Appell ippreżentat fil-5 ta’ Diċembru 2014 minn Dansk Automat Brancheforening mis-sentenza mogħtija mill-Qorti Ġenerali (Il-Ħames Awla) fis-26 ta’ Settembru 2014 fil-Kawża T-601/11, Dansk Automat Brancheforening vs Il-Kummissjoni Ewropea

(Kawża C-563/14 P)

(2015/C 046/38)

Lingwa tal-kawża: id-Daniż

Partijiet

Appellanti: Dansk Automat Brancheforening (rappreżentanti: K. Dyekjær, T. Høg u J. Flodgaard, avukati)

Partijiet oħra fil-proċedura: Il-Kummissjoni Ewropea, Ir-Renju tad-Danimarka, Ir-Repubblika ta’ Malta, Betfair Group plc, Betfair International Ltd, European Gaming and Betting Association (EGBA)

Talbiet tal-appellanti

Aggravji u argumenti prinċipali

Prinċipalment, huwa sostnut li meta ċaħdet ir-rikors tal-appellanti bħala inammissibbli, il-Qorti Ġenerali interpretat u/jew applikat b’mod ħażin il-kundizzjonijiet stabbiliti mir-raba’ paragrafu tal-Artikolu 263 TFUE fir-rigward ta’ deċiżjoni tal-Kummissjoni adottata fuq il-bażi tal-Artikolu 107(3)(c) TFUE.

B’mod partikolari, il-Qorti Ġenerali applikat b’mod ħażin il-kunċett ta’ “individwalment ikkonċernat” tar-raba’ paragrafu tal-Artikolu 263 TFUE, fis-sens li ma ġiex interpretat skont il-ġurisprudenza tal-Qorti tal-Ġustizzja u li għalhekk ġie applikat ħażin. F’dan ir-rigward, il-Qorti Ġenerali: (1) b’mod żbaljat ikkunsidrat li l-mekkaniżmu li jaffettwa l-membri tal-appellanti jaffettwa wkoll lil terzi, u għalhekk jeskludi li dawn il-membri jistgħu jkunu individwalment ikkonċernati; (2) b’mod żbaljat ikkonstata li l-membri inkwistjoni kienu biss sostnew li dawn kienu f’kompetizzjoni mal-benefiċjarji tal-miżura ta’ għajnuna; (3) naqas milli jieħu inkunsiderazzjoni d-data speċifika mressqa mill-appellanti li l-miżura ta’ għajnuna x’aktarx illi inevitabbilment ikollha effetti negattivi sinjifikattivi fuq is-sitwazzjoni tal-appellanti fis-suq; (4) kif ukoll, li minbarra l-ilment imsemmi fil-punt (1), li hija b’mod żbaljat ma ħaditx inkunsiderazzjoni l-fatt li l-effetti negattivi sinjifikattivi tal-mekkaniżmu mhux se jaffettwaw lill-operaturi bl-istess mod. Barra minn hekk, il-Qorti Ġenerali: (5) żbaljat meta kkunsidrat li l-appellanti kellhom jikkonstataw tnaqqis fid-dħul mill-bejgħ tagħhom sabiex ikollhom locus standi; (6.) ċaħdet l-effetti negattivi stabbiliti minħabba fi kwistjonijiet oħra li kellhom effetti negattivi mhux speċifikati; (7) ma ħaditx inkunsiderazzjoni l-fatt li l-kundizzjonijiet sabiex tippreżenta rikors għandhom ikunu iktar flessibbli, peress li d-deċiżjoni tal-Kummissjoni li tawtorizza l-miżura ta’ għajnuna, skont l-Artikolu 107(3)(c) TFUE, ma kienx suġġett għal eżami amministrattiv ta’ veru minn qabel.

Barra minn hekk, il-Qorti Ġenerali: (8) applikat ħażin il-kunċett ta’ “att regolatorju li ma jinvolvix miżuri ta’ implementazzjoni” peress li kkonstatat b’mod żbaljat li d-deċiżjoni kkontestata teħtieġ miżuri ta’ implimentazzjoni, u (9) wettqet żball meta laqgħat it-talba tal-intervenjenti dwar l-ispejjeż.