9.9.2009

MT

Il-Ġurnal Uffiċjali tal-Unjoni Ewropea

C 215/3

---

SEJĦA GĦAL PROPOSTI

“Appoġġ għal miżuri ta’ informazzjoni fil-qasam tal-politika agrikola komuni”

L-implimentazzjoni ta’ miżuri ta’ informazzjoni skont il-linja tal-baġit 05 08 06 għall-2010

2009/C 215/04

1.   DAĦLA

Din is-sejħa għall-proposti hija bbażata fuq ir-Regolament tal-Kunsill (KE) Nru 814/2000 tas-17 ta’ April 2000 dwar il-miżuri ta' tagħrif li għandhom x'jaqsmu mal-politika komuni agrikola (1) li jiddefinixxi t-tip u l-kontenut tal-miżuri ta’ informazzjoni li l-Komunità tista’ tikkofinanzja. Ir-Regolament tal-Kummissjoni (KE) Nru 2208/2002 (2), emendat bir-Regolament (KE) Nru 1820/2004 (3), jistabbilixxi regoli dettaljati għall-applikazzjoni tar-Regolament (KE) Nru 814/2000.

L-għan ta’ din is-sejħa hu li jitqajmu l-proposti li jirrigwardaw il-finanzjament ta’ miżuri ta’ informazzjoni skont l-Artikolu 3(1) tar-Regolament tal-Kunsill (KE) Nru 814/2000, fuq il-krediti buġetarji tal-eżerċizzju 2010. Din is-sejħa għall-proposti tirrigwarda l-azzjonijiet ta’ informazzjoni li jiġu implimentati bejn l-1 ta’ Mejju 2010 u t-30 ta’ April 2011 (bħalma huma t-tħejjija, it-twettiq, is-segwitu u l-valutazzjoni).

Miżura ta' informazzjoni hija operazzjoni indipendenti u koerenti ta' informazzjoni organizzata abbażi ta’ baġit uniku. L-attivitajiet inklużi f'operazzjoni bħal din ivarjaw minn konferenza sempliċi għal kampanja komprensiva ta' informazzjoni li tkopri diversi tipi ta' attivitajiet (bħal konferenzi, produzzjonijiet awdjoviżivi, laqgħat ta' ħidma mobbli, eċċ.) u jsiru f'reġjun wieħed jew aktar tal-Istati Membri. Fil-każ tal-aħħar, l-azzjonijiet differenti previsti għandhom ikunu marbuta bejniethom u joffru strateġija konċettwali ċara; Bl-istess mod, ir-riżultati li jinkisbu u l-kalendarju tax-xogħol għandhom ikunu realistiċi u adattati għall-għanijiet tal-proġett. Il-miżuri għandhom jitwettqu fl-UE-27 u għandhom jirrispettaw il-limiti ta' żmien spjegati fil-punt 3 (it-tul ta' żmien u l-baġit) hawn taħt.

Kif speċifikat fl-Artikolu 4(2) tar-Regolament tal-Kummissjoni (KE) Nru 2208/2002, l-applikanti għal din is-sejħa għall-proposti għandhom ikunu persuni ġuridiċi kkostitwiti legalment fi Stat Membru għal mill-inqas sentejn, b’mod partikolari:

—	organizzazzjonijiet tal-bdiewa jew tal-iżvilupp rurali,

—	assoċjazzjonijiet tal-konsumaturi,

—	assoċjazzjonijiet għall-ħarsien tal-ambjent,

—	awtoritajiet pubbliċi tal-Istati Membri,

—	mezzi ta' komunikazzjoni,

—	universitajiet.

2.   IL-PRIJORITAJIET U L-GĦANIJIET GĦALL-2010

2.1.   Il-Prijoritajiet

Taħt din is-sejħa għall-proposti, l-Kummissjoni tixtieq tagħti prijorità:

—

lill-fatt li l-pubbliku tal-Istati Membri jkollu għarfien akbar fuq il-PAK (inkluż l-iżvilupp rurali), biex ikun jaf aħjar x’inhu r-rwol multifunzjonali tal-bdiewa tal-Unjoni Ewropea li jmur lilhinn mill-produzzjoni tal-oġġetti tal-ikel. Il-bdiewa huma wkoll gwardjani tal-pajżaġġ, għandhom rwol importanti fil-konservazzjoni tal-patrimonju komuni naturali tagħna u l-attività tagħhom hija l-pulmun ekonomiku ta’ bista żoni rurali,

—	lid-diskussjoni mal-partijiet interessati fl-agrikoltura fiż-żoni rurali dwar l-opportunitajiet u l-benefiċċji li joffru ż-żewġ prinċipji fundamentali tal-PAK għas-settur agrikolu u għall-iżvilupp sostenibbli tar-reġjuni rurali,

—

li tiġi ppreżentata l-politika agrikola komuni (PAK) rriformata u b'mod partikolari: — il-ħtieġa li jkun hemm tweġiba aħjar għall-opportunitajiet tas-suq, — is-simplifikazzjoni u l-immirar aħjar tal-appoġġ dirett għall-bdiewa, — it-tisħiħ tal-politika dwar l-iżvilupp rurali biex jitwieġbu aħjar l-isfidi ġodda, speċjalment dawk relatati mal-bidla fil-klima, il-ġestjoni tal-ilma, l-enerġija rinnovabbli u l-bijodiversità,

—	il-valutazzjoni ta' sistemi tal-UE fi ħdan il-PAK bil-ħsieb li jippromwovu sistema ta’ alimentazzjoni aktar tajba għas-saħħa u drawwiet alimentari aktar tajbin għas-saħħa, speċjalment fir-rigward tal-frott u ħxejjex fost it-tfal tal-iskola,

—	id-diskussjoni tal-politika tal-UE dwar il-kwalità tal-prodotti agrikoli,

—	id-diskussjoni ma’ dawk involuti fid-dinja agrikola kif ukoll mal-pubbliku dwar il-perspettivi tal-bidla fil-politika agrikola komuni (PAK) għal żmien medju u twil.

2.2.   Il-messaġġi li jridu jiġu kkomunikati

Il-Kummissjoni tixtieq tirċievi proposti għal miżuri ta' informazzjoni li jiffukaw fuq il-messaġġi li ġejjin:

—

Il-PAK hija politika ħajja. Hija tevolvi biex tirrifletti l-prijoritajiet li jinbidlu tas-soċejtà. Hija ġiet stabbilita bħala parti fundamentali tal-binja Ewropea b'enfażi qawwi fuq il-komunità Ewropea tal-biedja. Illum, l-agrikoltura Ewropea għandha rwol fundamentali fis-soċjetajiet tagħna. Hija taffettwa direttament il-kwalità tal-ambjent tagħna, l-ikel li nieklu u l-mod li bih nitrattaw l-annimali imrobbijin fl-irziezet tagħna. Dawn huma kwistjonijiet li jaffettwawna lkoll. Il-PAK tfittex li tippromwovi agrikoltura sostenibbli li twieġeb b'mod pożittiv għat-tħassib taċ-ċittadini mhux biss fil-komunitajiet agrikoli, iżda fis-soċjetà kollha kemm hi,

—

Il-PAK tappoġġa lill-bdiewa biex tgħinhom jaqdu r-rwol tagħhom bħala l-pulmun ekonomiku taż-żoni rurali. Hija tippermettilhom li jfornu kemm ikel ta' kwalità għolja u sigur kif ukoll beni pubbliċi li ma jistgħux jiġu pprovduti mis-suq biss: il-preżervazzjoni ta' struttura ekonomika u soċjali ħajja fiż-żoni rurali, il-ħarsien ambjentali u l-preżervazzjoni tal-pajsaġġi,

—

L-ostakli kummerċjali internazzjonali bil-mod il-mod qegħdin jingħelbu. Hija tendenza li għandna nilqgħu, b’mod partikulari sabiex jiġi stimulat l-iżvilupp fil-pajjiżi fqar. L-agrikoltura Ewropea qiegħda tiġi ffaċċjata dejjem aktar b'kompetizzjoni minn produtturi f'pajjiżi terzi. Il-kummerċ internazzjonali huwa parti mill-PAK. Il-PAK tippermetti lill-agrikoltura Ewropea tagħti l-aqwa sehem tagħha billi tippromwovi settur li huwa kompetittiv, innovattiv, li jwieġeb għas-suq u li jiffoka fuq il-produzzjoni ta' prodotti ta' kwalità u fuq l-identifikazzjoni ta' żbokki alternattivi għall-prodotti tagħha bħalma huma l-bijokarburanti,

—

Is-sussidji agrikoli huma ffinanzjati mill-flus ta' min iħallas it-taxxi. Għandna niżguraw li dawn jintefqu tajjeb u li jkunu ġestiti b'mod trasparenti. Iżda rridu niżguraw ukoll li l-PAK titmexxa b'regoli sempliċi, ċari, trasparenti u kost-effiċjenti. Il-piż amministrattiv għal dawk li jsegwuhom u għal dawk li jikkontrollawhom għandu jkun raġonevoli,

—

Il-biċċa l-kbira tat-territorju tal-UE jinsab f'żoni rurali. Dawn iż-żoni huma sors importanti ta' impjieg u jikkostitwixxu simbolu qawwi tal-patrimonju kulturali Ewropew. Il-PAK tħeġġeġ politika ta' żvilupp rurali li tiffavorixxi t-tkabbir u l-ħolqien tal-impjiegi fiż-żoni rurali, kemm fis-settur agrikolu kif ukoll lil hinn minnu, skont il-metodi li jsaħħu t-tessut ekonomiku, soċjali u ambjentali taż-żoni rurali tagħna,

2.3.   Tipi ta' miżuri ta' informazzjoni

Taħt din is-sejħa għall-proposti, il-Kummissjoni tixtieq tirċievi talbiet għat-tipi ta' miżuri ta' informazzjoni li ġejjin:

—	programmi tat-televiżjoni u r-radju (bħal dokumentarji, programmi ta' diskussjoni, eċċ.) (4),

—	produzzjonijiet viżwali, awdjo u awdjoviżivi u d-distribuzzjoni tagħhom (5),

—	azzjonijiet immirati lejn l-iskejjel u l-universitajiet,

—	konferenzi, seminars u laqgħat ta’ ħidma (inklużi dawk mobbli) speċjalment f’żoni rurali,

—	żjajjar ta’ skambju u ta’ informazzjoni, b’mod speċjali bejn Stati Membri antiki u ġodda,

—	stands ta’ informazzjoni f’fieri agrikoli,

—	kampanji ta’ informazzjoni, li jinkludu diversi tipi ta’ miżuri ta’ informazzjoni msemmija hawn fuq,

—	kategoriji oħra ta’ miżuri, bħal pubblikazzjonijiet u portals fuq l-internet ikunu kkunsidrati biss jekk jitwettqu f’waħda mil-lingwi tat-12-il Stat Membru ġdid.

2.4.   Destinatarji

Id-destinatarji tal-proġetti taħt din is-sejħa għall-proposti huma dawn li ġejjin:

—	il-pubbliku ġenerali fl-UE 27,

—	il-popolazzjoni taż-żoni rurali,

—	il-partijiet interessati fl-agrikoltura, il-bdiewa u benefiċjarji potenzjali oħra tal-miżuri ta’ żvilupp rurali.

3.   IT-TUL TA' ŻMIEN U L-BAĠIT

Din is-sejħa għall-proposti tikkonċerna miżuri speċifiċi ta’ informazzjoni li jridu jiġu implimentati (inklużi l-preparazzjoni, l-implimentazzjoni, is-segwitu u l-valutazzjoni) bejn l-1 ta’ Mejju 2010 u t-30 ta' April 2011.

Il-baġit totali previst disponibbli għall-miżuri ta’ informazzjoni li għandhom jitwettqu skont din is-sejħa għall-proposti jammonta għal EUR 3 250 000. Dan l-ammont se jitqassam fost il-miżuri li jitqiesu l-aqwa, skont il-kriterji msemmija fl-Anness III, punt 2. Il-Kummissjoni tirriżerva d-dritt li tnaqqas dan l-ammont totali disponibbli, kif ukoll li tagħti parti minnu biss.

L-ammont tas-sussidju mitlub mill-Kummissjoni għandu jkun bejn EUR 20 000 u EUR 200 000 għal kull miżura ta’ informazzjoni (ammont fiss għall-ispejjeż tal-persunal inkluża).

L-ispejjeż eliġibbli huma ddefiniti fl-Anness IV (it-tfassil tal-baġit). Il-kontribuzzjoni min-naħa tal-Kummissjoni għall-miżuri ta’ informazzjoni magħżula hija limitata għal 50 % tal-ispejjeż eliġibbli kollha minbarra l-ispejjeż tal-persunal li huma suġġetti għal ħlas fiss. Din ir-rata fissa ma tistax taqbeż l-EUR 10 000. Għall-miżuri ta’ informazzjoni li għandhom natura eċċezzjonali, u jekk ikun mitlub, il-persentaġġ tal-kontribut tal-Kummissjoni jista’ jasal sa 75 %.

Miżura ta’ informazzjoni tiġi rikonoxxuta bħala ta' interess eċċezzjonali kif imsemmi fl-Artikolu 7(2) tar-Regolament (KE) Nru 2208/2002 jekk jiġu sodisfatti l-erba’ kundizzjonijiet li ġejjin:

(1)	titwettaq f’wieħed mit-12-il Stat Membru l-ġodda;

(2)	ikollha kwalità teknika għolja u kost-effiċjenza tajba;

(3)	il-pjan ta’ tixrid tagħha jkun tali li jiggarantixxi t-tixrid tal-informazzjoni lill-ikbar udjenza possibbli;

(4)	jekk il-kumitat għall-evalwazzjoni, minn hawn ’il quddiem imsejjaħ il-kumitat, ikun taha mill-inqas 75 punt minn 100 punt għal kriterji tal-għoti kif imniżżel fl-Anness III, il-punt 2.

M’huwa ser ikun permess l-ebda prefinanzjament għal miżuri ta' informazzjoni li ngħataw sussidju skont din is-sejħa għall-proposti. L-għażla għall-applikazzjoni ma tobbligax lill-Kummissjoni li tagħti l-ammont sħiħ mitlub mill-applikant. Is-sussidju ma għandu fl-ebda ċirkostanza jaqbeż l-ammont mitlub.

4.   STRUZZJONIJIET ĠENERALI GĦAT-TRESSIQ TAT-TALBIET

4.1.   Struzzjonijiet għat-tħejjija tal-applikazzjoni

Kull min japplika ma jistax iressaq l-applikazzjoni ħlief għal miżura ta’ informazzjoni waħda għal kull eżerċizzju baġitarju.

L-applikazzjoni titressaq bl-użu tal-formoli xierqa disponibbli fl-indirizz tal-internet li ġej: http://ec.europa.eu/comm/agriculture/grants/capinfo/index_en.htm

L-applikazzjoni għandha tinkiteb b’waħda mil-lingwi uffiċjali tal-Komunità. Sabiex jitħaffef l-ipproċessar tat-talbiet fl-iqsar żmien possibbli, l-applikanti huma mħeġġa li jressqu l-applikazzjoni tagħhom bl-Ingliż jew bil-Franċiż u jekk dan ma jkunx possibbli li tal-inqas jinkludu traduzzjoni tal-kontenut tal-formola 3 bl-Ingliż jew bil-Franċiż.

L-applikazzjoni għandha tinkludi d-dokumenti li ġejjin li huma disponibbli fl-indirizz tal-internet imsemmi hawn fuq:

—	L-ittra tal-applikazzjoni li ssemmi t-titolu tal-miżura ta’ informazzjoni proposta u l-ammont tas-sussidju mitlub, iffirmata mir-rappreżentant awtorizzat legalment fi ħdan l-organizzazzjoni li tkun qed tapplika,

—

il-Formola Nru 1 (informazzjoni dwar l-applikant), Nru 2 (informazzjoni dwar il-koorganizzaturi jekk applikabbli), Nru 3 (deskrizzjoni dettaljata tal-miżura ta’ informazzjoni) tal-applikazzjoni. Jekk mistoqsija ma tapplikax għall-miżura ta’ informazzjoni proposta, għandek iddaħħal “mhux applikabbli” jew “n/a”. Jiġu kkunsidrati biss l-applikazzjonijiet ippreżentati fuq dawn il-formoli,

—	baġit wieħed tal-miżura ta’ informazzjoni proposta (li huwa magħmul minn tabella waħda dettaljata tan-nefqa u tabella waħda dettaljata tad-dħul u fil-bilanċ), mimlija kif xieraq, iffirmati u ddatati mir-rappreżentant awtorizzat legalment fl-organizzazzjoni li tkun qed tapplika,

—	id-dokumenti kollha addizzjonali msemmija fl-Anness I (Dokumenti addizzjonali meħtieġa sabiex tapplika għas-sussidju).

4.2.   Skadenzi u destinatarji li lilhom trid tintbagħat l-applikazzjoni

L-applikanti għandhom jibagħtu kopja waħda tal-applikazzjoni sħiħa tagħhom mhux aktar tard mill-31 ta’ Ottubru 2009 bil-posta reġistrata li tkun tinkludi għarfien li l-applikazzjoni waslet (il-marka tal-posta fuq l-envelopp sservi ta' prova tad-data ta' meta tkun intbagħtet) fl-indirizz li ġej:

Kummissjoni Ewropea

Unità AGRI. K.1

Sejħa għall-proposti 2009/C 215/04

Lis-sinjur M H.-E. Barth

L130 4/148A

1049 Brussels

BELGIUM

L-applikazzjonijiet iridu jintbagħtu ġo envelopp jew kaxxa tal-kartun issiġillata li titqiegħed ġo envelopp ieħor jew kaxxa tal-kartun issiġillata. Fuq l-envelopp jew il-kaxxa tal-kartun ta’ ġewwa, barra l-indirizz tad-destinatarju, kif inhu indikat fis-sejħa għall-proposti, għandu jkun hemm ukoll it-titlu “sejħa għall-proposti – dan il-pakkett ma għandux jinfetaħ mis-servizz postali”. Jekk jintużaw enveloppi li jkun fihom il-kolla, dawn għandhom ikunu ssiġillati b'tejp adeżiv u min jibgħathom għandu jiffirma matul dak it-tejp.

Ladarba d-dokumenti kollha li jintbagħtu lill-Kummissjoni għandhom jiġu skennjati paġna paġna, huwa mitlub li l-folji tal-applikazzjoni u tal-annessi ma jitwaħħlux flimkien. Barra minn hekk, b’rispett għall-ambjent, il-kandidati huma mħeġġa li jressqu l-applikazzjoni tagħhom fuq karti reċiklati jew stampati minn wara u minn quddiem.

Fl-istess ħin u mhux aktar tard mill-31 ta’ Ottubru 2009 f’nofs il-lejl (ħin ta' Brussell), l-applikanti għandhom jibagħtu wkoll kopja elettronika tal-applikazzjoni tagħhom, li tinkludi biss il-verżjoni elettronika tal-ittra tal-applikazzjoni, il-formoli 1-3 u l-baġit, identiċi għal dawk mibgħuta bil-posta, fl-indirizz elettroniku li ġej:

AGRI-GRANTS-APPLICATIONS-ONLY@ec.europa.eu

Hija responsabbiltà tal-applikanti li jibagħtu l-applikazzjoni tagħhom b'mod sħiħ u sad-data ta’ skadenza. L-applikazzjonijiet mibgħuta wara l-iskadenza jiġu rrifjutati.

5.   IL-PROĊEDURA U L-ISKEDA

5.1.   Il-wasla u r-reġistrazzjoni tal-applikazzjonijiet

Il-Kummissjoni tirreġistra l-applikazzjoni tiegħek u tibgħatlek konferma tal-wasla tagħha bil-posta elettronika bin-numru assenjat għall-applikazzjonijiet tiegħek fi żmien 15-il ġurnata tax-xogħol wara l-iskadenza li fiha kellhom jitressqu l-applikazzjonijiet.

5.2.   Eżami tal-applikazzjonijiet fid-dawl tal-kriterji ta' eliġibbiltà u esklużjoni

Kumitat ta’ valutazzjoni ad-hoc iwettaq l-eżami tal-eliġibbiltà tal-applikazzjonijiet. L-applikazzjonijiet li ma jissodisfawx kriterju wieħed jew aktar minn dawk stabbiliti fl-Anness II (kriterji ta’ eliġibbiltà u esklużjoni) ma jintlaqgħux.

L-applikazzjonijiet kollha eliġibbli jgħaddu għall-fażi ta’ valutazzjoni li jmiss (eżami fid-dawl tal-kriterji tal-għażla — kapaċità teknika u finanzjarja tal-applikanti).

5.3.   Eżami tal-applikazzjonijiet fid-dawl tal-kriterji tal-għażla – il-kapaċità teknika u finanzjarja tal-applikanti

Waqt din il-fażi, il-kumitat sejjer jeżamina l-kapaċità teknika u finanzjarja tal-applikanti eliġibbli abbażi tal-informazzjoni pprovduta fl-applikazzjoni skont il-kriterji deskritti fl-Anness III (1) (kriterji tal-għażla).

L-applikazzjonijiet kollha li jgħaddu minn din il-fażi jgħaddu għall-fażi li jmiss (il-valutazzjoni fid-dawl tal-kriterji tal-għotja).

5.4.   Il-valutazzjoni tal-applikazzjonijiet fid-dawl tal-kriterji tal-għotja

Matul din il-fażi, il-kumitat jevalwa l-applikazzjonijiet fid-dawl tal-kriterji għall-għoti spjegati fl-Anness III (2) (kriterji għall-għoti). L-applikazzjonijiet li jirċievu mill-inqas 60 punt mill-100 disponibbli (u mill-inqas 50 % tal-punti disponibbli għal kull kriterju) biss ikunu proposti għal għotja ta’ sussidju mill-kumitat ta' evalwazzjoni. Madankollu, il-fatt li tirċievi 60 mill-100 punt disponibbli ma jiggarantix li l-miżura ta' informazzjoni se tingħata s-sussidju. Fil-fatt, il-Kummissjoni tista' tgħolli r-rata minima aċċettabbli fid-dawl tan-numru ta' applikazzjonijiet ta’suċċess u tar-riżorsi baġitarji disponibbli.

L-applikazzjonijiet li jirċievu inqas minn 60 punt mill-100 disponibbli jew anqas minn 50 % tal-punti disponibbli għal kull kriterju jiġu mwarrba ; l-applikant jirċievi notifika bil-miktub li tagħti r-raġunijiet li għalihom ġiet imwarrba l-applikazzjoni.

Jekk l-għotja tas-sussidju tingħata, il-benefiċjarju jirċievi konvenzjoni ta' sussidju (mudell disponibbli mill-indirizz tal-internet imsemmi fil-punt 4.1 ta’ din is-Sejħa għall-proposti), denominat f'euros, li jispeċifika l-kondizzjonijiet u l-livell ta' finanzjament, li jista' jkun inferjuri għall-ammont mitlub fl-applikazzjoni. Fil-każ ta' żbalji aritmetiċi jew spejjeż ikkunsidrati mhux eliġibbli, il-baġit jiġi kkoreġut mis-servizzi tal-Kummissjoni. Jekk il-korrezzjoni twassal għal ammont ogħla tal-ispejjeż totali, l-ammont mitlub jibqa’ mhux mibdul u l-kontribuzzjoni tal-applikant tiżdied kif xieraq.

Id-data prevista għall-għeluq tal-proċedura ta’ valutazzjoni hija t-30 ta’ April 2010. Is-servizzi tal-Kummissjoni ma humiex awtorizzati li jinformaw lill-applikanti dwar l-istat tal-valutazzjoni tal-applikazzjoni tagħhom qabel id-deċiżjoni tal-għotja. Għal din ir-raġuni, l-applikanti huma mitluba biex ma jċemplux u ma jiktbux lill-Kummissjoni dwar ir-riżultat tal-applikazzjoni tagħhom qabel id-data prevista msemmija hawn fuq.

6.   REKLAMAR

Il-benefiċjarji għandhom l-obbligu li jiżguraw, bil-mezzi adegwati kollha u skont il-kundizzjonijiet stabbiliti fil-konvenzjoni tas-sussidju, li l-komunikazzjoni kollha u r-reklamar kollu tal-benefiċjarju dwar il-miżura msemmija isemmu l-finanzjament mogħti mill-Komunità.

Barra minn hekk, kull komunikazzjoni jew pubblikazzjoni tal-benefiċjarju, fi kwalunkwe forma u dwar kwalunkwe appoġġ, għandhom isemmu l-fatt li din torbot biss lill-awtur tagħha u li l-Kummissjoni mhijiex responsabbli għall-użu li jista’ jsir mill-informazzjoni inkluża f’din il-komunikazzjoni jew pubblikazzjoni.

L-evidenza ta’ dan ir-reklamar trid tiġi inkluża fir-rapporti tekniċi finali ta’ implimentazzjoni. Mudell tal-logo jista’ jitniżżel mill-indirizz tal-internet li ġej: http://europa.eu/abc/symbols/emblem/download_en.htm

Jekk l-organizzazzjoni benefiċjarja ma tkunx konformi mal-obbligu msemmi hawn fuq, il-Kummissjoni tirriżerva d-dritt li tnaqqas l-ammont tas-sussidju allokat lill-miżura ta' informazzjoni kkonċernata jew li tiċħad kompletament il-ħlas tas-sussidju lill-benefiċjarju.

7.   PROTEZZJONI TAD-DEJTA PERSONALI

Il-Kummissjoni Ewropea tiżgura li kwalunkwe dejta personali inkluża fl-applikazzjoni tkun ipproċessata skont ir-Regolament (KE) Nru 45/2001 tal-Parlament Ewropew u tal-Kunsill tat-18 ta’ Diċembru 2000 dwar il-protezzjoni tal-individwi fir-rigward tal-ipproċessar ta' dejta personali mill-istituzzjonijiet u l-korpi tal-Komunità u dwar il-moviment ħieles ta’ dik id-dejta (6). Dawn id-dispożizzjonijiet japplikaw b’mod partikolari għall-kunfidenzjalità u s-sigurtà tad-dejta in kwistjoni.

---

(1)  ĠU L 100, 20.4.2000, p. 7.

(2)  ĠU L 337, 13.12.2002, p. 21.

(3)  ĠU L 320, 21.10.2004, p. 14.

(4)  Għal din it-tip ta’ miżura, il-Konvenzjoni għas-sussidju tawtorizza lill-Kummissjoni biex tiddisponi minn drittijiet ta’ riproduzzjoni u diffużjoni, għal finijiet mhux kummerċjali, f’kull qasam tax-xandir, għal perjodu ta’ żmien mhux limitat u mingħajr restrizzjoni territorjali, tal-prodotti jew programmi jew ta’ partijiet minn dawn deskritti f’din il-miżura.

(5)  Ara nota numru 4

(6)  ĠU L 8, 12.1.2001, p. 1.

---

---

---

---

---