DEĊIŻJONI TAL-AWTORITÀ TA' SORVELJANZA TAL-EFTA

Nru 264/12/COL

tal-5 ta’ Lulju 2012

dwar l-istatus tan-Norveġja fir-rigward tan-nekrosi ematopoietika infettiva u s-settiċemija emorraġika virali u r-revoka tad-Deċiżjoni tal-Awtorità ta' Sorveljanza tal-EFTA Nru 302/08/COL (1)

2012/C 340/02

L-AWTORITÀ TA’ SORVELJANZA TAL-EFTA

Wara li kkunsidrat l-Att imsemmi fil-punt 8a tal-Parti 3.1 tal-Kapitolu I tal-Anness I tal-Ftehim taż-ŻEE,

Id-Direttiva tal-Kunsill 2006/88/KE tal-24 ta’ Ottubru 2006 dwar il-ħtiġiet tas-saħħa tal-annimali għall-annimali tal-akkwakultura u l-prodotti tagħhom, u dwar il-prevenzjoni u l-kontroll ta’ ċertu mard f'annimali akkwatiċi (2), kif ikkoreġuta u emendata

Wara li kkunsidrat l-Att imsemmi fil-punt 89 tal-Parti 4.2 tal-Kapitolu I tal-Anness I tal-Ftehim taż-ŻEE,

Id-Deċiżjoni tal-Kummissjoni tal-31 ta’ Ottubru 2008 li timplimenta d-Direttiva tal-Kunsill 2006/88/KE dwar programmi ta’ sorveljanza u qerda u status ta’ ħelsien minn mard ta’ Stati Membri, żoni u kompartimenti (3), kif emendata

Wara li kkunsidrat id-Deċiżjoni tal-Kulleġġ Nru 259/12/COL li tagħti s-setgħa lill-Membru tal-Kulleġġ kompetenti biex jadotta din id-deċiżjoni,

Billi:

In-Norveġja, permezz ta’ ittra ddatata t-3 ta’ Mejju 1994, ippreżentat lill-Awtorità ta' Sorveljanza tal-EFTA il-ġustifikazzjonijiet meħtieġa biex jingħata, safejn għandhom x’jaqsmu in-nekrożi ematopoietika infettiva (IHN) u s-settiċemija emorragika virali (VHS), l-istatus ta’ żona approvata lit-territorju tagħha, kif ukoll ir-regoli li jassiguraw l-osservanza tal-kundizzjonijiet li jridu jiġu rispettati biex jinżamm l-istatus approvat.

Id-Deċiżjoni tal-Awtorità Nru 71/94/COL tas-27 ta’ Ġunju 1994, kif l-aħħar emendata bid-Deċiżjoni Nru 244/02/COL tal-11 ta’ Diċembru 2002, stabbiliet li l-partijiet tan-Norveġja msemmija fl-Anness ta’ dik id-Deċiżjoni kienu rikonoxxuti bħala żona kontinentali approvata u bħala żona kostali approvata għall-ħut rigward l-IHN u l-VHS.

Fis-26 ta' Novembru 2007 kien ikkonfermat li faqqgħet il-VHS fil-Kontea ta' Møre og Romsdal fin-Norveġja. L-awtorità kompetenti fin-Norveġja infurmat lill-Awtorità dwar il-miżuri li ttieħdu biex tiġi eliminata l-marda u titrażżan il-firxa tagħha. Dawn il-miżuri kienu meqjusa bħala xierqa mill-Awtorità.

L-Awtorità ddeċidiet, permezz tad-Deċiżjoni Nru 302/08/COL, li n-Norveġja, minbarra ż-żoni li hemm riferenza għalihom fl-Anness ta' dik id-Deċiżjoni, għandha tibqa’ kkunsidrata bħala żona kontinentali approvata u żona kostali approvata għall-ħut rigward l-IHN u l-VHS.

Fit-8 ta’ Mejju 2012, in-Norveġja ssottomettiet lill-Awtorità dikjarazzjoni ta' status li hi ‘ħielsa mill-VHS’, u dokumentazzjoni ta' appoġġ dwar is-sorveljanza u t-teħid ta' kampjuni, fir-rigward tat-territorju kollu tagħha, bl-eċċezzjoni ta' dik il-parti tan-Norveġja li tinkorpora l-inħawi ta’ Grense Jacobselv u x-xmara Pasvik u x-xmajjar ta’ bejniethom u r-reġjun kostali ta’ magħhom.

L-Awtorità, f'kooperazzjoni mill-qrib mal-Kummissjoni Ewropea, eżaminat id-dikjarazzjoni u d-dokumentazzjoni mehmuża u tqis li d-dikjarazzjoni tikkonforma mar-rekwiżiti għal dikjarazzjoni ta’ status ta’ ħelsien mill-mard fid-Direttiva 2006/88/KE u d-Deċiżjoni 2009/177/KE.

L-Awtorità, bid-Deċiżjoni tagħha Nru 259/12/COL irreferiet il-kwistjoni lill-Kumitat Veterinarju tal-EFTA li jassisti l-Awtorità ta' Sorveljanza tal-EFTA. Il-Kumitat approva b'mod unanimu l-proposta mressqa mill-Awtorità. B’konsegwenza ta’ dan, il-miżuri previsti f’din id-Deċiżjoni huma skont l-opinjoni unanima tal-Kumitat Veterinarju tal-EFTA li jassisti lill-Awtorità ta’ Sorveljanza tal-EFTA u t-test finali tal-miżuri baqa’ mhux mibdul.

Għalhekk, in-Norveġja, minbarra dik il-parti tan-Norveġja li tinkorpora taż-żona ta’ qbid ta’ Grense Jacobselv u x-xmara Pasvik u x-xmajjar ta' bejniethom u r-reġjun kostali ta' magħhom, għandha tiġi ddikjarata ħielsa mill-VHS.

Ma kien hemm l-ebda tibdil fin-Norveġja fir-rigward tal-IHN. L-istatus tan-Norveġja għal din il-marda għandu jinżamm.

Huwa xieraq li d-Deċiżjoni tal-Awtorità Nru 302/08/COL tiġi rrevokata u sostitwita mid-Deċiżjoni preżenti.

ADOTTAT DIN ID-DEĊIŻJONI:

Artikolu 1

In-Norveġja, minbarra dik il-parti tan-Norveġja li tinkorpora ż-żoni ta’ qbid ta’ Grense Jacobselv u x-xmara Pasvik u x-xmajjar ta' bejniethom u r-reġjun kostali ta' magħhom, għandha tiġi ddikjarata ħielsa mill-IHN.

Artikolu 2

In-Norveġja, minbarra dik il-parti tan-Norveġja li tinkorpora ż-żoni ta’ qbid ta’ Grense Jacobselv u x-xmara Pasvik u x-xmajjar ta' bejniethom u r-reġjun kostali ta' magħhom, għandha tiġi ddikjarata ħielsa mill-VHS.

Artikolu 3

Id-Deċiżjoni tal-Awtorità ta’ Sorveljanza tal-EFTA Nru 302/08/COL tal-21 ta' Mejju 2008 qed tiġi rrevokata.

Artikolu 4

Din id-Deċiżjoni għandha tidħol fis-seħħ fil-5 ta' Lulju 2012.

Artikolu 5

Din id-Deċiżjoni hi indirizzata lin-Norveġja.

Artikolu 6

Din id-Deċiżjoni hija awtentika bl-Ingliż.

(1)  ĠU L 41, 12.2.2009, p. 32 u s-Suppliment taż-ŻEE Nru 7, 12.2.2009, p. 10.

(2)  ĠU L 328, 24.11.2006, p. 14 u s-Suppliment taż-ŻEE Nru 32, 17.6.2010, p. 1 bl-Islandiż u Nru 35, 23.6.2011, p. 44 bin-Norveġiż.

(3)  ĠU L 63, 7.3.2009, p. 15.