Talba għal deċiżjoni preliminari mressqa mit-Tribunalul Specializat Mureș (ir-Rumanija) fil-21 ta’ Ottubru 2016 – Michael Tibor Bachman vs FAER IFN SA

(Kawża C-535/16)

(2017/C 038/09)

Lingwa tal-kawża: ir-Rumen

Qorti tar-rinviju

Tribunalul Specializat Mureș

Partijiet fil-kawża prinċipali

Rikorrent: Michael Tibor Bachman

Konvenuta: FAER IFN SA

Domanda preliminari

L-Artikolu 2[(b)] tad-Direttiva 93/13/KEE (1), li jiddefinixxi l-kunċett ta “konsumatur”, għandu jiġi interpretat fis-sens li jinkludi wkoll persuna fiżika li, wara novazzjoni, impenjat ruħha fil-konfront ta’ stabbiliment ta’ kreditu li tirrimborsa krediti inizjalment mogħtija lil kumpannija għall-finijiet tal-attività tagħha, jiġifieri investimenti fl-attività tat-trasport ta’ merkanzija bit-triq, meta l-persuna fiżika inkwistjoni ma għandhiex rabta manifesta ma’ din il-kumpannija, iżda aġixxiet b’dan il-mod għal finijiet li ma jaqgħux fl-ambitu tal-attività professjonali tagħha, minħabba r-rabtiet tagħha mal-persuna li kienet tikkontrolla l-kumpannija li bbenefikat mill-krediti inizjali kif ukoll mal-persuni li ffirmaw kuntratti anċillari għall-kuntratti ta’ kreditu inizjali (kuntratti ta’ garanzija jew ta’ garanzija immobiljari/ipoteka)?

(1)  Direttiva tal-Kunsill 93/13 KEE, tal-5 ta’ April 1993, dwar klawżoli inġusti f’kuntratti mal-konsumatur (ĠU Edizzjoni Speċjali bil-Malti, Kapitolu 15, Vol. 2, p. 288).