—

tannulla d-deċiżjoni tal-Kummissjoni Ewropea tal-25 ta’ April 2023, Każ C(2023) 2727 final,

—

tikkundanna lill-konvenuta għall-ispejjeż tal-kawża.

1.

L-ewwel motiv: nuqqas ta’ osservanza tal-kamp ta’ applikazzjoni tar-Regolament (UE) 2022/2065 (1) (Digital Services Act, iktar ’il quddiem id-“DSA”) u applikazzjoni żbaljata tad-DSA.

Ir-rikorrenti hija tal-fehma li d-DSA ma japplikax għaliha, peress li ma hijiex servizz intermedjarju u konsegwentement la servizz ta’ hosting u lanqas pjattaforma online fis-sens tad-DSA. Il-provvista meħtieġa ta’ kontenut ta’ terzi hija nieqsa. Ir-rikorrenti tipprovdi l-kontenut tagħha stess billi tbigħ l-artikoli tagħha u tadotta wkoll bis-sħiħ il-kontenut tal-imsieħba tagħha permezz ta’ proċess strett ta’ onboarding.

Anki li kieku parti mis-servizz jikkwalifika bħala pjattaforma online, din ma tilħaqx il-limitu ta’ 45 miljun utent attiv fix-xahar. Il-konvenuta tinjora n-natura ibrida tas-servizz: mhux l-utenti kollha tas-servizz huma awtomatikament esposti għal kontenut ipprovdut minn terzi, iżda hija meħtieġa differenzjazzjoni preċiża.

Il-konvenuta tibbaża ruħha fuq kriterji żbaljati, bħal li l-fornitur allegatament ma huwiex identifikabbli. Hija tonqos milli tirrikonoxxi li din ma hijiex karatteristika deċiżiva, iżda pjuttost, bil-maqlub, hija ssostni s-suppożizzjoni tal-eżistenza ta’ kontenut proprju, filwaqt li tqies l-evalwazzjonijiet skont id-dritt tal-Unjoni.

2.

It-tieni motiv: in-natura ambigwa tal-Artikolu 33(1) u (4) flimkien mal-Artikolu 24(2) tad-DSA.

L-ispeċifikazzjonijiet għall-kalkolu tal-limitu huma wisq impreċiżi u jiksru l-prinċipju ta’ ċertezza legali skont id-dritt tal-Unjoni. L-Artikolu 33(1) tad-DSA għalhekk ma huwiex bażi legali li tikkonforma mad-dritt tal-Unjoni. Minħabba n-natura legali tagħha u l-kontenut mhux komplut tagħha, il-premessa 77 tad-DSA ma hijiex biżżejjed għad-determinazzjoni tal-metodu ta’ kalkolu, peress li wisq mistoqsijiet essenzjali jitħallew mingħajr tweġiba. Din tiddeskrivi biss min huwa kopert, iżda mhux kif. Fl-aħħar mill-aħħar, il-kriterji ma setgħux jiġu ddeterminati biżżejjed mingħajr l-adozzjoni ta’ att delegat. L-inadegwatezza hija ċara permezz ta’ tqabbil mar-Regolament (UE) 2022/1925 (2) (Digital Markets Act): dan huwa bbażat parzjalment fuq l-istess valur limitu, iżda jmur lil hinn peress li jispjega l-kriterji ta’ kalkolu f’anness separat. Madankollu, ma kienx hemm ukoll speċifikazzjonijiet ta’ kalkolu speċifiċi biżżejjed.

3.

It-tielet motiv: ksur tal-prinċipju ġenerali ta’ ugwaljanza.

In-natura ambigwa tal-metodu ta’ kalkolu tikser l-ewwel sentenza tal-Artikolu 2 TUE u l-Artikolu 20 tal-Karta tad-Drittijiet Fundamentali tal-Unjoni Ewropa, peress li dan iwassal għal trattament (de facto) mhux ugwali tal-fornituri ta’ pjattaformi online. Il-fornituri jimlew il-vojt, li jirriżulta b’mod partikolari mill-fatt li t-traċċar ta’ utenti individwali huwa pprojbit, b’metodi inkonsistenti u mhux trasparenti. Fl-istess ħin, id-DSA ma jipprovdi għall-ebda kontroll obbligatorju tal-metodi kollha ta’ kalkolu, iżda biss għal kontrolli ad hoc. Dan ma joħloqx kundizzjonijiet ekwi għall-fornituri ta’ servizzi li jikkompetu. Barra minn hekk, id-DSA jikser il-prinċipju ta’ trattament ugwali fis-sens li limitu ġenerali japplika għall-pjattaformi online kollha, irrispettivament mill-kriterji bbażati fuq ir-riskju tas-servizzi rispettivi.

4.

Ir-raba’ motiv: ksur tal-prinċipju ta’ proporzjonalità.

L-applikazzjoni tad-DSA tolqot b’mod sproporzjonat il-libertajiet u d-drittijiet bażiċi tar-rikorrenti u b’hekk tikser il-prinċipju ta’ proporzjonalità tat-tieni subparagrafu tal-Artikolu 5(4) TUE. Minn naħa, il-limitu ġenerali ma huwiex xieraq, u min-naħa l-oħra, l-impożizzjoni ta’ obbligi ulterjuri fuq ir-rikorrenti ma għadhiex meħtieġa, peress li l-kummerċ online huwa diġà rregolat (iżżejjed).

5.

Il-ħames motiv: ksur tal-obbligu ta’ motivazzjoni.

Fid-deċiżjoni tagħha, il-konvenuta kisret l-obbligu ta’ motivazzjoni skont l-Art 296 TFUE, b’tali mod li r-rikorrenti, bħala d-destinatarju, ma setgħetx tifhimha. Kwalunkwe subsunzjoni taħt id-definizzjoni tas-servizz ta’ hosting skont l-Artikolu 3(g)(iii) tad-DSA hija nieqsa, għalkemm dan huwa kruċjali għall-applikabbiltà tal-Artikolu 33 tad-DSA.