I. Il-kuntest ġuridiku

II. Il-fatti li wasslu għall-kawża

III. Il-proċedura quddiem il-Qorti Ġenerali u s-sentenza appellata

IV. Il-proċedura quddiem il-Qorti tal-Ġustizzja u t-talbiet tal-partijiet

V. L-appell inċidentali

A. L-argumenti tal-partijiet

B. Evalwazzjoni

1. L-ammissibbiltà tal-appell inċidentali

a) Fuq l-ammissibbiltà tal-aggravju uniku mqajjem insostenn tat-talba prinċipali tal-Kummissjoni, sa fejn dan huwa dirett kontra l-punti 59 u 63 tas-sentenza appellata

b) Fuq l-ammissibbiltà tat-talba tal-Kummissjoni li tiċħad il-ħames motiv imqajjem quddiem il-Qorti Ġenerali bħala infondat

c) Fuq l-ammissibbiltà tat-talba tal-Kummissjoni li l-Qorti tal-Ġustizzja tiċħad il-ħames motiv imqajjem quddiem il-Qorti Ġenerali bħala infondat sa fejn dan jirreferi għall-argumenti mressqa mill-Kunsill fit-tweġiba tiegħu għall-mistoqsijiet bil-miktub tal-Qorti Ġenerali

2. Fuq il-mertu

a) Fuq it-talba prinċipali tal-Kummissjoni, li fiha titlob l-annullament tas-sentenza appellata

b) Fuq it-talba sussidjarja tal-Kummissjoni, li fiha titlob lill-Qorti tal-Ġustizzja tannulla t-tieni punt tad-dispożittiv tas-sentenza appellata

VI. Fuq l-appell prinċipali

A. L-argumenti tal-partijiet

B. Evalwazzjoni

1. L-ammissibbiltà tal-appell

2. Fuq l-ammissibbiltà tal-aggravju uniku

3. Fuq il-mertu

VII. Fuq l-ispejjeż

VIII. Konklużjoni

1.

Permezz ta’ dan l-appell, Changmao Biochemical Engineering Co. Ltd titlob lill-Qorti tal-Ġustizzja tannulla s-sentenza tat‑3 ta’ Mejju 2018, Distillerie Bonollo et vs Il‑Kunsill (iktar ’il quddiem is-“sentenza appellata”) ( 2 ) li permezz tagħha l-Qorti Ġenerali annullat ir-Regolament ta’ Implimentazzjoni tal-Kunsill (UE) Nru 626/2012 (iktar ’il quddiem ir-“Regolament ikkontestat”) ( 3 ).

2.

Peress li Changmao Biochemical Engineering ma kinitx parti, iżda intervenjenti fil-proċedura quddiem il-Qorti Ġenerali, dan l-appell joffri lill-Qorti tal-Ġustizzja l-okkażjoni li tiddeċiedi dwar il-portata tat-tieni paragrafu tal-Artikolu 56 tal-Istatut tal-Qorti tal-Ġustizzja (iktar ’il quddiem l-“Istatut”), li jipprovdi li l-intervenjenti fl-ewwel istanza jistgħu jippreżentaw appell kontra deċiżjoni tal-Qorti Ġenerali biss meta din id-deċiżjoni taffettwahom direttament. Din il-kawża tqajjem ukoll il-kwistjoni tal-portata tal-Artikolu 11(9) tar-Regolament tal-Kunsill (KE) Nru 1225/2009 (iktar ’il quddiem ir-“Regolament bażiku”) ( 4 ), li jeżiġi li, fil-każ ta’ eżami mill-ġdid ta’ miżuri antidumping, l-istess metodoloġija għandha tiġi applikata bħal dik fl-investigazzjoni oriġinali, sakemm iċ-ċirkustanzi ma jkunux inbidlu. Barra minn hekk, peress li l-Kummissjoni ppreżentat appell inċidentali, li permezz tiegħu hija tikkontesta l-konstatazzjoni tal-Qorti Ġenerali li r-rikorrenti, li huma produtturi tal-Unjoni, huma direttament ikkonċernati mir-Regolament ikkontestat, il-Qorti tal-Ġustizzja għandha tiddetermina jekk l-interpretazzjoni tal-kundizzjoni tal-inċidenza diretta fis-sentenza reċenti tas‑6 ta’ Novembru 2018, Scuola Elementare Maria Montessori vs Il‑Kummissjoni, Il‑Kummissjoni vs Scuola Elementare Maria Montessori u Il‑Kummissjoni vs Ferracci (C‑622/16 P sa C‑624/16 P, EU:C:2018:873), tapplikax fil-qasam tal-antidumping.

3.

L-Artikolu 11 tar-Regolament bażiku, intitolat “Tistabbilixxi [Determinazzjoni ta’] dumping”, jipprevedi, fil-paragrafu 9 tiegħu:

“Fl-investigazzjonijiet kollha ta’ reviżjoni jew ta’ rifużjoni imwettqa skond dan l-Artikolu, il-Kummissjoni għandha, sakemm iċ-ċirkustanzi ma jkunux tbiddlu, tapplika l-istess metodoloġija bħal fl-investigazzjoni li wasslet għad-dazju, waqt li tingħata l-attenzjoni dovuta għall-Artikolu 2, u b’mod partikolari għall-paragrafi 11 u 12 tiegħu, u għall-Artikolu 17.”

4.

L-aċidu tartariku jintuża fil-produzzjoni tal-inbid u ta’ xarbiet oħra bħala addittiv tal-ikel u bħala ritardant fil-ġibs u fi prodotti oħra. Kemm fl-Unjoni Ewropea kif ukoll fl-Arġentina, l-aċidu tartariku huwa prodott minn prodotti sekondarji tal-produzzjoni tal-inbid, magħrufa bħala fond tal-inbid. Fiċ-Ċina, l-aċidu tartariku u l-aċidu tartariku DL huma prodotti mill-benżen. L-aċidu tartariku prodott permezz ta’ sinteżi kimika għandu l-istess karatteristiċi fiżiċi u kimiċi u huwa intiż għall-istess użi bażiċi bħal dak prodott minn prodotti sekondarji tal-produzzjoni tal-inbid.

5.

Changmao Biochemical Engineering hija produttur-esportatur Ċiniż tal-aċidu tartariku. Distillerie Bonollo SpA, Industria Chimica Valenzana (ICV) SpA, Distillerie Mazzari SpA, Caviro Distillerie Srl u Comercial Química Sarasa SL (iktar ’il quddiem, ir-“rikorrenti fl-ewwel istanza”) huma produtturi tal-Unjoni tal-aċidu tartariku.

6.

Fl‑24 ta’ Settembru 2004, il-Kummissjoni Ewropea rċeviet ilment dwar dumping fis-settur tal-aċidu tartariku minn diversi produtturi tal-Unjoni, fosthom Industria Chimica Valenzana (ICV), Distillerie Mazzari u Comercial Química Sarasa.

7.

Fit-30 ta’ Ottubru 2004, il-Kummissjoni ppubblikat avviż ta’ bidu ta’ proċedura antidumping f’Il-Ġurnal Uffiċjali tal-Unjoni Ewropea fir-rigward tal-importazzjonijiet ta’ aċidu tartariku li joriġina mir-Repubblika Popolari taċ-Ċina ( 5 ).

8.

Fis‑27 ta’ Lulju 2005, il-Kummissjoni adottat ir-Regolament (KE) Nru 1259/2005 li jimponi dazju antidumping provviżorju fuq l-importazzjonijiet ta’ aċidu tartariku li joriġinaw mir-Repubblika Popolari taċ-Ċina ( 6 ).

9.

Fit‑23 ta’ Jannar 2006, il-Kunsill tal-Unjoni Ewropea adotta r-Regolament (KE) Nru 130/2006 li jimponi dazju anti-dumping definittiv u li jiġbor b’mod definittiv id-dazju proviżorju impost fuq importazzjonijiet ta’ aċidu tartariku li joriġina mir-Repubblika Popolari taċ-Ċina ( 7 ).

10.

Skont ir-Regolament Nru 130/2006, Changmao Biochemical Engineering u Ninghai Organic Chemical Factory (iktar ’il quddiem iż-“żewġ produtturi-esportaturi Ċiniżi”) ingħataw l-istatus ta’ impriżi li joperaw f’ekonomija tas-suq (iktar ’il quddiem is-“SIES”) skont l-Artikolu 2(7)(ċ) tar-Regolament bażiku. Ġew imposti dazji antidumping ta’ 10.1 % u ta’ 4.7 % rispettivament fuq il-prodotti mmanifatturati miż-żewġ produtturi-esportaturi Ċiniżi ( 8 ). Ġie impost dazju antidumping ta’ 34.9 % fuq il-kumpanniji l-oħra kollha.

11.

Wara l-pubblikazzjoni, fl‑4 ta’ Awwissu 2010, ta’ avviż dwar l-iskadenza imminenti ta’ ċerti miżuri antidumping ( 9 ), il-Kummissjoni rċeviet, fis‑27 ta’ Ottubru 2010, talba għall-eżami mill-ġdid ta’ dawn il-miżuri, imressqa mill-ħames produtturi tal-Unjoni msemmija fil-punt 5 iktar ’il fuq. Fis‑26 ta’ Jannar 2011, il-Kummissjoni ppubblikat avviż ta’ bidu ta’ eżami mill-ġdid ta’ miżuri li ser jiskadu ( 10 ).

12.

Fid‑9 ta’ Ġunju 2011, il-Kummissjoni rċeviet talba għal eżami mill-ġdid intermedju parzjali fir-rigward taż-żewġ produtturi-esportaturi Ċiniżi, skont l-Artikolu 11(3) tar-Regolament bażiku. Din it-talba tressqet mill-ħames produtturi tal-Unjoni msemmija fil-punt 5 iktar ’il fuq. Fid‑29 ta’ Lulju 2011, il-Kummissjoni ppubblikat avviż ta’ bidu ta’ eżami mill-ġdid intermedju parzjali tal-miżuri antidumping applikabbli għal importazzjonijiet tal-aċidu tartariku li joriġina mir-Repubblika Popolari taċ-Ċina ( 11 ).

13.

Fis‑16 ta’ April 2012, il-Kunsill adotta r-Regolament ta’ Implimentazzjoni (UE) Nru 349/2012 li jimponi dazju anti-dumping definittiv fuq importazzjonijiet tal-aċidu tartariku li joriġinaw mir-Repubblika Popolari taċ-Ċina wara reviżjoni tal-iskadenza skont l-Artikolu 11(2) tar-Regolament bażiku ( 12 ).

14.

Ir-Regolament Nru 349/2012 żamm id-dazji antidumping stabbiliti mir-Regolament Nru 130/2006.

15.

Fi tmiem il-proċedura ta’ eżami mill-ġdid intermedju parzjali li tikkonċerna ż-żewġ produtturi-esportaturi Ċiniżi, fis‑26 ta’ Ġunju 2012, il-Kunsill adotta ir-Regolament ikkontestat, li jemenda r-Regolament Nru 349/2012.

16.

Essenzjalment, ir-Regolament ikkontestat ma jagħtix is-SIES liż-żewġ produtturi-esportaturi Ċiniżi u, wara li kkalkola l-valur normali stabbilit abbażi tal-informazzjoni pprovduta minn produttur li kkoopera f’pajjiż analogu, jiġifieri l-Arġentina, iżid id-dazji antidumping applikabbli għall-oġġetti prodotti minn dawn iż-żewġ kumpanniji, rispettivament, minn 10.1 % għal 13.1 % u minn 4.7 % għal 8.3 % ( 13 ).

17.

Fil‑5 ta’ Ottubru 2012, Changmao Biochemical Engineering ippreżentat rikors intiż għall-annullament tar-Regolament ikkontestat.

18.

Permezz ta’ sentenza tal‑1 ta’ Ġunju 2017 ( 14 ), il-Qorti Ġenerali annullat dan ir-regolament sa fejn kien japplika għal Changmao Biochemical Engineering, minħabba li, billi rrifjutaw li jikkomunikaw lil din il-kumpannija l-informazzjoni dwar id-differenza fil-prezzijiet tal-aċidu tartariku DL u tal-aċidu tartariku L+, li kien jikkostitwixxi wieħed mill-elementi fundamentali tal-kalkolu tal-valur normali tal-aċidu DL, il-Kunsill u l-Kummissjoni kienu kisru d-drittijiet tad-difiża ta’ Changmao Biochemical Engineering u l-Artikolu 20(2) tar-Regolament bażiku. Din is-sentenza ma ġietx ikkontestata b’appell.

19.

Fit‑28 ta’ Settembru 2012, ir-rikorrenti fl-ewwel istanza ppreżentaw rikors għall-annullament tar-Regolament ikkontestat.

20.

Permezz ta’ deċiżjoni tad‑9 ta’ Settembru 2016, u permezz ta’ digriet tal‑15 ta’ Settembru 2016, il-President tas-Sitt Awla tal-Qorti Ġenerali awtorizza l-interventi tal-Kummissjoni u ta’ Changmao Biochemical Engineering insostenn tat-talba tal-Kunsill, filwaqt li speċifika li, peress li t-talbiet għal intervent tagħhom tressqu wara l-iskadenza tat-terminu indikat fl-Artikolu 116(6) tar-Regoli tal-Proċedura tal-Qorti Ġenerali tat‑2 ta’ Mejju 1991 ( 15 ), kif emendati l-aħħar fid‑19 ta’ Ġunju 2013, huma kienu awtorizzati jippreżentaw l-osservazzjonijiet tagħhom biss waqt il-proċedura orali, abbażi tar-rapport għas-seduta li kien ikkomunikat lilhom.

21.

Permezz tas-sentenza appellata, il-Qorti Ġenerali ddeċidiet li r-rikors kien ammissibbli, laqgħet l-ewwel motiv imqajjem mir-rikorrenti u annullat ir-Regolament ikkontestat.

22.

L-ewwel nett, il-Qorti Ġenerali ċaħdet l-eċċezzjoni ta’ inammissibbiltà mqajma mill-Kunsill ibbażata fuq il-fatt li r-rikorrenti ma kinux direttament u individwalment ikkonċernati mir-Regolament ikkontestat u li, barra minn hekk, huma ma kellhomx interess ġuridiku.

23.

B’mod partikolari ( 16 ), il-Qorti Ġenerali ddeċidiet li r-rikorrenti kienu direttament ikkonċernati mir-Regolament ikkontestat. Il-Qorti Ġenerali fakkret li, skont il-ġurisprudenza, din il-kundizzjoni teżiġi, minn naħa, li l-miżura tal-Unjoni kkontestata direttament taffettwa s-sitwazzjoni legali tar-rikorrent u, min-naħa l-oħra, li d-destinatarji ta’ dan l-att li huma responsabbli mill-implimentazzjoni tiegħu ma għandu jkollhom l-ebda setgħa diskrezzjonali. Din l-aħħar kundizzjoni ġiet issodisfatta, peress li l-Istati Membri, li kienu responsabbli mill-implimentazzjoni tar-Regolament ikkontestat, ma kellhom l-ebda setgħa diskrezzjonali fir-rigward tar-rata tad-dazju antidumping u tal-impożizzjoni ta’ dan id-dazju fuq il-prodott ikkonċernat. Fir-rigward tal-ewwel rekwiżit, il-Kunsill u l-Kummissjoni sostnew li l-emenda tar-rata tad-dazju antidumping li ġab miegħu dan ir-Regolament ikkontestat ma setgħetx tipproduċi effetti legali fir-rigward tar-rikorrenti minħabba, minn naħa, li r-rikorrenti ma ħallsu l-ebda dazju antidumping u, min-naħa l-oħra, li huma ma kellhomx dritt suġġettiv għall-impożizzjoni ta’ ċertu livell ta’ dazji antidumping fuq il-kompetituri tagħhom. Il-Qorti Ġenerali ċaħdet din il-konstatazzjoni. Fil-fatt, kieku l-qrati tal-Unjoni kienu adottaw tali interpretazzjoni restrittiva ta’ dan ir-rekwiżit, kwalunkwe rikors ippreżentat minn produttur tal-Unjoni kontra regolament li jistabbilixxi dazji antidumping kien ikollu jiġi ddikjarat awtomatikament inammissibbli; l-istess kien japplika għal kwalunkwe rikors ippreżentat minn kompetitur tal-benefiċjarju ta’ għajnuna ddikjarata kompatibbli mas-suq intern mill-Kummissjoni fi tmiem il-proċedura ta’ investigazzjoni formali, kif ukoll għal kwalunkwe rikors ippreżentat minn kompetitur kontra deċiżjoni li tiddikjara konċentrazzjoni kompatibbli mas-suq intern. Madankollu, dawn it-tipi ta’ rikorsi ġew iddikjarati ammissibbli mill-ġurisprudenza. Peress li, f’dan il-każ, ir-rikorrenti kienu ressqu talba għal eżami mill-ġdid intermedju parzjali, u d-dazji antidumping imposti fi tmiem l-eżami mill-ġdid intermedju parzjali kienu intiżi sabiex jikkumpensaw id-dannu li huma kienu ġarrbu bħala produtturi kompetituri li joperaw fl-istess suq, il-Qorti Ġenerali kkonkludiet li huma kienu direttament ikkonċernati mir-Regolament ikkontestat.

24.

It-tieni nett, il-Qorti Ġenerali laqgħet l-ewwel motiv invokat quddiemha, ibbażat fuq il-ksur tal-Artikolu 11(9) tar-Regolament bażiku.

25.

Il-Qorti Ġenerali fakkret li l-Artikolu 11(9) tar-Regolament bażiku jeżiġi li, fl-investigazzjonijiet kollha ta’ eżami mill-ġdid, il-Kummissjoni għandha tapplika l-istess metodoloġija bħal dik fl-investigazzjoni oriġinali, sakemm iċ-ċirkustanzi ma jkunux inbidlu, filwaqt li tqis l-Artikolu 2 ta’ dak ir-regolament b’mod xieraq.

26.

F’dan il-każ, matul l-investigazzjoni oriġinali, il-valur normali ġie kkalkolat, għaż-żewġ produtturi-esportaturi Ċiniżi, li kienu ngħataw is-SIES, abbażi tal-prezzijiet reali ta’ bejgħ domestiku ta’ kull kumpannija, u, għall-produtturi-esportaturi li ma ngħatawx is-SIES, abbażi ta’ informazzjoni li waslet mingħand il-produttur fil-pajjiż analogu, b’mod partikolari, il-prezzijiet ta’ bejgħ domestiku fl-Arġentina. Fir-Regolament ikkontestat, is-SIES ġie rrifjutat liż-żewġ produtturi-esportaturi Ċiniżi matul l-investigazzjoni ta’ eżami mill-ġdid, b’tali mod li l-valur normali ma setax jiġi stabbilit iktar abbażi tal-prezzijiet reali ta’ bejgħ domestiku mitluba minn kull waħda minn dawn iż-żewġ kumpanniji. Huwa ġie kkalkolat, essenzjalment, abbażi tal-ispejjeż ta’ produzzjoni fl-Arġentina.

27.

Il-Qorti Ġenerali qieset li l-fatt li, fir-Regolament ikkontestat, il-valur normali għall-produtturi-esportaturi li ma ngħatawx is-SIES ġie kkalkolat abbażi tal-ispejjeż ta’ produzzjoni fl-Arġentina milli abbażi tal-prezzijiet ta’ bejgħ domestiku fl-Arġentina, jikkostitwixxi bidla fil-metodoloġija fis-sens tal-Artikolu 11(9) tar-Regolament bażiku. Peress li r-Regolament ikkontestat ma kienx jirreferi għal bidla fiċ-ċirkustanzi, din il-bidla ma hijiex konformi ma’ din id-dispożizzjoni.

28.

Konsegwentement, il-Qorti Ġenerali annullat ir-Regolament ikkontestat ( 17 ).

29.

Fuq talba tar-rikorrenti, hija żammet id-dazju antidumping stabbilit mir-Regolament ikkontestat fir-rigward ta’ Ninghai Organic Chemical Factory sakemm il-Kummissjoni u l-Kunsill ikunu adottaw il-miżuri neċessarji għall-eżekuzzjoni tas-sentenza appellata. Fid-dawl tas-sentenza tal‑1 ta’ Ġunju 2017, Changmao Biochemical Engineering vs Il‑Kunsill (T‑442/12, EU:T:2017:372), dan id-dazju ma setax jinżamm fir-rigward ta’ Changmao Biochemical Engineering.

30.

Permezz ta’ dan l-appell, Changmao Biochemical Engineering titlob lill-Qorti tal-Ġustizzja tannulla s-sentenza appellata fl-intier tagħha, u tikkundanna lir-rikorrenti fl-ewwel istanza għall-ispejjeż sostnuti mill-appellanti, kemm fl-ewwel istanza kif ukoll fl-appell.

31.

Distillerie Bonollo, Industria Chimica Valenzana (ICV), Distillerie Mazzari u Caviro Distillerie (iktar ’il quddiem, meħuda flimkien, “Distillerie Bonollo”) jitolbu lill-Qorti tal-Ġustizzja tiċħad l-appell bħala inammissibbli u, fi kwalunkwe każ, bħala infondat. Distillerie Bonollo titlob ukoll lill-Qorti tal-Ġustizzja tikkundanna lill-appellanti u lil kull intervenjent għall-ispejjeż li hija sostniet fl-ewwel istanza u fl-appell.

32.

Il-Kunsill jitlob lill-Qorti tal-Ġustizzja tiċħad l-appell bħala inammissibbli u tikkundanna lill-appellanti għall-ispejjeż tal-appell.

33.

Il-Kummissjoni titlob lill-Qorti tal-Ġustizzja tiċħad l-appell bħala inammissibbli u, fi kwalunkwe każ, bħala infondat, u tikkundanna lill-appellanti għall-ispejjeż.

34.

Il-Kummissjoni ppreżentat appell inċidentali. Hija titlob lill-Qorti tal-Ġustizzja tannulla s-sentenza appellata, tiddikjara l-ewwel erba’ motivi mqajma quddiem il-Qorti Ġenerali bħala inammissibbli ( 18 ), u tiddikjara li l-ħames motiv imqajjem quddiem il-Qorti Ġenerali ma huwiex fondat jew, sussidjarjament, tibgħat il-kawża lura quddiem il-Qorti Ġenerali sabiex din tiddeċiedi dwar il-ħames motiv imqajjem fl-ewwel istanza ( 19 ). Sussidjarjament, il-Kummissjoni titlob lill-Qorti tal-Ġustizzja tannulla s-sentenza appellata sa fejn il-Kunsill ġie ordnat jadotta l-miżuri neċessarji sabiex jikkonforma ruħu magħha. Il-Kummissjoni titlob ukoll lill-Qorti tal-Ġustizzja tikkundanna lil Changmao Biochemical Engineering għall-ispejjeż.

35.

Distillerie Bonollo titlob lill-Qorti tal-Ġustizzja tiċħad it-tieni parti tal-ewwel aggravju tal-appell inċidentali ( 20 ) bħala inammissibbli jew, sussidjarjament, bħala infondata. Barra minn hekk, Distillerie Bonollo titlob lill-Qorti tal-Ġustizzja tiċħad l-appell inċidentali bħala infondat jew ineffettiv għall-bqija. Fl-aħħar nett, hija titlob lill-Qorti tal-Ġustizzja tikkundanna lill-Kummissjoni għall-ispejjeż sostnuti minn Distillerie Bonollo fil-kuntest tal-proċedura quddiem il-Qorti tal-Ġustizzja u għal dawk sostnuti fil-każ ta’ rinviju lill-Qorti Ġenerali.

36.

Il-Kunsill isostni t-talbiet ippreżentati mill-Kummissjoni fl-appell inċidentali.

37.

Changmao Biochemical Engineering titlob lill-Qorti tal-Ġustizzja tannulla s-sentenza appellata, tiddikjara inammissibbli l-ewwel erba’ motivi mqajma quddiem il-Qorti Ġenerali, tiddikjara li l-ħames motiv imqajjem quddiem il-Qorti Ġenerali ma huwiex fondat jew, sussidjarjament, tibgħat il-kawża lura quddiem il-Qorti Ġenerali sabiex din tiddeċiedi dwar il-ħames motiv imqajjem fl-ewwel istanza. Sussidjarjament, hija titlob lill-Qorti tal-Ġustizzja tannulla s-sentenza appellata sa fejn din tordna lill-Kunsill jadotta l-miżuri neċessarji sabiex jikkonforma magħha. Fl-aħħar nett, hija titlob lill-Qorti tal-Ġustizzja tikkundanna lil Distillerie Bonollo għall-ispejjeż ta’ Changmao Biochemical Engineering.

38.

Waqt is-seduta tal‑24 ta’ Ottubru 2019, Changmao Biochemical Engineering, Distillerie Bonollo, il-Kunsill u l-Kummissjoni ppreżentaw l-osservazzjonijiet orali tagħhom.

39.

Peress li l-appell inċidentali ppreżentat mill-Kummissjoni prinċipalment jikkontesta l-ammissibbiltà tar-rikors fl-ewwel istanza, dan għandu jiġi eżaminat fl-ewwel lok.

40.

Il-Kummissjoni titlob lill-Qorti tal-Ġustizzja tannulla s-sentenza appellata, tiċħad l-ewwel erba’ motivi mqajma quddiem il-Qorti Ġenerali bħala inammissibbli ( 21 ), u tiċħad il-ħames motiv imqajjem fl-ewwel istanza bħala infondat jew, sussidjarjament, tibgħat il-kawża lura quddiem il-Qorti Ġenerali sabiex din tiddeċiedi dwar il-ħames motiv ( 22 ). Sussidjarjament, il-Kummissjoni titlob lill-Qorti tal-Ġustizzja tannulla s-sentenza appellata sa fejn, fit-tieni punt tad-dispożittiv tagħha, il-Kunsill ġie ordnat jadotta l-miżuri neċessarji sabiex jikkonforma ruħu magħha.

41.

Insostenn tat-talba tagħha għall-annullament tas-sentenza appellata, il-Kummissjoni tqajjem aggravju uniku. Hija ssostni li l-Qorti Ġenerali wettqet żball ta’ liġi meta qieset, fil-punti 51 sa 73 tas-sentenza appellata, li Distillerie Bonollo kienet direttament ikkonċernata mir-Regolament ikkontestat.

42.

Fl-ewwel lok, il-Kummissjoni ssostni li l-Qorti Ġenerali ma setgħetx tinvoka d-dritt għal protezzjoni ġudizzjarja effettiva, kif stabbilit fl-Artikolu 47 tal-Karta tad-Drittijiet Fundamentali tal-Unjoni Ewropea (iktar ’il quddiem il-“Karta”), sabiex tadotta interpretazzjoni wiesgħa tal-kundizzjoni tal-inċidenza diretta. Din l-interpretazzjoni, li skontha din il-kundizzjoni hija ssodisfatta meta l-att tal-Unjoni kkontestat ikollu effett sostanzjali fuq is-sitwazzjoni tar-rikorrent, ukoll ma hijiex konformi ma’ ġurisprudenza stabbilita, li timponi effett legali fuq is-sitwazzjoni tar-rikorrent. Fit-tieni lok, il-Kummissjoni ssostni li, sabiex ir-Regolament ikkontestat jipproduċi effetti fuq is-sitwazzjoni legali ta’ Distillerie Bonollo, huwa għandu jagħti dritt materjali lil din tal-aħħar. Madankollu, il-Kummissjoni ssostni li Distillerie Bonollo ma għandhiex dritt li teżiġi li ċertu livell ta’ miżuri antidumping għandu jiġi impost fuq produtturi ta’ pajjiżi terzi li huma kompetituri, peress li l-Artikolu 21 tar-Regolament bażiku jippermetti lill-Kunsill u lill-Kummissjoni li jastjenu milli jimponu tali miżuri meta dan ma jkunx fl-interess tal-Unjoni.

43.

Minn dan il-Kummissjoni tikkonkludi li s-sentenza appellata għandha tiġi annullata.

44.

Konsegwentement, il-Kummissjoni titlob lill-Qorti tal-Ġustizzja tiċħad l-ewwel erba’ motivi mqajma quddiem il-Qorti Ġenerali bħala inammissibbli u tiċħad il-ħames motiv imqajjem fl-ewwel istanza bħala infondat. Fir-rigward ta’ dan l-aħħar motiv, li huwa bbażat fuq il-ksur tad-drittijiet tad-difiża u tal-obbligu ta’ motivazzjoni, il-Kummissjoni tirrikonoxxi li dan huwa ammissibbli, peress li dan huwa motiv proċedurali u mhux fuq il-mertu. Madankollu, il-Kummissjoni ssostni li dan il-motiv huwa infondat, peress li, matul il-proċedura amministrattiva, Distillerie Bonollo kellha diversi skambji bil-miktub u orali mal-Kummissjoni. Fil-każ li l-Qorti tal-Ġustizzja madankollu tqis li hija ma tistax tiddeċiedi b’mod definittiv fuq il-ħames motiv imqajjem quddiem il-Qorti Ġenerali, il-Kummissjoni titlob li l-kawża tintbagħat lura quddiem il-Qorti Ġenerali sabiex din tiddeċiedi dwar dan il-motiv.

45.

Sussidjarjament, il-Kummissjoni titlob lill-Qorti tal-Ġustizzja tannulla t-tieni punt tad-dispożittiv tas-sentenza appellata. Insostenn ta’ din it-talba, il-Kummissjoni tinvoka aggravju uniku, ibbażat fuq il-fatt li l-Qorti Ġenerali wettqet żball ta’ liġi meta żammet id-dazju antidumping stabbilit mir-Regolament ikkontestat “sakemm il-[Kummissjoni] u l-[Kunsill i]kunu ħadu l-miżuri għall-implimentazzjoni ta’ [dik] is-sentenza”. Hija ssostni li, mid-dħul fis-seħħ tar-Regolament (UE) Nru 37/2014 tal-Parlament Ewropew u tal-Kunsill ( 23 ), hija biss il-Kummissjoni li tista’ timponi miżuri antidumping.

46.

Changmao Biochemical Engineering taqbel mat-talbiet kollha tal-Kummissjoni, bl-eċċezzjoni tal-fatt li, minn naħa, hija topponi t-talba sussidjarja tal-Kummissjoni (miġbura fil-qosor fil-punt preċedenti) u, min-naħa l-oħra, hija titlob lill-Qorti tal-Ġustizzja tikkundanna lil Distillerie Bonollo għall-ispejjeż ta’ Changmao Biochemical Engineering.

47.

Distillerie Bonollo titlob li l-appell inċidentali jiġi miċħud.

48.

Fl-ewwel lok, fir-rigward tal-allegazzjoni tal-Kummissjoni li l-ħames motiv imqajjem quddiem il-Qorti Ġenerali huwa infondat, Distillerie Bonollo ssostni li dan il-motiv huwa inammissibbli. Fil-fatt, l-ewwel nett, il-Qorti Ġenerali ma eżaminatx dan il-motiv, it-tieni nett, din hija kwistjoni ta’ fatt u, it-tielet nett, l-appell inċidentali jirreferi għar-risposta tal-Kunsill għall-mistoqsijiet bil-miktub tal-Qorti Ġenerali, li l-Kummissjoni ma kellhiex tirċievi kopja tagħhom peress li hija ġiet ammessa tintervjeni biss abbażi tar-rapport tas-seduta. Distillerie Bonollo tallega li din l-allegazzjoni, fi kwalunkwe każ, hija infondata.

49.

Fit-tieni lok, fir-rigward tal-aggravju uniku invokat insostenn tat-talba intiża għall-annullament tas-sentenza appellata, Distillerie Bonollo ssostni li dan huwa inammissibbli sa fejn dan huwa dirett kontra l-punti 59 u 63 tas-sentenza appellata. Fil-fatt, fir-rigward tal-ewwel punt, il-Kummissjoni tikkontesta konstatazzjoni ta’ fatt u, fir-rigward tal-aħħar punt, il-Kummissjoni sempliċement tipprova tissostitwixxi l-interpretazzjoni tagħha għal dik adottata mill-Qorti Ġenerali.

50.

Distillerie Bonollo barra minn hekk issostni li dan l-aggravju uniku huwa kompletament infondat jew ineffettiv. Distillerie Bonollo ssostni, b’mod partikolari, li l-Qorti Ġenerali ma bbażatx ruħha fuq il-prinċipju ta’ protezzjoni ġudizzjarja effettiva sabiex twessa’ l-kunċett ta’ inċidenza diretta, peress li r-riferiment, fil-punt 93 tas-sentenza appellata, għal dan il-prinċipju huwa superfluwu. Barra minn hekk, rikorrent huwa direttament ikkonċernat minn att tal-Unjoni meta, kif iddeċidiet il-Qorti Ġenerali fil-punt 52 tas-sentenza appellata, huwa jkun affettwat fil-kwalità tiegħu bħala attur tas-suq f’kompetizzjoni ma’ atturi oħra tas-suq. Dan il-kriterju ġie kkonfermat mill-Qorti tal-Ġustizzja fis-sentenza tagħha tas‑6 ta’ Novembru 2018, Scuola Elementare Maria Montessori vs Il‑Kummissjoni, Il‑Kummissjoni vs Scuola Elementare Maria Montessori u Il‑Kummissjoni vs Ferracci (C‑622/16 P sa C‑624/16 P, EU:C:2018:873, punt 43). Konsegwentement, Distillerie Bonollo ssostni li hija direttament ikkonċernata bħala kompetitriċi diretta taż-żewġ produtturi-esportaturi Ċiniżi, li fuq il-prodotti tagħhom ir-Regolament ikkontestat jonqos milli jimponi dazji antidumping adegwati.

51.

Fit-tielet lok, Distillerie Bonollo ssostni li l-aggravju uniku mqajjem insostenn tat-talba sussidjarja tal-Kummissjoni ma huwiex fondat. It-tieni punt tad-dispożittiv tas-sentenza appellata jobbliga mhux biss lill-Kunsill, iżda wkoll lill-istituzzjoni kompetenti, jiġifieri l-Kummissjoni, li jadottaw il-miżuri neċessarji għall-eżekuzzjoni ta’ dik is-sentenza.

52.

Il-Kunsill jappoġġja ż-żewġ talbiet ippreżentati mill-Kummissjoni.

53.

Fl-ewwel lok, il-Kunsill isostni li s-sentenza appellata għandha tiġi annullata, peress li l-Qorti Ġenerali żbaljat meta kkonstatat li l-erba’ motivi fuq il-mertu mqajma quddiemha kienu ammissibbli. Għalkemm il-kundizzjoni tal-inċidenza diretta għandha tiġi interpretata fid-dawl tal-prinċipju ta’ protezzjoni ġudizzjarja effettiva, dan il-prinċipju ma jistax iwassal sabiex jiġu miċħuda l-kundizzjonijiet ta’ ammissibbiltà previsti fir-raba’ paragrafu tal-Artikolu 263 TFUE. Barra minn hekk, il-ġurisprudenza li teżiġi li l-att tal-Unjoni jipproduċi effetti fuq is-sitwazzjoni legali tar-rikorrent minflok fuq is-sitwazzjoni fattwali tiegħu tibqa’ valida. Regolament li jimponi dazji antidumping ma jistax jipproduċi effett legali fir-rigward tal-produtturi tal-Unjoni sa fejn, minn naħa, dawn il-produtturi ma jħallsux dawn id-dazji u, min-naħa l-oħra, huma ma jkollomx dritt li jiġu imposti dazji fuq produtturi-esportaturi ta’ pajjiż terz. Għaldaqstant, fil-punti 52 u 53 tas-sentenza appellata, il-Qorti Ġenerali żbaljat meta ddeċidiet, essenzjalment, li l-kundizzjoni marbuta mal-inċidenza diretta tkun issodisfatta meta s-sitwazzjoni fattwali tar-rikorrent tkun affettwata.

54.

Fit-tieni lok, il-Kunsill jitlob li, fil-każ li l-Qorti tal-Ġustizzja tannulla s-sentenza appellata, hija għandha tiċħad il-ħames motiv invokat quddiem il-Qorti Ġenerali bħala infondat.

55.

Fit-tielet lok, il-Kunsill isostni li, jekk il-Qorti tal-Ġustizzja tiddeċiedi li ma tannullax is-sentenza appellata, hija għandha madankollu tannulla t-tieni punt tad-dispożittiv ta’ din is-sentenza, peress li r-Regolament Nru 37/2014 jagħti s-setgħa li tadotta miżuri antidumping biss lill-Kummissjoni.

56.

Permezz tal-appell inċidentali tagħha, il-Kummissjoni titlob l-annullament tas-sentenza appellata (iktar ’il quddiem it-“talba prinċipali tal-Kummissjoni”) minħabba li l-Qorti Ġenerali żbaljat meta ddeċidiet, fil-punti 51 sa 73 ta’ din is-sentenza, li Distillerie Bonollo kienet direttament ikkonċernata mir-Regolament ikkontestat. Sussidjarjament, il-Kummissjoni titlob l-annullament tat-tieni punt tad-dispożittiv tas-sentenza appellata, sa fejn dan il-punt jordna lill-Kunsill jadotta l-miżuri neċessarji għall-eżekuzzjoni ta’ dik is-sentenza (iktar ’il quddiem it-“talba sussidjarja tal-Kummissjoni”), minħabba li, mid-dħul fis-seħħ tar-Regolament Nru 37/2014, hija biss il-Kummissjoni li tista’ timponi miżuri antidumping.

57.

Distillerie Bonollo titlob li ż-żewġ talbiet tal-Kummissjoni jiġu miċħuda, filwaqt li l-Kunsill u Changmao Biochemical Engineering jingħaqdu maż-żewġ talbiet.

58.

Distillerie Bonollo tikkontesta l-ammissibbiltà, minn naħa, tal-aggravju uniku mqajjem insostenn tat-talba prinċipali tal-Kummissjoni, ibbażat fuq żball fl-evalwazzjoni tal-inċidenza diretta, sa fejn dan l-aggravju huwa dirett kontra ċerti punti tas-sentenza appellata, u, min-naħa l-oħra, tat-talba tal-Kummissjoni li l-Qorti tal-Ġustizzja għandha tiċħad il-ħames motiv imqajjem quddiem il-Qorti Ġenerali ( 24 ).

59.

Fil-fehma tiegħi, dawn l-eċċezzjonijiet ta’ inammissibbiltà għandhom jiġu miċħuda.

60.

Fl-ewwel lok, Distillerie Bonollo ssostni li l-aggravju uniku mqajjem mill-Kummissjoni huwa inammissibbli sa fejn dan huwa dirett kontra l-punt 59 tas-sentenza appellata, li fih il-Qorti Ġenerali kkonstatat li Distillerie Bonollo kienet direttament ikkonċernata mir-Regolament ikkontestat minħabba l-fatt li dan ir-regolament jimponi dazji antidumping fuq iż-żewġ produtturi-esportaturi Ċiniżi intiżi sabiex jikkumpensaw id-dannu mġarrab minn Distillerie Bonollo bħala kompetitriċi ta’ dawn iż-żewġ produtturi Ċiniżi. Skont Distillerie Bonollo, din hija kwistjoni ta’ fatt.

61.

Fil-fehma tiegħi, din l-eċċezzjoni ta’ inammissibbiltà trid tiġi miċħuda. Il-Kummissjoni ma tikkontestax il-konstatazzjoni tal-Qorti Ġenerali, fil-punt 59 tas-sentenza appellata, li Distillerie Bonollo kienet f’kompetizzjoni diretta maż-żewġ produtturi-esportaturi Ċiniżi, li effettivament hija konstatazzjoni ta’ fatt mhux suġġetta għall-istħarriġ tal-Qorti tal-Ġustizzja ( 25 ). Għall-kuntrarju, l-argument tal-Kummissjoni dwar il-punt 59 tas-sentenza appellata huwa li d-dannu mġarrab mill-industrija tal-Unjoni ġie evalwat mhux fir-Regolament ikkontestat, iżda f’“atti legali preċedenti” (jiġifieri r-Regolament Nru 349/2012 u r-Regolament Nru 130/2006), b’tali mod li kwalunkwe effett fuq is-sitwazzjoni legali ta’ Distillerie Bonollo ma jirriżultax mir-Regolament ikkontestat, iżda minn dawn l-“atti legali preċedenti”. Din hija kwistjoni ta’ liġi.

62.

Fit-tieni lok, Distillerie Bonollo ssostni li l-aggravju uniku huwa inammissibbli sa fejn dan huwa dirett kontra l-punt 63 tas-sentenza appellata, li fih il-Qorti Ġenerali ċaħdet l-argument tal-Kunsill li, sabiex tissodisfa l-kundizzjoni tal-inċidenza diretta, l-appellant għandu “jkollha dritt suġġettiv għall-impożizzjoni ta’ dazji antidumping ta’ livell speċifiku”. Fil-fatt, skont Distillerie Bonollo, il-Kummissjoni tfittex biss li tissostitwixxi l-interpretazzjoni tagħha għal dik adottata mill-Qorti Ġenerali.

63.

Din l-eċċezzjoni ta’ inammissibbiltà, fil-fehma tiegħi, trid tiġi miċħuda wkoll. Ċertament, dan l-argument tressaq fl-ewwel istanza mill-Kunsill u l-Kummissjoni intervjeniet insostenn tal-Kunsill fl-ewwel istanza. Madankollu, skont il-ġurisprudenza, meta appellant jikkontesta l-interpretazzjoni jew l-applikazzjoni tad-dritt tal-Unjoni magħmula mill-Qorti Ġenerali, il-punti ta’ liġi eżaminati fl-ewwel istanza jistgħu jerġgħu jiġu diskussi fl-appell. Fil-fatt, li kieku appellant ma jkunx jista’ jibbaża l-appell tiegħu fuq il-motivi u l-argumenti li kienu diġà tqajmu quddiem il-Qorti Ġenerali, il-proċedura ta’ appell tkun imċaħħda minn parti mis-sens tagħha ( 26 ). Barra minn hekk, il-Kummissjoni tikkontesta punt speċifiku tas-sentenza appellata, jiġifieri l-punt 63.

64.

Fl-appell inċidentali, il-Kummissjoni, wara li esponiet ir-raġunijiet għalfejn, fil-fehma tagħha, Distillerie Bonollo ma hijiex direttament ikkonċernata mir-Regolament ikkontestat u wara li talbet l-annullament tas-sentenza appellata fl-intier tagħha, titlob lill-Qorti tal-Ġustizzja tiċħad bħala infondat il-ħames motiv imqajjem quddiem il-Qorti Ġenerali, ibbażat fuq il-ksur tad-drittijiet tad-difiża u tal-obbligu ta’ motivazzjoni.

65.

Distillerie Bonollo tikkontesta l-ammissibbiltà tat-talba tal-Kummissjoni li tiċħad il-ħames motiv imqajjem quddiem il-Qorti Ġenerali bħala infondat. Fil-fatt, minn naħa, il-Qorti Ġenerali ma tatx deċiżjoni fir-rigward ta’ dan il-ħames motiv u, min-naħa l-oħra, il-kwistjoni dwar jekk, b’mod partikolari, id-drittijiet tad-difiża ta’ Distillerie Bonollo ġewx miksura hija kwistjoni ta’ fatt.

66.

Fl-opinjoni tiegħi, din l-eċċezzjoni ta’ inammissibbiltà trid tiġi miċħuda.

67.

L-ewwel nett, huwa minnu li, fis-sentenza appellata, il-Qorti Ġenerali ma eżaminatx il-ħames motiv imqajjem quddiemha. Ma kienx hemm lok li tagħmel dan, peress li hija laqgħet l-ewwel motiv, ibbażat fuq il-ksur tal-Artikolu 11(9) tar-Regolament bażiku, u annullat ir-Regolament ikkontestat għal din ir-raġuni ( 27 ). Madankollu, minn dan ma jirriżultax li t-talba tal-Kummissjoni, intiża għaċ-ċaħda tal-ħames motiv imqajjem fl-ewwel istanza bħala infondat hija inammissibbli. Fil-fatt, mill-appell inċidentali jirriżulta b’mod ċar li l-Kummissjoni titlob lill-Qorti tal-Ġustizzja teżamina u tiċħad il-ħames motiv imqajjem fl-ewwel istanza bħala infondat fl-eżerċizzju tas-setgħa tal-Qorti tal-Ġustizzja, skont l-Artikolu 61 tal-Istatut, li tiddeċiedi definittivament wara li tannulla d-deċiżjoni tal-Qorti Ġenerali. Fil-fatt, fil-kuntest tal-appell inċidentali, huwa biss wara li esponiet ir-raġunijiet għalfejn Distillerie Bonollo ma hijiex direttament affettwata mis-sentenza appellata u għalfejn, konsegwentement, din is-sentenza għandha tiġi annullata, li l-Kummissjoni titlob lill-Qorti tal-Ġustizzja tiċħad il-ħames motiv imqajjem fl-ewwel istanza bħala infondat. Barra minn hekk, fir-replika tagħha, il-Kummissjoni tispjega li huwa “sabiex tassisti lill-Qorti tal-Ġustizzja fl-eżerċizzju tas-setgħat mogħtija lilha mill-Artikolu 61 tal-Istatut” li hija tippreżenta l-opinjoni tagħha fuq il-ħames motiv imqajjem quddiem il-Qorti Ġenerali.

68.

It-tieni nett, minkejja li l-Artikolu 61 tal-Istatut ma jippreċiżax jekk, meta l-Qorti tal-Ġustizzja tiddeċiedi b’mod definittiv, hija tistax tagħti deċiżjonijiet fuq kwistjonijiet ta’ fatt, il-Qorti tal-Ġustizzja, fil-prattika, assumiet din il-kompetenza ( 28 ). Għaldaqstant, fl-ipoteżi fejn id-determinazzjoni tal-ħames motiv imqajjem fl-ewwel istanza teżiġi evalwazzjonijiet ta’ natura fattwali, dan ma jaffettwax l-ammissibbiltà tat-talba tal-Kummissjoni intiża għaċ-ċaħda ta’ dan il-motiv bħala infondat.

69.

Fl-appell inċidentali, il-Kummissjoni, insostenn tat-talba tagħha li l-Qorti tal-Ġustizzja tiċħad il-ħames motiv imqajjem quddiem il-Qorti Ġenerali bħala infondat, tirreferi għat-tweġiba tal-Kunsill għall-mistoqsijiet bil-miktub magħmula mill-Qorti Ġenerali ( 29 ) fil-kuntest tal-miżuri ta’ organizzazzjoni tal-proċedura ( 30 ).

70.

Distillerie Bonollo ssostni li r-riferimenti fl-appell inċidentali għat-tweġiba tal-Kunsill għall-mistoqsijiet bil-miktub tal-Qorti Ġenerali huma inammissibbli. Dan jirriżulta, skont Distillerie Bonollo, mill-fatt li l-Kummissjoni ġiet ammessa tintervjeni fl-ewwel istanza skont l-Artikolu 116(6) tar-Regoli tal-Proċedura tal-Qorti Ġenerali tat‑2 ta’ Mejju 1991, jiġifieri abbażi tar-rapport għas-seduta. Għaldaqstant, il-Kummissjoni ma kellhiex dritt tirċievi kopja tat-tweġiba tal-Kunsill għall-mistoqsijiet bil-miktub tal-Qorti Ġenerali. Konsegwentement, Distillerie Bonollo titlob lill-Qorti tal-Ġustizzja ma tiddeċidix dwar it-talba tal-Kummissjoni li l-Qorti tal-Ġustizzja tiċħad il-ħames motiv imqajjem quddiem il-Qorti Ġenerali bħala infondat.

71.

Fil-fehma tiegħi, l-appell inċidentali ma jistax jiġi ddikjarat inammissibbli sa fejn jirreferi għall-argumenti mressqa mill-Kunsill fit-tweġiba tiegħu għall-mistoqsijiet bil-miktub tal-Qorti Ġenerali.

72.

F’dan il-każ, il-Kummissjoni ġiet ammessa tintervjeni quddiem il-Qorti Ġenerali skont l-Artikolu 116(6) tar-Regoli tal-Proċedura tal-Qorti Ġenerali tat‑2 ta’ Mejju 1991 ( 31 ).

73.

Skont l-Artikolu 116(6) tar-Regoli tal-Proċedura tal-Qorti Ġenerali tat‑2 ta’ Mejju 1991, meta t-talba għal intervent issir wara l-iskadenza tat-terminu ta’ sitt ġimgħat mill-pubblikazzjoni f’Il-Ġurnal Uffiċjali tal-Unjoni Ewropea tal-avviż dwar il-preżentata tar-rikors, l-intervenjent “jista’ jippreżenta l-osservazzjonijiet tiegħu, ibbażati fuq ir-Rapport għas-Seduta li għandu jintbagħat lilu, waqt il-proċedura orali”. Minn dan isegwi li, f’dan il-każ, l-intervenjent ma għandux dritt jirċievi kopja tar-rikors, tar-risposta, tar-replika jew tal-kontroreplika ( 32 ).

74.

Madankollu, f’dan il-każ, il-Kummissjoni kellha d-dritt li tirċievi kopja tar-rikors u tar-risposta. Fil-fatt, l-Artikolu 24(7) tar-Regoli tal-Proċedura tal-Qorti Ġenerali tat‑2 ta’ Mejju 1991 ( 33 ) jipprevedi li, “meta l-Kunsill jew il-[Kummissjoni] ma jkunux parti fil-kawża, il-Qorti Ġenerali għandha tibgħatilhom kopja tar-rikors u tar-risposta tad-difiża, mingħajr l-annessi, sabiex ikunu jistgħu jikkonstataw jekk tkunx qiegħda tiġi invokata l-inapplikabbiltà ta’ xi att li kien ġie adottat minnhom skond l-Artikolu 277 TFUE”.

75.

Nosserva li l-argumenti mressqa mill-Kunsill fit-tweġiba tiegħu għall-mistoqsijiet bil-miktub tal-Qorti Ġenerali, li għalihom tirreferi l-Kummissjoni fl-appell inċidentali tagħha ( 34 ), kienu jinsabu wkoll fir-risposta tal-Kunsill quddiem il-Qorti Ġenerali ( 35 ), li l-Kummissjoni kellha dritt tirċievi kopja tagħha.

76.

Għaldaqstant, indipendentement mill-kwistjoni dwar jekk il-Kummissjoni kellhiex dritt tirċievi kopja tat-tweġiba tal-Kunsill għall-mistoqsijiet bil-miktub tal-Qorti Ġenerali, il-fatt li, fl-appell inċidentali tagħha, il-Kummissjoni tirreferi għal argumenti mressqa mill-Kunsill fit-tweġiba tiegħu għal dawn il-mistoqsijiet bil-miktub ma jistax iwassal għall-inammissibbiltà tal-appell inċidentali sa fejn dan jirrigwarda l-argumenti tal-Kunsill.

77.

Kif tfakkar fil-punt 56 ta’ dawn il-konklużjonijiet, il-Kummissjoni titlob, prinċipalment, l-annullament tas-sentenza appellata jew, sussidjarjament, l-annullament tat-tieni punt tad-dispożittiv tagħha. Ser neżamina kull waħda mit-talbiet suċċessivament.

78.

Permezz tal-aggravju uniku tagħha, il-Kummissjoni ssostni li l-Qorti Ġenerali wettqet żball meta qieset li Distillerie Bonollo kienet direttament ikkonċernata mir-Regolament ikkontestat.

79.

Skont ir-raba’ paragrafu tal-Artikolu 263 TFUE, persuna fiżika jew ġuridika tista’ tippreżenta rikors kontra att li ma tkunx id-destinatarja tiegħu jekk dan l-att jikkonċernaha direttament u individwalment.

80.

Skont ġurisprudenza stabbilita, il-kundizzjoni li persuna fiżika jew ġuridika għandha tkun direttament ikkonċernata mid-deċiżjoni li tkun is-suġġett tar-rikors teħtieġ li jiġu ssodisfatti żewġ kriterji kumulattivi, jiġifieri li l-miżura kkontestata, minn naħa, tipproduċi direttament effetti fuq is-sitwazzjoni legali tal-individwu u, min-naħa l-oħra, ma tħalli l-ebda setgħa diskrezzjonali lid-destinatarji inkarigati bl-implimentazzjoni tagħha, fejn din l-implimentazzjoni tkun ta’ natura purament awtomatika u tirriżulta biss mil-leġiżlazzjoni tal-Unjoni stess, mingħajr l-applikazzjoni ta’ regoli intermedjarji oħra ( 36 ).

81.

Il-Qorti Ġenerali ddeċidiet, fil-punt 59 tas-sentenza appellata, li r-Regolament ikkontestat kien direttament jaffettwa is-sitwazzjoni legali tar-rikorrenti fl-ewwel istanza peress li dawn tal-aħħar bdew il-proċedura ta’ eżami mill-ġdid intermedju parzjali, u li d-dazji antidumping imposti fi tmiem din il-proċedura kienu intiżi sabiex jikkumpensaw id-dannu mġarrab minnhom bħala kompetituri taż-żewġ produtturi-esportaturi Ċiniżi. Fir-rigward tat-tieni kriterju għal inċidenza diretta, dan ġie ssodisfatt ukoll, peress li l-Istati Membri ma kellhom l-ebda marġni ta’ diskrezzjoni fir-rigward tar-rata tad-dazju antidumping u tal-impożizzjoni ta’ dan id-dazju fuq il-prodotti kkonċernati.

82.

Nosserva li l-appell inċidentali jikkontesta biss l-evalwazzjoni magħmula mill-Qorti Ġenerali, fil-punti 51 sa 73 tas-sentenza appellata, tal-ewwel kriterju għal inċidenza diretta, u mhux l-analiżi, fil-punt 50 ta’ dik is-sentenza, tat-tieni kriterju.

83.

L-argument tal-Kummissjoni huwa li r-Regolament ikkontestat ma jaffettwax is-sitwazzjoni legali ta’ Distillerie Bonollo, peress li din tal-aħħar ma għandha l-ebda dritt li jista’ jiġi affettwat mill-adozzjoni tal-imsemmi regolament. Skont il-Kummissjoni, għalkemm ir-Regolament bażiku jagħti drittijiet proċedurali lil Distillerie Bonollo fil-kwalità tagħha ta’ lanjanti, huma biss id-drittijiet materjali, u mhux dawk proċedurali, li huma rilevanti sabiex jiġi ddeterminat jekk is-sitwazzjoni legali ta’ Distillerie Bonollo hijiex affettwata. Issa, la t-Trattat FUE u lanqas ir-Regolament bażiku ma jagħtu lil Distillerie Bonollo dritt materjali għall-impożizzjoni ta’ ċertu livell ta’ dazji antidumping fuq produtturi ta’ pajjiżi terzi li huma kompetituri.

84.

Min-naħa tagħha, Distillerie Bonollo tqis li r-Regolament ikkontestat direttament jaffettwa s-sitwazzjoni legali tagħha minħabba l-fatt li hija għandha d-dritt li ma tiġix suġġetta għal kompetizzjoni distorta permezz tad-dumping fis-suq li fih hija teżerċita l-attività tagħha. Dan jirriżulta, b’analoġija, mill-punt 50 tas-sentenza tas‑6 ta’ Novembru 2018, Scuola Elementare Maria Montessori vs Il‑Kummissjoni, Il‑Kummissjoni vs Scuola Elementare Maria Montessori u Il‑Kummissjoni vs Ferracci (C‑622/16 P sa C‑624/16 P, EU:C:2018:873).

85.

Jiena tal-fehma li l-Qorti tal-Ġustizzja għandha tiċħad l-aggravju uniku mqajjem insostenn tat-talba prinċipali tal-Kummissjoni. Kif ser jiġi espost iktar ’il quddiem, nipproponi li għal din il-kawża tiġi applikata s-soluzzjoni adottata mill-Qorti tal-Ġustizzja fis-sentenza tas‑6 ta’ Novembru 2018, Scuola Elementare Maria Montessori vs Il‑Kummissjoni, Il‑Kummissjoni vs Scuola Elementare Maria Montessori u Il‑Kummissjoni vs Ferracci (C‑622/16 P sa C‑624/16 P, EU:C:2018:873), u li jiġi konkluż li r-Regolament ikkontestat direttament jaffettwa s-sitwazzjoni legali ta’ Distillerie Bonollo minħabba d-dritt ta’ din tal-aħħar li ma tiġix suġġetta għal kompetizzjoni distorta permezz tad-dumping fis-suq li fih hija teżerċita l-attività tagħha.

86.

Qabelxejn, nirrileva li, kuntrarjament għal dak li jsostni l-Kunsill, mill-fatt li r-Regolament ikkontestat ma jobbligax lil Distillerie Bonollo tħallas dazji antidumping ma jirriżultax li dan ir-regolament ma jaffettwax is-sitwazzjoni legali tagħha.

87.

Fil-fatt, skont id-definizzjoni tagħhom, dazji antidumping huma imposti fuq prodotti mmanifatturati minn produtturi ta’ pajjiżi terzi, u mhux fuq prodotti mmanifatturati minn produtturi tal-Unjoni bħal Distillerie Bonollo. Konsegwentement, kieku l-Qorti tal-Ġustizzja kellha ssegwi l-approċċ tal-Kunsill, il-produtturi tal-Unjoni ma kienx ikollhom locus standi sabiex jitolbu l-annullament ta’ regolament li jimponi miżuri antidumping. Dan bilkemm ikun konformi mas-sentenzi tal‑20 ta’ Marzu 1985, Timex vs Il‑Kunsill u Il‑Kummissjoni (264/82, EU:C:1985:119, punti 12 sa 16) u tat‑18 ta’ Ottubru 2018, ArcelorMittal Tubular Products Ostrava et vs Il‑Kummissjoni (T‑364/16, EU:T:2018:696, punti 36 sa 53), li fihom ir-rikors għal annullament ta’ produttur tal-Unjoni ġie ddikjarat ammissibbli.

88.

Argument ieħor favur l-opinjoni stabbilita fil-punt 85 iktar ’il fuq huwa li d-dazji antidumping jitħallsu mill-importaturi tal-prodott ikkonċernat fl-Unjoni u jinġabru mill-awtoritajiet doganali tal-Istati Membri mar-rilaxx għal ċirkolazzjoni libera ta’ dan il-prodott fl-Unjoni. Dawn ma jitħallsux mill-produtturi-esportaturi. Għaldaqstant, kieku l-Qorti tal-Ġustizzja ssegwi l-approċċ tal-Kunsill, il-produtturi-esportaturi ma kienx ikollhom locus standi għall-annullament ta’ regolament li jimponi dazji antidumping fuq l-importazzjonijiet tal-prodotti tagħhom stess fl-Unjoni. Dan, ukoll, bilkemm ikun konformi ma’ ġurisprudenza stabbilita, li taċċetta l-ammissibbiltà ta’ rikorsi ppreżentati minn produtturi u minn esportaturi tal-prodott inkwistjoni li huma allegati li wettqu prattiki ta’ dumping abbażi ta’ informazzjoni relatata mal-attività kummerċjali tagħhom ( 37 ).

89.

Barra minn hekk, kif imsemmi fil-punt 85 iktar ’il fuq, naqbel ma’ Distillerie Bonollo li, billi poġġieha f’sitwazzjoni kompetittiva żvantaġġata, ir-Regolament ikkontestat direttament jaffettwa d-dritt tagħha li ma ġġarrabx distorsjoni tal-kompetizzjoni fis-suq li fih hija teżerċita l-attività tagħha.

90.

L-ewwel nett, dan jirriżulta mis-sentenza tas‑6 ta’ Novembru 2018, Scuola Elementare Maria Montessori vs Il‑Kummissjoni, Il‑Kummissjoni vs Scuola Elementare Maria Montessori u Il‑Kummissjoni vs Ferracci (C‑622/16 P sa C‑624/16 P, EU:C:2018:873). F’din is-sentenza, il-Qorti tal-Ġustizzja ddeċidiet li d-deċiżjoni li permezz tagħha l-Kummissjoni, minn naħa, ikkonstatat li ċerti miżuri kienu jikkostitwixxu għajnuna mill-Istat inkompatibbli, iżda astjeniet milli tordna l-irkupru tagħhom, u, min-naħa l-oħra, ikkonstatat li miżuri oħra ma jikkostitwixxux għajnuna mill-Istat, kienet direttament taffettwa s-sitwazzjoni legali tar-rikorrenti fl-ewwel istanza minħabba l-fatt li qegħdithom f’sitwazzjoni kompetittiva żvantaġġata u, minħabba f’hekk, affettwat id-dritt tagħhom li ma jkunux suġġetti għal kompetizzjoni distorta permezz tal-miżuri inkwistjoni fis-suq li fih huma kienu jereżerċitaw l-attività tagħhom ( 38 ). Kif iddeċidiet il-Qorti tal-Ġustizzja, dan id-dritt ingħata lir-rikorrenti fl-ewwel istanza mid-dispożizzjonijiet tat-Trattat dwar l-għajnuna mill-Istat, jiġifieri l-Artikoli 107 u 108 TFUE, li l-għan tagħhom huwa li tiġi mħarsa l-kompetizzjoni ( 39 ).

91.

Nipproponi li, għal din il-kawża, tiġi applikata s-soluzzjoni adottata mill-Qorti tal-Ġustizzja fis-sentenza msemmija fil-punt preċedenti, li ma tikkonċernax ir-regoli dwar l-għajnuna mill-Istat, iżda d-dispożizzjonijiet antidumping. Jiena nqis li r-Regolament ikkontestat direttament jaffettwa s-sitwazzjoni legali ta’ Distillerie Bonollo minħabba d-dritt tagħha li ma tiġix suġġetta għal kompetizzjoni li hija distorta mhux permezz ta’ għajnuna mill-Istat (kif kien il-każ f’dik is-sentenza), iżda permezz ta’ prattiki ta’ dumping fis-suq li fih hija teżerċita l-attività tagħha.

92.

Insostenn ta’ din is-soluzzjoni, infakkar li r-regoli antidumping huma intiżi sabiex iħarsu l-kompetizzjoni, bħall-Artikoli 107 u 108 TFUE. Ċertament, skont l-Artikolu 21(1) tar-Regolament bażiku, il-miżuri antidumping għandhom għan doppju: għandhom l-għan, minn naħa, li jeliminaw l-effetti ta’ distorsjoni kummerċjali kkawżat mid-dumping u, min-naħa l-oħra, li jistabbilixxu kompetizzjoni effettiva mill-ġdid. Madankollu, nenfasizza li l-prattiki ta’ dumping għandhom jitqiesu bħala kompetizzjoni żleali min-naħa tal-produtturi ta’ pajjiżi terzi, li kontrihom il-produtturi tal-Unjoni għandhom jiġu protetti ( 40 ). Skont ġurisprudenza stabbilita, l-istabbiliment ta’ dazji antidumping huwa miżura ta’ protezzjoni u ta’ prevenzjoni kontra kompetizzjoni żleali li tirriżulta minn prattiki ta’ dumping ( 41 ). Għalhekk, fil-fehma tiegħi, l-eliminazzjoni ta’ effetti ta’ distorsjoni kummerċjali tikkostitwixxi, fuq kollox, kundizzjoni għall-istabbiliment mill-ġdid ta’ kompetizzjoni leali fis-suq intern.

93.

Nirrileva wkoll li l-importanza tal-għan ta’ kompetizzjoni effettiva ta’ dazji antidumping hija kkonfermata mir-regola tad-dazju inferjuri. Skont din ir-regola, kif prevista fl-aħħar sentenza tal-Artikolu 9(4) tar-Regolament bażiku, il-livell tad-dazju antidumping għandu jiġi ddeterminat abbażi tal-marġni ta’ dumping, sakemm il-marġni ta’ dannu ma jkunx inqas mill-marġni ta’ dumping, f’liema każ id-dazju antidumping għandu jiġi kkalkolat abbażi tal-marġni ta’ dannu. Ir-regola tad-dazju inferjuri tiżgura li l-industrija tal-Unjoni ma tibbenefikax minn protezzjoni li tmur lil hinn minn dak li huwa neċessarju sabiex jiġu miġġielda l-effetti dannużi tal-importazzjonijiet li huma s-suġġett ta’ dumping ( 42 ), jiġifieri li l-industrija tal-Unjoni ma tibbenefikax minn vantaġġ kompetittiv ikbar meta mqabbla mal-importazzjonijiet li huma s-suġġett ta’ dumping ( 43 ).

94.

Għaldaqstant, b’analoġija mas-sentenza tas‑6 ta’ Novembru 2018, Scuola Elementare Maria Montessori vs Il‑Kummissjoni, Il‑Kummissjoni vs Scuola Elementare Maria Montessori u Il‑Kummissjoni vs Ferracci (C‑622/16 P sa C‑624/16 P, EU:C:2018:873), ir-Regolament ikkontestat għandu jitqies li direttament jaffettwa d-dritt ta’ Distillerie Bonollo li l-kompetizzjoni ma tiġix distorta permezz tad-dumping fis-suq fejn hija teżerċita l-attività tagħha u, konsegwentement, li direttament jaffettwa s-sitwazzjoni legali tagħha. Kif ikkonstatat il-Qorti Ġenerali fil-punt 59 tas-sentenza appellata, Distillerie Bonollo hija produttur tal-Unjoni tal-aċidu tartariku li topera fl-istess suq bħaż-żewġ produtturi-esportaturi Ċiniżi. Għaldaqstant, billi jimponi dazji antidumping allegatament insuffiċjenti fuq iż-żewġ produtturi-esportaturi Ċiniżi, ir-Regolament ikkontestat seta’ jpoġġiha f’sitwazzjoni kompetittiva żvantaġġata fis-suq intern.

95.

It-tieni nett, kuntrarjament għal dak li ssostni l-Kummissjoni, mill-Artikolu 9(4) u mill-Artikolu 21 tar-Regolament bażiku ma jirriżultax li Distillerie Bonollo ma għandhiex id-dritt li ma tiġix suġġetta għal kompetizzjoni distorta permezz tad-dumping fis-suq li fih hija teżerċita l-attività tagħha.

96.

Il-Kummissjoni ssostni li, meta jiġi stabbilit li jeżisti dumping u dannu, u li t-tieni wieħed huwa kkawżat mill-ewwel wieħed, hija tista’, madankollu, skont l-Artikolu 9(4) u l-Artikolu 21 tar-Regolament bażiku, tastjeni milli timponi miżuri antidumping jekk dawn il-miżuri ma jkunux fl-interess tal-Unjoni. Il-Kummissjoni ssostni li minn dan isegwi li Distillerie Bonollo ma għandhiex dritt materjali għall-protezzjoni kontra d-dumping.

97.

Ma naqbilx ma’ dan l-argument.

98.

Ċertament, skont il-ġurisprudenza tal-Qorti Ġenerali, l-industrija tal-Unjoni ma għandhiex dritt għall-impożizzjoni ta’ miżuri ta’ protezzjoni, anki meta tkun ġiet stabbilita l-eżistenza ta’ dumping u ta’ dannu, peress li tali miżuri jistgħu jiġu imposti biss meta jkun ġie stabbilit ukoll, skont l-Artikolu 9(4) u l-Artikolu 21 tar-Regolament bażiku, li dawn huma ġġustifikati fl-interess tal-Unjoni ( 44 ). L-eżami tal-interess tal-Unjoni jeħtieġ evalwazzjoni tal-konsegwenzi probabbli kemm tal-applikazzjoni kif ukoll tan-nuqqas ta’ applikazzjoni tal-miżuri proposti għall-interess tal-industrija tal-Unjoni u għall-interessi l-oħra involuti, jiġifieri l-importaturi, l-industrija upstream, l-utenti u l-proċessuri tal-prodott ikkonċernat, u l-konsumaturi ( 45 ). Dan jeħtieġ l-ibbilanċjar tal-interessi ta’ dawn il-partijiet ( 46 ).

99.

Madankollu, nosserva li dan huwa rekwiżit negattiv. Skont l-Artikolu 21(1) tar-Regolament bażiku, huwa biss jekk il-miżuri antidumping proposti ma jkunux fl-interess tal-Unjoni li l-Kummissjoni tista’ tastjeni milli tadotta tali miżuri ( 47 ). Fil-prattika, il-Kummissjoni rarament iddeċidiet li ma timponix miżuri antidumping minħabba li, minkejja li t-tliet kundizzjonijiet l-oħra (jiġifieri d-dumping, id-dannu u r-rabta kawżali) ikunu ssodisfatti, ma kienx fl-interess tal-Unjoni li timponihom ( 48 ).

100.

Barra minn hekk, nenfasizza li l-fatt li l-Kummissjoni tista’ tirrinunzja milli tordna l-irkupru ta’ għajnuna mill-Istat illegali u inkompatibbli jekk dan imur kontra prinċipju ġenerali tad-dritt tal-Unjoni ( 49 ) u l-fatt li l-Istat Membru kkonċernat jista’ jirrifjuta l-eżekuzzjoni tad-deċiżjoni ta’ rkupru f’każ ta’ impossibbiltà assoluta li jimplimentaha b’mod korrett ( 50 ) ma pprekludewx lill-Qorti tal-Ġustizzja milli tiddeċiedi, fis-sentenza tas‑6 ta’ Novembru 2018, Scuola Elementare Maria Montessori vs Il‑Kummissjoni, Il‑Kummissjoni vs Scuola Elementare Maria Montessori u Il‑Kummissjoni vs Ferracci (C‑622/16 P sa C‑624/16 P, EU:C:2018:873), li l-kompetituri tal-benefiċjarji ta’ għajnuna mill-Istat għandhom dritt li ma jkunux suġġetti għal kompetizzjoni distorta permezz ta’ għajnuna mill-Istat fis-suq li fih huma jeżerċitaw l-attività tagħhom.

101.

B’mod partikolari, meta l-irkupru ta’ għajnuna illegali u inkompatibbli jippreġudika l-prinċipju ta’ protezzjoni tal-aspettattivi leġittimi tal-benefiċjarju tal-għajnuna ( 51 ), il-Kummissjoni ma tibqax obbligata tordna l-irkupru ( 52 ). Hija ma għandhiex tordna l-irkupru. F’dan il-każ, il-konstatazzjoni tal-inkompatibbiltà tal-għajnuna mas-suq intern ma twassalx għall-istabbiliment mill-ġdid tal-kompetizzjoni fis-suq ikkonċernat. Madankollu, kif imsemmi fil-punt preċedenti, dan ma pprekludiex lill-Qorti tal-Ġustizzja milli ssostni li l-kompetituri tal-benefiċjarju ta’ għajnuna għandhom dritt li ma jkunux suġġetti għal kompetizzjoni distorta permezz ta’ għajnuna mill-Istat.

102.

Bl-istess mod, meta l-impożizzjoni ta’ miżuri antidumping ma tkunx fl-interess tal-Unjoni, il-Kummissjoni tista’ tiddeċiedi li ma tadottax tali miżuri. F’dan il-każ, id-distorsjonijiet kummerċjali li jirriżultaw minn prattiċi ta’ dumping ma jiġux eliminati, u l-kompetizzjoni ma tiġix stabbilita mill-ġdid fis-suq intern. Dan ma għandux jipprekludi lill-Qorti tal-Ġustizzja milli tikkonstata d-dritt ta’ produttur tal-Unjoni li ma jkunx suġġett għal kompetizzjoni distorta permezz tad-dumping.

103.

It-tielet nett, kuntrarjament għal dak li jsostnu l-Kummissjoni u l-Kunsill, jekk il-Qorti tal-Ġustizzja tikkonstata li l-ewwel kriterju għal inċidenza diretta huwa ssodisfatt f’dan il-każ, dan ma jkunx minħabba s-sempliċi effetti fattwali tar-Regolament ikkontestat fuq is-sitwazzjoni ta’ Distillerie Bonollo (għall-kuntrarju tal-effetti legali ta’ dan ir-regolament).

104.

Fil-fatt, kif issemma fil-punt 85 iktar ’il fuq, ir-Regolament ikkontestat direttament jaffettwa s-sitwazzjoni ta’ Distillerie Bonollo minħabba d-dritt tagħha li ma tkunx suġġetta għal kompetizzjoni distorta permezz tad-dumping, u mhux minħabba xi effetti fattwali ta’ dan ir-regolament.

105.

Nirrileva wkoll li ma teżisti l-ebda kontradizzjoni bejn is-soluzzjoni proposta fil-punt 85 iktar ’il fuq u l-punt 81 tas-sentenza tat‑28 ta’ Frar 2019, Il‑Kunsill vs Growth Energy u Renewable Fuels Association (C‑465/16 P, EU:C:2019:155). F’dak il-punt, il-Qorti tal-Ġustizzja ddeċidiet li l-fatt li regolament li jimponi dazji antidumping fuq l-importazzjonijiet tal-bijoetanol li joriġinaw mill-Istati Uniti tal-Amerika kien iwassal għal żvantaġġ kompetittiv għall-produtturi Amerikani tal-bijoetanol ma setax, fih innifsu, jippermetti li jitqies li dan ir-regolament kien jikkonċernahom direttament. Nirrileva, minn naħa, li dawn il-produtturi Amerikani tal-bijoetanol kienu produtturi ta’ pajjiżi terzi li l-prodotti tagħhom kienu suġġetti għal dazji antidumping, filwaqt li nipproponi li jitqies li l-produtturi tal-Unjoni għandhom dritt li ma jkunux suġġetti għal kompetizzjoni distorta permezz tad-dumping. Min-naħa l-oħra, dawn il-produtturi Amerikani tal-bijoetanol ma kinux jeżerċitaw l-attività tagħhom fis-suq intern ( 53 ), filwaqt li nipproponi li jitqies li l-operaturi reali fis-suq, u mhux l-operaturi potenzjali, għandhom dan id-dritt ( 54 ).

106.

Ir-raba’ nett, kuntrarjament għal dak li jsostnu l-Kummissjoni u l-Kunsill, is-soluzzjoni proposta fil-punt 85 iktar ’il fuq ma twassalx sabiex “ittaffi” l-ewwel kriterju għal inċidenza diretta.

107.

Kif issemma fil-punt 87 iktar ’il fuq, fis-sentenza tal‑20 ta’ Marzu 1985, Timex vs Il‑Kunsill u Il‑Kummissjoni (264/82, EU:C:1985:119, punti 11 sa 16), il-produtturi tal-Unjoni tqiesu li kellhom locus standi sabiex jitolbu l-annullament ta’ regolament li jimponi miżuri antidumping. Barra minn hekk, fis-sentenza tat‑18 ta’ Ottubru 2018, ArcelorMittal Tubular Products Ostrava et vs Il‑Kummissjoni (T‑364/16, EU:T:2018:696, punti 36 sa 53), il-produtturi tal-Unjoni tqiesu li kellhom locus standi sabiex jikkontestaw id-deċiżjoni li permezz tagħha l-Kummissjoni, għall-finijiet tal-eżekuzzjoni ta’ sentenza tal-Qorti Ġenerali, ordnat in-nuqqas ta’ ġbir ta’ dazji antidumping fuq l-importazzjonijiet ta’ prodotti mmanifatturati minn produttur-esportatur speċifiku.

108.

Minn dan isegwi li, jekk il-Qorti Ġenerali tikkonstata li r-Regolament ikkontestat direttament jaffettwa s-sitwazzjoni legali ta’ Distillerie Bonollo, kuntrarjament għal dak li jsostnu l-Kummissjoni u l-Kunsill, dan ma jwassalx sabiex “ittaffi” l-kundizzjoni għal inċidenza diretta. Id-deċiżjoni tagħha tkun konformi mal-ġurisprudenza msemmija fil-punt preċedenti.

109.

Argument partikolari favur din il-konklużjoni hija li, fil-qasam antidumping, kull fejn ġie kkonstatat li rikorrent (kemm jekk kien produttur, produttur-esportatur jew importatur tal-Unjoni) ma kellux locus standi sabiex jitlob l-annullament ta’ regolament li jimponi miżuri antidumping, dan kien għaliex huwa ma kienx individwalment ikkonċernat minn dan ir-regolament. Dan mhux għaliex huwa ma kienx direttament ikkonċernat minnu ( 55 ).

110.

Sa fejn naf jien, teżisti eċċezzjoni waħda biss. Din hija s-sentenza tat‑28 ta’ Frar 2019, Il‑Kunsill vs Growth Energy u Renewable Fuels Association (C‑465/16 P, EU:C:2019:155), li fiha l-locus standi tal-produtturi Amerikani tal-bijoetanol ġie rrifjutat minħabba li dawn ma kinux direttament ikkonċernati mill-att ikkontestat. Madankollu, kif issemma fil-punt 105 iktar ’il fuq, dan kien dovut għall-fatt partikolari li dawn il-produtturi ma kinux jesportaw il-bijoetanol direttament lejn l-Unjoni u li, għaldaqstant, il-produzzjoni tagħhom ma kinitx direttament suġġetta għad-dazji antidumping imposti.

111.

Barra minn hekk, f’kawżi fejn ġie aċċettat li r-rikorrenti kellhom locus standi sabiex jitolbu l-annullament ta’ regolament li jimponi miżuri antidumping, jew il-kundizzjoni għal inċidenza diretta ma ġietx eżaminata ( 56 ), jew inkella din tqieset li kienet ġiet issodisfatta. Fejn ġie deċiż li din kienet ġiet issodisfatta, dan kien minħabba t-tieni kriterju għal inċidenza diretta, jiġifieri, kif tfakkar fil-punt 80 iktar ’il fuq, minħabba l-fatt li l-awtoritajiet doganali tal-Istati Membri huma obbligati, mingħajr ebda marġni ta’ diskrezzjoni, li jiġbru d-dazji stabbiliti minn regolament antidumping. L-ewwel kriterju ma ġiex eżaminat ( 57 ).

112.

Sa fejn naf jien, jeżistu biss żewġ eċċezzjonijiet. Fis-sentenza tas‑26 ta’ Settembru 2000, Starway vs Il‑Kunsill (T‑80/97, EU:T:2000:216), ġie kkonstatat li regolament li jestendi miżuri antidumping direttament jaffettwa s-sitwazzjoni legali ta’ importatur. Fil-fatt, il-possibbiltà prevista minn dan ir-regolament li l-Kummissjoni tista’ tagħti lir-rikorrent eżenzjoni mid-dazju estiż (meta l-importazzjonijiet ma kinux jikkostitwixxu evażjoni tad-dazju inizjali) kienet, fiċ-ċirkustanzi tal-każ, purament teoretika ( 58 ). Bl-istess mod, fis-sentenza tat‑18 ta’ Ottubru 2018, ArcelorMittal Tubular Products Ostrava et vs Il‑Kummissjoni (T‑364/16, EU:T:2018:696), ġie kkonstatat li deċiżjoni li tipprevedi n-nuqqas ta’ ġbir ta’ dazji antidumping direttament taffettwa s-sitwazzjoni tal-produtturi tal-Unjoni “fil-kuntest tal-proċedura li wasslet għall-adozzjoni tal-miżuri antidumping”. Il-Qorti Ġenerali invokat, inter alia, il-fatt li kemm l-ilment li wassal għall-adozzjoni tar-regolament oriġinali kif ukoll it-talba għal eżami mill-ġdid ta’ miżuri li ser jiskadu kienu tressqu minn assoċjazzjoni professjonali f’isem il-produtturi tal-Unjoni, fosthom ir-rikorrenti ( 59 ). F’dan ir-rigward, infakkar li, kif imsemmi fil-punt 85 iktar ’il fuq, nipproponi li ma jiġux invokati d-drittijiet proċedurali tar-rikorrent, iżda d-dritt li ma jkunx suġġett għal kompetizzjoni distorta sabiex jiġi ddeterminat jekk l-ewwel kriterju għal inċidenza diretta huwiex issodisfatt. Fil-fatt, id-drittijiet proċedurali mogħtija mir-Regolament bażiku jvarjaw b’mod sinjifikattiv minn persuna għal oħra ( 60 ), b’tali mod li jista’ jiġi mistoqsi jekk is-sitwazzjoni legali ta’ kwalunkwe persuna li lilha dan ir-regolament jagħti drittijiet proċedurali tistax tiġi direttament affettwata minn regolament li jimponi miżuri antidumping.

113.

Konsegwentement, ma hemmx, fil-fehma tiegħi, sostenn fil-ġurisprudenza fil-qasam tal-antidumping għall-argument tal-Kummissjoni li l-locus standi ta’ produttur tal-Unjoni għandu jiġi rrifjutat minħabba li dan ma għandux dritt ta’ difiża kontra d-dumping u li, konsegwentement, ir-regolament li jimponi dazji antidumping ma jaffettwax is-sitwazzjoni legali tiegħu direttament. Minflok, jidhirli li s-sentenza appellata hija konformi mal-ġurisprudenza tal-qrati tal-Unjoni, li tgħid li, kif issemma fil-punt 110 iktar ’il fuq, sa fejn naf jien, il-locus standi ġie rrifjutat minħabba l-fatt li r-rikorrent ma kienx direttament ikkonċernat mill-att ikkontestat f’okkażjoni waħda biss, f’ċirkustanzi differenti minn dawk f’dan il-każ.

114.

Il-ħames nett, ma iniex konvint mill-argument tal-Kummissjoni u tal-Kunsill li, fil-punti 92 u 93 tas-sentenza appellata, il-Qorti Ġenerali b’mod żbaljat invokat id-dritt għal protezzjoni ġudizzjarja effettiva, kif stabbilit fl-Artikolu 47 tal-Karta, sabiex “twessa’” l-kundizzjoni tal-inċidenza diretta.

115.

Fl-imsemmija punti, il-Qorti Ġenerali qieset li, peress li r-Regolament ikkontestat ma setax jipprevedi miżuri ta’ implimentazzjoni fir-rigward ta’ Distillerie Bonollo, din tal-aħħar ma kellha, bħala prinċipju, l-ebda rimedji nazzjonali alternattivi. Għalkemm dan il-fatt ma setax iwassal, skont il-Qorti Ġenerali, għall-esklużjoni tal-kundizzjoni fir-rigward tal-inċidenza individwali, xorta jibqa’ l-fatt li l-kundizzjoni li persuna għandha tkun direttament u individwalment ikkonċernata għandha tiġi interpretata fid-dawl tad-dritt għal protezzjoni ġudizzjarja effettiva.

116.

Għalkemm l-Artikolu 47 tal-Karta ċertament ma għandux l-għan li jbiddel is-sistema ta’ stħarriġ ġudizzjarju prevista mit-Trattati, u b’mod partikolari r-regoli dwar l-ammissibbiltà tar-rikorsi ppreżentati direttament quddiem il-qrati tal-Unjoni ( 61 ), fl-opinjoni tiegħi, dan ma huwiex dak li għamlet il-Qorti Ġenerali fil-punti 92 u 93 tas-sentenza appellata.

117.

Il-Qorti Ġenerali ma waslitx għall-konklużjoni li Distillerie Bonollo kienet direttament ikkonċernata mir-Regolament ikkontestat billi invokat l-Artikolu 47 tal-Karta. Din il-konklużjoni kienet ibbażata fuq raġunijiet oħra, jiġifieri l-fatt, imsemmi fil-punt 59 tas-sentenza appellata, li Distillerie Bonollo bdiet il-proċedura ta’ eżami mill-ġdid intermedju parzjali u li d-dazji antidumping stabbiliti minn dan ir-regolament kienu intiżi sabiex jikkumpensaw id-dannu li hija ġarrbet bħala kompetitur li jopera fl-istess suq bħaż-żewġ produtturi-esportaturi Ċiniżi. Il-punti 92 u 93 ta’ dik is-sentenza sempliċement isostnu din il-konklużjoni, li l-Qorti Ġenerali kienet diġà waslet għaliha.

118.

Nirrileva wkoll li, billi ddeċidiet li r-Regolament ikkontestat kien direttament jaffettwa s-sitwazzjoni legali ta’ Distillerie Bonollo għar-raġunijiet imsemmija fil-punt preċedenti, il-Qorti Ġenerali ma injoratx il-kundizzjoni tal-inċidenza diretta. Hija adottat interpretazzjoni ta’ din il-kundizzjoni iktar wiesgħa minn dik proposta mill-Kummissjoni u mill-Kunsill, iżda dan ma jfissirx li injoratha.

119.

Minn dan nikkonkludi li, peress li r-Regolament ikkontestat jista’ jqiegħed lil Distillerie Bonollo f’sitwazzjoni kompetittiva żvantaġġata fis-suq li fih hija tinsab f’kompetizzjoni maż-żewġ produtturi-esportaturi Ċiniżi, dan ir-regolament direttament jaffettwa d-dritt ta’ Distillerie Bonollo li ma tkunx suġġetta għal kompetizzjoni distorta permezz ta’ prattika ta’ dumping f’dan is-suq. Minn dan isegwi li l-Qorti Ġenerali ma wettqitx żball meta qieset, fil-punt 59 tas-sentenza appellata, li r-Regolament ikkontestat kien direttament jaffettwa s-sitwazzjoni legali ta’ Distillerie Bonollo, u li l-aggravju uniku tal-appell għandu jiġi miċħud.

120.

Konsegwentement, l-appell inċidentali għandu jiġi miċħud sa fejn dan huwa intiż għall-annullament tas-sentenza appellata.

121.

Sussidjarjament, il-Kummissjoni titlob lill-Qorti tal-Ġustizzja tannulla t-tieni punt tad-dispożittiv tas-sentenza appellata sa fejn dan iżomm id-dazju antidumping impost mir-Regolament ikkontestat fuq il-prodotti ta’ Ninghai Organic Chemical Factory sakemm mhux biss il-Kummissjoni, iżda wkoll il-Kunsill ikunu adottaw il-miżuri neċessarji għall-implimentazzjoni tas-sentenza appellata. Il-Kummissjoni ssostni li, wara d-dħul fis-seħħ tar-Regolament Nru 37/2014, hija biss il-Kummissjoni li tista’ tadotta miżuri antidumping.

122.

Il-Kunsill u Changmao Biochemical Engineering jaqblu mal-Kummissjoni, filwaqt li Distillerie Bonollo ma taqbilx.

123.

Jiena nqis li t-talba sussidjarja tal-Kummissjoni għandha tintlaqa’.

124.

Fit-tieni punt tad-dispożittiv tas-sentenza appellata, il-Qorti Ġenerali żammet id-dazju antidumping impost mir-Regolament ikkontestat fuq il-prodotti ta’ Ninghai Organic Chemical Factory “sakemm il-[Kummissjoni] u l-[Kunsill] ikunu adottaw il-miżuri neċessarji għall-implimentazzjoni [tas]-sentenza [appellata]”.

125.

Infakkar li, skont l-ewwel paragrafu tal-Artikolu 266 TFUE, l-istituzzjoni li l-att tagħha jkun ġie ddikjarat null għandha tkun obbligata tieħu l-miżuri neċessarji sabiex tikkonforma ruħha mas-sentenza tal-Qorti tal-Ġustizzja. F’dan il-każ, ir-Regolament ikkontestat ġie adottat mill-Kunsill. Madankollu, ma jsegwix li l-Kunsill għandu, u lanqas jista’, jieħu l-miżuri neċessarji sabiex jikkonforma mas-sentenza appellata.

126.

Fil-fatt, skont il-ġurisprudenza, l-obbligu li tittieħed azzjoni previst fl-ewwel paragrafu tal-Artikolu 266 TFUE ma jikkostitwixxix sors ta’ kompetenza u ma jeżentax lill-istituzzjoni kkonċernata mill-bżonn li tibbaża l-att li jinkludi l-miżuri neċessarji għall-eżekuzzjoni ta’ sentenza ta’ annullament ta’ miżura fuq bażi legali li, minn naħa, tawtorizzaha tadotta dan l-att u, min-naħa l-oħra, tkun fis-seħħ fid-data tal-adozzjoni ta’ dan l-att ( 62 ).

127.

L-Artikolu 1 tar-Regolament Nru 37/2014 jemenda l-Artikolu 9(4) tar-Regolament bażiku fis-sens li d-dazji antidumping definittivi, li ġew imposti preċedentement mill-Kunsill, issa għandhom ikunu imposti mill-Kummissjoni ( 63 ).

128.

F’dan il-każ, il-miżuri neċessarji għall-eżekuzzjoni tas-sentenza appellata jistgħu jiġu adottati biss wara d-data tal-għoti ta’ dik is-sentenza, jiġifieri wara t‑3 ta’ Mejju 2018. Għaldaqstant, huma jistgħu jiġu adottati biss wara d-dħul fis-seħħ, fl‑20 ta’ Frar 2014, tar-Regolament Nru 37/2014 ( 64 ). Minn dan isegwi li l-miżuri neċessarji għall-eżekuzzjoni tas-sentenza appellata għandhom ikunu bbażati fuq l-Artikolu 9(4) tar-Regolament bażiku, kif emendat bir-Regolament Nru 37/2014, kif ukoll fuq l-Artikolu 14(1) tar-Regolament bażiku ( 65 ).

129.

Għaldaqstant, il-Kummissjoni biss tista’ tadotta dawn il-miżuri.

130.

Minn dan nikkonkludi li t-tieni punt tad-dispożittiv tas-sentenza appellata għandu jiġi annullat sa fejn dan iżomm id-dazju antidumping stabbilit mir-Regolament ikkontestat fuq il-prodotti ta’ Ninghai Organic Chemical Factory sakemm il-Kunsill ikun adotta l-miżuri neċessarji għall-eżekuzzjoni ta’ dik is-sentenza. It-tieni punt tad-dispożittiv tas-sentenza appellata madankollu jibqa’ validu sa fejn iżomm dak id-dazju sakemm il-Kummissjoni tkun adottat il-miżuri neċessarji għall-eżekuzzjoni ta’ dik is-sentenza.

131.

Il-kumplament tal-appell inċidentali għandu jiġi miċħud.

132.

Changmao Biochemical Engineering titlob l-annullament tas-sentenza appellata minħabba li l-Qorti Ġenerali żbaljat meta laqgħet il-motiv ibbażat fuq il-ksur tal-Artikolu 11(9) tar-Regolament bażiku.

133.

Permezz tal-aggravju uniku tagħha, Changmao Biochemical Engineering tikkontesta l-punti 132 sa 137 u 139 sa 141 tas-sentenza appellata.

134.

Dan l-aggravju huwa maqsum fi tliet partijiet.

135.

Fil-kuntest tal-ewwel parti tal-aggravju uniku tagħha, Changmao Biochemical Engineering issostni li l-fatt li, fir-Regolament ikkontestat, il-valur normali jiġi stabbilit abbażi tal-ispejjeż ta’ produzzjoni fl-Arġentina, milli abbażi tal-prezzijiet ta’ bejgħ domestiku fl-Arġentina, ma jikkostitwixxix bidla fil-metodoloġija fis-sens tal-Artikolu 11(9) tar-Regolament bażiku u li, fi kwalunkwe każ, kien hemm bidla fiċ-ċirkustanzi. Barra minn hekk, skont Changmao Biochemical Engineering, il-Qorti Ġenerali wettqet żball meta qieset li l-applikazzjoni tal-metodoloġija użata fl-investigazzjoni oriġinali kienet konformi mal-Artikolu 2 tar-Regolament bażiku u għalhekk meta naqset milli tieħu inkunsiderazzjoni d-differenzi fil-proċess ta’ produzzjoni tal-aċidu tartariku fl-Arġentina u fiċ-Ċina.

136.

Fit-tieni u fit-tielet partijiet tal-aggravju uniku tagħha, Changmao Biochemical Engineering issostni, essenzjalment, li l-Qorti Ġenerali żbaljat meta qieset li l-fatt li l-istess valur normali japplika għall-produtturi-esportaturi kollha li ma ngħatawx is-SIES ineħħi kull distinzjoni bejn il-produtturi-esportaturi li kkooperaw u dawk li ma kkooperawx.

137.

Distillerie Bonollo ssostni, l-ewwel nett, li l-appell huwa inammissibbli, it-tieni nett, li l-aggravju uniku huwa inammissibbli u, it-tielet nett, li dan l-aggravju huwa, fi kwalunkwe każ, infondat.

138.

Fl-ewwel lok, Distillerie Bonollo ssostni l-eċċezzjoni tal-Kunsill u tal-Kummissjoni li tallega li l-appell huwa inammissibbli.

139.

Fit-tieni lok, Distillerie Bonollo tallega li l-ewwel, it-tieni u t-tielet partijiet tal-aggravju uniku huma inammissibbli sa fejn parti waħda jew iktar minn dawn il-partijiet, l-ewwel nett, sempliċement jirrepetu l-argumenti ppreżentati quddiem il-Qorti Ġenerali; it-tieni nett, iqajmu kwistjoni ta’ fatt; it-tielet nett, jitolbu lill-Qorti tal-Ġustizzja tiddeċiedi dwar motiv li fuqu l-Qorti Ġenerali ma tatx deċiżjoni; jew, ir-raba’ nett, jikkontestaw motiv sussidjarju fis-sentenza appellata.

140.

Fit-tielet lok, Distillerie Bonollo ssostni li l-aggravju uniku tal-appell huwa, fi kwalunkwe każ, infondat. Hija ssostni li kien hemm bidla fil-metodoloġija fir-Regolament ikkontestat, peress li ma ġietx applikata l-metodoloġija li tinvolvi l-kalkolu tal-valur normali abbażi tal-prezzijiet ta’ bejgħ domestiku fl-Arġentina. Hija ssostni li ma teżisti l-ebda prova ta’ bidla fiċ-ċirkustanzi. Barra minn hekk, kuntrarjament għal dak li ssostni Changmao Biochemical Engineering, il-Qorti Ġenerali ma naqsitx milli tieħu inkunsiderazzjoni d-differenzi fl-ispejjeż ta’ produzzjoni tal-Arġentina u taċ-Ċina. Fir-rigward tal-allegazzjoni ta’ Changmao Biochemical Engineering li l-applikazzjoni tal-istess valur normali tneħħi kull distinzjoni bejn produtturi-esportaturi li kkooperaw u dawk li ma kkooperawx, Distillerie Bonollo tirrileva li l-ebda dispożizzjoni tar-Regolament bażiku ma tipprevedi t-trattament favorevoli għall-produtturi-esportaturi li kkooperaw fir-rigward tal-istabbiliment tal-valur normali.

141.

Il-Kunsill isostni li l-appell huwa inammissibbli. Fil-fatt, is-sentenza appellata ma taffettwax lil Changmao Biochemical Engineering direttament, kif jeżiġi t-tieni paragrafu tal-Artikolu 56 tal-Istatut. Fil-fatt, ir-Regolament ikkontestat diġà ġie annullat, sa fejn japplika għal Changmao Biochemical Engineering, permezz tas-sentenza tal‑1 ta’ Ġunju 2017, Changmao Biochemical Engineering vs Il‑Kunsill (T‑442/12, EU:T:2017:372). Għaldaqstant, kwalunkwe miżuri ta’ eżekuzzjoni tas-sentenza appellata, bħall-kalkolu mill-ġdid tal-valur normali abbażi tal-prezzijiet ta’ bejgħ domestiku fl-Arġentina, jistgħu japplikaw biss għal Ninghai Organic Chemical Factory.

142.

Il-Kummissjoni tallega li l-appell huwa inammissibbli għall-istess raġuni bħal dik invokata mill-Kunsill. Fi kwalunkwe każ, skont il-Kummissjoni, l-appell huwa infondat. Dan huwa minħabba l-fatt li l-formulazzjoni tal-Artikolu 11(9) tar-Regolament bażiku tirreferi għall-metodoloġija użata “fl-investigazzjoni [oriġinali]”, u mhux għall-metodoloġija użata għal kumpannija b’mod partikolari. Din id-dispożizzjoni ma tistax tiġi applikata minn kumpannija għal kumpannija. Barra minn hekk, l-oriġini ta’ din id-dispożizzjoni tiffavorixxi interpretazzjoni wiesgħa tal-obbligu li tiġi applikata l-istess metodoloġija fil-kuntest tal-investigazzjoni ta’ eżami mill-ġdid. Fl-aħħar nett, l-Artikolu 11(9) tar-Regolament bażiku għandu jitqies bħala espressjoni tal-prinċipju ta’ ugwaljanza fit-trattament, li issa huwa stabbilit fl-Artikolu 47 tal-Karta. Minn dan isegwi li, fir-Regolament ikkontestat, il-valur normali għandu jiġi ddeterminat abbażi tal-prezzijiet ta’ bejgħ domestiku għall-produtturi kollha li ma ngħatawx is-SIES, inklużi ż-żewġ produtturi-esportaturi Ċiniżi.

143.

Changmao Biochemical Engineering tqajjem aggravju uniku bbażat fuq il-fatt li l-Qorti Ġenerali wettqet żball ta’ liġi meta ddeċidiet li l-Artikolu 11(9) tar-Regolament bażiku ma jippermettix lill-Kunsill, fil-kuntest ta’ eżami mill-ġdid intermedju, li jikkalkola l-valur normali abbażi tal-ispejjeż ta’ produzzjoni f’pajjiż analogu, jiġifieri l-Arġentina, fejn, waqt l-investigazzjoni oriġinali, il-valur normali ġie ddeterminat abbażi tal-prezzijiet ta’ bejgħ domestiku fl-Arġentina.

144.

Distillerie Bonollo, il-Kunsill u l-Kummissjoni jitolbu li l-appell jiġi miċħud.

145.

Il-Kunsill u l-Kummissjoni jsostnu li l-appell huwa inammissibbli, peress li s-sentenza appellata ma taffettwax lil Changmao Biochemical Engineering direttament, kif jeżiġi t-tieni paragrafu tal-Artikolu 56 tal-Istatut, peress li r-Regolament ikkontestat kien diġà ġie annullat sa fejn dan japplika għal Changmao Biochemical Engineering permezz tas-sentenza tal‑1 ta’ Ġunju 2017, Changmao Biochemical Engineering vs Il‑Kunsill (T‑442/12, EU:T:2017:372). Distillerie Bonollo ssostni l-eċċezzjoni ta’ inammissibbiltà mqajma mill-Kunsill u mill-Kummissjoni, filwaqt li Changmao Biochemical Engineering issostni li l-appell huwa ammissibbli.

146.

Għar-raġunijiet esposti iktar ’il quddiem, jiena nqis li l-appell huwa ammissibbli.

147.

L-appell huwa ppreżentat minn Changmao Biochemical Engineering, li ma kinitx parti, iżda intervenjenti fil-proċedura quddiem il-Qorti Ġenerali ( 66 ).

148.

Skont it-tieni paragrafu tal-Artikolu 56 tal-Istatut, sabiex intervenjent fl-ewwel istanza (minbarra Stat Membru jew istituzzjoni tal-Unjoni) jippreżenta appell kontra sentenza tal-Qorti Ġenerali, dik is-sentenza għandha “[taffettwa] direttament” lil din il-persuna.

149.

Kif jirrilevaw il-Kunsill u l-Kummissjoni, fid-data tal-għoti tas-sentenza appellata, ir-Regolament ikkontestat kien diġà ġie annullat, sa fejn dan kien japplika għal Changmao Biochemical Engineering, permezz tas-sentenza tal‑1 ta’ Ġunju 2017, Changmao Biochemical Engineering vs Il‑Kunsill (T‑442/12, EU:T:2017:372), li issa saret definittiva.

150.

Madankollu, nirrileva li, fis-sentenza appellata, l-annullament tar-Regolament ikkontestat ma għandux portata limitata ( 67 ).

151.

Infakkar ukoll li, skont il-ġurisprudenza, l-istituzzjoni li l-att tagħha jkun ġie ddikjarat null b’sentenza hija obbligata, sabiex tikkonforma ruħha mal-obbligu tagħha, skont l-ewwel paragrafu tal-Artikolu 266 TFUE, li tieħu l-miżuri neċessarji għall-eżekuzzjoni ta’ dik is-sentenza, li tosserva mhux biss id-dispożittiv, iżda wkoll il-motivi li wasslu għas-sentenza u li jikkostitwixxu l-bażi essenzjali tagħha, sa fejn dawn huma neċessarji sabiex jiġi ddeterminat it-tifsira eżatta ta’ dak li ġie deċiż fid-dispożittiv ( 68 ).

152.

Permezz tas-sentenza appellata, ir-Regolament ikkontestat ġie annullat minħabba li, billi inizjalment stabbilixxa l-valur normali għall-produtturi-esportaturi li ma ngħatawx is-SIES abbażi tal-prezzijiet ta’ bejgħ domestiku fl-Arġentina u mbagħad uża valur normali stabbilit li ġie ddeterminat, essenzjalment, abbażi tal-ispejjeż ta’ produzzjoni fl-Arġentina fl-investigazzjoni ta’ eżami mill-ġdid li wasslet għall-adozzjoni tar-Regolament ikkontestat, il-Kunsill kien biddel il-metodoloġija u, għaldaqstant, kiser l-Artikolu 11(9) tar-Regolament bażiku. Konsegwentement, sabiex tikkonforma ruħha mal-obbligu tagħha, previst fl-ewwel paragrafu tal-Artikolu 266 TFUE, li tieħu l-miżuri neċessarji għall-eżekuzzjoni tas-sentenza appellata, il-Kummissjoni għandha tiftaħ il-proċedura mill-ġdid u tikkalkola l-valur normali mill-ġdid abbażi tal-prezzijiet ta’ bejgħ domestiku fl-Arġentina ( 69 ).

153.

Peress li, kif issemma fil-punt 150 iktar ’il fuq, l-annullament tar-Regolament ikkontestat ma għandux portata limitata, il-Kummissjoni għandha, sabiex tikkonforma ruħha mas-sentenza appellata, tikkalkola l-valur normali mill-ġdid abbażi tal-prezzijiet ta’ bejgħ domestiku fl-Arġentina mhux biss għal Ninghai Organic Chemical Factory, iżda wkoll għal Changmao Biochemical Engineering.

154.

B’kuntrast ma’ dan, fis-sentenza tal‑1 ta’ Ġunju 2017, Changmao Biochemical Engineering vs Il‑Kunsill (T‑442/12, EU:T:2017:372), ir-Regolament ikkontestat ġie annullat minħabba li, billi rrifjutaw li jipprovdu informazzjoni lil Changmao Biochemical Engineering dwar il-kalkolu tal-valur normali, il-Kunsill u l-Kummissjoni kienu kisru l-Artikolu 20(2) tar-Regolament bażiku u d-drittijiet tad-difiża. Konsegwentement, sabiex tikkonforma ruħha mal-obbligu tagħha li tieħu l-miżuri neċessarji għall-eżekuzzjoni tal-imsemmija sentenza, il-Kummissjoni għandha tagħti aċċess għal din l-informazzjoni lil Changmao Biochemical Engineering u tippermettilha tippreżenta osservazzjonijiet f’dan ir-rigward.

155.

Għaldaqstant, il-miżuri li għandhom jittieħdu għall-finijiet tal-eżekuzzjoni tas-sentenza appellata huma differenti mill-miżuri neċessarji għall-eżekuzzjoni tas-sentenza tal‑1 ta’ Ġunju 2017, Changmao Biochemical Engineering vs Il‑Kunsill (T‑442/12, EU:T:2017:372).

156.

Minn dan isegwi li Changmao Biochemical Engineering hija direttament affettwata mis-sentenza appellata minħabba d-dmir tal-Kummissjoni, sabiex tikkonforma ruħha ma’ dik is-sentenza, li tiftaħ il-proċedura mill-ġdid u li tikkalkola l-valur normali mill-ġdid abbażi tal-prezzijiet ta’ bejgħ domestiku fl-Arġentina.

157.

Dan huwa konformi mas-sentenza tat‑2 ta’ Ottubru 2003, International Power et vs NALOO (C‑172/01 P, C‑175/01 P, C‑176/01 P u C‑180/01 P, EU:C:2003:534). F’din is-sentenza, il-Qorti tal-Ġustizzja ddeċidiet li s-sentenza tal-Qorti Ġenerali li tannulla d-deċiżjoni li permezz tagħha l-Kummissjoni ċaħdet ilment imressaq kontra tliet impriżi, kienet direttament taffettwa lil dawn it-tliet impriżi. Fil-fatt, “sabiex teżegwixxi s-sentenza appellata, il-Kummissjoni [kienet] obbligata teżamina [l-ilment] mill-ġdid” u “[kien] possibbli li, fi tmiem dan l-eżami, il-Kummissjoni tadotta miżura żvantaġġuża [għat-tliet impriżi], li mbagħad jista’ jwassal li tiġi esposta għal azzjoni għad-danni quddiem il-qrati nazzjonali” ( 70 ).

158.

F’dan il-każ, Changmao Biochemical Engineering tallega li l-kalkolu tal-valur normali abbażi tal-prezzijiet ta’ bejgħ domestiku fl-Arġentina kellu jwassal għall-impożizzjoni ta’ rata ta’ dazju sinjifikattivament ogħla mir-rata ta’ 13.1 % imposta mir-Regolament ikkontestat. L-ebda waħda mill-partijiet l-oħra ma kkontestaw din l-allegazzjoni. Għalhekk, kif kien il-każ fis-sentenza ċċitata fil-punt preċedenti, jeżisti riskju li l-miżuri meħuda mill-Kummissjoni għall-eżekuzzjoni tas-sentenza appellata jkunu żvantaġġużi għal Changmao Biochemical Engineering, u li din tal-aħħar tkun esposta għal azzjonijiet għall-ħlas ta’ tali dazju.

159.

Il-konklużjoni tiegħi fil-punt 156 iktar ’il fuq ma tistax tiġi kkontestata mill-argument ta’ Distillerie Bonollo li Changmao Biochemical Engineering ma hijiex affettwata mis-sentenza appellata, iżda mill-miżuri meħuda għall-finijiet tal-eżekuzzjoni ta’ dik is-sentenza, b’tali mod li huwa biss fil-mument tal-adozzjoni ta’ dawk il-miżuri li Changmao Biochemical Engineering ser tkun direttament affettwata mis-sentenza appellata fis-sens tat-tieni paragrafu tal-Artikolu 56 tal-Istatut.

160.

Fil-fatt, l-ammissibbiltà ta’ appell ippreżentat minn intervenjent fl-ewwel istanza kontra sentenza li tannulla att tal-Unjoni ma hijiex suġġetta għall-kundizzjoni li l-istituzzjoni kompetenti tkun issodisfat l-obbligu tagħha, li jirriżulta mill-Artikolu 266 TFUE, li tieħu l-miżuri neċessarji għall-eżekuzzjoni ta’ dik is-sentenza. Fil-fatt, it-tieni paragrafu tal-Artikolu 56 tal-Istatut ma jinkludix tali kundizzjoni. Din id-dispożizzjoni teżiġi biss li “d-deċiżjoni tal-Qorti Ġenerali” direttament taffettwa lill-intervenjent fl-ewwel istanza. Minn dan isegwi li, sabiex jiġi ddeterminat jekk dan huwiex il-każ, jistgħu jittieħdu inkunsiderazzjoni biss is-sentenza tal-Qorti Ġenerali u l-obbligu tal-istituzzjoni kompetenti, li jirriżulta mis-sentenza li tannulla att tal-Unjoni, li tieħu l-miżuri neċessarji għall-eżekuzzjoni tagħha. Dawn il-miżuri stess ma jistgħux jittieħdu inkunsiderazzjoni, u lanqas ma jista’ jittieħed inkunsiderazzjoni jekk dawn ittiħdux fi żmien xieraq jew jekk dawn implimentawx is-sentenza b’mod korrett jew le.

161.

Ċertament, Changmao Biochemical Engineering tkun f’pożizzjoni li tista’ titlob l-annullament tal-miżuri meħuda sabiex timplimenta s-sentenza appellata. Madankollu, kuntrarjament għal dak li ssostni Distillerie Bonollo, dan ma jagħtix “opportunità doppja” lil Changmao Biochemical Engineering. Fil-fatt, fl-ipoteżi fejn din tal-aħħar tqajjem, insostenn tar-rikors għall-annullament tal-miżuri meħuda sabiex tiġi implimentata s-sentenza appellata, motiv li fuqu l-Qorti Ġenerali tkun diġà ddeċidiet, dan il-motiv ikun inammissibbli peress li dan jippreġudika l-prinċipju ta’ res judicata ( 71 ).

162.

Infakkar ukoll li, meta, bħal f’dan il-każ, l-att tal-Unjoni annullat permezz tas-sentenza tal-Qorti Ġenerali jkun regolament, l-obbligu għall-istituzzjoni kompetenti li tieħu l-miżuri neċessarji għall-eżekuzzjoni ta’ dik is-sentenza jqum biss mid-data taċ-ċaħda tal-appell ( 72 ). Għaldaqstant, jekk jiġi segwit l-approċċ ta’ Distillerie Bonollo, l-ammissibbiltà tal-appell ippreżentat minn intervenjent fl-ewwel istanza tkun tiddependi, f’dak il-każ, mir-rieda tajba tal-istituzzjoni kompetenti li teżegwixxi s-sentenza appellata.

163.

Għaldaqstant, huwa irrilevanti li l-Kummissjoni għadha ma ħaditx il-miżuri neċessarji għall-eżekuzzjoni tas-sentenza appellata, u lanqas tas-sentenza tal‑1 ta’ Ġunju 2017, Changmao Biochemical Engineering vs Il‑Kunsill (T‑442/12, EU:T:2017:372) ( 73 ).

164.

Huwa wkoll irrilevanti l-fatt li, wara eżami mill-ġdid tal-iskadenza tal-miżuri antidumping stabbiliti mir-Regolament Nru 349/2012, il-Kummissjoni adottat, fit‑28 ta’ Ġunju 2018, ir-Regolament ta’ Implimentazzjoni (UE) 2018/921 ( 74 ), li jżomm id-dazju ta’ 10.1 % impost fuq Changmao Biochemical Engineering mir-Regolament Nru 349/2012 ( 75 ).

165.

Minn dan nikkonkludi li l-appell huwa ammissibbli.

166.

L-ewwel nett, l-eċċezzjoni ta’ Distillerie Bonollo bbażata fuq l-inammissibbiltà tal-ewwel, tat-tieni u tat-tielet partijiet tal-aggravju uniku għandha tiġi miċħuda sa fejn dawn sempliċement jirrepetu l-argumenti ppreżentati mill-Kunsill fl-ewwel istanza. Kif issemma fil-punt 63 iktar ’il fuq, il-punti ta’ liġi eżaminati fl-ewwel istanza jistgħu jitqajmu mill-ġdid matul l-appell. Nosserva li l-appell jikkontesta punti speċifiċi tas-sentenza appellata: jiġifieri, fir-rigward tal-argument ibbażat fuq in-nuqqas ta’ bidla fil-metodoloġija, il-punt 132; fir-rigward tal-argument li d-differenzi fil-proċess tal-produzzjoni tal-aċidu tartariku bejn l-Arġentina u ċ-Ċina għandhom jittieħdu inkunsiderazzjoni meta jiġi ddeterminat il-valur normali ġust, il-punti 132 u 135 sa 137; fir-rigward tal-argument ibbażat fuq il-fatt li kien hemm bidla fiċ-ċirkustanzi, il-punt 134; u, fir-rigward tal-argument li, kieku l-metodoloġija applikata fl-investigazzjoni oriġinali kellha tiġi applikata għall-produtturi-esportaturi kollha li ma ngħatawx is-SIES fl-investigazzjoni ta’ eżami mill-ġdid, dan jelimina kull distinzjoni bejn il-produtturi-esportaturi li kkooperaw u dawk li ma kkooperawx, il-punti 139 sa 141.

167.

It-tieni nett, sa fejn in-noti ta’ Distillerie Bonollo għandhom jinftiehmu fis-sens li din tallega li l-argument li teżisti bidla fiċ-ċirkustanzi hija inammissibbli minħabba li din hija kwistjoni ta’ fatt, din l-eċċezzjoni għandha tiġi miċħuda. Il-kwistjoni dwar jekk il-fatt li s-SIES ingħata, u sussegwentement ġie rrifjutat liż-żewġ produtturi-esportaturi Ċiniżi jurix bidla fiċ-ċirkustanzi fis-sens tal-Artikolu 11(9) tar-Regolament bażiku hija, fil-fehma tiegħi, kwistjoni ta’ liġi.

168.

It-tielet nett, għalkemm naqbel ma’ Distillerie Bonollo li motiv ibbażat fuq il-ksur tad-drittijiet tad-difiża huwa inammissibbli, peress li l-Qorti Ġenerali ma ddeċidietx dwar dan il-motiv fis-sentenza appellata, jidhirli li tali aggravju ma tqajjimx fl-appell. L-appell jesponi fil-qosor, bħala introduzzjoni għat-tielet parti tal-aggravju uniku, li l-konstatazzjonijiet tal-Qorti Ġenerali dwar il-valur normali “jikkontradixxu […] ġurisprudenza stabbilita […], li tiżgura l-paraguni ġusti tal-prezzijiet u tirrispetta d-drittijiet tad-difiża tal-esportaturi” ( 76 ). Permezz ta’ dawn il-ftit kliem u fl-assenza ta’ elementi oħra, Changmao Biochemical Engineering ma qajmitx motiv ibbażat fuq il-ksur tad-drittijiet tad-difiża.

169.

Ir-raba’ nett, l-argument li l-Qorti Ġenerali wettqet żball meta ddeċidiet, fil-punt 141 tas-sentenza appellata, li l-istess valur normali jiġi applikat għall-produtturi-esportaturi kollha meta dan huwa ddeterminat abbażi ta’ data relatata ma’ pajjiż analogu ma huwiex, kif issostni Distillerie Bonollo, inammissibbli għar-raġuni li huwa dirett kontra motiv sussidjarju fis-sentenza appellata. Kif tindika Distillerie Bonollo stess, dan huwa ineffettiv ( 77 ).

170.

Minn dan nikkonkludi li l-aggravju uniku huwa għaldaqstant ammissibbli fl-intier tiegħu.

171.

Skont l-Artikolu 11(9) tar-Regolament bażiku, fl-investigazzjonijiet kollha ta’ eżami mill-ġdid fis-sens ta’ dan l-artikolu, il-Kummissjoni għandha tapplika, sa fejn iċ-ċirkustanzi ma jkunux inbidlu, l-istess metodoloġija bħal dik użata fl-investigazzjoni li wasslet għall-impożizzjoni tad-dazju, fid-dawl, inter alia, tal-Artikolu 2 ta’ dak ir-regolament.

172.

Skont il-ġurisprudenza, l-eċċezzjoni li tippermetti lill-istituzzjonijiet japplikaw, matul il-proċedura ta’ eżami mill-ġdid, metodu differenti minn dak użat fl-investigazzjoni oriġinali meta ċ-ċirkustanzi jkunu nbidlu għandha tingħata interpretazzjoni stretta ( 78 ).

173.

F’dan il-każ, fil-kuntest tal-investigazzjoni li wasslet għall-adozzjoni tar-Regolament Nru 130/2006, fir-rigward taż-żewġ produtturi-esportaturi Ċiniżi, li ngħataw is-SIES, il-valur normali ġie stabbilit abbażi tal-prezzijiet reali ta’ bejgħ domestiku tagħhom, skont l-Artikolu 2(1) sa (6) tar-Regolament bażiku ( 79 ), filwaqt li, fir-rigward tal-produtturi-esportaturi li ma ngħatawx is-SIES, il-valur normali ġie kkalkolat abbażi tal-prezzijiet ta’ bejgħ domestiku f’pajjiż analogu, jiġifieri l-Arġentina, skont l-Artikolu 2(7)(a) ta’ dan ir-regolament ( 80 ).

174.

Madankollu, fil-kuntest tal-investigazzjoni li wasslet għall-adozzjoni tar-Regolament ikkontestat, is-SIES ġie rrifjutat liż-żewġ produtturi-esportaturi Ċiniżi. Għaldaqstant, il-valur normali ma setax jibqa’ stabbilit skont l-Artikolu 2(1) sa (6) tar-Regolament bażiku. Huwa ġie kkalkolat, essenzjalment, abbażi tal-ispejjeż ta’ produzzjoni fl-Arġentina, skont l-Artikolu 2(7)(a) ta’ dan ir-regolament ( 81 ).

175.

Permezz tal-aggravju uniku tagħha, Changmao Biochemical Engineering issostni li l-Qorti Ġenerali wettqet żball meta qieset li l-Kunsill kien kiser l-Artikolu 11(9) tar-Regolament bażiku billi uża, fl-investigazzjoni ta’ eżami mill-ġdid, valur normali stabbilit għaż-żewġ produtturi-esportaturi Ċiniżi li kien ibbażat fuq l-ispejjeż ta’ produzzjoni fl-Arġentina, filwaqt li, waqt l-investigazzjoni oriġinali, huwa kien stabbilixxa l-valur normali għall-produtturi-esportaturi li ma ngħatawx is-SIES abbażi tal-prezzijiet ta’ bejgħ domestiku fl-Arġentina.

176.

L-aggravju uniku huwa maqsum fi tliet partijiet. Fl-ewwel parti, Changmao Biochemical Engineering tallega li ma kien hemm l-ebda bidla fil-metodoloġija u li, fi kwalunkwe każ, iċ-ċirkustanzi tal-każ kienu nbidlu, b’tali mod li l-Qorti Ġenerali żbaljat meta kkonstatat ksur tal-Artikolu 11(9) tar-Regolament bażiku.

177.

Fil-fehma tiegħi, l-ewwel parti tal-aggravju uniku għandha tintlaqa’.

178.

Kuntrarjament għal dak li ssostni Changmao Biochemical Engineering ( 82 ), kien hemm bidla fil-metodoloġija fis-sens tal-Artikolu 11(9) tar-Regolament bażiku.

179.

Skont il-ġurisprudenza, ikun hemm bidla fil-metodoloġija fis-sens ta’ din id-dispożizzjoni meta, fl-investigazzjoni oriġinali, il-prezz tal-esportazzjoni jkun ġie stabbilit abbażi tal-prezzijiet ta’ esportazzjoni reali lejn l-Unjoni, konformement mal-Artikolu 2(8) tar-Regolament bażiku, filwaqt li, fl-investigazzjoni ta’ eżami mill-ġdid, il-prezz ta’ esportazzjoni jkun inħadem abbażi tal-prezzijiet ta’ esportazzjoni reali lejn pajjiżi terzi skont l-Artikolu 2(9) ta’ dan ir-regolament ( 83 ). Bl-istess mod, meta, fl-investigazzjoni oriġinali, il-Kunsill bena l-valur normali abbażi tal-prezzijiet ta’ esportazzjoni reali ta’ produttur li jinsab f’pajjiż terz analogu u tal-prezzijiet ta’ bejgħ domestiku ta’ dan il-produttur, filwaqt li, fl-investigazzjoni ta’ eżami mill-ġdid, il-Kunsill stabbilixxa l-valur normali abbażi tal-ispejjeż ta’ produzzjoni tal-istess produttur, kien hemm bidla fil-metodoloġija ( 84 ).

180.

F’dan il-każ, fl-investigazzjoni oriġinali, il-valur normali ġie stabbilit abbażi tal-prezzijiet ta’ bejgħ domestiku fl-Arġentina fir-rigward tal-produtturi-esportaturi li ma ngħatawx is-SIES, filwaqt li, fl-investigazzjoni ta’ eżami mill-ġdid, dan ġie kkalkolat, essenzjalment, abbażi tal-ispejjeż ta’ produzzjoni fl-Arġentina fir-rigward taż-żewġ produtturi-esportaturi Ċiniżi, li ma kinux iktar eliġibbli għas-SIES. Fid-dawl tal-ġurisprudenza msemmija fil-punt preċedenti, jidhirli li din tikkostitwixxi bidla fil-metodoloġija fis-sens tal-Artikolu 11(9) tar-Regolament bażiku.

181.

Barra minn hekk, fil-fehma tiegħi, ma ntweriex li ċ-ċirkustanzi nbidlu.

182.

Diġà ġie deċiż li, b’mod partikolari, impenn ta’ prezz minimu (li kellu l-effett li l-prezzijiet ta’ esportazzjoni reali lejn l-Unjoni ma baqgħux iktar affidabbli u li, fl-investigazzjoni ta’ eżami mill-ġdid, prezz ta’ esportazzjoni stabbilit kellu jiġi kkalkolat abbażi tal-prezzijiet ta’ esportazzjoni lejn pajjiżi terzi) ( 85 ), jew bidla kunsiderevoli fl-ispejjeż tal-produzzjoni tal-prodott ikkonċernat ( 86 ) jikkostitwixxu bidla fiċ-ċirkustanzi fis-sens tal-Artikolu 11(9) tar-Regolament bażiku ( 87 ).

183.

Madankollu, Changmao Biochemical Engineering tillimita ruħha li tikkonstata bidla sinjifikattiva fiċ-ċirkustanzi, li tintwera mill-fatt li l-Kunsill u l-Kummissjoni tawha s-SIES fl-investigazzjoni oriġinali, iżda rrifjutawlha dan l-istatus fl-investigazzjoni ta’ eżami mill-ġdid. Fil-fehma tiegħi, dan ma huwiex biżżejjed sabiex tiġi stabbilita bidla fiċ-ċirkustanzi fis-sens tal-Artikolu 11(9) tar-Regolament bażiku.

184.

B’mod partikolari, nirrileva li, skont il-premessa 27 tar-Regolament ikkontestat, ir-raġuni għalfejn ġie deċiż, fl-investigazzjoni ta’ eżami mill-ġdid, li jintuża valur normali stabbilit ibbażat fuq l-ispejjeż ta’ produzzjoni fl-Arġentina iktar milli bl-użu tal-prezzijiet ta’ bejgħ domestiku fl-Arġentina kienet l-eżistenza ta’ “differenza fil-metodu ta’ produzzjoni bejn l-Arġentina u [ċ-Ċina], li [kellha] impatt sinifikanti fuq il-prezzijiet u l-ispejjeż”. Kif tispjega Changmao Biochemical Engineering, filwaqt li fl-Arġentina, l-aċidu tartariku huwa prodott minn prodotti sekondarji tal-produzzjoni tal-inbid, fiċ-Ċina, dan huwa prodott permezz ta’ sinteżi kimika. Madankollu, mir-Regolament Nru 349/2012 jirriżulta li d-differenzi bejn il-proċess ta’ produzzjoni u l-ispejjeż tal-produzzjoni tal-aċidu tartariku kienu diġà jeżistu meta kienet qiegħda ssir l-investigazzjoni oriġinali ( 88 ). Ma ġiex allegat quddiem il-Qorti Ġenerali li seħħet bidla fl-ispejjeż tal-produzzjoni tal-aċidu tartariku fl-Arġentina u/jew fiċ-Ċina bejn il-perijodu ta’ investigazzjoni oriġinali u l-perijodu ta’ eżami mill-ġdid intermedju. Fil-fehma tiegħi, minn dan isegwi li ma ntweriex li ċ-ċirkustanzi nbidlu fis-sens tal-Artikolu 11(9) tar-Regolament bażiku.

185.

Madankollu, jidhirli li l-Qorti Ġenerali ma pprovdietx motivazzjoni adegwata u suffiċjenti sabiex tqis, fil-punti 135 sa 137 tas-sentenza appellata, li l-applikazzjoni tal-metodoloġija użata fl-investigazzjoni oriġinali ma tmurx kontra l-Artikolu 2 tar-Regolament bażiku.

186.

Nosserva li l-Artikolu 11(9) tar-Regolament bażiku jeżiġi li l-Kummissjoni tapplika, fl-investigazzjonijiet ta’ eżami mill-ġdid kollha, l-istess metodoloġija bħal dik fl-investigazzjoni oriġinali, “waqt li tingħata l-attenzjoni dovuta għall-Artikolu 2, u b’mod partikolari għall-paragrafi 11 u 12 tiegħu, u għall-Artikolu 17”.

187.

Nirrileva li, meta, bħal f’dan il-każ hawnhekk, ma tkun seħħet l-ebda bidla fiċ-ċirkustanzi, ma huwiex suffiċjenti, sabiex tiġi ġġustifikata bidla fil-metodoloġija, li l-metodoloġija l-ġdida tkun iktar xierqa mill-ewwel waħda ( 89 ). Fl-assenza ta’ bidla fiċ-ċirkustanzi, bidla fil-metodoloġija hija ġġustifikata biss jekk il-metodoloġija preċedenti tmur kontra l-Artikoli 2 jew 17 tar-Regolament bażiku.

188.

Fil-fatt, mill-formulazzjoni tal-Artikolu 11(9) ta’ dan ir-regolament u mill-ġurisprudenza ċċitata fil-punt 172 iktar ’il fuq jirriżulta li r-regola ġenerali hija li l-metodoloġija użata fl-investigazzjoni oriġinali għandha tiġi applikata fl-investigazzjoni ta’ eżami mill-ġdid, u li l-użu ta’ metodoloġija differenti fl-investigazzjoni ta’ eżami mill-ġdid huwa l-eċċezzjoni. Jekk wieħed iqis li metodoloġija ġdida tista’, fl-assenza ta’ bidla fiċ-ċirkustanzi, tiġi applikata fil-proċedura ta’ eżami mill-ġdid anki jekk il-metodoloġija preċedenti ma tkunx tqieset li tmur kontra l-Artikoli 2 jew 17 tar-Regolament bażiku, l-eċċezzjoni ssir ir-regola.

189.

Għaldaqstant, għandu jiġi ddeterminat jekk l-applikazzjoni, fl-investigazzjoni ta’ eżami mill-ġdid, tal-metodoloġija użata fl-investigazzjoni oriġinali tmurx kontra l-Artikolu 2 tar-Regolament bażiku.

190.

Skont il-ġurisprudenza, huwa l-Kunsill li għandu juri li l-metodoloġija użata fl-investigazzjoni oriġinali ma kinitx konformi mal-Artikolu 2 tar-Regolament bażiku ( 90 ).

191.

Quddiem il-Qorti Ġenerali, il-Kunsill sostna li, fid-dawl tad-differenzi fil-proċess tal-produzzjoni tal-aċidu tartariku fl-Arġentina u fiċ-Ċina ( 91 ), huwa ma setax japplika, fl-investigazzjoni ta’ eżami mill-ġdid, il-metodoloġija użata fl-investigazzjoni oriġinali mingħajr ma jikser l-Artikolu 2(10) tar-Regolament bażiku, li jeżiġi li l-paragun bejn il-valur normali u l-prezz ta’ esportazzjoni jkun ġust. Il-Kunsill sostniet li l-paragun bejn, minn naħa, il-valur normali kkalkolat bl-użu tal-prezzijiet ta’ bejgħ domestiku fl-Arġentina, u għalhekk ibbażat fuq data relatata mal-proċess ta’ produzzjoni naturali, u, min-naħa l-oħra, il-prezzijiet ta’ esportazzjoni reali taż-żewġ produtturi-esportaturi Ċiniżi, u għalhekk relatati mal-proċess ta’ produzzjoni sintetika, kien ikun inġust.

192.

Fil-punti 135 sa 137 tas-sentenza appellata, il-Qorti Ġenerali ċaħdet l-argument tal-Kunsill li l-applikazzjoni tal-metodoloġija użata fl-investigazzjoni oriġinali ma kinitx tippermetti paragun ġust bejn il-valur normali u l-prezzijiet ta’ esportazzjoni għar-raġuni li, minn naħa, fil-każ li dan il-paragun ikun inġust, dan kellu jwassal ukoll lill-Kunsill u lill-Kummissjoni li jemendaw id-dazju antidumping applikabbli għall-produtturi-esportaturi l-oħra, ħaġa li huma ma għamlux, u, min-naħa l-oħra, l-aċidu tartariku prodotta permezz ta’ sinteżi kimika għandha “l-istess karatteristiċi u huwa intiż għall-istess użi bażiċi” bħal dak prodott minn prodotti sekondarji tal-produzzjoni tal-inbid.

193.

Jidhirli li l-Qorti Ġenerali ma setgħetx tikkonkludi li l-applikazzjoni tal-metodoloġija użata fl-investigazzjoni oriġinali “ma [t]idhirx li [hija] kuntrarj[a] għall-Artikolu 2 tar-Regolament bażiku” ( 92 ) billi tibbaża ruħha biss fuq dawn il-motivi.

194.

L-ewwel nett, il-fatt li l-Kunsill ma emendax id-dazju impost fuq il-produtturi-esportaturi l-oħra li ma ngħatawx is-SIES ma jurix li l-metodoloġija użata fl-investigazzjoni oriġinali ma hijiex kuntrarju għall-Artikolu 2 tar-Regolament bażiku. Dan jista’ jissuġġerixxi wkoll li l-Kunsill kiser din id-dispożizzjoni billi ma emendax id-dazju impost fuq il-produtturi-esportaturi l-oħra li ma ngħatawx is-SIES. L-ebda konklużjoni ma tista’ tinsilet mill-aġir tal-Kunsill fir-rigward tal-legalità tal-metodoloġija preċedenti jew tal-metodoloġija l-ġdida.

195.

It-tieni nett, jidhirli li, sabiex jiġi kkonstatat li l-applikazzjoni tal-metodoloġija użata fl-investigazzjoni oriġinali ma kinitx tmur kontra l-Artikolu 2 tar-Regolament bażiku, il-Qorti Ġenerali ma setgħetx sempliċement tikkonstata li l-aċidu tartariku prodott permezz ta’ sinteżi kimika għandu “l-istess karatteristiċi u huwa intiż għall-istess użi bażiċi” bħal dak prodott minn prodotti sekondarji tal-produzzjoni tal-inbid. Dan huwa minħabba l-fatt li d-differenzi fil-proċess ta’ produzzjoni ta’ aċidu tartariku fl-Arġentina u fiċ-Ċina, li fuqhom ibbaża ruħu l-Kunsill meta sostna li l-applikazzjoni tal-metodoloġija preċedenti ma tkunx konformi mal-Artikolu 2(10) tar-Regolament bażiku, għandhom, skont il-premessa 27 tar-Regolament ikkontestat ( 93 ), “impatt sinifikanti fuq il-prezzijiet u l-ispejjeż”.

196.

Barra minn hekk, nirrileva li d-differenzi fil-proċess ta’ produzzjoni huma r-raġuni għaliex, fir-Regolament ikkontestat, tbidlet il-metodoloġija u l-valur normali ġie kkalkolat, fir-rigward tal-produtturi-esportaturi li ma ngħatawx is-SIES, mhux abbażi tal-prezzijiet ta’ bejgħ domestiku fl-Arġentina, iżda bl-użu tal-ispejjeż ta’ produzzjoni fl-Arġentina ( 94 ). Għaldaqstant, jidhirli li, sa fejn il-Kunsill jibbaża ruħu fuq id-differenzi fil-proċess ta’ produzzjoni sabiex juri li l-applikazzjoni tal-metodoloġija preċedenti fl-investigazzjoni ta’ eżami mill-ġdid kienet tkun illegali, il-Qorti Ġenerali kellha teżamina mhux biss jekk dawn id-differenzi kinux jirrendu l-paragun bejn il-valur normali u l-prezzijiet ta’ esportazzjoni inġust, iżda wkoll jekk dawn id-differenzi kinux jipprekludu l-prezzijiet ta’ bejgħ domestiku fl-Arġentina milli jintużaw għall-kalkolu tal-valur normali. Huwa biss fil-każ li l-Qorti Ġenerali tikkonstata li, minkejja d-differenzi fil-proċess ta’ produzzjoni, il-prezzijiet ta’ bejgħ domestiku fl-Arġentina setgħu jintużaw għall-kalkolu tal-valur normali li hija setgħet tikkonkludi li l-applikazzjoni tal-metodoloġija preċedenti ma kinitx tmur kontra l-Artikolu 2 tar-Regolament bażiku u li, konsegwentement, il-Kunsill ma setax japplika metodoloġija ġdida fir-Regolament ikkontestat.

197.

Huwa minnu li l-Kunsill, li għandu l-oneru li juri l-illegalità tal-applikazzjoni tal-metodoloġija preċedenti, allega biss quddiem il-Qorti Ġenerali li d-differenzi fil-proċess ta’ produzzjoni ma jippermettux li jsir il-paragun xieraq meħtieġ mill-Artikolu 2(10) tar-Regolament bażiku; huwa ma allegax li dawn id-differenzi kienu jipprekludu l-użu tal-prezzijiet ta’ bejgħ domestiku fl-Arġentina meta jiġi kkalkolat il-valur normali. Madankollu, jidhirli li ż-żewġ kwistjonijiet huma marbuta, kif turi l-premessa 42 tar-Regolament ikkontestat, li tgħid li “[l]i kieku sar l-istess kalkolu billi ntużaw il-prezzijiet tal-bejgħ domestiku fl-Arġentina u mbagħad jiġi aġġustat il-valur normali u/jew il-prezz tal-esportazzjoni skont l-Artikolu 2(10) tar-Regolament bażiku ma kienx ikun hemm paragun ġust” ( 95 ).

198.

Minn dan isegwi li l-Qorti Ġenerali ma pprovdietx motivazzjoni adegwata u suffiċjenti sabiex tqis, fil-punt 137 tas-sentenza appellata, li l-applikazzjoni tal-metodoloġija użata fl-investigazzjoni oriġinali ma kinitx tmur kontra l-Artikolu 2 tar-Regolament bażiku.

199.

Kif issostni l-Kummissjoni, ma jistax jiġi kkonstatat li l-Artikolu 11(9) tar-Regolament bażiku għandu jiġi interpretat fis-sens li r-rekwiżit li għandha tiġi applikata l-istess metodoloġija fl-investigazzjoni oriġinali u f’dik ta’ eżami mill-ġdid ma jirreferix għall-metodoloġija applikata fil-proċedura oriġinali fl-intier tagħha, iżda għall-metodoloġija użata, fil-proċedura oriġinali, għal kull produttur-esportatur.

200.

Kieku dan kien il-każ, fl-investigazzjoni ta’ eżami mill-ġdid, il-valur normali kien ikollu jiġi stabbilit, fir-rigward taż-żewġ produtturi-esportaturi Ċiniżi, abbażi tal-prezzijiet reali ta’ bejgħ domestiku tagħhom ( 96 ). Madankollu, dan kien imur kontra l-Artikolu 2(7)(a) tar-Regolament bażiku, peress li, skont l-investigazzjoni ta’ eżami mill-ġdid, iż-żewġ produtturi-esportaturi Ċiniżi ma humiex iktar eliġibbli għas-SIES. Għalhekk, il-Kunsill jista’ japplika metodoloġija ġdida mingħajr ma jikser l-Artikolu 11(9) tar-Regolament bażiku ( 97 ).

201.

Madankollu, l-Artikolu 11(9) tar-Regolament bażiku ma jistax, fl-opinjoni tiegħi, jiġi interpretat fis-sens li r-rekwiżit li għandha tiġi applikata, fl-investigazzjoni ta’ eżami mill-ġdid, il-metodoloġija applikata fl-investigazzjoni oriġinali jirreferi għall-metodoloġija użata għal kull produttur-esportatur. L-ewwel nett, il-formulazzjoni ta’ din id-dispożizzjoni tmur kontra din l-interpretazzjoni, peress li hija timponi l-applikazzjoni tal-istess metodoloġija li ntużat “fl-investigazzjoni li wasslet għad-dazju”. Bħala definizzjoni, investigazzjoni tikkonċerna l-produtturi-esportaturi kollha tal-prodott ikkonċernat. Ma hemm xejn li jindika, fil-formulazzjoni tal-Artikolu 11(9) tar-Regolament bażiku, li għandha tittieħed inkunsiderazzjoni s-sitwazzjoni individwali tal-produtturi-esportaturi. It-tieni nett, għalkemm, sabiex “tiġi żgurata koerenza orizzontali ikbar”, il-Kummissjoni pproponiet li l-Artikolu 11(9) tar-Regolament bażiku jitħassar, minħabba, inter alia, il-fatt li “xi kultant dan wassal għall-użu kontinwu ta’ metodoloġiji ċarament skaduti” ( 98 ), din id-dispożizzjoni ma ġietx imħassra. Dan jissuġġerixxi interpretazzjoni wiesgħa tar-regola stabbilita fl-Artikolu 11(9) tar-Regolament bażiku. Din ir-regola għalhekk tapplika għall-metodoloġija użata fl-investigazzjoni fl-intier tagħha, u mhux għall-metodoloġija użata għal kull produttur-esportatur.

202.

Minn dan isegwi li l-ewwel parti tal-aggravju uniku għandha tintlaqa’, u s-sentenza appellata għandha tiġi annullata.

203.

Madankollu, sabiex inkun eżawrjenti, ser neżamina t-tieni u t-tielet parti tal-aggravju uniku fil-qosor.

204.

Permezz tat-tieni u tat-tielet partijiet tal-aggravju uniku tagħha, Changmao Biochemical Engineering issostni li l-Qorti Ġenerali qieset b’mod żbaljat, fil-punti 139 sa 141 tas-sentenza appellata, li l-fatt li l-istess valur normali japplika għall-produtturi-esportaturi kollha li ma ngħatawx is-SIES ineħħi kull distinzjoni bejn il-produtturi-esportaturi li kkooperaw u dawk li ma kkooperawx.

205.

Fil-fehma tiegħi, it-tieni u t-tielet partijiet tal-aggravju uniku ma jistgħux jintlaqgħu.

206.

Fil-punti 139 sa 141 tas-sentenza appellata, il-Qorti Ġenerali ċaħdet l-argument tal-Kunsill li, kieku l-valur normali kellu jiġi kkalkolat abbażi tal-prezzijiet ta’ bejgħ domestiku fl-Arġentina fir-rigward, minn naħa, taż-żewġ produtturi-esportaturi Ċiniżi, li kkooperaw, u, min-naħa l-oħra, tal-produtturi-esportaturi l-oħra, li ma kkooperawx, dan kien ineħħi kull distinzjoni bejn il-produtturi-esportaturi li kkooperaw u dawk li ma kkooperawx. Skont il-Qorti Ġenerali, din id-distinzjoni xorta tibqa’ teżisti, peress li l-produtturi-esportaturi li kkooperaw jistgħu jingħataw trattament individwali skont l-Artikolu 9(5) tar-Regolament bażiku, filwaqt li l-produtturi-esportaturi li ma kkooperawx ma jistgħux jingħataw tali trattament.

207.

Huwa ineffettiv l-argument ta’ Changmao Biochemical Engineering li fir-rigward tal-kalkolu tal-valur normali, il-fatt li produtturi-esportaturi li kkooperaw jistgħu, kuntrarjament għall-produtturi-esportaturi li ma kkooperawx, jingħataw trattament individwali ma jippermettix li ssir distinzjoni bejn il-produtturi-esportaturi li kkooperaw u dawk li ma kkooperawx. Huwa minnu li, meta produttur-esportatur jibbenefika minn trattament individwali skont l-Artikolu 9(5) tar-Regolament bażiku, il-valur normali nazzjonali applikabbli għall-produtturi-esportaturi kollha li ma ngħatawx is-SIES japplika, minkejja li marġni antidumping individwali tiġi kkalkolata abbażi tal-prezzijiet ta’ esportazzjoni reali ta’ dan il-produttur-esportatur. Madankollu, il-kwistjoni ineżami fil-punti 139 sa 141 tas-sentenza appellata ma hijiex dwar jekk japplikax l-istess valur normali għall-produtturi-esportaturi kollha li ma ngħatawx is-SIES, irrispettivament minn jekk ikkooperawx jew le. Fil-fatt, dan il-valur japplika, u dan huwa rrikonoxxut mill-Qorti Ġenerali. Il-kwistjoni hija dwar jekk, minkejja li japplika l-istess valur normali, it-trattament individwali jippermettix madankollu li ssir distinzjoni bejn il-produtturi-esportaturi li kkooperaw u dawk li ma kkooperawx.

208.

Sa fejn Changmao Biochemical Engineering issostni li l-istess valur normali ma japplikax għall-produtturi-esportaturi kollha li kkooperaw li ma ngħatawx is-SIES meta jkollhom proċessi u spejjeż ta’ produzzjoni differenti, dan l-argument huwa wkoll ineffettiv, għall-istess raġuni.

209.

Minn dan nikkonkludi li l-ewwel parti tal-aggravju uniku għandha tintlaqa’. Għaldaqstant, is-sentenza appellata għandha tiġi annullata għal din ir-raġuni.

210.

Ma naħsibx li l-Qorti tal-Ġustizzja hija f’pożizzjoni li tiddeċiedi l-kawża definittivament skont l-Artikolu 61 tal-Istatut. Fil-fatt, is-soluzzjoni tat-tilwima timplika evalwazzjoni ġdida taċ-ċirkustanzi tal-każ, fid-dawl tal-kunsiderazzjonijiet esposti fil-punti 185 sa 198 iktar ’il fuq, li hija evalwazzjoni li l-Qorti Ġenerali tinsab f’pożizzjoni aħjar sabiex twettaq.

211.

Għaldaqstant, din il-kawża għandha tintbagħat lura quddiem il-Qorti Ġenerali sabiex din teżamina jekk l-applikazzjoni, fl-investigazzjoni ta’ eżami mill-ġdid, tal-metodoloġija użata fl-investigazzjoni oriġinali tmurx kontra l-Artikolu 2 tar-Regolament bażiku. Sussegwentement, jekk hija tikkonstata li dan kien il-każ u li, konsegwentement, il-Kunsill seta’ japplika metodoloġija ġdida fl-investigazzjoni ta’ eżami mill-ġdid mingħajr ma jikser l-Artikolu 11(9) ta’ dak ir-regolament, il-Qorti Ġenerali jkollha teżamina l-motivi l-oħra mqajma quddiemha.

212.

Peress li l-proposta tiegħi hija li l-kawża tintbagħat lura quddiem il-Qorti Ġenerali, l-ispejjeż marbuta mal-appell prinċipali jkollhom jiġu rriżervati.

213.

Madankollu, il-Qorti tal-Ġustizzja jkollha tiddeċiedi fuq l-ispejjeż relatati mal-appell inċidentali.

214.

Skont l-Artikolu 138(3) tar-Regoli tal-Proċedura, li japplika għall-proċedura ta’ appell abbażi tal-Artikolu 184(1) tal-imsemmija regoli, jekk il-partijiet jitilfu rispettivament fuq waħda jew iktar mit-talbiet tagħhom, kull parti għandha tbati l-ispejjeż rispettivi tagħha. Madankollu, jekk fid-dawl taċ-ċirkustanzi tal-kawża jkun jidher ġustifikat, il-Qorti tal-Ġustizzja tista’ tiddeċiedi li waħda mill-partijiet għandha, minbarra l-ispejjeż tagħha, tbati parti mill-ispejjeż tal-parti l-oħra.

215.

F’dan il-każ, il-Kummissjoni tilfet sa fejn hija talbet lill-Qorti tal-Ġustizzja tannulla s-sentenza appellata minħabba li l-Qorti Ġenerali qieset b’mod żbaljat li Distillerie Bonollo kienet direttament ikkonċernata mir-Regolament ikkontestat, iżda rebħet il-kawża sa fejn hija talbet lill-Qorti tal-Ġustizzja tannulla t-tieni punt tad-dispożittiv tas-sentenza appellata sa fejn dan jipprevedi l-possibbiltà għall-Kunsill li jieħu l-miżuri neċessarji għall-eżekuzzjoni ta’ dik is-sentenza. Peress li Distillerie Bonollo talbet f’dan is-sens, hemm lok li l-Kummissjoni tiġi kkundannata tbati, minbarra l-ispejjeż tagħha, 80 % tal-ispejjeż sostnuti minn Distillerie Bonollo, filwaqt li hemm lok li Distillerie Bonollo tiġi kkundannata tbati 20 % tal-ispejjeż tagħha.

216.

Konformement mal-Artikolu 140(1) tar-Regoli tal-Proċedura, li huwa wkoll applikabbli għall-proċedura tal-appell bis-saħħa tal-Artikolu 184(1) tagħhom, hemm lok li l-Kunsill, li intervjena fil-proċedura dwar l-appell inċidentali, ibati l-ispejjeż rispettivi tiegħu relatati mal-appell inċidentali.

217.

Skont l-Artikolu 184(4) tar-Regoli tal-Proċedura, meta intervenjent fl-ewwel istanza jieħu sehem fil-proċedura tal-appell, il-Qorti tal-Ġustizzja tista’ tiddeċiedi li dan ibati l-ispejjeż rispettivi tiegħu. Peress li Changmao Biochemical Engineering ipparteċipat fl-appell inċidentali, hija għandha tbati l-ispejjeż rispettivi tagħha relatati mal-appell inċidentali.

218.

Għaldaqstant, nipproponi li l-Qorti tal-Ġustizzja għandha: