28.4.2014   

MT

Il-Ġurnal Uffiċjali tal-Unjoni Ewropea

C 129/14

—

tannulla s-sentenza tal-Qorti Ġenerali tal-Unjoni Ewropea T-116/11 mogħtija fil-11 ta’ Diċembru 2013 u tirreferi l-kawża lura lill-Qorti Ġenerali.

—

tikkundanna lill-Kummissjoni għall-ispejjeż.

L-ewwel aggravju. Interpretazzjoni żbaljata tal-klawżoli kuntrattwali u tad-dispożizzjonijiet legali u evalwazzjoni manifestament żbaljata tal-mezzi ta’ prova.

L-EMA tqis li s-sentenza hija vvizzjata b’interpretazzjoni żbaljata tal-klawżoli kuntrattwali u tad-dispożizzjonijiet legali applikabbli kif ukoll b’evalwazzjoni manifestament żbaljata tal-mezzi ta’ prova billi qieset li l-Kummissjoni kienet korrettament iddeduċiet li l-ispejjeż iffatturati, iżda li għadhom ma tħallsux, ma kinux ġew sostnuti mill-EMA u lanqas irreġistrati fil-kontijiet tal-istess appellanti sad-data tat-tħejjija taċ-ċertifikat ta’ awditu skont ir-regoli tal-kontabbiltà Belġjani.

It-tieni aggravju. Evalwazzjoni manifestament żbaljata tal-provi u nuqqas ta’ motivazzjoni.

L-EMA tqis li diversi kapijiet tas-sentenza huma vvizzjati b’difetti proċedurali gravi inkwantu dawn ma humiex motivati jew motivati b’mod insuffiċjenti jew kontradittorju. Barra minn hekk, il-Qorti Ġenerali għamlet diversi ommissjonijiet jew żbalji manifesti fl-evalwazzjoni tal-mezzi ta’ prova prodotti fis-sentenza. Mis-sentenza jirriżulta li l-Qorti Ġenerali ta’ spiss naqset milli tagħmel evalwazzjoni tagħha stess dwar il-provi prodotti mill-EMA, billi naqset, fil-fatt, milli tiddeċiedi dwar il-konklużjonijiet esposti mill-appellanti fir-rikors u fir-risposta. F’ħafna punti l-Qorti Ġenerali bbażat ruħha b’mod inkundizzjonali fuq il-konklużjonijiet tar-rapport finali ta’ awditu, imwettaq f’isem il-Kummissjoni fir-rigward tal-kuntratti Cocoon u Dicoems, meta proprju dawn il-konklużjonijiet kienu jikkostitwixxu s-suġġett tal-ilmenti tal-EMA fir-rikors prinċipali tagħha.

It-tielet aggravju. Applikazzjoni żbaljata tal-prinċipju ta’ bona fide u ta’ kollaborazzjoni leali fl-eżekuzzjoni tal-kuntratt.

L-EMA tqis li l-Qorti Ġenerali wettqet evalwazzjoni żbaljata tad-dritt Belġjan b’riferiment għall-applikazzjoni tal-prinċipju ta’ bona fide u ta’ kollaborazzjoni leali fl-eżekuzzjoni tal-kuntratt. Fit-twettiq tal-Proġetti Dicoems u Cocoon, il-Kummissjoni naqset milli twettaq l-obbligi ta’ kontroll tagħha stabbiliti fl-Artikolu 11.3.4 tal-kundizzjonijiet ġenerali tal-kuntratti, li jsemmi speċifikament l-obbligu tal-Kummissjoni li tiżgura l-eżekuzzjoni korretta tal-proġett mill-perspettiva xjentifika, teknoloġika u finanzjarja. Il-Qorti Ġenerali qieset b’mod żbaljat li l-Kummissjoni ma kinitx kisret id-dmir ta’ kontroll tagħha, lanqas ebda dispożizzjoni kuntrattwali speċifika u li hija kienet għalhekk ġustament ipproċediet għar-rexissjoni immedjata taż-żewġ kuntratti dwar il-Proġetti Dicoems u Cocoon, filwaqt li ċaħdet ukoll it-talba għall-kumpens tad-dannu ex contractu.

Ir-raba’ aggravju. Ksur tal-prinċipji tad-dritt Komunitarju.

L-EMA tinvoka diversi istanzi ta’ ksur tad-dritt Komunitarju mwettqa mill-Qorti Ġenerali, relatati, b’mod partikolari, mal-applikazzjoni żbaljata tal-prinċipji ta’ proporzjonalità u ta’ nondiskriminazzjoni, kif ukoll tad-drittijiet tad-difiża tal-appellanti.