Edizzjoni Provviżorja

SENTENZA TAL-QORTI TAL-ĠUSTIZZJA (L‑Ewwel Awla)

12 ta’ Settembru 2024 (*)

“Rinviju għal deċiżjoni preliminari – Sistema komuni ta’ taxxa fuq il-valur miżjud (VAT) – Direttiva 2006/112/KE – Artikolu 90(1) – Tnaqqis tal-bażi tat-taxxa fil-każ ta’ tnaqqis tal-prezz wara l-mument li fih it-tranżazzjoni tkun twettqet – Kontribuzzjonijiet imħallsa minn impriża farmaċewtika lill-organu ta’ assigurazzjoni għall-mard tal-Istat – Leġiżlazzjoni fiskali nazzjonali li teskludi mill-benefiċċju tat-tnaqqis tal-bażi tat-taxxa l-kontribuzzjonijiet imħallsa minn impriża farmaċewtika lill-organu pubbliku ta’ assigurazzjoni għall-mard skont obbligu statutorju”

Fil-Kawża C‑248/23,

li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Fővárosi Törvényszék (il-Qorti tal-Belt ta’ Budapest, l-Ungerija), permezz ta’ deċiżjoni tat‑30 ta’ Marzu 2023, li waslet fil-Qorti tal-Ġustizzja fit‑18 ta’ April 2023, fil-proċedura

Novo Nordisk A/S

vs

Nemzeti Adó- és Vámhivatal Fellebbviteli Igazgatósága,

IL-QORTI TAL-ĠUSTIZZJA (L‑Ewwel Awla),

komposta minn A. Arabadjiev, President tal-Awla, T. von Danwitz, P. G. Xuereb (Relatur), A. Kumin u I. Ziemele, Imħallfin,

Avukat Ġenerali: T. Ćapeta,

Reġistratur: I. Illéssy, Amministratur,

wara li rat il-proċedura bil-miktub u wara s-seduta tad‑19 ta’ Marzu 2024,

wara li rat l-osservazzjonijiet ippreżentati:

–        għal Novo Nordisk AS, minn T. Bodrogi-Szabó, Z. Hegymegi-Barakonyi u G. Riszter, ügyvédek,

–        għall-Gvern Ungeriż, minn M. Z. Fehér u K. Szíjjártó, bħala aġenti,

–        għall-Kummissjoni Ewropea, minn V. Bottka u J. Jokubauskaitė, bħala aġenti,

wara li semgħet il-konklużjonijiet tal-Avukata Ġenerali, ippreżentati fis-seduta tas‑6 ta’ Ġunju 2024,

tagħti l-preżenti

Sentenza

1        It-talba għal deċiżjoni preliminari tirrigwarda l-interpretazzjoni tal-Artikolu 90(1) tad-Direttiva tal-Kunsill 2006/112/KE tat‑28 ta’ Novembru 2006 dwar is-sistema komuni ta’ taxxa fuq il-valur miżjud (ĠU 2006, L 347, p. 1, rettifika fil-ĠU 2007, L 335, p. 60, iktar ’il quddiem id-“Direttiva dwar il-VAT”).

2        Din it-talba tressqet fil-kuntest ta’ tilwima bejn Novo Nordisk A/S u n-Nemzeti Adó- és Vámhivatal Fellebbviteli Igazgatósága (id-Direttorat tal-Appelli tal-Amministrazzjoni Nazzjonali tat-Taxxa u tad-Dwana, l-Ungerija, iktar ’il quddiem id-“Direttorat tal-Appelli”) dwar ir-rifjut ta’ dan tal-aħħar li jagħti lil Novo Nordisk id-dritt li tnaqqas mill-bażi tat-taxxa tat-taxxa fuq il-valur miżjud (VAT) dovuta l-kontribuzzjonijiet li hija ħallset, skont obbligu legali, lin-Nemzeti Egészségbiztosítási Alapkezelő (l-Organu li Jamministra l-Fond Nazzjonali tal-Assigurazzjoni għall-Mard, l-Ungerija, iktar ’il quddiem in-“NEAK”).

 Il‑kuntest ġuridiku

 Id‑dritt tal‑Unjoni

3        Skont l-Artikolu 73 tad-Direttiva dwar il-VAT:

“Fir-rigward tal-provvista ta’ merkanzija jew servizzi, minbarra kif imsemmi fl-Artikoli 74 sa 77, l-ammont taxxabbli għandu jinkludi dak kollu li jikkostitwixxi ħlas miksub jew li għandu jinkiseb mill-fornitur, għall-provvista, mill-konsumatur jew parti terza, inklużi s-sussidji marbuta direttament mal-prezz tal-provvista.”

4        L-Artikolu 78 ta’ din id-direttiva huwa fformulat kif ġej:

“L-ammont taxxabbli għandu jinkludi l-fatturi li ġejjin:

(a)      taxxi, dazji, imposti u piżijiet, minbarra l-VAT innifisha;

(b)      spejjeż inċidentali bħal kummissjoni, ippakkjar, trasport u spejjeż ta’ l-assigurazzjoni, mitluba mill-fornitur lill-konsumatur.

Għall-finijiet tal-punt (b) ta’ l-ewwel paragrafu, l-Istati Membri jistgħu jqisu spejjeż koperti minn ftehim separat bħala spejjeż inċidentali.”

5        Il-Kapitolu 5 tat-Titolu VII tal-imsemmija direttiva, intitolat “Disposizzjonijiet varji”, jinkludi l-Artikolu 90 tagħha li jipprevedi:

“1.      Fil-każ ta’ kanċellazzjoni, ċaħda [ta’ xoljiment, ta’ ħall] jew nuqqas ta’ pagament totali jew parzjali, jew fejn il-prezz hu mnaqqas wara li l-provvista tkun saret, l-ammont taxxabbli għandu jiġi ridott għaldaqstant skond kondizzjonijet li jiġu stabbiliti mill-Istati Membri.

2.      Fil-każ ta’ nuqqas ta’ ħlas totali jew parzjali, l-Istati Membri jistgħu jidderogaw mill-paragrafu 1.”

6        L-Artikolu 401 tal-istess direttiva jiddisponi:

“Mingħajr preġudizzju għal disposizzjonijiet oħra tad-dritt Komunitarju, din id-Direttiva ma żżommx Stat Membru milli jħalli jew idaħħal taxxi fuq kuntratti ta’ assigurazzjoni, taxxi fuq imħatri u logħob ta’ l-azzard, dazji tas-sisa, taxxi tal-boll jew b’mod aktar ġenerali, kwalunkwe taxxi, dazji jew piżijiet li ma jistgħux ikunu kkaratterizzati bħala taxxi fuq il-bejgħ, sakemm il-ġbir ta’ dawk it-taxxi, dazji jew piżijiet ma joħloqx, f’negozju bejn l-Istati Membri, għal formalitajiet li għandhom x’jaqsmu mal-qsim ta’ fruntieri.”

 Id‑dritt Ungeriż

7        Skont l-Artikolu 65 tal-az általános forgalmi adóról szóló 2007. évi CXXVII. törvény (il-Liġi Nru CXXVII tal‑2007 dwar it-Taxxa fuq il-Valur Miżjud) (Magyar Közlöny 2007/155. (XI.16.)):

“Sakemm din il-liġi ma tipprovdix mod ieħor, fir-rigward tal-kunsinni ta’ oġġetti u tal-provvisti ta’ servizzi, il-bażi tat-taxxa huwa kkostitwit mill-korrispettiv pekunjarju miksub jew li jkollu jinkiseb, mill-persuna li jkollha dritt għalih, mingħand il-persuna li takkwista l-oġġett, mingħand il-persuna li lilha jiġi pprovdut is-servizz jew mingħand terz, inkluż kull sussidju, irrispettivament mill-forma tiegħu, li jinfluwenza direttament il-prezz tal-kunsinna jew tal-provvista.”

8        L-Artikolu 36 tal-a biztonságos és gazdaságos gyógyszer- és gyógyászatisegédeszköz-ellátás, valamint a gyógyszerforgalmazás általános szabályairól szóló 2006. évi XCVIII. törvény (il-Liġi Nru XCVIII tal‑2006 li Tistabbilixxi Dispożizzjonijiet Ġenerali dwar il-Provvista Affidabbli u Ekonomikament Vijabbli ta’ Prodotti Mediċinali u Tagħmir Mediku u dwar il-Kummerċjalizzazzjoni ta’ Prodotti Mediċinali) (Magyar Közlöny 2006/146. (XI.29) (iktar ’il quddiem il-“Gyftv”) jipprevedi fil-paragrafu 1 tiegħu:

“Id-detentur tal-awtorizzazzjoni għat-tqegħid fis-suq ta’ prodott mediċinali jew, fejn id-detentur ma jwettaq l-ebda attività ta’ distribuzzjoni fl-Ungerija, id-distributur maħtur bi ftehim konkluż bejniethom u approvat mill-awtorità fiskali tal-Istat, u l-persuna li tkun issottomettiet applikazzjoni għal sussidju tas-sigurtà soċjali għal preparazzjoni u, jekk dik il-persuna ma tqassamx il-preparazzjoni, id-distributur […], għandhom ikunu suġġetti, fir-rigward ta’ prodotti mediċinali u preparazzjonijiet […] mibjugħa fl-ispiżeriji u li jibbenefikaw minn kull tip ta’ finanzjament pubbliku, bl-eċċezzjoni tal-prodotti mediċinali msemmija fl-Artikolu 38(1) u l-preparazzjonijiet imsemmija fil-leġiżlazzjoni dwar il-formula tat-trabi u l-formula ta’ prosegwiment, għall-obbligu li jitħallas 20 % ta’ parti tas-sussidju tas-sigurtà soċjali, ibbażat fuq id-data tal-bejgħ fuq preskrizzjonijiet mediċi għax-xahar ta’ riferiment, fi proporzjon mal-prezz tal-produzzjoni jew mal-prezz tal-importazzjoni […]. Id-detentur tal-awtorizzazzjoni għat-tqegħid fis-suq ta’ prodott mediċinali għandu jkun suġġett, fir-rigward tal-preparazzjonijiet imsemmija fil-leġiżlazzjoni dwar il-formula tat-trabi u l-formula ta’ prosegwiment mibjugħa fl-ispiżeriji u li jibbenefikaw minn kull tip ta’ finanzjament pubbliku, għall-obbligu li jħallas 10 % ta’ parti mis-sussidju tas-sigurtà soċjali, ibbażata fuq id-data tal-bejgħ fuq preskrizzjonijiet mediċi għax-xahar ta’ riferiment, fi proporzjon mal-prezz tal-produzzjoni (prezz tal-produzzjoni/prezz tal-konsumatur). L-obbligu tal-ħlas għandu jiġi kkalkolat għal kull prodott u għal kull tip ta’ sussidju. […]”

9        L-Artikolu 37 tal-Gyftv huwa redatt kif ġej:

“(1)      L-organu li jamministra l-fond nazzjonali tal-assigurazzjoni għall-mard għandu jibgħat lill-persuna responsabbli għall-ħlas jew għandu jippubblika fis-sit internet tiegħu, mhux iktar tard mill-għaxar jum tat-tieni xahar kalendarju wara x-xahar ta’ riferiment, id-data tas-sussidju u tal-bejgħ meħtieġa sabiex taqdi l-obbligu tal-ħlas stipulat fl-Artikolu 36(1) u (2).

Id-detenturi ta’ awtorizzazzjoni ta’ tqegħid fis-suq ta’ prodott mediċinali jew ta’ awtorizzazzjoni ta’ distribuzzjoni ta’ prodott mediċinali bl-ingrossa għandhom, skont l-obbligu ta’ ħlas imsemmi fl-Artikolu 36(1) u (2), jippreżentaw prospett lill-awtorità fiskali nazzjonali sa mhux iktar tard mill‑20 tat-tielet xahar kalendarju wara x-xahar ta’ riferiment, billi jużaw il-formola prevista mill-awtorità fiskali tal-Istat, u jagħmlu fl-istess ħin ħlas f’kont miftuħ għal dan l-għan mill-awtorità fiskali tal-Istat mat-Teżor.”

10      L-Artikolu 40 tal-Gyftv jistabbilixxi:

“L-awtorità fiskali tal-Istat

(a)      immedjatament wara li jsir il-ħlas tal-ammont irċevut skont l-Artikolu 36(1) sa (2) u (4) sa (4a),

(b)      [imħassar]

għandha tittrasferixxi dan fil-kont, kif indikat f’regoli speċjali, u miftuħ mat-Teżor, tal-Fond Nazzjonali tal-Assigurazzjoni għall-Mard.”

11      L-Artikolu 40/A tal-Gyftv jiddisponi:

“(1)      Minbarra l-obbligu ta’ ħlas stabbilit fl-Artikolu 36(1), id-detentur tal-awtorizzazzjoni għat-tqegħid fis-suq ta’ prodott mediċinali jew, fejn id-detentur ma jwettaq l-ebda attività ta’ distribuzzjoni fil-pajjiż, id-distributur maħtur bi ftehim konkluż bejniethom u approvat mill-awtorità fiskali tal-Istat […], għandhom ikunu suġġetti, fir-rigward ta’ prodotti mediċinali mibjugħa fl-ispiżeriji u li jibbenefikaw minn kull tip ta’ finanzjament pubbliku għal mill-inqas sitt snin, li l-prezz tagħhom, meħud bħala l-bażi għal dak il-finanzjament, jaqbeż 1 000 forint [Ungeriż (HUF) (madwar EUR 2.63)], għall-obbligu li jitħallsu 10 % ta’ parti tas-sussidju tas-sigurtà soċjali, abbażi tad-data tal-bejgħ fuq preskrizzjonijiet mediċi għax-xahar ta’ riferiment, fi proporzjon mal-prezz tal-produzzjoni jew il-prezz tal-importazzjoni […], sakemm ma jkunx hemm prodott ieħor li huwa wkoll iffinanzjat pubblikament u li l-ingredjent farmaċewtiku attiv tiegħu u r-rotta tal-amministrazzjoni tiegħu huma identiċi għal dawk tal-prodott inkwistjoni, iżda li jinbiegħ taħt trademark differenti minn detentur ta’ awtorizzazzjoni għat-tqegħid fis-suq differenti. L-obbligu tal-ħlas għandu jiġi kkalkolat għal kull prodott u għal kull tip ta’ sussidju.

[…]

(5)      L-awtorità fiskali tal-Istat għandha tinforma lill-organu ta’ assigurazzjoni għall-mard bl-approvazzjoni tal-ftehim bejn id-detentur tal-awtorizzazzjoni għat-tqegħid fis-suq u d-distributur, imsemmi fis-subparagrafu 1, fi żmien tmint ijiem mid-data tal-approvazzjoni.

(6)      L-organu ta’ assigurazzjoni għall-mard responsabbli għall-ġestjoni tal-Fond Nazzjonali tal-Assigurazzjoni għall-Mard għandha tibgħat lill-persuna responsabbli għall-ħlas jew għandha tippubblika fuq is-sit elettroniku tagħha, mhux iktar tard mill-għaxar jum tat-tieni xahar kalendarju wara x-xahar ta’ riferiment, id-data tas-sussidju u tal-bejgħ meħtieġa biex taqdi l-obbligu tal-ħlas stipulat fis-subparagrafu 1.

(7)      Skont l-obbligu ta’ ħlas stabbilit fis-subparagrafu 1, id-detentur tal-awtorizzazzjoni għat-tqegħid fis-suq ta’ prodott mediċinali għandu, mhux iktar tard mill-għoxrin jum tat-tielet xahar kalendarju wara x-xahar ta’ riferiment, jippreżenta prospett mal-awtorità fiskali tal-Istat billi juża l-formola disponibbli minn dik l-awtorità u, fl-istess ħin, għandu jagħmel ħlas fil-kont miftuħ mill-awtorità fiskali mat-Teżor għal dak il-għan speċifiku.

(8)      L-organu ta’ assigurazzjoni għall-mard responsabbli għall-ġestjoni tal-Fond Nazzjonali tal-Assigurazzjoni għall-Mard għandha tipprovdi, fl-istess ħin mas-servizz ta’ trażmissjoni tad-data msemmi fis-subparagrafu 6, servizz ta’ trażmissjoni ta’ data elettronika għall-benefiċċju tal-awtorità fiskali tal-Istat dwar id-data meħtieġa għall-monitoraġġ tal-persuni responsabbli għall-ħlas.

(9)      L-awtorità fiskali tal-Istat għandha tittrasferixxi l-ammont irċevut skont is-subparagrafu 1 fil-kont tal-Fond Nazzjonali tal-Assigurazzjoni għall-Mard miftuħ mat-Teżor, kif indikat f’regoli speċjali, u għandha twettaq dak it-trasferiment immedjatament wara li jsir il-ħlas.”

 Il‑kawża prinċipali u d‑domanda preliminari

12      Novo Nordisk, hija kumpannija rreġistrata fid-Danimarka li timmanifattura u tikkummerċjalizza prodotti mediċinali fl-Ungerija. Fil-kuntest tal-attivitajiet tagħha, din il-kumpannija tbigħ il-prodotti mediċinali tagħha fl-Ungerija.

13      Il-kummerċjalizzazzjoni bl-imnut ta’ prodotti mediċinali f’dan l-Istat Membru ssir, bl-eċċezzjoni tal-isptarijiet, permezz tal-ispiżeriji. L-ispiżeriji jixtru l-provvisti tagħhom mingħand distributuri bl-ingrossa u tali distributuri mingħand kumpanniji ta’ distribuzzjoni ta’ prodotti farmaċewtiċi, bħal Novo Nordisk.

14      Ċerti prodotti mediċinali jistgħu jiġu ssussidjati min-NEAK permezz ta’ sistema ta’ “sussidju tal-prezz tax-xiri”. Bis-saħħa ta’ din is-sistema, in-NEAK jagħti sussidju fuq il-prezz tax-xiri tal-prodotti mediċinali mibjugħa bi preskrizzjoni medika u koperti mis-sigurtà soċjali fil-kuntest ta’ trattamenti outpatient (iktar ’il quddiem is-“sussidju tas-sigurtà soċjali”). Il-ħlas tal-prezz tal-prodott mediċinali ssussidjat jinqasam bejn in-NEAK u l-pazjent. Dan tal-aħħar iħallas lill-ispiżerija ammont, imsejjaħ “reste à charge (il-prezz issussidjat)”, li jikkorrispondi għad-differenza bejn il-prezz tal-prodott mediċinali u l-ammont tas-sussidju tas-sigurtà soċjali. L-ispiżerija hija rrimborsata a posteriori min-NEAK għall-ammont ta’ dan is-sussidju. Il-prezz tal-prodotti mediċinali rċevut mill-ispiżeriji, li jikkostitwixxi l-bażi tat-taxxa għall-finijiet tal-VAT, għalhekk għandu żewġ komponenti, minn naħa, is-sussidju tas-sigurtà soċjali u, min-naħa l-oħra, ir-“reste à charge (il-prezz issussidjat)” imħallas mill-pazjent. L-ispiżerija għandha għaldaqstant tħallas il-VAT kemm fuq l-ammont imħallas mill-pazjent kif ukoll fuq is-somma mħallsa min-NEAK.

15      Minn naħa, Novo Nordisk tappartjeni għal grupp ta’ kumpanniji li, f’ismu stess u f’isem Novo Nordisk, daħal fi ftehim man-NEAK dwar il-portafoll ta’ prodotti mediċinali ssussidjati u dwar il-volum tal-prezzijiet (iktar ’il quddiem il-“ftehimiet dwar il-volum tal-prezzijiet”). Bis-saħħa tal-ftehimiet dwar il-volum tal-prezzijiet, Novo Nordisk impenjat ruħha li tħallas lin-NEAK, fuq il-kwantità ta’ prodotti mediċinali ssussidjati li hija tikkummerċjalizza, kontribuzzjonijiet ta’ ammont stabbilit fil-ftehim, miġbura fuq id-dħul mill-bejgħ ta’ dawn il-prodotti mediċinali.

16      Min-naħa l-oħra, bis-saħħa tal-Artikolu 36(1) u tal-Artikolu 40/A(1) tal-Gyftv, Novo Nordisk bħala distributur ta’ prodotti mediċinali hija suġġetta għal obbligu legali li jipprovdi li hija għandha tħallas l-ammonti korrispondenti rispettivament ta’ 20 % u ta’ 10 % ta’ parti mis-sussidji tas-sigurtà soċjali relatati mal-prodotti mediċinali kollha, imqassma fi spiżerija u li jibbenefikaw minn finanzjament minn fondi pubbliċi, li hija biegħet (iktar ’il quddiem l-“obbligu legali”).

17      Is-somom dovuti fir-rigward ta’ dan l-obbligu jitħallsu fil-kont tal-awtorità fiskali li tittrasferixxihom immedjatament fil-kont tal-fond ta’ assigurazzjoni għall-mard amministrat min-NEAK.

18      Peress li tissodisfa l-imsemmi obbligu, Novo Nordisk tirrinunzja għal parti mill-korrispettiv li hija kisbet għall-bejgħ tal-prodotti mediċinali mingħand il-bejjiegħa bl-ingrossa, u b’hekk tnaqqas id-dħul mill-bejgħ tagħha b’perċentwali predeterminata u stabbilita mil-leġiżlazzjoni nazzjonali. L-eżistenza stess tal-obbligu legali u skont il-każ l-ammont globali li għandu jitħallas għal din ir-raġuni għalhekk jiddependi mill-kwantità ta’ prodotti mediċinali ssussidjati mibjugħa u mill-ammont tas-sussidju tas-sigurtà soċjali.

19      Fil-kwalità tagħha ta’ distributur ta’ prodotti mediċinali, Novo Nordisk ippreżentat lill-awtorità fiskali tal-ewwel saff dikjarazzjoni tal-VAT ikkorreġuta għax-xahar ta’ Jannar 2016 li kienet tinkludi tnaqqis tal-bażi tat-taxxa għall-perijodu kkonċernat. L-ammont ta’ dan it-tnaqqis kien jikkorrispondi għall-ħlasijiet imwettqa minn Novo Nordisk b’applikazzjoni tal-ftehimiet ta’ teħid ta’ responsabbiltà u tal-obbligu legali.

20      L-awtorità fiskali tal-ewwel saff ċaħdet din id-dikjarazzjoni tat-taxxa kkorreġuta peress li qieset li ma kinitx tippermetti t-tnaqqis a posteriori tal-bażi tat-taxxa.

21      Id-Direttorat tal-Appelli, adit bl-ilment ta’ Novo Nordisk kontra din id-deċiżjoni, qies, billi bbaża ruħu fuq is-sentenza tas‑6 ta’ Ottubru 2021, Boehringer Ingelheim (C‑717/19, EU:C:2021:818), li Novo Nordisk setgħet tnaqqas mill-bażi tat-taxxa l-ammonti li hija ħallset skont il-ftehimiet ta’ teħid ta’ responsabbiltà.

22      Madankollu, id-Direttorat tal-Appelli rrifjutat li tnaqqas minn din il-bażi tat-taxxa l-ħlasijiet imwettqa minn Novo Nordisk skont l-obbligu legali (iktar ’il quddiem il-“ħlasijiet kontenzjużi”). Id-Direttorat tal-Appelli qies li dawn il-ħlasijiet, li kienu saru bis-saħħa ta’ obbligu previst mil-liġi, ma jikkostitwixxux tnaqqis fil-prezz li jista’ jitnaqqas mill-bażi tat-taxxa tal-VAT. Fil-fatt, il-ħlasijiet magħmula skont l-Artikolu 36(1) u l-Artikolu 40/A(1) tal-Gyftv għandhom jitqiesu bħala taxxa, peress li, minn naħa, dawn huma intiżi mhux għall-konsumatur finali, iżda għall-awtorità fiskali, u, min-naħa l-oħra, huma essenzjalment mezz sabiex jintlaħqu l-għanijiet baġitarji u tas-saħħa.

23      Novo Nordisk ippreżentat rikors kontra d-deċiżjoni tad-Direttorat tal-Appelli quddiem il-Fġvárosi Törvényszék (il-Qorti tal-Belt ta’ Budapest, l-Ungerija), li hija l-qorti tar-rinviju.

24      Filwaqt li tibbaża ruħha fuq il-ġurisprudenza li tirriżulta mis-sentenzi tal‑24 ta’ Ottubru 1996, Elida Gibbs (C‑317/94, EU:C:1996:400), u tal‑20 ta’ Diċembru 2017, Boehringer Ingelheim Pharma (C‑462/16, EU:C:2017:1006), din il-qorti tqis, qabelxejn, li n-NEAK għandu jitqies bħala l-konsumatur finali tal-kunsinni ta’ prodotti mediċinali mwettqa minn Novo Nordisk. Fil-fatt, iċ-ċirkustanza li l-benefiċjarju dirett ta’ dawn il-kunsinni ma huwiex in-NEAK li jirrimborsa a posteriori l-ammont tas-sussidju lill-ispiżerija, iżda l-persuni assigurati stess li jħallsu l-ammont tas-sussidju lilha, ma huwiex tali li jikser ir-rabta diretta li teżisti bejn dawn il-kunsinni u l-korrispettiv irċevut, b’tali mod li l-ammont irċevut mill-awtorità fiskali ma jistax ikun ogħla minn dak imħallas mill-konsumatur finali.

25      Sussegwentement, l-imsemmija qorti tosserva li l-espożizzjoni tal-motivi tal-abbozz ta’ liġi li tistabbilixxi l-obbligu legali tikklassifika l-ħlasijiet kontenzjużi bħala skont.

26      Fl-aħħar nett, l-obbligu legali huwa simili għal tnaqqis fil-prezz, fis-sens tal-Artikolu 90(1) tad-Direttiva dwar il-VAT, peress li, fiċ-ċirkustanzi tal-kawża prinċipali, Novo Nordisk ma rċevietx il-korrispettiv sħiħ għall-prodotti li hija biegħet.

27      Il-qorti tar-rinviju tirrileva, madankollu, li l-Qorti tal-Ġustizzja għadha ma ddeċidietx fuq il-kwistjoni dwar jekk il-fatt li l-ħlasijiet kontenzjużi twettqu bis-saħħa ta’ obbligu previst mil-liġi jfixkilx il-klassifikazzjoni tagħhom bħala tnaqqis fil-prezz, fis-sens tal-Artikolu 90(1) tad-Direttiva dwar il-VAT.

28      F’dawn iċ-ċirkustanzi, il-Fġvárosi Törvényszék (il-Qorti tal-Belt ta’ Budapest) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domanda preliminari li ġejja:

“L-Artikolu 90(1) tad-[Direttiva dwar il-VAT], għandu jiġi interpretat fis-sens li jipprekludi l-leġiżlazzjoni nazzjonali inkwistjoni fil-kawża prinċipali, li skontha, impriża farmaċewtika li twettaq ex lege ħlasijiet lill-korp ta’ assigurazzjoni għall-mard tal-Istat abbażi tad-dħul mill-bejgħ miksub minn prodotti farmaċewtiċi li jibbenefikaw minn finanzjament pubbliku ma għandhiex dritt tnaqqas a posteriori l-valur taxxabbli, minħabba l-fatt li l-ħlasijiet jitwettqu ex lege, li jistgħu jitnaqqsu mill-bażi tal-obbligu ta’ ħlas kemm il-ħlasijiet imwettqa skont kuntratt dwar il-volum tal-finanzjament kif ukoll l-investimenti magħmula mill-impriża f’riċerka u fi żvilupp fis-settur tas-saħħa u li l-ammont dovut huwa miġbur mill-awtorità tat-taxxa tal-Istat, li tittrasferixxi dan l-ammont immedjatament lill-korp ta’ assigurazzjoni għall-mard tal-Istat?”

 Fuq id‑domanda preliminari

29      Permezz tad-domanda tagħha, il-qorti tar-rinviju tistaqsi, essenzjalment, jekk l-Artikolu 90(1) tad-Direttiva tal-VAT għandux jiġi interpretat fis-sens li jipprekludi leġiżlazzjoni nazzjonali li permezz tagħha impriża farmaċewtika li hija obbligata tħallas lill-organu ta’ assigurazzjoni għall-mard tal-Istat, parti mid-dħul mill-bejgħ tagħha miksub mill-bejgħ ta’ prodotti farmaċewtiċi li jibbenefikaw minn finanzjament minn fondi pubbliċi, ma għandhiex dritt tnaqqas a posteriori l-bażi tat-taxxa għal dawn il-ħlasijiet, fid-dawl tal-fatt li dawn jitwettqu ex lege, li jistgħu jitnaqqsu mill-bażi tal-obbligu ta’ ħlas kemm il-ħlasijiet imwettqa skont kuntratt dwar il-volum tal-finanzjament kif ukoll l-investimenti magħmula mill-impriża f’riċerka u fi żvilupp fis-settur tas-saħħa, u li s-somom dovuti huma miġbura mill-awtorità fiskali, li tittrasferixxi dan l-ammont immedjatament lill-organu ta’ assigurazzjoni għall-mard tal-Istat.

30      Mill-Artikolu 90(1) tad-Direttiva dwar il-VAT, li jirrigwarda l-każijiet ta’ kanċellazzjoni, ta’ xoljiment, ta’ ħall, ta’ nuqqas ta’ pagament totali jew parzjali, jew fejn il-prezz hu mnaqqas wara li l-provvista tkun saret, l-Istati Membri huma obbligati jnaqqsu l-bażi tat-taxxa u, għaldaqstant, l-ammont tal-VAT dovut mill-persuna taxxabbli kull darba li, wara l-konklużjoni ta’ tranżazzjoni, parti mill-korrispettiv jew il-korrispettiv kollu ma jinġabarx mill-persuna taxxabbli. Din id-dispożizzjoni tikkostitwixxi l-espressjoni ta’ prinċipju fundamentali tad-Direttiva dwar il-VAT, li jgħid li l-bażi taxxabbli hija kkostitwita mill-korrispettiv irċevut realment u li l-korollarju tiegħu huwa li l-awtorità fiskali ma tkunx tista’ tiġbor, bħala VAT, ammont ikbar minn dak miġbur mill-persuna taxxabbli (sentenza tas‑6 ta’ Ottubru 2021, Boehringer Ingelheim, C‑717/19, EU:C:2021:818, punt 41 u l-ġurisprudenza ċċitata).

31      Fir-rigward tal-kuntest li fih tidħol din id-dispożizzjoni, għandu jiġi rrilevat li l-Artikolu 73 tad-Direttiva dwar il-VAT jipprevedi li l-bażi tat-taxxa tinkludi, għall-kunsinni ta’ oġġetti u l-provvisti ta’ servizzi, dak kollu li jikkostitwixxi l-korrispettiv miksub jew li jkun irid jinkiseb mill-fornitur jew min jipprovdi dawn it-tranżazzjonijiet mingħand ix-xerrej, il-konsumatur jew terz, inklużi s-sussidji marbuta direttament mal-prezz ta’ dawn it-tranżazzjonijiet.

32      F’dan ir-rigward, għandu jitfakkar li l-prinċipju bażiku tas-sistema tal-VAT huwa bbażat fuq il-fatt li l-VAT hija intiża li tolqot biss lill-konsumatur finali u li tkun perfettament newtrali fir-rigward tal-persuni taxxabbli li jintervjenu fil-proċess ta’ produzzjoni u ta’ distribuzzjoni ta’ qabel l-istadju tal-ħlas finali tat-taxxa, irrispettivament min-numru ta’ tranżazzjonijiet li jkunu saru (sentenza tas‑6 ta’ Ottubru 2021, Boehringer Ingelheim, C‑717/19, EU:C:2021:818, punt 39 u l-ġurisprudenza ċċitata).

33      F’dan il-każ, jirriżulta mid-deċiżjoni tar-rinviju li Novo Nordisk tbigħ, fis-suq Ungeriż, prodotti mediċinali ssussidjati min-NEAK, permezz ta’ bejjiegħa bl-ingrossa, lill-ispiżeriji li jbigħuhom mill-ġdid lil persuni koperti minn din l-assigurazzjoni għall-mard tal-Istat permezz tal-ħlas min-naħa tagħhom tad-differenza bejn il-prezz tal-prodott mediċinali u l-ammont tas-sussidju tas-sigurtà soċjali mħallas direttament min-NEAK lill-ispiżeriji. Bis-saħħa tal-obbligu legali, Novo Nordisk tħallas lin-NEAK, permezz tal-awtorità fiskali, ammonti li jikkorrispondu rispettivament għal 20 % u għal 10 % minn naħa tas-sussidji tas-sigurtà soċjali relatati mal-prodotti mediċinali kollha, imqassma fi spiżerija u li jibbenefikaw minn finanzjament mill-fondi pubbliċi, li hija biegħet. Dawn l-ammonti huma miġbura mid-dħul mill-bejgħ minn dawn il-prodotti mediċinali. Anki jekk id-destinatarju formali tal-ħlasijiet kontenzjużi hija l-awtorità fiskali, din hija obbligata tittrasferixxi immedjatament l-ammonti mħallsa lin-NEAK.

34      F’dan il-kuntest, kemm l-awtorità fiskali kif ukoll il-Gvern Ungeriż iqisu li l-modalitajiet li bihom il-ħlasijiet kontenzjużi twettqu minn Novo Nordisk jiġġustifikaw il-klassifikazzjoni tagħhom bħala taxxa, fis-sens tal-punt (a) tal-ewwel paragrafu tal-Artikolu 78 tad-Direttiva dwar il-VAT, u konsegwentement, li dawn il-ħlasijiet għandhom jiġu inklużi fil-bażi tat-taxxa tal-kunsinna tal-prodotti mediċinali.

35      F’dan ir-rigward, il-Qorti tal-Ġustizzja diġà ppreċiżat li, sabiex taxxi, dazji, imposti u piżijiet ikunu jistgħu jaqgħu taħt il-bażi tat-taxxa tal-VAT, minkejja li ma jirrappreżentawx valur miżjud u ma jikkostitwixxux il-korrispettiv ekonomiku tal-kunsinna ta’ oġġetti jew tal-provvista ta’ servizzi, dawn għandu jkollhom rabta diretta ma’ din il-kunsinna jew ma’ din il-provvista u li l-kwistjoni dwar jekk il-fatt taxxabbli fir-rigward ta’ taxxa, dazju, imposta jew piż ikkonċernata jikkoinċidi ma’ dak tal-VAT huwa element determinanti sabiex tiġi stabbilita l-eżistenza ta’ tali rabta (ara, f’dan is-sens, is-sentenzi tal‑20 ta’ Mejju 2010, Il‑Kummissjoni vs Il‑Polonja, C‑228/09, EU:C:2010:295, punt 30, u tal‑11 ta’ Ġunju 2015, Lisboagás GDL, C‑256/14, EU:C:2015:387, punt 29 kif ukoll il-ġurisprudenza ċċitata).

36      Qabelxejn, jidher, bla ħsara għall-verifika mill-qorti tar-rinviju, li l-ħlasijiet kontenzjużi ma jirrappreżentawx valur miżjud.

37      Sussegwentement, għandu jiġi kkonstatat li, sa fejn il-parti tal-prezz tal-bejgħ tal-prodotti mediċinali ssussidjati li titħallas minn Novo Nordisk, permezz tal-awtorità fiskali, lin-NEAK hija stabbilita minn qabel u hija obbligatorja, hija ma tistax titqies li tagħmel parti mill-korrispettiv ekonomiku tal-kunsinni ta’ dawn il-prodotti mediċinali realment irċevuti minn Novo Nordisk (ara, f’dan is-sens, is-sentenza tad‑19 ta’ Lulju 2012, International Bingo Technology, C‑377/11, EU:C:2012:503, punt 28).

38      Fl-aħħar nett, mid-deċiżjoni tar-rinviju jirriżulta, minn naħa, li l-avveniment li fi tmiemu l-obbligu legali previst fl-Artikolu 36(1) u fl-Artikolu 40/A(1) tal-Gyftv huwa impost fuq il-persuna taxxabbli huwa l-bejgħ tal-prodotti mediċinali u, min-naħa l-oħra, li l-ammont globali dovut abbażi ta’ dan l-obbligu huwa ddeterminat skont il-kwantità ta’ prodotti mediċinali mibjugħa u l-ammont tas-sussidju għas-sigurtà soċjali.

39      Fir-rigward tal-possibbiltà, irrikonoxxuta mil-leġiżlazzjoni nazzjonali lill-impriżi farmaċewtiċi, li jitnaqqsu mill-ammont tal-ħlasijiet kontenzjużi l-kontribuzzjonijiet imħallsa abbażi tal-ftehimiet ta’ teħid ta’ responsabbiltà li jirrigwardaw il-perijodu ta’ riferiment, imnaqqsa bil-VAT, kif ukoll l-ispejjeż allokati għar-riċerka u għall-iżvilupp, jekk l-eżerċizzju ta’ din il-possibbiltà huwa, jekk ikun il-każ, ta’ natura li jnaqqas l-ammont ta’ dawn il-ħlasijiet, din ma għandhiex effett fuq il-fatt li, fid-dawl tal-kunsiderazzjonijiet li jinsabu fil-punti 36 sa 38 ta’ din is-sentenza, l-imsemmija ħlasijiet jistgħu jiġu kklassifikati bħala taxxa, fis-sens tal-punt (a) tal-ewwel paragrafu tal-Artikolu 78 tad-Direttiva dwar il-VAT.

40      Minn naħa, in-NEAK huwa l-benefiċjarju finali kemm tal-ħlasijiet magħmula kemm abbażi tal-obbligu legali kif ukoll abbażi tal-ftehimiet ta’ teħid ta’ responsabbiltà.

41      Min-naħa l-oħra, il-Gvern Ungeriż ma pprovda ebda preċiżazzjoni dwar il-modalitajiet ta’ funzjonament tal-mekkaniżmu ta’ tnaqqis tal-ammont tal-ħlasijiet li jirriżultaw mill-obbligu legali tal-ispejjeż ta’ riċerka u ta’ żvilupp fis-settur tas-saħħa, b’tali mod li ma hemm xejn li jippermetti li jiġi dedott minn din il-possibbiltà li hija rilevanti sabiex jitqies li l-ħlasijiet kontenzjużi huma taxxi li għandhom jiġu inklużi fil-bażi tat-taxxa tal-VAT, konformement mal-punt (a) tal-ewwel paragrafu tal-Artikolu 78 tad-Direttiva dwar il-VAT.

42      F’dawn iċ-ċirkustanzi, il-fatt taxxabbli li jagħti lok għall-ħlasijiet kontenzjużi jista’ jikkoinċidi ma’ dak tal-VAT dovuta għall-prodotti mediċinali ssussidjati u kkummerċjalizzati. Dawn il-ħlasijiet jistgħu għalhekk, bis-saħħa tal-punt (a) tal-ewwel paragrafu tal-Artikolu 78 tad-Direttiva dwar il-VAT, jiġu inklużi fil-bażi tat-taxxa tal-VAT.

43      Fir-rigward tal-kwistjoni dwar jekk l-ammonti mħallsa minn impriżi farmaċewtiċi lill-organi ta’ sigurtà soċjali fl-okkażjoni ta’ bejgħ ta’ prodotti mediċinali ssussidjati jistgħux, madankollu, jaqgħu taħt l-Artikolu 90(1) tad-Direttiva dwar il-VAT, għandu jitfakkar, minn naħa, li l-Qorti tal-Ġustizzja diġà ddeċidiet li l-iskont mogħti, bis-saħħa ta’ liġi nazzjonali, minn impriża farmaċewtika lil impriża ta’ assigurazzjoni għall-mard privata jwassal għal tnaqqis tal-bażi tat-taxxa favur din l-impriża farmaċewtika, fis-sens tal-Artikolu 90(1) tad-Direttiva dwar il-VAT, meta kunsinni ta’ prodotti farmaċewtiċi jitwettqu permezz ta’ bejjiegħa bl-ingrossa lil spiżeriji li jwettqu dawn il-kunsinni lil persuni koperti minn assigurazzjoni għall-mard privata, li tirrimborsa lill-assigurati tagħha l-prezz tax-xiri tal-prodotti farmaċewtiċi (sentenza tal‑20 ta’ Diċembru 2017, Boehringer Ingelheim Pharma, C‑462/16, EU:C:2017:1006, punt 46).

44      Huwa irrilevanti f’dan ir-rigward l-argument tal-Gvern Ungeriż li jgħid li fil-kawża li tat lok għal din is-sentenza, in-natura privata tal-impriża tal-assigurazzjoni għall-mard kienet tikkostitwixxi differenza primordjali, filwaqt li f’dan il-każ, il-ħlasijiet kontenzjużi għandhom natura ta’ dħul fiskali. Fil-fatt, kif jirriżulta mill-punt 33 ta’ din is-sentenza, il-benefiċjarju reali tal-ħlasijiet kontenzjużi ma huwiex l-awtorità fiskali iżda n-NEAK li jużahom għas-sussidju tal-prezz tax-xiri tal-prodotti mediċinali, u dan bl-istess mod bħal f’din il-kawża.

45      Min-naħa l-oħra, il-Qorti tal-Ġustizzja ddeċidiet li l-Artikolu 90(1) tad-Direttiva dwar il-VAT jipprekludi leġiżlazzjoni nazzjonali li tipprevedi li impriża farmaċewtika ma tistax tnaqqas mill-bażi tat-taxxa tagħha għall-finijiet tal-VAT il-parti mid-dħul mill-bejgħ tagħha li jkun ġej mill-bejgħ ta’ prodotti mediċinali ssussidjati mill-organu ta’ assigurazzjoni għall-mard tal-Istat li hija tħallas lil dan l-organu, bis-saħħa ta’ kuntratt konkluż bejn dan tal-aħħar u din l-impriża, minħabba li l-ammonti mħallsa abbażi ta’ dan ma jkunux ġew iddeterminati fuq il-bażi ta’ modalitajiet stabbiliti minn qabel mill-imsemmija impriża fil-kuntest tal-politika kummerċjali tagħha u li dawn il-ħlasijiet ma jkunux saru għal finijiet promozzjonali (sentenza tas‑6 ta’ Ottubru 2021, Boehringer Ingelheim, C‑717/19, EU:C:2021:818, punt 55).

46      Issa, il-modalitajiet li skonthom, f’dan il-każ, il-ħlasijiet kontenzjużi saru abbażi tal-obbligu legali ma jistgħux jikkontestaw il-klassifikazzjoni ta’ dawn il-ħlasijiet ta’ tnaqqis tal-prezz, fis-sens tal-Artikolu 90(1) tad-Direttiva dwar il-VAT.

47      Fil-fatt, l-ewwel nett, il-Qorti tal-Ġustizzja diġà ppreċiżat li l-kamp ta’ applikazzjoni tal-Artikolu 90(1) tad-Direttiva dwar il-VAT ikopri t-tnaqqis fil-prezzijiet li jirriżulta kemm mill-ftehimiet konklużi bejn impriża farmaċewtika u organu ta’ assigurazzjoni għall-mard tal-Istat kif ukoll minn obbligi legali bħal dawk inkwistjoni fil-kawża prinċipali (ara, f’dan is-sens, is-sentenza tas‑6 ta’ Ottubru 2021, Boehringer Ingelheim, C‑717/19, EU:C:2021:818, punti 48 u 49).

48      Barra minn hekk, il-partijiet fil-proċedura kkonfermaw waqt is-seduta li l-għan tal-ħlasijiet magħmula skont l-obbligu legali huwa identiku għal dak ta’ dawk imħallsa abbażi tal-ftehim ta’ teħid ta’ responsabbiltà konklużi bejn l-organu tas-sigurtà soċjali u l-impriżi farmaċewtiċi, jiġifieri li jissussidjaw il-prezz tax-xiri tal-prodotti mediċinali mibjugħa b’riċetta medika u koperti mis-sigurtà soċjali fil-kuntest ta’ trattamenti outpatient.

49      It-tieni nett, il-fatt li, fil-kawża prinċipali, il-benefiċjarju dirett tal-kunsinni tal-prodotti mediċinali inkwistjoni ma huwiex l-organu ta’ assigurazzjoni għall-mard tal-Istat li jirrimborsa a posteriori l-ammont tas-sussidju lill-ispiżerija, iżda l-persuni assigurati nnifishom, ma huwiex ta’ natura li jikser ir-rabta diretta li teżisti bejn il-kunsinna ta’ oġġetti li saret u l-korrispettiv irċevut (sentenza tas‑6 ta’ Ottubru 2021, Boehringer Ingelheim, C‑717/19, EU:C:2021:818, punt 45 u l-ġurisprudenza ċċitata).

50      Fil-fatt, peress li l-ispiżerija għandha tħallas il-VAT fuq l-ammont imħallas mill-pazjent iżda wkoll fuq l-ammont imħallas lilha mill-organu ta’ assigurazzjoni għall-mard tal-Istat għall-prodotti mediċinali ssussidjati, din tal-aħħar għandha titqies li tintervjeni bħala konsumatur finali ta’ kunsinna mwettqa minn impriża farmaċewtika suġġetta għall-VAT, b’tali mod li l-ammont irċevut mill-awtorità fiskali ma jistax ikun ogħla minn dak imħallas mill-konsumatur finali (ara, f’dan is-sens, is-sentenza tas‑6 ta’ Ottubru 2021, Boehringer Ingelheim, C‑717/19, EU:C:2021:818, punt 46 u l-ġurisprudenza ċċitata).

51      F’dan ir-rigward, fir-rigward tad-determinazzjoni tal-konsumatur finali, ma huwiex rilevanti l-argument imressaq mill-Gvern Ungeriż li l-ammonti dovuti abbażi tal-obbligu legali jinġabru mill-awtorità fiskali. Fil-fatt, kif tfakkar fil-punt 44 ta’ din is-sentenza, din tal-aħħar tittrasferixxi dawn is-somom immedjatament lin-NEAK li jagħti sussidju fir-rigward tal-prezz tax-xiri tal-prodotti mediċinali mibjugħa b’riċetta mediċinali u koperti mis-sigurtà soċjali fil-kuntest ta’ trattamenti outpatient.

52      Issa, il-mekkaniżmu ta’ dan it-trasferiment immedjat jimmilita favur il-klassifikazzjoni tal-ħlasijiet kontenzjużi bħala tnaqqis tal-prezz fis-sens tal-Artikolu 90(1) tad-Direttiva dwar il-VAT.

53      Kuntrarjament għal dak li jsostni l-Gvern Ungeriż, l-Artikolu 401 ta’ din id-direttiva ma jipprekludix din l-interpretazzjoni, fid-dawl tal-kuntest ta’ dan l-artikolu. Fil-fatt, il-fatt li l-Istati Membri jistgħu jżommu jew jintroduċu ċerti taxxi, dazji jew piżijiet fil-kundizzjonijiet previsti f’dan l-artikolu, bl-ebda mod ma jipprekludi li tali taxxi, dazji jew piżijiet għandhom, skont il-punt (a) tal-ewwel paragrafu tal-Artikolu 78 tal-imsemmija direttiva, jittieħdu inkunsiderazzjoni għall-finijiet tad-determinazzjoni tal-bażi tat-taxxa tal-VAT, u dan bħala tnaqqis fil-prezz, fis-sens tal-Artikolu 90(1) tal-istess direttiva.

54      Barra minn hekk, mid-deċiżjoni tar-rinviju jirriżulta li, permezz tal-ħlasijiet kontenzjużi, Novo Nordisk tirrinunzja għal parti mill-korrispettiv imħallas mill-bejjiegħa bl-ingrossa.

55      Issa, il-fatt li l-bażi li fuqha tiġi kkalkolata l-VAT dovuta mill-impriża farmaċewtika, bħala persuna taxxabbli, tkun ikbar mis-somma li hija finalment irċeviet, ma huwiex konformi mal-prinċipju ta’ newtralità fiskali mfakkra fil-punt 32 ta’ din is-sentenza. Li kieku dan kien il-każ, dan il-prinċipju ma jiġix osservat (ara, f’dan is-sens, is-sentenza tas‑6 ta’ Ottubru 2021, Boehringer Ingelheim, C‑17/19, EU:C:2021:818, punt 44 u l-ġurisprudenza ċċitata).

56      Għalhekk, parti mill-korrispettiv miksub wara l-bejgħ tal-prodotti mediċinali mill-impriża farmaċewtika ma kinitx inġabret minnha minħabba l-kontribuzzjoni li hija tħallas lill-organu ta’ assigurazzjoni għall-mard tal-istat, liema organu jħallas lill-ispiżeriji parti mill-prezz ta’ dawn il-prodotti mediċinali, hemm lok li jitqies li l-prezz ta’ dawn tal-aħħar tnaqqas wara l-mument li fih seħħet it-tranżazzjoni, fis-sens tal-Artikolu 90(1) tad-Direttiva dwar il-VAT (sentenza tas‑6 ta’ Ottubru 2021, Boehringer Ingelheim, C‑717/19, EU:C:2021:818, punt 47).

57      Fil-fatt, l-impriża farmaċewtika ma setgħetx tiddisponi liberament mill-prezz kollu rċevut waqt il-bejgħ tal-prodotti tagħha lill-bejjiegħa bl-ingrossa (ara, b’analoġija, is-sentenza tal‑20 ta’ Diċembru 2017, Boehringer Ingelheim Pharma, C‑462/16, EU:C:2017:1006, punt 43 u l-ġurisprudenza ċċitata).

58      Fid-dawl tal-kunsiderazzjonijiet preċedenti, ir-risposta għad-domanda magħmula għandha tkun li l-Artikolu 90(1) tad-Direttiva tal-VAT għandu jiġi interpretat fis-sens li jipprekludi leġiżlazzjoni nazzjonali li permezz tagħha impriża farmaċewtika li hija obbligata tħallas lill-organu ta’ assigurazzjoni għall-mard tal-Istat, parti mid-dħul mill-bejgħ tagħha miksub mill-bejgħ ta’ prodotti farmaċewtiċi li jibbenefikaw minn finanzjament minn fondi pubbliċi, ma għandhiex dritt tnaqqas a posteriori l-bażi tat-taxxa għal dawn il-ħlasijiet, fid-dawl tal-fatt li dawn jitwettqu ex lege, li jistgħu jitnaqqsu mill-bażi tal-obbligu ta’ ħlas kemm il-ħlasijiet imwettqa skont kuntratt dwar il-volum tal-finanzjament kif ukoll l-investimenti magħmula mill-impriża f’riċerka u fi żvilupp fis-settur tas-saħħa, u li s-somom dovuti huma miġbura mill-awtorità fiskali, li tittrasferixxi dan l-ammont immedjatament lill-organu ta’ assigurazzjoni għall-mard tal-Istat.

 Fuq l‑ispejjeż

59      Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija dik il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (L‑Ewwel Awla) taqta’ u tiddeċiedi:

L-Artikolu 90(1) tad-Direttiva tal-Kunsill 2006/112/KE tat‑28 ta’ Novembru 2006 dwar is-sistema komuni ta’ taxxa fuq il-valur miżjud,

għandu jiġi interpretat fis-sens li:

jipprekludi leġiżlazzjoni nazzjonali li permezz tagħha impriża farmaċewtika li hija obbligata tħallas lill-organu ta’ assigurazzjoni għall-mard tal-Istat, parti mid-dħul mill-bejgħ tagħha miksub mill-bejgħ ta’ prodotti farmaċewtiċi li jibbenefikaw minn finanzjament minn fondi pubbliċi, ma għandhiex dritt tnaqqas a posteriori l-bażi tat-taxxa għal dawn il-ħlasijiet, fid-dawl tal-fatt li dawn jitwettqu ex lege, li jistgħu jitnaqqsu mill-bażi tal-obbligu ta’ ħlas kemm il-ħlasijiet imwettqa skont kuntratt dwar il-volum tal-finanzjament kif ukoll l-investimenti magħmula mill-impriża f’riċerka u fi żvilupp fis-settur tas-saħħa, u li s-somom dovuti huma miġbura mill-awtorità fiskali, li tittrasferixxi dan l-ammont immedjatament lill-organu ta’ assigurazzjoni għall-mard tal-Istat.

Firem

*      Lingwa tal-kawża: l-Ungeriż.