Wiċċ nazzjonali ġdid ta’ muniti tal-euro maħsuba għaċ-ċirkolazzjoni

(2019/C 57/12)

Il-wiċċ nazzjonali tal-munita kommemorattiva ġdida ta’ 2 euro, maħsuba għaċ-ċirkolazzjoni u maħruġa mill-Irlanda

Il-muniti tal-euro maħsuba għaċ-ċirkolazzjoni għandhom status ta’ valuta legali fiż-żona tal-euro kollha. Sabiex tinforma lill-pubbliku u lill-partijiet kollha li jużaw il-muniti, il-Kummissjoni tippubblika deskrizzjoni tad-disinji tal-muniti l-ġodda kollha (1). F’konformità mal-konklużjonijiet tal-Kunsill tal-10 ta’ Frar 2009 (2), l-Istati Membri taż-żona tal-euro u l-pajjiżi li kkonkludew ftehim monetarju mal-Unjoni Ewropea li jipprevedi l-ħruġ ta’ muniti tal-euro, huma awtorizzati li joħorġu muniti kommemorattivi tal-euro maħsuba għaċ-ċirkolazzjoni, kemm-il darba jiġu ssodisfati ċerti kundizzjonijiet, b’mod partikolari li tintuża d-denominazzjoni ta’ 2 euro biss. Dawn il-muniti għandhom l-istess karatteristiċi tekniċi bħall-muniti l-oħra ta’ 2 euro, iżda l-wiċċ nazzjonali tagħhom ikun fih disinn kommemorattiv ta’ rilevanza simbolika kbira f’termini nazzjonali jew Ewropej.

Pajjiż li qiegħed joħroġ il-munita : L-Irlanda

Suġġett tal-kommemorazzjoni : 100 sena mit-twaqqif tad-Dáil Éireann (il-Parlament Irlandiż)

Deskrizzjoni tad-disinn : Fid-disinn tidher l-ewwel seduta tad-Dáil Éireann fir-Round Room. L-iggvernar tan-nazzjon Irlandiż beda fil-21 ta’ Jannar u s-seduta tmexxiet kompletament bil-lingwa Irlandiża biex tiġi riflessa n-natura simbolika tal-laqgħa. Ir-Round Room kbira ta’ Mansion House tqawwes fuq il-ġemgħa kbira tal-ewwel Dáil elett tan-nazzjon. Il-kliem “An Chéad Dáil” fiċ-ċentru tad-disinn flimkien mas-sena “1919” fil-parti ta’ fuq huma mnaqqxa b’tipa unċjali tradizzjonali. Fil-parti t’isfel huma mnaqqxa l-isem tal-pajjiż u s-sena tal-ħruġ “ÉIRE 2019”.

Iċ-ċirku ta’ barra tal-munita juri t-12-il stilla tal-bandiera Ewropea.

L-għadd ta’ muniti li se jinħarġu : 1 000 000 munita

Data tal-ħruġ : Jannar 2019

(1)  Ara l-ĠU C 373, 28.12.2001, p. 1 għall-uċuħ nazzjonali tal-muniti kollha li nħarġu fl-2002.

(2)  Ara l-konklużjonijiet tal-Kunsill Affarijiet Ekonomiċi u Finanzjarji tal-10 ta’ Frar 2009 u r-Rakkomandazzjoni tal-Kummissjoni tad-19 ta’ Diċembru 2008 dwar linji-gwida komuni għall-uċuħ nazzjonali u l-ħruġ ta’ muniti tal-ewro maħsuba għaċ-ċirkolazzjoni (ĠU L 9, 14.1.2009, p. 52).