mod pjuttost tajjeb.

–Madwar 80 % tar-rispondenti b’esperjenza fl-erba’ programmi tal-UE msemmija hawn fuq jaqblu li dawn il-programmi jżidu l-valur bil-kbir jew b’mod pjuttost raġonevoli fuq dak li l-Istati Membri jistgħu jiksbu fil-livell nazzjonali, reġjonali u / jew lokali.

–L-ostakli ewlenin identifikati mir-rispondenti li jistgħu jxekklu lill-programmi / fondi attwali milli jilħqu l-objettivi tagħhom huma simili ħafna irrispettivament mill-programm inkwistjoni: “In-nuqqas fil-baġit tal-programmi biex jissodisfa d-domanda”; “Nuqqas ta’ appoġġ mogħti lill-partijiet ikkonċernati ta’ skala żgħira”; “Nuqqas ta’ appoġġ għal dawk li japplikaw għall-ewwel darba” huma identifikati bħala t-tliet ostakli prinċipali.

–Ir-rispondenti b’esperjenza f’wieħed jew aktar mill-erba’ programmi tal-UE jaqblu li “l-użu ta’ formoli ta’ applikazzjoni aktar issimplifikati”, “l-iffaċilitar ta’ netwerks u sħubijiet strutturati”, “l-iffaċilitar tal-finanzjament għal azzjonijiet li jkopru s-setturi kollha ta’ azzjoni” u “koordinazzjoni aħjar bejn programmi / fondi differenti” huma l-passi ewlenin li għandhom jittieħdu biex jiġu ssimplifikati u mnaqqsa l-piżijiet amministrattivi għall-benefiċjarji.

Ġew analizzati tliet xenarji ewlenin:

–L-istatus quo li jinżammu erba’ programmi ta’ finanzjament taħt is-sottoraggruppament “valuri” tal-baġit tal-UE, jiġifieri l-Programm ta’ Drittijiet, Ugwaljanza u Ċittadinanza, il-Programm Ġustizzja, il-Programm Ewropa Kreattiva u Programm “L-Ewropa għaċ-Ċittadini”.

–Bħala alternattiva għas-sitwazzjoni attwali u għax-xenarju bażi, it-tieni xenarju propona li jiġu żviluppati sinerġiji fost il-programmi attwali u li dawn jinġabru flimkien biex jiffurmaw kappa politika waħda dwar il-valuri tal-UE b’żewġ programmi ta’ finanzjament sottostanti: il-Programm Kultura, Drittijiet u Valuri Ewropej u l-Programm Ġustizzja.

–It-tielet xenarju kien jinvolvi l-ħolqien ta’ programm uniku ta’ finanzjament li jkopri l-erba’ programmi ta’ finanzjament elenkati hawn fuq.

Ix-xenarju bażi: l-istatus quo b’erba’ programmi ta’ finanzjament u tnaqqis baġitarju proporzjonali ta’ 15 %

L-analiżi tax-xenarju bażi bi tnaqqis possibbli ta’ 15 % tal-fondi disponibbli turi li se jkun hemm konsegwenzi negattivi fuq l-implimentazzjoni tal-politika. B’mod partikolari:

Tnaqqis ta’ 15 % fil-finanzjament tal-programm REC jirriżulta fi prijoritizzazzjoni annwali, jiġifieri konċentrazzjoni tal-finanzjament f’xi oqsma politiċi f’sena waħda u l-promozzjoni ta’ oqsma politiċi oħrajn fis-snin ta’ wara, f’kontradizzjoni mal-bżonnijiet dejjem jiżdiedu fil-qasam. Dan it-tnaqqis jimplika wkoll it-tnaqqis ta’ studji, ġbir ta’ data, kampanji ta’ sensibilizzazzjoni, eċċ., li huma kollha neċessarji għal politika u leġiżlazzjoni mibnija fuq bażi soda u fuq l-evidenza.

Għall-programm “L-Ewropa għaċ-Ċittadini”, tnaqqis baġitarju ta’ 15 % jfisser tnaqqis fil-baġit tax-xenarju bażi għal EUR 157 miljun li mhuwiex biżżejjed għall-impenn tal-Kummissjoni li tqiegħed liċ-ċittadini fil-qalba tal-proċess Ewropew. Il-massa kritika tal-parteċipanti u l-kopertura ġeografika tal-attivitajiet meħtieġa biex jintlaħaq l-impatt maħsub ma tibqax tintlaħaq. Allokazzjoni baġitarja stabbli (fuq il-bażi tal-baġit 2017) tippermetti kontinwità iżda xorta jkollha impatt limitat.

Tnaqqis ta’ 15 % fil-finanzjament għas-sottoprogramm MEDIA ta’ Ewropa Kreattiva inevitabbilment jimplika simplifikazzjoni u konċentrazzjoni fuq għadd limitat ta’ azzjonijiet. Tnaqqis fil-finanzjament ikollu impatt sproporzjonat fuq pajjiżi bi produzzjoni aktar baxxa u / jew pajjiżi b’żona ġeografika / lingwistika ristretta. Dan inaqqas ukoll l-għadd ta’ attivitajiet ta’ taħriġ għal professjonisti awdjoviżivi u l-għadd ta’ koproduzzjonijiet tal-UE, li huma fost l-opri li jivvjaġġaw l-aħjar tul il-fruntieri. It-tnaqqis fl-ambitu tan-netwerk tal-operaturi taċ-ċinema jkollu impatt negattiv fuq l-aċċess taċ-ċittadini tal-UE – b’mod notevoli mill-pajjiżi tal-Ewropa Ċentrali u tal-Lvant – għal kontenut Ewropew mhux nazzjonali.

Tnaqqis ta’ 15 % għas-sottoprogramm Kultura ta’ Ewropa Kreattiva mhux se jagħmilha possibbli li tintlaħaq massa kritika biex jiġu ssodisfati l-ħtiġijiet tas-setturi kulturali u kreattivi. Dan jimplika b’mod partikolari impatt imnaqqas fuq il-valur miżjud Ewropew u għalhekk impatt imnaqqas fuq id-diversità kulturali, inqas opportunitajiet għal kooperazzjoni transfruntiera, inqas opportunitajiet tas-suq u inqas possibiltajiet ta’ karriera għall-prattikanti mis-setturi kulturali u kreattivi. L-impatt soċjetali jitnaqqas u l-ftuħ internazzjonali tal-programm jista’ jkun li jkun hemm bżonn jiġi limitat għal-livell tiegħu qabel l-2014 u li l-parteċipazzjoni ta’ pajjiżi msieħba ġirien ewlenin tal-UE tiġi abbandunata.

Il-Garanzija Finanzjarja għas-setturi kulturali u kreattivi tista’ tkun mhedda, u dan ikun ta’ detriment għas-setturi kulturali u kreattivi, speċjalment għall-pajjiżi tal-Lvant li s-swieq finanzjarji tagħhom huma inqas żviluppati u fejn għalhekk hemm inqas possibilitajiet ta’ aċċess għall-finanzi.

Alternattiva mwarrba fil-valutazzjoni tal-impatt: programm wieħed

Għal raġunijiet relatati mal-bażi ġuridika, twarrbet l-alternattiva proposta fit-tielet xenarju ta’ strument / programm uniku. Il-biċċa l-kbira tal-attivitajiet u l-politiki huma bbażati fuq artikoli li jipprevedu proċedura leġiżlattiva ordinarja ħlief għall-programm attwali “L-Ewropa għaċ-Ċittadini”. Attwalment, l-enfażi prinċipali tal-programm “L-Ewropa għaċ-Ċittadini” hija fuq il-parteċipazzjoni ċivika u għalhekk dan huwa bbażat fuq l-Artikolu 352 TFUE (unanimità). Wara l-analiżi, l-objettivi tal-attivitajiet korrispondenti, li kieku l-enfażi tagħhom kellha tinbidel sa ċertu punt, jistgħu jiġu adattati sabiex jidħlu fl-approċċ il-ġdid ta’ programm usa’; fit-tali każ, dawn jaqgħu fil-kamp ta’ applikazzjoni tal-Artikolu 167(1) u (2) TFUE, li jipprevedi l-proċedura leġiżlattiva ordinarja. Madankollu, minħabba l-pożizzjoni tar-Renju Unit u tal-Irlanda dwar l-ispazju ta’ libertà, sigurtà u ġustizzja u l-pożizzjoni tad-Danimarka kif stipulat fil-Protokolli 21 u 22 annessi mat-Trattati, il-Programm Ġustizzja, filwaqt li jesiġi proċedura leġiżlattiva ordinarja, jenħtieġ jibqa’ strument separat.

Alternattiva proposta fil-valutazzjoni tal-impatt: qafas ta’ Valuri tal-UE b’żewġ programmi ta’ finanzjament

L-analiżi turi li hemm lok għal titjib f’rabta mas-sitwazzjoni attwali ta’ erba’ programmi ta’ finanzjament. Għalhekk, bħala alternattiva għas-sitwazzjoni u x-xenarju bażi attwali, huwa propost li jiġu żviluppati sinerġiji fost il-programmi u l-linji prerogattivi attwali u li dawn jinġabru flimkien taħt kappa politika waħda dwar il-valuri tal-UE b’żewġ programmi ta’ finanzjament sottostanti: il-programm Kultura, Drittijiet u Valuri Ewropej u l-programm Ġustizzja, kif ippreżentati hawn taħt:

L-arkitettura l-ġdida tal-finanzjament tal-futur bħala alternattiva għax-xenarju bażi għandha l-għan li:

–tiżviluppa sinerġiji fost il-politiki sabiex tinstab raġuni komuni għal azzjoni, filwaqt li jiġu rrispettati l-karatteristiċi speċifiċi tagħhom;

–tnaqqas it-trikkib bejniethom u l-frammentazzjoni;

–tiżgura l-flessibbiltà fl-allokazzjoni tal-fondi, filwaqt li tiżgura ċertu grad ta’ prevedibbiltà tal-finanzjament iddedikat għal kull politika;

–trawwem azzjonijiet transsettorjali u innovattivi;

–tiżgura massa kritika ta’ riżorsi għall-promozzjoni tal-valuri, filwaqt li tqis ukoll il-ħtiġijiet ta’ kull politika.

Alternattiva aċċettata

Il-Kummissjoni ddeċidiet li jkollha programm Ewropa Kreattiva awtonomu u li toħloq Fond għall-Ġustizzja, id-Drittijiet u l-Valuri li jinkludi żewġ programmi: il-Programm Ġustizzja u l-Programm dwar id-Drittijiet u l-Valuri. Il-valutazzjoni tal-impatt tibqa’ valida meta tirfed dawn l-inizjattivi. Din id-deċiżjoni hija riflessa fil-pakkett tal-proposta QFP ta’ wara l-2020 li l-Kummissjoni ppreżentat fit-2 ta’ Mejju 2018 4 .

·Is-simplifikazzjoni

Il-programm propost dwar id-Drittijiet u l-Valuri huwa r-riżultat tar-raggruppament ta’ żewġ programmi ta’ finanzjament, jiġifieri l-Programm ta’ Drittijiet, Ugwaljanza u Ċittadinanza u l-Programm “L-Ewropa għaċ-Ċittadini”. Dawn il-programmi huma strumenti żgħar, li ma jistgħux jilħqu massa kritika u li l-effettività tagħhom hija limitata mill-baġits relattivament baxxi tagħhom. Għaldaqstant, il-fatt li se jinġabru flimkien ifisser simplifikazzjoni, sinerġiji u rinfurzar reċiproku u se jgħin biex dawn isiru aktar effettivi.

B’mod partikolari, permezz tar-raggruppament mill-ġdid, taħt l-istess objettivi, tal-attivitajiet dwar iċ-ċittadinanza, il-proċeduri se jkunu aktar faċli għall-benefiċjarji li se jkollhom punt uniku ta’ kuntatt għall-proposti tagħhom.

Il-programm attwali “L-Ewropa għaċ-Ċittadini” diġà saritlu simplifikazzjoni sostanzjali b’miżuri bħal somom f’daqqa u rati fissi, applikazzjoni għall-formoli elettroniċi u deċiżjonijiet tal-għotjiet. F’dan is-sens, se titfittex li tinkiseb implimentazzjoni simplifikata għall-oqsma ta’ politika ffinanzjati mill-programm ta’ Drittijiet, Ugwaljanza u Ċittadinanza permezz ta’ miżuri bħal somom f’daqqa, rati fissi u kostijiet unitarji.

Il-kumplessità u d-diversità tar-regoli ta’ finanzjament tal-programmi attwali jirrappreżentaw ostaklu għall-applikanti. L-użu ta’ punt uniku ta’ kuntatt għal utenti esterni biex jipparteċipaw fiċ-ċiklu tal-ħajja tal-għotjiet (jiġifieri portal għall-parteċipanti ), li jinkludi sistema komprensiva ta’ ġestjoni tal-għotjiet, jista’ jkollu rwol importanti fis-simplifikazzjoni tal-aċċess għall-programm. Il-Programm ta’ Drittijiet, Ugwaljanza u Ċittadinanza jiġi ġestit permezz tas-sistema korporattiva tal-Kummissjoni li inizjalment kienet żviluppata għall-programm Orizzont 2020, filwaqt li l-programm “L-Ewropa għaċ-Ċittadini” jista’ jsegwi fi stadju aktar tard. Ġaladarba din il-migrazzjoni tkun iffinalizzata, il-Programm dwar id-Drittijiet u l-Valuri u l-benefiċjarji tiegħu se jibbenefikaw minn din is-simplifikazzjoni.

·Drittijiet fundamentali

L-objettivi tal-Programm dwar id-Drittijiet u l-Valuri huma marbutin mill-qrib mal-promozzjoni tad-drittijiet fundamentali u huma konformi mal-Karta tad-Drittijiet Fundamentali tal-UE. B’mod partikolari, il-programm il-ġdid, flimkien mal-Programm Ġustizzja, se jkun jifforma parti mill-Fond għall-Ġustizzja, id-Drittijiet u l-Valuri tal-baġit tal-UE li għandu l-għan li jsostni soċjetajiet miftuħa, demokratiċi u inklużivi, li jagħti s-setgħa lill-persuni billi jipproteġi u jippromovi d-drittijiet u l-valuri, u li jiżviluppa ulterjorment spazju tal-ġustizzja tal-UE.

4.IMPLIKAZZJONIJIET GĦALL-BAĠIT

5.ELEMENTI OĦRA

·Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar

Se jiġi żviluppat pjan ta’ implimentazzjoni biex jiġu speċifikati l-arranġamenti għat-tmexxija tal-programm.

Se jiġi żviluppat pjan ta’ monitoraġġ u ta’ evalwazzjoni biex jiġi speċifikat kif l-azzjonijiet se jitwettqu fil-prattika, u skont liema strateġija dwar id-data. Se jsir monitoraġġ tal-programm, kemm b’mod kontinwu (pereż. biex jirrispondi b’mod f’waqtu għal avvenimenti mhux previsti u għal ħtiġijiet eċċezzjonali) kif ukoll bażi regolari (biex jirrapporta dwar avvenimenti prinċipali bħal sejħiet għal proposti, analiżijiet ta’ proġetti, avvenimenti ta’ disseminazzjoni jew koordinazzjoni) u, meta rilevanti, il-monitoraġġ se jikkontribwixxi għall-indikaturi ewlenin tal-programm. Ir-rapporti ta’ monitoraġġ sussegwentement se jikkontribwixxu għal:

–evalwazzjoni ta’ nofs it-terminu (mhux aktar tard minn erba’ snin wara li tibda l-implimentazzjoni tal-programm), flimkien mal-evalwazzjoni finali tal-programmi predeċessuri; u

–evalwazzjoni finali (li trid issir mhux aktar tard minn erba’ snin wara tmiem il-perjodu ta’ programmazzjoni).

Dawn l-evalwazzjonijiet se jitwettqu f’konformità mal-paragrafi 22 u 23 tal-Ftehim Interistituzzjonali tat-13 ta’ April 2016 5 , li fih it-tliet istituzzjonijiet ikkonfermaw li l-evalwazzjonijiet ta’ leġiżlazzjoni u politika eżistenti jenħtieġ li jipprovdu l-bażi għall-valutazzjonijiet tal-impatt tal-opzjonijiet għal azzjoni ulterjuri. L-evalwazzjonijiet se jivvalutaw l-effetti tal-programm fil-post, fuq il-bażi tal-indikaturi / miri tal-programm filwaqt li janalizzaw fid-dettall kemm il-programm jista’ jitqies rilevanti, effettiv u effiċjenti, jipprovdi biżżejjed valur miżjud tal-UE u huwa koerenti ma’ politiki oħra tal-UE. L-evalwazzjonijiet se jinkludu t-tagħlimiet meħuda biex jiġu indirizzati dawk in-nuqqasijiet / il-problemi identifikati u rakkomandazzjonijiet biex ikun sfruttat kwalunkwe potenzjal għal titjib ulterjuri fl-azzjonijiet jew fir-riżultati tagħhom u biex jiġi mmassimizzat l-użu / l-impatt tagħhom.

Il-Kummissjoni se tirrapporta regolarment lill-Parlament Ewropew, lill-Kunsill u lil kull istituzzjoni rilevanti oħra tal-UE, permezz ta’ rapporti ta’ monitoraġġ u ta’ evalwazzjoni u tabella ta’ valutazzjoni pubblika tal-indikaturi ewlenin tal-programm.

Parti sinifikanti tal-programm se tiġi implimentata mill-Aġenzija Eżekuttiva għall-Edukazzjoni, l-Awdjoviżiv u l-Kultura (EACEA) taħt is-superviżjoni tas-servizzi tal-Kummissjoni responsabbli mill-programm.

·Spjegazzjoni fid-dettall tad-dispożizzjonijiet speċifiċi tal-proposta

L-objettiv ġenerali tal-Programm propost dwar id-Drittijiet u l-Valuri huwa “li jipproteġi u jippromovi d-drittijiet u l-valuri kif imnaqqxa fit-Trattati tal-UE u fil-Karta tad-Drittijiet Fundamentali tal-UE, inkluż billi jingħata appoġġ lill-organizzazzjonijiet tas-soċjetà ċivili sabiex is-soċjetajiet miftuħa, demokratiċi u inklużivi jiġu sostnuti”. Dan l-objettiv ġenerali se jintlaħaq permezz ta’ tliet objettivi speċifiċi: il-promozzjoni tal-ugwaljanza u tad-drittijiet, il-promozzjoni tal-involviment u tal-parteċipazzjoni taċ-ċittadini fil-ħajja demokratika tal-Unjoni, u l-ġlieda kontra l-forom kollha ta’ vjolenza. Il-programm se jipprevedi u jaċċellera s-sinerġiji bejn l-objettivi speċifiċi differenti tiegħu, biex jappoġġa b’mod aktar effettiv l-oqsma ta’ politika koperti minn dawn l-objettivi u biex iżid il-potenzjal tagħhom li jilħqu lill-persuni. Sabiex ikun effettiv, jenħtieġ li l-programm iqis in-natura speċifika tal-politiki differenti, il-gruppi differenti fil-mira tagħhom u l-ħtiġijiet partikolari tagħhom permezz ta’ approċċi mfassla apposta.

2018/0207 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jistabbilixxi l-Programm dwar id-Drittijiet u l-Valuri

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 16(2), l-Artikolu 19(2), l-Artikolu 21(2), l-Artikolu 24, l-Artikolu 167, u l-Artikolu 168 tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew, 6  

Wara li kkunsidraw l-opinjoni tal-Kumitat tar-Reġjuni, 7  

Filwaqt li jaġixxu skont il-proċedura leġiżlattiva ordinarja,

Billi:

(1)F’konformità mal-Artikolu 2 tat-Trattat dwar l-Unjoni Ewropea, “l-Unjoni hija bbażata fuq il-valuri tar-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem, inklużi d-drittijiet ta’ persuni li jagħmlu parti minn minoranzi. Dawn il-valuri huma komuni għall-Istati Membri f’soċjetà fejn jipprevalu l-pluraliżmu, in-nondiskriminazzjoni, it-tolleranza, il-ġustizzja, is-solidarjetà u l-ugwaljanza bejn in-nisa u l-irġiel”. L-Artikolu 3 jkompli jispeċifika li “l-mira tal-Unjoni hija li tippromovi l-paċi, il-valuri tagħha u l-benessri tal-popli tagħha” u, fost oħrajn, “għandha tirrispetta r-rikkezza tad-diversità kulturali u lingwistika tagħha u għandha tassigura li jitħares u jkun żviluppat il-wirt kulturali Ewropew”. Dawn il-valuri huma affermati mill-ġdid ulterjorment u artikolati fid-drittijiet, fil-libertajiet u fil-prinċipji stabbiliti fil-Karta tad-Drittijiet Fundamentali tal-Unjoni Ewropea.

(2)Dawn id-drittijiet u l-valuri jridu jibqgħu jiġu promossi u infurzati, u kondiviżi fost iċ-ċittadini u l-popli u jridu jkunu fil-qalba tal-proġett tal-UE. Għaldaqstant, fil-baġit tal-UE għandu jinħoloq Fond ġdid għall-Ġustizzja, id-Drittijiet u l-Valuri, li jinkludi l-programm Ġustizzja u l-programm dwar id-Drittijiet u l-Valuri. Fi żmien meta s-soċjetajiet Ewropej qed iħabbtu wiċċhom ma’ estremiżmu, radikaliżmu u diviżjonijiet, huwa aktar importanti minn qatt qabel li l-ġustizzja, id-drittijiet u l-valuri tal-UE jiġu promossi, imsaħħa u difiżi: id-drittijiet tal-bniedem, ir-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt. Dan se jkollu implikazzjonijiet diretti u profondi għall-ħajja politika, soċjali, kulturali u ekonomika fl-UE. Bħala parti mill-Fond il-ġdid, il-Programm Ġustizzja se jkompli jappoġġa l-iżvilupp ulterjuri tal-ispazju tal-ġustizzja tal-Unjoni u tal-kooperazzjoni transfruntiera. Il-Programm dwar id-Drittijiet u l-Valuri se jiġbor flimkien il-Programm ta’ Drittijiet, Ugwaljanza u Ċittadinanza 2014-2020 stabbilit permezz tar-Regolament (UE) Nru 1381/2013 tal-Parlament Ewropew u tal-Kunsill 8 u l-programm Ewropa għaċ-Ċittadini stabbilit permezz tar-Regolament tal-Kunsill (UE) Nru 390/2014 9 , (minn hawn ’il quddiem “il-Programmi predeċessuri”).

(3)Il-Fond għall-Ġustizzja, id-Drittijiet u l-Valuri u ż-żewġ programmi ta’ finanzjament sottostanti tiegħu se jiffokaw primarjament fuq il-persuni u l-entitajiet, li jikkontribwixxu biex id-drittijiet, id-diversità rikka u l-valuri komuni tagħna jieħdu l-ħajja u jkunu vibranti. L-objettiv aħħari huwa li titrawwem u tiġi sostnuta soċjetà bbażata fuq id-drittijiet, ugwali, inklużiva u demokratika. Dan jinkludi soċjetà ċivili vibranti, l-inkoraġġiment tal-parteċipazzjoni demokratika, ċivika u soċjali tal-persuni u t-trawwim tad-diversità rikka tas-soċjetà Ewropea, fuq il-bażi tal-istorja u l-memorja komuni tagħna. L-Artikolu 11 tat-Trattat tal-Unjoni Ewropea jispeċifika ulterjorment li l-istituzzjonijiet għandhom, permezz ta’ mezzi xierqa, jagħtu liċ-ċittadini u lill-assoċjazzjonijiet rappreżentattivi l-opportunità li jsemmgħu l-opinjonijiet tagħhom u jiskambjawhom fil-pubbliku fl-oqsma ta’ azzjoni kollha tal-Unjoni.

(4)Jenħtieġ li l-Programm dwar id-Drittijiet u l-Valuri jippermetti l-iżvilupp ta’ sinerġiji biex jiġu indirizzati l-isfidi li huma komuni għall-promozzjoni u għall-protezzjoni tal-valuri u biex tintlaħaq dimensjoni kritika sabiex jinkisbu riżultati konkreti fil-qasam. Dan għandu jinkiseb billi jimxi fuq il-passi tal-esperjenza pożittiva tal-Programmi predeċessuri. Dan għandu jippermetti li jiġi sfruttat bis-sħiħ il-potenzjal tas-sinerġiji, li jiġu appoġġati b’mod aktar effettiv l-oqsma politiċi koperti u li jiżdied il-potenzjal tagħhom biex jilħqu lill-persuni. Sabiex ikun effettiv, il-Programm għandu jqis in-natura speċifika tal-politiki differenti, il-gruppi differenti fil-mira tagħhom u l-ħtiġijiet partikolari tagħhom permezz ta’ approċċi mfassla apposta.

(5)Sabiex l-Unjoni Ewropea tersaq aktar qrib lejn iċ-ċittadini tagħha, huma meħtieġa diversi azzjonijiet u sforzi koordinati. Li ċ-ċittadini jinġabru flimkien fi proġetti ta’ ġemellaġġ jew netwerks ta’ bliet u li jingħata appoġġ lill-organizzazzjonijiet tas-soċjetà ċivili fl-oqsma koperti mill-programm se jikkontribwixxi biex jiżdied l-involviment taċ-ċittadini fis-soċjetà u fl-aħħar mill-aħħar l-involviment tagħhom fil-ħajja demokratika tal-Unjoni. Fl-istess waqt l-appoġġ mogħti lil attivitajiet li jippromovu l-komprensjoni reċiproka, id-diversità, id-djalogu u r-rispett lejn l-oħrajn irawwem sens ta’ appartenenza u identità Ewropea, fuq il-bażi ta’ komprensjoni reċiproka tal-valuri, il-kultura, l-istorja u l-wirt Ewropej. Il-promozzjoni ta’ sens ta’ appartenenza akbar fl-Unjoni u tal-valuri tal-Unjoni huwa partikolarment importanti fost iċ-ċittadini tar-reġjuni ultraperiferiċi tal-UE minħabba l-bogħod u d-distanza mill-Ewropa kontinentali.

(6)L-attivitajiet ta’ kommemorazzjoni u r-riflessjoni kritika dwar il-memorja storika tal-Ewropa huma meħtieġa biex iċ-ċittadini jsiru konxji mill-istorja komuni bħala l-pedament għal ġejjieni u skop morali komuni u għal valuri komuni. Ir-rilevanza ta’ aspetti storiċi, kulturali u interkulturali jenħtieġ għalhekk li titqies ukoll, kif ukoll ir-rabtiet bejn il-kommemorazzjoni u l-ħolqien ta’ identità Ewropea u s-sens ta’ appartenenza komuni.

(7)Jenħtieġ li ċ-ċittadini jkunu aktar konxji mid-drittijiet tagħhom li jirriżultaw miċ-ċittadinanza tal-Unjoni, u jenħtieġ li jħossuhom komdi jgħixu, jivvjaġġaw, jistudjaw, jaħdmu u jagħmlu xogħol volontarju fi Stat Membru ieħor, u jenħtieġ li jħossuhom kapaċi jgawdu u jeżerċitaw id-drittijiet taċ-ċittadinanza kollha tagħhom u jkollhom fiduċja fl-aċċess ugwali, fl-infurzabbiltà sħiħa u fil-protezzjoni sħiħa tad-drittijiet tagħhom mingħajr ebda diskriminazzjoni, irrispettivament minn fejn jinsabu fl-Unjoni. Is-soċjetà ċivili teħtieġ tkun appoġġata biex tippromovi u tissalvagwardja l-valuri komuni tal-UE skont l-Artikolu 2 TUE u toħloq sensibilizzazzjoni dwarhom, u biex tikkontribwixxi għat-tgawdija effettiva tad-drittijiet skont id-dritt tal-Unjoni.

(8)L-ugwaljanza bejn in-nisa u l-irġiel hija valur fundamentali u objettiv tal-Unjoni Ewropea. Id-diskriminazzjoni u t-trattament inugwali tan-nisa jiksru d-drittijiet fundamentali tagħhom u jxekklu l-parteċipazzjoni politika, soċjali u ekonomika sħiħa tagħhom fis-soċjetà. Barra minn hekk, l-eżistenza ta’ ostakli strutturali u kulturali tfixkel il-kisba ta’ ugwaljanza reali bejn is-sessi. Il-promozzjoni tal-ugwaljanza bejn is-sessi fl-attivitajiet kollha tal-Unjoni hija għalhekk attività ewlenija għall-Unjoni u xprun għat-tkabbir ekonomiku u jenħtieġ li tiġi appoġġata mill-programm.

(9)Il-vjolenza bbażata fuq is-sess u l-vjolenza kontra t-tfal u ż-żgħażagħ tikkostitwixxi ksur serju tad-drittijiet fundamentali. Il-vjolenza għadha hemm fl-Unjoni kollha, fil-kuntesti soċjali u ekonomiċi kollha, u għandha riperkussjonijiet serji fuq is-saħħa fiżika u psikoloġika tal-vittmi u fuq is-soċjetà inġenerali. It-tfal, iż-żgħażagħ u n-nisa huma partikolarment vulnerabbli għall-vjolenza, b’mod partikolari f’relazzjonijiet mill-qrib. Jenħtieġ li tittieħed azzjoni biex jiġu promossi d-drittijiet tat-tfal u biex tikkontribwixxi għall-protezzjoni tat-tfal minn danni u vjolenza, li huma perikolużi għas-saħħa fiżika u mentali tagħhom u jikkostitwixxu ksur tad-drittijiet tagħhom għall-iżvilupp, għall-protezzjoni u għad-dinjità. Il-ġlieda kontra l-forom kollha ta’ vjolenza, il-promozzjoni tal-prevenzjoni u l-protezzjoni u l-appoġġ għall-vittmi huma prijoritajiet tal-Unjoni li jgħinu biex jintlaħqu d-drittijiet fundamentali tal-individwi u jikkontribwixxu għall-ugwaljanza bejn in-nisa u l-irġiel. Dawn il-prijoritajiet jenħtieġ li jkunu appoġġati mill-Programm.

(10)Rieda politika qawwija u azzjoni koordinata bbażata fuq il-metodi u r-riżultati tal-Programm Daphne, il-Programm ta’ Drittijiet, Ugwaljanza u Ċittadinanza u l-Programm Ġustizzja preċedenti huma meħtieġa sabiex jiġu evitati u miġġielda l-forom kollha ta’ vjolenza u biex jiġu protetti l-vittmi. B’mod partikolari, mit-tnedija tiegħu fl-1997, il-finanzjament ta’ Daphne biex jiġu appoġġati l-vittmi tal-vjolenza u l-ġlieda kontra l-vjolenza fuq in-nisa, it-tfal u ż-żgħażagħ kien suċċess ġenwin kemm f’termini tal-popolarità tiegħu mal-partijiet ikkonċernati (awtoritajiet pubbliċi, istituzzjonijiet akkademiċi u organizzazzjonijiet mhux governattivi) u kemm f’termini tal-effettività tal-proġetti ffinanzjati. Dan iffinanzja proġetti li jissensibilizzaw, li jipprovdu servizzi ta’ appoġġ lill-vittmi u li jappoġġaw l-attivitajiet ta’ organizzazzjonijiet nongovernattivi (NGOs) li jaħdmu fil-post. Dan indirizza l-forom kollha ta’ vjolenza, bħal pereżempju l-vjolenza domestika, il-vjolenza sesswali, it-traffikar tal-bnedmin, kif ukoll forom ġodda ta’ vjolenza emerġenti bħaċ-ċiberbulliżmu. Għalhekk huwa importanti li jitkomplew dawn l-azzjonijiet kollha u li dawk ir-riżultati u t-tagħlimiet meħuda jitqiesu b’mod xieraq fl-implimentazzjoni tal-Programm.

(11)In-nondiskriminazzjoni huwa prinċipju fundamentali tal-Unjoni. L-Artikolu 19 tat-Trattat dwar il-Funzjonament tal-Unjoni Ewropea jipprevedi azzjoni għall-ġlieda kontra d-diskriminazzjoni bbażata fuq is-sess, ir-razza jew l-oriġini etnika, ir-reliġjon jew it-twemmin, id-diżabbiltà, l-età jew l-orjentazzjoni sesswali. In-nondiskriminazzjoni hija wkoll imnaqqxa fl-Artikolu 21 tal-Karta. Jenħtieġ li jitqiesu l-karatteristiċi speċifiċi tad-diversi forom ta’ diskriminazzjoni u jenħtieġ li tiġi żviluppata azzjoni xierqa b’mod parallel biex tiġi prevenuta u miġġielda d-diskriminazzjoni fuq il-bażi ta’ raġuni waħda jew aktar. Jenħtieġ li l-Programm jappoġġa azzjonijiet li jipprevenu u jikkumbattu d-diskriminazzjoni, ir-razziżmu, il-ksenofobija, l-antisemitiżmu, il-mibegħda kontra l-Musulmani u forom oħra ta’ intolleranza. F’dan il-kuntest, jenħtieġ li tingħata attenzjoni partikolari lill-prevenzjoni u lill-ġlieda kontra kull forma ta’ vjolenza, mibegħda, segregazzjoni u stigmatizzazzjoni, kif ukoll lill-ġlieda kontra l-bulliżmu, il-fastidju u t-trattament intolleranti. Il-Programm jenħtieġ li jiġi implimentat b’mod li jirrinforza kemm lilu stess kif ukoll l-attivitajiet l-oħra tal-Unjoni li jkollhom l-istess objettivi, b’mod partikolari dawk imsemmija fil-Komunikazzjoni tal-Kummissjoni tal-5 ta’ April 2011 intitolata “Qafas tal-UE għal Strateġiji Nazzjonali għall-Integrazzjoni tar-Roma fl-2020 10 ” u fir-Rakkomandazzjoni tal-Kunsill tad-9 ta’ Diċembru 2013 dwar miżuri ta’ integrazzjoni tar-Rom effettivi fl-Istati Membri 11 .

(12)L-ostakli attitudinali u ambjentali kif ukoll in-nuqqas ta’ aċċessibbiltà jfixklu l-parteċipazzjoni sħiħa u effettiva ta’ persuni b’diżabbiltà fis-soċjetà fuq bażi ugwali mal-oħrajn. Il-persuni b’diżabbiltà jaffaċċjaw ostakli biex, fost affarijiet oħra, ikollhom aċċess għas-suq tax-xogħol, jibbenefikaw minn edukazzjoni inklużiva u ta’ kwalità, jevitaw il-faqar u l-esklużjoni soċjali, igawdu aċċess għal inizjattivi kulturali u għall-midja jew jużaw id-drittijiet politiċi tagħhom. Bħala parti mill-Konvenzjoni tan-Nazzjonijiet Uniti dwar id-Drittijiet ta’ Persuni b’Diżabbiltà (UNCRPD), l-Unjoni u l-Istati Membri kollha tagħha impenjaw ruħhom li jippromovu, jipproteġu u jiżguraw tgawdija sħiħa u ugwali tad-drittijiet tal-bniedem u tal-libertajiet fundamentali kollha mill-persuni b’diżabbiltà kollha. Id-dispożizzjonijiet tal-UNCRPD saru parti integrali mill-ordni legali tal-Unjoni.

(13)Id-dritt għar-rispett tal-ħajja privata u tal-familja ta’ dak li jkun, għad-domiċilju u għall-komunikazzjonijiet (dritt għall-privatezza) huwa dritt fundamentali stabbilit fl-Artikolu 7 tal-Karta tad-Drittijiet Fundamentali. Il-protezzjoni tad-data personali hija dritt fundamentali stabbilit fl-Artikolu 8 tal-Karta tad-Drittijiet Fundamentali u fl-Artikolu 16 tat-Trattat dwar il-Funzjonament tal-Unjoni Ewropea. Il-konformità mar-regoli dwar il-protezzjoni tad-data personali hija soġġetta għall-kontroll minn awtoritajiet superviżorji indipendenti. Il-qafas legali tal-Unjoni, b’mod partikolari r-Regolament (UE) 2016/679 tal-Parlament Ewropew u tal-Kunsill 12 u d-Direttiva (UE) 2016/680 tal-Parlament Ewropew u tal-Kunsill 13 jistipulaw dispożizzjonijiet biex ikun żgurat li d-dritt għall-protezzjoni tad-data personali jkun effettivament protett. Dawn l-istrumenti legali jinkarigaw lill-awtoritajiet superviżorji nazzjonali tal-protezzjoni tad-data bil-kompitu li jippromovu kuxjenza pubblika u komprensjoni tar-riskji, tar-regoli, tas-salvagwardji u tad-drittijiet fir-rigward tal-ipproċessar tad-data personali. Jenħtieġ li l-Unjoni tkun tista’ twettaq attivitajiet ta’ sensibilizzazzjoni, twettaq studji u attivitajiet rilevanti oħra minħabba l-importanza tad-dritt għall-protezzjoni tad-data personali fi żminijiet ta’ żviluppi teknoloġiċi rapidi.

(14)L-Artikolu 24 TFUE jobbliga lill-Parlament Ewropew u lill-Kunsill biex jadottaw dispożizzjonijiet għall-proċeduri u l-kundizzjonijiet meħtieġa għal inizjattiva taċ-ċittadini fis-sens tal-Artikolu 11 tat-Trattat dwar l-Unjoni Ewropea. Dan sar permezz tal-adozzjoni tar-Regolament [(UE) Nru 211/2011 tal-Parlament Ewropew u tal-Kunsill 14 ]. Jenħtieġ li l-Programm jappoġġa l-iffinanzjar tal-appoġġ tekniku u organizzattiv għall-implimentazzjoni tar-Regolament [(UE) Nru 211/2011], u b’hekk jirfed l-eżerċitar tad-dritt taċ-ċittadini li jniedu u jappoġġaw inizjattivi taċ-ċittadini Ewropej.

(15)B’mod konformi mal-Artikoli 8 u 10 TFUE, il-Programm fl-attivitajiet kollha tiegħu jenħtieġ li jappoġġa l-integrazzjoni bejn is-sessi u l-integrazzjoni tal-objettivi tan-nondiskriminazzjoni.

(16)L-Artikolu 3(3) TUE jirrikjedi li l-Unjoni tippromovi l-protezzjoni tad-drittijiet tat-tfal, f’konformità mal-Artikolu 24 tal-Karta u mal-Konvenzjoni tan-Nazzjonijiet Uniti dwar id-Drittijiet tat-Tfal.

(17)F’konformità mal-atti tal-Unjoni dwar it-trattament indaqs, l-Istati Membri stabbilew korpi indipendenti għall-promozzjoni tat-trattament indaqs, magħrufa aħjar bħala “korpi tal-ugwaljanza”, sabiex jiġġieldu d-diskriminazzjoni fuq il-bażi tar-razza u tal-oriġini etnika kif ukoll tal-ġeneru. Madankollu, bosta Stati Membri għamlu pass ulterjuri lil hinn minn dawn ir-rekwiżiti u żguraw li l-korpi tal-ugwaljanza jkunu jistgħu wkoll jittrattaw id-diskriminazzjoni bbażata fuq raġunijiet oħra bħall-età, l-orjentazzjoni sesswali, ir-reliġjon u t-twemmin, id-diżabbiltà jew raġunijiet oħrajn. Il-korpi tal-ugwaljanza għandhom rwol ewlieni fil-promozzjoni tal-ugwaljanza u fl-iżgurar tal-applikazzjoni effettiva tal-leġiżlazzjoni dwar it-trattament indaqs billi jipprovdu, b’mod partikolari, assistenza indipendenti lill-vittmi tad-diskriminazzjoni, jagħmlu eżerċizzji ta’ stħarriġ indipendenti dwar id-diskriminazzjoni, jippubblikaw rapporti indipendenti u jagħmlu rakkomandazzjonijiet dwar kwalunkwe kwistjoni marbuta mad-diskriminazzjoni f’pajjiżhom. Huwa essenzjali li l-ħidma tal-korpi tal-ugwaljanza tkun ikkoordinata fil-livell tal-Unjoni f’dan ir-rigward. EQUINET inħoloq fl-2007. Il-membri tiegħu huma l-korpi nazzjonali għall-promozzjoni tat-trattament indaqs kif stabbiliti permezz tad-Direttivi tal-Kunsill 2000/43/KE 15 u 2004/113/KE 16 , u d-Direttivi 2006/54/KE 17 u 2010/41/UE 18 tal-Parlament Ewropew u tal-Kunsill. EQUINET jinsab f’sitwazzjoni ta’ eċċezzjoni, billi huwa l-unika entità li tiżgura l-koordinazzjoni tal-attivitajiet bejn il-korpi tal-ugwaljanza. Din l-attività ta’ koordinazzjoni minn EQUINET hija kruċjali għall-implimentazzjoni tajba tad-dritt tal-Unjoni kontra d-diskriminazzjoni fl-Istati Membri u jenħtieġ li tkun appoġġata mill-Programm.

(18)Il-korpi indipendenti tad-drittijiet tal-bniedem u l-organizzazzjonijiet tas-soċjetà ċivili għandhom rwol essenzjali fil-promozzjoni, fis-salvagwardja u fis-sensibilizzazzjoni tal-valuri komuni tal-Unjoni skont l-Artikolu 2 TUE, u biex jikkontribwixxu għat-tgawdija effettiva tad-drittijiet skont id-dritt tal-Unjoni, inkluża l-Karta tad-Drittijiet Fundamentali tal-UE. Kif rifless fir-Riżoluzzjoni tal-Parlament Ewropew tat-18 ta’ April 2018, appoġġ finanzjarju adegwat huwa essenzjali għall-iżvilupp ta’ ambjent konduċenti u sostenibbli għall-organizzazzjonijiet tas-soċjetà ċivili biex isaħħu r-rwol tagħhom u jwettqu l-funzjonijiet tagħhom b’mod indipendenti u effettiv. Filwaqt li jikkomplementaw l-isforzi fuq il-livell nazzjonali, il-fondi tal-UE jenħtieġ għalhekk li jikkontribwixxu biex jappoġġaw, jagħtu s-setgħa u jibnu l-kapaċità tal-organizzazzjonijiet tas-soċjetà ċivili indipendenti li huma attivi fil-promozzjoni tad-drittijiet tal-bniedem u li l-attivitajiet tagħhom jgħinu fl-infurzar strateġiku tad-drittijiet skont id-dritt tal-UE u l-Karta tad-Drittijiet Fundamentali tal-UE, inkluż permezz ta’ attivitajiet ta’ promozzjoni u sorveljanza, kif ukoll jikkontribwixxu, jissalvagwardjaw u jqajmu kuxjenza dwar il-valuri komuni tal-Unjoni fil-livell nazzjonali.

(19)Jenħtieġ li l-Kummissjoni tiżgura l-konsistenza kumplessiva, il-kumplimentarjetà u s-sinerġiji mal-ħidma tal-korpi, tal-uffiċċji u tal-aġenziji tal-Unjoni, b’mod partikolari l-Istitut Ewropew għall-Ugwaljanza bejn is-Sessi u l-Aġenzija għad-Drittijiet Fundamentali tal-Unjoni Ewropea, u jenħtieġ li tivvaluta l-ħidma ta’ atturi nazzjonali u internazzjonali oħrajn fl-oqsma koperti mill-Programm.

(20)Jenħtieġ li l-Programm ikun miftuħ, soġġett għal ċerti kondizzjonijiet, għall-parteċipazzjoni tal-membri tal-Assoċjazzjoni Ewropea tal-Kummerċ Ħieles (EFTA) li huma membri taż-Żona Ekonomika Ewropea (ŻEE) u tal-membri tal-EFTA li mhumiex membri tal-ŻEE, u ta’ pajjiżi Ewropej oħra. Pajjiżi aderenti, pajjiżi kandidati u pajjiżi kandidati potenzjali li jibbenefikaw minn xi strateġija ta’ qabel l-adeżjoni jenħtieġ li jkunu jistgħu jipparteċipaw ukoll fil-Programm.

(21)Sabiex tiġi żgurata allokazzjoni effiċjenti tal-fondi mill-baġit ġenerali tal-Unjoni, hemm bżonn li jiġi żgurat il-valur miżjud Ewropew tal-azzjonijiet kollha mwettqa, tal-kumplimentarjetà tagħhom mal-attivitajiet tal-Istati Membri, filwaqt li l-konsistenza, il-kumplimentarjetà u s-sinerġiji għandhom jiġu mfittxija permezz tal-programmi ta’ finanzjament li jappoġġaw oqsma ta’ politika b’rabtiet mill-qrib ma’ xulxin, b’mod partikolari fl-ambitu tal-Fond għall-Ġustizzja, id-Drittijiet u l-Valuri — kif ukoll tal-programm Ewropa Kreattiva, u Erasmus+ sabiex jiġi rrealizzat il-potenzjal ta’ salib it-toroq kulturali fl-oqsma tal-kultura, tal-midja, tal-arti, tal-edukazzjoni u tal-kreattività. Hemm bżonn li jinħolqu sinerġiji ma’ programmi Ewropej oħra ta’ finanzjament, b’mod partikolari fl-oqsma tal-impjiegi, tas-suq intern, tal-intrapriża, taż-żgħażagħ, tas-saħħa, taċ-ċittadinanza, tal-ġustizzja, tal-migrazzjoni, tas-sigurtà, tar-riċerka, tal-innovazzjoni, tat-teknoloġija, tal-industrija, tal-koeżjoni, tat-turiżmu, tar-relazzjonijiet esterni, tal-kummerċ u tal-iżvilupp.

(22)Dan ir-Regolament jistabbilixxi pakkett finanzjarju għall-Programm dwar id-Drittijiet u l-Valuri li jrid jikkostitwixxi l-ammont primarju ta’ referenza, fis-sens ta’ [il-punt 17 tal-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f’materji ta’ baġit u dwar ġestjoni finanzjarja tajba 19 ], għall-Parlament Ewropew u għall-Kunsill matul il-proċedura baġitarja annwali.

(23)Ir-Regolament (UE, Euratom) Nru [ir-RF il-ġdid] (ir-“Regolament Finanzjarju”) japplika għal dan il-Programm. Jistabbilixxi regoli dwar l-implimentazzjoni tal-baġit tal-Unjoni, inklużi r-regoli dwar għotjiet, premjijiet, akkwist pubbliku, implimentazzjoni indiretta, strumenti finanzjarji u garanziji baġitarji.

(24)It-tipi ta’ finanzjament u l-metodi ta’ implimentazzjoni skont dan ir-Regolament, jenħtieġ li jintgħażlu skont il-ħila tagħhom li jiksbu l-objettivi speċifiċi tal-azzjonijiet u li jagħtu r-riżultati, filwaqt li b’mod partikolari jitqiesu l-kostijiet tal-kontrolli, il-piż amministrattiv u r-riskju mistenni tan-nuqqas ta’ konformità. Dan jenħtieġ li jinkludi kunsiderazzjoni tal-użu ta’ somom f’daqqa, rati fissi u kostijiet ta’ unità, kif ukoll finanzjament mhux marbut ma’ kostijiet kif imsemmija fl-Artikolu 125(1) tar-Regolament Finanzjarju. F’konformità mar-Regolament Finanzjarju, ir-Regolament (UE, Euratom) Nru 883/2013 tal-Parlament Ewropew u tal-Kunsill 20 , ir-Regolament tal-Kunsill (Euratom, KE) Nru 2988/95 21 , ir-Regolament tal-Kunsill (Euratom, KE) Nru 2185/96 22 u r-Regolament tal-Kunsill (UE) 2017/1939 23  , l-interessi finanzjarji tal-Unjoni jridu jiġu protetti permezz ta’ miżuri proporzjonati, inklużi l-prevenzjoni, il-korrezzjoni u l-investigazzjoni ta’ irregolaritajiet u ta’ frodi, l-irkupru ta’ fondi mitlufa, imħallsa bi żball jew użati b’mod mhux korrett u fejn xieraq, l-impożizzjoni ta’ sanzjonijiet amministrattivi. B’mod partikolari, f’konformità mar-Regolament (UE, Euratom) Nru 883/2013 u r-Regolament (Euratom, KE) Nru 2185/96, l-Uffiċċju Ewropew Kontra l-Frodi (OLAF) jista’ jwettaq investigazzjonijiet amministrattivi, inklużi kontrolli u spezzjonijiet fil-post, bil-ħsieb li jistabbilixxi jekk kienx hemm frodi, korruzzjoni jew kull attività illegali oħra li taffettwa l-interessi finanzjarji tal-Unjoni. F’konformità mar-Regolament (UE) 2017/1939, l-Uffiċċju tal-Prosekutur Pubbliku Ewropew (l-UPPE) jista’ jinvestiga u jressaq każijiet ta’ frodi u reati kriminali oħrajn li jaffettwaw l-interessi finanzjarji tal-Unjoni, kif previst fid-Direttiva (UE) 2017/1371 tal-Parlament Ewropew u tal-Kunsill 24 . F’konformità mar-Regolament Finanzjarju, kwalunkwe persuna jew entità li tirċievi fondi tal-Unjoni trid tikkoopera bis-sħiħ fil-protezzjoni tal-interessi finanzjarji tal-Unjoni, tagħti d-drittijiet u l-aċċess meħtieġa lill-Kummissjoni, lill-OLAF, lill-UPPE u lill-Qorti Ewropea tal-Awdituri (QEA) u tiżgura li kwalunkwe parti terza involuta fl-implimentazzjoni tal-fondi tal-Unjoni tagħti drittijiet ekwivalenti.

(25)Il-pajjiżi terzi li huma membri taż-Żona Ekonomika Ewropea (ŻEE) jistgħu jieħdu sehem fil-programmi tal-Unjoni fil-qafas tal-kooperazzjoni stabbilita skont il-Ftehim ŻEE, li jipprevedi l-implimentazzjoni tal-programmi permezz ta’ deċiżjoni skont dan il-ftehim. Il-pajjiżi terzi jistgħu wkoll jipparteċipaw fuq il-bażi ta’ strumenti legali oħra. Jenħtieġ li tiġi introdotta dispożizzjoni speċifika f’dan ir-Regolament li tagħti d-drittijiet neċessarji u l-aċċess lill-uffiċjal tal-awtorizzazzjoni responsabbli, lill-Uffiċċju Ewropew Kontra l-Frodi (OLAF) u kif ukoll lill-Qorti Ewropea tal-Awdituri sabiex jeżerċitaw b’mod komprensiv il-kompetenzi rispettivi tagħhom.

(26)Ir-regoli finanzjarji orizzontali adottati mill-Parlament Ewropew u mill-Kunsill fuq il-bażi tal-Artikolu 322 tat-Trattat dwar il-Funzjonament tal-Unjoni Ewropea japplikaw għal dan ir-Regolament. Dawn ir-regoli huma stipulati fir-Regolament Finanzjarju u jiddeterminaw b’mod partikolari l-proċedura għall-istabbiliment u l-implimentazzjoni tal-baġit permezz ta’ għotjiet, akkwist, implimentazzjoni indiretta, u jipprovdu għal kontrolli dwar ir-responsabbiltà ta’ atturi finanzjarji. Ir-regoli adottati fuq il-bażi tal-Artikolu 322 TFUE jikkonċernaw ukoll il-protezzjoni tal-baġit tal-Unjoni f’każ ta’ defiċjenzi ġeneralizzati rigward l-istat tad-dritt fl-Istati Membri, billi r-rispett għall-istat tad-dritt hija prekundizzjoni essenzjali għal ġestjoni finanzjarja soda u effettiva tal-finanzjament mill-UE.

(27)Skont [l-Artikolu 94 tad-Deċiżjoni tal-Kunsill 2013/755/UE 25 ], persuni u entitajiet stabbiliti f’pajjiżi u territorji extra-Ewropej (overseas countries and territories, OCTs) huma eliġibbli għal finanzjament soġġett għar-regoli u għall-objettiv tal-Programm u għall-arranġamenti possibbli applikabbli għall-Istat Membru li magħhom il-pajjiż jew territorju extra-Ewropew rilevanti huwa marbut.

(28)Filwaqt li jirrifletti dwar l-importanza tal-indirizzar tat-tibdil fil-klima skont l-impenji tal-Unjoni biex jimplimenta l-Ftehim ta’ Pariġi u l-Għanijiet ta’ Żvilupp Sostenibbli tan-Nazzjonijiet Uniti, dan il-Programm se jikkontribwixxi biex jintegra l-azzjoni klimatika u għall-kisba ta’ mira kumplessiva ta’ 25 % ta’ nfiq tal-baġit tal-UE li jappoġġaw l-objettivi tal-klima. L-azzjonijiet rilevanti se jiġu identifikati matul it-tħejjija u l-implimentazzjoni tal-Programm, u vvalutati mill-ġdid fil-kuntest tal-evalwazzjoni tiegħu ta’ nofs it-terminu.

(29)Skont il-paragrafi 22 u 23 tal-Ftehim Interistituzzjonali għat-Tfassil Aħjar tal-Liġijiet tat-13 ta’ April 2016, hemm il-ħtieġa li jiġi evalwat dan il-Programm fuq il-bażi tal-informazzjoni miġbura permezz ta’ rekwiżiti speċifiċi ta’ monitoraġġ, filwaqt li jiġu evitati r-regolamentazzjoni żejda u l-piżijiet amministrattivi, b’mod partikolari għall-Istati Membri. Dawn ir-rekwiżiti, meta xieraq, jistgħu jinkludu indikaturi li jistgħu jitkejlu, bħala bażi għall-evalwazzjoni tal-effetti tal-Programm fil-post.

(30)Sabiex jiġu żgurati kundizzjonijiet uniformi għall-implimentazzjoni ta’ dan ir-Regolament, is-setgħa li jiġu adottati atti f’konformità mal-Artikolu 290 tat-Trattat dwar il-Funzjonament tal-Unjoni Ewropea jenħtieġ li tiġi delegata lill-Kummissjoni fir-rigward ta’ indikaturi kif indikat fl-Artikolu 14 u 16 u fl-Anness II. Huwa ta’ importanza partikolari li l-Kummissjoni twettaq konsultazzjonijiet xierqa matul il-ħidma preparatorja tagħha, inkluż f’livell espert, u li dawk il-konsultazzjonijiet jitwettqu f’konformità mal-prinċipji stabbiliti fil-Ftehim Interistituzzjonali dwar it-Tfassil Aħjar tal-Liġijiet tat-13 ta’ April 2016. B’mod partikolari, biex tiġi żgurata parteċipazzjoni ugwali fit-tħejjija tal-atti delegati, il-Parlament Ewropew u l-Kunsill jirċievu d-dokumenti kollha fl-istess ħin bħall-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi ta’ esperti tal-Kummissjoni li jittrattaw it-tħejjija ta’ atti delegati.

(31)Sabiex ikunu żgurati kundizzjonijiet uniformi għall-implimentazzjoni ta' dan ir-Regolament, jenħtieġ li l-Kummissjoni tingħata setgħat ta’ implimentazzjoni. Jenħtieġ li dawn is-setgħat jiġu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill 26 .

ADOTTAW DAN IR-REGOLAMENT:

Kapitolu I
Dispożizzjonijiet ġenerali

Artikolu 1
Suġġett

Dan ir-Regolament jistabbilixxi l-programm dwar id-Drittijiet u l-Valuri (“il-Programm”).

Jistabbilixxi l-għanijiet tal-Programm, il-baġit għall-perjodu 2021 – 2027, il-forom ta’ finanzjament tal-Unjoni u r-regoli għall-għoti ta’ dan it-tip ta’ finanzjament.

Artikolu 2
Għanijiet tal-programm

1.L-objettiv ġenerali tal-Programm huwa li jipproteġi u jippromovi d-drittijiet u l-valuri kif imnaqqxa fit-Trattati tal-UE, inkluż billi jingħata appoġġ lill-organizzazzjonijiet tas-soċjetà ċivili sabiex is-soċjetajiet miftuħa, demokratiċi u inklużivi jiġu sostnuti.

2.Fl-ambitu tal-objettivi ġenerali stabbiliti fil-paragrafu 1, il-programm għandu l-objettivi speċifiċi li ġejjin li jikkorrispondu għal-linji:

(a)għall-promozzjoni tal-ugwaljanza u tad-drittijiet (il-linja għall-Ugwaljanza u d-drittijiet),

(b)    għall-promozzjoni tal-involviment u tal-parteċipazzjoni taċ-ċittadini fil-ħajja demokratika tal-Unjoni (il-linja għall-Involviment u l-parteċipazzjoni taċ-ċittadini),

(c)għall-ġlieda tal-vjolenza (il-linja Daphne).

Artikolu 3
Il-linja għall-Ugwaljanza u d-drittijiet

Fl-ambitu tal-objettivi speċifiċi stabbiliti fil-punt (a) tal-Artikolu 2(2), il-Programm għandu jiffoka fuq:

(a)il-prevenzjoni u l-ġlieda tal-inugwaljanzi u d-diskriminazzjoni fuq bażi ta’ sess, oriġini razzjali jew etnika, reliġjon jew twemmin, diżabbiltà, età jew orjentazzjoni sesswali, u li jappoġġa politiki komprensivi li jippromovu l-ugwaljanza bejn is-sessi u l-ġlieda kontra d-diskriminazzjoni u l-integrazzjoni tagħhom kif ukoll politiki li jikkumbattu r-razziżmu u l-forom kollha ta’ intolleranza;

(b)il-protezzjoni u l-promozzjoni tad-drittijiet tat-tfal, id-drittijiet tal-persuni b’diżabbiltà, id-drittijiet taċ-ċittadinanza tal-Unjoni u d-dritt għall-protezzjoni tad-data personali.

Artikolu 4
Linja għall-Involviment u l-parteċipazzjoni taċ-ċittadini

Fl-ambitu tal-objettivi speċifiċi stabbiliti fil-punt (b) tal-Artikolu 2(2), il-Programm għandu jiffoka fuq:

(a)il-komprensjoni taċ-ċittadini dwar l-Unjoni, l-istorja, il-wirt kulturali u d-diversità tagħha;

(b)il-promozzjoni tal-iskambju u l-kooperazzjoni bejn iċ-ċittadini ta’ pajjiżi differenti; il-promozzjoni tal-parteċipazzjoni ċivika u demokratika taċ-ċittadini billi jippermetti liċ-ċittadini u lill-assoċjazzjonijiet rappreżentattivi jsemmgħu l-opinjonijiet tagħhom u jiskambjawhom fil-pubbliku fl-oqsma ta’ azzjoni kollha tal-Unjoni;

Artikolu 5
Il-linja Daphne

Fl-ambitu tal-objettivi speċifiċi stabbiliti fil-punt (c) tal-Artikolu 2(2), il-Programm għandu jiffoka fuq:

(a)il-prevenzjoni u l-ġlieda ta’ kull forma ta’ vjolenza kontra t-tfal, iż-żgħażagħ u n-nisa, kif ukoll il-vjolenza kontra gruppi oħra f’riskju;

(b) l-appoġġ u l-protezzjoni tal-vittmi ta’ tali vjolenza.

Artikolu 6
Baġit

1.Il-pakkett finanzjarju għall-implimentazzjoni tal-Programm għall-perjodu mill-2021 – 2027 għandu jkun ta’ EUR [641 705 000] fi prezzijiet kurrenti.

2.Fl-ammont imsemmi fil-paragrafu 1, l-ammont indikattiv li ġej għandu jiġi allokat għall-objettiv li ġej:

(a)EUR [408.705.000] għall-objettivi speċifiċi msemmija fl-Artikolu 2(2)(a) u 2(2)(c);

(b)EUR [233.000.000] għall-objettivi speċifiċi msemmija fl-Artikolu 2(2)(b);

3.L-ammont imsemmi fil-paragrafu 1 jista’ jintuża għal assistenza teknika u amministrattiva għall-implimentazzjoni tal-Programm, bħal attivitajiet preparatorji, ta’ monitoraġġ, ta’ kontroll, ta’ awditu u ta’ evalwazzjoni inklużi sistemi korporattivi tat-teknoloġiji tal-informazzjoni, studji, laqgħat ta’ esperti, komunikazzjonijiet dwar prijoritajiet u oqsma marbuta mal-objettivi ġenerali tal-programm.

4.Mingħajr preġudizzju għar-Regolament Finanzjarju, in-nefqa għall-azzjonijiet li jirriżultaw minn proġetti inklużi fl-ewwel programm ta’ ħidma tista’ tkun eliġibbli mill-1 ta’ Jannar 2021.

5.Ir-riżorsi allokati lill-Istati Membri taħt ġestjoni konġunta jistgħu, fuq it-talba tagħhom, jiġu ttrasferiti għall-Programm. Il-Kummissjoni għandha timplimenta dawn ir-riżorsi direttament f’konformità mal-Artikolu 62(1)(a) tar-Regolament Finanzjarju jew indirettament f’konformità mal-Artikolu 62(1)(c). Fejn possibbli dawn ir-riżorsi għandhom jintużaw għall-benefiċċju tal-Istat Membru kkonċernat.

Artikolu 7
Pajjiżi terzi assoċjati mal-Programm

1.Il-Programm għandu jkun miftuħ għall-pajjiżi li ġejjin dment li jiġu ssodisfati l-kundizzjonijiet:

(a)Membri tal-Assoċjazzjoni Ewropea tal-Kummerċ Ħieles (EFTA) li huma membri taż-Żona Ekonomika Ewropea (ŻEE), f’konformità mal-kundizzjonijiet stabbiliti fil-Ftehim ŻEE;

(b)il-pajjiżi aderenti, il-pajjiżi kandidati u l-pajjiżi kandidati potenzjali, f’konformità mal-prinċipji ġenerali u t-termini u l-kundizzjonijiet ġenerali għall-parteċipazzjoni ta’ dawk il-pajjiżi fil-programmi tal-Unjoni stabbiliti fil-ftehimiet qafas rispettivi u fid-deċiżjonijiet tal-Kunsill ta’ Assoċjazzjoni, jew fi ftehimiet simili, u f’konformità mal-kundizzjonijiet speċifiċi stabbiliti fi ftehimiet bejn l-Unjoni u dawk il-pajjiżi;

(c)il-pajjiżi koperti mill-Politika Ewropea tal-Viċinat, f’konformità mal-prinċipji ġenerali u t-termini u l-kundizzjonijiet ġenerali għall-parteċipazzjoni ta’ dawk il-pajjiżi fil-programmi tal-Unjoni stabbiliti fil-ftehimiet qafas rispettivi u fid-deċiżjonijiet tal-Kunsill ta’ Assoċjazzjoni, jew fi ftehimiet simili, u f’konformità mal-kundizzjonijiet speċifiċi stabbiliti fi ftehimiet bejn l-Unjoni u dawk il-pajjiżi.

(d)Il-pajjiżi terzi, f’konformità mal-kundizzjonijiet stabbiliti fi ftehim speċifiku li jkopri l-parteċipazzjoni tal-pajjiż terz fi kwalunkwe programm tal-Unjoni, sakemm dak il-ftehim:

-jiżgura bilanċ ġust fir-rigward tal-kontribuzzjonijiet u tal-benefiċċji tal-pajjiż terz li jkun qed jipparteċipa fil-programmi tal-Unjoni;

-jistabbilixxi l-kundizzjonijiet tal-parteċipazzjoni fil-programmi, inkluż il-kalkolu tal-kontribuzzjonijiet finanzjarji għal programmi individwali u l-kostijiet amministrattivi tagħhom. Dawn il-kontribuzzjonijiet għandhom jikkostitwixxu dħul assenjat f’konformità mal-Artikolu [21(5)] tar-[Regolament Finanzjarju l-ġdid];

-ma jagħtix lill-pajjiż terz, is-setgħa li jieħu deċiżjonijiet dwar il-programm;

-jiggarantixxi d-drittijiet tal-Unjoni li tiżgura ġestjoni finanzjarja tajba u li tipproteġi l-interessi finanzjarji tagħha.

Artikolu 8
Implimentazzjoni u forom ta’ finanzjament mill-UE

1.Il-Programm għandu jiġi implimentat b’ġestjoni diretta skont ir-Regolament Finanzjarju jew b’ġestjoni indiretta flimkien ma’ korpi msemmija fl-Artikolu 61(1)(c) tar-Regolament Finanzjarju.

2.Il-Programm jista’ jipprovdi finanzjament fi kwalunkwe waħda mill-forom stabbiliti fir-Regolament Finanzjarju.

3.[Il-kontribuzzjonijiet għal mekkaniżmu ta’ assigurazzjoni reċiproku jistgħu jkopru r-riskju assoċjat mal-irkupru ta’ fondi dovuti minn riċevituri u għandhom jitqiesu bħala garanzija suffiċjenti skont ir-Regolament Finanzjarju. Id-dispożizzjonijiet stipulati [fl-Artikolu X] tar-Regolament XXX [is-suċċessur tar-Regolament dwar il-Fond ta’ Garanzija] għandhom japplikaw].

Artikolu 9
Tipi ta’ azzjonijiet

L-azzjonijiet li jikkontribwixxu għall-kisba ta’ objettiv speċifiku speċifikat fl-Artikolu 2 jistgħu jirċievu finanzjament skont dan ir-Regolament. B’mod partikolari, l-attivitajiet elenkati fl-Anness I għandhom ikunu eliġibbli għal finanzjament.

Kapitolu II
Għotjiet

Artikolu 10
Għotjiet

1.Għotjiet li jaqgħu taħt il-Programm għandhom jingħataw u jiġu ġestiti skont it-Titolu VIII tar-Regolament Finanzjarju.

2.Il-kumitat ta’ evalwazzjoni jista’ jkun magħmul minn esperti esterni.

Artikolu 11
Finanzjament kumulattiv, [kumplimentari] u kkombinat

1.Azzjoni li tkun irċeviet kontribuzzjoni skont il-Programm tista’ tirċievi wkoll kontribuzzjoni minn kull programm ieħor tal-Unjoni, inklużi Fondi taħt ġestjoni kondiviża, sakemm il-kontribuzzjonijiet ma jkoprux l-istess kostijiet. [Il-finanzjament kumulattiv ma għandux jaqbeż it-total tal-kostijiet eliġibbli tal-azzjoni u l-appoġġ minn diversi programmi tal-Unjoni jista’ jiġi kkalkulat fuq bażi prorata].

2.Jekk il-Programm u l-Fondi taħt ġestjoni kondiviża msemmija fl-Artikolu 1 tar-Regolament (UE) [XX] [CPR] jipprovdu b’mod konġunt appoġġ finanzjarju għal azzjoni waħda, dik l-azzjoni għandha tiġi implimentata f’konformità mar-regoli stabbiliti f’dan ir-Regolament, inklużi r-regoli dwar l-irkupru ta’ ammonti mħallsa indebitament.

3.L-azzjonijiet eliġibbli skont il-Programm u konformi mal-kundizzjonijiet imsemmija fit-tieni subparagrafu jistgħu jiġu identifikati bl-għan li jiġu ffinanzjati mill-Fondi taħt ġestjoni kondiviża. F’dan il-każ, għandhom japplikaw ir-rati ta’ kofinanzjament u r-regoli ta’ eliġibbiltà stipulati f’dan ir-Regolament.

L-azzjonijiet imsemmija fl-ewwel subparagrafu għandhom jikkonformaw mal-kundizzjonijiet kumulattivi li ġejjin:

(a)dawn ikunu ġew ivvalutati f’sejħa għal proposti skont il-Programm;

(b)dawn iħarsu l-ħtiġijiet minimi ta’ kwalità ta’ din is-sejħa għal proposti;

(c)dawn ma jistgħux jiġu ffinanzjati skont din is-sejħa għal proposti minħabba restrizzjonijiet baġitarji.

L-azzjonijiet għandhom jiġu implimentati mill-awtorità ta’ ġestjoni msemmija fl-Artikolu [65] tar-Regolament (UE)[XX] [CPR] f’konformità mar-regoli stabbiliti f’dak ir-Regolament u r-regolamenti speċifiċi għall-fondi, inklużi regoli dwar il-korrezzjonijiet finanzjarji.”

Artikolu 12
Entitajiet eliġibbli

1.Il-kriterji tal-eliġibbiltà stabbiliti fil-paragrafi minn 2 sa 3 għandhom japplikaw flimkien mal-kriterji stabbiliti fl-[Artikolu 197] tar-Regolament Finanzjarju.

2.Huma eliġibbli l-entitajiet li ġejjin:

(a)entitajiet ġuridiċi stabbiliti fi kwalunkwe wieħed mill-pajjiżi li ġejjin:

·Stat Membru jew pajjiż jew territorju extra-Ewropew marbut miegħu;

·pajjiż terz assoċjat mal-Programm;

(b)kwalunkwe entità ġuridika maħluqa skont il-liġi tal-Unjoni jew kwalunkwe organizzazzjoni internazzjonali;

3.Għotja operattiva tista’ tingħata mingħajr sejħa għal proposti lin-Netwerk Ewropew għall-Korpi tal-Ugwaljanza (EQUINET) għall-kopertura tan-nefqa assoċjata mal-programm ta’ ħidma permanenti tiegħu.

Kapitolu III
Programmazzjoni, Monitoraġġ, Evalwazzjoni u Kontroll

Artikolu 13
Programm ta’ ħidma

1.Il-Programm għandu jiġi implimentat permezz tal-programmi ta’ ħidma msemmija fl-Artikolu 110 tar-Regolament Finanzjarju.

2.Il-programm ta’ ħidma għandu jiġi adottat mill-Kummissjoni permezz ta’ att ta’ implimentazzjoni. Dak l-att ta’ implimentazzjoni għandu jiġi adottat skont il-proċedura konsultattiva msemmija fl-Artikolu 19.

Artikolu 14
Monitoraġġ u rapportar

1.L-indikaturi għar-rapportar dwar il-progress tal-Programm lejn il-kisba tal-objettivi speċifiċi stipulati fl-Artikolu 2 huma stabbiliti fl-Anness II.

2.Biex tiżgura valutazzjoni effettiva tal-progress tal-Programm lejn il-kisba tal-objettivi tiegħu, il-Kummissjoni għandha tingħata s-setgħa li tadotta atti delegati, f’konformità mal-Artikolu 16, biex tiżviluppa d-dispożizzjonijiet għal qafas ta’ monitoraġġ u ta’ evalwazzjoni, inkluż permezz ta’ emendi għall-Anness II biex tirrieżamina u tikkumplimenta l-indikaturi fejn meħtieġ.

3.Is-sistema ta’ rapportar dwar il-prestazzjoni għandha tiżgura li d-dejta għall-monitoraġġ tal-implimentazzjoni u tar-riżultati tal-programm tinġabar b’mod effiċjenti, effettiv, u f’waqtu. Għal dan il-għan, għandhom jiġu imposti rekwiżiti ta’ rapportar proporzjonat fuq dawk li jirċievu l-fondi tal-UE u l-Istati Membri.

Artikolu 15
Evalwazzjoni

1.L-evalwazzjonijiet għandhom jitwettqu f’waqthom sabiex jikkontribwixxu għall-proċess tat-teħid tad-deċiżjonijiet.

2.L-evalwazzjoni interim tal-Programm għandha titwettaq ladarba jkun hemm biżżejjed informazzjoni disponibbli dwar l-implimentazzjoni tal-Programm, iżda mhux aktar tard minn erba’ snin wara l-bidu tal-implimentazzjoni tal-programm. L-evalwazzjoni ta’ nofs it-terminu għandha tqis ir-riżultati tal-evalwazzjonijiet tal-impatt fit-tul tal-programmi predeċessuri (Drittijiet, Ugwaljanza u Ċittadinanza u L-Ewropa għaċ-Ċittadini).

3.Fi tmiem l-implimentazzjoni tal-Programm, iżda mhux aktar tard minn erba’ snin wara t-tmiem tal-perjodu speċifikat fl-Artikolu 1, għandha titwettaq evalwazzjoni finali tal-Programm mill-Kummissjoni.

4.Il-Kummissjoni għandha tikkomunika l-konklużjonijiet tal-evalwazzjonijiet, akkumpanjati mill-osservazzjonijiet tagħha, lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni.

Artikolu 16
Eżerċizzju tad-delega

1.Il-Kummissjoni tingħata s-setgħa li tadotta atti delegati soġġett għall-kundizzjonijiet stipulati f’dan l-Artikolu.

2.Is-setgħa ta’ adozzjoni ta’ atti delegati msemmija fl-Artikolu 14 għandha tingħata lill-Kummissjoni sal-31 ta’ Diċembru 2027.

3.Id-delega tas-setgħa msemmija fl-Artikolu 14 tista’ tiġi revokata fi kwalunkwe ħin mill-Parlament Ewropew jew mill-Kunsill. Deċiżjoni ta’ revoka għandha ttemm id-delega tas-setgħat speċifikata f’dik id-Deċiżjoni. Din għandu jibda jkollha effett fil-jum wara dak tal-pubblikazzjoni tad-deċiżjoni f’Il-Ġurnal Uffiċjali tal-Unjoni Ewropea jew f’data aktar tard speċifikata fiha. Ma għandhiex taffettwa l-validità ta’ kwalunkwe att delegat li diġà jkun fis-seħħ.

4.Qabel ma tadotta l-att delegat, il-Kummissjoni għandha tikkonsulta lill-esperti maħtura minn kull Stat Membru b’konformità mal-prinċipji stabbiliti fil-Ftehim Interistituzzjonali dwar it-Tfassil Aħjar tal-Liġijiet tat-13 ta’ April 2016.

5.Hekk kif tadotta att delegat, il-Kummissjoni għandha tinnotifikah simultanjament lill-Parlament Ewropew u lill-Kunsill.

6.Att delegat adottat skont l-Artikolu 14 għandu jidħol fis-seħħ biss jekk la l-Parlament Ewropew u lanqas il-Kunsill ma jkunu oġġezzjonaw għalih fi żmien xahrejn minn meta jkunu ġew mgħarrfin bih jew jekk, qabel ma jiskadi dak il-perjodu, kemm il-Parlament Ewropew u kif ukoll il-Kunsill ikunu għarrfu lill-Kummissjoni li mhumiex se joġġezzjonaw għalih. Dan il-perjodu għandu jiġi estiż b’xahrejn bl-inizjattiva tal-Parlament Ewropew jew tal-Kunsill.

Artikolu 17
Protezzjoni tal-interessi finanzjarji tal-Unjoni

Meta pajjiż terz jipparteċipa fil-programm permezz ta’ deċiżjoni skont ftehim internazzjonali jew permezz ta’ kull strument legali ieħor, il-pajjiż terz għandu jagħti d-drittijiet neċessarji u l-aċċess meħtieġ lill-uffiċjal tal-awtorizzazzjoni responsabbli, lill-Uffiċċju Ewropew Kontra l-Frodi (OLAF), u lill-Qorti Ewropea tal-Awdituri biex jeżerċitaw b’mod komprensiv il-kompetenzi rispettivi tagħhom. Fil-każ tal-OLAF, drittijiet bħal dawn għandhom jinkludu d-dritt li jwettaq investigazzjonijiet, inklużi kontrolli u spezzjonijiet fil-post, previsti fir-Regolament (UE, Euratom) Nru 883/2013 tal-Parlament Ewropew u tal-Kunsill dwar investigazzjonijiet immexxija mill-Uffiċċju Ewropew Kontra l-Frodi (OLAF).

Kapitolu IV
Dispożizzjonijiet Tranżitorji u Finali

Artikolu 18
Informazzjoni, komunikazzjoni u pubbliċità

1.Ir-riċevituri tal-finanzjament tal-Unjoni għandhom jirrikonoxxu l-oriġini u jiżguraw il-viżibbiltà tal-finanzjament tal-Unjoni (b’mod partikolari meta jippromovu l-azzjonijiet u r-riżultati tagħhom) billi jipprovdu informazzjoni mmirata koerenti, effettiva u proporzjonata lil diversi udjenzi inkluż lill-midja u lill-pubbliku.

2.Il-Kummissjoni għandha timplimenta azzjonijiet ta’ informazzjoni u ta’ komunikazzjoni relatati mal-Programm, u l-azzjonijiet u r-riżultati tiegħu. Ir-riżorsi finanzjarji allokati għall-Programm għandhom jikkontribwixxu wkoll għall-komunikazzjoni korporattiva dwar il-prijoritajiet politiċi tal-Unjoni, sakemm dawn ikunu relatati mal-objettivi msemmija fl-Artikolu 2.

Artikolu 19
Proċedura ta’ Kumitat

1.Il-Kummissjoni għandha tkun assistita minn kumitat. Dan il-kumitat għandu jkun kumitat fis-sens tar-Regolament (UE) Nru 182/2011.

2.Meta ssir referenza għal dan il-paragrafu, għandu japplika l-Artikolu 4 tar-Regolament (UE) Nru 182/2011.

3.Il-kumitat jista’ jiltaqa’ f’konfigurazzjonijiet speċifiċi biex jittratta l-linji individwali tal-Programm.

Artikolu 20
Tħassir

Ir-Regolament (UE) Nru 1381/2013 u r-Regolament (UE) Nru 390/2014 jitħassru b’effett mill-1 ta’ Jannar 2021.

Artikolu 21
Dispożizzjonijiet tranżitorji

1.Dan ir-Regolament ma għandux jaffettwa t-tkomplija jew il-modifika tal-azzjonijiet ikkonċernati, sal-għeluq tagħhom, skont ir-Regolamenti (UE) Nru 1381/2013 u (UE) Nru 390/2014, li għandhom jibqgħu japplikaw għall-azzjonijiet ikkonċernati sal-għeluq tagħhom.

2.Il-pakkett finanzjarju għall-Programm jista’ jkopri wkoll l-ispejjeż tal-assistenza teknika u amministrattiva meħtieġa biex tiġi żgurata t-tranżizzjoni bejn il-Programm u l-miżuri adottati skont il-programmi predeċessuri tiegħu stabbiliti permezz tar-Regolamenti (UE) Nru 1381/2013 u (UE) Nru 390/2014.

3.Jekk meħtieġ, l-approprjazzjonijiet jistgħu jiddaħħlu fil-baġit lil hinn mill-2027 biex ikopru l-ispejjeż previsti fl-Artikolu 6(3), sabiex jippermettu l-ġestjoni ta’ azzjonijiet mhux kompletati sal-31 ta’ Diċembru 2027.

Artikolu 22
Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u għandu japplika direttament fl-Istati Membri kollha.

Magħmul fi Brussell,

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA/TAL-INIZJATTIVA

1.1.Titolu tal-proposta/tal-inizjattiva

1.2.Qasam/oqsma ta’ politika kkonċernat(i) (raggruppament ta’ programmi)

1.3.Natura tal-proposta/tal-inizjattiva

1.5.Raġunijiet għall-proposta/għall-inizjattiva

1.6.Tul ta’ żmien u impatt finanzjarju

1.7.Modalità/modalitajiet ta’ ġestjoni ppjanata/i

2.MIŻURI TA’ ĠESTJONI

2.1.Regoli ta’ monitoraġġ u ta’ rapportar

2.2.Sistema ta’ ġestjoni u ta’ kontroll

2.3.Miżuri għall-prevenzjoni ta’ frodi u ta’ irregolaritajiet

3.IMPATT FINANZJARJU STMAT TAL-PROPOSTA/TAL-INIZJATTIVA

3.1.Intestatura/i tal-qafas finanzjarju pluriennali u linja/i baġitarja/i tan-nefqa affettwata/i

3.2.Impatt stmat fuq in-nefqa 

3.2.1.Sommarju tal-impatt stmat fuq in-nefqa

3.2.3.Impatt stmat fuq l-approprjazzjonijiet ta’ natura amministrattiva

3.2.5.Kontribuzzjonijiet ta’ terzi persuni

3.3.Impatt stmat fuq id-dħul

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA/TAL-INIZJATTIVA

1.1.Titolu tal-proposta/tal-inizjattiva

1.2.Qasam/oqsma ta’ politika kkonċernat(i) fl-istruttura ABM/ABB 27  

1.3.Natura tal-proposta / tal-inizjattiva

◻ azzjoni ġdida 

◻ azzjoni ġdida li ssegwi proġett pilota / azzjoni preparatorja 28  

◻ l-estensjoni ta’ azzjoni eżistenti 

⌧ fużjoni jew dirottar ta’ azzjoni waħda jew iżjed lejn azzjoni oħra/azzjoni ġdida 

1.4.Raġunijiet għall-proposta / għall-inizjattiva

1.4.1.Rekwiżit(i) li jridu jiġu ssodisfati fuq terminu qasir jew twil inkluża kronoloġija dettaljata għall-prosegwiment tal-implimentazzjoni tal-inizjattiva

1.4.2.Il-valur miżjud tal-involviment tal-Unjoni (dan jista’ jirriżulta minn fatturi differenti, pereż. il-gwadann mill-koordinazzjoni, iċ-ċertezza tad-dritt, kumplementarjetajiet jew effettività akbar). Għall-iskopijiet ta’ dan il-punt, “il-valur miżjud tal-involviment tal-Unjoni” huwa l-valur li jirriżulta mill-intervent tal-Unjoni li jkun addizzjonali għall-valur li kieku kien jinħoloq mill-Istati Membri waħedhom.

1.4.3.Tagħlimiet meħuda minn esperjenzi simili fl-imgħoddi

1.4.4.Kompatibbiltà u sinerġija possibbli ma’ strumenti xierqa oħra

1.5.Tul ta’ żmien u impatt finanzjarju

◻ Tul ta’ żmien limitata

–x    fis-seħħ minn 01/012021 sa 31/122027

–x    Impatt finanzjarju mill-2021 sal-2027 għall-approprjazzjonijiet ta’ impenn u mill-2021 sal-2027 u lil hinn għall-approprjazzjonijiet ta’ pagament.

◻ durata illimitata

Implimentazzjoni b’perjodu ta’ tnedija minn SSSS sa SSSS, segwita b’operazzjoni fuq skala sħiħa.

1.6.Modalità/modalitajiet ta’ ġestjoni ppjanata/i 29  

x Ġestjoni diretta mill-Kummissjoni

–x mid-dipartimenti tagħha, inkluż il-persunal tagħha fid-delegazzjonijiet tal-Unjoni;

–x    mill-aġenziji eżekuttivi

◻ Ġestjoni kondiviża mal-Istati Membri

◻ Ġestjoni indiretta billi jiġu fdati kompiti ta’ implimentazzjoni baġitarja:

–◻ lill-pajjiżi terzi jew lill-korpi nnominati minnhom;

–◻ lill-organizzazzjonijiet internazzjonali u lill-aġenziji tagħhom (iridu jiġu speċifikati);

–◻lill-BEI u lill-Fond Ewropew tal-Investiment;

–◻ lill-korpi msemmija fl-Artikoli 70 u 71 tar-Regolament Finanzjarju;

–◻ lill-korpi tal-liġi pubblika;

–◻ lill-korpi rregolati mil-liġi privata b’missjoni ta’ servizz pubbliku sa fejn dawn jipprovdu garanziji finanzjarji adegwati;

–◻ lill-korpi rregolati mil-liġi privata ta’ Stat Membru li jkunu fdati bl-implimentazzjoni ta’ sħubija pubblika-privata u li jipprovdu garanziji finanzjarji adegwati;

–◻ lill-persuni fdati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE, u identifikati fl-att bażiku rilevanti.

–Jekk jiġi indikat aktar minn mod wieħed ta’ ġestjoni, jekk jogħġbok ipprovdi d-dettalji fit-Taqsima “Kummenti”.

2.MIŻURI TA’ ĠESTJONI

2.1.Regoli ta’ monitoraġġ u ta’ rapportar

Speċifika l-frekwenza u l-kundizzjonijiet.

2.2.Sistema ta’ ġestjoni u ta’ kontroll

2.2.1.Ġustifikazzjoni tal-mod(i) ta’ ġestjoni, tal-mekkaniżmu/i għall-implimentazzjoni tal-finanzjament, tal-modalitajiet ta’ pagament u tal-istrateġija ta’ kontroll proposti

2.2.2.Informazzjoni dwar ir-riskji identifikati u dwar is-sistema/i ta’ kontroll intern stabbiliti għall-mitigazzjoni tagħhom

2.2.3.Stima u ġustifikazzjoni tal-kosteffettività tal-kontrolli (proporzjon tal-“kostijiet tal-kontrolli ÷ il-valur tal-fondi relatati ġestiti”), u valutazzjoni tal-livelli mistennija tar-riskju ta’ żball (mal-pagament u fl-għeluq)

2.3.Miżuri għall-prevenzjoni ta’ frodi u ta’ irregolaritajiet

Speċifika l-miżuri ta’ prevenzjoni u ta’ protezzjoni eżistenti jew previsti, pereż. mill-Istrateġija Kontra l-Frodi.

3.IMPATT FINANZJARJU STMAT TAL-PROPOSTA / TAL-INIZJATTIVA

3.1.Intestatura/i tal-qafas finanzjarju pluriennali u linja/i baġitarja/i tan-nefqa affettwata/i

3.2.Impatt stmat fuq in-nefqa

3.2.1.Sommarju tal-impatt stmat fuq in-nefqa

miljuni ta’ EUR (aġġustati għal tliet pożizzjonijiet deċimali)

L-approprjazzjonijiet huma intiżi li jiffinanzjaw l-attivitajiet elenkati fl-Anness I ta’ dan ir-Regolament li jikkontribwixxu għall-kisba tal-objettivi speċifiċi fil-linja tal-Ugwaljanza u tad-Drittijiet, il-Linja tal-involviment u l-parteċipazzjoni taċ-ċittadini, u l-Linja Daphne. L-allokazzjoni tal-fondi msemmija fl-Artikolu 6(2)(a) tista’ tinqasam ulterjorment bejn il-Linja tal-Ugwaljanza u d-Drittijiet (bejn wieħed u ieħor 75 %) u l-Linja Daphne (bejn wieħed u ieħor 25 %). L-allokazzjoni tal-Fondi msemmija fl-Artikolu 6(2)(b) se tkun iddedikata għal-Linja tal-Involviment u l-Parteċipazzjoni taċ-Ċittadini, inkluż l-appoġġ għall-NGOs ġestit direttament mid-DĠ JUST li jirrappreżenta bejn wieħed u ieħor 20 %.

* Dan l-ammont ikopri nefqa’ ta’ appoġġ għall-programm dwar id-Drittijiet u l-Valuri u l-kontribuzzjoni għall-EACEA għall-ġestjoni tal-legat tal-programm Ewropa għaċ-Ċittadini 2014-2020 u l-iddelegar potenzjali ta’ parti mill-programm dwar id-Drittijiet u l-Valuri (il-linja tal-Involviment u l-parteċipazzjoni taċ-ċittadini) lil aġenzija eżekuttiva. L-ammont ikopri, barra minn hekk, l-iddelegar potenzjali tal-appoġġ lill-NGOs fil-linja tal-involviment u l-parteċipazzjoni taċ-ċittadini. L-amministrazzjoni tal-legat tagħti spjegazzjoni għall-ammonti ogħla għall-2021-2023. Il-programm jaf ikun (parzjalment) delegat lil aġenzija eżekuttiva, soġġett għall-eżitu tal-analiżi tal-ispejjeż imqabbla mal-benefiċċji u deċiżjonijiet relatati li jridu jittieħdu, u li l-approprjazzjonijiet amministrattivi għall-implimentazzjoni tal-programm fil-Kummissjoni u fl-aġenzija eżekuttiva jkunu adattati skont dan.

miljuni ta’ EUR (aġġustati għal tliet pożizzjonijiet deċimali)

miljuni ta’ EUR (aġġustati għal tliet pożizzjonijiet deċimali)

3.2.2.Impatt stmat fuq l-approprjazzjonijiet operazzjonali

–◻    Il-proposta / L-inizjattiva ma teħtieġx l-użu ta’ approprjazzjonijiet ta’ natura amministrattiva

–x        Il-propost/ L-inizjattiva teħtieġ l-użu ta’ approprjazzjonijiet ta’ natura amministrattiva, kif spjegat hawn taħt:

miljuni ta’ EUR (aġġustati għal tliet pożizzjonijiet deċimali)

L-approprjazzjonijiet meħtieġa għar-riżorsi umani u għal nefqa oħra ta’ natura amministrattiva se jiġu koperti mill-approprjazzjonijiet tad-DĠ li diġà jkunu assenjati għall-ġestjoni tal-azzjoni u / jew li jkunu ġew riassenjati fid-DĠ, flimkien, jekk ikun meħtieġ, ma’ kwalunkwe allokazzjoni addizzjonali li tista’ tingħata lid-DĠ tal-ġestjoni skont il-proċedura annwali ta’ allokazzjoni u fid-dawl tal-limitazzjonijiet baġitarji.

3.2.2.1.Rekwiżiti stmati ta’ riżorsi umani

–◻    Il-proposta / L-inizjattiva ma teħtieġx l-użu ta’ riżorsi umani.

–x    Il-proposta / L-inizjattiva teħtieġ l-użu ta’ riżorsi umani, kif spjegat hawn taħt:

L-istima trid tiġi espressa f’unitajiet ekwivalenti għall-full-time

Ir-riżorsi umani meħtieġa se jiġu koperti mill-persunal tad-DĠ li diġà jkun assenjat għall-ġestjoni tal-azzjoni u / jew li diġà jkun ġie riassenjat fid-DĠ, flimkien, jekk ikun meħtieġ, ma’ kwalunkwe allokazzjoni addizzjonali li tista’ tingħata lid-DĠ tal-ġestjoni skont il-proċedura annwali ta’ allokazzjoni u fid-dawl tal-limitazzjonijiet baġitarji.

Deskrizzjoni tal-kompiti li jridu jitwettqu:

3.2.3.Kontribuzzjonijiet ta’ terzi persuni

Il-proposta / L-inizjattiva:

–X    ma tipprevedix il-kofinanzjament minn terzi persuni

–◻    tipprevedi l-kofinanzjament minn terzi persuni li qed jiġi stmat hawn taħt:

Approprjazzjonijiet f’miljuni ta’ EUR (aġġustati għal tliet pożizzjonijiet deċimali)

3.3.Impatt stmat fuq id-dħul

–◻    Il-proposta / L-inizjattiva ma għandha l-ebda impatt finanzjarju fuq id-dħul.

–X    Il-proposta / L-inizjattiva għandha l-impatt finanzjarju li ġej:

–◻    fuq ir-riżorsi proprji

–◻    fuq dħul ieħor

indika, jekk id-dħul huwa assenjat għal-linji tan-nefqa ◻    

miljuni ta’ EUR (sa tliet pożizzjonijiet deċimali)

Għal dħul assenjat, speċifika l-linja/i baġitarja/i tan-nefqa affettwata/i.

Rimarki oħra (pereż. il-metodu/il-formula li ntuża(t) għall-kalkolu tal-impatt fuq id-dħul jew kwalunkwe informazzjoni oħra).

(1)    COM(2017) 358 tat-28 ta’ Ġunju 2017.

(2)    https://ec.europa.eu/commission/sites/beta-political/files/juncker-political-guidelines-speech_mt.pdf

(3)    Ir-Regolament (UE) Nru 1293/2013 tal-Parlament Ewropew u tal-Kunsill tal-11 ta’ Diċembru 2013 dwar l-istabbiliment ta’ Programm għall-Ambjent u l-Azzjoni Klimatika (LIFE) u li jħassar ir-Regolament (KE) Nru 614/2007 Test b’relevanza għaż-ŻEE

(4)    COM(2018) 321.

(5)    Il-Ftehim Interistituzzjonali bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar it-Tfassil Aħjar tal-Liġijiet tat-13 ta’ April 2016; ĠU L 123, 12.5.2016, p. 1–14.

(6)    ĠU C , , p. .

(7)    ĠU C , , p. .

(8)    Ir-Regolament (UE) Nru 1381/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi Programm ta’ Drittijiet, Ugwaljanza u Ċittadinanza għall-perjodu 2014 sa 2020 (ĠU L 354, 28.12.2013, p. 62)

(9)    Ir-Regolament tal-Kunsill (UE) Nru 390/2014 tal-14 ta’ April 2014 li jistabbilixxi l-programm “L-Ewropa għaċ-Ċittadini” għall-perjodu 2014–2020 (ĠU L 115, 17.4.2014, p. 3)

(10)    COM(2011) 173.

(11)    ĠU C 378, 24.12.2013, p. 1.

(12)    ĠU L 119, 4.5.2016, p. 1-88.

(13)    ĠU L 119, 4.5.2016, p. 89-131.

(14)    Ir-Regolament (UE) Nru 211/2011 tal-Parlament Ewropew u tal-Kunsill tas-16 ta’ Frar 2011 dwar l-inizjattiva taċ-ċittadini (ĠU L 65, 11.3.2011, p. 1).

(15)    Id-Direttiva tal-Kunsill 2000/43/KE tad-29 ta’ Ġunju 2000 li timplimenta l-prinċipju tat-trattament ugwali bejn il-persuni irrispettivament mill-oriġini tar-razza jew etniċità (ĠU L 180, 19.7.2000, p. 22).

(16)    Id-Direttiva tal-Kunsill 2004/113/KE tat-13 ta’ Diċembru 2004 li timplimenta l-prinċipju ta’ trattament ugwali bejn l-irġiel u n-nisa fl-aċċess għal u l-provvista ta’ merkanzija u servizzi (ĠU L 373, 21.12.2004, p. 37).

(17)    Id-Direttiva 2006/54/KE tal-Parlament Ewropew u tal-Kunsill tal-5 ta' Lulju 2006 dwar l-implimentazzjoni tal-prinċipju ta’ opportunitajiet indaqs u ta’ trattament ugwali tal-irġiel u n-nisa fi kwistjonijiet ta’ impjiegi u xogħol (ĠU L 204, 26.7.2006, p. 23).

(18)    Id-Direttiva 2010/41/UE tal-Parlament Ewropew u tal-Kunsill tas-7 ta' Lulju 2010 dwar l-applikazzjoni tal-prinċipju ta’ trattament ugwali bejn l-irġiel u n-nisa li jeżerċitaw attività li fiha jaħdmu għal rashom u li tħassar id-Direttiva tal-Kunsill 86/613/KEE (ĠU L 180, 15.7.2010, p. 1).

(19)    [ ĠU C 373, 20.12.2013, p. 1. https://eur-lex.europa.eu/legal-content/MT/TXT/?uri=uriserv%3AOJ.C_.2013.373.01.0001.01.ENG&toc=OJ%3AC%3A2013%3A373%3ATOC

(20)    Ir-Regolament (UE, Euratom) Nru 883/2013 tal-Parlament Ewropew u tal-Kunsill tal-11 ta’ Settembru 2013 dwar investigazzjonijiet immexxija mill-Uffiċċju Ewropew Kontra l-Frodi (OLAF) u li jħassar ir-Regolament tal-Parlament Ewropew u tal-Kunsill (KE) Nru 1073/1999 u r-Regolament tal-Kunsill (Euratom) Nru 1074/1999 (ĠU L 248, 18.9.2013, p. 1.

(21)    Ir-Regolament tal-Kunsill (KE, Euratom) Nru 2988/95 tat-18 ta’ Diċembru 1995 dwar il-protezzjoni tal-interessi finanzjarji tal-Komunità Ewropea (ĠU L 312, 23.12.95, p.1).

(22)    Ir-Regolament tal-Kunsill (Euratom, KE) Nru 2185/96 tal-11 ta’ Novembru 1996 dwar il-verifiki u l-ispezzjonijiet fil-post imwettqa mill-Kummissjoni sabiex tipproteġi l-interessi finanzjarji tal-Komunità Ewropea kontra l-frodi u irregolaritajiet oħra (ĠU L 292, 15.11.1996, p. 2).

(23)    Ir-Regolament tal-Kunsill (UE) 2017/1939 tat-12 ta’ Ottubru 2017 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”) (ĠU L 283, 31.10.2017, p.1).

(24)    Id-Direttiva (UE) 2017/1371 tal-Parlament Ewropew u tal-Kunsill tal-5 ta’ Lulju 2017 dwar il-ġlieda kontra l-frodi tal-interessi finanzjarji tal-Unjoni permezz tal-liġi kriminali (ĠU L 198, 28.7.2017, p. 29).

(25)    Id-Deċiżjoni tal-Kunsill 2013/755/UE tal-25 ta’ Novembru 2013 dwar l-assoċjazzjoni tal-pajjiżi u t-territorji extra-Ewropej mal-Unjoni Ewropea (“Deċiżjoni dwar l-Assoċjazzjoni Extra-Ewropea”) (ĠU L 344, 19.12.2013, p. 1).

(26)    Ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13)

(27)    ABM: immaniġġar ibbażat fuq l-attività; ABB: ibbaġitjar ibbażat fuq l-attività.

(28)    Kif imsemmi fl-Artikolu 58(2)(a) jew (b) tar-Regolament Finanzjarju.

(29)    Dettalji tal-modalitajiet ta’ ġestjoni u r-referenzi għar-Regolament Finanzjarju jinsabu fuq is-sit BudgWeb: http://www.cc.cec/budg/man/budgmanag/budgmanag_mt.html

(30)    Id-deċiżjoni biex il-kompiti ta’ delega jiġu ddelegati lil Aġenżija Eżekuttiva se tittieħed skont ir-REGOLAMENT TAL-KUNSILL (KE) Nru 58/2003, fuq il-bażi ta’ analiżi tal-ispejjeż imqabbla mal-benefiċċji.

(31)    Diff. = Approprjazzjonijiet differenzjati / Mhux diff. = Approprjazzjonijiet mhux differenzjati.

(32)    L-EFTA: Assoċjazzjoni Ewropea tal-Kummerċ Ħieles.

(33)    Pajjiżi kandidati u, meta applikabbli, kandidati potenzjali mill-Balkani tal-Punent.

(34)    Assistenza teknika u / jew amministrattiva u nefqa b’sostenn għall-implimentazzjoni ta’ programmi u / jew ta’ azzjonijiet tal-UE (li qabel kienu l-linji “BA”), riċerka indiretta, riċerka diretta.

(35)    Assistenza teknika u / jew amministrattiva u nefqa b’sostenn tal-implimentazzjoni ta’ programmi u / jew ta’ azzjonijiet tal-UE (li qabel kienu l-linji “BA”), riċerka indiretta, riċerka diretta.

(36)    AC = Aġenti Kuntrattwali; AL = Persunal Lokali; END = Espert Nazzjonali Sekondat; INT= Persunal tal-Aġenzija; JPD = Esperti Subordinati fid-Delegazzjonijiet.

(37)    Sottolimitu massimu għall-persunal estern kopert mill-approprjazzjonijiet operazzjonali (li qabel kienu l-linji “BA”).

(38)    Fir-rigward tar-riżorsi proprji tradizzjonali (id-dazji doganali, l-imposti fuq iz-zokkor), l-ammonti indikati jridu jkunu ammonti netti, jiġifieri ammonti grossi wara t-tnaqqis ta’ 20 % għall-kostijiet tal-ġbir.

IL-KUMMISSJONI EWROPEA

Brussell,30.5.2018

COM(2018) 383 final

ANNESSI

tal-Proposta għal

REGOLAMENT TAL-PARLAMENT EWROPEW U TAL-KUNSILL

li jistabbilixxi l-Programm dwar id-Drittijiet u l-Valuri

{SEC(2018) 274 final}
{SWD(2018) 290 final}
{SWD(2018) 291 final}

ANNESS I

L-attivitajiet tal-Programm

Il-kisba tal-objettivi speċifiċi tal-Programm imsemmija fl-Artikolu 2(2) se ssir b’mod partikolari permezz tal-appoġġ għall-attivitajiet li ġejjin:

(a)is-sensibilizzazzjoni, it-tixrid ta’ informazzjoni biex jittejjeb l-għarfien tal-politiki u tad-drittijiet fl-oqsma koperti mill-Programm;

(b)it-tagħlim reċiproku permezz tal-iskambju ta’ prattiki tajbin fost il-partijiet ikkonċernati biex jittejjeb l-għarfien u l-komprensjoni reċiproka u l-involviment ċiviku u demokratiku;

(c) attivitajiet analitiċi u ta’ monitoraġġ 1 biex is-sitwazzjoni fl-Istati Membri u fil-livell tal-UE tinftiehem aħjar fl-oqsma koperti mill-Programm kif ukoll biex tittejjeb l-implimentazzjoni tad-dritt u tal-politiki tal-UE;

(d)it-taħriġ tal-partijiet interessati rilevanti biex jittejjeb l-għarfien tagħhom tal-politiki u d-drittijiet fl-oqsma koperti;

(e)l-iżvilupp u l-manutenzjoni tal-għodod tat-Teknoloġiji tal-Informazzjoni u l-Komunikazzjoni (ICT);

(f)it-tisħiħ tal-għarfien taċ-ċittadini dwar il-kultura, l-istorja u l-kommemorazzjoni Ewropea kif ukoll is-sens ta’ appartenenza tagħhom fl-Unjoni;

(g)il-ġabra flimkien ta’ Ewropej ta’ nazzjonalitajiet u kulturi differenti billi jingħataw l-opportunità li jieħdu sehem f’attivitajiet ta’ ġemellaġġ;

(h)it-tħeġġiġ u l-iffaċilitar ta’ parteċipazzjoni attiva fil-bini ta’ Unjoni aktar demokratika kif ukoll għarfien tad-drittijiet u tal-valuri permezz tal-appoġġ għall-organizzazzjonijiet tas-soċjetà ċivili

(i)l-iffinanzjar tal-appoġġ tekniku u organizzattiv biex ikun implimentat ir-Regolament [(EU) Nru 211/2011], u b’hekk jirfed l-eżerċitar tad-dritt taċ-ċittadini li jniedu u jappoġġaw inizjattivi taċ-ċittadini Ewropej;

(j)l-iżvilupp tal-kapaċità tan-netwerks Ewropej biex jippromovu u jiżviluppaw ulterjorment id-dritt tal-Unjoni, l-istrateġiji u l-għanijiet ta’ politika kif ukoll l-għoti ta’ appoġġ lill-organizzazzjonijiet tas-soċjetà ċivili attivi fl-oqsma koperti mill-Programm.

(k)it-tisħiħ tal-għarfien tal-programm u d-disseminazzjoni u t-trasferibbiltà tar-riżultati tiegħu u t-trawwim tas-sensibilizzazzjoni taċ-ċittadini, inkluż billi jkunu stabbiliti u appoġġati punti ta’ informazzjoni dwar il-programm u netwerk nazzjonali ta’ kuntatt.

ANNESS II

Indikaturi

Se jsir monitoraġġ mill-qrib tal-Programm abbażi ta’ sett ta’ indikaturi maħsuba biex ikejlu sa fejn l-objettivi ġenerali u speċifiċi tal-Programm ikunu ntlaħqu u bl-għan li jiġu minimizzati l-piżijiet u l-kostijiet amministrattivi. Għal dak l-għan, se tinġabar data fir-rigward tas-sett ta’ indikaturi ewlenin li ġejjin:

(1)    Dawn l-attivitajiet jinkludu, pereżempju, il-ġbir tad-data u tal-istatistika; l-iżvilupp ta’ metodoloġiji komuni u, fejn xieraq, indikaturi jew punti ta’ riferiment; studji, riċerki, analiżi u stħarriġ; evalwazzjonijiet; valutazzjoni tal-impatt; l-elaborazzjoni u pubblikazzjoni ta’ gwidi, rapporti u materjal edukattiv.