I. Introduzzjoni

II. Il‑fatti li wasslu għall‑kawża

A. Fuq id‑deċiżjoni bil‑quddiem mogħtija mill‑awtoritajiet tat-taxxa Lussemburgiżi lil FFT u l‑proċedura amministrattiva quddiem il‑Kummissjoni

B. Fuq id‑deċiżjoni kontenzjuża

1. Deskrizzjoni tal‑kontenut essenzjali tad‑deċiżjoni bil‑quddiem inkwistjoni

2. Deskrizzjoni tar‑regoli Lussemburgiżi rilevanti

3. Deskrizzjoni tal‑linji gwida tal‑OECD

4. Evalwazzjoni tad‑deċiżjoni bil‑quddiem inkwistjoni

C. Il‑proċedura quddiem il‑Qorti Ġenerali u s‑sentenza appellata

D. Il‑proċedura quddiem il‑Qorti tal‑Ġustizzja u t‑talbiet tal‑partijiet fl‑appell

III. Fuq l-appell

A. Fuq it‑tieni aggravju

1. L‑argumenti tal‑partijiet

2. Fuq l‑effettività tat‑tieni aggravju

3. Fuq il‑fondatezza tal‑ewwel parti

4. Fuq il‑fondatezza tat‑tieni parti

B. Fuq l‑ewwel aggravju

1. L‑argumenti tal‑partijiet

2. Fuq l‑ewwel parti

a) Fuq l‑ammissibbiltà

b) Fuq il‑fondatezza

1) Kummenti preliminari

2) Evalwazzjoni

3. Fuq it‑tieni parti

a) Fuq in‑natura effettiva

b) Fuq il‑fondatezza

C. Fuq it‑tielet aggravju

1. L‑argumenti tal‑partijiet

2. Fuq l‑ewwel parti

a) Fuq in‑natura effettiva

b) Fuq il‑fondatezza

3. Fuq it‑tieni parti

a) Fuq in‑natura effettiva

b) Fuq il‑fondatezza

D. Konklużjoni dwar l‑appell

IV. Fuq l‑ispejjeż

V. Konklużjoni

1.

“Ruling fiskali” jew id-“deċiżjoni tat-taxxa bil-quddiem” huma prassi komuni li tippermetti lill-impriżi jitolbu mingħand l-awtorità tat-taxxa “deċiżjoni bil-quddiem” dwar it-taxxa li huma jkollhom iħallsu. It-terminu “ruling” ġeneralment jindika l-fatt li awtorità tat-taxxa tadotta pożizzjoni uffiċjali, spiss fuq talba tal-persuna taxxabbli, dwar l-applikazzjoni ta’ ċerti dispożizzjonijiet leġiżlattivi fis-seħħ fir-rigward ta’ sitwazzjoni jew ta’ tranżazzjoni jew ta’ diversi tranżazzjonijiet li jkunu għadhom ma pproduċewx effetti fiskali. B’hekk, il-persuni taxxabbli jfittxu li jiksbu assigurazzjonijiet li jorbtu lill-awtorità fir-rigward tat-trattament fiskali tat-tranżazzjonijiet tagħhom.

2.

Mix-xahar ta’ Ġunju 2014, il-Kummissjoni Ewropea nediet sensiela ta’ investigazzjonijiet intiżi sabiex tivverifika l-konformità tal-prattiki tal-awtoritajiet tat-taxxa ta’ diversi Stati Membri fir-rigward ta’ impriżi multinazzjonali mar-regoli tat-Trattat dwar l-għajnuna mill-Istat, fir-rigward, b’mod partikolari, mat-tqassim tal-profitti bejn id-diversi Stati li fihom dawn l-impriżi jkollhom l-attivitajiet tagħhom. Waħda minn dawn l-investigazzjonijiet wasslet għall-adozzjoni tad-deċiżjoni dwar l-għajnuna li allegatament ingħatat mill-awtoritajiet tat-taxxa Lussemburgiżi lill-grupp Fiat ( 2 ).

3.

Fl-istess ħin, ir-rivelazzjonijiet tal-investigazzjoni ġurnalistika msejħa “Lux Leaks”, f’Novembru 2014 ġabu dan is-suġġett għall-attenzjoni tal-pubbliku ġenerali u pprovokaw diversi reazzjonijiet ta’ rabja ( 3 ). Wara dawn ir-rivelazzjonijiet, bosta politiċi ħadu azzjonijiet, kemm fuq livell Ewropew kif ukoll fuq livell internazzjonali, intiżi sabiex jirrimedjaw dak li issa kien meqjus bħala ksur serju tal-ekwità fil-qasam tat-taxxa. L-iktar azzjoni reċenti irriżultat fi ftehim li ħoloq taxxa globali fuq id-dħul tal-impriżi multinazzjonali ( 4 ).

4.

Għalkemm għandha tkun konxja mill-kuntest politiku, ekonomiku u anki soċjali ta’ din il-kawża, il-Qorti tal-Ġustizzja trid, fis-sentenza li trid tagħti, teżamina l-kwistjonijiet li jqajjem l-approċċ adottat mill-Kummissjoni fid-deċiżjoni kontenzjuża fid-dawl tal-kunsiderazzjonijiet legali biss. Is-sentenza mogħtija mill-Qorti Ġenerali fil-kawżi Il‑Gran Dukat tal‑Lussemburgu u Fiat Chrysler Finance Europe vs Il‑Kummissjoni Ewropea ( 5 ), li kkonfermat dan l-approċċ, hija s-suġġett ta’ dan l-appell.

5.

In-natura innovattiva tal-approċċ tal-Kummissjoni kienet tikkonsisti b’mod partikolari fl-introduzzjoni tal-prinċipju ta’ distakkament fl-eżami tal-eżistenza ta’ vantaġġ ekonomiku. F’dawn iċ-ċirkustanzi, il-Qorti tal-Ġustizzja ser ikollha l-okkażjoni, fis-sentenza futura tagħha, li tiddeċiedi b’mod partikolari dwar ċerti kwistjonijiet marbuta mal-applikazzjoni ta’ dan il-prinċipju, bħal dik li tirrigwarda n-neċessità li jittieħdu inkunsiderazzjoni l-effetti ta’ deċiżjoni bil-quddiem fuq il-grupp ta’ kumpanniji kkonċernat kollu kemm hu sabiex tiġi vverifikata l-eżistenza ta’ vantaġġ fis-sens tal-Artikolu 107(1) TFUE.

6.

Fl‑14 ta’ Marzu 2012, il-konsulent tat-taxxa ta’ Fiat Chrysler Finance Europe, li qabel kienet magħrufa bħala Fiat Finance and Trade Ltd (iktar ’il quddiem “FFT”), bagħat ittra lill-awtoritajiet tat-taxxa Lussemburgiżi li kienet titlob l-approvazzjoni ta’ ftehim dwar il-prezz ta’ trasferiment. Huwa ppreżentalhom ukoll, insostenn ta’ din it-talba, rapport, miktub minnu stess, li janalizza l-prezzijiet ta’ trasferiment applikati għat-tranżazzjonijiet imwettqa minn FFT.

7.

Fit‑3 ta’ Settembru 2012, l-awtoritajiet tat-taxxa Lussemburgiżi adottaw deċiżjoni bil-quddiem bi tweġiba għat-talba ta’ FFT (iktar ’il quddiem id-“deċiżjoni bil-quddiem inkwistjoni”). Din id-deċiżjoni kienet tinsab f’ittra li tindika li fiha kien indikat li, “fir-rigward tal-ittra, bid-data tal‑14 ta’ Marzu 2012, dwar l-attivitajiet ta’ finanzjament fi ħdan il-grupp ta’ FFT, [kien] ikkonfermat li l-analiżi tal-prezzijiet ta’ trasferiment [kienet] twettqet konformement maċ-Ċirkulari 164/2 tat‑28 ta’ Jannar 2011 u li hija [kienet] tosserva l-prinċipju ta’ distakkament”.

8.

Fid‑19 ta’ Ġunju 2013, il-Kummissjoni Ewropea bagħtet lill-Gran Dukat tal-Lussemburgu l-ewwel talba għal informazzjoni li tirrigwarda l-informazzjoni ddettaljata dwar il-prattiki nazzjonali fil-qasam tad-deċiżjonijiet bil-quddiem. Din l-ewwel talba għal informazzjoni ġiet segwita minn diversi skambji bejn il-Gran Dukat tal-Lussemburgu u l-Kummissjoni sal-adozzjoni, minn din tal-aħħar, fl‑24 ta’ Marzu 2014, ta’ deċiżjoni li tordna lill-Gran Dukat tal-Lussemburgu jipprovdilha l-informazzjoni.

9.

Fil‑11 ta’ Ġunju 2014, il-Kummissjoni fetħet il-proċedura ta’ investigazzjoni formali prevista fl-Artikolu 108(2) TFUE dwar id-deċiżjoni bil-quddiem inkwistjoni. Fil‑21 ta’ Ottubru 2015, il-Kummissjoni adottat id-deċiżjoni kontenzjuża li tiddikjara li din id-deċiżjoni bil-quddiem tikkostitwixxi għajnuna mill-Istat fis-sens tal-Artikolu 107(1) TFUE.

10.

Il-Kummissjoni ddeskriviet id-deċiżjoni bil-quddiem inkwistjoni bħala li tappoġġja metodu ta’ allokazzjoni tal-profitti lil FFT fi ħdan il-grupp tal-karozzi Fiat/Chrysler, li kien jippermetti lil FFT tiddetermina annwalment l-ammont tat-taxxa fuq il-kumpanniji li hija kellha tħallas fil-Gran Dukat tal-Lussemburgu. Il-Kummissjoni ppreċiżat li din id-deċiżjoni kellha valur vinkolanti għall-awtorità tat-taxxa għal perijodu ta’ ħames snin, jiġifieri mis-sena fiskali 2012 sa dik tal‑2016 ( 6 ).

11.

Il-Kummissjoni indikat li d-deċiżjoni bil-quddiem inkwistjoni kienet ġiet adottata abbażi tal-Artikolu 164(3) tal-code des impôts sur les revenus luxembourgeois (loi du 4 décembre 1967 concernant l’impôt sur la revenus) (il-Kodiċi tat-Taxxa fuq id-Dħul Lussemburgiż (il-Liġi tal‑4 ta’ Diċembru 1967 dwar it-Taxxa fuq id-Dħul, kif emendata, iktar ’il quddiem il-“Kodiċi dwar it-Taxxa”)) ( 7 ) u taċ-Ċirkulari L.I.R. Nru 164/2 tad-Direttur tal-Kontribuzzjonijiet Lussemburgiż tat‑28 ta’ Jannar 2011 (iktar ’il quddiem iċ-“Ċirkulari Nru 164/2”). F’dan ir-rigward, il-Kummissjoni rrilevat, minn naħa, li dan l-artikolu kien jistabbilixxi l-prinċipju ta’ distakkament fid-dritt fiskali Lussemburgiż, li jgħid li t-tranżazzjonijiet bejn kumpanniji tal-istess grupp kellhom jiġu rremunerati daqslikieku kienu ġew konklużi bejn kumpanniji indipendenti li jinnegozjaw f’ċirkustanzi paragunabbli f’kundizzjonijiet ta’ distakkament. Min-naħa l-oħra, hija osservat li ċ-Ċirkulari Nru 164/2 kienet tippreċiża b’mod partikolari kif tiġi ddeterminata remunerazzjoni ta’ distakkament meta dawn it-tranżazzjonijiet ikunu saru mill-kumpanniji ta’ finanzjament tal-grupp ( 8 ).

12.

Il-Kummissjoni ddeskriviet il-prinċipji tal-Organizzazzjoni għall-Kooperazzjoni u l-Iżvilupp Ekonomiku (OECD) fil-qasam tal-prezzijiet ta’ trasferiment u indikat li l-prezzijiet ta’ trasferiment kienu jirreferu għall-prezzijiet iffatturati għal tranżazzjonijiet kummerċjali bejn diversi entitajiet li jappartjenu għall-istess grupp ta’ kumpanniji. Hija affermat li, sabiex jiġi evitat li l-kumpanniji multinazzjonali jiġu mħeġġa jattribwixxu l-inqas profitti possibbli fil-pajjiżi li jintaxxaw iktar il-profitti tagħhom, l-awtoritajiet tat-taxxa għandhom jaċċettaw il-prezzijiet ta’ trasferiment bejn kumpanniji integrati biss meta, skont il-prinċipju ta’ distakkament, it-tranżazzjonijiet jiġu rremunerati daqslikieku kienu ġew aċċettati minn kumpanniji indipendenti li jinnegozjaw f’sitwazzjonijiet paragunabbli f’kundizzjonijiet ta’ distakkament. Il-Kummissjoni ppreċiżat li dan il-prinċipju jinsab fl-Artikolu 9 tal-Mudell ta’ Konvenzjoni Fiskali tal-OECD dwar id-dħul u l-kapital ( 9 ).

13.

Il-Kummissjoni fakkret li l-prinċipji applikabbli fil-qasam tal-prezzijiet ta’ trasferiment għall-impriżi multinazzjonali u l-awtoritajiet tat-taxxa, adottati mill-Kumitat għall-Affarijiet Fiskali tal-OECD fis‑27 ta’ Ġunju 1995 u rreveduti fit‑22 ta’ Lulju 2010 (iktar ’il quddiem il-“linji gwida tal-OECD”), kienu jelenkaw ħames metodi sabiex tiġi stabbilita approssimazzjoni tal-prezzijiet ta’ distakkament għat-tranżazzjonijiet u t-tqassim tal-profitti bejn il-kumpanniji integrati ( 10 ).

14.

It-tieni wieħed huwa l-metodu tat-tranżazzjoni tal-marġni pożittiv (iktar ’il quddiem il-“MTMN”) li jikkostitwixxi metodu indirett użat sabiex tiġi stabbilita approssimazzjoni tal-prezzijiet ta’ distakkament għat-tranżazzjonijiet u tat-tqassim tal-profitti bejn il-kumpanniji tal-istess grupp. Il-Kummissjoni ddeskriviet dan il-metodu bħala li jikkonsisti fl-istima tal-ammont potenzjali tal-profitt skont il-prinċipju ta’ distakkament għal attività kkunsidrata kollha kemm hi minflok għal tranżazzjonijiet speċifiċi. Barra minn hekk, hija ppreċiżat li, għall-finijiet ta’ din l-evalwazzjoni, kien neċessarju li jintgħażel indikatur tal-profitti, bħall-ispejjeż, id-dħul mill-bejgħ jew mill-investimenti fissi, u li tiġi applikata għalih rata ta’ profitti li tirrifletti dik osservata fi tranżazzjonijiet komparabbli magħmula fis-suq ħieles ( 11 ).

15.

Fir-rigward tat-tielet u r-raba’ kundizzjoni tal-eżistenza ta’ għajnuna mill-Istat, il-Kummissjoni qieset li d-deċiżjoni bil-quddiem inkwistjoni kienet tagħti vantaġġ selettiv lil FFT, sa fejn din kienet wasslet għal tnaqqis tat-taxxa dovuta mill-persuna kkonċernata lil-Lussemburgu billi ddevjat mit-taxxa li hija kellha tħallas skont is-sistema ordinarja tat-taxxa fuq il-kumpanniji. Hija waslet għal din il-konklużjoni wara eżami konkomitanti tal-vantaġġ u tas-selettività, strutturat skont it-tliet stadji ddefiniti mill-Qorti tal-Ġustizzja sabiex tistabbilixxi jekk miżura fiskali partikolari għandhiex tiġi kklassifikata bħala “selettiva”.

16.

Fl-ewwel stadju ta’ din l-analiżi, il-Kummissjoni kkunsidrat li l-qafas ta’ referenza kien is-sistema ġenerali tat-taxxa fuq il-kumpanniji tal-Lussemburgu u li l-għan ta’ din is-sistema kien it-tassazzjoni tal-profitti tal-kumpanniji kollha residenti fil-Lussemburgu. Id-differenza fil-kalkolu tal-profitti taxxabbli bejn il-kumpanniji indipendenti u l-kumpanniji integrati ma kellha, skont il-Kummissjoni, ebda effett fuq dan l-għan sa fejn dan tal-aħħar kien jimplika t-tassazzjoni tal-profitti tal-kumpanniji residenti kollha, kemm jekk integrati kif ukoll jekk le. Bħad-dispożizzjonijiet partikolari applikabbli għall-gruppi, li kienu intiżi biss sabiex iqiegħdu fuq livell ugwali dawn iż-żewġ tipi ta’ kumpanniji. Barra minn hekk, l-għan tad-deċiżjoni bil-quddiem inkwistjoni, jiġifieri li jiġu ddeterminati l-profitti taxxabbli ta’ FFT għall-finijiet tat-taxxa fuq il-kumpanniji abbażi tal-imsemmija sistema, ikkonferma li din tal-aħħar kienet tikkostitwixxi l-qafas ta’ referenza sa fejn dan l-għan ma kienx jiddistingwi lil FFT minħabba l-appartenenza tagħha għal grupp. F’dan ir-rigward, il-Kummissjoni qieset li l-kumpanniji integrati u mhux integrati kienu jinsabu f’sitwazzjoni fattwali u legali simili fid-dawl tal-għan tas-sistema ġenerali tat-taxxa fuq il-kumpanniji tal-Lussemburgu ( 12 ).

17.

Fit-tieni stadju tal-analiżi tagħha, il-Kummissjoni qabel kollox indikat li l-kwistjoni dwar jekk miżura fiskali tikkostitwixxix deroga mill-qafas ta’ referenza ġeneralment tikkoinċidi mal-konstatazzjoni ta’ vantaġġ mogħti lill-benefiċjarju permezz ta’ din il-miżura. Fil-fehma tagħha, meta miżura fiskali twassal għal tnaqqis mhux iġġustifikat tat-taxxa dovuta minn benefiċjarju li, fl-assenza ta’ din il-miżura, ikollu jħallas taxxa ogħla skont il-kuntest ta’ referenza, dan it-tnaqqis jikkostitwixxi kemm il-vantaġġ mogħti mill-imsemmija miżura kif ukoll id-deroga mill-qafas ta’ referenza. Barra minn hekk, il-Kummissjoni fakkret li, fil-każ ta’ miżura individwali bħalma hija d-deċiżjoni bil-quddiem inkwistjoni, l-identifikazzjoni tal-vantaġġ tippermetti bħala prinċipju, skont il-ġurisprudenza, li s-selettività tagħha tiġi preżunta ( 13 ).

18.

Fir-rigward tad-determinazzjoni tal-vantaġġ f’dan il-każ, il-Kummissjoni fakkret li miżura fiskali li twassal lil kumpannija li tappartjeni lil grupp sabiex tiffattura prezzijiet ta’ trasferiment li huma inqas minn dawk li jintalbu bejn impriżi indipendenti kienet tagħti vantaġġ lil din il-kumpannija sa fejn din il-miżura twassal għal tnaqqis tal-bażi taxxabbli tagħha u, għaldaqstant, tat-taxxa dovuta b’applikazzjoni tas-sistema ġenerali tat-taxxa fuq il-kumpanniji. Fil-fehma tal-Kummissjoni, il-Qorti tal-Ġustizzja b’hekk aċċettat li l-prinċipju ta’ distakkament, jiġifieri “il-prinċipju li jgħid li t-tranżazzjonijiet imwettqa bejn kumpaniji tal-istess grupp għandhom jiġu rremunerati bħallikieku miftiehma minn kumpaniji indipendenti li jinnegozjaw f’ċirkostanzi komparabbli f’kundizzjonijiet ta’ distakkament” ( 14 ), iservi bħala kriterju ta’ referenza sabiex jiġi ddeterminat jekk kumpannija ta’ grupp tibbenefikax minn vantaġġ fis-sens tal-Artikolu 107(1) TFUE. Konsegwentement, il-Kummissjoni ppreċiżat li hija kellha tivverifika jekk il-metodu appoġġjat mill-awtorità tat-taxxa Lussemburgiża fid-deċiżjoni bil-quddiem inkwistjoni kienx jiddevja minn metodu li kien iwassal għal approssimazzjoni affidabbli ta’ riżultat ibbażat fuq is-suq u, minħabba f’hekk, mill-prinċipju ta’ distakkament. F’tali każ, id-deċiżjoni bil-quddiem inkwistjoni titqies, skont il-Kummissjoni, li tagħti vantaġġ selettiv lil FFT fis-sens tal-Artikolu 107(1) TFUE ( 15 ).

19.

Fid-dawl ta’ dawn il-kunsiderazzjonijiet, il-Kummissjoni qieset li diversi għażliet ta’ metodu u parametri u diversi aġġustamenti, ivvalidati mill-Gran Dukat tal-Lussemburgu u li huma l-bażi tal-analiżi tal-prezzijiet ta’ trasferiment fid-deċiżjoni bil-quddiem inkwistjoni, kienu jwasslu għal tnaqqis tat-taxxa fuq il-kumpanniji li l-kumpanniji indipendenti kellhom iħallsu ( 16 ).

20.

L-ewwel, fir-rigward tal-kapital proprju li għandu jiġi rremunerat, il-Kummissjoni qieset li l-fondi proprji regolatorji ipotetiċi ta’ FFT, magħżula mill-konsulent tat-taxxa, ma kinux jikkostitwixxu indikatur xieraq tal-livell ta’ profitti fil-kuntest tal-applikazzjoni tal-MTMN intiż sabiex tiġi stmata remunerazzjoni ta’ distakkament għall-funzjonijiet eżerċitati minn FFT. Il-Kummissjoni għalhekk ikkonstatat li, billi ħa inkunsiderazzjoni l-fondi regolatorji ipotetiċi, li jammontaw għal EUR 28.5 miljun, minflok il-kapital proprju ta’ kontabbiltà, li jammonta għal EUR 287.5 miljun għas-sena 2011, li abbażi tiegħu ġie applikat il-mudell ta’ pprezzar tal-assi kapitali (iktar ’il quddiem il-“MEDAF”), il-konsulent tat-taxxa kien qasam b’għaxra r-remunerazzjoni taxxabbli ta’ FFT ( 17 ).

21.

It-tieni, fir-rigward tal-applikazzjoni tal-Qafas ta’ Basel II sabiex jiġu ddeterminati l-fondi proprji regolatorji ipotetiċi, il-Kummissjoni qieset li l-Gran Dukat tal-Lussemburgu kien wettaq żbalji li wassluh sabiex jissottovaluta l-ammont tal-fondi regolatorji ipotetiċi ta’ FFT u li wasslu għal tnaqqis tal-ammont tat-taxxa dovuta minn FFT ( 18 ).

22.

It-tielet, il-Kummissjoni qieset li l-konsulent tat-taxxa ta’ FFT kien wettaq bosta tnaqqis fuq il-kapital rimanenti ta’ din il-kumpannija, li kien jiddevja minn riżultat ibbażat fuq is-suq. F’dan ir-rigward, hija qieset b’mod partikolari li d-deċiżjoni tal-konsulent tat-taxxa li jiżola l-komponent tal-fondi proprji msejjaħ “fondi proprji li jkopru l-investimenti finanzjarji f’[Fiat Finance North America Inc. (iktar ’il quddiem FFNA)] u [Fiat Finance Canada (iktar ’il quddiem FFC)]” u li jagħtih remunerazzjoni nulla sabiex tiġi stmata l-bażi taxxabbli ta’ FFT ma kinitx xierqa ( 19 ).

23.

Ir-raba’, il-Kummissjoni qieset li l-għażla magħmula mill-konsulent tat-taxxa li jżomm beta ta’ 0.29 fl-applikazzjoni tal-MEDAF sabiex jistabbilixxi r-dħul tal-kapital proprju li għandu jiġi applikat għall-fondi proprji regolatorji ipotetiċi ta’ FFT kienet twassal għal allokazzjoni tal-profitti lil FFT li ma kinitx konformi mal-prinċipju ta’ distakkament ( 20 ).

24.

Il-Kummissjoni għalhekk qieset b’mod partikolari, l-ewwel, li l-livell ta’ remunerazzjoni xieraq għall-funzjonijiet ta’ finanzjament u ta’ teżor ta’ FFT kellu jiġi stabbilit fuq il-bażi tal-fondi proprji ta’ kontabbiltà; it-tieni, li s-sena 2012 kienet tikkostitwixxi sena ta’ referenza xierqa sabiex tiġi stabbilita l-bażi taxxabbli ta’ FFT fil-Lussemburgu; it-tielet, li d-dħul tal-kapital proprju qabel it-taxxa ta’ 6.05 % (u dak wara t-taxxa ta’ 4.3 %), aċċettat bid-deċiżjoni bil-quddiem inkwistjoni u kkalkolat skont il-MEDAF, kien ferm taħt id-dħul tal-kapital proprju meħtieġ fis-settur finanzjarju, li kien baqa’ b’mod konsistenti ta’ 10 % u iktar; ir-raba’, li r-rendiment ta’ kapital proprju meħtieġ kien ta’ 10 % wara t-taxxa applikata għall-ammont sħiħ tal-kapital proprju ta’ kontabbiltà ( 21 ).

25.

Sussidjarjament, il-Kummissjoni qieset li, fi kwalunkwe każ, id-deċiżjoni bil-quddiem inkwistjoni kienet tagħti vantaġġ selettiv inkluż fir-rigward ta’ qafas ta’ referenza iktar limitat, invokat mill-Gran Dukat tal-Lussemburgu u minn FFT, magħmul mill-Artikolu 164(3) tal-Kodiċi tat-Taxxa u miċ-Ċirkulari Nru 164/2, li kienu jipprevedu l-prinċipju ta’ distakkament fid-dritt tat-taxxa Lussemburgiż ( 22 ). Barra minn hekk, il-Kummissjoni ma qablitx mal-argument ta’ FFT li jgħid li, sabiex turi l-eżistenza ta’ trattament selettiv favur tagħha b’riżultat tad-deċiżjoni bil-quddiem inkwistjoni, hija kellha tqabbel din id-deċiżjoni bil-quddiem mal-prattika tal-awtorità tat-taxxa Lussemburgiża bbażata fuq iċ-Ċirkulari, b’mod partikolari mad-deċiżjonijiet bil-quddiem mogħtija lil kumpanniji oħra ta’ finanzjament u ta’ teżor li l-Gran Dukat tal-Lussemburgu kien ipprovda lill-Kummissjoni bħala kampjun rappreżentattiv tal-prattika tiegħu fir-rigward tad-deċiżjonijiet bil-quddiem ( 23 ).

26.

Fit-tielet stadju tal-analiżi tagħha, il-Kummissjoni osservat li la l-Gran Dukat tal-Lussemburgu u lanqas FFT ma kienu pprovdew l-iċken raġuni li tiġġustifika t-trattament preferenzjali ta’ FFT li jirriżulta mid-deċiżjoni bil-quddiem inkwistjoni, u li, fi kwalunkwe każ, ma setgħet tiġi identifikata l-ebda raġuni li tista’ titqies li tirriżulta direttament mill-prinċipji fundaturi tal-qafas ta’ referenza, jew li kienet tirriżulta mill-mekkaniżmi inerenti għas-sistema meħtieġa għall-funzjonament u għall-effikaċja tagħha ( 24 ).

27.

Il-Kummissjoni qieset, bħala konklużjoni, li d-deċiżjoni bil-quddiem inkwistjoni kienet tat lil FFT vantaġġ selettiv u li din id-deċiżjoni kienet tikkostitwixxi għalhekk għajnuna mill-Istat fis-sens tal-Artikolu 107(1) TFUE.

28.

Il-benefiċjarju ta’ din l-għajnuna kien, skont il-Kummissjoni, il-grupp tal-karozzi Fiat/Chrysler kollu kemm hu, sa fejn FFT kienet tifforma entità ekonomika mal-entitajiet l-oħra ta’ dan il-imsemmi grupp u li t-tnaqqis tat-taxxa dovuta minn FFT kellu neċessarjament l-effett li jnaqqas il-kundizzjonijiet tal-prezz tas-self fi ħdan il-gruppi mogħtija minn FFT ( 25 ).

29.

Permezz ta’ rikors ippreżentat fir-Reġistru tal-Qorti Ġenerali fit‑30 ta’ Diċembru 2015, il-Gran Dukat tal-Lussemburgu ppreżenta r-rikors fil-Kawża T‑755/15, intiż għall-annullament tad-deċiżjoni kontenzjuża.

30.

Permezz ta’ att ippreżentat fir-Reġistru tal-Qorti Ġenerali fid‑29 ta’ Diċembru 2015, FFT ippreżentat ir-rikors fil-Kawża T‑759/15, intiż ukoll għall-annullament tad-deċiżjoni kontenzjuża.

31.

Permezz tad-digrieti tal‑25 ta’ Mejju 2016 u tat‑18 ta’ Lulju 2016, il-President tal-Ħames Awla tal-Qorti Ġenerali laqa’ t-talbiet għal intervent tar-Renju Unit u tal-Irlanda fil-Kawżi T‑755/15 u T‑759/15. Peress li r-Renju Unit irtira l-intervent tiegħu permezz ta’ att ippreżentat fir-Reġistru tal-Qorti Ġenerali fid‑9 ta’ Diċembru 2016, dan tħassar miż-żewġ kawżi bħala intervenjent b’digriet tal-President tas-Seba’ Awla Estiża tal‑15 ta’ Diċembru 2016.

32.

Permezz ta’ digriet tal-President tas-Seba’ Awla Estiża tal-Qorti Ġenerali tas‑27 ta’ April 2018, wara li nstemgħu l-partijiet, il-Kawżi T‑755/15 u T‑759/15 ingħaqdu għall-finijiet tal-fażi orali tal-proċedura, skont l-Artikolu 68(1) tar-Regoli tal-Proċedura tal-Qorti Ġenerali. Barra minn hekk, wara li nstemgħu l-partijiet waqt is-seduta, il-Qorti Ġenerali ddeċidiet li kien hemm lok li l-Kawżi T‑755/15 u T‑759/15 jingħaqdu għall-finijiet tad-deċiżjoni li tagħlaq l-istanza, minħabba konnessjoni, skont din l-istess dispożizzjoni.

33.

Insostenn tar-rikorsi tagħhom, FFT u l-Gran Dukat tal-Lussemburgu qajmu ħames sensiliet ta’ motivi li kienu, essenzjalment, ibbażati:

34.

Permezz tas-sentenza appellata, il-Qorti Ġenerali ċaħdet dawn il-motivi kollha u, għaldaqstant, ir-rikorsi fil-Kawżi T‑755/15 u T‑759/15 fl-intier tagħhom.

35.

Fir-rigward tat-tieni sensiela ta’ motivi, u b’mod partikolari l-motivi bbażati fuq l-applikazzjoni żbaljata tal-prinċipju ta’ distakkament għall-istħarriġ tal-għajnuna mill-Istat, il-Qorti Ġenerali rrilevat qabel kollox li, fil-kuntest tad-determinazzjoni tas-sitwazzjoni fiskali ta’ kumpannija integrata, il-prezzijiet ta’ tranżazzjonijiet fi ħdan il-grupp ma humiex stabbiliti f’kundizzjonijiet tas-suq. Sussegwentement hija qieset li, sabiex tiddetermina l-eżistenza eventwali ta’ vantaġġ fis-sens tal-Artikolu 107(1) TFUE, il-Kummissjoni tista’ tqabbel il-piż fiskali ta’ tali impriża integrata li jirriżulta mill-applikazzjoni ta’ miżura fiskali ma’ dak ta’ impriża li teżerċita l-attivitajiet tagħha f’kundizzjonijiet tas-suq u li jirriżulta mill-applikazzjoni tar-regoli ta’ tassazzjoni normali tad-dritt nazzjonali, meta d-dritt fiskali nazzjonali ma jagħmilx distinzjoni bejn l-impriżi integrati u l-impriżi indipendenti għall-finijiet tal-issuġġettar tagħhom għat-taxxa fuq il-kumpanniji u għalhekk għandu l-għan li jintaxxa l-profitt tal-ewwel impriżi daqslikieku kien jirriżulta minn tranżazzjonijiet imwettqa bi prezzijiet tas-suq ( 26 ).

36.

F’dan il-kuntest, il-prinċipju ta’ distakkament jikkostitwixxi, skont il-Qorti Ġenerali, “għodda” jew “kriterju ta’ referenza” li jippermetti li jiġi vverifikat jekk il-prezzijiet tat-tranżazzjonijiet fi ħdan il-grupp aċċettati mill-awtoritajiet nazzjonali jikkorrispondux għall-prezzijiet ipprattikati f’kundizzjonijiet tas-suq, sabiex jiġi ddeterminat jekk kumpannija integrata tibbenefikax, bis-saħħa ta’ miżura fiskali li tiddefinixxi l-prezzijiet ta’ trasferiment tagħha, minn vantaġġ fis-sens tal-Artikolu 107(1) TFUE ( 27 ).

37.

Il-Qorti Ġenerali sussegwentement osservat li, f’dan il-każ, id-deċiżjoni bil-quddiem inkwistjoni tirrigwarda d-determinazzjoni tal-profitti taxxabbli ta’ FFT skont il-Kodiċi tat-Taxxa Lussemburgiż u li dan il-kodiċi huwa intiż sabiex jintaxxa l-profitt li jirriżulta mill-attività ekonomika ta’ din l-impriża integrata daqslikieku kien jirriżulta minn tranżazzjonijiet imwettqa bi prezzijiet tas-suq. Fuq din il-bażi, hija qieset li l-Kummissjoni setgħet tipparaguna sew il-profitt taxxabbli ta’ FFT li jirriżulta mill-applikazzjoni tad-deċiżjoni bil-quddiem inkwistjoni mal-profitt taxxabbli, li jirriżulta mill-applikazzjoni tar-regoli ta’ tassazzjoni normali tad-dritt Lussemburgiż, ta’ impriża li tinsab f’sitwazzjoni fattwali komparabbli u li teżerċita l-attivitajiet tagħha f’kundizzjonijiet ta’ kompetizzjoni ħielsa ( 28 ).

38.

Fl-aħħar nett, il-Qorti Ġenerali ċaħdet l-argumenti tal-Gran Dukat tal-Lussemburgu u ta’ FFT intiżi li jikkontestaw din il-konklużjoni.

39.

Fir-rigward tal-argumenti li l-Kummissjoni ma kienet tat ebda bażi legali għall-prinċipju tagħha ta’ distakkament u ma kinitx ippreċiżat il-kontenut tiegħu, il-Qorti Ġenerali ddikjarat, fid-dawl tal-bażi legali, li l-Kummissjoni kienet tabilħaqq indikat, l-ewwel, li l-prinċipju ta’ distakkament kien neċessarjament jagħmel parti integrali mill-eżami, skont l-Artikolu 107(1) TFUE, tal-miżuri fiskali mogħtija lill-kumpanniji ta’ grupp u, it-tieni, li dan il-prinċipju kien prinċipju ġenerali ta’ ugwaljanza fit-trattament fil-qasam tat-tassazzjoni li jaqa’ taħt l-applikazzjoni ta’ dan l-artikolu tat-Trattat ( 29 ). Fir-rigward tal-kontenut tal-prinċipju ta’ distakkament, il-Qorti Ġenerali kkunsidrat li mid-deċiżjoni kontenzjuża jirriżulta li dan huwa għodda li tippermetti li jiġi vverifikat li t-tranżazzjonijiet fi ħdan il-grupp jiġu rremunerati daqslikieku kienu ġew innegozjati minn impriżi indipendenti ( 30 ).

40.

F’dak li jirrigwarda l-argument li l-prinċipju ta’ distakkament applikat fid-deċiżjoni kontenzjuża kien kriterju barrani għad-dritt fiskali Lussemburgiż, u b’hekk ippermetta lill-Kummissjoni twettaq, b’mod definittiv, armonizzazzjoni moħbija fil-qasam tat-tassazzjoni diretta bi ksur tal-awtonomija fiskali tal-Istati Membri, il-Qorti Ġenerali qieset li dan ma kienx fondat peress li l-użu ta’ dan il-prinċipju kien awtorizzat mill-fatt li r-regoli fiskali Lussemburgiżi kienu jipprevedu li l-kumpanniji integrati jiġu ntaxxati bl-istess mod bħall-kumpanniji indipendenti ( 31 ).

41.

Fir-rigward tal-argument li l-Kummissjoni kienet indebitament iddikjarat, fid-deċiżjoni kontenzjuża, l-eżistenza ta’ prinċipju ġenerali ta’ ugwaljanza fit-trattament fil-qasam tat-tassazzjoni, il-Qorti Ġenerali kkunsidrat li din il-formulazzjoni tal-Kummissjoni ma kellhiex tiġi iżolata mill-kuntest tagħha u ma setgħetx tiġi interpretata fis-sens li l-Kummissjoni kienet irrikonoxxiet l-eżistenza ta’ prinċipju ta’ ugwaljanza fit-trattament fir-rigward tat-taxxa inerenti fl-Artikolu 107(1) TFUE ( 32 ).

42.

Fir-rigward tal-motiv ibbażat fuq l-eżistenza ta’ żbalji ta’ metodoloġija ta’ kalkolu fid-determinazzjoni tar-remunerazzjoni ta’ FFT, il-Qorti Ġenerali ddeċidiet li, fid-deċiżjoni kontenzjuża, il-Kummissjoni kienet qieset ġustament, l-ewwel, li l-kapital proprju kollu ta’ FFT kellu jittieħed inkunsiderazzjoni għall-finijiet tal-kalkolu tar-remunerazzjoni tal-attivitajiet tagħha ta’ finanzjament fi ħdan il-grupp u ta’ teżor ( 33 ); it-tieni, li l-Gran Dukat tal-Lussemburgu ma kellux jieħu l-kapital regolatorju ipotetiku ta’ FFT bħala bażi għall-kalkolu tar-remunerazzjoni tar-riskji ( 34 ); it-tielet, li l-Gran Dukat tal-Lussemburgu kien eskluda b’mod żbaljat parti mill-kapital proprju ta’ FFT, sal-livell tal-parteċipazzjonijiet tagħha fis-sussidjarji tagħha, mill-kapital li kellu jittieħed inkunsiderazzjoni biex tiġi ddeterminata r-remunerazzjoni ta’ FFT għall-attivitajiet ta’ finanzjament fi ħdan il-grupp u ta’ teżor ( 35 ). Konsegwentement, il-Qorti Ġenerali kkonstatat li l-metodu approvat mill-awtoritajiet tat-taxxa Lussemburgiżi kien naqqas ir-remunerazzjoni ta’ FFT, li serviet biex tiġi ddeterminata t-taxxa dovuta minn din tal-aħħar, u b’hekk ingħatalha vantaġġ ekonomiku, mingħajr il-ħtieġa li jiġi eżaminat l-ilment tal-Gran Dukat tal-Lussemburgu dwar l-iżball magħmul mill-Kummissjoni fl-identifikazzjoni tar-rata ta’ dħul.

43.

Permezz tal-appell tagħha, Fiat Chrysler Finance Europe titlob li l-Qorti tal-Ġustizzja jogħġobha:

44.

Il-Kummissjoni titlob li l-Qorti tal-Ġustizzja jogħġobha:

45.

L-Irlanda titlob lill-Qorti tal-Ġustizzja:

46.

Fiat Chrysler Finance Europe, l-Irlanda, il-Gran Dukat tal-Lussemburgu u l-Kummissjoni ppreżentaw l-osservazzjonijiet orali tagħhom quddiem il-Qorti tal-Ġustizzja waqt seduta konġunta għall-Kawżi C‑885/19 P u C‑898/19 P li saret fl‑10 ta’ Mejju 2021.

47.

Insostenn tal-appell tagħha, FFT, li magħha ngħaqdet l-Irlanda, tqajjem tliet aggravji. L-ewwel wieħed huwa bbażat fuq ksur tal-Artikolu 107(1) TFUE sa fejn il-Qorti Ġenerali allegatament wettqet diversi żbalji fl-analiżi tagħha dwar jekk l-appellanti kinitx ibbenefikat minn vantaġġ ekonomiku. It-tieni motiv huwa bbażat fuq ksur tal-obbligu ta’ motivazzjoni sa fejn il-Qorti Ġenerali evalwat il-bażi legali tal-prinċipju ta’ distakkament b’mod inkoerenti u kontradittorju. It-tielet motiv huwa bbażat fuq ksur tal-prinċipju ta’ ċertezza legali sa fejn il-Qorti Ġenerali, l-ewwel, ikkonfermat il-prinċipju ddefinit b’mod żbaljat “ta’ distakkament” mingħajr ma kkontrollat il-portata u l-kontenut tiegħu u, it-tieni, qieset li l-preżunzjoni ta’ selettività kienet tapplika għad-deċiżjoni bil-quddiem inkwistjoni. Għall-finijiet ta’ ċarezza u ta’ koerenza, ser nibda bit-tieni motiv imqajjem minn FFT.

48.

Permezz tal-ewwel parti tat-tieni aggravju, FFT issostni li s-sentenza appellata hija vvizzjata b’raġunament inkoerenti u kontradittorju fir-rigward tal-analiżi tal-bażi legali tal-prinċipju ta’ distakkament tal-Kummissjoni. Filwaqt li tikkonferma l-approċċ irrakkomandat mill-Kummissjoni, il-Qorti Ġenerali tinjora dan l-approċċ b’mod flagranti billi tissuġġetta l-applikazzjoni ta’ dan il-prinċipju għall-inkorporazzjoni tiegħu fid-dritt tal-Istat Membru inkwistjoni, mingħajr ma tagħti l-ebda spjegazzjoni jew ġustifikazzjoni. Barra minn hekk, il-Qorti Ġenerali tindika li l-prinċipju ta’ distakkament tal-Kummissjoni la jirriżulta mid-dritt nazzjonali u lanqas mill-OECD, u li huwa inerenti għall-Artikolu 107 TFUE bħala prinċipju ta’ ugwaljanza fit-trattament fil-qasam tat-tassazzjoni, filwaqt li żżid li dan l-artikolu ma jinkludi ebda prinċipju ta’ ugwaljanza fit-trattament fil-qasam tat-tassazzjoni. Dan l-argument konfuż u inkoerenti jikkostitwixxi, skont FFT, difett ta’ motivazzjoni tas-sentenza.

49.

Permezz tat-tieni parti tat-tieni aggravju, FFT issostni, l-ewwel, li l-Qorti Ġenerali żbaljat meta vvalidat, fil-punt 142 tas-sentenza appellata, ir-riferiment tad-deċiżjoni kontenzjuża għas-sentenza Forum 187 ( 36 ) insostenn tat-teżi li tgħid li l-prinċipju ta’ distakkament huwa applikabbli indipendentement mill-inkorporazzjoni tiegħu minn qabel fid-dritt nazzjonali. F’dan ir-rigward, FFT tqis, barra minn hekk, li l-Qorti Ġenerali naqset milli tieħu inkunsiderazzjoni l-effett tal-bdil ta’ pożizzjoni fuq l-applikabbiltà tas-sentenza Forum 187. It-tieni, FFT targumenta li r-raġunament tal-Qorti Ġenerali fis-sentenza appellata jagħti stampa mħawda tal-bażi tal-prinċipju ta’ distakkament. Minn dan isegwi li dan ir-raġunament huwa manifestament żbaljat, inkoerenti u kontradittorju, bi ksur tal-obbligu ta’ motivazzjoni li għandha l-Qorti Ġenerali.

50.

Il-Kummissjoni ssostni li t-tieni aggravju għandu jiġi miċħud minħabba n-natura ineffettiva tiegħu. Fi kwalunkwe każ, kemm l-ewwel kif ukoll it-tieni parti ta’ dan l-aggravju għandhom, skont il-Kummissjoni, jiġu miċħuda fil-mertu. F’dak li jirrigwarda l-ewwel parti, il-Kummissjoni tqis li din tirriżulta minn qari selettiv u deformat tas-sentenza appellata u għalhekk għandha tiġi miċħuda. Fir-rigward tat-tieni parti, il-Kummissjoni ssostni b’mod partikolari li l-Qorti Ġenerali ġustament ibbażat ruħha fuq is-sentenza Forum 187 insostenn tal-konklużjoni li hija waslet għaliha dwar il-bażi legali tal-prinċipju ta’ distakkament.

51.

Il-Kummissjoni tqis li t-tieni aggravju huwa ineffettiv sa fejn, anki jekk jitqies li dan l-aggravju jintlaqa’, dan ma jistax iwassal għall-annullament tas-sentenza appellata. Dan l-aggravju huwa bbażat fuq l-affermazzjoni li l-Qorti Ġenerali wettqet żball ta’ liġi meta kkonfermat l-użu mill-Kummissjoni ta’ prinċipju ta’ distakkament sui generis insostenn tal-konstatazzjoni prinċipali tagħha dwar l-eżistenza ta’ vantaġġ selettiv. Issa, anki kieku din l-affermazzjoni kienet eżatta, fatt li l-Kummissjoni tikkontesta, id-deċiżjoni kontenzjuża tinkludi raġunament sussidjarju bbażat fuq bażi legali differenti, jiġifieri l-Artikolu 164(3) tal-Kodiċi dwar it-Taxxa u ċ-Ċirkulari Nru 164/2, raġunament li ġie approvat mill-Qorti Ġenerali mingħajr ma ġie kkontestat minn FFT.

52.

F’dan ir-rigward, qabel kollox għandu jitfakkar li l-premessi 315 sa 317 tad-deċiżjoni kontenzjuża jesponu raġunament sussidjarju li jgħid li d-deċiżjoni bil-quddiem inkwistjoni tagħti wkoll vantaġġ selettiv lil FFT meta din tiġi eżaminata fir-rigward tal-qafas ta’ referenza iktar limitat magħmul mill-kumpanniji integrati kollha li japplikaw prezzijiet ta’ trasferiment u li jaqgħu taħt id-dispożizzjonijiet nazzjonali msemmija iktar ’il fuq. Dan ir-raġunament ġie, essenzjalment, ikkonfermat mill-Qorti Ġenerali fil-punti 287 sa 299 tas-sentenza appellata.

53.

Issa, huwa evidenti li l-kwistjoni dwar il-bażi legali tal-prinċipju ta’ distakkament ġiet prinċipalment eżaminata mill-Qorti Ġenerali fil-punti 140 sa 148 tas-sentenza appellata, li jista’ jagħti x’jifhem li l-eventwali rikonoxximent tal-fondatezza ta’ dan l-aggravju ma għandux effett fuq l-eżami mwettaq mill-Qorti Ġenerali sussidjarjament fil-punti 287 sa 299 ta’ din is-sentenza. Madankollu, qari iktar bir-reqqa tas-sentenza appellata juri li dan l-eżami ma jistax jitqies li huwa diviżibbli u indipendenti mir-raġunament żviluppat mill-Qorti Ġenerali, prinċipalment, fil-punti 140 sa 148 ta’ din is-sentenza.

54.

Fil-fatt, fl-evalwazzjoni tar-raġunament sussidjarju tal-Kummissjoni, il-Qorti Ġenerali rrikonoxxiet li din kienet ittrasponiet ġustament ċerti elementi ta’ analiżi li jirrigwardaw ir-raġunament prinċipali tagħha. B’mod partikolari, hija kkonstatat, fil-punti 292 u 294 tas-sentenza appellata, li r-raġunament sussidjarju tal-Kummissjoni kien ibbażat fuq l-eżami prinċipali tagħha tad-deċiżjoni bil-quddiem inkwistjoni, u b’mod partikolari fuq it-Taqsima 7.2.2 tad-deċiżjoni kontenzjuża, li jidhirli li tinkludi l-argumenti tal-Kummissjoni ddedikati għall-bażi legali u l-portata tal-prinċipju ta’ distakkament kif ukoll għall-applikazzjoni ta’ dan il-prinċipju għall-każ inkwistjoni ( 37 ). Peress li l-bażi legali tar-raġunament sussidjarju tal-Kummissjoni, kif ivvalidat mill-Qorti Ġenerali, tirriżulta mill-eżami prinċipali tagħha, l-ewwel wieħed ma jistax jissussisti legalment għall-illegalità tat-tieni wieħed. Fi kliem ieħor, kieku t-tieni aggravju mressaq minn FFT kellu jintlaqa’, u b’hekk jiġi invalidat l-użu tal-prinċipju ta’ distakkament, dan ir-raġunament sussidjarju jkun ukoll ivvizzjat bi żball ta’ liġi, b’tali mod li l-konklużjoni misluta mid-deċiżjoni kontenzjuża, kif ikkonfermata mis-sentenza appellata, ma tibqax valida.

55.

Għalhekk inqis li t-tieni aggravju ta’ dan l-appell ma jistax jiġi ddikjarat ineffettiv.

56.

Preliminarjament, għandu jitfakkar li, skont ġurisprudenza stabbilita, il-motivazzjoni ta’ sentenza tal-Qorti Ġenerali għandha turi b’mod ċar u inekwivoku r-raġunament tagħha, b’mod li l-persuni kkonċernati jkunu jistgħu jsiru jafu l-ġustifikazzjonijiet tad-deċiżjoni meħuda u l-Qorti tal-Ġustizzja tkun tista’ teżerċita l-istħarriġ ġudizzjarju tagħha ( 38 ).

57.

Il-Qorti tal-Ġustizzja hija għalhekk mitluba tiddetermina jekk il-motivazzjoni tas-sentenza appellata dwar il-bażi legali tal-prinċipju ta’ distakkament hijiex konformi mal-kundizzjonijiet meħtieġa minn din il-ġurisprudenza. Fil-fehma tiegħi, it-tweġiba għal din il-mistoqsija għandha tkun fl-affermattiv għar-raġunijiet li ġejjin.

58.

Qabel kollox, hemm lok li jiġi osservat li l-kritika magħmula minn FFT fl-appell tagħha hija indirizzata prinċipalment kontra l-punti 149 sa 162 tas-sentenza appellata. Issa, jidhirli li ma hemmx dubju li l-parti l-kbira tar-raġunament tal-Qorti Ġenerali dwar il-bażi legali tal-prinċipju ta’ distakkament applikat fid-deċiżjoni kontenzjuża jinsab pjuttost fil-punti 140 sa 148 ta’ din is-sentenza.

59.

Kif diġà fakkart iktar ’il fuq, il-Qorti Ġenerali essenzjalment osservat, fil-punt 140 tal-imsemmija sentenza, li l-piż fiskali ta’ kull kumpannija integrata ma huwiex iddeterminat skont loġika tas-suq minħabba li l-prezzijiet ta’ tranżazzjonijiet fi ħdan il-grupp huma miftiehma bejn il-kumpanniji li jifformaw parti mill-istess grupp. Sussegwentement, il-Qorti Ġenerali indikat, fil-punt 141 tas-sentenza appellata, li, meta miżura fiskali tingħata lil impriża integrata, il-Kummissjoni tista’ tivverifika l-eżistenza ta’ vantaġġ ekonomiku billi tqabbel il-piż fiskali li jirriżulta mill-applikazzjoni ta’ din il-miżura ma’ dak li jirriżulta mill-applikazzjoni tar-regoli ta’ tassazzjoni “normali” tad-dritt nazzjonali ta’ impriża mqiegħda f’sitwazzjoni paragunabbli.

60.

Qabel ma esponiet b’dan il-mod il-kontenut tal-prinċipju ta’ distakkament użat fid-deċiżjoni kontenzjuża, il-Qorti Ġenerali ppreċiżat, fl-istess punt, li dan il-prinċipju huwa applikabbli “meta d-dritt fiskali nazzjonali ma jagħmilx distinzjoni bejn l-impriżi integrati u l-impriżi awtonomi għall-finijiet tal-issuġġettar tagħhom għat-taxxa fuq il-kumpanniji”, peress li, f’każ bħal dan, “dan id-dritt ikollu l-intenzjoni li jintaxxa l-profitt li jirriżulta mill-attività ekonomika ta’ tali impriża integrata bħalma kien jirriżulta minn tranżazzjonijiet imwettqa għal prezzijiet tas-suq”. B’hekk, is-sentenza appellata tindika b’mod ċar li l-bażi legali tal-prinċipju ta’ distakkament tinsab fid-dritt nazzjonali, u b’mod iktar preċiż fil-fatt li dan id-dritt jirrifletti l-għan tal-leġiżlatur nazzjonali li jittratta lill-kumpanniji integrati, għal finijiet fiskali, bl-istess mod bħall-kumpanniji indipendenti għall-finijiet tat-taxxa fuq il-kumpanniji. Għalkemm, fil-punt 142, il-Qorti Ġenerali tirreferi għas-sentenza Forum 187”, dan kien biss sabiex issostni l-konklużjonijiet li hija siltet.

61.

Wara li l-bażi legali tal-prinċipju ta’ distakkament ġie ddefinit b’dan il-mod u wara li esponiet, fil-punti 143 u 144 tas-sentenza appellata, ir-rwol ta’ dan il-prinċipju fid-determinazzjoni tal-eżistenza ta’ vantaġġ fis-sens tal-Artikolu 107(1) TFUE, il-Qorti Ġenerali kkunsidrat, fil-punt 145 ta’ din is-sentenza, li l-prinċipju msemmi kien applikabbli f’dan il-każ sa fejn il-Kodiċi tat-Taxxa Lussemburgiż kien intiż sabiex jintaxxa lill-kumpanniji integrati u lill-kumpanniji indipendenti bl-istess mod skont it-taxxa fuq il-kumpanniji. Fil-punt 147 tas-sentenza appellata, il-Qorti Ġenerali żiedet li, għalkemm il-Kummissjoni ma hijiex marbuta mil-Linji Gwida tal-OECD fl-implimentazzjoni tal-prinċipju ta’ distakkament, dawn il-linji gwida “għandhom importanza prattika ċerta fl-interpretazzjoni tal-kwistjonijiet relatati mal-prezzijiet ta’ trasferiment”.

62.

Fid-dawl ta’ dawn l-iżviluppi, il-motivi tal-Qorti Ġenerali li jinsabu fil-punti 149 sa 162 tas-sentenza appellata, li ġew miżjuda sabiex jittieħdu inkunsiderazzjoni ċerti argumenti mressqa minn FFT u mill-Gran Dukat tal-Lussemburgu fl-ewwel istanza, ma jiżvelawx inkoerenza jew kontradizzjoni intrinsika.

63.

F’dan ir-rigward, għandu jiġi osservat, fl-ewwel lok, li ma hemm ebda kontradizzjoni bejn l-affermazzjoni li tgħid li l-prinċipju ta’ distakkament kif deskritt fid-deċiżjoni kontenzjuża jeżisti “indipendentement mill-inkorporazzjoni ta’ tali prinċipju fis-sistema ġuridika nazzjonali” — li tirriżulta mill-premessi 228 u 229 ta’ din id-deċiżjoni u li hija sostanzjalment ivvalidata mill-Qorti Ġenerali fil-punti 149 et seq. tas-sentenza appellata — u l-idea li dan il-prinċipju huwa applikabbli f’dan il-każ minħabba l-fatt li huwa “inerenti għas-sistema ordinarja ta’ tassazzjoni kif previst mid-dritt nazzjonali”, biex nużaw il-kliem li użat il-Kummissjoni fis-seduta quddiem il-Qorti Ġenerali u li din irrepetiet fil-punt 152 tas-sentenza appellata.

64.

Fil-fehma tiegħi, il-kliem repetut fil-punt 152 tas-sentenza appellata għandu jiġi assimilat ma’ dak tal-ewwel sentenza tal-punt 141 ta’ din is-sentenza. Fi kliem ieħor, ikun żbaljat li jinftiehem, bħalma tagħmel FFT, fis-sens li l-Qorti Ġenerali ssuġġettat il-possibbiltà li jintuża l-prinċipju ta’ distakkament applikat fid-deċiżjoni kontenzjuża għall-inkorporazzjoni preċedenti tiegħu fid-dritt nazzjonali. Għall-kuntrarju, il-Qorti Ġenerali riedet tfisser li l-prinċipju ta’ distakkament japplika indipendentement mill-fatt li jkun ġie espliċitament ikkodifikat fid-dritt nazzjonali, sakemm ikun jista’ jiġi kkonstatat li s-sistema fiskali nazzjonali li tirregola t-taxxa fuq il-kumpanniji tkun intiża sabiex titratta lill-kumpanniji integrati, għal finijiet fiskali, bl-istess mod bħall-kumpanniji indipendenti, ħaġa li hija kompletament koerenti mal-kontenut tal-punt 149 tas-sentenza appellata.

65.

Fit-tieni lok, inqis li ċ-ċarezza u l-koerenza tar-raġunament tal-Qorti Ġenerali stabbilit fil-bażi legali tal-prinċipju ta’ distakkament lanqas ma huma mdgħajfa, kif tallega FFT, mill-fatt li l-Qorti Ġenerali vvalidat, fil-punti 147 u 149 ta’ din is-sentenza, l-affermazzjoni tal-Kummissjoni li tgħid li l-prinċipju ta’ distakkament applikat fid-deċiżjoni kontenzjuża huwa distint minn dak tal-OECD. F’dan ir-rigward ninsisti fuq il-fatt li mir-raġunament kollu jirriżulta li l-Qorti Ġenerali ma ddeċidietx li dan il-prinċipju ta’ distakkament għandu l-bażi legali tiegħu f’regola kkodifikata, li kienet neċessarjament tiġi introdotta sabiex tittrasponi fid-dritt fiskali nazzjonali l-prinċipju ta’ distakkament stabbilit fi ħdan l-OECD.

66.

Fit-tielet u l-aħħar lok, nirrileva li l-allegata inkoerenza bejn il-punti 150 u 161 tas-sentenza appellata, allegata minn FFT, tirriżulta minn fehim żbaljat ta’ dawn il-punti. Għaldaqstant huwa utli li jiġi eżaminat il-kliem tagħhom.

67.

Fil-punt 150 tas-sentenza appellata, il-Qorti Ġenerali ddikjarat li l-Kummissjoni kienet indikat, fil-premessa 228 tad-deċiżjoni kontenzjuża, li l-prinċipju ta’ distakkament kien “prinċipju ġenerali ta’ ugwaljanza fit-trattament fir-rigward tat-tassazzjoni, li kien jirriżulta mill-applikazzjoni tal-Artikolu 107(1) TFUE” ( 39 ). Fil-punt 161 ta’ din is-sentenza, il-Qorti Ġenerali wieġbet għal ilment mill-Irlanda u FFT billi indikat li din il-formulazzjoni ma setgħetx tinftiehem bħala li tikkonferma l-eżistenza ta’ “prinċipju ġenerali ta’ ugwaljanza fit-trattament fir-rigward tat-taxxa inerenti għall-Artikolu 107(1) TFUE” ( 40 ).

68.

Kuntrarjament għal dak li tallega FFT, il-premessa 228 tad-deċiżjoni kontenzjuża, kif irriprodotta fil-punt 150 tas-sentenza appellata, ma tfissirx neċessarjament li l-prinċipju ta’ distakkament jirriżulta mill-Artikolu 107(1) TFUE. Għall-kuntrarju, jidhirli li l-Qorti Ġenerali ċaħdet, fil-punt 161 tas-sentenza appellata, tali interpretazzjoni ta’ din il-premessa, b’konformità sħiħa mal-konklużjoni, magħmula preċedentement fil-punt 141 tas-sentenza appellata, li l-bażi legali tal-prinċipju ta’ distakkament jinsab fid-dritt nazzjonali, u b’mod partikolari fil-fatt li dan id-dritt jirrifletti l-għan tal-leġiżlatur nazzjonali li jittratta l-kumpanniji integrati, għal finijiet fiskali, bl-istess mod bħall-kumpanniji indipendenti taħt it-taxxa fuq il-kumpanniji. Il-kwistjoni dwar jekk din il-bażi legali hijiex konformi mal-ġurisprudenza rilevanti ma hijiex is-suġġett ta’ dan l-aggravju.

69.

Sa fejn il-motivazzjoni żviluppata mill-Qorti Ġenerali fir-rigward tal-bażi legali tal-prinċipju ta’ distakkament tissodisfa l-kundizzjonijiet ta’ ċarezza u ta’ koerenza meħtieġa mill-ġurisprudenza, jiena tal-opinjoni li l-Qorti tal-Ġustizzja għandha tiċħad l-ewwel parti ta’ dan l-aggravju.

70.

It-tieni parti tat-tieni aggravju tifforma wkoll parti mill-allegazzjoni ta’ FFT li l-motivazzjoni tas-sentenza appellata hija inkoerenti u kontradittorja.

71.

Permezz tal-ewwel ilment tagħha, FFT targumenta li l-ksur tal-obbligu ta’ motivazzjoni mwettaq b’dan il-mod joriġina minn qari żbaljat tal-portata tas-sentenza Forum 187.

72.

F’dan ir-rigward, għandu jitfakkar li, fid-deċiżjoni kontenzjuża, il-Kummissjoni kienet ikkunsidrat li, permezz tas-sentenza Forum 187, il-Qorti tal-Ġustizzja approvat l-użu tal-prinċipju ta’ distakkament sabiex tiddetermina jekk miżura fiskali li tuża metodu ta’ kalkolu tal-profitt taxxabbli tal-kumpannija ta’ grupp tagħtix lok għal vantaġġ selettiv għall-finijiet tal-Artikolu 107(1) TFUE ( 41 ).

73.

FFT tqis li l-Qorti Ġenerali iżolat il-punt 95 tas-sentenza Forum 187 mill-kuntest tagħha billi qieset, fil-punt 142 tas-sentenza appellata, li l-Qorti tal-Ġustizzja rrikonoxxiet in-neċessità li tqabbel skema ta’ għajnuna derogatorja ma’ dik ta’ “liġi ordinarja bbażata fuq id-differenza bejn id-dħul u l-ħruġ ta’ impriża li teżerċita l-attivitajiet tagħha f’kundizzjonijiet ta’ kompetizzjoni ħielsa”. Skont FFT, din is-sentenza tinjora l-kuntest ġuridiku inkwistjoni, li fih is-“sistema ta’ liġi ordinarja” (id-dritt fiskali nazzjonali) kienet hija stess tipprevedi tali eżami.

74.

Għandu jiġi vverifikat jekk din il-pożizzjoni tistax tiġi kondiviża.

75.

Fil-kawża li tat lok għal din is-sentenza, il-Qorti tal-Ġustizzja kienet mitluba teżamina deċiżjoni li permezz tagħha l-Kummissjoni kienet ikkonkludiet li s-sistema fiskali fis-seħħ fil-Belġju favur iċ-ċentri ta’ koordinazzjoni awtorizzati kienet skema ta’ għajnuna mill-Istat inkompatibbli mas-suq komuni ( 42 ). Fost id-diversi vantaġġi ekonomiċi li minnhom ibbenefikaw dawn iċ-ċentri ta’ koordinazzjoni skont din is-sistema fiskali kien hemm il-metodu ta’ determinazzjoni tad-dħul taxxabbli tagħhom. Il-profitt taxxabbli kien iffissat għal ammont fiss skont il-metodu msejjaħ “cost plus” u kien jikkorrispondi għal perċentwali tal-ammont tal-infiq u tal-ispejjeż ta’ operat li minnhom kienu esklużi b’mod partikolari l-ispejjeż tal-persunal u l-ispejjeż finanzjarji. Fl-assenza ta’ kull informazzjoni dwar l-attività eżerċitata, il-perċentwali tal-profitti li kellu jittieħed inkunsiderazzjoni kien stabbilit għal 8 %. Il-profitt hekk stabbilit kien intaxxat bir-rata normali tat-taxxa fuq il-kumpanniji.

76.

Sabiex tivverifika jekk l-imsemmija sistema fiskali kinitx tagħti vantaġġ liċ-ċentri ta’ koordinazzjoni, il-Qorti tal-Ġustizzja kkunsidrat li kien meħtieġ, fis-silta ċċitata mill-Qorti Ġenerali fil-punt 142 tas-sentenza appellata, li tqabbel din l-istess sistema fiskali ma’ dik tad-dritt ordinarju, li fiha d-dħul taxxabli ta’ kull kumpannija li teżerċita l-attivitajiet tagħha f’kundizzjonijiet ta’ kompetizzjoni ħielsa kien jikkorrispondi għad-differenza bejn id-dħul u l-ispejjeż tagħha ( 43 ). B’hekk, il-Qorti tal-Ġustizzja kienet ikkonkludiet li l-esklużjoni tal-ispejjeż tal-persunal u tal-ispejjeż finanzjarji, li kienu jikkontribwixxu b’mod preponderanti għar-realizzazzjoni tad-dħul taċ-ċentri ta’ koordinazzjoni, tal-ispejjeż li jservu għad-determinazzjoni tad-dħul taxxabbli ta’ dawn iċ-ċentri ma “[kinitx tippermetti] li jiġu stabbiliti prezzijiet ta’ trasferiment li jkunu qrib dawk li [kienu] jintalbu f’kundizzjonijiet ta’ kompetizzjoni ħielsa” ( 44 ).

77.

Skont il-Kummissjoni, ma hemm l-ebda dubju li l-Qorti tal-Ġustizzja b’hekk applikat il-prinċipju ta’ distakkament. Anki jekk dan il-prinċipju ma jissemmiex fil-punti 95 u 96 tas-sentenza Forum 187, il-Kummissjoni tqis li l-użu tal-kliem “li teżerċita l-attivitajiet tagħha f’kundizzjonijiet ta’ kompetizzjoni ħielsa”, fil-punt 95, u “prezzijiet ta’ trasferiment”, fil-punt 96, ma jħalli l-ebda lok għal interpretazzjonijiet differenti.

78.

Fir-rigward tal-bażi legali tal-applikazzjoni tal-imsemmi prinċipju, il-Kummissjoni tingħaqad ma’ FFT sabiex tindika li l-Qorti tal-Ġustizzja qabblet, fis-sentenza Forum 187, it-trattament fiskali taċ-ċentri ta’ koordinazzjoni mar-regoli ordinarji tad-dritt Belġjan. Hija żżid madankollu li r-raġuni li għaliha l-Qorti tal-Ġustizzja kkunsidrat it-trattament fiskali tal-kumpanniji indipendenti bħala kriterju ta’ riferiment sabiex tikkonstata l-eżistenza ta’ vantaġġ favur dawn iċ-ċentri kienet l-istess bħal dik li l-Qorti Ġenerali adottat fil-punti 141 u 145 tas-sentenza appellata, li tgħid li l-għan aħħari tas-sistema fiskali nazzjonali inkwistjoni kien li jiġi ggarantit li l-bażi taxxabbli tal-kumpanniji integrati tiġi evalwata bl-istess mod bħal dik tal-kumpanniji indipendenti.

79.

Fil-fehma tiegħi, din l-interpretazzjoni tas-sentenza Forum 187 ma hijiex konvinċenti.

80.

Din is-sentenza fl-ebda mument ma tgħid li l-Istati Membri huma obbligati jimplimentaw il-prinċipju ta’ distakkament meta dan il-prinċipju ma jkunx ikkodifikat fid-dritt nazzjonali. Dan ma huwiex sorprendenti fil-fehma tiegħi, sa fejn din ma kinitx il-kwistjoni ġuridika li ġiet interpretata mill-Qorti tal-Ġustizzja.

81.

L-istruttura tar-raġunament tal-Qorti tal-Ġustizzja fl-imsemmija sentenza turi dan b’mod ċar. L-ewwel nett, il-Qorti tal-Ġustizzja tfakkar, fil-punti 91 sa 93, il-karatteristiċi essenzjali tal-metodu ta’ determinazzjoni tal-profitt taxxabbli, kif jirriżulta mis-sistema fiskali prevista mill-arrêté royal noo 187, du 30 décembre 1982, relatif à la création des centres de coordination (id-Digriet Irjali Nru 187, tat‑30 ta’ Diċembru 1982 dwar l-istabbiliment taċ-ċentri ta’ koordinazzjoni) ( 45 ). Sussegwentement, hija tindika, fil-punt 94, li dan il-metodu “huwa bbażat fuq l-hekk imsejjaħ “cost plus” irrakkomandat mill-[OECD] għall-intaxxar tas-servizzi pprovduti minn kumpannija sussidjarja jew stabbiliment fiss f’isem il-kumpanniji li jagħmlu parti mill-istess grupp u stabbiliti fi Stati oħra”, qabel ma tikkonstata essenzjalment, fil-punti 95 u 96, li kien meħtieġ li jsir paragun bejn l-ammont tad-dħul taxxabbli li jirriżulta mill-applikazzjoni ta’ din is-sistema fiskali u dak li jirriżulta mill-applikazzjoni tas-sistema tad-dritt ordinarju.

82.

Minn dan isegwi li l-leġiżlatur Belġjan kien inkorpora fid-dritt nazzjonali metodu analogu għal dak imsejjaħ “cost plus”, li huwa wieħed mill-metodi ta’ kalkolu tal-prezzijiet ta’ trasferiment irrakkomandati mill-OECD sabiex jiġi ddeterminat indirettament il-prezz ta’ distakkament ta’ tranżazzjoni fi ħdan il-grupp. Issa, kif jenfasizza l-Avukat Ġenerali Léger fil-punt 257 tal-konklużjonijiet li huwa ppreżenta f’din il-kawża, ir-rikorrenti ma kinitx ikkontestat il-fatt li l-eżistenza ta’ vantaġġ kellha tiġi evalwata abbażi tal-kriterju li fuqu huwa bbażat il-metodu “cost plus” tal-OECD, jiġifieri dak li l-prezzijiet ta’ trasferiment għandhom jiġu stabbiliti b’mod li jwasslu għall-prezzijiet li jiġu pprattikati f’kundizzjonijiet ta’ distakkament ( 46 ). Barra minn hekk, mid-deċiżjoni tal-Kummissjoni jirriżulta li l-awtorità Belġjana kellha tirreferi, għall-finijiet tal-iffissar ta’ dawn il-prezzijiet, għar-rapporti tal-OECD ( 47 ).

83.

B’hekk, jidhirli li l-Qorti tal-Ġustizzja qed tiddeċiedi kwistjoni ġuridika li tagħha l-integrazzjoni tal-prinċipju ta’ distakkament fid-dritt nazzjonali tikkostitwixxi l-premessa loġika. Ladarba Stat Membru jkun għażel li jinkorpora fid-dritt nazzjonali tiegħu metodu ta’ determinazzjoni tal-profitt taxxabbli tal-kumpanniji integrati simili għall-metodu “cost plus” tal-OECD u li għalhekk għandu l-għan li jintaxxa dawn il-kumpanniji fuq bażi paragunabbli ma’ dik li tirriżulta mill-applikazzjoni tas-sistema tad-dritt ordinarju, dan l-Istat jagħti vantaġġ ekonomiku lill-imsemmija kumpanniji meta jinkludi f’dan il-metodu dispożizzjonijiet li jkollhom l-effett li jnaqqsu l-piż fiskali li dawn l-istess kumpanniji normalment ikollhom iħallsu b’applikazzjoni tal-imsemmija sistema.

84.

Madankollu, is-sempliċi riferiment żbaljat għas-sentenza Forum 187 ma huwiex, fil-fehma tiegħi, ta’ natura li jikkaratterizza inkoerenza jew kontradizzjoni fir-raġunament tal-Qorti Ġenerali dwar il-bażi legali tal-prinċipju ta’ distakkament, peress li dan ma jikkostitwixxix is-sostenn neċessarju tal-argument żviluppat fis-sentenza appellata.

85.

Fir-rigward tat-tieni lment, għandu jiġi osservat, preliminarjament, li FFT tirreferi għall-punti 152 u 153 tas-sentenza appellata, li permezz tagħhom il-Qorti Ġenerali essenzjalment iddeċidiet li l-allegata bidla fil-pożizzjoni tal-Kummissjoni fis-seduta (“il-prinċipju ta’ distakkament […] kien inerenti għas-sistema ordinarja ta’ tassazzjoni kif previst mid-dritt nazzjonali”) ma setgħetx, fi kwalunkwe każ, tpoġġi f’dubju l-konstatazzjoni li tgħid li mid-deċiżjoni kontenzjuża kien jirriżulta li l-prinċipju ta’ distakkament “japplika fil-kuntest tal-eżami ta’ miżura fiskali nazzjonali skont l-Artikolu 107(1) TFUE”.

86.

Fir-rigward tal-assenza ta’ eżami tal-effett tal-bidla fil-pożizzjoni tal-Kummissjoni fuq il-fondatezza tar-riferiment għas-sentenza Forum 187 insostenn ta’ konklużjoni sostanzjalment analoga għal dik milħuqa fid-deċiżjoni kontenzjuża dwar il-bażi legali tal-prinċipju ta’ distakkament, huwa importanti li jiġi rrilevat li FFT ma tistax issostni, bħalma tagħmel, minn naħa, li l-Kummissjoni bidlet il-pożizzjoni li hija kienet adottat fid-deċiżjoni kontenzjuża, u, min-naħa l-oħra, li l-Qorti Ġenerali żbaljat meta injorat l-imsemmi argument. Fil-fatt naqbel mal-analiżi, magħmula fil-punt 153 tas-sentenza appellata, li l-Kummissjoni ma għandhiex dritt tbiddel, fl-istadju tas-seduta, il-pożizzjoni meħuda fid-deċiżjoni kontenzjuża ( 48 ). Minn dan isegwi li l-Qorti Ġenerali ma setgħetx tinkludi fir-raġunament tagħha l-argument imressaq waqt is-seduta.

87.

Fir-rigward tal-immaġni konfuża tal-oriġini tal-prinċipju ta’ distakkament li jirriżulta mis-sentenza appellata, jidhirli li FFT ma ssemmix biss il-punti 152 u 153 ta’ din is-sentenza, iżda wkoll il-punti 150, 151 u 161 tagħha. Permezz ta’ dawn il-motivi, il-Qorti Ġenerali ddeċidiet li l-argumenti li jallegaw l-assenza ta’ indikazzjoni tal-bażi legali tal-prinċipju ta’ distakkament fid-deċiżjoni kontenzjuża u l-klassifikazzjoni ineżatta tiegħu bħala “prinċipju ġenerali ta’ ugwaljanza fit-trattament fil-qasam tat-tassazzjoni”, ma kinux ta’ natura li jinvalidaw ir-raġunament li jinsab fil-punti 140 sa 148 tas-sentenza appellata.

88.

B’mod partikolari, il-Qorti Ġenerali kkunsidrat li d-deċiżjoni kontenzjuża kienet ikkaratterizzat il-prinċipju ta’ distakkament bħala “għodda” li tista’ tintuża fil-kuntest tal-eżami skont l-Artikolu 107(1) TFUE u bħala prinċipju ġenerali ta’ ugwaljanza fit-trattament fil-qasam tat-tassazzjoni “li taqa’ taħt” (u mhux “inerenti għal”) id-dispożizzjoni tat-trattat imsemmija iktar ’il fuq.

89.

Issa, jidhirli li l-punti 150 sa 153 u 161 huma perfettament koerenti mal-iżviluppi li l-Qorti Ġenerali tiddedika għall-bażi legali tal-prinċipju ta’ distakkament b’mod partikolari fil-punt 141 tas-sentenza appellata. Bħala konklużjoni u sa fejn l-inkoerenza u l-kontradizzjoni tar-raġunament tal-Qorti Ġenerali ma jistgħux jiġu kkritikati f’dan il-każ, fil-fehma tiegħi, dan it-tieni lment ma għandux jintlaqa’.

90.

Fid-dawl ta’ dawn il-kunsiderazzjonijiet kollha, jiena tal-opinjoni li t-tieni parti tat-tieni aggravju għandha tiġi miċħuda.

91.

Fl-ewwel parti tal-ewwel aggravju, FFT issostni li l-Qorti Ġenerali applikat b’mod żbaljat il-kriterju ġuridiku li jippermetti li jkun magħruf jekk id-deċiżjoni bil-quddiem inkwistjoni kinitx appoġġjat metodoloġija ta’ prezz ta’ trasferiment li tmur lil hinn mill-ineżattezzi inerenti għal din il-metodoloġija ( 49 ). Fl-opinjoni ta’ FFT, l-iżbalji li allegatament jivvizzjaw il-metodu ta’ kalkolu tar-remunerazzjoni ta’ FFT adottat fid-deċiżjoni bil-quddiem inkwistjoni huma bbażati fuq nuqqas ta’ fehim fundamentali tal-MTMN użat sabiex jiġu ddeterminati l-benefiċċji ipotetiċi ta’ distakkament ta’ FFT għall-attivitajiet koperti minn din id-deċiżjoni. B’mod partikolari, huwa meħtieġ li wieħed iżomm f’moħħu li l-MTMN ma jikkonċernax l-attivitajiet kollha ta’ kumpannija, iżda biss dik li għaliha huwa mfittex profitt ta’ distakkament. Sa fejn FFT teżerċita attivitajiet oħra, dawn huma għalhekk irrilevanti għall-applikazzjoni tal-MTMN.

92.

FFT tenfasizza li l-Qorti Ġenerali ma setgħetx tikkonkludi li d-deċiżjoni bil-quddiem inkwistjoni kienet tappoġġja metodoloġija li tmur lil hinn mill-marġni ta’ diskrezzjoni wiesa’ li għandha neċessarjament tiġi rrikonoxxuta fil-qasam, fid-dawl tal-kumplessità tat-tranżazzjonijiet finanzjarji u tal-element ta’ suġġettività inerenti għall-applikazzjoni tal-MTMN. Fil-fatt, il-Kummissjoni hija obbligata turi li l-iżbalji metodoloġiċi preżunti jwasslu għal diskrepanza kbira meta mqabbla ma’ riżultat ta’ distakkament.

93.

Billi ma ħaditx inkunsiderazzjoni l-portata tal-marġni ta’ diskrezzjoni li għandha tiġi rrikonoxxuta fit-tfassil tad-deċiżjoni bil-quddiem inkwistjoni, il-Qorti Ġenerali wettqet żball ta’ liġi fl-eżami tal-ewwel, it-tieni u r-raba’ żball allegati mill-Kummissjoni, billi qieset il-kritiki li din għamlet sabiex tikkonkludi li din id-deċiżjoni kienet tagħti vantaġġ lil FFT.

94.

Fir-rigward tal-ewwel żball allegat, li jirrigwarda l-possibbiltà ta’ segmentazzjoni tal-kapital ta’ kumpannija integrata skont l-attivitajiet varji tagħha, FFT tqis, essenzjalment, li l-Qorti Ġenerali wettqet diversi żbalji meta adottat il-konklużjonijiet tal-Kummissjoni u meta qieset li FFT kellha tuża l-kapital proprju ta’ kontabbiltà kollu tagħha għall-finijiet tal-applikazzjoni tal-MTMN. Fir-rigward tat-tieni żball allegat, relatat mat-teħid inkunsiderazzjoni tal-fondi proprji regolatorji ipotetiċi bħala indikatur tal-livell ta’ profitti għar-remunerazzjoni tar-riskji assoċjati mal-attivitajiet ta’ finanzjament fi ħdan il-grupp u ta’ teżor ta’ FFT, FFT issostni li l-fatt li dawn il-fondi ma jikkostitwixxux dritt fil-profitti tal-kumpannija inkwistjoni, u lanqas fir-remunerazzjoni tar-riskji sostnuti minnhom ma huwiex rilevanti. Fir-rigward tar-raba’ żball allegat, marbut mal-assenza ta’ teħid inkunsiderazzjoni tal-ishma ta’ FFT f’FFNA u FFC għall-finijiet tal-kalkolu tar-remunerazzjoni tal-attivitajiet ta’ finanzjament u ta’ teżor ta’ FFT, l-analiżi tal-Qorti Ġenerali fil-punt 274 tas-sentenza appellata hija vvizzjata minn żewġ żbalji ta’ liġi, jiġifieri taqlib tal-oneru tal-prova u d-dikjarazzjoni li tgħid li l-esklużjoni tal-ishma miżmuma minn FFT fl-imsemmija sussidjarji ma kinitx tippermetti li din titqabbel debitament ma’ impriżi oħra li joperaw fis-suq.

95.

Il-Kummissjoni twieġeb li l-ewwel parti tal-ewwel aggravju għandha tiġi ddikjarata inammissibbli. Fir-rigward tal-mertu, hija topponi l-argumenti kollha mressqa minn FFT u tqis għalhekk li din il-parti għandha tiġi miċħuda.

96.

Permezz tat-tieni parti tal-ewwel aggravju, FFT tqis li l-Qorti Ġenerali wettqet żball sa fejn ħadet inkunsiderazzjoni biss l-effetti fiskali fuq FFT sabiex tiddetermina jekk id-deċiżjoni bil-quddiem inkwistjoni kinitx tagħti vantaġġ skont l-Artikolu 107(1) TFUE. B’dan il-mod, il-Qorti Ġenerali ma kkunsidratx debitament id-dimensjoni intragrupp u transkonfinali tal-effetti ta’ din id-deċiżjoni fuq il-grupp Fiat/Chrysler. Is-sentenza appellata, u b’mod iktar preċiż il-punti 317 u 318 tagħha, hija għalhekk ivvizzjata minn żewġ sensiliet ta’ żbalji. L-ewwel, il-Qorti Ġenerali kkonkludiet b’mod żbaljat li FFT ma kinitx stabbilixxiet in-“newtralizzazzjoni” tal-vantaġġ fil-livell tal-grupp. It-tieni, il-Qorti Ġenerali kkunsidrat b’mod żbaljat li l-effett ta’ grupp seta’ jiġi injorat fl-eżami tal-eżistenza ta’ vantaġġ ekonomiku. F’dan l-aħħar rigward, FFT issostni li, billi injorat l-effett ta’ grupp, il-Qorti Ġenerali adottat perspettiva irrikonċiljabbli mal-affermazzjoni tagħha stess li tgħid li kull vantaġġ favur FFT huwa vantaġġ favur il-grupp Fiat/Chrysler kollu.

97.

Il-Kummissjoni tqis li t-tieni parti tal-ewwel aggravju għandha tiġi ddikjarata ineffettiva jew, fi kwalunkwe każ, għandha tiġi miċħuda fuq il-mertu peress li l-argumenti kollha mressqa minn FFT insostenn ta’ din il-parti ma jistgħux jiġu aċċettati.

98.

Il-Kummissjoni tqis li l-ewwel parti tal-ewwel aggravju hija inammissibbli fl-intier tagħha minħabba li FFT tfittex li tikseb eżami mill-ġdid tal-iżbalji ta’ metodoloġija rrilevati mill-Kummissjoni fil-ftehim dwar il-prezz ta’ trasferiment ikkonfermat mid-deċiżjoni bil-quddiem inkwistjoni abbażi ta’ fatt ġdid jew ta’ raġunament ġdid.

99.

F’dan ir-rigward, il-Kummissjoni tirrileva li l-kritika prinċipali ta’ FFT tirrigwarda l-assenza ta’ teħid inkunsiderazzjoni mill-Qorti Ġenerali, fl-eżami tagħha tal-evalwazzjoni magħmula mill-Kummissjoni fid-deċiżjoni kontenzjuża, tal-fatt li FFT kienet teżerċita żewġ attivitajiet distinti, jiġifieri t-teħid tar-riskji marbuta mar-rwoli tagħha ta’ finanzjament u ta’ teżor u l-provvista ta’ servizzi ta’ finanzjament fi ħdan il-grupp u ta’ teżor. Filwaqt li tammetti li l-Gran Dukat tal-Lussemburgu sostna fit-tul quddiem il-Qorti Ġenerali li l-oġġezzjonijiet metodoloġiċi fformulati mill-Kummissjoni fir-rigward tal-applikazzjoni tal-MTMN fil-ftehim dwar il-prezz ta’ trasferiment ma kinux fondati, il-Kummissjoni tenfasizza li dan l-Istat Membru qatt ma għamel id-distinzjoni msemmija iktar ’il fuq. Minn dan isegwi li, f’dan l-appell, FFT ma tqajjimx kwistjonijiet ta’ liġi fir-rigward tal-applikazzjoni żbaljata tal-kriterju ġuridiku intiż sabiex tiġi vverifikata l-eżistenza ta’ vantaġġ fil-każ ineżami, iżda hija tikkritika pjuttost l-applikazzjoni ta’ dan il-kriterju minħabba fatt preżunt li qatt ma ġie ppreżentat quddiem il-Qorti Ġenerali.

100.

Jekk jitqies li kien possibbli li jiġi sostnut li dan il-fatt preżunt jirriżulta mid-dokumenti ppreżentati lill-Qorti Ġenerali, għandu jiġi kkunsidrat, skont il-Kummissjoni, li din il-parti hija bbażata fuq raġunament li ma jikkostitwixxix sempliċement amplifikazzjoni ta’ argument imqajjem matul il-proċedura quddiem il-Qorti Ġenerali, iżda argument kompletament ġdid.

101.

Preliminarjament, għandhom jiġu mfakkra fil-qosor il-prinċipji li għandhom jittieħdu inkunsiderazzjoni mill-Qorti tal-Ġustizzja sabiex hija tkun tista’ tiddeċiedi dwar l-eċċezzjoni ta’ inammissibbiltà mqajma mill-Kummissjoni.

102.

Il-pożizzjoni tal-Kummissjoni hija bbażata, essenzjalment, fuq il-ġurisprudenza stabbilita li tgħid li l-kompetenza tal-Qorti tal-Ġustizzja hija limitata għall-evalwazzjoni tas-soluzzjoni legali li tkun ingħatat għall-motivi u għall-argumenti diskussi quddiem il-Qorti Ġenerali u għalhekk parti ma tistax, bħala prinċipju, tqajjem għall-ewwel darba quddiem il-Qorti tal-Ġustizzja aggravju li hija ma tkunx invokat quddiem il-Qorti Ġenerali, peress li dan ikun ifisser li din il-parti titħalla tadixxi lill-Qorti tal-Ġustizzja b’tilwima iktar estiża minn dik li tagħha ħadet konjizzjoni l-Qorti Ġenerali ( 50 ).

103.

Bħalma tosserva FFT fir-replika tagħha, il-Qorti tal-Ġustizzja indikat ukoll b’mod iterattiv li rikorrent jista’, fl-appell tiegħu, jinvoka aggravji li jirriżultaw mis-sentenza appellata stess u li huma intiżi li jikkritikaw, fid-dritt, il-fondatezza tagħha ( 51 ). Għaldaqstant huwa għal kollox possibbli li l-argument ġuridiku żviluppat fil-kuntest tal-appell ikun differenti minn dak imressaq fl-ewwel istanza ( 52 ), peress li, f’każ bħal dan, l-aggravji huma fformulati mhux skont id-deċiżjoni tal-Kummissjoni, iżda skont is-sentenza tal-Qorti Ġenerali.

104.

F’dan il-każ, anki jekk jitqies, kif issostni l-Kummissjoni, li l-ewwel parti tal-ewwel aggravju hija bbażata fuq “fatt ġdid” jew “raġunament ġdid” meta mqabbla rispettivament mal-fatti invokati u mar-raġunamenti żviluppati fil-proċedura fl-ewwel istanza, dan ma huwiex biżżejjed fih innifsu sabiex tiġi ddikjarata inammissibbli.

105.

Fil-fatt mill-qari ta’ din il-parti jirriżulta li FFT tikkritika lill-Qorti Ġenerali li sostniet b’mod żbaljat il-konklużjoni tad-deċiżjoni kontenzjuża li tgħid li d-deċiżjoni bil-quddiem inkwistjoni kienet appoġġjat metodoloġija ta’ ffissar tal-prezzijiet ta’ trasferiment li tmur lil hinn min-nuqqas ta’ preċiżjoni inerenti għal tali metodoloġija. B’mod iktar partikolari, FFT tqis li l-analiżi li l-Qorti Ġenerali għamlet tal-allegati żbalji li jivvizzjaw id-determinazzjoni tal-prezzijiet ta’ trasferiment inkwistjoni tirriżulta minn nuqqas ta’ fehim fundamentali tal-MTMN. Din tal-aħħar ma għandhiex l-għan li tistabbilixxi l-livell ta’ profitti għall-attività globali ta’ impriża, iżda biss dak tal-attività tagħha li għaliha huwa mfittex profitt ta’ distakkament. Huwa f’dan il-kuntest li jidħol l-argument ta’ FFT li jikkritika lill-Qorti Ġenerali li ma ħaditx inkunsiderazzjoni ż-żewġ attivitajiet distinti eżerċitati minn din il-kumpannija.

106.

Fi kliem ieħor, FFT għandha l-intenzjoni li ssostni, permezz ta’ din il-parti, argumenti li jirriżultaw mis-sentenza appellata stess ( 53 ) u li huma intiżi li jikkritikaw, fid-dritt, il-fondatezza tagħha. B’mod iktar preċiż, hija tikkontesta l-applikazzjoni mill-Qorti Ġenerali tal-kriterju ġuridiku użat sabiex jiġi ddeterminat jekk deċiżjoni tat-taxxa bil-quddiem bħal dik inkwistjoni tagħtix vantaġġ ekonomiku. Issa, hija ġurisprudenza stabbilita li l-kwistjoni dwar jekk il-Qorti Ġenerali applikatx b’mod korrett kriterju legali, bħall-prinċipju ta’ distakkament, hija kwistjoni ta’ dritt li tista’ tkun is-suġġett tal-istħarriġ tal-Qorti tal-Ġustizzja fl-istadju tal-appell ( 54 ).

107.

Fid-dawl tal-kunsiderazzjonijiet imsemmija iktar ’il fuq, inqis li l-ewwel parti tal-ewwel aggravju ma għandhiex tiġi miċħuda fl-intier tagħha mill-ewwel u għalhekk nistieden lill-Qorti tal-Ġustizzja tiddikjaraha ammissibbli sa fejn din il-parti tirrigwarda żball tal-Qorti Ġenerali fil-validazzjoni tar-raġunament segwit fid-deċiżjoni kontenzjuża fir-rigward tal-applikazzjoni tal-MTMN f’dan il-każ.

108.

Preliminarjament, għandu jitfakkar li, sabiex jiġi ddeterminat jekk id-deċiżjoni bil-quddiem inkwistjoni kinitx tagħti vantaġġ lil FFT, il-Qorti Ġenerali indikat, fil-punt 141 tas-sentenza appellata, li “il-Kummissjoni tista’ tqabbel l-oneru fiskali ta’ tali impriża integrata li jirriżulta mill-applikazzjoni tal-imsemmija miżura fiskali, mal-oneru fiskali li jirriżulta mill-applikazzjoni tar-regoli ta’ tassazzjoni normali tad-dritt nazzjonali ta’ impriża, imqiegħda f’sitwazzjoni fattwali komparabbli, li teżerċita l-attivitajiet tagħha f’kundizzjonijiet tas-suq”. Sussegwentement, il-Qorti Ġenerali ppreċiżat, fil-punt 143 ta’ din is-sentenza, li, għalkemm, permezz tal-miżura fiskali inkwistjoni, l-awtoritajiet nazzjonali aċċettaw ċertu livell ta’ prezz ta’ tranżazzjoni fi ħdan il-grupp, “l-Artikolu 107(1) TFUE jippermetti lill-Kummissjoni tistħarreġ jekk dan il-livell tal-prezz jikkorrispondix għal dak li kien jintuża f’kundizzjonijiet tas-suq, sabiex tivverifika jekk minn dan jirriżultax tnaqqis tal-oneri imposti normalment fuq il-finanzi tal-impriża inkwistjoni, li jagħtiha għalhekk vantaġġ fis-sens tal-imsemmi artikolu”. Il-prinċipju ta’ distakkament jikkostitwixxi għalhekk, skont il-Qorti Ġenerali, “għodda” jew “kriterju ta’ referenza” li jippermetti lill-Kummissjoni tiddetermina jekk kumpannija integrata tibbenefikax, bis-saħħa ta’ miżura fiskali li tiffissa l-prezzijiet ta’ trasferiment tagħha, minn vantaġġ fis-sens tal-Artikolu 107(1) TFUE.

109.

Bħalma jirriżulta mill-punt 196 tas-sentenza appellata, l-implimentazzjoni tal-prinċipju ta’ distakkament mill-Kummissjoni wasslet, f’dan il-każ, sabiex tiġi kkonstatata l-eżistenza ta’ vantaġġ minħabba l-fatt li l-metodoloġija ta’ kalkolu tar-remunerazzjoni ta’ FFT, kif ivvalidata mill-awtoritajiet tat-taxxa Lussemburgiżi, kienet ivvizzjata b’diversi żbalji li jirrigwardaw, minn naħa, l-ammont tal-kapital li għandu jiġi rremunerat, u, min-naħa l-oħra, ir-rata ta’ dħul li għandha tiġi applikata.

110.

Il-Qorti Ġenerali ppreċiżat, fil-punti 197 sa 199 ta’ din is-sentenza, li l-ħames żbalji identifikati mill-Kummissjoni kienu jirrigwardaw rispettivament, l-ewwel, l-għażla li l-kapital jiġi ssegmentat fi tliet kategoriji li għalihom ġew applikati rati ta’ dħul; it-tieni, l-użu tal-fondi proprji regolatorji ipotetiċi bħala indikatur tal-livell ta’ profitti; it-tielet, kieku kellu jitqies li dan l-użu huwa permess, l-applikazzjoni b’analoġija tal-Qafas ta’ Basel II, sabiex jiġu ddeterminati l-fondi proprji regolatorji ipotetiċi ta’ FFT; ir-raba’, it-tnaqqis tal-ishma ta’ FFNA u FFC, u l-ħames, il-livell ta’ rata ta’ dħul tal-kapital li għandu jiġi rremunerat, ikkalkolat sa 6.05 %, bl-applikazzjoni tal-MEDAF.

111.

Fl-aħħar nett, il-Qorti Ġenerali eżaminat, fil-punti 264 sa 284 tal-imsemmija sentenza, l-argumenti tal-Gran Dukat tal-Lussemburgu dwar l-ewwel, it-tieni u r-raba’ żball irrilevati mill-Kummissjoni. Fid-dawl tal-konklużjoni ta’ dan l-eżami, il-Qorti Ġenerali kkunsidrat li ma kienx neċessarju li l-analiżi tagħha tiġi estiża għall-fondatezza tal-argumenti li jirrigwardaw it-tielet u l-ħames żball identifikati mill-Kummissjoni.

112.

Għaldaqstant, il-Qorti tal-Ġustizzja hija mitluba tiddetermina, fis-sentenza futura tagħha, jekk il-Qorti Ġenerali kinitx korretta meta kkonfermat il-konklużjonijiet tal-Kummissjoni dwar l-ewwel, it-tieni u r-raba’ żball li hija indikat.

113.

F’dan ir-rigward, għandu jiġi rrilevat, qabelxejn, li n-nuqqas ta’ qbil bejn il-partijiet la jolqot l-għan u lanqas il-kontenut tal-metodoloġija użata mill-Kummissjoni f’dan il-każ. Fil-fatt huwa stabbilit li l-MTMN huwa intiż sabiex jiffissa l-prezz ta’ trasferiment tat-tranżazzjonijiet konklużi bejn żewġ kumpanniji integrati, u jiżvolġi fi tliet stadji. L-ewwel wieħed jikkonsisti f’li tiġi ddefinita l-attività li għaliha huwa mfittex il-prezz ta’ distakkament. It-tieni wieħed jikkonsisti fl-għażla ta’ bażi xierqa, imsejħa indikatur tal-livell ta’ profitti. It-tielet wieħed jikkonsisti fl-applikazzjoni għal dan l-indikatur ta’ rata ta’ dħul li tirrifletti dik osservata fi tranżazzjonijiet komparabbli mwettqa fis-suq ħieles.

114.

Madankollu, il-partijiet ma jaqblux dwar l-għażla tal-indikatur tal-livell ta’ profitti rilevanti. Filwaqt li FFT tqis li kien ġust li d-deċiżjoni bil-quddiem inkwistjoni kienet qieset, bħala indikatur tal-profitt, il-kapital meħtieġ b’mod leġiżlattiv mill-istabbilimenti bankarji, il-Qorti Ġenerali vvalidat l-eżistenza tal-ewwel, it-tielet u r-raba’ żball irrilevati fid-deċiżjoni kontenzjuża minħabba l-fatt li l-kapital kollu tal-kontabbiltà ta’ FFT, li kien jinkludi wkoll il-kapital miżmum minn FFT f’ċerti sussidjarji tal-grupp, kellu għall-kuntrarju jittieħed inkunsiderazzjoni. B’dan il-mod, il-Qorti Ġenerali, skont FFT, ma ħaditx debitament inkunsiderazzjoni l-marġni ta’ diskrezzjoni li għandha l-awtorità tat-taxxa Lussemburgiża fl-approvazzjoni tagħha tal-prezzijiet ta’ trasferiment.

115.

Qabel ma nibda l-analiżi tal-fondatezza tal-ilmenti li FFT tagħmel lill-Qorti Ġenerali talli ma osservatx il-marġni ta’ diskrezzjoni li għandhom l-awtoritajiet nazzjonali fl-applikazzjoni ta’ metodoloġiji bħall-MTMN, jidhirli li għandha ssir preċiżjoni doppja.

116.

Fir-rigward tan-natura tal-istħarriġ ġudizzjarju eżerċitat mill-Qorti Ġenerali, din qieset, fil-punt 207 tas-sentenza appellata, li l-istħarriġ tagħha jikkonsisti f’“li jivverifika jekk l-iżbalji identifikati fid-deċiżjoni [kontenzjuża], li fuq il-bażi tagħhom il-Kummissjoni bbażat il-konstatazzjoni tagħha dwar l-eżistenza ta’ vantaġġ, imorrux lil hinn mill-impreċiżazzjonijiet inerenti għall-applikazzjoni ta’ metodu maħsub sabiex tinkiseb approssimazzjoni affidabbli ta’ riżultat ibbażat fuq is-suq” ( 55 ). Fi kliem ieħor, il-Qorti Ġenerali għandha tivverifika jekk il-Kummissjoni wrietx li l-iżbalji metodoloġiċi li hija identifikat ma jippermettux li wieħed jasal għal approssimazzjoni affidabbli ta’ riżultat ta’ distakkament minħabba li dawn l-iżbalji wasslu sabiex jitnaqqas il-profitt taxxabbli meta mqabbel mal-oneru fiskali li jirriżulta mill-applikazzjoni tar-regoli ta’ tassazzjoni normali tad-dritt nazzjonali. Din id-deskrizzjoni tal-istħarriġ ġudizzjarju tal-Qorti Ġenerali għandha, fil-fehma tiegħi, tkun kondiviża, sa fejn hija tasal sabiex tirrikonċilja r-rekwiżit li jiġi żgurat li l-klassifikazzjoni bħala għajnuna mill-Istat tiddependi esklużivament mill-effetti tal-miżura statali kkonċernata u dak li jingħata marġni ta’ diskrezzjoni lill-awtoritajiet tat-taxxa nazzjonali minħabba n-natura approssimattiva tal-metodoloġiji tad-determinazzjoni tal-prezzijiet ta’ trasferiment.

117.

Fir-rigward tal-marġni ta’ diskrezzjoni mogħti lill-awtoritajiet tat-taxxa nazzjonali fil-kuntest ta’ dan l-istħarriġ, il-Qorti Ġenerali indikat, fil-punt 204 tas-sentenza appellata, li “l-Istat Membru għandu marġni ta’ diskrezzjoni fl-approvazzjoni tal-prezzijiet ta’ trasferiment” u li “dan il-marġni ta’ diskrezzjoni madankollu ma jistax iwassal biex iċaħħad lill-Kummissjoni mill-kompetenza tagħha sabiex tistħarreġ li l-prezzijiet ta’ trasferiment inkwistjoni ma jwasslux għall-għoti ta’ vantaġġ selettiv fis-sens tal-Artikolu 107(1) TFUE”, filwaqt li sussegwentement iżżid li “[f]’dan il-kuntest, il-Kummissjoni għandha tieħu inkunsiderazzjoni l-fatt li l-prinċipju ta’ distakkament jippermettilha tivverifika jekk prezz ta’ trasferiment appoġġjat minn Stat Membru jikkorrispondix għal approssimazzjoni affidabbli ta’ riżultat ibbażat fuq is-suq u jekk id-distakk ikkonstatat eventwalment fil-kuntest ta’ dan l-eżami ma jmurx lil hinn mill-impreċiżazzjonijiet inerenti għall-metodu applikat sabiex tinkiseb l-imsemmija approssimazzjoni ( 56 )”.

118.

Għalhekk jidhirli li huwa neċessarju li jiġi kkonfutat il-qari ta’ dan il-punt imressaq minn FFT fl-appell tagħha, li jgħid li awtorità tat-taxxa nazzjonali għandha neċessarjament, waqt l-adozzjoni tad-deċiżjonijiet bil-quddiem, marġni ta’ diskrezzjoni wiesa’ u li minn dan jirriżulta b’mod inevitabbli element ta’ suġġettività fir-rigward tal-mod kif il-metodoloġiji intiżi sabiex jiddeterminaw il-prezzijiet ta’ trasferiment jiġu applikati f’kull każ partikolari. Fil-fatt, jiena persważ li l-imsemmi punt għandu sempliċement jiġi interpretat fis-sens li l-awtoritajiet tat-taxxa nazzjonali għandhom marġni ta’ diskrezzjoni — li bl-ebda mod ma huwa kklassifikat bħala “wiesa’” fis-sentenza appellata — minħabba n-natura approssimattiva tal-metodoloġiji tad-determinazzjoni tal-prezzijiet ta’ trasferiment.

119.

Madankollu, għandu jiġi vverifikat jekk il-fondatezza tal-kritika ta’ FFT li tgħid li l-Qorti Ġenerali ddeċidiet bi żball li t-tliet żbalji allegatament imwettqa, skont il-Kummissjoni, mill-awtorità tat-taxxa Lussemburgiża fl-implimentazzjoni tal-MTMN ma jippermettux il-kisba ta’ approssimazzjoni affidabbli ta’ riżultat ta’ distakkament.

120.

Fir-rigward tal-ewwel żball dwar l-għażla li l-kapital ta’ FFT jinqasam fi tliet kategoriji, il-Qorti Ġenerali vvalidat il-konklużjonijiet tal-Kummissjoni għal żewġ raġunijiet. L-ewwel, is-segmentazzjoni tal-kapital ma kinitx intiża sabiex tissodisfa r-rekwiżit ta’ differenzazzjoni tal-funzjonijiet ta’ FFT ( 57 ). It-tieni, din is-segmentazzjoni kienet ibbażata fuq analiżi purament artifiċjali tal-użu tal-fondi proprji ta’ FFT ( 58 ).

121.

Fir-rigward ta’ dawn il-motivi, il-kritika prinċipali ta’ FFT tirrigwarda l-punt 235 tas-sentenza appellata, li fih il-Qorti Ġenerali tirrileva qabel kollox li “it‑tliet kategoriji ta’ fondi proprji vvalidati mid-deċiżjoni [bil-quddiem inkwistjoni] jirrigwardaw rispettivament ir-remunerazzjoni tar-riskji, ir-remunerazzjoni tal-attivitajiet ta’ holding u r-remunerazzjoni tal-funzjonijiet”, sabiex sussegwentement tiddeduċi li “[d]an [l-aħħar] segment jikkorrispondi għalhekk għall-attivitajiet kollha ta’ FFT li huma s-suġġett tad-deċiżjoni bil-quddiem inkwistjoni” ( 59 ). Skont FFT, il-Qorti Ġenerali injorat il-fatt li hija teżerċita żewġ attivitajiet distinti li għandhom jiġu rremunerati b’żewġ modi differenti, jiġifieri, l-ewwel, żamma tal-assi ta’ terzi (remunerata bir-“remunerazzjoni tar-riskji”) u, it-tieni, il-konċessjoni tal-krediti fi ħdan il-grupp Fiat/Chrysler (remunerata bir-“remunerazzjoni tal-funzjonijiet”) u b’hekk ikkonkludiet b’mod żbaljat li l-kapital ta’ FFT ma kellux jiġi ssegmentat għall-finijiet tal-kalkolu ta’ remunerazzjoni ta’ distakkament. Sa fejn FFT teżerċita żewġ attivitajiet distinti, il-Qorti Ġenerali lanqas ma tista’ tqis, kif tagħmel fil-punti 238 u 239, li l-kapital proprju ta’ FFT għandu jiġi rremunerat fl-intier tiegħu, bl-esklużjoni ta’ kull segmentazzjoni, minħabba li dan il-kapital proprju kollu huwa espost għar-riskji u disponibbli sabiex tiġi sostnuta s-solvenza ta’ din il-kumpannija.

122.

Ma hemmx dubju li r-raġunament ta’ FFT huwa bħala prinċipju konformi mal-loġika tal-MTMN. Kif ġie espost iktar ’il fuq, il-partijiet f’dan l-appell jaqblu fuq il-fatt li l-ewwel stadju ta’ din il-metodoloġija jikkonsisti f’li tiġi ddefinita l-attività li għaliha huwa mfittex il-prezz ta’ distakkament. Madankollu, inqis li l-premessa ta’ tali raġunament, jiġifieri l-eżerċizzju minn FFT ta’ żewġ attivitajiet distinti, ma ntweriex b’mod suffiċjenti fid-dritt.

123.

Huwa importanti li jiġi rrilevat, f’dan ir-rigward, li mill-qari tal-atti tal-proċess jirriżulta li FFT manifestament tiltaqa’ ma’ diffikultajiet sabiex tiddefinixxi ż-“żamma tal-assi ta’ terzi” imsemmija fl-appell tagħha. Fil-każ li FFT għandha l-intenzjoni li tagħmel riferiment, kif jidhirli, għal attività li tikkonsisti fit-teħid ta’ riskju fil-kuntest tas-servizzi ta’ finanzjament u ta’ teżor ipprovduti lill-kumpanniji l-oħra tal-grupp, naqbel mal-pożizzjoni tal-Kummissjoni li tgħid li d-distinzjoni bejn tali attività u l-provvista tal-istess servizzi ta’ finanzjament u ta’ teżor hija irrilevanti, sa fejn dawn huma żewġ fergħat tal-istess attività (jew “funzjoni” sabiex nuża l-lingwa tal-linji gwida tal-OECD), jiġifieri dik ta’ finanzjament fi ħdan il-grupp u ta’ teżor.

124.

L-argument prinċipali ta’ FFT, kif ukoll l-argumenti li huma loġikament marbuta miegħu, huwa għalhekk, fil-fehma tiegħi, infondat.

125.

Fir-rigward tal-motiv li jgħid li s-segmentazzjoni tal-kapital ta’ FFT kienet ibbażata fuq analiżi purament artifiċjali tal-użu tal-fondi proprji tagħha, FFT targumenta li l-Qorti Ġenerali ma setgħetx tafferma ġustament, kif għamlet fil-punt 241 tas-sentenza appellata, li “is-segmentazzjoni tal-kapital proprju skont l-attivitajiet ta’ FFT ma tiħux inkunsiderazzjoni l-fatt li l-profitti taxxabbli tagħha jvarjaw skont l-ispejjeż tas-self tagħha, li jiddependu, b’mod partikolari, mid-daqs tal-kapital tagħha”. Fil-fehma ta’ FFT, il-Qorti Ġenerali ma qisitx li, meta l-ammont tal-kapital ta’ min jissellef jiżdied lil hinn minn livell raġonevolment suffiċjenti sabiex ikopri r-riskji tagħha, kull tnaqqis addizzjonali tal-ispejjeż tas-self li ġejjin miż-żieda tal-kapital huwa minimu jew ugwali għal żero. Il-Qorti Ġenerali kellha tikkritika d-deċiżjoni kontenzjuża sa fejn il-Kummissjoni ma kinitx eżaminat jekk il-kapital miżmum minn FFT li jeċċedi l-kapital regolatorju ipotetiku kienx effettivament iżid ir-dħul tagħha. B’dan il-mod, FFT sempliċement, fil-fehma tiegħi, issemmi affermazzjoni ġenerika li ma jidhirlix li hija suffiċjenti, waħedha, sabiex turi li l-punt 241 tas-sentenza appellata jirriżulta minn premessa ineżatta. Għaldaqstant, dan l-argument għandu jiġi miċħud.

126.

FFT tikkontesta wkoll l-argument sussidjarju użat mill-Qorti Ġenerali insostenn tal-konklużjoni li tgħid li t-tieni segment tal-kapital ta’ FFT (ishma miżmuma f’FFNA u FFC), kif ikkonfermat mid-deċiżjoni bil-quddiem inkwistjoni, ma jistax jiġi distint mill-ewwel wieħed għall-finijiet tal-kalkolu tar-remunerazzjoni ta’ distakkament. B’mod iktar partikolari, ma huwiex eżatt, skont FFT, li jiġi affermat li l-ishma ta’ kumpannija omm f’sussidjarji jistgħu jitqiesu, kif ikkonstatat il-Qorti Ġenerali fil-punt 245 tas-sentenza appellata, bħala forma ta’ injezzjoni ta’ kapital minflok l-għoti ta’ self fi ħdan il-grupp. Fil-fehma tiegħi, peress li FFT ma tikkritikax il-konstatazzjoni prinċipali li fuqha hija bbażata tali konklużjoni, li tinsab fil-punt 244 tas-sentenza appellata, li tgħid li l-ishma miżmuma minn FFT f’FFNA u FFC ma setgħux jiġu mifruda mill-ewwel segment sa fejn dawn kienu wkoll esposti għar-riskji fil-każ ta’ insolvenza ta’ FFT, dan l-ilment għandu jitqies bħala ineffettiv.

127.

Fir-rigward tal-argument imressaq minn FFT li jgħid li l-użu tal-kapital proprju ta’ kontabbiltà bħala indikatur tal-livell ta’ profitti ta’ FFT ma huwiex xieraq sa fejn dan jista’ jiġi mmanipulat faċilment, inqis, bħall-Kummissjoni, li dan l-argument huwa inammissibbli peress li ma huwiex indirizzat kontra s-sentenza appellata.

128.

Fir-rigward tat-tieni żball, li jikkonsisti fit-teħid inkunsiderazzjoni tal-fondi regolatorji ipotetiċi bħala indikatur tal-livell ta’ profitti, FFT tikkritika lill-Qorti Ġenerali li ddeċidiet li dawn il-fondi ma setgħux jiġu kklassifikati b’dan il-mod minħabba li “la jikkostitwixxu dritt għall-profitti tal-entità inkwistjoni, u lanqas għar-remunerazzjoni tar-riskji mġarrba minn din l-entità” ( 60 ). Kieku dan kien il-każ, ħafna indikaturi tal-livell ta’ profitti permessi mil-linji gwida tal-OECD ( 61 ), bħall-bejgħ, l-ispejjeż operattivi u l-assi operattivi jkunu esklużi. Issa, inqis li l-qari tal-bidu tal-punt segwenti tas-sentenza appellata (“Fit-tieni lok, fir-rigward tal-evalwazzjoni tal-Kummissjoni, prinċipalment, li tgħid li l-għażla, […] li tikkonsisti fit-teħid inkunsiderazzjoni tal-kapital regolatorju ipotetiku ta’ FFT, hija żbaljata, […] ( 62 )”) huwa biss konstatazzjoni introduttiva għall-evalwazzjoni magħmula mill-Qorti Ġenerali fil-punt 255 tal-imsemmija sentenza. Permezz ta’ din il-konstatazzjoni, jidhirli li l-Qorti Ġenerali bl-ebda mod ma riedet tesprimi kundizzjoni neċessarja tal-klassifikazzjoni ta’ “indikatur tal-livell ta’ profitti”. Għaldaqstant, fil-fehma tiegħi, dan l-argument għandu jiġi miċħud bħala infondat.

129.

FFT tikkontesta wkoll l-evalwazzjoni tal-Qorti Ġenerali, li tinsab fil-punt 255 tas-sentenza appellata, li tgħid li l-fondi regolatorji ipotetiċi ma jistgħux jittieħdu inkunsiderazzjoni peress li “ma għandhom l-ebda rabta mal-profitti li investitur jitlob lill-kumpannija li jinvesti fiha”. FFT issostni li l-MTMN ma jirrikjedix li l-indikatur tal-livell ta’ profitti jippreżenta “rabta” ma’ dawn il-profitti, iżda l-iktar l-iktar “korrelazzjoni” ( 63 ) raġonevolment affidabbli.

130.

Issa, id-distinzjoni bejn “rabta” u “korrelazzjoni” hija artifiċjali u ma tistax, fil-fehma tiegħi, tinvalida l-evalwazzjoni tal-Qorti Ġenerali, iktar u iktar peress li, kif tfakkar il-Kummissjoni fir-risposta tagħha, il-paragrafu 2.87 tal-linji gwida tal-OECD jidher li jindika li l-indikatur tal-livell ta’ profitt għandu jirrifletti l-valur tal-funzjonijiet eżerċitati mill-entità inkwistjoni u, għaldaqstant, il-profitti li din l-entità hija f’pożizzjoni li tiġġenera. Għaldaqstant, lanqas dan l-argument ma huwa konvinċenti.

131.

Fl-aħħar nett, fir-rigward tar-raba’ żball, li jikkonsisti fl-assenza ta’ teħid inkunsiderazzjoni tal-kapital marbut mal-ishma ta’ FFT f’FFC u FFNA fil-kalkolu tar-remunerazzjoni tal-attivitajiet ta’ finanzjament fi ħdan il-grupp u ta’ teżor ta’ FFT, din tal-aħħar tikkontesta, qabelxejn, l-affermazzjoni tal-Qorti Ġenerali, li tinsab fil-punt 273 tas-sentenza appellata, li tgħid li, minħabba n-natura funġibbli tiegħu, l-integralità tal-kapital proprju tiġi wkoll esposta għar-riskji u għandu għalhekk jittieħed inkunsiderazzjoni fil-kalkolu ta’ tali remunerazzjoni. Kuntrarjament għal dak li tallega FFT, jirriżulta b’mod ċar mill-qari tat-taqsima tal-appell iddedikata għall-ewwel żball li FFT ma ppreżentat l-ebda argument insostenn tal-affermazzjoni tagħha li tgħid li n-natura funġibbli tal-kapital proprju ma tipprekludix is-segmentazzjoni tiegħu.

132.

Barra minn hekk, FFT tafferma li l-konstatazzjoni magħmula mill-Qorti Ġenerali fil-punt 274 tas-sentenza appellata, li tgħid li l-Gran Dukat tal-Lussemburgu ma kienx stabbilixxa li l-kumpanniji li magħhom il-Kummissjoni qabblet lil FFT kienu naqqsu mill-kapital tagħhom l-ishma tagħhom f’sussidjarji jew li ma kienx jaf li l-istabbilimenti finanzjarji li joperaw fis-suq kellhom ishma bħal dawn, hija vvizzjata b’żewġ żbalji ta’ liġi.

133.

L-ewwel, din il-konstatazzjoni taqleb l-oneru tal-prova, peress li hija r-responsabbiltà tal-Kummissjoni li turi li d-data ta’ paragun użata mill-awtorità tat-taxxa Lussemburgiża ma kinitx xierqa, u mhux tal-Istat Membru li jiġġustifika tali użu. Jiena ma naqbilx ma’ dan l-argument. Kif tinnota l-Kummissjoni fir-risposta tagħha, il-punt 274 tas-sentenza appellata jikkostitwixxi fil-fatt it-tweġiba għal argument imressaq mill-Gran Dukat tal-Lussemburgu fir-rikors tiegħu fl-ewwel istanza u intiż li jikkontesta, abbażi tad-data kkonsolidata ta’ 28 bank sistemiku miġbura minn dan l-Istat Membru, il-konstatazzjoni magħmula fid-deċiżjoni kontenzjuża li l-livell ta’ kapital proprju ta’ FFT ma jippermetti legalment li jsir ebda tnaqqis ( 64 ). Fl-imsemmi punt 274, il-Qorti Ġenerali sempliċement ikkonfermat l-approċċ tal-Kummissjoni li jikkonsisti f’li tibbaża ruħha fuq il-proporzjon ta’ lieva medju stabbilit mill-Awtorità Bankarja Ewropea. Fl-assenza ta’ qlib tal-oneru tal-prova li jista’ jiġi ddeterminat b’dan il-mod, dan l-argument ma jistax, fil-fehma tiegħi, jintlaqa’.

134.

It-tieni, FFT tikkontesta l-premessa tal-konstatazzjoni li tirriżulta mill-punt 274 tas-sentenza appellata, li tgħid li ma huwiex possibbli li tiġi evalwata l-profittabbiltà tal-attività eżerċitata minn kumpannija indipendenti komparabbli fuq bażi kkonsolidata meta d-data kkonsolidata biss tkun disponibbli. Għall-kuntrarju, ma hemm xejn li jipprekludi, skont FFT, li ssir tali evalwazzjoni. Jidhirli li dan l-argument ma jistax jintlaqa’ sa fejn huwa raġonevoli li wieħed jaħseb, kif tosserva l-Kummissjoni fir-risposta tagħha, li d-data kkonsolidata tista’ tintuża għal dan il-għan biss meta s-sussidjarji kollha tal-kumpannija paragunabbli jeżerċitaw l-istess funzjonijiet fil-kuntest tal-istess attività.

135.

Fid-dawl tal-kunsiderazzjonijiet preċedenti, nipproponi lill-Qorti tal-Ġustizzja tiċħad l-ewwel parti tal-ewwel aggravju fl-intier tagħha sa fejn il-Qorti Ġenerali ma wettqet ebda żball ta’ liġi meta qieset li t-tliet żbalji mwettqa fil-kalkolu tar-remunerazzjoni tal-attività ta’ finanzjament u teżor eżerċitata minn FFT, kif identifikati mill-Kummissjoni fid-deċiżjoni kontenzjuża, ma kinux jippermettu li tintlaħaq approssimazzjoni affidabbli ta’ riżultat ta’ distakkament, u setgħu għalhekk iservu bħala bażi għall-konstatazzjoni tal-eżistenza ta’ vantaġġ fis-sens tal-Artikolu 107(1) TFUE. F’dan ir-rigward, nenfasizza li FFT ma tikkontestax l-affermazzjoni tal-Qorti Ġenerali, li tinsab fil-punt 283 tas-sentenza appellata, li tgħid li, li kieku kellu jitqies li għandha tapplika r-rata ta’ dħul prevista mill-Gran Dukat tal-Lussemburgu, l-ammont ta’ remunerazzjoni ta’ FFT li kien jirriżulta kien ikun ħafna ogħla minn dak li jirriżulta mid-deċiżjoni bil-quddiem inkwistjoni, peress li din ir-rata kienet tiġi applikata għall-integralità tal-ammont tal-kapital proprju, li tirrappreżenta ammont għaxar darbiet ikbar minn dak li lilu l-imsemmija rata ġiet applikata bis-saħħa tad-deċiżjoni bil-quddiem inkwistjoni.

136.

L-allegata natura ineffettiva tat-tieni parti tal-ewwel aggravju hija dovuta, skont il-Kummissjoni, għall-fatt li din ma tirrigwardax il-punt 316 tas-sentenza appellata, li jesponi l-motivazzjoni prinċipali li wasslet lill-Qorti Ġenerali tiċħad l-argument li l-Kummissjoni kienet obbligata tistabbilixxi l-eżistenza ta’ vantaġġ fil-livell tal-grupp.

137.

Għandu jitfakkar li, fil-punt 316 tas-sentenza appellata, il-Qorti Ġenerali qabel kollox indikat li l-Gran Dukat tal-Lussemburgu ma kien ressaq ebda argument “li jistabbilixxi li l-grupp Fiat/Chrysler u FFT ma jikkostitwixxux unità ekonomika fis-sens tad-dritt tal-għajnuna mill-Istat”. Sussegwentement hija qieset li, fi kwalunkwe każ, FFT hija kompletament ikkontrollata minn Fiat SpA, li min-naħa tagħha tikkontrolla l-grupp Fiat/Chrysler. Fl-aħħar nett, il-Qorti Ġenerali kkonkludiet li “kull vantaġġ li jkun ta’ benefiċċju għal FFT ikun ta’ benefiċċju għall-imsemmi grupp kollu kemm hu, b’mod partikolari jekk dan jinvolvi […] kundizzjonijiet ta’ self, mogħti minn FFT lill-kumpanniji l-oħra tal-grupp, iktar vantaġġużi minħabba t-tnaqqis tal-oneru fiskali li din tal-aħħar tibbenefika minnu”.

138.

Huwa minnu li FFT ma tikkontestax, fl-appell tagħha, dawn il-konklużjonijiet tal-Qorti Ġenerali. Madankollu, jidhirli li huwa żbaljat li minn dan niddeduċi n-natura ineffettiva ta’ dan l-aggravju. Fil-fatt, kuntrarjament għall-Kummissjoni, ma narax raġuni għalfejn ir-raġunament tal-Qorti Ġenerali li jinsab fil-punti 316, 317 u 318 tas-sentenza appellata għandu jiġi interpretat fis-sens li l-ewwel wieħed minn dawn il-punti jesponi l-motivazzjoni prinċipali u l-aħħar tnejn juru evalwazzjonijiet purament sussidjarji. Kif għadu kif intwera, il-Qorti Ġenerali kkonfermat, fil-punt 316 ta’ din is-sentenza, il-konstatazzjoni tal-Kummissjoni li tgħid li FFT u l-grupp Fiat/Chrysler kienu l-benefiċjarji tal-għajnuna inkwistjoni, u sussegwentement qieset, fil-punti 317 u 318 tal-imsemmija sentenza, li n-nuqqas ta’ evalwazzjoni mill-Kummissjoni tal-eżistenza ta’ vantaġġ ekonomiku fil-livell tal-grupp ma setax jiġi kkritikat. Dawn huma għalhekk żewġ komponenti neċessarji ta’ raġunament unitarju intiż li juri li l-Kummissjoni ma kinitx wettqet żball ta’ liġi meta qieset li FFT u l-grupp Fiat/Chrysler ibbenefikaw minn vantaġġ fis-sens tal-Artikolu 107(1) TFUE. Fil-fehma tiegħi, dan il-qari ma huwiex invalidat mill-użu tal-kliem “[b]arra minn hekk” fil-bidu tal-punti 317 u 318 tas-sentenza, kif tallega l-Kummissjoni ( 65 ).

139.

Fl-appell tagħha, FFT tikkritika lill-Qorti Ġenerali li naqset milli tieħu inkunsiderazzjoni, fil-kuntest tal-eżami marbut mal-eżistenza ta’ vantaġġ ekonomiku, l-“effett ta’ grupp”, li jeżiġi analiżi tal-effetti ekonomiċi ta’ deċiżjoni bil-quddiem fil-qasam tal-prezz ta’ trasferiment fuq il-grupp kollu kkonċernat. Kif irrikonoxxiet il-Kummissjoni fil-premessa 343 tad-deċiżjoni kkontestata, “[l]-mekkaniżmu ta’ stabbiliment tal-prezzijiet ta’ trasferiment għandu, min-natura tiegħu, effetti fuq aktar minn kumpanija waħda tal-grupp (żieda fil-prezz fi ħdan kumpanija se tnaqqas il-profitt tal-ieħor)”. Għaldaqstant jidhirli li huwa evidenti li, kieku din il-parti kellha tintlaqa’, il-konklużjoni tal-Qorti Ġenerali li tgħid li l-Kummissjoni kienet qieset ġustament li FFT u l-grupp Fiat/Chrysler kienu bbenefikaw minn vantaġġ ekonomiku tiġi invalidata u dan iwassal għall-annullament tas-sentenza appellata.

140.

F’dawn iċ-ċirkustanzi, inqis li t-tieni parti tal-ewwel aggravju għandha tiġi ddikjarata effettiva.

141.

Bħala tfakkira, il-Qorti Ġenerali kkonstatat, fil-punt 317 tas-sentenza appellata, li, jekk jitqies li dan l-element huwa rilevanti għall-finijiet tal-eżami tal-eżistenza ta’ vantaġġ ekonomiku, la l-Gran Dukat tal-Lussemburgu u lanqas FFT “ma jistabbilixxu li t-tnaqqis ta’ taxxa li din tal-aħħar tibbenefika minnu fil-Lussemburgu huwa ‘nnewtralizzat’ minn żidiet ta’ taxxa fi Stati Membri oħra”. Sussegwentement hija ppreċiżat, fil-punt 318 ta’ din is-sentenza, li, anki jekk tali “newtralizzazzjoni” kienet seħħet, dan ma jippermettix li jitqies li FFT u l-grupp Fiat/Chrysler ma bbenefikawx minn vantaġġ, sa fejn l-eżistenza ta’ dan tal-aħħar “hija ddeterminata fil-konfront tar-regoli ta’ tassazzjoni normali, b’tali mod li r-regoli fiskali ta’ Stat Membru ieħor ma humiex rilevanti”. Minn dan isegwi, skont il-Qorti Ġenerali, li “peress li ġie stabbilit li impriża integrata tibbenefika, permezz ta’ miżura fiskali mogħtija minn Stat Membru, minn tnaqqis tal-oneru fiskali li normalment [hija] kien ikollha ġġarrab bl-applikazzjoni tar-regoli ta’ tassazzjoni normali, is-sitwazzjoni fiskali ta’ impriża oħra tal-grupp fi Stat Membru ieħor ma għandhiex effett fuq l-eżistenza ta’ vantaġġ”. Għal din l-istess raġuni, il-Qorti Ġenerali ċaħdet l-argument ta’ FFT, li jgħid li, fi kwalunkwe każ, hija ma bbenefikat minn ebda vantaġġ mill-fatt li dan id-dħul mill-ġdid ġie impost jew fl-Italja jew fil-Lussemburgu.

142.

Fl-ewwel lok ser nindirizza l-ilment, indirizzat kontra l-punt 317 tas-sentenza appellata, li huwa intiż essenzjalment li jikkontesta l-konklużjoni tal-Qorti Ġenerali li tgħid li n-newtralizzazzjoni fiskali fil-livell tal-grupp tal-vantaġġ mogħti lil FFT ma ġietx stabbilita minn din tal-aħħar, u sussegwentement l-ilment, indirizzat kontra l-punt 318 ta’ din is-sentenza, li jikkontesta r-rilevanza nnifisha tagħha għall-finijiet tal-evalwazzjoni tal-eżistenza ta’ vantaġġ fis-sens tal-Artikolu 107(1) TFUE.

143.

Fir-rigward tal-ilment li jgħid li l-Qorti Ġenerali qieset li FFT ma wrietx li l-vantaġġ allegatament mogħti huwa nnewtralizzat fil-livell tal-grupp, FFT tafferma, l-ewwel nett, li, fil-punt 317 tas-sentenza appellata, il-Qorti Ġenerali qalbet l-oneru tal-prova billi rrikjediet li FFT tipprova l-ineżistenza ta’ vantaġġ, li jmur kontra l-ġurisprudenza klassika li tgħid li hija l-Kummissjoni li għandha tipprova l-eżistenza tiegħu.

144.

Sempliċi teħid inkunsiderazzjoni tal-istruttura tas-sentenza appellata jwassal, fil-fehma tiegħi, sabiex jiġi konkluż li dan ma huwiex il-każ. Fil-fatt, huwa osservat li l-punt 317 jagħmel parti mit-Taqsima 4 tat-Titolu D ta’ din is-sentenza. It-titolu D, imsejjaħ “Fuq it-tieni sensiela ta’ motivi, ibbażati fuq l-assenza ta’ vantaġġ”, huwa kompost minn erba’ taqsimiet, jiġifieri t-taqsimiet 1 (“Osservazzjonijiet preliminari”), 2 (“Fuq ir-raġunament prinċipali tal-Kummissjoni, li jgħid li d-deċiżjoni tat-taxxa inkwistjoni kienet tidderoga mis-sistema ġenerali tat-taxxa fuq il-kumpanniji tal-Lussemburgu”), 3 (“Fuq ir-raġunament ifformulat sussidjarjament mill-Kummissjoni li jgħid li d-deċiżjoni tat-taxxa inkwistjoni kienet tidderoga mill-Artikolu 164(3) tal-Kodiċi tat-Taxxa u miċ-Ċirkulari [Nru 164/2]”), u 4 (“Fuq il-motiv ibbażat fuq l-assenza ta’ vantaġġ fil-livell tal-grupp”). It-Taqsimiet 2 u 3, żviluppati rispettivament b’mod prinċipali u sussidjarjament, jiddikjaraw l-istess konklużjoni, jiġifieri li l-Kummissjoni qieset ġustament li d-deċiżjoni bil-quddiem inkwistjoni kienet tagħti vantaġġ lil FFT ( 66 ). Għalhekk, il-Kummissjoni effettivament issodisfat l-oneru tagħha li tipprova l-eżistenza ta’ vantaġġ fis-sens tal-Artikolu 107(1) TFUE. F’dawn iċ-ċirkustanzi, kien l-obbligu ta’ FFT u tal-Gran Dukat tal-Lussemburgu, mingħajr ma dan jimplika qlib tal-oneru tal-prova, li juru li tali vantaġġ kien ġie nnewtralizzat fil-livell tal-grupp minħabba li t-tnaqqis tal-oneru fiskali ta’ FFT fil-Lussemburgu kien ġie kompletament ikkumpensat miż-żieda tal-oneru fiskali ta’ impriża oħra tal-grupp fi Stat Membru ieħor. Għaldaqstant ma nistax naqbel mal-ewwel argument imressaq minn FFT.

145.

It-tieni, FFT targumenta li, fil-punt 317 tas-sentenza appellata, il-Qorti Ġenerali sempliċement affermat li hija ma kienet ipproduċiet l-ebda prova insostenn tal-eżistenza tal-effett ta’ newtralizzazzjoni fiskali fil-livell tal-grupp Fiat/Chrysler, u b’hekk injorat id-diversi argumenti li permezz tagħhom FFT kienet irrapportat l-iżbalji u ineżattezzi li wasslu lill-Kummissjoni għal tali konklużjoni ( 67 ). Minn dan jirriżulta ksur tal-obbligu ta’ motivazzjoni li għandha l-Qorti Ġenerali.

146.

Skont FFT, hija kienet ipproduċiet rapport ta’ awditu tal-pulizija fiskali Taljana u żewġ avviżi ta’ evalwazzjoni tat-taxxa fuq il-kumpanniji tal-awtorità tat-taxxa Taljana li jaffermaw li FFT kienet issopravvalutat il-profitti taxxabbli tagħha u kienet għalhekk ħallset taxxa fuq il-kumpanniji għolja wisq fil-Lussemburgu minħabba l-ammont għoli wisq tal-interessi miġbura fuq is-self intra-grupp mogħti lil waħda mis-sussidjarji tagħha (Fiat Chrysler Finance S.p.A., iktar ’il quddiem “FCF”). Għalhekk, jirriżulta b’mod evidenti li teżisti rabta indiskutibbli bejn il-profitti ta’ FFT u dawk ta’ FCF fis-sens li dħul ogħla minn FFT (minħabba l-ġbir ta’ interessi ogħla) jipprovoka tnaqqis fid-dħul ta’ FCF (minħabba l-ħlas ta’ interessi ogħla) u viċiversa. Barra minn hekk, il-proċedura bonarja taħt il-Ftehim ta’ Arbitraġġ biex tiġi evitata t-taxxa doppja bejn l-Italja u l-Lussemburgu turi li ammont ogħla ta’ dħul taxxabbli fil-Lussemburgu neċessarjament jinkludi ammont inqas ta’ dħul taxxabbli fl-Italja.

147.

Permezz ta’ dan l-argument, jidhirli li FFT tikkritika lill-Qorti Ġenerali minħabba l-assenza ta’ teħid inkunsiderazzjoni tal-provi prodotti fl-ewwel istanza insostenn tal-eżistenza ta’ newtralizzazzjoni fiskali tal-vantaġġ allegatament mogħti lil FFT fil-livell tal-grupp Fiat/Chrysler. Jekk qed nifhem l-argument ta’ FFT b’mod korrett, jeħtieġ li neżamina l-frażi rilevanti tal-punt 317 tas-sentenza appellata li tgħid kif ġej: “[…] hemm lok li jiġi kkonstatat li la l-Gran Dukat tal-Lussemburgu u lanqas FFT ma jistabbilixxu li t-tnaqqis tat-taxxa li din tal-aħħar tibbenefika minnu fil-Lussemburgu jkun ‘innewtralizzat’ minn żieda fit-taxxa fi Stati Membri oħra” ( 68 ). Issa, il-verb “jistabbilixxi”, li jidhirli li l-Qorti Ġenerali għażlet bir-reqqa, jimplika b’mod ċar, fil-fehma tiegħi, li l-provi prodotti minn FFT ġew effettivament eżaminati anki jekk tqiesu bħala insuffiċjenti sabiex jikkorroboraw l-argument ta’ FFT. F’dawn iċ-ċirkustanzi, l-argument li qed jiġi eżaminat ma jistax, fil-fehma tiegħi, jiġi segwit, peress li, kif jirriżulta minn ġurisprudenza stabbilita tal-Qorti tal-Ġustizzja ( 69 ), il-Qorti Ġenerali ma hijiex obbligata timmotiva b’mod espress l-evalwazzjonijiet tagħha fir-rigward tal-valur ta’ kull prova prodotta quddiemha, b’mod partikolari meta tqis li dawn ikunu bla interess jew irrilevanti għas-soluzzjoni tat-tilwima, bla ħsara għall-obbligu li tosserva l-prinċipji ġenerali u r-regoli proċedurali dwar l-oneru u l-produzzjoni tal-prova u mhux li tiżnatura l-provi ( 70 ).

148.

Fid-dawl tal-kunsiderazzjonijiet preċedenti, nistieden lill-Qorti tal-Ġustizzja tiċħad l-ewwel ilment tat-tieni parti tal-ewwel aggravju.

149.

F’dak li jirrigwarda l-ilment dwar ir-rilevanza tat-teħid inkunsiderazzjoni tan-newtralizzazzjoni fiskali fil-livell tal-grupp, għandu l-ewwel nett jitfakkar li l-Qorti Ġenerali ddeċidiet li l-eżistenza ta’ vantaġġ għandha tiġi ddeterminata fil-konfront tar-regoli ta’ tassazzjoni normali, li jeskludi li jistgħu jittieħdu inkunsiderazzjoni r-regoli fiskali ta’ Stat Membru ieħor sabiex jiġi evalwat l-effett ta’ miżura fiskali fuq is-sitwazzjoni tal-grupp kollu kemm hu.

150.

Għandu jiġi osservat li l-Qorti Ġenerali tibbaża ruħha, f’dan ir-rigward, fuq is-sentenza Spanja vs Il‑Kummissjoni ( 71 ). Fil-kawża li tat lok għal din is-sentenza, il-miżuri kontenzjużi kienu jikkonsistu f’vantaġġi fiskali fl-għoti ta’ ċerti artijiet u f’sussidju ta’ self u ta’ garanziji lil bdiewa Spanjoli sabiex itaffu l-effetti ta’ żieda sinjifikattiva fil-prezz tal-gażolju fuq livell dinji. Ir-Renju ta’ Spanja kien iddefenda ruħu b’mod partikolari billi sostna li dawn il-miżuri ma setgħux jiġu kklassifikati bħala għajnuna mill-Istat minħabba li l-vantaġġ hekk mogħti kien inqas minn dak li kienu jibbenefikaw minnu l-bdiewa ta’ Stati Membri oħra abbażi ta’ miżuri adottati minn dawn l-Istati sabiex inaqqsu t-tassazzjoni tal-karburanti fit-territorju tagħhom. Il-Qorti tal-Ġustizzja ċaħdet dan il-motiv billi affermat li “il-kunċett ta’ vantaġġ mogħti lill-benefiċjarji ta’ għajnuna mill-Istat […] huwa ddeterminat b’paragun ma’ impriżi oħra tal-istess Stat Membru u mhux ma’ impriżi ta’ Stati Membri oħra” ( 72 ).

151.

Skont FFT, din is-sentenza ma tikkorroborax il-konklużjoni tal-Qorti Ġenerali. Għalkemm minn dan jirriżulta b’mod ċar li l-eżami tal-eżistenza ta’ vantaġġ ma jistax jimplika paragun bejn is-sitwazzjoni fiskali ta’ FFT u dik ta’ persuni taxxabbli oħra stabbiliti fi Stati Membri oħra, għall-kuntrarju ma jistax jiġi dedott li dan l-eżami jista’ jinjora l-effett ta’ grupp. F’dan ir-rigward, FFT issostni, essenzjalment, li t-teħid inkunsiderazzjoni tal-effett ta’ grupp huwa iktar u iktar imperattiv peress li, kif irrilevat il-Kummissjoni fil-premessa 343 tad-deċiżjoni kontenzjuża, “il-mekkaniżmu ta’ stabbiliment tal-prezzijiet ta’ trasferiment għandu, min-natura tiegħu, effetti fuq aktar minn kumpanija waħda tal-grupp”.

152.

Għalhekk tqum il-kwistjoni dwar jekk, kuntrarjament għal dak li ddeċidiet il-Qorti Ġenerali fis-sentenza appellata, il-Kummissjoni kinitx obbligata tieħu inkunsiderazzjoni d-dimensjoni intragrupp u transkonfinali tal-effetti tad-deċiżjoni bil-quddiem inkwistjoni meta hija vverifikat jekk din id-deċiżjoni tagħtix vantaġġ fis-sens tal-Artikolu 107(1) TFUE. Li kieku l-Kummissjoni għamlet dan, hija setgħet tikkonstata, skont FFT, tnaqqis tal-profitti fil-livell tal-grupp jew in-newtralizzazzjoni tagħhom, b’tali mod li l-ammont tal-vantaġġ reali kien ikun jew inqas għoli mill-ammont tal-vantaġġ immedjatament perċettibbli jew imnaqqas għal xejn.

153.

Fil-fehma tiegħi, it-tweġiba għal din il-mistoqsija titlob neċessarjament li jitfakkar wieħed mil-limiti tal-kamp ta’ applikazzjoni tar-regoli fil-qasam tal-għajnuna mill-Istat.

154.

Huwa magħruf li l-Artikolu 107(1) TFUE jipprojbixxi l-għoti ta’ kull vantaġġ indebitu minn Stat Membru. Ir-raġuni għal din il-projbizzjoni għandha tiġi assimilata ma’ dik tar-regoli tal-Unjoni dwar il-moviment liberu. Bħal dawn tal-aħħar, hija tfisser l-abolizzjoni progressiva tal-miżuri leġiżlattivi li jistgħu jipprekludu l-moviment liberu tal-atturi ekonomiċi ( 73 ).

155.

B’mod iktar preċiż, l-għan tar-regoli fil-qasam tal-għajnuna mill-Istat huwa, kif nafu, li tiġi evitata “gwerra ta’ sussidji” (“subsidies war”) bejn l-Istati Membri tal-Unjoni, li twassal għall-ħolqien ta’ ostakoli għall-moviment liberu tal-kumpanniji, kif ukoll tal-merkanzija, tas-servizzi, tal-ħaddiema u tal-kapital ( 74 ).

156.

Il-projbizzjoni tal-għoti ta’ għajnuna mill-Istat tkopri għalhekk il-miżuri, inklużi l-miżuri fiskali, adottati minn Stat Membru ta’ natura li jostakolaw l-aċċess għas-suq nazzjonali tiegħu. Huwa ovvju li r-regoli li jirregolaw l-attività tal-kumpanniji f’dan l-aħħar suq, imsejħa “regoli ta’ tassazzjoni normali” meta jkunu ta’ natura fiskali, jistgħu jappartjenu biss fl-ordinament ġuridiku tal-imsemmi Stat.

157.

F’dawn iċ-ċirkustanzi, il-Qorti Ġenerali kkunsidrat ġustament, fil-fehma tiegħi, li r-regoli fis-seħħ fi Stati Membri oħra ma jinteressawx l-eżami tal-eżistenza ta’ vantaġġ ekonomiku f’dan il-każ, minkejja li dawn ir-regoli jistgħu jwasslu għal tnaqqis jew newtralizzazzjoni tal-profitti fil-livell tal-grupp, u, minħabba f’hekk, għall-vantaġġ reali miksub mill-grupp ikkonċernat kollu.

158.

Jidhirli li dan il-qari huwa kkorroborat minn żewġ konstatazzjonijiet.

159.

L-ewwel, jidhirli li huwa evidenti li l-awtonomija ta’ Stat Membru fil-qasam tat-tassazzjoni diretta, kif irrikonoxxuta minn ġurisprudenza stabbilita ( 75 ), ma tistax tiġi kompletament żgurata jekk ir-regoli ta’ tassazzjoni normali meħuda inkunsiderazzjoni għall-finijiet tal-eżami mwettaq skont l-Artikolu 107(1) TFUE ma jkunux ġew esklużivament ippromulgati mil-leġiżlatur tal-Istat Membru kkonċernat.

160.

It-tieni, wieħed jista’ faċilment jara li, kieku kellhom l-obbligu li jikkunsidraw l-effett tar-regoli fiskali ta’ Stati Membri oħra, l-awtoritajiet tat-taxxa ta’ Stat Membru bilkemm ikunu jistgħu jevalwaw jekk deċiżjonijiet bil-quddiem li jkunu maħsuba li jiġu adottati jagħtux vantaġġ ekonomiku u jikkostitwixxux għaldaqstant għajnuna mill-Istat fis-sens tal-Artikolu 107(1) TFUE. F’dawn iċ-ċirkustanzi, ma jidhirlix inkonċepibbli li dawn l-awtoritajiet jirreaġixxu billi jinnotifikaw lill-Kummissjoni t-test tad-deċiżjonijiet bil-quddiem kollha, li jagħmel il-piż tax-xogħol li jaqa’ fuq din l-istituzzjoni għall-inqas eċċessiv.

161.

L-argumenti l-oħra mressqa minn FFT insostenn tat-teħid inkunsiderazzjoni tal-effett ta’ grupp ma humiex, fil-fehma tiegħi, ta’ natura li jikkontestaw l-interpretazzjoni proposta iktar ’il fuq.

162.

Tali teħid inkunsiderazzjoni huwa konformi, skont FFT, mal-prinċipju stabbilit mill-Qorti Ġenerali fil-punt 47 tas-sentenza Fútbol Club Barcelona vs Il‑Kummissjoni ( 76 ), li jgħid li l-eżistenza ta’ vantaġġ ekonomiku għandha tiġi evalwata abbażi tal-effetti tal-miżura, meqjusa globalment. Issa, jien konxju bis-sħiħ tal-eżistenza ta’ din il-ġurisprudenza. Barra minn hekk, huwa preċiżament fis-sentenza mogħtija fl-istadju tal-appell li l-Qorti tal-Ġustizzja fakkret reċentement li, sabiex jiġi ddeterminat jekk miżura statali tikkostitwixxix għajnuna mill-Istat “huwa neċessarju li jiġu kkunsidrati l-elementi kollha ta’ dritt u ta’ fatt li bihom hija mogħnija din il-miżura, b’mod partikolari l-benefiċċji u l-oneri li jirriżultaw minnha […] u, b’hekk, li ssir evalwazzjoni tal-imsemmija miżura fl-intier tagħha li tieħu inkunsiderazzjoni l-karatteristiċi partikolari għaliha” ( 77 ).

163.

Madankollu għandu jiġi rrilevat li la f’din il-kawża u lanqas fil-kawżi li taw lok għas-sentenzi msemmija mill-Qorti tal-Ġustizzja ( 78 )“l-elementi ta’ dritt” li kienu jakkumpanjaw il-miżura statali inkwistjoni ma kienu jinkludu r-regoli fiskali ta’ Stat Membru ieħor. Minn dan jirriżulta li n-natura globali tal-evalwazzjoni li għandha tagħmel il-Kummissjoni ma timponix, f’dan il-każ, li jiġi evalwat jekk it-tnaqqis tal-ammont tat-taxxa fuq il-kumpanniji mħallas minn FFT fil-Lussemburgu minħabba l-adozzjoni tad-deċiżjoni bil-quddiem inkwistjoni huwiex ikkumpensat, kompletament jew parzjalment, minn żieda fl-ammont tat-taxxa mħallsa minn kumpanniji oħra tal-grupp Fiat/Chrysler abbażi tat-taxxa fuq il-kumpanniji fi Stati Membri oħra.

164.

It-teħid inkunsiderazzjoni tal-effett ta’ grupp jista’ wkoll jiġi kkonċiljat, skont FFT, ma’ seba’ sentenzi li permezz tagħhom il-Qorti tal-Ġustizzja stabbilixxiet li l-possibbiltà li jiġi kkumpensat vantaġġ hija irrilevanti biss sa fejn tali kumpens joriġina minn piżijiet li huma “distinti” u“mingħajr relazzjoni” mal-miżura fiskali assimilata ma’ għajnuna mill-Istat ( 79 ). Min-naħa tiegħi, inqis li din il-ġurisprudenza ma hijiex rilevanti f’dan il-każ. Fil-fatt, il-piżijiet li bihom il-benefiċjarji tal-miżuri fiskali eżaminati f’dawn is-sentenzi riedu jikkumpensaw il-vantaġġ ekonomiku miksub permezz ta’ dawn il-miżuri bl-ebda mod ma kienu jirriżultaw mill-applikazzjoni tar-regoli fiskali li jappartjenu għall-ordinament ġuridiku ta’ Stat Membru ieħor.

165.

FFT tenfasizza li l-argument tagħha huwa kkorroborat mill-fatt li l-assenza ta’ teħid inkunsiderazzjoni tal-effetti tad-deċiżjoni bil-quddiem fil-livell tal-grupp Fiat/Chrysler hija inkompatibbli mal-affermazzjoni tal-Qorti Ġenerali li tgħid li kull vantaġġ favur FFT kien ibbenefika lil dan il-grupp kollu kemm hu ( 80 ). Is-sempliċi qari propost fil-kuntest tal-appell jista’, fil-fatt, jitqies li huwa konsistenti ma’ din l-aħħar affermazzjoni.

166.

Lanqas dan l-argument supplimentari ma jwassalni sabiex nibdel ir-risposta li nipproponi li l-Qorti tal-Ġustizzja tagħti lit-tieni parti tal-ewwel aggravju.

167.

Fil-fatt, FFT ma tikkontestax il-konstatazzjoni tal-Qorti Ġenerali, li tinsab fil-punti 313 u 316 tas-sentenza appellata, li tgħid li l-benefiċjarju tat-trattament fiskali vantaġġuż mogħti lil FFT huwa l-grupp Fiat/Chrysler kollu kemm hu, sa fejn FFT u l-grupp Fiat/Chrysler jifformaw unità ekonomika. Għall-kuntrarju, hija taċċetta l-imsemmija identifikazzjoni tal-benefiċjarju daqslikieku kienet premessa.

168.

Għaldaqstant, fl-opinjoni tiegħi, it-tieni parti tal-ewwel aggravju għandha tiġi miċħuda.

169.

Fid-dawl ta’ dawn il-kunsiderazzjonijiet, nipproponi lill-Qorti tal-Ġustizzja tiċħad l-ewwel aggravju fl-intier tiegħu.

170.

Permezz tal-ewwel parti tat-tielet aggravju, FFT issostni li l-Qorti Ġenerali sempliċement ikkonfermat il-prinċipju innovattiv ta’ distakkament u ddefinit b’mod żbaljat mill-Kummissjoni. Dan l-approċċ għandu l-konsegwenza diretta li jippermetti lill-Kummissjoni ssawwar il-portata ta’ dan il-prinċipju kif jidhrilha, u dan joħloq inċertezza legali kbira kemm għall-Istati Membri kif ukoll għall-impriżi. Din l-inċertezza hija enfasizzata min-natura kważi retroattiva tal-applikazzjoni mill-Kummissjoni tal-prinċipju ta’ distakkament għall-ftehimiet fiskali individwali. Għaldaqstant, l-analiżi inadegwata, mill-Qorti Ġenerali, tal-portata ta’ dan il-prinċipju tikkomprometti b’mod serju l-kapaċità tal-impriżi li jipprevedu u jippjanaw l-obbligi fiskali tagħhom.

171.

Il-Kummissjoni tirribatti li din il-parti għandha tiġi miċħuda bħala ineffettiva. Fuq il-mertu, hija tqis ukoll li din il-parti, li essenzjalment tirrepeti t-tieni aggravju, ma tistax tiġi milqugħa. F’dan ir-rigward, il-Kummissjoni ssostni b’mod partikolari li l-portata u l-kontenut tal-prinċipju ta’ distakkament huma estremament ċari peress li l-Qorti Ġenerali indikat li skont id-dritt fiskali Lussemburgiż, it-tranżazzjonijiet bejn operaturi ekonomiċi marbuta għandhom jiġu evalwati għal finijiet fiskali daqslikieku kienu ġew konklużi f’kundizzjonijiet ta’ distakkament bejn operaturi ekonomiċi mhux relatati.

172.

Fit-tieni parti tat-tielet aggravju, FFT tqis li l-Qorti Ġenerali kisret il-prinċipju ta’ ċertezza legali meta kkonfermat, fil-punti 339 sa 359 tas-sentenza appellata, il-preżunzjoni ta’ natura selettiva li l-Kummissjoni attribwiet lill-miżura kkontestata. F’dan il-każ, xejn ma jippermetti li jiġi affermat li din il-miżura tikkostitwixxi għajnuna individwali u li l-preżunzjoni ta’ selettività stabbilita mill-ġurisprudenza tal-Qorti tal-Ġustizzja hija applikabbli. L-approvazzjoni ta’ din il-preżunzjoni marbuta mad-deċiżjonijiet tat-taxxa bil-quddiem tiġġenera, skont FFT, inċertezza legali kunsiderevoli għall-impriżi u għall-Istati Membri.

173.

Il-Kummissjoni tirribatti li din il-parti għandha wkoll tiġi miċħuda bħala ineffettiva. Din hija wkoll infondata sa fejn FFT ma ressqet ebda argument insostenn tal-ilment magħmul lill-Qorti Ġenerali li kisret il-prinċipju ta’ ċertezza legali billi invokat preżunzjoni ta’ selettività fir-rigward tal-miżuri fiskali individwali. Il-Kummissjoni ssostni, fid-dawl tal-ġurisprudenza tal-Qorti tal-Ġustizzja, li deċiżjoni bil-quddiem individwali fil-qasam tal-prezzijiet ta’ trasferiment ma tistax titqies li ngħatat fil-kuntest ta’ skema ta’ għajnuna, kif tikkonferma l-Qorti Ġenerali fis-sentenza appellata.

174.

Il-Kummissjoni tqis li l-ewwel parti tat-tielet aggravju hija ineffettiva sa fejn, anki jekk jitqies li din il-parti tintlaqa’, hija ma tistax twassal għall-annullament tas-sentenza appellata. Dan l-aggravju huwa bbażat fuq l-affermazzjoni li l-Qorti Ġenerali wettqet żball ta’ liġi meta kkonfermat l-użu mill-Kummissjoni ta’ prinċipju ta’ distakkament ad hoc, li l-bażi legali tiegħu hija żbaljata, insostenn tal-konstatazzjoni prinċipali tagħha dwar l-eżistenza ta’ vantaġġ selettiv. Issa, anki jekk din l-affermazzjoni kienet eżatta, fatt li l-Kummissjoni tikkontesta, id-deċiżjoni kontenzjuża tinkludi raġunament sussidjarju għall-bażi legali differenti, jiġifieri l-Artikolu 164(3) tal-Kodiċi dwar it-Taxxa u ċ-Ċirkulari Nru 164/2, raġunament li ġie approvat mill-Qorti Ġenerali mingħajr ma ġie kkontestat minn FFT.

175.

Min-naħa tiegħi, jien inqis, bil-kontra tal-Kummissjoni, li l-ewwel parti tat-tielet aggravju ta’ dan l-appell ma tistax tiġi ddikjarata inoperattiva għall-istess raġunijiet bħal dawk esposti fil-punti 52 sa 54 ta’ dawn il-konklużjonijiet.

176.

Qabel kollox għandu jiġi speċifikat li, permezz ta’ din il-parti, FFT tafferma essenzjalment li l-Qorti Ġenerali wettqet żball ta’ liġi billi astjeniet milli tiċċensura l-karatterizzazzjoni insuffiċjenti tal-portata tal-prinċipju ta’ distakkament mill-Kummissjoni minħabba l-ksur tal-prinċipju ta’ ċertezza legali. Għalhekk, kuntrarjament għal dak li ssostni l-Kummissjoni, l-għan ta’ din il-parti għandu jiġi distint minn dak tat-tieni aggravju sa fejn ma hijiex intiża, kuntrarjament għal dan tal-aħħar, li tikkontesta d-definizzjoni tal-bażi legali tal-prinċipju ta’ distakkament li jirriżulta mis-sentenza appellata.

177.

Wara li ġie stabbilit dan, għandhom isiru xi osservazzjonijiet preliminari fuq il-prinċipju ta’ ċertezza legali.

178.

Il-prinċipju ta’ ċertezza legali, li jikkostitwixxi prinċipju ġenerali tad-dritt tal-Unjoni u japplika wkoll għall-atti tal-istituzzjonijiet, tal-korpi u tal-organi tal-Unjoni, jeħtieġ, skont ġurisprudenza stabbilita, li r-regoli ta’ dritt ikunu ċari u preċiżi u li jkunu ta’ natura prevedibbli ( 81 ). B’mod iktar partikolari, dan il-prinċipju jimplika li għandu jiġi evalwat jekk att legali tal-Unjoni jippermettix lill-persuni kkonċernati li jkunu jafu b’eżattezza u mingħajr ambigwità l-portata tad-drittijiet u tal-obbligi tagħhom u li jieħdu l-miżuri tagħhom kif xieraq ( 82 ). Dan ir-rekwiżit għandu jiġi impost b’rigorożità partikolari fil-każ ta’ att li jista’ jkollu konsegwenzi finanzjarji ( 83 ).

179.

Mill-ġurisprudenza tal-Qorti tal-Ġustizzja jirriżulta li l-prinċipju ta’ ċertezza legali huwa intrinsikament marbut mal-produzzjoni normattiva tal-Unjoni u tal-awtoritajiet nazzjonali meta dawn jimplimentaw id-dritt tal-Unjoni u li jawtorizza stħarriġ ġudizzjarju dwar l-imperfezzjonijiet li jistgħu jwasslu għal applikazzjoni inċerta tal-att regolatorju kkontestat ( 84 ).

180.

Il-prinċipju ta’ ċertezza legali għandu portata iktar ristretta fir-rigward ta’ deċiżjoni amministrattiva, kif jirriżulta mill-ġurisprudenza dwar l-għajnuna mill-Istat. F’dan il-qasam, ksur tal-prinċipju ta’ ċertezza legali ġie kkonstatat biss mill-Qorti tal-Ġustizzja meta kien hemm inkwistjoni aġir adottat mill-Kummissjoni qabel jew matul il-proċedura li wasslet għall-adozzjoni ta’ deċiżjoni ta’ rkupru tal-għajnuna mill-Istat ( 85 ).

181.

F’dan il-każ, il-prinċipju ta’ ċertezza legali huwa invokat kontra l-użu, għall-finijiet tal-eżami tal-kundizzjoni tal-vantaġġ, tal-prinċipju ta’ distakkament minħabba l-assenza ta’ karatterizzazzjoni tal-portata ta’ dan tal-aħħar. L-għan ta’ din il-kontestazzjoni huwa, fi kliem ieħor, il-fondatezza ta’ evalwazzjoni tal-Kummissjoni dwar il-klassifikazzjoni ta’ miżura statali bħala għajnuna mill-Istat. Madankollu, il-fondatezza ta’ tali evalwazzjoni ma tistax tiġi kkontestata mill-perspettiva tal-konformità mal-prinċipju ta’ ċertezza legali. Pożizzjoni kuntrarja tkun tfisser li l-Kummissjoni ma titħalliex tikkunsidra approċċi ġodda fl-applikazzjoni tar-regoli tad-dritt u tikkundannaha għalhekk sabiex tiffriża l-pożizzjoni tagħha fiż-żmien. B’mod partikolari, tali qari jkun ifisser li l-Kummissjoni tkun prekluża milli tirrikorri għal kull kriterju ta’ referenza ġdid sabiex tiggwida l-evalwazzjoni tagħha tal-eżistenza ta’ vantaġġ ekonomiku fis-sens tal-Artikolu 107(1) TFUE.

182.

Fid-dawl tal-ġurisprudenza msemmija iktar ’il fuq u tal-fatt li l-kritika ta’ FFT tirrigwarda, b’mod definittiv, il-konstatazzjoni tal-eżistenza ta’ vantaġġ għall-finijiet tal-klassifikazzjoni tad-deċiżjoni tat-taxxa bil-quddiem inkwistjoni bħala għajnuna mill-Istat, hemm lok li jiġi konkluż li l-prinċipju ta’ ċertezza legali ma jistax jiġi validament invokat fil-każ ineżami. Għaldaqstant, ebda żball ta’ liġi ma’ jista’ jiġi attribwit lill-Qorti Ġenerali talli ma kkundannatx il-karatterizzazzjoni tal-portata tal-prinċipju ta’ distakkament kif tirriżulta mid-deċiżjoni kontenzjuża. Għalhekk, fil-fehma tiegħi, l-ewwel parti tat-tielet aggravju għandha tiġi miċħuda.

183.

Fi kwalunkwe każ, il-Qorti Ġenerali qieset ġustament, bi tweġiba għall-argumenti mqajma rispettivament minn FFT u mill-Gran Dukat tal-Lussemburgu u li jinsabu fil-punti 155 u 176 tas-sentenza appellata, li l-Kummissjoni kienet ikkaratterizzat b’mod suffiċjenti l-portata u l-kontenut tal-prinċipju ta’ distakkament applikat fid-deċiżjoni kontenzjuża, u li din il-karatterizzazzjoni b’hekk ma kienet tagħti lok għal ebda kritika għas-setgħa diskrezzjonali eċċessivament wiesgħa mogħtija lill-Kummissjoni fl-applikazzjoni ta’ dan il-prinċipju. Qed naħseb b’mod partikolari fl-affermazzjonijiet tal-Qorti Ġenerali li l-prinċipju ta’ distakkament huwa “għodda li tippermetti li jiġi mistħarreġ li t-tranżazzjonijiet fi ħdan il-grupp jiġu rremunerati daqslikieku kienu ġew innegozjati bejn impriżi indipendenti” u li jgħidu li l-eżami fid-dawl ta’ dan il-prinċipju “jikkonsisti […] fl-eżami ta’ jekk il-metodu ta’ determinazzjoni tal-prezzijiet ta’ trasferiment appoġġjat fid-deċiżjoni tat-taxxa inkwistjoni jippermettix il-kisba ta’ approssimazzjoni affidabbli ta’ riżultat ibbażat fuq is-suq”.

184.

Fir-rigward tal-argument ta’ FFT li jgħid li setgħa diskrezzjonali eċċessivament wiesgħa tal-Kummissjoni tirriżulta mill-fatt li, bħalma ddikjarat il-Qorti Ġenerali fil-punt 413 tas-sentenza appellata, il-linji gwida tal-OECD “ma humiex vinkolanti għall-Kummissjoni” u jibqgħu “mingħajr effett” fuq l-analiżi tagħha, huwa diffiċli li wieħed jara kif dan l-argument jista’ jikkorrobora l-ksur tal-prinċipju ta’ ċertezza legali allegat fil-konfront tal-Kummissjoni f’deċiżjoni individwali bħad-deċiżjoni kontenzjuża. Fil-fatt, din l-istituzzjoni rreferiet b’mod wiesa’, għall-finijiet tal-analiżi tagħha tal-eżistenza ta’ vantaġġ ekonomiku, għall-modalitajiet ta’ applikazzjoni tal-prinċipju ta’ distakkament previsti mill-imsemmija Linji gwida, kif ikkonfermat il-Qorti Ġenerali fil-punt 176 tas-sentenza appellata.

185.

Għaldaqstant huwa żbaljat li jiġi sostnut li l-Qorti Ġenerali kellha tiċċensura d-deċiżjoni kontenzjuża minħabba li l-Kummissjoni la ppreċiżat il-portata u lanqas il-kontenut tal-prinċipju ta’ distakkament.

186.

Din il-konklużjoni ma tistax tiġi kkontestata, fil-fehma tiegħi, mill-argument ta’ FFT li jallega li l-Qorti Ġenerali kellha tirrileva n-natura “kważi retroattiva” tal-applikazzjoni mill-Kummissjoni tal-prinċipju ta’ distakkament għall-ftehimiet fiskali individwali. Tali natura hija spjegata, skont FFT, mill-fatt li l-Kummissjoni tista’, skont l-Artikolu 107 TFUE, tiftaħ mill-ġdid u teżamina dawn il-ftehimiet fiskali individwali sabiex tivverifika jekk jikkostitwixxux għajnuna mill-Istat illegali, u b’hekk tipprekludi kemm lill-awtoritajiet tat-taxxa nazzjonali kif ukoll lill-impriżi benefiċjarji milli jevalwaw u jipprevedu b’mod raġonevoli jekk ftehim fiskali huwiex ser jiġi kkontestat jew le b’suċċess mill-Kummissjoni.

187.

F’dan ir-rigward, għandu jiġi osservat li tali klassifikazzjoni tista’ prima facie tevoka sitwazzjoni ġuridika ta’ inkompatibbiltà mal-prinċipju ta’ ċertezza legali. Dan il-prinċipju fil-fatt ġeneralment jostakola l-applikazzjoni retroattiva tar-regoli tal-Unjoni tad-dritt sostantiv billi tawtorizzaha biss meta jkun ċar mit-termini tagħhom, mill-iskop tagħhom jew mill-istruttura tagħhom li għandhom jiġu attribwiti effett retroattiv ( 86 ). Madankollu, huwa ċar li l-applikazzjoni tal-prinċipju ta’ distakkament mill-Kummissjoni hija kklassifikata minn FFT bħala “kważi retroattiva” għar-raġuni biss li hija timplika l-eżami ta’ ftehimiet fiskali diġà konklużi mill-awtorità tat-taxxa nazzjonali mal-impriżi kkonċernati. Mhux biss din l-applikazzjoni ma għandha l-ebda rabta mar-retroattività, iżda tikkostitwixxi t-twettiq tipiku tal-missjoni ta’ kontroll tal-għajnuna mill-Istat fdata lill-Kummissjoni. Meta miżura statali ta’ appoġġ ekonomiku tkun ingħatat lil impriża mingħajr ma tkun ġiet innotifikata minn qabel lill-Kummissjoni, din tal-aħħar hija awtorizzata teżamina tali miżura skont l-Artikoli 107 u 108 TFUE.

188.

Ma ħarabx mill-attenzjoni tiegħi li l-ftehimiet fiskali inkwistjoni huma preċiżament konklużi sabiex tinħoloq ċertezza legali fir-rigward tal-ammont tat-taxxa dovuta mill-impriża li hija parti għalihom. Madankollu, din il-konstatazzjoni ma jidhirlix li hija ta’ natura li tawtorizza eċċezzjoni għar-regola ġurisprudenzjali li tgħid li l-impriżi li jibbenefikaw minn miżuri statali ta’ appoġġ ekonomiku ma jistgħux jinvokaw aspettattiva leġittima — “l-aspett suġġettiv tal-prinċipju oġġettiv ta’ ċertezza legali” ( 87 ) — fil-legalità tagħhom meta dawn ma jkunux ingħataw b’osservanza tal-proċedura ta’ notifika tal-għajnuna mill-Istat ( 88 ).

189.

F’dawn iċ-ċirkustanzi, l-ewwel parti tat-tielet aggravju ma tistax għaldaqstant, fil-fehma tiegħi, tiġi milqugħa.

190.

Fir-rigward tat-tieni parti tat-tielet aggravju, il-Kummissjoni ssostni li din għandha wkoll tiġi miċħuda bħala ineffettiva. Skont il-Kummissjoni, id-deċiżjoni kontenzjuża stabbilixxiet ukoll is-selettività tad-deċiżjoni bil-quddiem inkwistjoni permezz tal-analiżi fi tliet stadji applikabbli għall-iskemi ta’ għajnuna u l-Qorti Ġenerali approvatha fil-punti 360 sa 366 tas-sentenza appellata. Peress li FFT ma kkontestatx dawn il-punti fl-appell tagħha, il-konklużjoni dwar is-selettività tad-deċiżjoni bil-quddiem inkwistjoni tibqa’ valida anki jekk din il-parti tintlaqa’.

191.

Għandu jiġi kkonstatat li, fid-deċiżjoni kontenzjuża, is-selettività hija evalwata billi tintuża mhux biss preżunzjoni, iżda wkoll l-analiżi fi tliet stadji preċedentement deskritta f’dawn il-konklużjonijiet. B’mod sussidjarju, din l-analiżi ġiet ivvalidata mill-Qorti Ġenerali fil-punti 360 sa 366 tas-sentenza appellata.

192.

F’dan ir-rigward, jidhirli li huwa neċessarju li jitfakkar, kif tagħmel il-Qorti Ġenerali fil-punt 361 tas-sentenza appellata, li l-ewwel żewġ stadji tal-imsemmija analiżi, jiġifieri dawk relatati rispettivament mad-determinazzjoni tal-qafas ta’ referenza u mal-verifika tal-eżistenza ta’ deroga minnu, ġew eżaminati flimkien mal-vantaġġ ekonomiku u li l-kwistjoni dwar jekk id-deċiżjoni bil-quddiem tidderogax mill-qafas ta’ referenza, kemm jekk ikun l-iktar wiesa’ jew l-iktar limitat, kienet tikkoinċidi mal-konstatazzjoni tal-vantaġġ mogħti lill-impriża benefiċjarja.

193.

Fid-dawl ta’ dan, nirrileva biss li din l-analiżi sussidjarja ma tistax iżżomm il-validità tagħha jekk il-Qorti tal-Ġustizzja tiddeċiedi, fis-sentenza futura tagħha, li tiċċensura l-konklużjonijiet tal-Qorti Ġenerali dwar il-bażi tal-prinċipju ta’ distakkament, kif nistedinha tagħmel fil-konklużjonijiet tiegħi dwar il-Kawża C‑898/19 P Irlanda vs Il‑Kummissjoni, li min-naħa tiegħu jkollu l-effett li jinvalida l-eżami kollu tagħha tal-vantaġġ selettiv, kemm fir-raġunament prinċipali kif ukoll f’dak sussidjarjament.

194.

Għaldaqstant nissuġġerixxi lill-Qorti tal-Ġustizzja tiddikjara li t-tieni parti tat-tielet aggravju ma hijiex ineffettiva.

195.

Għandu jitfakkar, b’mod preliminari, li l-preżunzjoni ta’ selettività ġiet invokata għall-ewwel darba fis-sentenza Il‑Kummissjoni vs MOL, li fiha l-Qorti tal-Ġustizzja indikat li “r-rekwiżit ta’ selettività jvarja skont jekk il-miżura inkwistjoni hijiex prevista bħala skema ġenerali tal-għajnuna jew bħala għajnuna individwali” u sussegwentement iżżid li “[f]’dan il-każ tal-aħħar, l-identifikazzjoni tal-vantaġġ ekonomiku jippermetti, bħala prinċipju, li s-selettività tagħha tiġi preżunta” ( 89 ). Din hija preżunzjoni konfutabbli, li l-applikazzjoni tagħha hija suġġetta għat-twettiq ta’ kundizzjoni doppja, jiġifieri l-eżistenza ta’ vantaġġ fis-sens tal-Artikolu 107(1) TFUE u n-natura individwali tal-miżura kkonċernata.

196.

Jidhirli li din il-parti tinkludi żewġ ilmenti distinti. Fir-rigward tal-ewwel wieħed, FFT tinvoka l-ksur taċ-ċertezza legali għar-raġuni li, minħabba l-approvazzjoni tal-preżunzjoni ta’ selettività mill-Qorti Ġenerali, il-klassifikazzjoni tad-deċiżjoni bil-quddiem inkwistjoni bħala għajnuna mill-Istat tiddependi biss mill-eżami tal-eżistenza ta’ vantaġġ ekonomiku, li huwa implimentat bl-applikazzjoni ta’ prinċipju, bħal dak ta’ distakkament, li l-bażi legali tiegħu tibqa’ inċerta u l-portata ddefinita ħażin. F’dan ir-rigward, huwa biżżejjed li jiġi rrilevat li l-premessi ta’ dan l-ilment, jiġifieri l-inċertezza dwar il-bażi legali tal-prinċipju ta’ distakkament u l-assenza ta’ definizzjoni tal-portata tiegħu, diġà ġew ikkonfutati f’dawn il-konklużjonijiet waqt l-analiżi tal-ewwel parti tat-tieni aggravju u tal-ewwel parti tat-tielet aggravju. Fil-fehma tiegħi, l-ilment inkwistjoni għandu għalhekk jiġi miċħud.

197.

Fir-rigward tat-tieni lment, li jirrigwarda l-legalità tal-applikazzjoni tal-preżunzjoni ta’ selettività f’dan il-każ, għandu jitfakkar li l-Qorti Ġenerali kkonkludiet dwar in-natura individwali tad-deċiżjoni bil-quddiem inkwistjoni wara analiżi, imwettqa fil-punti 342 u 343 tas-sentenza appellata, fid-dawl tad-definizzjonijiet ta’ “għajnuna individwali” u ta’ “skema ta’ għajnuna” li jinsabu rispettivament fl-Artikolu 1(e) u fl-Artikolu 1(d) tar-Regolament (UE) 2015/1589 ( 90 ).

198.

L-ewwel waħda minn dawn id-dispożizzjonijiet tikkaratterizza essenzjalment l-għajnuna individwali bħala għajnuna li ma tingħatax fuq il-bażi ta’ skema ta’ għajnuna, filwaqt li t-tieni waħda tissuġġetta l-klassifikazzjoni ta’ miżura statali bħala “skema ta’ għajnuna” sabiex jissodisfa tliet kundizzjonijiet kumulattivi. L-ewwel, għajnuna tista’ tingħata individwalment lil impriżi fuq il-bażi ta’ dispożizzjoni. It-tieni, ebda miżura supplimentari ta’ applikazzjoni ma hija meħtieġa għall-għoti ta’ din l-għajnuna. It-tielet, l-impriżi li lilhom tista’ tingħata l-għajnuna individwali għandhom jiġu ddefiniti “b’mod ġenerali u astratt” ( 91 ). Kif il-Qorti Ġenerali indikat fil-punti 346 u 347 tas-sentenza appellata u l-Qorti tal-Ġustizzja reċentement ikkonfermat, is-sodisfazzjoni tal-kundizzjonijiet elenkati iktar ’il fuq jimplika, b’mod partikolari, li l-elementi essenzjali tal-iskema ta’ għajnuna jirriżultaw mid-dispożizzjonijiet identifikati bħala l-bażi legali ta’ din l-iskema, u li l-awtorità tat-taxxa nazzjonali li tadotta l-miżura ma għandhiex setgħa diskrezzjonali li tippermettilha tinfluwenza l-ammont tal-għajnuna, il-karatteristiċi tagħha jew il-kundizzjonijiet li fihom tingħata ( 92 ).

199.

Nirrileva, bħall-Kummissjoni, li FFT ma pproduċiet l-ebda prova insostenn tal-argument tagħha li jgħid li d-deċiżjoni bil-quddiem inkwistjoni ma tikkostitwixxix miżura individwali. Minn dan isegwi li t-tieni parti tat-tielet aggravju ma tistax, fil-fehma tiegħi, tiġi milqugħa.

200.

Fi kwalunkwe każ, il-konklużjoni tal-Qorti Ġenerali li tikklassifika bħala “miżura individwali” d-deċiżjoni bil-quddiem inkwistjoni, fil-fehma tiegħi, ma hija suġġetta għal ebda kritika. B’mod partikolari, jidher ġust li jiġi kkunsidrat, kif għamlet il-Qorti Ġenerali fil-punt 352 tas-sentenza appellata, li, waqt l-adozzjoni ta’ deċiżjoni bil-quddiem, l-awtorità tat-taxxa Lussemburgiża “għandha marġni ta’ diskrezzjoni sabiex tevalwa, fir-rigward taċ-ċirkustanzi ta’ kull każ, l-aħjar metodu sabiex tikkalkola l-ammont taxxabbli ta’ kull kumpannija li tressaq talba għal deċiżjoni bil-quddiem”. Barra minn hekk, jidher diffiċli li tiġi kkontestata l-identifikazzjoni fil-punt 351 tas-sentenza appellata tal-elementi essenzjali tal-għajnuna mal-elementi li jikkostitwixxu l-vantaġġ ekonomiku, jiġifieri “l-konferma ta’ metodu ta’ determinazzjoni tar-remunerazzjoni ta’ FFT fuq il-bażi ta’ segmentazzjoni tal-kapital proprju u tal-applikazzjoni ta’ rati ta’ dħul differenti skont din is-segmentazzjoni”. Jekk din il-premessa tiġi aċċettata, ma hemmx dubju li dawn l-elementi jirriżultaw f’dan il-każ biss mid-deċiżjoni bil-quddiem inkwistjoni, u mhux mid-dispożizzjonijiet tad-dritt nazzjonali li abbażi tagħhom ġiet adottata d-deċiżjoni bil-quddiem, jiġifieri l-Artikolu 164(3) tal-Kodiċi dwar it-Taxxa u ċ-Ċirkulari Nru 164/2. Għaldaqstant nissuġġerixxi lill-Qorti tal-Ġustizzja tiċħad it-tieni parti tat-tielet aggravju.

201.

Għal finijiet ta’ kompletezza, jeħtieġ, fil-fehma tiegħi, li nżid preċiżazzjoni. Meta huma argumentaw quddiem il-Qorti Ġenerali li d-deċiżjoni bil-quddiem inkwistjoni kellha titqies bħala għajnuna mogħtija skont skema ta’ għajnuna, ir-rikorrenti fl-ewwel istanza ma allegawx li din tal-aħħar kienet ibbażata fuq l-Artikolu 164(3) tal-Kodiċi dwar it-Taxxa u ċ-Ċirkulari Nru 164/2, flimkien ma’ prattika stabbilita tal-awtorità tat-taxxa Lussemburgiża fir-rigward tad-deċiżjonijiet bil-quddiem mogħtija lil kumpanniji oħra ta’ finanzjament u ta’ teżor minbarra FFT. Kieku ġiet ikkonfermata l-eżistenza ta’ tali prassi amministrattiva stabbilita, ir-risposta li jiena nirrakkomanda fl-aħħar tal-punt preċedenti ta’ dawn il-konklużjonijiet probabbilment tkun opposta.

202.

Dan ikun il-konsegwenza tat-teħid inkunsiderazzjoni tal-interpretazzjoni tal-kunċett ta’ “skema ta’ għajnuna”, stabbilit fl-Artikolu 1(d) tar-Regolament 2015/1589, li ngħatat reċentement mill-Qorti tal-Ġustizzja fis-sentenza Il‑Kummissjoni vs Il‑Belġju u Magnetrol International dwar l-eżenzjonijiet fiskali tal-profitti żejda mogħtija mill-awtoritajiet Belġjani fil-forma ta’ deċiżjonijiet bil-quddiem. Waqt l-eżami dwar is-sodisfazzjoni tal-ewwel kundizzjoni prevista mill-imsemmi artikolu, il-Qorti tal-Ġustizzja fil-fatt ippreċiżat li d-“dispożizzjoni” tal-iskema li fuqha huwa bbażat l-għoti tal-għajnuna individwali tista’ wkoll tkun prassi amministrattiva kostanti tal-awtoritajiet tat-taxxa ta’ Stat Membru “meta din il-prattika tiżvela “approċċ sistematiku”, li l-karatteristiċi tagħha jissodisfaw ir-rekwiżiti previsti [fl-imsemmi artikolu]”, u li t-teħid inkunsiderazzjoni ta’ tali prassi amministrattiva ma huwiex limitat għas-sitwazzjonijiet li fihom ma teżisti ebda dispożizzjoni li tistabbilixxi l-iskema inkwistjoni ( 93 ). Issa, kif jirriżulta minn din is-sentenza, l-eżistenza tal-imsemmija prassi amministrattiva timplika ġeneralment li l-kundizzjonijiet l-oħra jkunu ssodisfatti wkoll, peress li l-kundizzjonijiet previsti fl-Artikolu 1(d) tar-Regolament 2015/1589 huma kkunsidrati mill-Qorti tal-Ġustizzja bħala li huma “intrinsikament marbuta” ( 94 ).

203.

Fid-dawl tal-kunsiderazzjonijiet preċedenti, nipproponi lill-Qorti tal-Ġustizzja tiċħad it-tielet aggravju fl-intier tiegħu.

204.

Fid-dawl ta’ dawn il-kunsiderazzjonijiet, nipproponi li l-Qorti tal-Ġustizzja tiċħad l-appell fl-intier tiegħu.

205.

Skont l-Artikolu 184(2) tar-Regoli tal-Proċedura tal-Qorti tal-Ġustizzja, meta l-appell ma jkunx fondat, hija għandha tiddeċiedi dwar l-ispejjeż.

206.

Skont l-Artikolu 138(1) tar-Regoli tal-Proċedura, applikabbli għall-proċedura ta’ appell skont l-Artikolu 184(1) ta’ dawn ir-regoli, il-parti li titlef il-kawża għandha tbati l-ispejjeż, jekk dawn ikunu ġew mitluba. Peress li l-Kummissjoni talbet f’dan is-sens, hemm lok li FFT tiġi kkundannata għall-ispejjeż sostnuti mill-Kummissjoni f’dan l-appell.

207.

Skont l-Artikolu 140(1) tar-Regoli tal-Proċedura, l-Istati Membri u l-istituzzjonijiet li intervjenew fil-kawża għandhom ibatu l-ispejjeż tagħhom. L-Irlanda, parti intervenjenti fil-kawża, għandha għalhekk tbati l-ispejjeż rispettivi tagħha sostnuti fil-kuntest ta’ dan l-appell.

208.

Fid-dawl ta’ dawn il-kunsiderazzjonijiet, nipproponi li l-Qorti tal-Ġustizzja tiddeċiedi kif ġej: