—

Id-deċiżjoni kkontestata tikklassifika n-negozjanti ewlenin li joperaw fir-Russja, bħala definizzjoni, bħala “negozjanti ewlenin jew persuni ġuridiċi, entitajiet jew korpi involuti fis-setturi ekonomiċi li jipprovdu sors sostanzjali ta’ dħul lill-Gvern tal-Federazzjoni Russa”, irrispettivament minn jekk dan huwiex effettivament il-każ jew le.

—

Id-deċiżjoni kkontestata tikklassifika lill-membri tal-familja immedjati, jew persuni fiżiċi oħra li jibbenefikaw minn negozjanti ewlenin li joperaw fir-Russja, bħala definizzjoni, bħala persuni li jgħinu lil dawn in-negozjanti ewlenin jevitaw il-miżuri restrittivi, irrispettivament minn jekk dan huwiex effettivament il-każ jew le.

—

Id-deċiżjoni la hija adegwata u lanqas neċessarja sabiex jintlaħaq l-għan fundamentali mfittex u r-restrizzjonijiet li timponi fuq il-persuni huma eċċessivi meta pparagunati ma’ dan l-għan fundamentali. Hija tippermetti wkoll li jiġu ssanzjonati wkoll negozjanti mhux ewlenin involuti f’setturi ekonomiċi li jipprovdu sors sostanzjali ta’ dħul lill-Gvern tal-Federazzjoni Russa.

—

Minħabba l-bidla u l-estensjoni kostanti tal-kriterji li permezz tagħhom persuni u entitajiet jiġu inklużi fil-lista ta’ sanzjonijiet tal-Unjoni Ewropea, huwa impossibbli għall-persuni kkonċernati u għall-persuni li jirrisjedu fir-Russja li jadattaw l-aġir tagħhom skont ix-xewqat tal-Kunsill.

—

Id-deċiżjoni kkontestata tuża kriterji vagi bħal “negozjanti ewlenin” u “setturi ekonomiċi li jipprovdu sors sostanzjali ta’ dħul lill-Gvern tal-Federazzjoni Russa”. Hija ma tipprovdi ebda kriterju kwantitattiv jew kwalitattiv sabiex tistabbilixxi min huwa “ewlieni” u liema huma dawn is-setturi. Is-setturi msemmija lanqas ma ġew iddefiniti.

—

Id-deċiżjoni kkontestata tkopri l-membri tal-familja tan-negozjanti ewlenin filwaqt li ma tikkonċernax il-membri tal-familja tal-persuni fiżiċi msemmija fl-Artikolu 1(1)(a) u fl-Artikolu 2(1)(a) tad-Deċiżjoni 2014/145/PESK.