EUR-Lex Access to European Union law
This document is an excerpt from the EUR-Lex website
Document C2008/141/13
Call for proposals 2008 — Culture Programme (2007-2013) — Implementation of the programme actions: multi-annual cooperation projects; cooperation measures; special action (third countries); and support for bodies active at European level in the field of culture
Sejħa għal proposti 2008 — Programm Kultura (2007–2013) — Implimentazzjoni ta' l-azzjonijiet tal-programm: proġetti multiannwali ta' kooperazzjoni; miżuri ta' kooperazzjoni; azzjonijiet speċjali (pajjiżi terzi); u appoġġ għall-istituzzjonijiet attivi fil-qasam tal-kultura fil-livell Ewropew
Sejħa għal proposti 2008 — Programm Kultura (2007–2013) — Implimentazzjoni ta' l-azzjonijiet tal-programm: proġetti multiannwali ta' kooperazzjoni; miżuri ta' kooperazzjoni; azzjonijiet speċjali (pajjiżi terzi); u appoġġ għall-istituzzjonijiet attivi fil-qasam tal-kultura fil-livell Ewropew
ĠU C 141, 7.6.2008, p. 27–31
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
7.6.2008 |
MT |
Il-Ġurnal Uffiċjali ta’ l-Unjoni Ewropea |
C 141/27 |
Sejħa għal proposti 2008 — Programm Kultura (2007–2013)
Implimentazzjoni ta' l-azzjonijiet tal-programm: proġetti multiannwali ta' kooperazzjoni; miżuri ta' kooperazzjoni; azzjonijiet speċjali (pajjiżi terzi); u appoġġ għall-istituzzjonijiet attivi fil-qasam tal-kultura fil-livell Ewropew
(2008/C 141/13)
Introduzzjoni
Din is-sejħa għal proposti hija bbażata fuq id-Deċiżjoni Nru 1855/2006/KE (1) tal-Parlament Ewropew u tal-Kunsill tat-12 ta' Diċembru 2006, li tistabbilixxi l-Programm Kultura (2007 — 2013), aktar 'il quddiem imsejjaħ “il-Programm Kultura”. Il-kondizzjonijiet dettaljati ta' din is-sejħa għal proposti jinsabu fil-Gwida għall-Programm dwar il-Programm Kultura (2007 — 2013) ippubblikata fuq il-websajt ta' l-Ewropa (ara l-punt VIII). Il-Gwida għall-Programm tikkostitwixxi parti integrali minn din is-sejħa għal proposti.
I. Għanijiet
Il-Programm Kultura twaqqaf biex ikabbar l-ispazju kulturali kondiviż mill-Ewropej, li huwa bbażat fuq il-wirt kulturali komuni, permezz ta' l-iżvilupp ta' attivitajiet ta' kooperazzjoni fost operaturi kulturali minn pajjiżi eliġibbli (2), bl-għan li tiġi mħeġġa l-feġġa ta' ċittadinanza Ewropea.
Il-Programm jimmira lejn tliet għanijiet speċifiċi:
— |
il-promozzjoni tal-mobilità transnazzjonali ta' nies li jaħdmu fis-settur kulturali, |
— |
l-appoġġ għaċ-ċirkolazzjoni transnazzjonali ta' xogħlijiet u prodotti kulturali u artistiċi, |
— |
il-promozzjoni ta' djalogu interkulturali. |
Il-Programm għandu approċċ flessibbli, interdixxiplinarju u jiffoka fuq il-bżonnijiet espressi minn operaturi kulturali fil-konsultazzjonijiet pubbliċi li wasslu għat-tfassil tiegħu.
II. Linji
Din is-sejħa tkopri l-linji tal-Programm Kultura li ġejjin:
1. |
Appoġġ għal proġetti kulturali (l-ewwel linja) Organizzazzjonijiet kulturali jingħataw appoġġ biex jaħdmu flimkien fi proġetti mwettqa bejn il-fruntieri u biex joħolqu u jimplimentaw attivitajiet kulturali u artistiċi. L-enfasi ta' din il-linja hi li tgħin organizzazzjonijiet, bħal teatri, mużewijiet, assoċjazzjonijiet professjonali, ċentri ta' riċerka, universitajiet, istituti kulturali u awtoritajiet pubbliċi minn pajjiżi differenti jipparteċipaw fil-Programm Kultura u jikkooperaw sabiex is-setturi differenti jkunu jistgħu jaħdmu flimkien u jestendu l-firxa kulturali u artistika tagħhom bejn il-fruntieri. Din il-linja tinqasam f'erba' kategoriji, iddettaljati hawn taħt. Linja 1.1: Proġetti Multiannwali ta' Kooperazzjoni (li jdumu minn tlieta sa ħames snin) L-ewwel kategorija tfittex li trawwem rabtiet kulturali transnazzjonali multiannwali billi tinkoraġġixxi minimu ta' sitt operaturi kulturali ġejjin minn talanqas sitt pajjiżi eliġibbli biex jikkooperaw u jaħdmu f'setturi partikolari u f'setturi diversi fl-iżvilupp ta' attivitajiet kulturali konġunti fuq perjodu ta' minn tlieta sa ħames snin. Hemm fondi disponibbli bejn minimu ta' EUR 200 000 u massimu ta' EUR 500 000 fis-sena, iżda l-appoġġ mill-UE huwa limitat għal massimu ta' 50 % ta' l-ispiża totali eliġibbli. Il-fondi huma maħsuba biex jgħinu jwaqqfu jew jestendu l-firxa ġeografika ta' proġett u jagħmluh sostenibbli wara l-perjodu tal-finanzjament. Linja 1.2.1: Proġetti ta' Kooperazzjoni (li jdumu sa 24 xahar) It-tieni kategorija hija dwar azzjonijiet kondiviżi minn minimu ta' tliet operaturi kulturali, li jaħdmu f'settur partikolari jew f'diversi setturi, ġejjin minn talanqas tliet pajjiżi eliġibbli fuq perjodu massimu ta' sentejn. L-azzjonijiet indikati b'mod speċjali huma dawk li jesploraw mezzi ta' kooperazzjoni fit-tul. Hemm fondi disponibbli ta' bejn EUR 50 000 u EUR 200 000, iżda l-appoġġ ta' l-UE huwa limitat għal massimu ta' 50 % ta' l-ispiża totali eliġibbli. Linja 1.2.2: Proġetti ta' Traduzzjoni Letterarja (li jdumu sa 24 xahar) It-tielet kategorija tikkonċerna l-appoġġ għal proġetti ta' traduzzjoni. L-appoġġ ta' l-UE għat-Traduzzjoni Letterarja huwa mmirat sabiex itejjeb l-għarfien ta' l-Ewropej tal-letteratura u l-wirt letterarju ta' xulxin permezz tal-promozzjoni taċ-ċirkolazzjoni ta' xogħlijiet ta' immaġinazzjoni (fiction) bejn il-pajjiżi. Djar tal-pubblikazzjoni jistgħu jingħataw għotjiet għat-traduzzjoni u l-pubblikazzjoni ta' xogħlijiet letterarji minn lingwa Ewropea għal oħra. Hemm fondi disponibbli ta' bejn EUR 2 000 u EUR 60 000, iżda l-appoġġ ta' l-UE huwa limitat għal massimu ta' 50 % ta' l-ispiża totali eliġibbli. Linja 1.3: Proġetti ta' Kooperazzjoni ma' Pajjiżi Terzi (li jdumu sa 24 xahar) Ir-raba' kategorija tfittex li tappoġġja proġetti ta' kooperazzjoni kulturali immirati lejn skambji kulturali bejn pajjiżi li qed jieħdu sehem fil-Programm u Pajjiżi Terzi li għandhom ftehim ta' assoċjazzjoni jew kooperazzjoni ma' l-UE, sakemm dan ta' l-aħħar ikun jinkludi klawżoli kulturali. Kull sena jintgħażel Pajjiż Terz wieħed jew aktar għal dik is-sena partikolari. Il-pajjiż jew pajjiżi jiġu eventwalment indikati kull sena fuq il-websajt ta' l-Aġenzija Eżekuttiva qabel id-data ta' l-għeluq tas-sottomissjoni. L-azzjoni tkun teħtieġ li tiġġenera dimensjoni internazzjonali ta' kooperazzjoni konkreta. Il-proġetti ta' kooperazzjoni jinvolvu mill-anqas tliet operaturi kulturali, ġejjin minn talanqas tliet pajjiżi eliġibbli b'kooperazzjoni kulturali ma' mill-anqas organizzazzjoni waħda mill-Pajjiż Terz magħżul u/jew jinvolvu attivitajiet kulturali mwettqa fil-Pajjiż Terz magħżul. Hemm fondi disponibbli ta' bejn EUR 50 000 u massimu ta' EUR 200 000, iżda l-appoġġ mill-UE huwa limitat għal massimu ta' 50 % ta' l-ispiża totali eliġibbli. |
2. |
Appoġġ għall-Organizzazzjonijiet Attivi fil-Qasam tal-Kultura fil-Livell Ewropew (Linja 2) Organizzazzjonijiet kulturali li jaħdmu, jew jixtiequ jaħdmu, fil-livell Ewropew fil-qasam tal-kultura jistgħu jirċievu appoġġ għall-ispejjeż operattivi tagħhom. Din il-linja hija mmirata lejn organizzazzjonijiet li jippromwovu sens ta' esperjenza kulturali kondiviża b'dimensjoni verament Ewropea. L-għotja maħruġa taħt din il-linja hija b'appoġġ għall-ispejjeż operattivi magħmula fir-rigward ta' l-attivitajiet permanenti ta' organizzazzjonijiet benefiċjarji. Din hija ferm differenti minn kull tip ta' għotja oħra li tista' tingħata taħt il-linji l-oħra tal-Programm. Erba' kategoriji ta' organizzazzjonijiet huma eliġibbli taħt din il-linja:
Hemm fondi massimi disponibbli, skond il-kategorija li għaliha ssir l-applikazzjoni, iżda l-appoġġ ta' l-UE huwa limitat għal massimu ta' 80 % ta' l-ispejjeż totali eliġibbli. |
III. Azzjonijiet u Applikanti Eliġibbli
Il-Programm Kultura jappoġġa proġetti, organizzazzjonijiet, attivitajiet promozzjonali u riċerka fil-friegħi kollha tal-kultura, minbarra l-fergħa awdjoviżiva li għaliha hemm programm separat bl-isem MEDIA (3). L-operaturi kulturali, li jinkludu intrapriżi kulturali, jistgħu jipparteċipaw fil-Programm Kultura sakemm dawn ikunu joperaw f'kapaċità kulturali mhux għall-profitt.
Applikanti eliġibbli għandhom:
— |
ikunu organizzazzjonijiet pubbliċi (4) jew privati bi status legali, li l-attività prinċipali tagħhom tkun fl-isfera kulturali (setturi kulturali u kreattivi), u |
— |
jkollhom is-sede legali irreġistrata f'wieħed mill-pajjiżi eliġibbli. |
Persuni fiżiċi mhumiex eliġibbli biex japplikaw għal għotja taħt dan il-Programm.
IV. Pajjiżi Eliġibbli
Pajjiżi eliġibbli taħt dan il-Programm huma:
— |
l-istati Membri ta' l-UE (5), |
— |
pajjiżi taż-ŻEE (6) (l-Iżlanda, il-Liechtenstein, in-Norveġja), |
— |
pajjiżi kandidati għas-sħubija fl-UE (il-Kroazja, it-Turkija u dik li qabel kienet ir-Repubblika Jugoslava tal-Maċedonja) u s-Serbja. |
Il-pajjiżi tal-Balkani tal-punent (l-Albanija, l-Bożnija u l-Ħerzegovina, u l-Montenegro) jistgħu jsiru eliġibbli fil-futur, soġġetti għall-konklużjoni ta' Memorandum ta' Ftehim dwar il-parteċipazzjoni ta' kull wieħed minn dawk il-pajjiżi fil-Programm (7).
V. Kriterji ta' l-għoti
(1) |
kemm jista' l-proġett jiġġenera valur miżjud Ewropew reali (0-5 punti totali); |
(2) |
ir-relevanza ta' l-attivitajiet għall-għanijiet speċifiċi tal-Programm (0-5 punti totali); |
(3) |
kemm huma mfassla tajjeb l-attivitajiet proposti, u kemm jistgħu jitwettqu b'suċċess b'livell ta' eċċellenza għoli (0-5 punti totali); |
(4) |
il-kwalità ta' sħubija (għal-linji 1.1, 1.2.1, u 1.3 biss) (0-5 punti totali); |
(5) |
kemm jistgħu l-attivitajiet jipproduċu riżultati li jiksbu l-għanijiet tal-Programm (0-5 punti totali); |
(6) |
kemm se jkunu kkomunikati u promossi b'mod xieraq ir-riżultati ta' l-attivitajiet (0-5 punti totali); |
(7) |
l-impatt fit-tul — is-sostenibbiltà (mhux għal-linja 1.2.2) (0-5 punti totali); |
(8) |
id-Dimensjoni Internazzjonali tal-Kooperazzjoni (għal-linja 1.3 biss: Proġetti ta' Kooperazzjoni Kulturali ma' Pajjiżi Terzi) (0-5 punti totali). |
VI. Baġit
Il-Programm għandu baġit totali ta' EUR 400 miljun (8) għall-perjodu 2007-2013.
L-approprjazzjonijiet annwali totali, inklużi għal dawk l-azzjonijiet li ma jiffurmawx parti mill-Gwida għall-Programm, jistgħu jvarjaw minn madwar EUR 43 miljun għal madwar EUR 58 miljun, jiddependi mis-sena. Fuq proposta mill-Kummissjoni, l-analiżi tal-baġit annwali għal kull linja (konformi mal-previżjonijiet indikati aktar 'l isfel) hija approvata mill-Kumitat tal-Programm.
Baġit previst għall-2009 għal-linji li ġejjin:
Linja 1.1 |
Proġetti Multiannwali ta' Kooperazzjoni |
EUR 18 200 000 |
Linja 1.2.1 |
Proġetti ta' Kooperazzjoni |
EUR 17 049 440 |
Linja 1.2.2 |
Proġetti ta' Traduzzjoni Letterarja |
EUR 2 000 000 |
Linja 1.3 |
Proġetti ta' Kooperazzjoni ma' Pajjiżi Terzi |
EUR 1 024 000 |
Linja 2 |
Appoġġ għall-Organizzazzjonijiet Attivi fil-Qasam tal-Kultura fil-Livell Ewropew |
EUR 7 100 000 |
VII. Dati ta' l-għeluq ta' l-applikazzjonijiet
Linji |
Data ta' l-għeluq għas-Sottomissjonijiet |
|
Linja 1 |
Appoġġ għall-proġetti kulturali |
|
Linja 1.1 |
Proġetti Multiannwali ta' Kooperazzjoni |
1 ta' Ottubru 2008 |
Linja 1.2.1 |
Proġetti ta' Kooperazzjoni |
1 ta' Ottubru 2008 |
Linja 1.2.2 |
Proġetti ta' Traduzzjoni Letterarja |
1 ta' Frar 2009 |
Linja 1.3 |
Proġetti ta' Kooperazzjoni Kulturali ma' Pajjiżi Terzi |
1 ta' Mejju 2009 |
Linja 2 |
Appoġġ għall-Organizzazzjonijiet Attivi fil-Qasam tal-Kultura fil-Livell Ewropew |
1 ta' Novembru 2008 |
Jekk id-data ta' l-għeluq għas-sottomissjoni taħbat is-Sibt, il-Ħadd jew fi btala pubblika fil-pajjiż ta' l-applikant, l-ebda estensjoni ma tingħata, u dan għandu jitqies mill-applikanti fl-ippjanar tas-sottomissjoni tagħhom.
Id-dati ta' l-għeluq għas-sottomissjoni ta' l-applikazzjonijiet għas-snin ta' wara taħt il-Programm Kultura għandhom ikunu l-istess dati kalendarji indikati fil-Gwida għall-Programm.
VIII. Aktar informazzjoni
Il-kondizzjonijiet dettaljati għall-applikazzjoni jinsabu fil-Gwida għall-Programm Kultura fuq il-websajts li ġejjin:
|
Direttorat Ġenerali għall-Edukazzjoni u Kultura http://ec.europa.eu/culture/index_en.htm |
|
Aġenzija Eżekuttiva għall-Edukazzjoni, Awdjoviżiv u Kultura http://eacea.ec.europa.eu/culture/index_en.htm |
(2) Ara l-punt IV.
(3) http://eacea.eu.europa.eu/media/index_en.htm
(4) Organizzazzjoni pubblika hija kkunsidrata bħala kull organizzazzjoni li xi parti mill-ispejjeż tagħha huma ffinanzjati mill-baġit ta' l-Istat bħala dritt, mill-gvern ċentrali, reġjonali jew lokali. Jiġifieri, dawn l-ispejjeż huma ffinanzjati mill-fondi tas-settur pubbliku miġbura mit-tassazzjoni, multi jew ħlasijiet stabbiliti bil-liġi, mingħajr il-ħtieġa li jgħaddu minn proċess ta' applikazzjoni li jista' jirriżulta f'nuqqas ta' suċċess fil-ksib tal-fondi. Organizzazzjonijiet li jiddependu mill-fondi ta' l-Istat għall-eżistenza tagħhom u jirċievu għotjiet sena wara sena, imma li għalihom teżisti l-possibbiltà, anki jekk teoretika, li ma jirnexxilhomx jirċievu l-flus f'xi sena partikolari, huma meqjusa bħala organizzazzjonijiet privati.
(5) Is-27 Stat Membru: l-Awstrija, il-Belġju, il-Bulgarija, Ċipru, ir-Repubblika Ċeka, id-Danimarka, l-Estonja, il-Finlandja, Franza, il-Ġermanja, il-Greċja, l-Ungerija, l-Irlanda, l-Italja, il-Latvja, il-Litwanja, Malta, l-Olanda, il-Polonja, il-Portugall, ir-Rumanija, is-Slovakja, is-Slovenja, Spanja, l-Iżvezja, ir-Renju Unit.
(6) Żona Ekonomika Ewropea.
(7) Aktar informazzjoni dwar żviluppi li jikkonċernaw dawn il-Pajjiżi Terzi tixxandar fil-websajt ta' l-Aġenzija Eżekuttiva: http://eacea.ec.europa.eu
(8) Pajjiżi eliġibbli li mhumiex fl-UE jikkontribwixxu wkoll għall-baġit tal-Programm.