5.6.2009

MT

Il-Ġurnal Uffiċjali tal-Unjoni Ewropea

C 125/24

---

Sejħa għall-proposti IX-2010/02 – Konċessjonijiet lill-Fondazzjonijiet Politiċi f’Livell Ewropew

2009/C 125/09

1.   GĦANIJIET

1.1.   Sfond

L-Artikolu 191 tat-Trattat li jistabbilixxi l-Komunità Ewropea jgħid li l-partiti politiċi f’livell Ewropew huma fattur importanti għall-integrazzjoni fl-Unjoni. Jagħtu kontribut sabiex tinħoloq kuxjenza u jesprimu r-rieda politika taċ-ċittadini ta’ l-Unjoni. F’dan il-kuntest, ir-Regolament (KE) Nru 2004/2003 tal-Parlament Ewropew u tal-Kunsill ta’ l-4 ta’ Novembru 2003 (1) jistipula r-regolamenti li jirregolaw il-partiti politiċi f'livell Ewropew u r-regoli dwar il-finanzjament tagħhom. Ir-reviżjoni tar-Regolament irrikonoxxiet l-irwol tal-fondazzjonijiet politiċi f'livell Ewropew, li, bħala organizzazzjonijiet affiljati ma' partiti politiċi f'livell Ewropew “jistgħu, permezz ta' l-attivitajiet tagħhom, jappoġġjaw u jsaħħu l-objettivi ta' dawn b'mod speċjali billi jikkontribwixxu għad-dibattitu dwar il-kwistjonijiet ta' politika pubblika Ewropea u dwar l-integrazzjoni Ewropea, inkluż li jaġixxu bħala katalisti għal ideat, analiżi u għażliet politiċi ġodda.” Ir-Regolament jipprovdi, partikolarment, għal konċessjoni annwali ta' operat mill-Parlament Ewropew, lill-fondazzjonijiet politiċi li japplikaw u li jissodisfaw il-kundizzjonijiet stipulati fir-Regolament.

1.2.   Għan tas-sejħa

Skond l-Artikolu 2 tad-Deċiżjoni tal-Bureau tal-Parlament Ewropew tad-29 ta' Marzu 2004 li tistipula l-proċeduri għall-implimentazzjoni tar-Regolament (KE) Nru 2004/2003 (2), “Il-Parlament Ewropew għandu jippubblika kull sena, qabel tmiem l-ewwel nofs tas-sena, sejħa għall-proposti bil-għan li jqassam konċessjonijiet li jiffinanzjaw lill-partiti u fondazzjonijiet.” Is-sejħa għall-proposti tikkonċerna l-applikazzjonijiet għall-konċessjonijiet għas-sena finanzjarja 2010 li tkopri l-perijodu ta’ attività mill-1 ta' Jannar 2010 sal-31 ta' Dicembru 2010.

2.   KRITERJI U DOKUMENTI TA’ APPOĠĠ

2.1.   Ammisibiltà

L-applikazzjonijiet mhux se jkunu ammissibbli jekk ma jiġux sottomessi bil-miktub fuq il-formola ta’ l-applikazzjoni għall-konċessjonijiet li tinsab fl-Anness 1 tad-Deċiżjoni tal-Bureau tal-Parlament Ewropew tad-29 ta’ Marzu 2004 imsemmija hawn fuq, u ma jingħatawx lill-President tal-Parlament Ewropew sad-data ta’ l-għeluq u ma jkunux jissodisfaw il-kundizzjonijiet għas-sottomissjoni ta’ l-applikazzjonijiet stipulati hawn taħt.

2.2.   Kriterji ta’ l-eliġibiltà

Sabiex tkun eliġibbli għal konċessjoni, fondazzjoni politika f’livell Ewropew għandha tissodisfa l-kundizzjonijiet stipulati fl-Artikolu 3(2) tar-Regolament (KE) Nru 2004/2003, jiġifieri:

(a)	għandha tkun affiljata ma' wieħed mill-partiti politiċi f'livell Ewropew rikonoxxut b'konformità ma' dan ir-Regolament, kif ċertifikat minn dak il-partit;

(b)	għandu jkollha personalità legali fl-Istat Membru li fih hemm allokata is-sede tagħha. Din il-personalità legali għandha tkun separata minn dik tal-partit politiku f'livell Ewropew li miegħu hija affiljata l-fondazzjoni;

(c)	għandha tosserva, partikolarment fil-programm tagħha u fl-attivitajiet tagħha, il-prinċipji li fuqhom hija stabbilita l-Unjoni Ewropea, jiġifieri l-prinċipji tal-libertà, id-demokrazija, ir-rispett lejn id-drittijiet tal-bniedem u l-libertajiet fondamentali, u l-istat ta’dritt;

(d)	m'għandhiex tippromwovi objettivi ta' profitt;

(e)	il-korp ta' tmexxija tagħha għandu jkun kompost b'mod bilanċjat ġeografikament.

2.3.   Kriterji ta’ l-esklużjoni

L-applikanti għandhom jiċċertifikaw ukoll li huma ma jinsabux f’xi waħda miċ-ċirkostanzi deskritti fl-Artikoli 93(1) u 94 tar-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 dwar ir-Regolament Finanzjarju li japplika għall-baġit ġenerali tal-Komunitajiet Ewropej (3).

2.4.   Kriterji ta’ l-għażla

L-applikanti għandhom jipprovdu evidenza li għandhom il-vijabiltà legali u finanzjarja meħtieġa sabiex iwettqu l-programm ta’ attivitajiet stipulat fl-applikazzjoni għall-finanzjament u li għandhom il-kapaċità teknika u ta' l-immaniġġjar meħtieġa sabiex iwettqu b’suċċess il-programm ta’ attivitajiet li għalih huma qed japplikaw għall-konċessjoni.

2.5.   Kriterji ta’ l-għoti

Skond l-Artikolu 4(5) tar-Regolament (KE) Nru 2004/2003, l-approprjazzjonijiet disponibbli għas-sena finanzjarja 2010 għandhom jitqassmu kif ġej bejn il-fondazzjonijiet politiċi f’livell Ewropew li kisbu deċiżjoni pożittiva għall-applikazzjoni tagħhom għall-finanzjament skond il-kriterji ta’ ammisibiltà, eliġibiltà, u l-kriterji ta’ l-esklużjoni u ta’ l-għażla:

(a)	15 % se jitqassmu f'ishma ndaqs;

(b)	85 % se jitqassmu bejn dawk li huma affiljati għal dawn il-partiti politiċi f'livell Ewropew li għandhom membri eletti fil-Parlament Ewropew, proporzjonalment man-numru ta' membri eletti.

2.6.   Dokumenti ta’ appoġġ

Għall-iskop ta’ evalwazzjoni tal-kriterji ta’ hawn fuq, l-applikanti għandhom jipprovdu d-dokumenti ta’ appoġġ li ġejjin:

(a)	L-ittra oriġinali li tindika l-ammont ta' għotja rikjest

(b)	Il-formola ta’ applikazzjoni fl-Anness 1 tad-Deċiżjoni tal-Bureau tal-Parlament Ewropew tad-29 ta’ Marzu 2004 mimlija u ffirmata kif meħtieġ (inkluża d-dikjarazzjoni solenni bil-miktub)

(c)	L-istatuti ta' l-applikant (jew dikjarazzjoni li ma kien hemm l-ebda tibdil fid-dokumenti li ġew imressqa)

(d)	Iċ-ċertifikat uffiċjali ta’ reġistrazzjoni (jew dikjarazzjoni li ma kien hemm l-ebda tibdil fid-dokumenti li ġew imressqa)

(e)	Evidenza riċenti ta’ l-eżistenza ta’ l-applikant

(f)	Lista ta’ diretturi/membri tal-Bord Maniġerjali (l-ismijiet u l-kunjomijiet, ċittadinanza, it-titli jew il-karigi fi ħdan il-partit li qed japplika) (jew dikjarazzjoni li ma kien hemm l-ebda tibdil fid-dokumenti li ġew imressqa)

(g)	Il-programm ta' l-applikant (jew dikjarazzjoni li ma kien hemm l-ebda tibdil fid-dokumenti li ġew imressqa)

(h)	Dikjarazzjoni finanzjarja komprensiva għall-2008 iċċertifikata minn korp tal-verifika estern (4)

(i)	Baġit provviżorju għall-operat matul il-perijodu kkonċernat (mill-1 ta' Jannar 2010 sa sal-31 ta' Dicembru 2010) li jindika n-nefqa eliġibbli għall-finanzjament mill-baġit Komunitarju.

3.   FINANZJAMENT KOMUNITARJU

It-total ta’ l-istima tal-baġit għas-sena finanzjarja 2010 huwa ta’ EUR 7 140 000 li huwa suġġett għall-approvazzjoni mill-awtorità tal-baġit.

L-ammont massimu li jitħallas lill-benefiċjarji mill-Parlament Ewropew m'għandux jaqbeż il-85 % ta’ l-ispejjeż marbuta ma’ l-operat tal-fondazzjonijiet politiċi f’livell Ewropew li huma eliġibbli. Il-fondazzjoni politika kkonċernata għandha r-responsabiltà li tipprovdi evidenza.

Il-finanzjament Komunitarju se jieħu l-għamla ta’ konċessjoni għall-operat kif jipprovdu r-Regolament Finanzjarju u r-Regolament tal-Kummissjoni (KE, Euratom) Nru 2342/2002 tat-23 ta’ Diċembru 2002 li jippreskrivi regoli ddettaljati għall-implimentazzjoni tar-Regolament tal-Kunsill (KE, Euratom) Nru 1605/2002 fuq ir-Regolament Finanzjarju li jgħodd għall-baġit ġenerali tal-Komunitajiet Ewropej (5). L-arranġamenti għall-ħlas tal-konċessjonijiet u l-obbligi li jirregolaw l-użu tagħhom se jiġu stipulati fi ftehim ta’ għoti ta’ konċessjoni - kampjun ta’ dan il-ftehim jinsab fl-Anness 2 tad-Deċiżjoni tal-Bureau tal-Parlament Ewropew tad-29 ta’ Marzu 2004.

4.   PROĊEDURA

4.1.   Data ta’ l-għeluq u s-sottomissjoni ta’ l-applikazzjonijiet

Id-data ta’ l-għeluq għas-sottomissjoni ta’ l-applikazzjonijiet hija l-1 ta' Novembru 2009. L-applikazzjonijiet imressqa wara dik id-data mhux se jiġu kkunsidrati.

L-applikzzjonijiet għandhom:

—	isiru permezz tal-formola ta’ l-applikazzjoni għall-konċessjoni;

—	jiġu ffirmati, mingħajr ma l-applikant jonqos milli jagħmel dan, minnu stess jew minn aġent awtorizzat b’mod korrett;

—

jiġu sottomessi f'żewġ envelops li t-tnejn iridu jkunu ssiġillati. Barra l-indirizz tad-dipartiment reċipjent kif mogħti fuq is-sejħa għall-proposti, fuq l-envelop ta’ ġewwa għandu jitniżżel dan li ġej: CALL FOR PROPOSALS — 2010 grants to political foundations at European level NOT TO BE OPENED BY THE MAIL SERVICE OR BY ANY OTHER UNAUTHORISED PERSON Jekk jintużaw envelops li jeħlu minnhom infushom, dawn għandhom jiġu ssiġillati bit-tejp li jwaħħal bil-firma ta’ min qed jibgħat imwaħħla fuqu. Il-firma ta’ min qed jibgħat għandha tinkludi mhux biss il-firma bil-miktub tiegħu, iżda wkoll it-timbru ta’ l-organizzazzjoni tiegħu;

—

jitressqu mhux iktar tard mid-data ta’ l-għeluq stipulata fis-sejħa għall-proposti jew bil-posta rreġistrata, kif muri bit-timbru tal-posta jew bis-servizz tal-kurjer skond id-data fuq l-irċevuta tad-depożitu, L-envelop ta’ barra għandu jkun indirizzat lil: EUROPEAN PARLIAMENT Mail Service KAD 00D008 2929 Luxembourg LUXEMBOURG Dan l-envelop għandu jkun fih ukoll l-indirizz ta’ min qed jibgħat. L-envelop ta’ ġewwa għandu jkun indirizzat lil: President of the European Parliament via Mr Vanhaeren, Director-General of Finance SCH 05B031 2929 Luxembourg LUXEMBOURG

4.2.   Skeda għall-implimentazzjoni tal-programm ta’ attivitajiet

Il-perijodu eliġibbli għall-kofinanzjament tan-nefqa marbuta ma’ l-operat tal- fondazzjonijiet politiċi f’livell Ewropew fl-2010 jibda mill-1 ta' Jannar 2010 sal-31 ta' Dicembru 2010.

4.3.   Proċedura ta' l-għoti u skeda

Il-proċedura u l-iskeda li ġejjin se japplikaw għall-għoti ta’ konċessjonijiet lill-fondazzjonijiet politiċi f’livell Ewropew:

(a)	Il-preżentazzjoni ta’ l-applikazzjoni lill-Parlament Ewropew (mhux iktar tard mill-1 ta' Novembru 2009)

(b)	Kunsiderazzjoni u għażla mid-dipartimenti tal-Parlament Ewropew. L-applikazzjonijiet li jitqiesu ammissibbli biss se jiġu eżaminati a bażi tal-kriterji ta’ l-eliġibiltà, ta’ l-esklużjoni u ta’ l-għażla stipulati fis-sejħa għall-proposti.

(c)	L-adozzjoni tad-deċiżjoni finali mill-Bureau tal-Parlament Ewropew (mhux aktar tard mill-1 ta' Frar 2010) u n-notifika ta’ l-applikanti.

(d)	Firma tal-ftehim ta’ għoti ta’ konċessjoni (fi żmien 30 ġurnata mid-deċiżjoni tal-Bureau)

(e)	Ħlas bil-quddiem ta’ 80 % (fi żmien 15-il ġurnata mill-iffirmar tal-ftehim).

4.4.   Iktar informazzjoni

It-testi li ġejjin huma disponibbli fis-sit ta’ l-Internet tal-Parlament Ewropew fl-indirizz li ġej:

http://www.europarl.europa.eu/tenders/invitations.htm

(a)	Ir-Regolament (KE) Nru 2004/2003 tal-Parlament Ewropew u tal-Kunsill ta’ l-4 ta’ Novembru 2003 dwar ir-regolamenti li jirregolaw il-partiti politiċi f'livell Ewropew u r-regoli dwar il-finanzjament tagħhom.

(b)	Id-deċiżjoni tal-Bureau tal-Parlament Ewropew tad-29 ta' Marzu 2004 li tistipula proċeduri għall-implimentazzjoni tar-Regolament (KE) Nru 2004/2003 tal-Parlament Ewropew u tal-Kunsill dwar ir-regolamenti li jirregolaw il-partiti politiċi f’livell Ewropew u r-regoli dwar il-finanzjament tagħhom.

(c)	Il-formola ta’ l-applikazzjoni għall-konċessjoni;

(d)	Ftehim dwar il-kampjun.

Kwalunkwe mistoqsijiet relatati ma’ din is-sejħa għall-proposti li għandha l-għan li tagħti konċessjonijiet għandhom jintbagħtu bil-posta elettronika,u għandha tiġi kkwotata r-referenza, fl-indirizz li ġej: Helmut.Betz@europarl.europa.eu

---

(1)  ĠU L 297, 15.11.2003, p. 1.

(2)  ĠU C 155, 12.6.2004, p. 1.

(3)  ĠU L 248, 16.9.2002, p. 1.

(4)  Sakemm l-applikant ma jkunx ġie stabbilit matul is-sena kurrenti.

(5)  ĠU L 357, 31.12.2002, p. 1.

---