1.   SOMMARJU

(1)

L-Awtorità ta’ Sorveljanza tal-EFTA (EFTA Surveillance Authority, “ESA”) tixtieq tinforma lill-Iżlanda li, wara li vvalutat il-mappa tal-għajnuna reġjonali Iżlandiża 2022-2027, l-ESA tqisha kompatibbli mal-prinċipji stabbiliti fil-Linji Gwida dwar l-għajnuna reġjonali mill-Istat (Regional Aid Guidelines, “RAG”) (1).

(2)

Din id-deċiżjoni tirrappreżenta l-valutazzjoni tal-ESA tal-mappa tal-għajnuna reġjonali skont il-paragrafu 190 tar-RAG. Il-mappa approvata tikkostitwixxi parti integrali mir-RAG (2). Il-mappa tal-għajnuna reġjonali nnifisha ma tinvolvi l-ebda għajnuna mill-Istat u ma tikkostitwixxix awtorizzazzjoni biex tingħata din l-għajnuna.

(3)

L-ESA bbażat id-deċiżjoni tagħha fuq il-kunsiderazzjonijiet li ġejjin.

2.   PROĊEDURA

(4)

Fl-1 ta’ Diċembru 2021, l-ESA adottat ir-RAG il-ġodda tagħha. Ir-RAG il-ġodda stabbilew kundizzjonijiet li skonthom l-għajnuna reġjonali notifikabbli tista’ titqies kompatibbli mal-funzjonament tal-Ftehim dwar iż-ŻEE (3). Jistabbilixxu wkoll kriterji għall-identifikazzjoni taż-żoni li jissodisfaw il-kundizzjonijiet għall-kompatibbiltà skont l-Artikolu 61(3)(a) u l-Artikolu 61(3)(c) tal-Ftehim dwar iż-ŻEE (4), l-hekk imsejjħa ż-żoni “a” u “c”.

(5)

Skont il-paragrafu 150 tar-RAG, iż-żoni li l-Istati tal-EFTA membri taż-ŻEE jixtiequ jiddeżinjaw bħala żoni “a” jew “c” iridu jiġu identifikati f’mappa tal-għajnuna reġjonali.

(6)

Skont il-paragrafu 189 tar-RAG, jenħtieġ li kull Stat tal-EFTA membru taż-ŻEE jinnotifika lill-ESA dwar il-mappa unika tal-għajnuna reġjonali applikabbli sal-31 ta’ Diċembru 2027. L-awtoritajiet tal-Iżlanda nnotifikaw dwar il-mappa tal-għajnuna reġjonali Iżlandiża 2022-2027 fis-27 ta’ Jannar 2022. (5)

3.   ŻONI ELIĠIBBLI DDEŻINJATI MILL-AWTORITAJIET TAL-IŻLANDA

(7)

Ġiet stabbilita klassifikazzjoni komuni ta’ unitajiet territorjali għall-istatistika fl-UE. Din il-klassifikazzjoni tissejjaħ NUTS. Il-klassifikazzjoni NUTS topera bi tliet livelli ġerarkiċi nnumerati minn 1 sa 3. NUTS 1 huwa magħmul mill-akbar unitajiet, filwaqt li NUTS 3 ikopri l-iżgħar unitajiet (6).

(8)

Kif innutat fin-nota 30 f’qiegħ il-paġna tar-RAG, reġjuni statistiċi simili għall-klassifikazzjoni NUTS ġew definiti fl-Istati tal-EFTA membri taż-ŻEE. Għaldaqstant, filwaqt li l-linji gwida tal-Kummissjoni dwar l-għajnuna reġjonali (7) jirreferu għall-klassifikazzjoni NUTS, ir-RAG jużaw it-terminu reġjuni statistiċi. Il-klassifikazzjoni NUTS u r-reġjuni statistiċi fl-Istati tal-EFTA membri taż-ŻEE jinsabu fil-paġni web tal-Eurostat (8).

(9)

L-Iżlanda kollha taqa’ f’reġjun statistiku wieħed fil-livell 2 (Ísland). Fil-livell 3, l-Iżlanda hija maqsuma aktar f’żewġ reġjuni statistiċi. Dawn huma rispettivament ir-reġjun kapitali (Höfuðborgarsvæði) u l-Iżlanda barra mir-reġjun kapitali (Landsbyggð) (9).

(10)

Iż-żoni ddeżinjati fil-mappa tal-għajnuna reġjonali Iżlandiża 2022-2027 huma dawk li jinkludu r-reġjun tal-livell 3 ta’ Landsbyggð (10).

(11)

Fuq il-bażi tad-data dwar il-popolazzjoni mill-1 ta’ Jannar 2018, id-densità tal-popolazzjoni tal-Iżlanda hija 3,48 abitant kull km2. Landsbyggð għandha popolazzjoni ferm inqas densa minn Höfuðborgarsvæði. Id-densitajiet tal-popolazzjoni f’Landsbyggð u Höfuðborgarsvæði huma rispettivament 1,27 u 225,87 abitanti kull km2 ibbażati fuq id-data dwar il-popolazzjoni mill-1 ta’ Jannar 2018 (11).

(12)

Landsbyggð tkopri żoni ta’ 99 258 km2. Fuq il-bażi tal-aktar data reċenti minn Statistics Iceland (Hagstofan), il-popolazzjoni residenti kienet ta’ 132 264 abitant fl-1 ta’ Jannar 2021. Dan huwa ekwivalenti għal densità ta’ popolazzjoni ta’ 1,33 abitanti kull km2 (12).

(13)

L-illustrazzjoni grafika mehmuża bħala l-Anness I ta’ din id-deċiżjoni turi lil Landsbyggð. L-Anness II fih ukoll lista ta’ dawk l-unitajiet iżgħar li jiffurmaw dan ir-reġjun tal-livell 3 (13).

4.   VALUTAZZJONI

(14)

Il-kopertura tal-għajnuna reġjonali disponibbli għall-perjodu 2022-2027 hija stabbilita għal kull Stat tal-EFTA membru taż-ŻEE fl-Anness I tar-RAG. L-Iżlanda kollha hija identifikata fl-Anness I bħala żona “c” predefinita.

(15)

L-awtoritajiet Iżlandiżi jistgħu jużaw din l-allokazzjoni biex jiddeżinjaw żoni “c” fil-mappa tal-għajnuna reġjonali tagħhom. Ir-regoli li jirregolaw din id-deżinjazzjoni jinsabu fil-paragrafi 168 u 169 tar-RAG.

(16)

Skont il-paragrafu 168 tar-RAG, l-Istati tal-EFTA membri taż-ŻEE jistgħu jiddeżinjaw iż-żoni “c” predefiniti. Il-paragrafu 169 jippermetti wkoll approċċ flessibbli fejn jiġu inklużi oqsma oħra. Billi l-Iżlanda kollha hija allokata fl-Anness I bħala żona “c” predefinita, l-awtoritajiet Iżlandiżi setgħu jiddeżinjaw l-Iżlanda kollha bħala żona “c” fil-mappa tal-għajnuna reġjonali tagħhom.

(17)

Kif stabbilit fil-paragrafu (9) hawn fuq, l-Iżlanda taqa’ f’reġjun statistiku wieħed fil-livell 2 (Ísland). Fil-livell 3, l-Iżlanda hija maqsuma aktar f’żewġ reġjuni statistiċi. Dawn huma rispettivament ir-reġjun kapitali (Höfuðborgarsvæði) u l-Iżlanda barra mir-reġjun kapitali (Landsbyggð).

(18)

Meta ddeżinjaw iż-żoni eliġibbli fil-mappa tal-għajnuna reġjonali Iżlandiża 2022–2027, l-awtoritajiet Iżlandiżi inkludew ir-reġjun tal-livell 3 ta’ Landsbyggð u eskludew ir-reġjun tal-livell 3 ta’ Höfuðborgarsvæði. Billi r-reġjun tal-livell 3 inkluż ta’ Landsbyggð jaqa’ f’dawn iż-żoni “c” predefiniti stabbiliti fl-Anness I tar-RAG, l-ESA ssib li d-deżinjazzjoni ta’ Landsbyggð bħala żoni “c” fil-mappa tal-għajnuna reġjonali Iżlandiża 2022-2027 hija konformi mar-RAG.

(19)

Skont in-nota 65 f’qiegħ il-paġna tar-RAG, żoni skarsament popolati u b’popolazzjoni baxxa ħafna jenħtieġ li jiġu identifikati fuq il-mappa tal-għajnuna reġjonali. “Żoni skarsament popolati ħafna” huma definiti fil-paragrafu 19 (32) bħala “reġjuni statistiċi fil-livell 2 b’inqas minn tmien abitanti għal kull km2 jew partijiet minn tali reġjuni statistiċi ddeżinjati mill-Istat tal-EFTA membri taż-ŻEE kkonċernat f’konformità mal-paragrafu 169”. Landsbyggð għalhekk tikkwalifika bħala b’popolazzjoni baxxa ħafna.

5.   INTENSITAJIET TAL-GĦAJNUNA

(20)

Skont il-paragrafu 151 tar-RAG, il-mappa tal-għajnuna reġjonali trid tispeċifika l-intensitajiet massimi tal-għajnuna applikabbli fiż-żoni eliġibbli matul il-perjodu ta’ validità tal-mappa approvata.

(21)

L-intensitajiet massimi tal-għajnuna fil-mappa japplikaw għall-għajnuna għall-investiment reġjonali. L-intensitajiet massimi permessi għal din l-għajnuna skont ir-RAG huma stabbiliti fit-Taqsima 7.4 tagħhom.

(22)

Il-paragrafu 182(1) tar-RAG jistipula li l-intensità tal-għajnuna għal intrapriżi kbar ma tridx taqbeż l-20 % f’żoni skarsament popolati. Mill-paragrafu 186 jirriżulta wkoll li l-intensitajiet tal-għajnuna jistgħu jiżdiedu sa 20 punt perċentwali għal impriżi żgħar jew sa 10 punti perċentwali għal intrapriżi ta’ daqs medju. Kif speċifikat fin-nota 85 f’qiegħ il-paġna tar-RAG, madankollu, iż-żieda fl-intensitajiet tal-għajnuna għal intrapriżi żgħar u ta’ daqs medju mhux se tapplika għal għajnuna mogħtija għal proġetti kbar ta’ investiment (14).

(23)

L-awtoritajiet Iżlandiżi nnotifikaw intensità ta’ għajnuna massima għal intrapriżi kbar ta’ 20 %. L-intensitajiet massimi jiżdiedu b’20 punt perċentwali għal impriżi żgħar u b’10 punti perċentwali għal impriżi ta’ daqs medju. Dawn l-intensitajiet akbar tal-għajnuna, madankollu, ma japplikawx għall-għajnuna mogħtija għal proġetti kbar ta’ investiment (15).

(24)

Il-limiti fl-intensitajiet tal-għajnuna definiti mill-awtoritajiet tal-Iżlanda, kif deskritti fil-paragrafu (23), huma konformi mad-dispożizzjonijiet deskritti fil-paragrafu (22). Għalhekk huma konformi mar-RAG.

6.   GĦAL KEMM ŻMIEN U RIEŻAMI

(25)

F’konformità mal-paragrafu 189 tar-RAG, l-awtoritajiet Iżlandiżi nnotifikaw mappa ta’ għajnuna reġjonali unika, applikabbli sal-31 ta’ Diċembru 2027.

(26)

Mill-paragrafu 194 tar-RAG jirriżulta li fl-2023 se jsir rieżami ta’ nofs it-terminu tal-mapep tal-għajnuna reġjonali. L-ESA se tikkomunika d-dettalji dwar ir-rieżami sa Ġunju 2023.

7.   KONKLUŻJONI

(27)

Fuq il-bażi tal-valutazzjoni ta’ hawn fuq, l-ESA ssib li l-mappa tal-għajnuna reġjonali Iżlandiża 2022-2027 hija kompatibbli mal-prinċipji stabbiliti fir-RAG. Il-mappa approvata tikkostitwixxi parti integrali mir-RAG.

(28)

L-Annessi I u II jiffurmaw parti integrali minn din id-deċiżjoni.

---

(1)  Id-Deċiżjoni tal-Awtorità ta’ Sorveljanza tal-EFTA Nru 269/21/COL tal-1 ta’ Diċembru 2021 li tintroduċi l-Linji Gwida riveduti dwar l-Għajnuna Reġjonali mill-Istat għall-2022–2027 [2022/1047] (ġu l 173, 30.6.2022, P. 79).

(2)  Ir-RAG, il-paragrafu 190.

(3)  Ir-RAG, il-paragrafu 2.

(4)   Ibid.

(5)  In-notifika hija ppreżentata bħala d-Dokument Nru 1265806. Iż-żewġ Annessi tiegħu huma ppreżentati bħala d-Dokumenti Nri 1265808 u 1265810.

(6)  Ir-Regolament (KE) Nru 1059/2003 tal-Parlament Ewropew u tal-Kunsill tas-26 ta’ Mejju 2003 dwar l-istabbiliment ta’ klassifikazzjoni komuni ta’ unitajiet territorjali għall-istatistika (NUTS) (ĠU L 154, 21.6.2003, p. 1) kif emendat mir-Regolament Delegat tal-Kummissjoni (UE) 2019/1755 tat-8 ta’ Awwissu 2019 li jemenda l-Annessi tar-Regolament (KE) Nru 1059/2003 tal-Parlament Ewropew u tal-Kunsill dwar l-istabbiliment ta’ klassifikazzjoni komuni ta’ unitajiet territorjali għall-istatistika (NUTS) (ĠU L 270, 24.10.2019, p. 1).

(7)  Linji Gwida dwar l-għajnuna reġjonali mill-Istat (ĠU C 153, 29.4.2021, p. 1)

(8)  https://ec.europa.eu/eurostat/web/nuts/nuts-maps. Dan il-web-link iddaħħal, u ġie ċċekkjat l-aħħar, fit-8 ta’ Frar 2022.

(9)  Id-Dokument Nru 1265806, p. 2.

(10)   Ibid.

(11)   Ibid.

(12)  Id-Dokument Nru 1265806, p. 3 u 4.

(13)  L-Annessi huma bbażati fuq id-Dokumenti Nri 1265808 u 1265810.

(14)  It-terminu “proġett kbir ta’ investiment” huwa definit fil-paragrafu 19(18) bħala investiment inizjali bi spejjeż eliġibbli li jaqbżu l-EUR 50 miljun.

(15)  Id-Dokument Nru 1265806, p. 3.