1.

Permezz tal-appelli rispettivi tagħhom, ir-Renju Unit tal-Gran Brittanja u l-Irlanda ta’ Fuq (C‑555/22 P), ITV plc (C‑556/22 P) u LSEGH (Luxembourg) Ltd u London Stock Exchange Group Holdings (Italy) Ltd (iktar ’il quddiem, flimkien, “LSEGH”) (C‑564/22 P) jitolbu l-annullament tas-sentenza tal-Qorti Ġenerali tat‑8 ta’ Ġunju 2022, Ir‑Renju Unit u ITV vs Il‑Kummissjoni (T‑363/19 u T‑456/19, EU:T:2022:349, iktar ’il quddiem is-“sentenza appellata”). Din is-sentenza ċaħdet ir-rikorsi tar-Renju Unit u ta’ ITV intiżi għall-annullament tad-Deċiżjoni tal-Kummissjoni (UE) 2019/1352 ( 2 ).

2.

Fir-Renju Unit, ir-regoli fiskali dwar il-kumpanniji barranin kkontrollati (CFC) huma stabbiliti fil-Parti 9A tat-Taxation (International and Other Provisions) Act 2010 (Il-Liġi tal‑2010 dwar it-Tassazzjoni (Dispożizzjonijiet Internazzjonali u Dispożizzjonijiet Oħra), iktar ’il quddiem it-“TIOPA”) ( 3 ), li tinkludi regoli dwar l-aspetti internazzjonali tas-sistema ta’ taxxi diretti tar-Renju Unit, inkluż it-tnaqqis tat-taxxa doppja u diversi dispożizzjonijiet kontra l-evażjoni.

3.

Il-fatti li wasslu għat-tilwima huma esposti fil-punti 1 sa 28 tas-sentenza appellata. Għall-finijiet ta’ dawn il-konklużjonijiet, dawn jistgħu jinġabru fil-qosor kif ġej.

4.

Wara proċedura ta’ investigazzjoni formali mibdija skont l-Artikolu 108(2) TFUE, il-Kummissjoni Ewropea adottat id-deċiżjoni inkwistjoni u kkonstatat li minħabba l-eżenzjonijiet previsti fil-Kapitolu 9 tal-Parti 9A tat-TIOPA (iktar ’il quddiem il-“Kapitolu 9”), l-iskema ta’ eżenzjoni fuq il-finanzjament tal-gruppi (GFE), kienet tikkostitwixxi għajnuna mill-Istat fis-sens tal-Artikolu 107(1) TFUE. Dan kien minħabba li din l-iskema kienet tapplika għall-profitti finanzjarji mhux kummerċjali (NTFP) li jirriżultaw minn relazzjonijiet ta’ self kwalifikanti (QLR) li jaqgħu taħt l-Artikolu 371EB (bħall-Gvern tar-Renju Unit, jiena ser nirreferi għall-“Artikoli” fil-qosor bħala “A.”) tal-Kapitolu 5 tal-Parti 9A tat-TIOPA (iktar ’il quddiem l-“iskema kkontestata” jew l-“eżenzjonijiet inkwistjoni”). Il-Kummissjoni qieset li l-eżenzjonijiet inkwistjoni kienu jikkostitwixxu “skema ta’ għajnuna” li kienet inkompatibbli mas-suq intern u li kienet ġiet implimentata illegalment mir-Renju Unit bi ksur tal-Artikolu 108(3) TFUE.

5.

Madankollu, il-Kummissjoni kkonkludiet li l-iskema kkontestata ma kinitx tikkostitwixxi għajnuna meta applikata għal NTFP li jirriżultaw minn QLR li jaqgħu taħt l-A. 371EC (investimenti kapitali mir-Renju Unit; iktar ’il quddiem il-“kriterju tal-kapital konness mar-Renju Unit”) tal-Kapitolu 5 u li ma jaqgħux taħt l-A. 371EB (attivitajiet tar-Renju Unit) ta’ dan il-kapitolu, fuq il-bażi tal-fatt li l-funzjonijiet tal-persuni sinjifikattivi (FPS) ( 4 ) twettqu fir-Renju Unit (iktar ’il quddiem il-“kriterju tal-FPS tar-Renju Unit”).

6.

Fid-deċiżjoni inkwistjoni, il-Kummissjoni ffokat fuq l-eżistenza ta’ vantaġġ selettiv. Il-Kummissjoni b’hekk irrilevat li l-eżenzjonijiet inkwistjoni kienu jippermettu lil kumpannija stabbilita fir-Renju Unit – li altrimenti kienet tkun suġġetta (skont il-Kapitolu 5) għal imposta ta’ CFC – titlob (skont il-Kapitolu 9) li din l-imposta ta’ CFC tiġi ntaxxata biss fuq 25 % tan-NTFP ta’ CFC li jirriżultaw minn QLR, b’tali mod li 75 % ta’ dawn il-profitti kienu eżentati minn din l-imposta. Taħt ċerti kundizzjonijiet, dawn tal-aħħar jistgħu jiġu ntaxxati fuq perċentwali saħansitra iżgħar, li jista’ jwassal għal eżenzjoni li tkopri sa 100 % tal-profitti rilevanti taċ-CFC.

7.

Fir-rigward tan-natura selettiva tal-eżenzjonijiet inkwistjoni, il-Kummissjoni kkunsidrat li l-qafas ta’ riferiment kien ikkostitwit mir-regoli dwar iċ-CFC u li dawn l-eżenzjonijiet kienu jikkostitwixxu deroga minn dan il-qafas.

8.

F’dan il-kuntest, il-Kummissjoni ddeċidiet li s-sitwazzjoni ta’ entità taxxabbli li tikkontrolla CFC li taqla’ n-NTFP li jirriżultaw minn QLR kienet paragunabbli ma’ dik ta’ entità taxxabbli li tikkontrolla CFC li għamlet NTFP oħrajn, b’mod partikolari fil-kuntest ta’ self mogħti minn CFC lil kumpanniji relatati residenti fir-Renju Unit, magħrufa bħala “self upstream”, u self mogħti minn CFC lil terzi, indikat mir-Renju Unit bħala “self fittizju”.

9.

Il-Kummissjoni fakkret li miżura li tidderoga mill-qafas ta’ riferiment setgħet madankollu tkun iġġustifikata min-natura jew mill-istruttura ġenerali ta’ dan il-qafas u li kien l-Istat Membru ( 5 ) li kellu juri l-eżistenza ta’ tali ġustifikazzjoni. Ir-Renju Unit kien sostna, l-ewwel, li l-eżenzjonijiet inkwistjoni kienu intiżi li jiżguraw li s-sistema tkun ġestibbli u amministrabbli. It-tieni, l-eżenzjonijiet kienu jiżguraw l-eżerċizzju tal-libertà ta’ stabbiliment fi ħdan l-Unjoni Ewropea.

10.

F’dan ir-rigward, il-Kummissjoni aċċettat li, sa fejn l-iskema kkontestata kienet tkopri sitwazzjonijiet li jaqgħu fil-kamp ta’ applikazzjoni tal-Kapitolu 5, skont il-kriterju tal-kapital konness mar-Renju Unit, din l-iskema setgħet tiġi kkunsidrata bħala intiża sabiex tiżgura l-“ġestjoni amministrattiva” tar-regoli dwar iċ-CFC. L-iskema kkontestata żgurat li imposta ta’ CFC tiġi ntaxxata biss fuq il-profitti ġġenerati minn assi tar-Renju Unit li setgħu raġonevolment jitqiesu bħala ddevjati b’mod artifiċjali mir-Renju Unit, mingħajr ma tobbliga lill-kumpanniji u lill-awtoritajiet tat-taxxa jwettqu eżerċizzju eċċessivament oneruż biex jillokalizzaw il-fondi, minħabba n-natura funġibbli tal-kapital.

11.

B’kuntrast ma’ dan, il-Kummissjoni rrilevat li l-iskema kkontestata kienet tat vantaġġ selettiv a priori lil kumpanniji li kienu suġġetti għat-taxxa fir-Renju Unit u li kienu jikkontrollaw CFC li kienet tagħmel NTFP li jirriżultaw minn QLR f’sitwazzjonijiet li jissodisfaw il-kriterju tal-FPS tar-Renju Unit. Il-Kummissjoni kkonkludiet li tali vantaġġ selettiv a priori la seta’ jkun iġġustifikat min-neċessità li jkun hemm regoli kontra l-evażjoni, li jkunu amministrabbli u ġestibbli, u lanqas min-neċessità li jiġu osservati l-libertajiet stabbiliti fit-Trattati.

12.

Barra minn hekk, hija sostniet li, wara l-emendi li saru għar-regoli dwar iċ-CFC fil-kuntest tat-traspożizzjoni tad-Direttiva 2016/1164 ( 6 ), b’effett mill‑1 ta’ Jannar 2019 u li permezz tagħhom ma kienx iktar possibbli li jsiru applikazzjonijiet għall-eżenzjonijiet inkwistjoni fir-rigward tal-profitti msemmija fil-punt preċedenti, l-iskema kkontestata kienet saret konformi mar-regoli dwar l-għajnuna mill-Istat.

13.

Fir-rigward tal-kompatibbiltà tal-iskema inkwistjoni mas-suq intern, il-Kummissjoni sostniet, essenzjalment, li l-għajnuna mogħtija taħt din l-iskema ma tiffaċilitax l-iżvilupp ta’ ċerti attivitajiet ekonomiċi jew ta’ ċerti żoni ekonomiċi, bir-riżultat li ma taqax taħt l-Artikolu 107(3)(c) TFUE.

14.

Finalment, il-Kummissjoni ordnat l-irkupru tal-għajnuna mogħtija taħt l-iskema kkontestata mingħand il-benefiċjarji tagħha.

15.

Il-Qorti Ġenerali ċaħdet ir-rikorsi ppreżentati rispettivament mill-Gvern tar-Renju Unit u minn ITV. Hija ddeċidiet, inter alia, li l-kundizzjoni dwar l-eżistenza ta’ vantaġġ selettiv kienet issodisfatta. F’dan il-kuntest, hija wettqet l-analiżi klassika fi tliet stadji li jikkonsistu fis-segwenti: (i) l-identifikazzjoni tal-qafas ta’ riferiment; (ii) li jiġi vverifikat jekk l-iskema kkontestata kinitx tidderoga minn dan il-qafas, fid-dawl tal-għan li hija ssegwi, u (iii) stabbiliment ta’ jekk l-Istat Membru kienx wera li d-differenzazzjoni introdotta mill-iskema ta’ għajnuna kienet iġġustifikata, peress li din id-differenzazzjoni kienet tirriżulta min-natura jew mill-istruttura ġenerali tal-qafas li fih kienet taqa’ din l-iskema.

16.

Il-Qorti Ġenerali ċaħdet l-eċċezzjonijiet li permezz tagħhom ir-Renju Unit u ITV sostnew li l-Kummissjoni kienet wettqet żball manifest ta’ evalwazzjoni meta kkonkludiet li l-qafas ta’ riferiment kien jikkonsisti biss fir-“regoli dwar iċ-CFC”, u mhux fis-sistema ġenerali tat-taxxa fuq il-kumpanniji tar-Renju Unit (iktar ’il quddiem is-“sistema ġenerali tat-TK”).

17.

F’dan ir-rigward, fl-ewwel lok, il-Qorti Ġenerali ddikjarat li s-sistema ġenerali tat-TK kienet ibbażata fuq il-prinċipju ta’ territorjalità, li fuq il-bażi tiegħu huma biss il-profitti magħmula fir-Renju Unit li jiġu ntaxxati. Imbagħad, hija rrilevat li r-regoli dwar iċ-CFC kienu intiżi li jiżguraw li l-profitti magħmula minn CFC – li, skont dan il-prinċipju, normalment ma jiġux intaxxati fir-Renju Unit – jiġu madankollu ntaxxati (meta jkunu tqiesu li ġew artifiċjalment iddevjati lil hinn mir-Renju Unit) u li għalhekk artifiċjalment żiedu l-profitti taċ-CFC, li sussegwentement qassmet dividendi li ma kinux taxxabbli fir-Renju Unit. Il-Qorti Ġenerali kkonkludiet minn dan li r-regoli dwar iċ-CFC ma kinux eċċezzjoni għas-sistema ġenerali tat-TK iżda estensjoni tagħha, jew korollarju li jsegwi loġika distinta u separabbli minn dik ta’ din is-sistema ( 7 ).

18.

Fit-tieni lok, il-Qorti Ġenerali eżaminat jekk ir-regoli dwar iċ-CFC setgħux jitqiesu bħala sett komplet ta’ regoli, distint mis-sistema ġenerali tat-TK, b’mod partikolari fir-rigward ta’ elementi bħall-bażi tat-taxxa, il-persuna taxxabbli, il-fatt taxxabbli u r-rata tat-taxxa.

19.

Fir-rigward tal-bażi tat-taxxa, il-Qorti Ġenerali rrilevat, essenzjalment, li r-regoli dwar iċ-CFC kienu intiżi li jintaxxaw il-profitti ta’ kontabbiltà taċ-CFC magħmula barra mir-Renju Unit li kienu ddevjati b’mod artifiċjali lil hinn minn dan l-Istat. Kuntrarjament, it-taxxa fuq il-kumpanniji tar-Renu Unit (iktar ’il quddiem TK) kienet tapplika għall-profitti magħmula fir-Renju Unit minn kumpanniji stabbiliti hemmhekk ( 8 ).

20.

Fir-rigward tal-persuna taxxabbli, il-Qorti Ġenerali ddeċidiet, essenzjalment, li l-persuni taxxabbli suġġetti għar-regoli dwar iċ-CFC kienu differenti mill-persuni taxxabbli suġġetti għas-sistema ġenerali tat-TK minħabba l-aspett partikolari li dawn ir-regoli kienu jidħlu fis-seħħ meta kumpanniji residenti fir-Renju Unit kellhom ċerti interessi f’sussidjarji barra mir-Renju Unit ( 9 ).

21.

Fir-rigward tal-fatt taxxabbli, il-Qorti Ġenerali ddeċidiet li l-fattur determinanti għall-finijiet tal-impożizzjoni ta’ imposta ta’ CFC kien l-iddevjar artifiċjali ta’ profitti lil hinn mir-Renju Unit filwaqt li, fis-sistema ġenerali tat-TK, kien it-twettiq ta’ profitti fir-Renju Unit li ta lok għat-taxxa ( 10 ).

22.

F’dak li jirrigwarda r-rata tat-taxxa, il-Qorti Ġenerali, filwaqt li rrikonoxxiet li r-regoli dwar iċ-CFC ma kinux jinkludu rata speċifika applikabbli għall-profitti taċ-CFC u rreferiet għar-rata prevista mis-sistema ġenerali tat-TK, ikkunsidrat li, fl-intier tagħha, l-imposta ta’ CFC kienet iddeterminata skont mekkaniżmu ta’ kalkolu speċifiku li kien jinvolvi, skont il-każ, il-kalkolu tal-medja ta’ diversi rati tat-taxxa applikabbli għall-profitti tal-kumpannija relatata li kienet taxxabbli fir-Renju Unit ( 11 ).

23.

Barra minn hekk, il-Qorti Ġenerali rrilevat li r-regoli dwar iċ-CFC kienu jinkludu dispożizzjonijiet speċifiċi dwar il-kalkolu tal-imposta ta’ CFC, il-ġestjoni u l-ġbir ta’ din l-imposta u, b’mod iktar partikolari, ir-relazzjoni tagħha mat-taxxi dovuti mill-kumpannija residenti fir-Renju Unit u dawk imħallsa miċ-CFC fil-pajjiż ta’ residenza tagħha. Barra minn hekk, hija enfasizzat li, fil-kalkolu tal-ammont tat-taxxa dovuta mill-kumpannija residenti li kienet taxxabbli minħabba l-profitti magħmula miċ-CFC tagħha, kien previst tnaqqis mit-taxxi kollha li kien ikollhom jitħallsu fil-pajjiż ospitanti taċ-CFC ( 12 ).

24.

Fl-ewwel lok, il-Qorti Ġenerali ddeċidiet, essenzjalment, li r-regoli stabbiliti fil-Parti 9A tat-TIOPA kienu jistabbilixxu kriterji għall-identifikazzjoni ta’ sitwazzjonijiet fejn kien hemm iddevjar artifiċjali ta’ profitti, bħal, inter alia, dawk koperti mill-Kapitolu 5 tagħha. Għalhekk, skont il-Qorti Ġenerali, fejn wieħed mill-kriterji stabbiliti minn dawn ir-regoli ġie ssodisfatt, il-profitti magħmula miċ-CFC inkwistjoni kienu ntaxxati fir-Renju Unit permezz tal-imposta taċ-CFC. Minn dan hija kkonkludiet li l-fatt li, fil-Kapitolu 9 tagħha, huma previsti eżenzjonijiet minn din l-imposta għal profitti li altrimenti kienu jkunu suġġetti għaliha, skont il-kriterji msemmija iktar ’il fuq, jikkostitwixxi vantaġġ, u mhux bdil fit-tassazzjoni tal-profitti taċ-CFC jew delimitazzjoni tal-kamp ta’ tassazzjoni ta’ dawn il-profitti.

25.

Fit-tieni lok, il-Qorti Ġenerali ddeċidiet, essenzjalment, li l-għan tar-regoli dwar iċ-CFC kien il-protezzjoni tal-bażi tat-TK tar-Renju Unit billi jiġu ntaxxati profitti ġġenerati minn attivitajiet u assi tar-Renju Unit li ġew iddevjati b’mod artifiċjali lejn CFC.

26.

Fit-tielet lok, il-Qorti Ġenerali ddeċidiet, essenzjalment, li l-GFE kienet selettiva a priori fid-dawl tal-għan tal-qafas ta’ riferiment.

27.

Il-Qorti Ġenerali ċaħdet l-argumenti tar-Renju Unit u ta’ ITV li skonthom l-eżenzjonijiet inkwistjoni kienu ġġustifikati.

28.

Fir-rigward tal-ewwel ġustifikazzjoni, qabel kollox, il-Qorti Ġenerali kkonstatat li, għalkemm mit-tweġibiet għall-konsultazzjoni li kienet saret mill-awtoritajiet tar-Renju Unit qabel l-adozzjoni tar-regoli dwar iċ-CFC jirriżulta li, inter alia, il-proposta dwar eżenzjoni parzjali ta’ 75 % kienet fil-biċċa l-kbira appoġġjata minħabba s-sempliċità u l-faċilità ta’ applikazzjoni tagħha, ir-Renju Unit ma kien ipproduċa ebda prova li tikkwantifika l-ispejjeż amministrattivi relatati mal-identifikazzjoni u mal-lokalizzazzjoni tal-FPS fil-kuntest tas-self intragrupp, iżda sempliċement għamel affermazzjonijiet ġenerali. Il-Qorti Ġenerali rrilevat ukoll li ma kienx intwera’ li l-limitu ta’ eżenzjoni ta’ 75 % kien neċessarju jew xieraq sabiex tingħata risposta għad-domanda dwar id-diffikultà li jiġu identifikati u llokalizzati l-FPS imwettqa fil-kuntest ta’ self intragrupp li jiġġenera NTFP.

29.

Fir-rigward tat-tieni ġustifikazzjoni, il-Qorti Ġenerali ddeduċiet mis-sentenza Cadbury Schweppes u Cadbury Schweppes Overseas ( 13 ) li, peress li l-imposta ta’ CFC kienet tapplika għal profitti li, skont il-kriterji tal-FPS tar-Renju Unit, kellhom jitqiesu li ġew iddevjati b’mod artifiċjali, din l-imposta ma kinitx tikkostitwixxi ostakolu għal-libertà ta’ stabbiliment u ddeċidiet, konsegwentement, li l-eżenzjonijiet inkwistjoni ma setgħux jiġu ġġustifikati sabiex tiġi żgurata din il-libertà.

30.

Il-Kummissjoni ssostni li d-dritt nazzjonali huwa kwistjoni ta’ fatt, li taqa’ taħt il-ġurisdizzjoni esklużiva tal-Qorti Ġenerali, ħlief fil-każ fejn l-interpretazzjoni ta’ dan id-dritt tkun ibbażata fuq żnaturament tal-provi. Hija taċċetta li, skont is-sentenza Fiat ( 14 ), id-determinazzjoni korretta tal-qafas ta’ riferiment hija kwistjoni ta’ dritt, iżda ssostni li, f’din is-sentenza, l-iżball ikkonstatat mill-Qorti tal-Ġustizzja kien relatat mal-kwistjoni dwar jekk il-Qorti Ġenerali kinitx ħadet inkunsiderazzjoni fatturi xierqa meta għamlet din id-determinazzjoni, u ma kienx relatat mal-interpretazzjoni tad-dritt nazzjonali. B’kuntrast, fil-kawżi ineżami, l-appellanti ma jallegawx li l-Qorti Ġenerali bbażat ruħha fuq elementi żbaljati meta evalwat jekk il-Kummissjoni kinitx iddefinixxiet b’mod korrett il-qafas ta’ riferiment.

31.

Ir-Renju Unit, ITV u LSEGH jikkontestaw dawn l-argumenti u jsostnu li l-appelli huma ammissibbli.

32.

L-ewwel, infakkar li, skont is-sentenza Fiat (punt 82), “[h]uwa minnu li, fir-rigward tal-eżami, fil-kuntest ta’ appell, tal-evalwazzjonijiet tal-Qorti Ġenerali fir-rigward tad-dritt nazzjonali, li, fil-qasam tal-għajnuna mill-Istat, jikkostitwixxu evalwazzjonijiet ta’ fatti, il-Qorti tal-Ġustizzja għandha biss kompetenza sabiex tivverifika jekk kienx hemm żnaturament ta’ dan id-dritt”.

33.

Madankollu, jibqa’ l-fatt li l-Qorti tal-Ġustizzja ma tistax tiġi mċaħħda mill-possibbiltà li tivverifika jekk din l-evalwazzjoni tikkostitwixxix fiha nnifisha żball ta’ dritt tal-Unjoni ( 15 ).

34.

Fil-fatt, mill-ġurisprudenza tal-Qorti tal-Ġustizzja jirriżulta li “il-kwistjoni ta’ jekk il-Qorti Ġenerali ddelimitatx b’mod xieraq il-qafas ta’ riferiment rilevanti […] tirrigwarda punt ta’ dritt li jista’ jkun is-suġġett tal-istħarriġ tal-Qorti tal-Ġustizzja fl-istadju tal-appell. Fil-fatt, l-argumenti intiżi li jikkontestaw l-għażla tal-qafas ta’ riferiment jew it-tifsira tiegħu fil-kuntest tal-ewwel stadju tal-analiżi tal-eżistenza ta’ vantaġġ selettiv huma ammissibbli peress li din l-analiżi tirriżulta minn klassifikazzjoni ġuridika tad-dritt nazzjonali abbażi ta’ dispożizzjoni tad-dritt tal-Unjoni” ( 16 ).

35.

Fil-fatt, skont il-ġurisprudenza, “[jekk] jiġi aċċettat li l-Qorti tal-Ġustizzja ma hijiex f’pożizzjoni li tiddetermina jekk huwiex mingħajr ma wettqet żball ta’ liġi li l-Qorti Ġenerali adottat id-delimitazzjoni tal-qafas ta’ riferiment rilevanti, l-interpretazzjoni u l-applikazzjoni tiegħu bħala parametru deċiżiv għall-finijiet tal-eżami tal-eżistenza ta’ vantaġġ selettiv ikun ifisser li tiġi aċċettata l-possibbiltà li l-Qorti Ġenerali tkun wettqet, jekk ikun il-każ, ksur ta’ dispożizzjoni tad-dritt primarju tal-Unjoni, jiġifieri l-Artikolu 107(1) TFUE, mingħajr ma dan il-ksur ikun jista’ jiġi ssanzjonat fl-ambitu tal-appell, u dan imur kontra t-tieni subparagrafu tal-Artikolu 256(1) TFUE” ( 17 ).

36.

Barra minn hekk, meta l-Qorti Ġenerali tkun ikkonstatat jew evalwat il-fatti, il-Qorti tal-Ġustizzja għandha l-ġurisdizzjoni, skont l-Artikolu 256 TFUE, li tistħarreġ il-klassifikazzjoni ġuridika ta’ dawn il-fatti, li testendi għall-evalwazzjoni tal-kontenut tad-dritt nazzjonali fil-każ ta’ żnaturament. Il-Qorti tal-Ġustizzja għandha tkun tista’ tistħarreġ jekk il-Qorti Ġenerali tkunx “wettqet konstatazzjonijiet li jmorru b’mod manifest kontra l-kontenut tad-dispożizzjonijiet tad-dritt [nazzjonali] inkwistjoni” jew jekk tkunx tathom portata li manifestament ma għandhomx ( 18 ). Għalhekk, id-definizzjoni tal-qafas ta’ riferiment u, b’estensjoni, il-kwistjoni dwar jekk il-Qorti Ġenerali żnaturatx id-dritt nazzjonali jikkostitwixxu punti ta’ liġi suġġetti għall-istħarriġ tal-Qorti tal-Ġustizzja fl-istadju tal-appell ( 19 ).

37.

Minn dan isegwi li l-appelli ineżami huma ammissibbli.

38.

Insostenn tal-appell tiegħu (Kawża C‑555/22 P), ir-Renju Unit iqajjem ħames aggravji fejn jallega: (i) żball ta’ liġi, żnaturament u klassifikazzjoni żbaljata tal-fatti fir-rigward tal-identifikazzjoni tal-qafas ta’ riferiment; (ii) żball ta’ liġi, żnaturament u klassifikazzjoni żbaljata tal-fatti fir-rigward tal-eżistenza ta’ vantaġġ; (iii) żball ta’ liġi, żnaturament u klassifikazzjoni żbaljata tal-fatti u ksur tal-obbligu ta’ motivazzjoni fir-rigward tas-selettività; (iv) żball ta’ liġi, żnaturament u klassifikazzjoni żbaljata tal-fatti fir-rigward tal-prattiċità amministrattiva, u (v) żball ta’ liġi fir-rigward tal-libertà ta’ stabbiliment.

39.

Sussegwentement, ITV (Kawża C‑556/22 P) tqajjem erba’ aggravji, fejn tallega: (i) żball fid-determinazzjoni tal-qafas ta’ riferiment; (ii) żball fid-determinazzjoni ta’ vantaġġ selettiv; (iii) żball fit-trattament tal-ġustifikazzjoni għall-eżenzjonijiet inkwistjoni, u (iv) żball fl-applikazzjoni tas-sentenza Cadbury.

40.

Finalment, LSEGH (Kawża C‑564/22 P) iqajmu ħames aggravji, fejn jallegaw: (i) żball ta’ liġi fl-identifikazzjoni tal-qafas ta’ riferiment; (ii) żball ta’ liġi f’dak li jikkonċerna l-identifikazzjoni tal-għan ta’ dan il-qafas; (iii) żball ta’ liġi fir-rigward tal-eżistenza ta’ diskriminazzjoni bejn operaturi ekonomiċi; (iv) ksur tal-Artikoli 263 u 296 TFUE minħabba li ma ġewx indirizzati ċerti motivi u s-sostituzzjoni mill-Qorti Ġenerali tal-motivazzjoni tagħha stess għal dik tal-Kummissjoni fid-deċiżjoni inkwistjoni, u (v) żball ta’ liġi fir-rigward tal-ġustifikazzjoni tal-eżenzjonijiet inkwistjoni.

41.

Minkejja li l-appellanti ma jinvokawx l-istess numru ta’ eċċezzjonijiet u minkejja l-fatt li, fil-kuntest ta’ dawn l-eċċezzjonijiet, kull appellant seta’ jagħti iktar jew inqas piż lil ċerti argumenti jew iressaq argumenti speċifiċi, l-argumenti tagħhom madankollu jikkonċentraw fuq erba’ elementi: (i) id-determinazzjoni tal-qafas ta’ riferiment; (ii) l-eżistenza ta’ vantaġġ selettiv (iii) il-ġustifikazzjoni għall-iskema kkontestata fuq il-bażi tan-neċessità li tiġi ffaċilitata l-prattiċità amminsitrattiva tar-regoli dwar iċ-CFC; u (iv) il-ġustifikazzjoni għal din l-iskema sabiex tiġi osservata l-libertà ta’ stabbiliment.

42.

Għandu jiġi enfasizzat li l-appelli jiffokaw prinċipalment fuq l-element (i) (il-qafas ta’ riferiment).

43.

Għaldaqstant, ser nindirizza l-argumenti differenti tal-appellanti flimkien skont dawn l-erba’ elementi (li jaqgħu taħt it-tliet stadji konsekuttivi tal-analiżi magħmula mill-Qorti Ġenerali, filwaqt li l-aħħar żewġ elementi jikkostitwixxu l-Istadju 3 tal-analiżi).

44.

L-argumenti tal-appellanti li skonthom il-Kapitoli 5 u 9 għandhom jinqraw flimkien, sa fejn jirriflettu l-approċċ ibbażat fuq ir-riskju segwit mir-Renju Unit, huma rilevanti mhux biss għall-finijiet tal-evalwazzjoni tal-eżistenza u tal-ġustifikazzjoni ta’ vantaġġ selettiv, iżda wkoll għall-finijiet tad-definizzjoni tal-qafas ta’ riferiment korrett innifsu.

45.

Barra minn hekk, minkejja li wħud mill-argumenti mressqa mill-appellanti taħt l-elementi (iii) u (iv) iktar ’il fuq jikkonċernaw l-Istadju 3 tal-analiżi, diġà ser nindirizza dawn l-argumenti fil-parti tal-konklużjonijiet dwar il-qafas ta’ riferiment ( 20 ). Dan huwa ġġustifikat peress li teżisti rabta stretta bejn l-argumenti mressqa fir-rigward tad-determinazzjoni tal-qafas ta’ riferiment rilevanti, minn naħa, u dawk intiżi sabiex jiġġustifikaw il-qari flimkien tal-Kapitoli 5 u 9 u li skonthom l-eżenzjonijiet inkwistjoni għandhom jitqiesu bħala simili għall-filtri tal-Kapitolu 3 tal-Parti 9A tat-TIOPA (iktar ’il quddiem il-“Kapitolu 3) u għall-“eżenzjonijiet fil-livell ta’ entità”, min-naħa l-oħra.

46.

Ir-Renju Unit isostni li l-Qorti Ġenerali wettqet żball ta’ liġi u/jew kisret id-dritt tal-Unjoni minħabba li żnaturat il-fatti sottostanti u kklassifikathom b’mod żbaljat fil-liġi meta kkonkludiet li r-regoli tar-Renju Unit dwar iċ-CFC għandhom jiġu ttrattati bħala l-qafas ta’ riferiment.

47.

ITV issostni li l-Qorti Ġenerali wettqet żball ta’ liġi u/jew żball manifest ta’ evalwazzjoni meta kkonkludiet li l-Kummissjoni ma kinitx wettqet żball meta għażlet il-qafas ta’ riferiment għall-analiżi tal-kwistjoni dwar jekk il-miżuri ta’ għajnuna mill-Istat previsti fl-Artikoli 107 u 108 TFUE kinux ġew miksura.

48.

LSEGH isostnu, l-ewwel, li l-Qorti Ġenerali wettqet żball ta’ liġi peress li żnaturat id-dritt nazzjonali u injorat il-provi meta identifikat ir-regoli tar-Renju Unit dwar iċ-CFC fil-Parti 9A tat-TIOPA bħala l-qafas ta’ riferiment, minflok is-sistema ġenerali tat-TK li minnha huma jifformaw parti inseparabbli. It-tieni, anki li kieku l-qafas ta’ riferiment kien ir-regoli tar-Renju Unit dwar iċ-CFC, il-Qorti Ġenerali wettqet żball ta’ liġi fl-identifikazzjoni tal-għan tal-qafas ta’ riferiment u, konsegwentement, wettqet żball meta identifikat id-dispożizzjonijiet tal-Kapitolu 5 bħala li jiddeterminaw it-tassazzjoni “normali” tan-NTFP, b’tali mod li l-GFE li tinsab fil-Kapitolu 9 kienet tagħti “vantaġġ”.

49.

Il-Kummissjoni tikkontesta l-argumenti tal-appellanti u ssostni, essenzjalment, li l-Qorti Ġenerali ma kkunsidratx li kien “normali” li jiġu ntaxxati l-profitti kollha taċ-CFC, iżda rrilevat li l-profitti tagħhom kienu suġġetti għal imposta ta’ CFC, minkejja l-fatt li dawn kienu saru minn kumpannija mhux tar-Renju Unit meta dawn irriżultaw minn iddevjar artifiċjali. Għaldaqstant, ir-regoli dwar iċ-CFC jagħmluha possibbli li profitti li jirriżultaw minn assi jew attivitajiet fir-Renju Unit jiġu inklużi fil-bażi tat-taxxa tar-Renju Unit, li altrimenti kienu jaqgħu ’l barra minnha. Il-Kummissjoni ssostni, essenzjalment, li riskji sinjifikattivi ta’ devjazzjoni huma esklużi fil-każ ta’ profitti koperti mill-“eżenzjonijiet ta’ entità”, filwaqt li ma humiex esklużi fir-rigward ta’ profitti koperti mill-eżenzjonijiet inkwistjoni, li jissodisfaw il-kriterji tal-Kapitolu 5.

50.

F’dak li jirrigwarda l-qafas ta’ riferiment, l-appellanti jsostnu, essenzjalment, li l-Kummissjoni, wara li kklassifikat ir-regoli dwar iċ-CFC bħala sistema fiskali “normali”, ma qegħditx dawn ir-regoli f’kuntest korrett, li fih huma jirrappreżentaw eċċezzjoni strettament iddelimitata għal, u jifformaw parti, mis-sistema ġenerali tat-TK. Din l-aħħar sistema hija fil-biċċa l-kbira territorjali u tipprevedi t-tassazzjoni, bħala prinċipju, biss tal-profitti li l-kumpanniji stabbiliti fir-Renju Unit għamlu huma stess. Ir-regoli dwar iċ-CFC ma jistgħux jiġu sseparati mis-sistema ġenerali tat-TK, iżda jikkostitwixxu miżura korrettiva, inseparabbli minn din is-sistema, li għandha l-għan li tipproteġi l-bażi tat-TK fir-Renju Unit mill-abbużi li jinvolvu ċ-CFC. Skont l-appellanti, l-eżenzjonijiet inkwistjoni ġew ifformulati b’mod wiesa’ ħafna, b’tali mod li jiġi żgurat li n-NTFP taċ-CFC ma jkunux (kompletament) suġġetti għall-imposta ta’ CFC kull darba li r-riskju għall-bażi tat-taxxa tar-Renju Unit ikun baxx u fejn l-eċċezzjoni għall-prinċipju ta’ territorjalità ta’ din l-imposta hija, għaldaqstant, inġustifikata. Dawn l-eżenzjonijiet huma simili għall-eżenzjonijiet ta’ entità u l-filtri tal-Kapitolu 3. L-appellanti jsostnu li għandu jittieħed inkunsiderazzjoni wkoll il-fatt li l-Kapitolu 4, li jikkonċerna l-applikazzjoni tal-imposta ta’ CFC għall-profitti finanzjarji kummerċjali taċ-CFC jipprevedi eżenzjonijiet fi ħdanu, filwaqt li l-Kapitolu 5 nnifsu ma jipprevedix eżenzjonijiet.

51.

Kif semmejt fil-punt 45 iktar ’il fuq, dawn l-argumenti huma marbuta mill-qrib ma’ dawk li permezz tagħhom l-appellanti jsostnu li huwa żbaljat li jiġi kkunsidrat li l-Kapitolu 5 jistabbilixxi kriterji li jippermettu li jiġi stabbilit liema NTFP taċ-CFC għandhom jiġu kklassifikati bħala ddevjati artifiċjalment, filwaqt li l-Kapitolu 9 jistabbilixxi eżenzjonijiet għal ċerti profitti li altrimenti kienu jkunu s-suġġett ta’ imposta ta’ CFC skont il-Kapitolu 5. L-appellanti jsostnu li dawn il-kapitoli jikkomplementaw lil xulxin u jagħtu lok għal sistema uniformi u koerenti ta’ tassazzjoni tan-NTFP taċ-CFC. B’hekk, meħuda flimkien, l-imsemmija kapitoli jiddefinixxu l-kamp ta’ applikazzjoni tal-imposta ta’ CFC, billi jieħdu inkunsiderazzjoni l-evalwazzjoni tar-riskju maħluq għall-bażi tat-taxxa fir-Renju Unit, mill-oriġini u l-użu tal-kapital li minnu jirriżultaw dawn in-NTFP.

52.

Barra minn hekk, l-appellanti jsostnu li r-regoli dwar iċ-CFC għandhom jinqraw flimkien mad-dispożizzjonijiet tas-sistema ġenerali tat-TK li permezz tagħha, l-ewwel, id-dividendi li ċ-CFC iqassmu lil kumpanniji omm stabbiliti fir-Renju Unit ma humiex taxxabbli u, it-tieni, dawn il-kumpanniji jistgħu jnaqqsu l-interessi tas-self tagħhom, anki meta l-fondi hekk mislufa jintużaw sabiex tiġi ffinanzjata CFC.

53.

Il-Qorti tal-Ġustizzja ddeċidiet li “d-determinazzjoni tal-qafas ta’ riferiment għandha importanza ikbar fil-każ ta’ miżuri fiskali peress li l-eżistenza ta’ vantaġġ ekonomiku, fis-sens tal-Artikolu 107(1) TFUE, tista’ tiġi stabbilita biss meta mqabbla ma’ tassazzjoni msejħa ‘normali’” ( 21 ).

54.

Barra minn hekk, huwa “meħtieġ li s-sistema fiskali ordinarja jew [il-qafas] ta’ riferiment applikabbli fl-Istat Membru kkonċernat tkun identifikata b’mod korrett fid-deċiżjoni tal-Kummissjoni u tkun eżaminata mill-qorti adita b’kontestazzjoni dwar din l-identifikazzjoni. Peress li d-determinazzjoni [tal-qafas] ta’ riferiment tikkostitwixxi l-punt tat-tluq tal-eżami komparattiv li għandu jitwettaq fil-kuntest tal-evalwazzjoni tan-natura selettiva, żball imwettaq f’din id-determinazzjoni neċessarjament jivvizzja l-analiżi kollha tal-kundizzjoni dwar in-natura selettiva” ( 22 ).

55.

Għandu jitfakkar ukoll li, skont is-sentenza World Duty Free ( 23 ), “[id]-determinazzjoni tal-kuntest ta’ riferiment, li għandha ssir wara dibattitu kontradittorju mal-Istat Membru kkonċernat, għandha tirriżulta minn eżami oġġettiv tal-kontenut, mir-rabta u mill-effetti konkreti tar-regoli applikabbli skont id-dritt nazzjonali ta’ dan l-Istat. F’dan ir-rigward, is-selettività ta’ miżura fiskali ma tistax tiġi evalwata fid-dawl ta’ qafas ta’ riferiment kkostitwit minn xi dispożizzjonijiet tad-dritt nazzjonali tal-Istat Membru kkonċernat li nħarġu artifiċjalment minn qafas leġiżlattiv iktar wiesa’” (enfasi miżjuda minni).

56.

Konsegwentement, “meta l-miżura fiskali inkwistjoni tkun inseparabbli mis-sistema ġenerali ta’ tassazzjoni tal-Istat Membru kkonċernat, għandu jsir riferiment għal din is-sistema. Min-naħa l-oħra, meta jidher li tali miżura tista’ tiġi sseparata b’mod ċar mill-imsemmija sistema ġenerali [tat-TK], ma jistax jiġi eskluż li l-qafas ta’ riferiment li għandu jittieħed inkunsiderazzjoni jkun iktar limitat minn din is-sistema ġenerali [tat-TK], jew saħansitra li jidentifika ruħu mal-miżura stess, meta din tkun tippreżenta ruħha bħala regola li għandha loġika ġuridika awtonoma u li huwa impossibbli li jiġi identifikat grupp normattiv koerenti barra minn din il-miżura” ( 24 ).

57.

Minn dan isegwi li – qabel ma tevalwa n-natura tal-miżura inkwistjoni u jekk din tikkostitwixxix vantaġġ selettiv – il-Qorti tal-Ġustizzja għandha tivverifika jekk il-qafas ta’ riferiment ġiex iddefinit b’mod korrett. Dan jobbliga lill-Qorti tal-Ġustizzja tistabbilixxi, l-ewwel, il-kriterju li għandu jiġi applikat sabiex jiġi ddeterminat liema interpretazzjoni tad-dritt nazzjonali tipprevali: jekk huwiex dak propost mill-Kummissjoni jew jekk huwiex dak propost mill-Istat Membru. It-tieni, il-Qorti tal-Ġustizzja għandha tevalwa jekk din l-interpretazzjoni prevalenti tistax tiġi miċħuda.

58.

Is-sentenza Fiat (punt 73) ( 25 ) tagħmilha ċara li, “f’oqsma li ma humiex oqsma li fihom id-dritt fiskali tal-Unjoni huwa s-suġġett ta’ armonizzazzjoni, huwa l-Istat Membru kkonċernat li għandu jiddetermina, permezz tal-eżerċizzju tal-kompetenzi tiegħu fil-qasam tat-tassazzjoni diretta u b’osservanza tal-awtonomija fiskali tiegħu, il-karatteristiċi li jikkostitwixxu t-taxxa, li jiddefinixxu, bħala prinċipju, [il-qafas] ta’ riferiment jew is-sistema fiskali ‘normali’, li abbażi tagħha għandha tiġi analizzata l-kundizzjoni dwar in-natura selettiva. Dan japplika b’mod partikolari għad-determinazzjoni tal-bażi tat-taxxa u tal-fatt li jagħti lok għal din it-taxxa” (enfasi miżjuda minni).

59.

Barra minn hekk, fil-ġurisprudenza tagħha, il-Qorti tal-Ġustizzja tirreferi f’dan ir-rigward għall-prinċipju ta’ legalità fiskali, li jagħmel parti mill-ordinament ġuridiku tal-Unjoni bħala prinċipju ġenerali tad-dritt, u jeżiġi li kull obbligu ta’ ħlas ta’ taxxa kif ukoll l-elementi essenzjali kollha li jiddefinixxu l-elementi materjali tiegħu jkunu previsti mil-liġi u li persuna taxxabbli tkun f’pożizzjoni li tipprevedi u tikkalkola l-ammont tat-taxxa dovuta u li tiddetermina l-mument meta din issir dovuta ( 26 ).

60.

Għalhekk huwa ċar mill-ġurisprudenza tal-Qorti tal-Ġustizzja li, fid-determinazzjoni tal-qafas ta’ riferiment għall-applikazzjoni tal-Artikolu 107(1) TFUE għal miżuri fiskali, il-Kummissjoni hija, bħala prinċipju, obbligata taċċetta l-interpretazzjoni tad-dispożizzjonijiet rilevanti tad-dritt nazzjonali mogħtija mill-Istat Membru kkonċernat fil-kuntest tad-dibattitu kontradittorju bejn l-Istat u l-Kummissjoni sa fejn din l-interpretazzjoni tkun kompatibbli mal-formulazzjoni ta’ dawn id-dispożizzjonijiet ( 27 ).

61.

F’dan l-istess sens, infakkar li kemm is-sentenzi Fiat (punt 96) ( 28 ) kif ukoll Engie (punt 44) jindikaw b’mod ċar li l-analiżi tal-Kummissjoni għandha tkun ibbażata fuq prinċipji fiskali li huma espliċiti fid-dritt nazzjonali ( 29 ).

62.

Minn dan isegwi li l-qafas ta’ riferiment għandu jiġi stabbilit fuq il-bażi tad-dritt nazzjonali kif interpretat mill-Istat Membru, li huwa intitolat jiddefinixxi l-għanijiet u l-elementi kostituttivi tal-leġiżlazzjoni fiskali inkwistjoni kif ukoll l-implimentazzjoni prattika ta’ din il-leġiżlazzjoni.

63.

Madankollu, l-interpretazzjoni tal-Istat Membru ma hijiex assoluta. Il-Kummissjoni tista’ titbiegħed minn din l-interpretazzjoni, iżda biss suġġett għall-kundizzjonijiet stabbiliti mill-ġurisprudenza tal-Qorti tal-Ġustizzja. Dan jista’ jkun il-każ, b’mod partikolari, meta l-Kummissjoni tasal sabiex tistabbilixxi li interpretazzjoni oħra tipprevali fil-ġurisprudenza jew fil-prattika amministrattiva ta’ dan l-Istat Membru, meta hija jkollha tibbaża ruħha fuq provi affidabbli u konsistenti li kienu s-suġġett ta’ dibattitu kontradittorju fil-proċedura amministrattiva ( 30 ).

64.

F’sitwazzjoni bħal dik fil-kawża ineżami, fejn l-Istat Membru ma jkollux tali ġurisprudenza jew prattika amministrattiva, jista’ jiġi dedott mill-kundizzjonijiet diskussi iktar ’il fuq li l-interpretazzjoni tal-Kummissjoni tipprevali fuq l-interpretazzjoni tal-Istat Membru biss jekk il-Kummissjoni tkun tista’ tistabbilixxi li din l-aħħar interpretazzjoni hija manifestament inkompatibbli mal-formulazzjoni u mal-għanijiet tad-dispożizzjonijiet nazzjonali inkwistjoni.

65.

Barra minn hekk, l-approċċ adottat mill-Qorti tal-Ġustizzja jfisser li hija l-Kummissjoni li għandha l-oneru tal-prova li turi li l-interpretazzjoni tal-Istat Membru hija manifestament żbaljata u inkompatibbli mal-formulazzjoni u mal-għanijiet tad-dispożizzjonijiet nazzjonali.

66.

L-analiżi tiegħi ser tindirizza l-kwistjoni ċentrali tal-appelli ineżami: ir-regoli dwar iċ-CFC huma l-qafas ta’ riferiment korrett fil-kawża ineżami? Sabiex inwieġeb għal din il-mistoqsija, ser nuża kriterju f’żewġ stadji li, fil-fehma tiegħi, jista’ jiġi dedott mill-ġurisprudenza tal-Qorti tal-Ġustizzja ċċitata iktar ’il fuq ( 31 ). L-ewwel ser nipprova nistabbilixxi jekk ir-regoli dwar iċ-CFC għandhomx loġika ġuridika tagħhom stess ( 32 ) li tiddetermina l-eżistenza tagħhom jew jekk għandhomx jitqiesu bħala parti integrali mis-sistema ġenerali tat-TK. Imbagħad ser neżamina d-dritt nazzjonali billi nindirizza l-kwistjoni dwar jekk l-interpretazzjoni tar-regoli dwar iċ-CFC ipprovduta mir-Renju Unit tikkorrispondix għall-formulazzjoni u l-għanijiet ta’ dan id-dritt nazzjonali, jew jekk il-Kummissjoni rnexxilhiex turi li l-interpretazzjoni tar-Renju Unit hija manifestament inkompatibbli ma’ din il-formulazzjoni u ma’ dawn l-għanijiet ( 33 ).

67.

Fil-punt 82 tas-sentenza appellata, il-Qorti Ġenerali ġustament iddeċidiet li s-sistema taċ-CFC kienet korollarja tas-sistema ġenerali tat-TK.

68.

Madankollu, hija sussegwentement iddeċidiet li “ir-regoli applikabbli għas-CFC huma msejsa fuq loġika differenti minn dik tas-sistema ġenerali tat-taxxa fir-Renju Unit. Din il-loġika hija, ċertament, komplementari jew, hekk kif indikat il-Kummissjoni fil-premessa 105 tad-[deċiżjoni inkwistjoni], korollarja għas-sistema ġenerali tat-taxxa msejsa fuq il-prinċipju ta’ territorjalità, madankollu din hija separabbli minnha”.

69.

Qabel kollox, għandu jiġi rrilevat li, bħala prinċipju, korollarju ma jistax ikun separabbli mill-element prinċipali li, bħala definizzjoni, huwa mistenni li joħroġ minnu u li, konsegwentement, huwa meqjus li jsegwi l-istess loġika. Għaldaqstant, għandu jiġi eżaminat jekk il-kawża ineżami tippreżentax distinzjoni li tiġġustifika devjazzjoni mill-fehma ġenerali, li tippermetti lill-Qorti Ġenerali tikkonkludi li, filwaqt li s-sistema taċ-CFC kienet korollarja tas-sistema ġenerali tat-TK, din kienet ibbażata fuq loġika distinta.

70.

Konsegwentement, ser neżamina jekk ir-regoli dwar iċ-CFC għandhomx skop speċifiku tagħhom stess u elementi kostituttivi u għodod tagħhom stess li jintużaw sabiex jilħqu dan l-għan, sabiex jiġi stabbilit jekk dawn humiex differenti minn dawk tas-sistema ġenerali tat-TK.

71.

F’din it-taqsima, ser nanalizza l-iskop tas-sistema ġenerali tat-TK u tar-regoli dwar iċ-CFC kif ukoll il-kwistjoni dwar jekk ir-regoli dwar iċ-CFC jikkontribwixxux għall-iskop tas-sistema ġenerali tat-TK.

72.

Mill-osservazzjonijiet tar-Renju Unit jirriżulta li l-iskop tas-sistema ġenerali tat-TK u ta’ dak tar-regoli dwar iċ-CFC huwa l-protezzjoni tal-bażi tat-TK tar-Renju Unit mit-tnaqqis tal-bażi tat-taxxa u t-trasferiment tal-profitti (iktar ’il quddiem il-“BEPS”). Fil-fatt, abbażi tal-proġett tal-OECD/G20 BEPS huwa inekwivokabbli li l-iskop tar-regoli dwar iċ-CFC huwa li jiġu evitati kemm t-tnaqqis tal-bażi tat-taxxa kif ukoll it-trasferiment tal-profitti ( 34 ). Għaldaqstant, il-Qorti Ġenerali żbaljat meta ddeċidiet li l-għan tar-regoli dwar iċ-CFC seta’ jkun biss li jiġi miġġieled it-trasferiment tal-profitti fil-forma ta’ ddevjar artifiċjali ta’ profitti mir-Renju Unit ( 35 ).

73.

Kif irrilevaw l-appellanti, sabiex jikkonforma ruħu mas-sentenza Cadbury, ir-Renju Unit ipprova jiffoka biss fuq arranġamenti “purament artifiċjali” ta’ ddevjar ta’ profitti permezz tal-imposta ta’ CFC. F’din is-sentenza, il-Qorti tal-Ġustizzja kienet iddeċidiet li s-sistema preċedenti taċ-CFC tar-Renju Unit kienet tikser il-libertà ta’ stabbiliment. Mill-istess sentenza jirriżulta li kwalunkwe tali ksur jista’ jiġi ġġustifikat biss jekk dan ikun jiffoka fuq il-ħolqien ta’ arranġamenti “purament artifiċjali”, jiġifieri, dawk “bl-għan li tiġi evaża t-taxxa normalment dovuta fuq il-profitti ġġenerati minn attivitajiet magħmula fit-territorju nazzjonali” (punt 55 ta’ din is-sentenza).

74.

Għaldaqstant, kif jispjega r-Renju Unit, il-leġiżlatur nazzjonali ipprova jillimita l-imposta ta’ CFC għal sitwazzjonijiet fejn: (i) iċ-CFC ma kellhom ebda preżenza ekonomika ġenwina fit-territorju barra mill-pajjiż u għaldaqstant ma jikkonformawx mal-hekk imsejjaħ “kriterju tal-post tan-negozju”, jew (ii) ikun hemm evalwazzjoni tar-riskju kkalibrata biżżejjed sabiex tippermetti li l-imposta taċ-CFC tiffoka fuq dik il-parti ta’ profitti ta’ CFC li jimminaw is-sistema tat-taxxa tar-Renju Unit.

75.

Waqt is-seduta, l-appellanti kkonfermaw li l-iskop tar-regoli dwar iċ-CFC huwa doppju: il-ġlieda kontra t-tnaqqis tal-bażi tat-taxxa u t-trasferiment tal-profitti. Ir-Renju Unit indika inter alia l-Kapitolu 7 tal-Parti 9A tat-TIOPA u r-raba’ xenarju tal-Kapitolu 5 tagħha dwar is-self finanzjarju organizzat permezz ta’ entità offshore, li jikkonfermaw li dak li huwa fil-mira ma huwiex biss it-trasferiment tal-profitti, iżda wkoll t-tnaqqis tal-bażi tat-taxxa. Il-Kummissjoni sempliċement insistiet fuq il-fatt li teżisti distinzjoni netta bejn it-tnaqqis tal-bażi tat-taxxa u t-trasferiment tal-profitti u li, fil-fehma tagħha, l-uniku għan essenzjali tar-regoli dwar iċ-CFC kien it-trasferiment tal-profitti, jiġifieri, iddevjar artifiċjali tal-profitti. Inqis li d-dikjarazzjonijiet tal-Kummissjoni ma humiex konvinċenti u, fi kwalunkwe każ, inqishom insuffiċjenti sabiex niċħad l-interpretazzjoni tal-Istat Membru tad-dritt nazzjonali tiegħu.

76.

Minn dan isegwi li r-regoli dwar iċ-CFC u s-sistema ġenerali tat-TK għandhom l-istess skop: li jintaxxaw il-profitti tal-kumpanniji li jagħmlu parti, jew li kienu jkunu jagħmlu parti, mill-bażi tat-TK tar-Renju Unit kieku ma kienx għat-tnaqqis tal-bażi tat-taxxa u t-trasferiment tal-profitti. Fil-fatt, kif tenfasizza ġustament ITV, is-sett ta’ miżuri u ta’ eżenzjonijiet fit-TIOPA jsegwi approċċ olistiku, peress li dawn kollettivament jiffokaw fuq ir-riskju tal-implimentazzjoni ta’ arranġamenti artifiċjali, peress li dawn l-arranġamenti għandhom effett materjali fuq l-integrità tas-sistema ġenerali tat-TK. Il-mezzi li bihom dan ir-riskju huwa indirizzat jiddependu minn ċirkustanzi fattwali li jistgħu jseħħu fil-prattika. Għaldaqstant, il-Parti 9A tat-TIOPA tuża diversi tekniċi leġiżlattivi sabiex timmira biss l-iskemi “purament artifiċjali”, minn naħa, u sabiex tikkontribwixxi għaż-żamma tal-bażi tat-TK, min-naħa l-oħra.

77.

F’dan ir-rigward, nikkunsidra li l-Kapitolu 9, b’mod partikolari, jidher li huwa miżura leġiżlattiva xierqa sabiex jikkomplementa l-iskop tas-sistema ġenerali tat-TK b’mod konformi mad-deċiżjoni tal-Qorti tal-Ġustizzja fis-sentenza Cadbury. Dan il-kapitolu jippermetti għalhekk lil kumpannija tipproduċi provi li juru li s-self ingħata sabiex jiffinanzja attivitajiet kummerċjali ta’ kumpanniji oħra ta’ grupp multinazzjonali minn QLR jew li ma kienx hemm iddevjar ta’ profitti jew inkella taċċetta l-imposta ta’ CFC, li hija bbażata fuq stima mmotivata tal-livell mistenni ta’ kapitalizzazzjoni eċċessiva.

78.

Mill-kunsiderazzjonijiet preċedenti jirriżulta li r-regoli dwar iċ-CFC jikkontribwixxu verament għall-iskop tas-sistema ġenerali tat-TK.

79.

Kif tenfasizza ITV, is-sistema taċ-CFC isservi sabiex tippreżerva l-integrità tas-sistema ġenerali tat-TK billi tinkludi fl-imposta tat-taxxa tar-Renju Unit il-profitti li, filwaqt li ġew magħmula barra mill-pajjiż, ġew iddevjati b’mod artifiċjali lil hinn mir-Renju Unit u li għalhekk għandhom jiġu ttrattati daqslikieku oriġinaw fir-Renju Unit. Mingħajr l-applikazzjoni tar-regoli dwar iċ-CFC, il-fokus territorjali tas-sistema tat-TK tar-Renju Unit x’aktarx jiġi evitat permezz ta’ evażjoni fiskali aggressiva.

80.

Mis-sentenza appellata u mill-osservazzjonijiet tal-partijiet jirriżulta li ma huwiex ikkontestat li – minbarra r-regoli dwar iċ-CFC – is-sistema ġenerali tat-TK kienet tipprovdi, matul il-perijodu mistħarreġ, li t-TK tar-Renju Unit kienet tapplika biss għall-profitti magħmula minn kumpanniji residenti fir-Renju Unit. Fl-istess sens, hija kienet tapplika għal kumpanniji mhux residenti li jeżerċitaw attivitajiet kummerċjali fir-Renju Unit permezz ta’ stabbiliment permanenti jew li jiġġeneraw profitti mit-territorju tar-Renju Unit.

81.

L-appellanti jispjegaw li s-sistema ġenerali tat-TK hija bbażata fuq il-prinċipju bbażat “prinċipalment fuq it-territorjalità”. Dan l-approċċ ifisser li, normalment, gruppi multinazzjonali mhux tar-Renju Unit ma jkunu suġġetti għal ebda regola fiskali tar-Renju Unit ħlief għar-regoli dwar iċ-CFC, jiġifieri, minbarra din l-eċċezzjoni ebda profitti li joriġinaw minn barra l-pajjiż ma jiġu ntaxxati mir-Renju Unit. Għalhekk, ir-regoli dwar iċ-CFC huma eċċezzjoni għall-prinċipju tat-territorjalità, u esklużjoni minn din l-eċċezzjoni (bħal dik fil-Kapitolu 9) ma għandhiex titqies bħala deroga. Mill-analiżi preċedenti jirriżulta li arranġamenti purament artifiċjali jeżistu sabiex jiddevjaw il-profitti u jwettqu tnaqqis tal-bażi tat-taxxa. Konsegwentement, il-kamp ta’ applikazzjoni territorjali tas-sistema ġie aġġustat, skont ir-Renju Unit, sabiex ikun prinċipalment territorjali u s-sistema ġiet ikkomplementata b’eċċezzjoni għall-prinċipju purament territorjali. Din l-eċċezzjoni timmira dawn l-arranġamenti purament artifiċjali u ġġib dawn il-profitti lura fir-Renju Unit “fejn jappartjenu (bħala kunċett)”.

82.

Fil-punt 83 tas-sentenza appellata, il-Qorti Ġenerali wettqet żball meta kkonstatat li r-regoli dwar iċ-CFC ma kinux joperaw bħala eċċezzjoni għas-sistema ġenerali tat-TK. Ir-regoli dwar iċ-CFC jimponu fuq il-kumpanniji tar-Renju Unit imposta ekwivalenti għat-TK tar-Renju Unit minħabba d-dħul li jirriżulta lis-sussidjarji mhux residenti barra mir-Renju Unit (CFC) u kkontabilizzat fir-rapporti finanzjarji taċ-CFC. Kif spjegajt iktar ’il fuq, tali eċċezzjoni għandha l-għan li tindirizza arranġamenti purament artifiċjali. Din l-eċċezzjoni turi għaliex is-sistema tat-TK bħala tali hija bbażata fuq il-prinċipju prinċipalment territorjali.

83.

Madankollu, għandu jiġi nnotat li l-piż fiskali definittiv huwa impost fuq kumpannija, residenti fir-Renju Unit, li hija responsabbli għat-taxxa riżultanti fuq il-profitti ta’ entità ta’ kumpannija differenti, residenti barra mir-Renju Unit.

84.

Minn dan isegwi li l-Qorti Ġenerali fehmet ħażin in-natura prinċipalment territorjali tas-sistema ġenerali tat-TK u pproċediet fuq il-bażi li jiġu ntaxxati biss il-profitti magħmula fir-Renju Unit (ara l-punt 116 tas-sentenza appellata). Din hija klassifikazzjoni żbaljata tal-kamp ta’ applikazzjoni territorjali sottostanti tas-sistema.

85.

Pereżempju, dan l-iżball wassal lill-Qorti Ġenerali sabiex tippreżumi li d-dħul minn attivitajiet fir-Renju Unit li joriġina minn CFC għandu neċessarjament ikun ġie ddevjat b’mod artifiċjali. Din hija konklużjoni żbaljata bbażata fuq premessa żbaljata ( 36 ).

86.

Fil-fatt, huwa preċiżament minħabba n-natura speċifika tar-riskji għall-bażi tat-taxxa kif ġew identifikati mil-leġiżlatur tar-Renju Unit li l-approċċ tat-tassazzjoni prinċipalment territorjali ġie adottat u jinkludi l-eżenzjonijiet inkwistjoni.

87.

Kif ġustament tenfasizza ITV, biex nuża analoġija relatata mas-sajd, il-Parti 9A tat-TIOPA titfa’ xibka wiesgħa, iżda t-toqob fil-malja huma kbar: jinqabdu biss il-ħut rilevanti (ta’ ċertu daqs). Madankollu, it-toqob f’xibka tas-sajd ma jiġux deskritti bħala għodda separata. Pjuttost, huma parti konxja u ddeliberata tax-xibka nnifisha.

88.

Jista’ jiġi konkluż mill-kunsiderazzjonijiet preċedenti li l-kamp ta’ applikazzjoni prinċipalment territorjali tat-TK tar-Renju Unit ifisser li s-sistema fiskali tar-Renju Unit hija intiża sabiex taqbad profitti barranin li jirriżultaw lil kumpanniji barranin biss fejn (i) dawn il-profitti jkunu ġew iddevjati artifiċjalment mill-ġurisdizzjoni tal-grupp ta’ kumpanniji omm tar-Renju Unit, jew (ii) l-arranġamenti jkunu jimminaw is-sistema ġenerali tat-TK b’mod abbużiv. Inkella, tintilef ir-rabta territorjali ta’ tassazzjoni tal-profitti barranin.

89.

Il-Kummissjoni sempliċement issostni li r-Renju Unit ma huwiex f’pożizzjoni li jidentifika xi parti minn din is-sentenza li hija suġġetta għall-konklużjoni tal-Qorti Ġenerali li s-sistema tat-TK tar-Renju Unit hija kompletament, u mhux prinċipalment, territorjali. Hija ssostni li t-talba tar-Renju Unit għandha tiġi ddikjarata ineffettiva. Inqis li l-argumenti ta’ din l-istituzzjoni huma insuffiċjenti biex juru li l-interpretazzjoni tar-Renju Unit hija manifestament inkonsistenti mal-formulazzjoni u mal-għanijiet tad-dritt nazzjonali tiegħu.

90.

Minn dan isegwi li l-għan u l-għodod magħżula tar-regoli dwar iċ-CFC huma r-raġuni essenzjali li għaliha s-sistema ġenerali tat-TK kollha kemm hi titqies li għandha kamp ta’ applikazzjoni prinċipalment territorjali.

91.

Kif enfasizza l-Avukat Ġenerali Wahl f’Andres ( 37 ), jista’ jiġi dedott mill-ġurisprudenza li, f’kawżi bħal din ineżami, il-Qorti tal-Ġustizzja approvat approċċ li jfittex li jidentifika r-regoli kollha li jinfluwenzaw il-piż fiskali fuq l-impriżi. Tali approċċ jiżgura li s-selettività ta’ miżura fiskali tiġi evalwata fid-dawl ta’ qafas li jinkludi d-dispożizzjonijiet rilevanti kollha, u mhux fid-dawl ta’ dispożizzjonijiet li ġew artifiċjalment isseparati minn qafas leġiżlattiv usa’.

92.

Mis-sentenza tal-Qorti tal-Ġustizzja fl-istess kawża jirriżulta li l-kuntest ta’ riferiment ma għandux ikun regola li tikkostitwixxi eċċezzjoni għar-regola ġenerali, meta l-evalwazzjoni tal-kontenut kollu tad-dispożizzjonijiet kollha jippermetti li jiġi konkluż li l-miżura fiskali inkwistjoni kienet tiddefinixxi sitwazzjoni li kienet taqa’ taħt ir-regola ġenerali. Il-Qorti tal-Ġustizzja ddeċidiet li “s-selettività ta’ miżura fiskali ma tistax tiġi ġustament evalwata fid-dawl tal-kuntest ta’ referenza ikkostitwit minn xi dispożizzjonijiet li ġew artifiċjalment estratti minn qafas leġiżlattiv usa’” ( 38 ).

93.

Fil-kawża ineżami, il-Qorti Ġenerali kkonkludiet li l-qafas ta’ riferiment kien ekwiparat għar-regoli dwar iċ-CFC, li, kif urejt iktar ’il fuq, huma eċċezzjoni għat-tassazzjoni territorjali sa fejn dawn jimponu l-imposta ta’ CFC fuq profitti li ma kinux ikunu taxxabbli skont is-sistema ġenerali tat-TK.

94.

Jiena nqis li, fid-dawl tal-ġurisprudenza Andres iċċitata iktar ’il fuq, regoli li jintroduċu tali eċċezzjoni ma jistgħux jikkostitwixxu l-qafas ta’ riferiment korrett.

95.

Barra minn hekk, ir-regoli dwar iċ-CFC ma jistgħux jiġu kkunsidrati bħala separabbli mis-sistema ġenerali tat-TK, għaliex inkella – billi tingħata importanza eċċessiva lit-teknika leġiżlattiva użata mill-Istat inkwistjoni – ikun jinqasam artifiċjalment il-piż fiskali fuq l-entità residenti fir-Renju Unit. Dan huwa preċiżament dak li għamlet il-Qorti Ġenerali fis-sentenza appellata, iżda dan imur kontra l-ġurisprudenza tal-Qorti tal-Ġustizzja ( 39 ).

96.

Il-konklużjonijiet tiegħi iktar ’il fuq dwar il-qafas ta’ riferiment ma humiex invalidati mill-allegati distinzjonijiet dwar l-elementi prinċipali tar-regoli ta’ tassazzjoni tal-kumpanniji fir-Renju Unit li l-Qorti Ġenerali qajmet fil-punti 85 sa 88 tas-sentenza appellata.

97.

L-ewwel nett, fir-rigward tal-punt 85 tas-sentenza appellata (bażi tat-taxxa), kif jenfasizza r-Renju Unit, il-Qorti Ġenerali tfittex b’mod żbaljat li tiddistingwi bejn il-profitti magħmula fir-Renju Unit u l-profitti li ġew iddevjati b’mod artifiċjali lil hinn mir-Renju Unit – sabiex tittrattahom bħala bażijiet tat-taxxa differenti. Dan jiżnatura l-kunċett ta’ “bażi tat-taxxa” f’dan il-kuntest. Il-Glossarju tal-OECD jiddefinixxi t-terminu “bażi tat-taxxa” (jew “bażi taxxabbli”) bħala “l-oġġett jew l-ammont li fuqu tiġi applikata r-rata tat-taxxa, pereżempju d-dħul tal-kumpanniji, id-dħul personali, il-proprjetà immobbli” [traduzzjoni libera] ( 40 ). Jiġifieri, dan it-terminu jirreferi għall-oġġett jew għall-ammont suġġett għat-tassazzjoni, kemm jekk jikkonsisti fi “qligħ”, “bejgħ” (fil-każ ta’ taxxa ġenerali fuq il-bejgħ) jew “valur miżjud” (fil-każ tat-taxxa fuq il-valur miżjud) jew “assi” (fil-każ ta’ taxxa fuq il-kapital bħat-taxxa fuq il-patrimonju jew it-taxxa tas-suċċessjoni). Kuntrarjament għal dak li ssuġġerixxiet il-Qorti Ġenerali, l-imposta ta’ CFC fir-Renju Unit u l-imposta ġenerali tat-TK japplikaw it-tnejn għall-istess bażi tat-taxxa: il-profitti tal-kumpanniji.

98.

Il-Qorti Ġenerali rraġunat li l-leġiżlazzjoni dwar iċ-CFC tkun tikkostitwixxi ġabra distinta ta’ regoli jekk il-bażi tat-taxxa tkun differenti, qabel ma ddefinixxiet din il-bażi tat-taxxa distinta bħala l-profitti ta’ kumpanniji ta’ CFC li huma taxxabbli skont ir-regoli dwar iċ-CFC. Dan jinjora l-fatt li kemm l-imposta ġenerali fuq it-TK kif ukoll l-imposta ta’ CFC japplikaw għall-istess tip ta’ bażi tat-taxxa bħall-profitti tal-kumpanniji taxxabbli, u dawn il-profitti huma kkalkolati skont l-istess regoli bħal dawk applikabbli għaċ-CFC u għall-kumpanniji residenti fir-Renju Unit.

99.

It-tieni nett, dwar il-punt 86 tas-sentenza appellata (persuna taxxabbli), jiena nirrileva li l-imposta ta’ CFC hija attribwita lill-kumpanniji omm stabbiliti fir-Renju Unit, jiġifieri kumpanniji suġġetti għat-TK fir-Renju Unit. Huwa minnu li, kif issostni l-Kummissjoni, dawn huma subtaqsima tal-kumpanniji stabbiliti fir-Renju Unit, peress li mhux kollha neċessarjament għandhom CFC li l-profitti tagħhom jiskattaw imposta ta’ CFC. Madankollu, jibqa’ l-fatt li, fi ħdan din is-subtaqsima, l-istess kumpanniji għandhom iħallsu kemm it-TK u l-imposta ta’ CFC. Il-persuna taxxabbli hija l-istess fiż-żewġ ċirkustanzi: skont is-sistema ġenerali tat-TK, it-taxxa hija imposta fuq il-kumpanniji residenti fir-Renju Unit u, skont ir-regoli dwar iċ-CFC, it-taxxa hija wkoll imposta fuq il-kumpanniji residenti fir-Renju Unit li lilhom huma attribwiti l-profitti taċ-CFC tagħhom.

100.

F’dan ir-rigward, l-argumenti tal-Kummissjoni jirriproduċu l-qofol tal-analiżi żbaljata tal-Qorti Ġenerali. Il-Kummissjoni tibbaża ruħha fuq ir-raġunament tal-Qorti Ġenerali li skontu l-kumpanniji suġġetti għat-taxxa fuq il-profitti taċ-CFC huma – bħala prinċipju – differenti minn dawk li ma humiex. Dan sempliċement jidentifika li sistema intiża għall-profitti ta’ CFC qiegħda tintaxxa l-profitti ta’ CFC. Dan jinjora l-punt essenzjali, jiġifieri li l-“persuna taxxabbli” responsabbli għall-ħlas tat-taxxa (kemm taħt is-sistema ġenerali tat-TK u s-sistema taċ-CFC) tibqa’ l-kumpannija residenti fir-Renju Unit.

101.

It-tielet nett, fir-rigward tal-punt 87 tas-sentenza appellata (fatt taxxabbli), il-Qorti Ġenerali kkonstatat li t-tassazzjoni ta’ imposta ta’ CFC (skont ir-regoli dwar iċ-CFC) tirriżulta meta ċ-CFC jagħmlu profitti barra mir-Renju Unit u jitqiesu li joriġinaw minn arranġamenti artifiċjali jew minn iddevjar ta’ riżorsi jew ta’ profitti li kellhom jiġu ntaxxati fir-Renju Unit u (fil-każ tat-TK tar-Renju Unit) it-twettiq ta’ profitti fir-Renju Unit huwa fatt taxxabbli differenti. Din hija distorsjoni tal-kunċett ta’ “fatt taxxabbli”. Kif jirrileva r-Renju Unit, taħt is-sistema ġenerali tat-TK u r-regoli dwar iċ-CFC, l-avveniment li jagħti lok għall-issuġġettar ta’ persuna għat-taxxa huwa t-twettiq ta’ profitti. Il-Kummissjoni ma tat l-ebda tweġiba dwar dan il-punt.

102.

Huwa irrilevanti jekk dawn il-profitti jirriżultawx minn kumpannija omm tar-Renju Unit jew miċ-CFC: l-istess regoli japplikaw sabiex jiġi ddeterminat il-mument li fih jirriżultaw il-profitti (pereżempju, l-applikazzjoni tar-rikonoxximent tal-profitti fil-kontijiet). Ebda profitti ma jirriżultaw sempliċement mill-konklużjoni ta’ arranġamenti artifiċjali jew mid-devjazzjoni ta’ riżorsi jew profitti mir-Renju Unit. Kif jenfasizza r-Renju Unit, il-profitti jirriżultaw – kemm taħt is-sistema ġenerali tat-TK kif ukoll taħt ir-regoli dwar iċ-CFC – meta dawn il-profitti jiġu magħmula u rrikonoxxuti għal finijiet tat-taxxa; japplikaw regoli identiċi għad-determinazzjoni tal-mument li fih ikunu rriżultaw dawn il-profitti.

103.

Finalment, il-punt 88 tas-sentenza appellata (rata tat-taxxa) jirrileva li r-rata tat-taxxa applikabbli għall-imposta ta’ CFC hija l-istess bħal dik prevista mis-sistema ġenerali tat-TK. Dan kellu jwassal lill-Qorti Ġenerali sabiex tikkonferma li mill-inqas element wieħed mir-regoli dwar iċ-CFC kien l-istess bħas-sistema ġenerali tat-TK. Minflok, il-punt 88 ikompli billi jirreferi għas-sitwazzjoni li fiha jeżistu “iktar min rata waħda applikabbli” u fejn il-medja ta’ dawn ir-rati hija applikata għall-profitti ta’ CFC ( 41 ). L-istess punt jikkonkludi li l-imposta ta’ CFC hija ddeterminata minn kalkolu speċifiku li jinvolvi l-kalkolu tal-medja ta’ diversi rati tat-taxxa.

104.

Kif isostni ġustament ir-Renju Unit, meta l-Qorti Ġenerali kkonkludiet li jeżisti kalkolu ppersonalizzat fir-rigward tal-imposta ta’ CFC li huwa sostanzjalment differenti mill-approċċ adottat f’A. 8(5) tal-Corporation Tax Act 2009 (l-Att dwar it-Taxxa fuq il-Kumpanniji, iktar ’il quddiem is-“CTA 2009”), hija wettqet żball. Fil-fatt, l-A. 371BC u l-A. 8(5) huma maħsuba sabiex jagħtu lok għal imposta fiskali ekwivalenti għal kull perijodu ta’ kontabbiltà individwali, iżda huma jipproduċu din l-imposta fiskali permezz ta’ rotot kemxejn differenti.

105.

Minn dan isegwi li l-elementi prinċipali tas-sistema fiskali inkwistjoni (il-bażi tat-taxxa, il-persuna taxxabbli, il-fatt taxxabbli u r-rata tat-taxxa) jikkonfermaw li s-sistema ġenerali tat-TK u r-regoli dwar iċ-CFC joħolqu flimkien sett koerenti ta’ regoli ( 42 ), b’tali mod li l-qafas ta’ riferiment korrett huwa s-sistema ġenerali tat-TK u mhux ir-regoli dwar iċ-CFC.

106.

L-appellanti jsostnu li, kuntrarjament għal dak li ddeċidiet il-Qorti Ġenerali, ir-regoli dwar iċ-CFC ma jistgħux jiġu sseparati mis-sistema ġenerali tat-TK, peress li, skont il-formulazzjoni użata fl-osservazzjonijiet bil-miktub tar-Renju Unit u ta’ ITV, dawn jikkostitwixxu eċċezzjoni għall-prinċipju ta’ territorjalità li fil-biċċa l-kbira jikkaratterizza din is-sistema jew, skont il-formulazzjoni użata minn LSEGH, rimedju inseparabbli minn din is-sistema, u li huwa intiż sabiex jipproteġi l-bażi tat-TK tar-Renju Unit minn abbużi li jinvolvu ċ-CFC.

107.

Kif isostni ġustament ir-Renju Unit, fid-determinazzjoni tal-qafas ta’ riferiment, il-Qorti Ġenerali ma ħaditx inkunsiderazzjoni l-punt sa fejn ir-regoli dwar iċ-CFC huma ispirati u jagħmlu parti mil-leġiżlazzjoni iktar wiesgħa tat-TK.

108.

Sa minn l-A. 371AA(12) tal-Parti 9A tat-TIOPA, huwa jindika b’mod ċar li l-leġiżlazzjoni dwar iċ-CFC tagħmel parti mil-liġijiet li jirrigwardaw l-Atti dwar it-Taxxa fuq il-Kumpanniji.

109.

It-teknika tal-abbozzar użata mil-leġiżlatur tikkonferma li l-intenzjoni kienet li r-regoli dwar iċ-CFC u s-sistema ġenerali tat-TK jintużaw flimkien. Fil-fatt, hemm diversi riferimenti għad-dispożizzjonijiet taċ-CTA 2009 u 2010 fil-Parti 9A ( 43 ). Hemm iktar minn 80 referiment għad-dispożizzjonijiet taċ-CTA fil-leġiżlazzjoni tal‑2013 dwar iċ-CFC ( 44 ). Anki d-definizzjoni ta’ QLR hija bbażata fuq id-definizzjoni ta’ “relazzjonijiet ta’ self” fl-A. 302(1) taċ-CTA 2009 ( 45 ).

110.

Minn dan isegwi li, anki strutturalment, il-Parti 9A tat-TIOPA tagħmel parti mil-leġiżlazzjoni tar-Renju Unit dwar it-TK, u ma tistax tikkostitwixxi hija stess qafas ta’ riferiment awtonomu. Il-punt 68 tas-sentenza appellata jistabbilixxi ġustament: “[meta] l-miżura fiskali inkwistjoni tkun inseparabbli mis-sistema ġenerali tat-taxxa tal-Istat Membru kkonċernat, għandu jsir riferiment għal din is-sistema” u, fil-fatt, il-Parti 9A hija inseparabbli mis-sistema ġenerali tat-TK.

111.

Minn dan isegwi li l-istruttura tad-dritt nazzjonali u t-teknika tal-abbozzar jikkonfermaw ukoll li s-sistema ġenerali tat-TK u r-regoli dwar iċ-CFC huma marbuta u li dawn ir-regoli ma jistgħux jiġu sseparati minn din is-sistema.

112.

Kif tikkonferma d-duttrina, “il-pożizzjoni li ma hemmx differenza bejn ir-regoli dwar iċ-CFC u dispożizzjonijiet oħra tas-sistema tat-taxxa fuq il-kumpanniji tar-Renju Unit li tiddelimita dak li jaqa’ fix-xibka tat-taxxa fuq il-kumpanniji tar-Renju Unit tidher pjuttost konvinċenti. Minkejja l-fatt li s-sistema taċ-CFC hija magħmula minn sett sħiħ ta’ regoli distinti mis-sistema ġenerali tat-taxxa fuq il-kumpanniji tar-Renju Unit, il-Parti 9A [tat-TIOPA] hija b’mod ċar komplementarja, fil-prinċipju, għall-approċċ territorjali tal-[Att dwar it-Taxxa fuq il-Kumpanniji]. Għaldaqstant, is-sistema taċ-CFC tista’ tinftiehem b’mod sħiħ biss jekk wieħed jikkunsidra s-sistema tat-taxxa fuq il-kumpanniji tar-Renju Unit fl-intier tagħha pjuttost milli meta tiġi kkunsidrata waħedha” [traduzzjoni libera] ( 46 ).

113.

Ir-regoli dwar iċ-CFC għandhom, fil-fehma tiegħi, jitqiesu bħala estensjoni tas-sistema ġenerali tat-TK. Konsegwentement, ikun żbaljat u artifiċjali li tali estensjoni tkun separabbli minn din is-sistema u jkun kuntrarju għas-sentenza World Duty Free (ara l-punt 55 ta’ dawn il-konklużjonijiet).

114.

Il-Qorti Ġenerali għalhekk wettqet żball meta sseparat sett ta’ regoli partikolari (ir-regoli dwar iċ-CFC) mill-qafas leġiżlattiv usa’ tagħhom (is-sistema ġenerali tat-TK), kuntrarjament għall-prinċipji stabbiliti b’mod preċiż fil-punt 68 tas-sentenza appellata.

115.

Minn dan isegwi li r-regoli dwar iċ-CFC għandhom, bħala prinċipju, jiġu kklassifikati bħala li jagħmlu parti mis-sistema ġenerali tat-TK, u li l-Qorti Ġenerali wettqet żball ta’ liġi meta ddeċidiet il-kuntrarju. Barra minn hekk, il-Kummissjoni ma wrietx li tali klassifikazzjoni, ipprovduta mill-Istat Membru, hija manifestament inkompatibbli mal-għan (l-effetti speċifiċi), l-elementi kostituttivi (il-kontenut) u l-istruttura tar-regoli dwar iċ-CFC u s-sistema ġenerali tat-TK ( 47 ). Issa jeħtieġ li ngħaddi għall-istadju li jmiss tal-analiżi tiegħi, li jikkonsisti fid-dħul fid-dettall u fl-analiżi tal-kontenut tad-dispożizzjonijiet speċifiċi tal-leġiżlazzjoni nazzjonali inkwistjoni. Dan jinvolvi l-verifika dwar jekk l-interpretazzjoni tal-formulazzjoni tad-dispożizzjonijiet individwali rilevanti tad-dritt nazzjonali proposta mill-Istat Membru inkwistjoni twassalx għal interpretazzjoni manifestament inkompatibbli ma’ dawn id-dispożizzjonijiet ( 48 ).

116.

Mill-ġurisprudenza tal-Qorti tal-Ġustizzja jirriżulta, kif fakkart fil-punt 60 ta’ dawn il-konklużjonijiet, li, bħala prinċipju, hija l-interpretazzjoni minn Stat Membru tad-dritt nazzjonali tiegħu li tiddetermina l-qafas ta’ riferiment għall-finijiet tal-evalwazzjoni tas-selettività tal-miżura inkwistjoni.

117.

Peress li l-Qorti Ġenerali minflok ikkonfermat l-interpretazzjoni tad-dritt nazzjonali adottata mill-Kummissjoni fid-deċiżjoni inkwistjoni, għandu jiġi vverifikat jekk l-interpretazzjoni tal-Istat Membru tad-dispożizzjonijiet nazzjonali rilevanti, kif sostnuta fl-appell tar-Renju Unit u appoġġjata fis-sottomissjonijiet ta’ ITV u ta’ LSEGH, hijiex effettivament inkompatibbli mal-formulazzjoni ta’ dawn id-dispożizzjonijiet.

118.

L-A. 371BB tal-Kapitolu 2 tal-Parti 9A tat-TIOPA jistabbilixxi r-regola bażika sabiex jiġi ddeterminat liema profitti huma suġġetti għall-imposta ta’ CFC.

119.

L-A. 371BB jindika, l-ewwel, fis-subartikolu 1 tiegħu, liema stadji għandhom jiġu segwiti sabiex jiġi ddeterminat jekk u, jekk ikun il-każ, liema mill-Kapitoli 4 sa 8 japplikaw għall-profitti ta’ CFC (Stadju 1 tal-A. 371BB).

120.

Sussegwentement, huwa jistabbilixxi l-limitu sa fejn il-profitti jaqgħu taħt wieħed minn dawn il-kapitoli (Stadju 2 tal-A. 371BB) u jipprevedi, fis-subartikolu 2 tiegħu, li s-subartikolu 1 huwa “suġġett għal”inter alia l-Kapitolu 9.

121.

Meta r-Renju Unit isostni li r-riferiment għall-Kapitolu 9 fis-subartikolu 2 jikkostitwixxi dispożizzjoni indikattiva u mhux waħda operattiva, dan ma jikkontradixxix il-formulazzjoni tas-subartikolu 2. Fil-fatt, hija sempliċement tiġbed l-attenzjoni tal-persuna taxxabbli għall-fatt li l-Kapitolu 9 jista’ jaffettwa l-applikazzjoni tas-subartikolu 1, iżda ma hijiex suffiċjenti fiha nnifisha sabiex tintaxxa kwalunkwe NTFP permezz tal-Istadju 2.

122.

Is-subartikoli 1 u 2, moqrija flimkien, ma jidhrux li huma inkompatibbli mal-interpretazzjoni tar-Renju Unit dwar kif jopera l-Kapitolu 9 fis-sistema taċ-CFC: ir-Renju Unit isostni li, meta l-profitti jissodisfaw il-kriterji tal-Kapitolu 9, dawn ma jiġux eżaminati fil-kuntest tal-kapitoli l-oħra tal-Parti 9A tat-TIOPA. Għaldaqstant, ladarba japplika l-Kapitolu 9, ma huwiex meħtieġ li jiġi vverifikat jekk il-profitti jaqgħux ukoll taħt wieħed mill-kriterji tal-Kapitolu 5, peress li, irrispettivament minn jekk dan huwiex il-każ, dawn il-profitti ser jiġu ntaxxati skont ir-regoli tal-Kapitolu 9.

123.

Meta l-A. 371BB jinqara fil-kuntest tal-Parti 9A tat-TIOPA, l-interpretazzjoni pprovduta minn ITV u LSEGH hija plawżibbli u ma tikkontradixxix it-test attwali tal-Parti 9A tat-TIOPA. Fil-fatt, dawn il-partijiet isostnu li l-Kapitolu 9 jista’ jiġi applikat, fuq talba tal-kumpannija taxxabbli kkonċernata, mingħajr ma l-ewwel jittieħed inkunsiderazzjoni l-Kapitolu 5, u għalhekk mingħajr ma huwa neċessarju li jiġi stabbilit jekk in-NTFP taċ-CFC li jirriżultaw minn QLR (u li għalhekk jaqgħu taħt il-Kapitolu 9) jissodisfawx il-kriterji tal-Kapitolu 5.

124.

Barra minn hekk, ingħata eżempju ta’ tali interpretazzjoni fil-Manwal tal-HMRC ( 49 ), li jipprovdi l-eżempju li ġej fir-rigward tal-A. 371BB: “L-[NTFP] segwenti jirriżultaw f’perijodu ta’ kontabbiltà għal CFC[:] 10 miljun lira sterlina (GBP) minn self A li huwa QLR[;] GBP 20 miljun minn self B li huwa QLR[;] u] GBP 15‑il miljun li huwa tqassim mhux eżentat. Issir talba għall-applikazzjoni tal-Kapitolu 9, filwaqt li jiġi ppreċiżat li [l-A.] 371IB (l-eżenzjoni totali) għandu japplika għall-profitti tas-self A, bl-eżenzjoni ta’ 90 % tal-[NTFP] minn dan is-self. [L-A.] 371ID (75 % eżenzjoni) japplika għal self B. Bħala riżultat tat-talba, profitti ta’ GBP 6 miljun jgħaddu mill-gateway ta’ imposta ta’ CFC skont il-Kapitolu 9 (GBP 1 miljun minn self A u GBP 5 miljun minn self B); il-bqija tal-profitti ta’ GBP 15‑il miljun ma jgħaddux mill-gateway ta’ imposta ta’ CFC skont il-Kapitolu 9 peress li t-tqassim mhux eżentat ta’ profitti ma jaqax taħt l-[A.] 302(1) taċ-CTA 2009. Minflok, it-tqassim mhux eżentat ta’ GBP 15‑il miljun jgħaddu mill-gateway ta’ imposta ta’ CFC skont il-Kapitolu 5 (fuq l-ipoteżi għall-finijiet ta’ dan l-eżempju, li l-profitti jaqgħu taħt il-Kapitolu 5)” (enfasi miżjuda minni).

125.

Fil-fehma tiegħi, id-dispożizzjonijiet tal-A. 371BB isostnu l-pożizzjoni tar-Renju Unit, li skontha, meta japplika wieħed mit-tliet GFE (kundizzjonijiet tal-Kapitolu 9), ma huwiex neċessarju li jiġi kkunsidrat il-Kapitolu 5. Il-Kapitolu 3 (A. 371CB(1) u (8) ( 50 )) jagħmilha ċara li l-Kapitolu 9 jista’ jiġi applikat mingħajr ma jiġi kkunsidrat il-Kapitolu 5 ( 51 ).

126.

Il-Kummissjoni tinsisti essenzjalment li l-Qorti Ġenerali ġustament ikkonkludiet li n-NTFP li għalihom tapplika l-imposta ta’ CFC fuq il-bażi tal-Kapitolu 5 (jew permezz tal-kriterji tal-FPS tar-Renju Unit jew il-kriterju tal-kapital konness mar-Renju Unit) jikkostitwixxu profitti li ġew iddevjati b’mod artifiċjali lil hinn mir-Renju Unit fis-sens tar-regoli taċ-CFC u l-Kapitolu 9 jaġixxi bħala eżenzjoni (parzjali) għal NTFP li jirriżultaw minn QLR li għalihom kienet tkun applikabbli l-imposta ta’ CFC skont il-Kapitolu 5. L-ebda wieħed mill-argumenti tal-Kummissjoni ma jistabbilixxi li l-interpretazzjoni tar-Renju Unit tad-dispożizzjonijiet tal-A. 371BB hija manifestament żbaljata.

127.

L-A. 371CB tal-Kapitolu 3 jistabbilixxi ċ-ċirkustanzi li fihom jiġi applikat il-Kapitolu 5. Huwa jipprevedi – suġġett għal ċerti eċċezzjonijiet iddefiniti – li l-Kapitolu 5 japplika għan-NTFP iġġenerati minn CFC f’perijodu ta’ kontabbiltà stabbilit. L-A. 371CB(8) jipprevedi li, “fil-każ ta’ kumpannija taxxabbli li tressaq talba skont il-Kapitolu 9, f’dan l-artikolu u fil-Kapitolu 5, ir-riferimenti għall-[NTFP] taċ-CFC jirreferu għal dawk il-profitti li jeskludu wkoll il-profitti [QLR] taċ-CFC (kif iddefiniti fil-Kapitolu 9)” (enfasi miżjuda minni).

128.

Il-qari ta’ din id-dispożizzjoni huwa konsistenti mal-interpretazzjoni tar-Renju Unit li l-leġiżlazzjoni tiddefinixxi l-eżenzjonijiet fl-A. 371CB(2), (3) u (4) kif ukoll fil-Kapitolu 5. Sussegwentement, il-preżenza tal-avverbju “wkoll” f’A. 371CB(8) tippermetti l-interpretazzjoni li l-eżenzjonijiet fil-Kapitolu 9 joperaw b’żieda ma’ eżenzjonijiet oħra f’A. 371CB u fil-Kapitolu 5.

129.

Huwa għalhekk plawżibbli li l-A. 371CB(1) u (8) jiġu interpretati fis-sens li l-Kapitolu 9 jista’ jiġi applikat mingħajr ma jiġi kkunsidrat il-Kapitolu 5 ( 52 ). L-appellanti jsostnu li l-A. 371CB(8) huwa dispożizzjoni operattiva ċentrali, li tipprevedi li, fil-każ ta’ talba, il-Kapitolu 9 japplika minflok il-Kapitolu 5, u li l-Kapitoli 3 u 9, moqrija flimkien, jipprevedu metodu alternattiv ta’ kalkolu tal-ammont tan-NTFP li, fil-każ ta’ QLR, ikunu taxxabbli. Jekk ikun hemm NTFP, il-Kapitolu 9 jiġi kkunsidrat l-ewwel, u huwa b’mod sussidjarju biss li kwalunkwe NTFP residwu mhux inklużi fil-profitti tal-QLR jiġu kkunsidrati taħt l-Artikolu 5. Jidhirli li tali interpretazzjoni hija konsistenti mal-formulazzjoni tad-dispożizzjonijiet inkwistjoni.

130.

Barra minn hekk, ITV enfasizzat li l-Kapitolu 9 jservi sabiex jiddefinixxi n-natura u l-portata tal-profitti rilevanti li jaqgħu fil-gateway tal-Kapitolu 5 in limine. Għaldaqstant, jista’ jiġi sostnut li l-Kapitolu 9 ma jissostitwixxix id-dispożizzjonijiet li kieku kienu japplikaw.

131.

Il-Kummissjoni tirrikonoxxi li l-Kapitoli 5 u 9 huma metodi alternattivi għad-determinazzjoni tal-profitti taxxabbli. Madankollu, il-Kummissjoni tinsisti fuq il-fatt li ma jsegwix li dawn il-kapitoli jikkostitwixxu huma stess alternattivi għall-identifikazzjoni tan-NTFP li huma suġġetti għal imposta taxxabbli. Madankollu, minn tali qari ma jirriżultax li l-interpretazzjoni tal-Istat Membru hija manifestament inkompatibbli mal-formulazzjoni attwali tad-dispożizzjonijiet nazzjonali.

132.

L-A. 371EA(1) tal-Kapitolu 5 jipprevedi li, għall-għanijiet tal-Istadju 2 tal-A. 371BB(1), il-profitti ta’ CFC li jaqgħu taħt dan il-kapitolu huma n-NTFP tagħha sa fejn dawn jissodisfaw il-kriterji ta’ dan il-kapitolu. L-A. 371EA(2) jindika li “r-referenzi għall-[NTFP] taċ-CFC għandhom jinqraw skont [l-A.] 371CB(2) u, sa fejn applikabbli, [l-A.] 371CB(8)”.

133.

Kif jenfasizzaw ir-Renju Unit u ITV, il-fatt li l-A. 371EA(2) tal-Kapitolu 5 jirreferi għall-A. 371CB(8) tal-Kapitolu 3 jfisser, kif spjegajt iktar ’il fuq, li, jekk ikun hemm NTFP, il-Kapitolu 9 għandu jiġi kkunsidrat l-ewwel, u huma biss kwalunkwe NTFP residwu mhux inklużi fil-profitti QLR li mbagħad jittieħdu inkunsiderazzjoni skont il-Kapitolu 5. Fil-fehma tiegħi, tali interpretazzjoni hija konsistenti u plawżibbli.

134.

Il-Kapitolu 5 (l-A. 371EA (2)) jirrikjedi li r-riferimenti għan-NTFP jinqraw skont l-A. 371CB(2) u (8). Sussegwentement, l-A. 371CB(8) jeżiġi li riferiment għan-NTFP fil-Kapitolu 5 għandu jiġi ttrattat bħala li jeskludi l-profitti li jirriżultaw minn QLR li huma s-suġġett ta’ talba skont il-Kapitolu 9 (kif spjegajt fil-punt preċedenti).

135.

Fil-fehma tiegħi, bir-riferiment għall-A. 371CB(8), l-A. 371EA – li, skont it-titolu tiegħu, jikkostitwixxi r-“regola bażika” tal-Kapitolu 5 u li huwa ddedikat għan-NTFP taċ-CFC – jissuġġetta l-applikazzjoni tal-kriterji ta’ dan il-kapitolu għall-fatt li n-NTFP inkwistjoni ma jkunux jaqgħu taħt il-Kapitolu 9.

136.

Għaldaqstant, din l-evalwazzjoni ma tirrendix l-interpretazzjoni sostnuta mir-Renju Unit inkompatibbli mal-formulazzjoni tad-dispożizzjonijiet nazzjonali.

137.

Il-Kummissjoni tinterpreta b’mod żbaljat il-kliem tal-A. 371EA(2) li, kif analizzajt iktar ’il fuq, jindikaw li r-riferimenti għan-NTFP fil-Kapitolu 5 għandhom jinqraw bla ħsara għall-kliem tal-A. 371CB (8) fejn dan l-artikolu ikun applikabbli.

138.

Fir-replika tagħha, il-Kummissjoni ssostni li mill-A. 371IA(1) jirriżulta li l-Kapitolu 9 japplika għan-NTFP li jirriżultaw minn QLR li kieku altrimenti kienu jkunu suġġetti għal imposta skont il-Kapitolu 5. Kuntrarjament għal dan l-argument, il-formulazzjoni tal-A. 371EA ma tistax tiġi interpretatat b’mod inekwivoku bħala li tfisser li l-istess profitti jistgħu jaqgħu kemm taħt il-Kapitolu 5 u l-Kapitolu 9 fl-istess ħin.

139.

Mill-kunsiderazzjonijiet preċedenti jirriżulta li xejn mill-formulazzjoni u mill-kuntest tal-A. 371EA ma jindika li l-Istat Membru ressaq interpretazzjoni manifestament inkompatibbli tad-dispożizzjoni inkwistjoni li turi li l-interpretazzjoni ssuġġerita mill-Kummissjoni tirriżulta b’mod inekwivoku mill-formulazzjoni tad-dispożizzjoni rilevanti.

140.

Il-formulazzjoni tal-A. 371IA(1) sa (3) tal-Kapitolu 9 tiddeskrivi l-mekkaniżmu li bih kumpannija tista’ tressaq ilment skont il-Kapitolu 9 u tillimita l-applikazzjoni tal-Kapitolu 9 għan-NTFP ta’ dik il-kumpannija li jirriżultaw minn QLR.

141.

L-ewwel, is-subartikolu 1 tal-A. 371IA jipprevedi li “dan il-Kapitolu japplika jekk[:] bl-eċċezzjoni ta’ dan il-Kapitolu, jkun japplika l-Kapitolu 5 ([NTFP])” għall-profitti ta’ CFC. Is-subartikolu 2 tiegħu jistabbilixxi li “kumpannija taxxabbli […] tista’ tressaq talba […] għall-istadju 2 tal-[A.] 371BB(1) (il-gateway tal-imposta ta’ CFC) […] suġġett għal dan il-Kapitolu”. Finalment, is-subartikolu 3 jistabbilixxi li, “jekk [din] il-kumpannija tressaq […] ilment, il-profitti taċ-CFC [minn QLR] jiġu suġġetti għall-imposta ta’ CFC sakemm (u biss sakemm) ma jkunux eżentati skont dan il-Kapitolu”.

142.

Skont ir-Renju Unit, il-formulazzjoni “bl-eċċezzjoni ta’ dan il-Kapitolu, jkun japplika l-Kapitolu 5 ([NTFP])” fl-A. 371IA(1)(a) ma jfissirx li tirriżulta imposta taxxabbli skont il-Kapitolu 5 li kieku ma kienx hemm talba għall-applikazzjoni tal-Kapitolu 9. Din il-formulazzjoni tispjega r-relazzjoni bejn il-Kapitoli 5 u 9 ( 53 ). Hija ma tappoġġjax is-suġġeriment li l-Kapitolu 9 huwa eżenzjoni mill-Kapitolu 5. Minflok, hija tirrifletti l-mod li bih dawn iż-żewġ kapitoli għandhom jiġu applikati flimkien. Dan ma jfissirx li, fl-assenza ta’ talba skont il-Kapitolu 9, dawn in-NTFP isiru taxxabbli skont il-Kapitolu 5. Tali spjegazzjoni tidher iktar plawżibbli bit-teħid inkunsiderazzjoni tal-interpretazzjoni ta’ dispożizzjonijiet oħra analizzati iktar ’il fuq.

143.

Il-Kummissjoni ssostni, fuq il-bażi ta’ interpretazzjoni tal-A. 371IA(1) sa (3) tal-Kapitolu 9 tat-TIOPA, li “n-NTFP ikkonċernati skont il-Kapitolu 9 huma dawk li, fl-assenza tal-eżenzjoni prevista fil-Kapitolu 9, ikunu suġġetti għal imposta ta’ CFC (fuq il-bażi tal-Kapitolu 5 – li huwa l-Kapitolu dwar in-NTFP)”.

144.

Din l-allegazzjoni tintuża mill-Kummissjoni insostenn tal-klassifikazzjoni żbaljata tagħha tal-Kapitolu 9 bħala deroga li tagħti “vantaġġ” lill-persuni taxxabbli meta mqabbla ma’ dak li l-Kummissjoni tallega li hija t-tassazzjoni “normali” tan-NTFP, jiġifieri r-regoli tal-Kapitolu 5.

145.

Madankollu, kif jenfasizzaw LSEGH, il-Kummissjoni hija żbaljata fir-rigward tal-funzjonament tar-regoli rilevanti. Kif ġie diskuss iktar ’il fuq, il-Kapitolu 9 jista’ jirriżulta f’NTFP li jkunu suġġetti għal imposta taxxabbli ta’ CFC li ma kinitx tirriżulta skont il-Kapitolu 5. Fuq din il-bażi, il-Kapitolu 9 ma għandux jitqies li jidderoga mill-Kapitolu 5 (ara wkoll il-punti 129 u 130 ta’ dawn il-konklużjonijiet). Il-Kapitolu 9 jista’ jkun deroga biss fuq il-bażi tal-qafas ta’ riferiment jekk, li kieku ma kienx għal dan il-kapitolu, il-kumpannija kien ikollha tħallas taxxa (jew kien ikollha tħallas iktar taxxa).

146.

F’dan il-kuntest, eżempji prattiċi enfasizzati minn LSEGH juru meta persuna taxxabbli tkun tista’ tagħżel b’mod razzjonali l-Kapitolu 9 f’ċirkustanzi fejn tal-inqas uħud min-NTFP taċ-CFC rilevanti ma kinux jaqgħu taħt il-Kapitolu 5, u madankollu dawn jiġu suġġetti għall-imposta ta’ CFC skont il-Kapitolu 9. Dawn l-eżempji juru li, fil-prattika, il-Kapitolu 9 ma jikkostitwixxix b’mod esklużiv eliminazzjoni jew tnaqqis tat-taxxa ta’ CFC li kieku kienet tiġi ntaxxata skont il-Kapitolu 5 u għalhekk tiġi kklassifikata bħala deroga ( 54 ).

147.

Fl-assenza ta’ eżempji konkreti ta’ prattika li tipprova l-oppost, il-Kummissjoni naqset milli turi li l-formulazzjoni tal-A. 371IA(1) – li jiddikjara li japplika l-Kapitolu 9 jekk “bl-eċċezzjoni ta’ dan il-Kapitolu, il-Kapitolu 5 ([NTFP]) japplika għall-perijodu ta’ kontabbiltà ta’ CFC” – hija prova tat-teżi li “l-Kapitolu 9 japplika għall-NTFP li jirriżultaw minn QLR li kieku kienu jkunu suġġetti għal imposta skont il-Kapitolu 5”. Din il-formulazzjoni tad-dispożizzjonijiet tindika pjuttost li t-terminu “bl-eċċezzjoni ta’” jiddeskrivi r-relazzjoni bejn iż-żewġ kapitoli.

148.

Tali interpretazzjoni hija kkonfermata wkoll mill-argumenti tar-Renju Unit li skonthom, fid-deċiżjoni inkwistjoni, l-Kummissjoni bbażat l-evalwazzjoni tagħha u ffokat fuq id-dispożizzjoni żbaljata tar-regoli dwar iċ-CFC. Skont is-sottomissjonijiet tar-Renju Unit, l-A. 371IA(1)(a) ma huwiex dispożizzjoni ta’ natura operattiva, iżda sempliċement waħda mill-kundizzjonijiet ta’ applikazzjoni tal-Kapitolu 9. Kif analizzajt iktar ’il fuq ( 55 ), huwa l-A. 371CB(8), li huwa dispożizzjoni ta’ natura operattiva, li jinkludi kundizzjoni kruċjali li, jekk titressaq talba, il-Kapitolu 9 japplika minflok il-Kapitolu 5.

149.

Minn dan isegwi li, fl-assenza ta’ eżempji konkreti ta’ ġurisprudenza jew ta’ prattika amministrattiva tal-Istat Membru kkonċernat li jiddevjaw mill-interpretazzjoni ta’ dan l-Istat ( 56 ), l-interpretazzjoni sostnuta mill-Kummissjoni ma hijiex suffiċjenti sabiex tipprevali fuq l-interpretazzjoni u d-deskrizzjoni tas-sitwazzjonijiet prattiċi pprovduti mill-appellanti.

150.

Skont is-suġġerimenti tal-Kummissjoni, ikkonfermati mill-Qorti Ġenerali, il-Kapitoli 5 u 9 jistabbilixxu, rispettivament, regoli u eċċezzjonijiet għar-regoli dwar iċ-CFC, fis-sens li dan l-aħħar kapitolu jwassal għal tnaqqis tat-taxxa li kienet tkun dovuta skont l-ewwel wieħed. Madankollu, kif analizzajt iktar ’il fuq, l-istruttura leġiżlattiva u l-kontenut tal-leġiżlazzjoni nazzjonali jikkonfermaw il-kuntrarju: la l-Kapitolu 5 u lanqas il-Kapitolu 9 ma huma superjuri għal xulxin, huma primus inter pares u japplikaw għal kategoriji differenti ta’ NTFP.

151.

Il-formulazzjoni tad-dispożizzjonijiet tat-TIOPA turi li l-Kapitolu 9 ma huwiex deroga minn, jew eċċezzjoni, għall-Kapitolu 5 ( 57 ), iżda pjuttost mekkaniżmu komplementari u alternattiv li permezz tiegħu r-responsabbiltà tista’ tiġi evalwata meta jiġu ssodisfatti ċerti kundizzjonijiet speċifiċi.

152.

Dawn iż-żewġ kapitoli jikkomplementaw lil xulxin u jagħtu lok għal sett koerenti ta’ regoli fil-qasam tat-tassazzjoni tan-NTFP taċ-CFC. B’hekk, meħuda flimkien, dawn il-kapitoli jiddefinixxu l-kamp ta’ applikazzjoni tal-imposta ta’ CFC, billi jieħdu inkunsiderazzjoni l-evalwazzjoni tar-riskju li jirriżulta għall-bażi tat-taxxa fir-Renju Unit, mill-oriġini u l-użu tal-kapital li minnu jitwettqu dawn in-NTFP. Iċ-CFC jistgħu jippreżentaw riskju għall-bażi tat-TK minħabba t-tnaqqis tal-bażi tat-taxxa u t-trasferiment tal-profitti. Bħala riżultat, ir-regoli tar-Renju Unit dwar iċ-CFC l-ewwel jidentifikaw iċ-CFC li jippreżentaw l-ikbar riskju ta’ tnaqqis tal-bażi tat-taxxa u ta’ trasferiment tal-profitti (għalhekk, is-sistema taċ-CFC hija bbażata fuq ir-riskju) u mbagħad jikkwantifikaw l-ammont ta’ profitt li għandu jinġieb lura fix-xibka tat-taxxa tar-Renju Unit. Il-Parti 9A tat-TIOPA topera biex tidentifika dawk l-arranġamenti li jippreżentaw l-ogħla riskju għall-bażi tat-TK tar-Renju Unit. It-tliet GFE huma bbażati fuq dan l-approċċ ibbażat fuq ir-riskju. Kif isostni r-Renju Unit, il-pożizzjoni tal-leġiżlatur tiegħu, waqt it-tfassil tal-leġiżlazzjoni rilevanti, kienet li l-QLR (jiġifieri, is-self intiż sabiex jiffinanzja attivitajiet kummerċjali reali tal-grupp, li għalih jistgħu japplikaw il-GFE) jippreżentaw riskju relattivament baxx ta’ ddevjar artifiċjali ta’ profitti. Dan jikkuntrasta mas-“self upstream” u l-“ftehimiet moneybox”, li t-tnejn jippreżentaw riskju għoli għall-bażi tat-TK tar-Renju Unit.

153.

Peress li qraw dawn il-kapitoli separatament, il-Kummissjoni u l-Qorti Ġenerali attribwixxew valur eċċessiv lit-teknika regolatorja użata mil-leġiżlatur tar-Renju Unit, minflok ma wettqu eżami oġġettiv tal-kontenut, tal-istruttura u tal-effetti attwali tar-regoli applikabbli skont id-dritt nazzjonali kkonċernat, kif teżiġi l-ġurisprudenza ( 58 ).

154.

Għalhekk jista’ jiġi konkluż li l-effett mixtieq tal-Kapitoli 5 u 9 huwa li jiġu indirizzati kollettivament ir-riskji maħluqa minn ċerti arranġamenti artifiċjali ddefiniti. Barra minn hekk, huma jipprovdu għodod legali sabiex jimplimentaw is-sistema ta’ tassazzjoni prinċipalment territorjali tal-profitti tal-kumpanniji f’ċirkustanzi fejn ir-Renju Unit stabbilixxa riskju ta’ arranġamenti purament artifiċjali minn ċerti CFC u tal-kumpanniji omm tagħhom residenti fir-Renju Unit.

155.

Fl-aħħar nett, bħala parti mill-analiżi tal-kontenut u tal-effetti speċifiċi tal-leġiżlazzjoni nazzjonali, ser nindirizza l-kwistjoni tat-tifsira tal-kunċett ta’ FPS. Għalkemm, formalment, dan għandu pjuttost jiġi indirizzat fl-Istadju 2 jew 3 tal-analiżi, l-evalwazzjoni tal-qafas ta’ riferiment tkun inkompleta li kieku ma jiġux indirizzati l-formulazzjoni u l-kuntest tad-dispożizzjonijiet dwar il-FPS peress li dan il-kunċett jifforma parti integrali mill-qafas. Skont ITV, peress li qieset is-sistema taċ-CFC bħala separabbli, bil-kunċett tal-FPS bħala l-indikazzjoni tagħha ta’ devjazzjoni artifiċjali ta’ profitti, il-Kummissjoni introduċiet kunċett astratt minflok l-applikazzjoni tajba tal-leġiżlazzjoni nazzjonali inkwistjoni.

156.

Fil-fatt, l-adeżjoni tal-Kummissjoni għall-kunċett ta’ analiżi tal-FPS użat bħala l-uniku indikazzjoni ta’ devjazzjoni artifiċjali fi ħdan is-sistema taċ-CFC tixbah l-adeżjoni żbaljata tagħha għall-kunċett astratt ta’ “evalwazzjoni ta’ distakkament” fil-kawża li tat lok għas-sentenza Fiat ( 59 ). Il-Qorti Ġenerali (b’mod partikolari fil-punt 101 tas-sentenza appellata) wettqet żball ta’ liġi meta vvalidat dan l-approċċ żbaljat ( 60 ).

157.

Kif jispjegaw LSEGH, il-kunċett ta’ FPS jintuża fir-regoli tar-Renju Unit dwar iċ-CFC bħala wieħed mill-indikaturi li jidentifikaw il-profitti li huma suġġetti għall-Kapitolu 4 (profitti minn attivitajiet fir-Renju Unit) u għall-Kapitolu 5 (NTFP), li fih l-A. 371EB jirregola n-NTFP li jirriżultaw minn attivitajiet fejn hemm FPS tar-Renju Unit. Għaldaqstant, huwa plawżibbli li, kif isostnu LSEGH, il-kunċett tal-FPS ma huwiex regola gwida, iżda huwa użat biss f’dawn il-gateways tal-Kapitoli 4 u 5 u, anki f’dawn il-kapitoli, dan il-kunċett huwa dejjem applikat b’mod parallel ma’ kunċetti oħra (bħall-esklużjonijiet tal-Kapitolu 4 jew il-GFE tal-Kapitolu 9).

158.

Jidher li, għall-kuntrarju tal-argumenti tal-Kummissjoni, ir-regoli dwar iċ-CFC ma humiex imfassla prinċipalment bil-FPS tar-Renju Unit bħala indikazzjoni ta’ devjazzjoni artifiċjali tal-profitti. Kif issostni ITV, dan kien ikun strument goff li potenzjalment kien jikser il-kriterju ta’ proporzjonalità u s-sentenza Cadbury. ITV issostni wkoll li t-TIOPA kompletament teskludi l-ħtieġa tal-applikazzjoni tal-kriterju tal-FPS tar-Renju Unit, peress li, meta jiġu indirizzati QLR, in-natura u l-livell ta’ riskju għall-integrità tas-sistema ġenerali tat-TK jistgħu jiġu indirizzati sempliċement bl-użu tal-Kapitolu 9. Dawn l-argumenti donnhom jindikaw li l-kriterju tal-FPS tar-Renju Unit huwa wieħed mill-għodod applikati mis-sistema taċ-CFC, u – kuntrarjament għal dak issuġġerit mill-Kummissjoni u mill-Qorti Ġenerali – ma huwiex l-għodda determinanti.

159.

Barra minn hekk, l-analiżi tal-FPS inevitabbilment twassal għal evalwazzjoni suġġettiva u dan huwa kritiku meta, bħal fil-kawża ineżami, l-analiżi kellha titwettaq ex post. Kif spjegat ITV quddiem il-Qorti Ġenerali, l-approċċ tal-HMRC kien, fil-prattika, sostanzjalment differenti mill-maġġoranza l-kbira tal-analiżijiet imwettqa mill-persuni taxxabbli u mill-konsulenti tagħhom. Dan jista’ jwassal għal litigazzjoni estensiva, li teħtieġ analiżi ddettaljata tal-passi meħuda mill-persuna taxxabbli biex tiġi stabbilita evalwazzjoni preċiża tal-livell tal-FPS tar-Renju Unit u ta’ dawk li ma humiex tar-Renju Unit, rispettivament. ITV enfasizzat eżempji konkreti fl-ewwel istanza, fejn l-impriża dinjija tal-kontabbiltà Deloitte LLP kienet eżaminat kampjun ta’ 25 persuna taxxabbli ( 61 ), kollha bi gruppi omm fir-Renju Unit, li kienu wieġbu għal talbiet għal informazzjoni tal-HMRC dwar l-istrutturi ta’ finanzjament tal-Kapitolu 9 li ġew affettwati mid-deċiżjoni inkwistjoni. Wara analiżi ddettaljata tal-FPS, tliet persuni taxxabbli kkonkludew li ma kellhom ebda FPS fir-Renju Unit, 22 persuna taxxabbli kkonkludew li kellhom perċentwali minoritarju ta’ FPS fir-Renju Unit, filwaqt li l-ebda persuna taxxabbli ma sabet li kellha 100 % ta’ FPS fir-Renju Unit. Fi tliet każijiet biss, is-sejbiet tal-HMRC u tal-persuna taxxabbli kienu konsistenti ma’ xulxin. Id-diverġenzi fl-approċċ jistgħu jinsabu fir-rapport redatt ta’ Deloitte li ġie ppreżentat quddiem il-Qorti Ġenerali ( 62 ). Dawn l-inkonsistenzi juru l-inċertezzi u n-nuqqasijiet f’invokazzjoni ta’ kriterju tal-FPS għall-għoti ta’ eżitu affidabbli u ġust għall-persuni taxxabbli b’mod ġenerali, u b’mod korrispondenti, il-ħtieġa għal kriterju raġonevoli ddefinit b’mod ċar fil-forma tal-Kapitolu 9. Din l-oġġettività tista’ biss tikkonferma l-interpretazzjoni tal-analiżi tal-FPS bħala li tifforma biss parti mill-għodod disponibbli taħt ir-regoli dwar iċ-CFC u tkompli tindika l-plawżibbiltà tad-dikjarazzjonijiet tar-Renju Unit dwar diffikultajiet amministrattivi fl-evalwazzjoni individwali tal-FPS kemm min-naħa tal-amministrazzjoni kif ukoll minn dik tal-persuna taxxabbli.

160.

Jiena naqbel ma’ ITV li l-Kummissjoni u l-Qorti Ġenerali interpretaw b’mod żbaljat l-analiżi tal-FPS bħala element ċentrali tar-regoli dwar iċ-CFC, b’tali mod li l-Kapitolu 9 ġie kkunsidrat f’dan il-kuntest bħala eżenzjoni. Urejt li l-Kapitolu 9 huwa pjuttost għodda ta’ riferiment, li fil-biċċa l-kbira tipproteġi kontra l-kapitalizzazzjoni eċċessiva u tfittex li tistabbilixxi indikazzjoni tat-taxxa tar-Renju Unit, li r-Renju Unit ikun tilef bħala kunċett. B’mod partikolari, hija ma tippruvax tidentifika xi indikazzjoni għall-FPS tar-Renju Unit meta tindirizza l-finanzjament intragrupp.

161.

Fuq il-bażi tal-kunsiderazzjonijiet preċedenti, l-evalwazzjoni tal-formulazzjoni u tal-kuntest tal-Kapitoli 4 u 5 fir-rigward tal-FPS juru li l-Kummissjoni naqset milli tistabbilixxi li l-interpretazzjoni pprovduta mill-Istat Membru kkonċernat fir-rigward tal-formulazzjoni u l-kuntest tar-regoli tal-FPS hija manifestament żbaljata.

162.

Mill-kunsiderazzjonijiet kollha preċedenti jirriżulta li applikazzjoni korretta tal-prinċipji ġurisprudenzjali mfakkra fil-punti 55 u 56 ta’ dawn il-konklużjonijiet tikkonferma li r-regoli dwar iċ-CFC fil-kawża ineżami ma jistgħux jiġu sseparati mis-sistema ġenerali tat-TK, sa fejn dawn jifformaw parti integrali minn din is-sistema u jikkomplementawha. Konsegwentement, il-qafas ta’ riferiment korrett fil-kawża ineżami kellu jkun is-sistema ġenerali tat-TK, u mhux ir-regoli dwar iċ-CFC.

163.

Mill-ġurisprudenza tal-Qorti tal-Ġustizzja, ċċitata fil-punt 54 ta’ dawn il-konklużjonijiet, u mill-kunsiderazzjonijiet preċedenti, jirriżulta li “żball imwettaq [fid]-determinazzjoni [tal-qafas ta’ riferiment] neċessarjament jivvizzja l-analiżi kollha tal-kundizzjoni dwar in-natura selettiva”.

164.

Konsegwentement, is-sentenza appellata għandha tiġi annullata fl-intier tagħha u d-deċiżjoni inkwistjoni għandha tiġi annullata.

165.

Għaldaqstant, ma huwiex neċessarju li jiġu eżaminati l-aggravji l-oħra. Madankollu, ser nipprovdi analiżi qasira – għall-finijiet ta’ kompletezza – fil-każ li l-Qorti tal-Ġustizzja ma taqbilx mal-evalwazzjoni tiegħi iktar ’il fuq.

166.

Ir-Renju Unit u ITV (permezz tat-tieni aggravji rispettivi tagħhom) isostnu, essenzjalment, li l-Qorti Ġenerali wettqet żball ta’ liġi meta ddeċidiet li l-leġiżlazzjoni tar-Renju Unit dwar iċ-CFC kienet tagħti lok għal vantaġġ. Dan l-iżball ta’ liġi rriżulta minn distorsjonijiet u żnaturament tal-fatti relatati mar-rwol tal-FPS fil-leġiżlazzjoni tar-Renju Unit dwar iċ-CFC u r-relazzjoni bejn il-Kapitoli 5 u 9.

167.

Permezz tat-tielet aggravju tiegħu, ir-Renju Unit isostni li l-Qorti Ġenerali wettqet żball ta’ liġi meta evalwat l-għan u s-selettività tal-leġiżlazzjoni tar-Renju Unit dwar iċ-CFC. Is-sentenza appellata fiha distorsjonijiet irrepetuti u/jew żbalji manifesti ta’ evalwazzjoni fir-rigward tar-rwol tal-FPS fil-leġiżlazzjoni tar-Renju Unit dwar iċ-CFC u r-relazzjoni reċiproka bejn il-Kapitoli 5 u 9 tagħha. Hija lanqas ma tirreġistra jew tindirizza l-elementi essenzjali tas-sottomissjonijiet tar-Renju Unit, bi ksur tal-obbligu ta’ motivazzjoni tagħha.

168.

Permezz tat-tielet aggravju tagħhom, LSEGH isostnu li l-Qorti Ġenerali wettqet żball ta’ liġi fir-rigward tal-konstatazzjoni tal-eżistenza ta’ vantaġġ selettiv. B’mod partikolari, il-Qorti Ġenerali wettqet żball meta kkonkludiet b’mod żbaljat li l-operaturi ekonomiċi li jistgħu jibbenefikaw mill-GFE skont il-Kapitolu 9 kienu jinsabu f’sitwazzjoni legali u fattwali komparabbli ma’ kumpanniji li ma setgħux jagħmlu dan.

169.

Il-Kummissjoni tikkontesta l-argumenti preċedenti.

170.

Jekk il-konklużjoni tal-Qorti Ġenerali dwar l-Istadju 1 tal-analiżi (definizzjoni tal-qafas ta’ riferiment) kellha tiġi kkonfermata mill-Qorti tal-Ġustizzja – ħaġa li jidhirli li hija improbabbli – ikun neċessarju li jiġi eżaminat jekk l-evalwazzjoni mill-Qorti Ġenerali tal-Istadju 2 tal-analiżi (jekk il-miżura tat-taxxa tikkostitwixxix deroga mill-qafas ta’ riferiment) hijiex, min-naħa tagħha, korretta wkoll. Dan jinvolvi eżami tal-kwistjoni dwar jekk l-eżenzjonijiet inkwistjoni jidderogawx mill-qafas ta’ riferiment, sa fejn jintroduċu differenzazzjonijiet bejn operaturi li, fid-dawl tal-għan imfittex f’dan il-qafas, ikunu jinsabu f’sitwazzjoni fattwali u legali komparabbli.

171.

Ikolli nammetti li dan l-eżerċizzju jidhirli li huwa teoretiku ħafna, peress li dak li ntqal iktar ’il fuq ikun possibbli biss jekk il-Qorti tal-Ġustizzja ma taqbilx mal-konklużjonijiet tiegħi dwar il-qafas ta’ riferiment u tasal għall-konklużjoni li l-qafas ta’ riferiment fil-kawża ineżami huwa l-Parti 9A tat-TIOPA, bl-eċċezzjoni tal-Kapitolu 9 tagħha (li jipprevedi l-eżenzjonijiet inkwistjoni). Jekk jiġi aċċettat li l-qafas ta’ riferiment huwa l-Parti 9A tat-TIOPA inkluż il-Kapitolu 9, huwa diffiċli li wieħed jifhem kif jista’ jiġi vverifikat jekk l-argumenti mressqa mill-Kummissjoni u kkonfermati mis-sentenza appellata humiex ta’ natura li jistabbilixxu li l-Kapitolu 9 joħloq eżenzjonijiet li jidderogaw minn dan il-qafas ta’ riferiment, minkejja li jagħmlu parti minn dan il-qafas.

172.

Fi kwalunkwe każ, anki fix-xenarju teoretiku li r-regoli kollha dwar iċ-CFC jiġu kkunsidrati bħala l-qafas ta’ riferiment, xorta jibqa’ l-fatt li – kif spjegajt fid-dettall fir-rigward tal-evalwazzjoni tiegħi tal-Istadju 1 tal-analiżi – il-leġiżlazzjoni nazzjonali, kif interpretata mill-Istat Membru kkonċernat, ma ġietx ikkonfutata mill-Kummissjoni (sa fejn ma wrietx li l-interpretazzjoni tar-Renju Unit tal-leġiżlazzjoni nazzjonali tagħha hija manifestament żbaljata). B’mod partikolari, il-Kapitolu 9 ma huwiex deroga jew eċċezzjoni għall-Kapitolu 5 ( 63 ), iżda pjuttost mekkaniżmu komplementari u alternattiv għall-evalwazzjoni tar-responsabbiltà meta jiġu ssodisfatti ċerti kundizzjonijiet speċifiċi.

173.

Fil-fatt, kif nispjega fl-evalwazzjoni tiegħi tal-Istadju 1, l-ewwel, il-Kummissjoni u l-Qorti Ġenerali kienu żbaljati li l-Kapitolu 9 jipprevedi eżenzjonijiet mill-imposta ta’ CFC favur in-NTFP ta’ CFC li altrimenti kienu jkunu taxxabbli skont il-Kapitolu 5. Il-Qorti Ġenerali issopravalutat ir-rwol tal-kriterju tal-FPS tar-Renju Unit meta ddeċidiet li kwalunkwe NTFP ta’ CFC li jissodisfa dan il-kriterju għandu awtomatikament jiġi kklassifikat bħala ddevjat b’mod artifiċjali mir-Renju Unit u li, konsegwentement, huwa suġġett għall-imposta ta’ CFC skont il-Kapitolu 5. Ċerti tipi ta’ arranġamenti, speċifikament QLR, ma jġorrux riskju għoli ta’ ddevjar artifiċjali, irrispettivment mill-preżenza ta’ FPS fir-Renju Unit. Tipi oħra ta’ arranġamenti, speċifikament dawk mhux koperti minn QLR, jinvolvu tali riskju, għal darba oħra irrispettivament mill-preżenza ta’ FPS fir-Renju Unit.

174.

It-tieni, mill-analiżi tiegħi tal-Istadju 1 jirriżulta wkoll li l-Kummissjoni u l-Qorti Ġenerali ma ħadux inkunsiderazzjoni l-fatt li r-regoli dwar iċ-CFC, kollha kemm huma u fid-dawl tal-għan tagħhom, ġew ikkonċepiti billi ġie segwit approċċ ibbażat fuq evalwazzjoni tar-riskji li l-profitti taċ-CFC jirrappreżentaw għas-sistema ġenerali tat-TK (li r-regoli dwar iċ-CFC tagħha jagħmlu parti integrali minnha). L-għan ta’ dawn ir-regoli huwa li jindirizzaw it-tnaqqis tal-bażi tat-taxxa u t-trasferiment ta’ profitti, filwaqt li l-Kummissjoni u l-Qorti Ġenerali aċċettaw b’mod żbaljat dan l-aħħar element biss.

175.

It-tielet, kif jista’ jiġi dedott mill-evalwazzjoni tiegħi tal-Istadju 1, meta l-Kummissjoni u l-Qorti Ġenerali pparagunaw, minn naħa, in-NTFP taċ-CFC li għalihom kienu applikabbli l-eżenzjonijiet inkwistjoni u, min-naħa l-oħra, n-NTFP taċ-CFC esklużi minn dawn l-eżenzjonijiet, huma llimitaw ruħhom li jwieġbu fl-affermattiv għall-mistoqsija dwar jekk dawn il-profitti kollha setgħux jissodisfaw il-kriterju tal-FPS tar-Renju Unit, minflok ma ħadu inkunsiderazzjoni l-livelli ta’ riskju għas-sistema ġenerali tat-TK assoċjata mal-profitti differenti.

176.

Minn dan isegwi li l-Qorti Ġenerali wettqet żball ta’ liġi meta kkonfermat l-interpretazzjoni mogħtija mill-Kummissjoni tal-leġiżlazzjoni nazzjonali sottostanti tal-Istat Membru kkonċernat u b’hekk waslet għal konklużjoni legali żbaljata fir-rigward tal-eżistenza ta’ vantaġġ u r-rwol tal-FPS fi ħdan din il-leġiżlazzjoni nazzjonali. Bl-istess mod, il-Qorti Ġenerali wettqet żbalji simili fir-rigward tal-għan tar-regoli dwar iċ-CFC (u tas-sistema ġenerali tat-TK).

177.

Fil-każ li l-Qorti tal-Ġustizzja ma taqbilx mal-analiżi tiegħi iktar ’il fuq u tiġi kkonfermata l-analiżi tal-Qorti Ġenerali dwar is-selettività a priori tal-eżenzjonijiet inkwistjoni – ħaġa li jidhirli li hija improbabbli – ikun neċessarju li jiġu eżaminati l-argumenti tal-appellanti dwar il-mod kif il-Qorti Ġenerali evalwat il-ġustifikazzjonijiet ta’ dawn l-eżenzjonijiet.

178.

Permezz tar-raba’ aggravju tiegħu, ir-Renju Unit isostni li l-Qorti Ġenerali ma indirizzatx l-argument tiegħu li d-distinzjoni fid-deċiżjoni inkwistjoni bejn l-FPS tar-Renju Unit u l-kapital konness mar-Renju Unit kienet irrazzjonali, bir-riżultat li l-Qorti Ġenerali kisret l-obbligu ta’ motivazzjoni tagħha. Barra minn hekk, il-Qorti Ġenerali ċaħdet il-ġustifikazzjoni tal-prattiċità amministrattiva għal żewġ raġunijiet marbuta mal-allegata assenza ta’ provi quddiem il-Qorti Ġenerali. Ir-Renju Unit isostni li ebda wieħed minn dawn il-motivi ma kien fondat, u t-tnejn li huma jimplikaw żnaturament manifest tal-fatti inkwistjoni quddiem il-Qorti Ġenerali.

179.

Permezz tat-tielet aggravju tagħha, ITV issostni li l-Qorti Ġenerali wettqet żball ta’ liġi u/jew żball manifest ta’ evalwazzjoni meta kkonkludiet li l-eżenzjonijiet, jekk dawn kienu jagħtu vantaġġ selettiv (quod non), ma setgħux jiġu ġġustifikati fuq il-bażi tal-prattiċità amministrattiva.

180.

Permezz tal-ħames aggravju tagħhom, LSEGH isostnu li l-Qorti Ġenerali wettqet żball ta’ liġi meta kkonkludiet li l-GFE fil-Kapitolu 9 ma kinitx iġġustifikata min-natura jew mill-istruttura tal-qafas ta’ riferiment.

181.

Il-Kummissjoni tikkontesta dawn l-argumenti.

182.

Fl-ewwel parti tal-konklużjonijiet tiegħi (qafas ta’ riferiment) urejt li l-interpretazzjoni tar-Renju Unit tal-leġiżlazzjoni nazzjonali tiegħu hija plawżibbli fir-rigward tal-għan, tal-kontenut u tal-effetti speċifiċi tal-leġiżlazzjoni nazzjonali u li l-interpretazzjoni ta’ dan id-dritt nazzjonali adottata mill-Kummissjoni fid-deċiżjoni inkwistjoni kienet għalhekk żbaljata. Fir-rigward tal-problemi relatati mal-prattiċità tal-analiżi tal-FPS, dawn ġew indirizzati speċifikament fil-punti 157 sa 159 u 173 ta’ dawn il-konklużjonijiet.

183.

Għaldaqstant, huwa biżżejjed li jiġi rrilevat – bħalma għamlet il-Qorti tal-Ġustizzja fis-sentenza Andres ( 64 ) – li huwa fuq il-bażi tal-evalwazzjoni ġuridika żbaljata tagħha (li permezz tagħha l-Kummissjoni ma wettqitx żball fl-interpretazzjoni tal-leġiżlazzjoni nazzjonali sottostanti ( 65 )) li l-Qorti Ġenerali analizzat is-sottomissjonijiet li r-rikorrenti fl-ewwel istanza kienu ppreżentawlha sabiex juru l-ġustifikazzjoni tal-eżenzjonijiet inkwistjoni minħabba n-neċessità li tiġi żgurata l-prattiċità amministrattiva. Għaldaqstant, l-iżball ta’ liġi preċedenti jivvizzja neċessarjament ukoll l-evalwazzjoni ta’ din il-ġustifikazzjoni mill-Qorti Ġenerali ( 66 ).

184.

Madankollu, fix-xenarju teoretiku fejn l-evalwazzjoni ta’ dawn l-aggravji tkun saret mill-Qorti tal-Ġustizzja, dawn ikollhom neċessarjament jintlaqgħu.

185.

Permezz tal-ħames aggravju tiegħu, ir-Renju Unit isostni li r-raġunament tal-Qorti Ġenerali jinkludi żball manifest ta’ dritt fir-rigward tar-rekwiżit tal-libertà ta’ stabbiliment u tal-importanza tas-sentenza Cadbury, li huwa ekwivalenti għal nuqqas ta’ osservanza ta’ din il-kawża. Il-konklużjoni tal-Qorti Ġenerali dwar din il-kwistjoni tikxef diversi żbalji. L-ewwel, hija bbażata fuq interpretazzjoni żbaljata tar-rwol tal-FPS fil-leġiżlazzjoni tar-Renju Unit dwar iċ-CFC. It-tieni, jidher li l-Qorti Ġenerali ppreżumiet li r-Renju Unit adotta sistema purament territorjali. It-tielet, din il-parti tas-sentenza appellata la tesponi u lanqas tindirizza argumenti sostanzjali mressqa mir-Renju Unit f’dak li jikkonċerna l-impatt tal-linja tal-ġurisprudenza Cadbury fuq it-tfassil tal-leġiżlazzjoni tiegħu dwar iċ-CFC.

186.

Permezz tar-raba’ aggravju tagħha, ITV issostni li l-Qorti Ġenerali wettqet żball ta’ liġi peress li ma kkunsidratx u ma applikatx b’mod korrett is-sentenza Cadbury. B’mod partikolari, din il-qorti naqset milli tagħmel dan fil-kuntest tal-eżami tal-qafas ta’ riferiment, tal-vantaġġ selettiv jew inkella tal-kwistjoni dwar jekk l-eżenzjonijiet inkwistjoni jistgħux ikunu ġġustifikati sabiex tiġi protetta l-libertà ta’ stabbiliment skont l-Artikolu 49 TFUE. Barra minn hekk jew sussidjarjament, il-Qorti Ġenerali ma mmotivatx suffiċjentement il-konklużjonijiet tagħha dwar din il-kwistjoni.

187.

Permezz tal-ħames aggravju tagħhom, LSEGH isostnu li l-Qorti Ġenerali wettqet żball ta’ liġi meta kkonkludiet li l-GFE fil-Kapitolu 9 ma hijiex iġġustifikata min-natura jew mill-istruttura ġenerali tal-qafas ta’ riferiment.

188.

Il-Kummissjoni tikkontesta dawn l-argumenti.

189.

Kif spjegajt fil-punti 182 u 183 ta’ dawn il-konklużjonijiet, peress li l-Qorti Ġenerali laqgħet b’mod żbaljat l-interpretazzjoni żbaljata mogħtija mill-Kummissjoni tal-leġiżlazzjoni nazzjonali sottostanti, l-analiżi tal-Qorti Ġenerali tas-sottomissjonijiet ippreżentati quddiemha mir-rikorrenti fl-ewwel istanza sabiex juru l-ġustifikazzjoni (inkluża din) tal-eżenzjonijiet inkwistjoni hija neċessarjament ivvizzjata wkoll.

190.

Huwa biżżejjed li jiġi rrilevat li, fil-punti 73 sa 77 ta’ dawn il-konklużjonijiet, ġie konkluż li, bis-sistema l-ġdida taċ-CFC, l-intenzjoni tal-leġiżlatur tar-Renju Unit kienet li jikkonforma ruħu, b’mod partikolari, mas-sentenza Cadbury u li l-Kummissjoni ma kinitx ressqet argumenti li jippermettu lill-Qorti tal-Ġustizzja tikkontesta din l-interpretazzjoni bħala manifestament żbaljata.

191.

Madankollu, fix-xenarju teoretiku fejn tkun saret evalwazzjoni ta’ dawn l-aggravji mill-Qorti tal-Ġustizzja, dawn ikollhom neċessarjament jintlaqgħu.

192.

LSEGH isostnu li l-Qorti Ġenerali kisret l-Artikolu 263 TFUE u l-Artikolu 296 TFUE billi naqset milli tindirizza l-eċċezzjonijiet u billi kisret l-obbligu ta’ motivazzjoni tagħha, u peress li l-Qorti Ġenerali ssostitwixxiet il-motivazzjoni tagħha għal dik tal-Kummissjoni fid-deċiżjoni inkwistjoni.

193.

Il-Kummissjoni tikkontesta dawn l-argumenti u ssostni li l-Qorti Ġenerali ġustament ikkonfermat il-konstatazzjonijiet tal-Kummissjoni dwar in-nuqqas ta’ ġustifikazzjoni tad-deroga għal raġunijiet ta’ prattiċità amministrattiva u li hija osservat l-obbligu tagħha ta’ motivazzjoni.

194.

Kif spjegajt fil-punti 182 u 183 ta’ dawn il-konklużjonijiet, peress li l-Qorti Ġenerali laqgħet b’mod żbaljat l-interpretazzjoni żbaljata mogħtija mill-Kummissjoni tal-leġiżlazzjoni nazzjonali sottostanti, l-analiżi tal-Qorti Ġenerali tas-sottomissjonijiet ippreżentati quddiemha mir-rikorrenti fl-ewwel istanza sabiex juru l-ġustifikazzjoni (inkluża din) tal-eżenzjonijiet inkwistjoni hija neċessarjament ivvizzjata wkoll.

195.

Madankollu, fix-xenarju teoretiku fejn tkun saret evalwazzjoni ta’ dan l-aggravju mill-Qorti tal-Ġustizzja, dan ikollu neċessarjament jintlaqa’.

196.

Fid-dawl tal-konklużjonijiet preċedenti, nipproponi li l-Qorti tal-Ġustizzja għandha: