1. 

Għal darb’oħra l-Qorti tal-Ġustizzja qed tintalab tieħu deċiżjoni dwar ir-regoli għad-determinazzjoni tal-leġiżlazzjoni applikabbli li jinsabu fir-Regolament Nru 1408/71 ( 2 ). F’dan il-każ, fil-kuntest ta’ kawża fejn tiġi indirizzata wkoll il-kwistjoni tan-natura ġuridika tal-blata kontinentali u t-tifsira u l-portata tal-estensjoni funzjonali tas-sovranità tal-Istati Membri fuq dak l-ispazju. Fi kwalunkwe każ, l-interess reali ta’ din il-kawża jinsab fid-diffikultà evidenti li d-dispożizzjonijiet ta’ dak ir-regolament jiġu applikati għal stat ta’ fatt li, fl-opinjoni tal-partijiet, jippermetti biss soluzzjoni bbażata fuq analoġija. Kif se nipprova nuri, ir-Regolament stess, madankollu, fih ir-risposta.

2.

Il-Konvenzjoni tan-Nazzjonijiet Uniti dwar il-Liġi tal-Baħar, iffirmata f’Montego Bay (il-Ġamajka) fl-10 ta’ Diċembru 1982, li daħlet fis-seħħ fis-16 ta’ Novembru 1994, ġiet irrattifikata mir-Renju tal-Pajjiżi l-Baxxi fit-28 ta’ Ġunju 1996 u ġiet approvata f’isem il-Komunità Ewropea permezz tad-Deċiżjoni tal-Kunsill 98/392/KE tat-23 ta’ Marzu 1998 ( 3 ).

3.

L-Artikolu 60 tagħha, intitolat “Gżejjer artifiċjali, stallazzjonijiet u strutturi fiż-żona ekonomika esklussiva”, jipprovdi li:

“1.   Fiż-żona ekonomika esklussiva, l-Istat kostali għandu jkollu d-dritt esklussiv li jibni u li jawtorizza u jirregola l-kostruzzjoni, l-oprazzjoni u l-użu ta’:

2.   L-Istat kostali għandu jkollu l-ġurisdizzjoni esklussiva fuq dawk il-gżejjer artifiċjali, stallazzjonijiet u strutturi, inkluża l-ġurisdizzjoni fir-rigward tal-liġijiet u r-regolament doganali, fiskali, tas-saħħa, tas-sigurtà u ta’ l-immigrazzjoni.

[…]”

4.

Taħt it-titolu “Id-drittijiet ta’ l-Istat kostali fuq is-sikka [blata] kontinentali”, l-Artikolu 77 tal-Konvenzjoni jipprovdi dan li ġej:

“1.   L-Istat kostali jeżerċita fuq is-sikka [blata] kontinentali drittijiet sovrani għall-iskop ta’ l-esplorazzjoni tagħha u ta’ l-esplojtazzjoni tar-riżorsi naturali tagħha.

2.   Id-drittijiet msemmija fil-paragrafu 1 huma esklussivi fis-sens li jekk Stat kostali ma jesplorax is-sikka kontinentali jew ma jutilizzax ir-riżorsi tagħha, ħadd ma jkun jista jidħol għal dawn l-attivitajiet mingħajr il-kunsens espliċitu ta’ l-Istat kostali.

3.   Id-drittijiet ta’ l-Istat kostali fuq is-sikka kontinentali ma jiddependux mill-okkupazzjoni, effettiva jew mistħajjla, jew fuq xi proklama espressa.

[…]”

5.

L-Artikolu 79 tal-Konvenzjoni, intitolat “Fili u pajpijiet sottomarini fuq is-sikka [blata] kontinentali” jistabbilixxi kif ġej:

“1.   L-Istati kollha huma ntitolati li jqiegħdu fili u pajpijiet sottomarini fuq is-sikka [blata] kontinentali, b’konformità mad-disposizzjonijiet ta’ dan l-Artikolu.

2.   Bla ħsara għad-dritt li jieħdu miżuri raġjonevoli għall-esplorazzjoni tas-sikka kontinentali, l-esplojtazzjoni tar-riżorsi naturali tagħha u tal-prevenzjoni, t-tnaqqis u l-kontroll tat-tniġġiż minn pajpijiet, l-Istat kostali ma jistax jimpedixxi it-tqegħid jew il-manteniment ta’ fili jew pajpijiet bħal dawk.

3   Il-delineazzjoni tal-korsa għat-tqegħid ta’ pajpijiet bħal dawk fuq is-sikka kontinentali hija suġġetta għall-kunsens ta’ l-Istat kostali.

4.   Xejn f’din il-parti ma jaffettwa d-dritt ta’ l-Istat kostali li jistabbilixxi kondizzjonijiet dwar il-fili u l-pajpijiet li jidħlu fit-territorju jew fl-ibħra territorjali tiegħu, jew tal-ġurisdizzjoni tiegħu fuq il-fili u l-pajpijiet kostruwiti jew użati b’konnessjoni ma l-esplorazzjoni tas-sikka kontinentali jew l-esplorazzjoni tar-riżorsi tagħha jew ta’ l-operazzjonijiet ta’ gżejjer artifiċjali, stallazzjonijiet u strutturi taħt il-ġurisdizzjoni tiegħu.

[…]”

6.

Skont l-Artikolu 80 (“Gżejjer artifiċjali, stallazzjonijiet u strutturi fis-sikka [blata] kontinentali”), “[l]-Artikolu 60 japplika mutatis mutandis għal gżejjer artifiċjali, stallazzjonijiet u strutturi fis-sikka [blata] kontinentali.”

7.

Il-premessi tar-Regolament Nru 1048/71 li huma ta’ interess, għal dan il-każ huma dawn li ġejjin:

“Billi d-dispożizzjonijiet għall-koordinament tal-leġislazzjonijiet tas-sigurtà soċjali nazzjonali jaqgħu fl-ambitu tal-libertà tal-moviment għall-ħaddiema li huma ċittadini ta’ l-Istati Membri u għandhom jikkontribwixxu għat-titjib fil-livell tal-għixien u tal-kondizzjonijiet ta’ l-impjieg;

[…]

Billi d-differenzi konsiderevoli li jeżistu bejn il-leġislazzjonijiet nazzjonali dwar il-persuni li għalihom japplikaw jagħmluha preferibbli li jistabbilixxu l-prinċipju li r-Regolament japplika għall-persuni kollha assigurati taħt l-iskemi tas-sigurtà soċjali għall-persuni impjegati u għal dawk li jaħdmu għal rashom jew permezz tat-tfittxija ta’ l-impjieg jew ta’ l-impjieg għal rashom;

Billi huwa meħtieġ li jkunu rispettati l-karatteristiċi speċjali tal-leġislazzjonijiet tas-sigurtà soċjali nazzjonali u biex titwaqqaf biss sistema ta’ koordinazzjoni;

[…]

Billi l-persuni impjegati u dawk impjegati għal rashom li qegħdin jiċċaqilqu fil‑Komunità għandhom ikunu suġġetti għall-iskema tas‑sigurtà soċjali ta’ Stat Membru wieħed biss biex ikun evitat t-taħwid fil-leġislazzjonijiet nazzjonali applikabbli u l-kumplikazzjonijiet li jirriżultaw minħabba f’hekk;

[…]

Billi minħabba l-garanzija ta’ l-ugwaljanza fit-trattament tal-ħaddiema kollha okkupati fit-territorju ta’ l-Istat Membru jkun effettiv kemm jista’ jkun, huwa sewwa li tkun determinata bħala l-leġislazzjoni applikabbli, bħala regola ġenerali, dik ta’ l-Istat Membru li fih il-persuna kkonċernata tfittex impjieg jew impjieg għal rasha;

Billi f’ċerti sitwazzjonijiet li jiġġustifikaw kriterja oħra ta’ applikabbiltà, huwa possibbli li tidderoga mir-regola ġenerali;

[…]”

8.

L-Artikolu 1 tar-Regolament Nru 1408/71, intitolat “Definizzjonijiet”, jgħid kif ġej:

“Għall-iskop ta’ dan ir-Regolament:

[…]”

9.

Taħt it-titolu “Il-persuni koperti” l-Artikolu 2 jistipula fil-paragrafu 1 tiegħu li:

“Dan ir-Regolament għandu japplika għall-ħaddiema li huma jew kienu soġġetti għall-leġislazzjoni ta’ Stat Membru wieħed jew iktar u li huma ċ-ċittadini nazzjonali ta’ wieħed mill-Istati Membri jew li huma persuni mingħajr Stat jew rifuġjati li jirrisjedu ġewwa t-territorju ta’ wieħed mill-Istati Membri, kif ukoll għall-membri tal-familja tagħhom u s-superstiti tagħhom.”

10.

It-Titolu II tar-Regolament, intitolat “Determinazzjoni tal-leġislazzjoni applikabbli”, jibda bl-Artikolu 13 (“Regoli Ġenerali”), li jipprovdi kif ġej:

“1.   Bla ħsara għall-Artikoli 14ċ u 14f, persuni li għalihom japplika dan ir-Regolament għandhom ikunu soġġetti għall-liġijiet ta’ Stat Membru wieħed biss. Dawk il-liġijiet għandhom jiġu stabbiliti skond id-dispożizzjonijiet ta’ dan it-Titolu.

2.   Suġġetti [Bla ħsara] għall-Artikoli 14 sa 17:

11.

L-Artikolu 14 tar-Regolament Nru 1408/71 (intitolat “Regoli speċjali applikabbli għall-persuni, minbarra l-baħrin, ingaġġati fi mpieg imħallas”) jistipula kif ġej:

“L-Artikolu 13(2)(a) japplika suġġett għall-eċċezzjonijiet u ċ-ċirkustanzi li ġejjin:

[…]

12.

Skont l-Artikolu 14b (“Applikazzjoni ta’ regoli speċjali għan-nies tal-baħar”):

“L-Artikolu 13(2)(ċ) jkun japplika suġġett għall-eċċezzjonijiet u ċirkustanzi segwenti:

[…]

13.

L-Artikolu 15 tar-Regololament (“Regoli li jikkonċernaw s-sigurtà voluntarja jew is-sigurtà b’għażla kontinwata”) jinqara kif ġej:

“1.   L-Artikoli 13 sa 14d ma japplikawx għas-sigurtà voluntarja jew għas-sigurtà b’għażla kontinwata kemm-il darba, fejn tidħol waħda mill-friegħi li għalihom saret riferenza fl-Artikolu 4, teżisti f’xi Stat Membru skema ta’ sigurtà voluntarja biss.

2.   Fejn l-applikazzjoni tal-leġislazzjonijiet ta’ tnejn jew iktar Stati Membri tinvolvi aktar minn assigurazzjoni waħda:

[…]”

14.

Skont l-Artikolu 8 tal-Ftehim KE-Svizzera:

“Il-partijiet kontraenti għandhom jipprovdu, b’mod konformi mal-Anness II, għall-koordinament tas-sistemi ta’ sigurtà soċjali bil-għan partikolari li jiżguraw:

15.

L-Anness II tal-Ftehim KE-Svizzera, l-Artikolu 1:

“1.   Il-partijiet kontraenti jaqblu, fir-rigward tal-koordinazzjoni tal-iskemi tas-sigurtà soċjali, li japplikaw bejniethom l-atti legali tal-Unjoni Ewropea li għalihom qiegħda ssir referenza u kif emendati, bis-Sezzjoni A ta’ dan l-Anness, jew ir-regoli ekwivalenti għal dawn l-atti.

2.   It-terminu ‘Stat(i) Membru/i’ inkluż fl-atti legali msemmija fis-sezzjoni A ta’ dan l-Anness għandu jinftiehem li jinkludi lill-Isvizzera flimkien mal-Istati koperti mill-atti legali rilevanti tal-Unjoni Ewropea.”

16.

Is-Sezzjoni A tal-imsemmi Anness II tirreferi għar-Regolament Nru 1408/71, li ġie ssostitwit bir-Regolament [KE] Nru 883/2004 ( 5 ), applikabbli mill-1 ta’ Mejju 2010. L-Anness II nnifsu tal-Ftehim KE-Svizzera ġie aġġornat bid-Deċiżjoni Nru 1/2012 tal-Kumitat Konġunt stabbilit taħt dan il-Ftehim ( 6 ), b’effett mill-1 ta’ April 2012. Il-verżjoni l-ġdida tal-Anness II tirreferi għar-Regolament Nru 883/2004. Madankollu, skont l-Artikolu 90(1) tar-Regolament 883/2004, u l-Anness II, Sezzjoni A, il-paragrafu 3, tal-Ftehim KE-Svizzera, kif emendat, l-avvenimenti qabel l-1 ta’ April 2012, huma rregolati mir-Regolament Nru 1408/71.

17.

Skont id-digriet tar-rinviju ta’ din it-talba għal deċiżjoni preliminari, b’mod konformi mal-leġiżlazzjoni tal-Pajjiżi l-Baxxi dwar is-sigurtà soċjali, ir-regola ġenerali hija li r-residenti tal-Pajjiżi l-Baxxi huma assigurati b’mod obbligatorju u għandhom iħallsu l-kontribuzzjonijiet għall-assigurazzjonijiet previsti mil-liġi. B’eċċezzjoni għal dan u skont l-Artikolu 12(1) tal-Besluit uitbreiding en beperking kring verzekerden volksverzekeringen 1999 (Digriet li jestendi u jillimita l-grupp ta’ persuni affiljati mas-sigurtà soċjali tal-1999), persuna li tgħix fil-Pajjiżi l-Baxxi ma għandhiex tkun affiljata mas-sigurtà soċjali jekk taħdem esklużivament barra mill-Pajjiżi l-Baxxi għal perijodu kontinwu ta’ mill-inqas tliet xhur, sakemm dan ix-xogħol ma jitwettaqx abbażi ta’ relazzjoni ta’ servizz ma’ persuna li timpjega residenti jew domiċiljat fil-Pajjiżi l-Baxxi.

18.

Skont il-Besluit verzekeringsplicht zeevarenden (Digriet dwar l-obbligu ta’ affiljazzjoni tal-baħħara), meta baħri li jirrisjedi fi Stat Membru jaħdem fuq vapur li jtajjar il-bandiera ta’ Stat terz li ma huwiex Stat li huwa parti mill-Ftehim dwar iż-Żona Ekonomika Ewropea għal persuna li timpjega stabbilita fil-Pajjiżi l-Baxxi, tapplika l-liġi tal-Pajjiżi l-Baxxi dwar l-assigurazzjonijiet soċjali tal-impjegati.

19.

It-talba għal deċiżjoni preliminari tirrigwarda kawża bejn is-sigurtà soċjali tal-Pajjiżi l-Baxxi u L. Kik, ċittadin Olandiż residenti fil-Pajjiżi l-Baxxi, impjegat ma’ impriża Svizzera fuq bastiment li jinstalla l-pajpijiet li, taħt il-bandiera tal-Panama, ħadem sal-31 ta’ Mejju 2004 fit-territorju tal-Pajjiżi l-Baxxi (affiljat b’mod obbligatorju mas-sigurtà soċjali tal-Pajjiżi l-Baxxi) u bejn l-1 ta’ Ġunju u l-24 ta’ Awwissu 2004 għamel dan b’mod konsekuttiv fuq il-blata kontinentali tal-Istati Uniti, f’ibħra internazzjonali u fuq il-parti tal-blata kontinentali tal-Pajjiżi l-Baxxi, tar-Renju Unit u mill-ġdid tal-Pajjiżi l-Baxxi.

20.

Il-kwistjoni diskussa fil-kawża a quo hija jekk L. Kik kienx obbligat jew le li jikkontribwixxi għas-sigurtà soċjali tal-Pajjiżi l-Baxxi matul il-perijodu bejn l-1 ta’ Ġunju u l-24 ta’ Awwissu 2004.

21.

Il-qrati nazzjonali kienu tal-opinjoni (fl-ewwel istanza u fl-appell) li r-risposta għandha tkun fl-affermattiv, peress li l-Liġi nazzjonali tipprovdi li r-residenti tal-Pajjiżi l-Baxxi huma assigurati b’mod obbligatorju u għandhom iħallsu l-kontribuzzjonijiet meħtieġa.

22.

L. Kik ressaq appell ta’ kassazzjoni quddiem il-Hoge Raad der Nederlanden, li hija l-Qorti li qed tressaq din it-talba għal deċiżjoni preliminari.

23.

It-talba għal deċiżjoni preliminari, imressqa fil-15 ta’ Mejju 2013, hija kif ġej:

24.

Fil-proċedura dehru, billi ppreżentaw osservazzjonijiet bil-miktub, L. Kik, il-Gvern tal-Pajjiżi l-Baxxi u l-Kummissjoni. Kollha kemm huma dehru fis-seduta pubblika, li nżammet fit-3 ta’ Lulju 2014, fejn ġew mistiedna mill-Qorti tal-Ġustizzja biex jiffokaw l-argumenti tagħhom fuq it-tieni domanda magħmula mill-Hoge Raad.

25.

Il-partijiet kollha jaqblu fuq il-konstatazzjoni li r-Regolament Nru 1408/71 japplika fiċ-ċirkustanzi tal-każ. B’mod partikolari, il-Gvern tal-Pajjiżi l-Baxxi jikkunsidra li r-regolament inkwistjoni japplika għall-perijodu ta’ żmien ikkonċernat kollu.

26.

L. Kik u l-Kummissjoni jemmnu li, fiċ-ċirkustanzi ta’ dan il-każ, u skont il-ġurisprudenza stabbilita fil-kawża Aldewereld ( 7 ), il-ġurisdizzjoni hija tal-Istat ta’ stabbiliment tal-persuna li timpjega, jiġifieri tal-Konfederazzjoni Svizzera.

27.

Il-Gvern tal-Pajjiżi l-Baxxi jikkunsidra li, skont l-Artikoli 13(2)(f), u 14(2)(b)(i) tar-Regolament Nru 1408/71, l-Istat li għandu l-ġurisdizzjoni huwa dak tar-residenza tal-impjegat.

28.

Il-Hoge Raad tistaqsi lill-Qorti tal-Ġustizzja jekk ir-Regolament Nru 1408/71 japplikax fiċ-ċirkustanzi tal-każ ippreżentat fil-kawża prinċipali u, jekk iva, liema hija l-leġiżlazzjoni nazzjonali li jirreferu għaliha r-regoli ta’ kunflitt ta’ dan ir-regolament, fejn kemm fl-opinjoni tagħha kif ukoll skont l-opinjoni tal-partijiet, dawn ir-regoli ma jkoprux b’mod speċifiku sitwazzjoni bħal dik inkwistjoni f’dan il-każ.

29.

Għall-formulazzjoni korretta ta’ din il-kwistjoni, għandu jiġi stabbilit b’mod preċiż liema huma eżattament iċ-ċirkustanzi tal-każ.

30.

L. Kik huwa Olandiż u jgħix fil-Pajjiżi l-Baxxi. Sal-31 ta’ Mejju 2004 huwa ħadem għal impriża stabbilita fil-Pajjiżi l-Baxxi u kien assigurat b’mod obbligatorju f’dan l-Istat Membru.

31.

Mill-1 ta’ Ġunju 2004 huwa impjegat bħala baħħar minn kumpannija Svizzera u jaħdem fuq bastiment li jtajjar bandiera tal-Panama. Ma jidhirx li minn dan il-mument kien assigurat fl-Isvizzera, iżda li mill-25 ta’ Awwissu 2004 ma baqax ikun assigurat b’mod obbligatorju fil-Pajjiżi l-Baxxi, peress li, skont il-liġi tal-Pajjiżi l-Baxxi, l-obbligu li jkun assigurat fil-pajjiż jispiċċa ladarba jkun ħadem kontinwament għal mill-inqas tliet xhur barra mill-Pajjiżi l-Baxxi u ma’ persuna li timpjega li ma tkunx residenti fil-Pajjiżi l-Baxxi. Barra minn hekk, L. Kik ġie intaxxat għall-ħin kollu li kien fil-Pajjiżi l-Baxxi.

32.

Il-perijodu diskuss huwa bejn l-1 ta’ Ġunju u l-24 ta’ Awwissu 2004. Matul dan iż-żmien, L. Kik ħadem: a) tliet ġimgħat fuq il-blata kontinentali tal-Istati Uniti; b) ġimagħtejn fl-ibħra internazzjonali; c) xahar u ġimgħa fuq il-blata kontinentali tal-Pajjiżi l-Baxxi; d) ġimgħa fuq il-blata kontinentali tar-Renju Unit.

33.

Għalhekk, mit-total tat-tliet xhur inkwistjoni, L. Kik ħadem xahar u ġimgħa fuq il-blata kontinentali tal-Pajjiżi l-Baxxi. Ġimgħa minnhom għamilha fuq il-blata kontinentali tar-Renju Unit, b’tali mod li, mit-tliet xhur li huma ta’ interess hawnhekk, ħadem ħames ġimgħat f’territorju kompletament barra mill-Unjoni (l-ibħra internazzjonali u l-blata kontinentali ta’ Stat terz). Fi kliem ieħor, għal iktar minn nofs il-perijodu kkontestat huwa ħadem fuq il-blata kontinentali ta’ Stat Membru ( 8 ).

34.

Il-qorti tar-rinviju tistaqsi, l-ewwel nett, jekk ir-Regolament Nru 1408/71 japplikax għaċ-ċirkustanzi ta’ dan il-każ u, jekk iva, jekk dan japplikax biss matul il-jiem meta L. Kik ħadem fuq il-blata kontinentali ta’ Stat Membru jew jekk japplikax ukoll meta ħadem barra mit-territorju tal-Unjoni.

35.

Fil-fehma tiegħi, u bi qbil mal-fehmiet tal-partijiet kollha, ma hemmx dubju dwar l-applikabbiltà tar-Regolament Nru 1408/71, billi l-Artikolu 2(1) tiegħu jipprovdi li “għandu japplika għall-ħaddiema li huma jew kienu soġġetti għall-leġislazzjoni ta’ Stat Membru wieħed jew iktar u li huma ċ-ċittadini nazzjonali ta’ wieħed mill-Istati Membri”. F’dan il-każ, L. Kik kien suġġett għas-sistema ġenerali tas-sigurtà soċjali tal-Pajjiżi l-Baxxi sal-25 ta’ Awwissu 2004, fejn jitqajjem dubju dwar jekk mill-1 ta’ Ġunju preċedenti kellux ikun attwalment suġġett għal-leġiżlazzjoni ta’ Stat Membru ieħor jew ekwivalenti, u dan jeħtieġ li jsir riferiment għar-regoli tal-kunflitt tal-Artikolu 13 tar-Regolament Nru 1408/71 biex jiġi ddeterminat liema hija l-liġi nazzjonali applikabbli.

36.

Fl-opinjoni tiegħi ma tinħoloq l-ebda diffikultà dwar il-kwistjoni ta’ jekk ix-xogħol magħmul minn L. Kik fuq il-blata kontinentali maġenb il-Pajjiżi l-Baxxi u r-Renju Unit għandux jiġi kkunsidrat bħala li twettaq fit-territorju tal-Unjoni. Skont il-ġurisprudenza stabbilita mill-Qorti tal-Ġustizzja fis-sentenza tas-17 ta’ Jannar 2012, Salemink ( 9 ), ix-xogħol magħmul fuq il-blata kontinentali maġenb Stat Membru jagħmel parti funzjonalment mit-territorju sovran tiegħu u, għalhekk, ma tistax tiġi evitata l-applikazzjoni tad-dritt tal-Unjoni. Madankollu, il-Qorti tal-Ġustizzja ddeċidiet li dan kien il-każ f’relazzjoni ma’ attività tax-xogħol imwettaq “fuq l-imsemmija sikka [blata] kontinentali, fil-kuntest tal-attivitajiet ta’ esplorazzjoni u/jew sfruttament tar-riżorsi naturali [tagħhom]” ( 10 ). F’dan il-każ, L. Kik ħadem fuq bastiment li jqiegħed il-pajpijiet fuq il-blata kontinentali maġenb it-territorju tal-Unjoni, jiġifieri, wettaq attività li, bħala prinċipju, ma tistax titqies bħala “esplorazzjoni u/jew sfruttament tar-riżorsi naturali [...] tas-sikka [blata] kontinentali”.

37.

Ċertament, il-blata kontinentali tkompli tkun suġġetta għas-sovranità tal-Stat li jinstab maġenbha meta fuqha jitqiegħdu fili u pajpijiet sottomarini, barra minn hekk, skont l-Artikolu 79(3) tal-Konvenzjoni dwar il-Liġi tal-Baħar “[i]l-delineazzjoni tal-korsa għat-tqegħid ta’ pajpijiet bħal dawk fuq il-blata kontinentali hija suġġetta għall-kunsens ta’ l-Istat kostali”, bla ħsara, skont il-paragrafu 4 tal-istess Artikolu kemm għad-“dritt ta’ l-Istat kostali li jistabbilixxi kondizzjonijiet dwar il-fili u l-pajpijiet li jidħlu fit-territorju jew fl-ibħra territorjali tiegħu” kif ukoll għall-“ġurisdizzjoni tiegħu fuq il-fili u l-pajpijiet kostruwiti jew użati b’konnessjoni ma l-esplorazzjoni tas-sikka [blata] kontinentali jew l-esplorazzjoni tar-riżorsi tagħha jew ta’ l-operazzjonijiet ta’ gżejjer artifiċjali, stallazzjonijiet u strutturi taħt il-ġurisdizzjoni tiegħu.”

38.

Din it-traċċa, jekk wieħed irid isejħilha hekk, minima ta’ poter sovran garantit mill-Konvenzjoni dwar il-Liġi tal-Baħar tista’, prima facie, tkun biżżejjed sabiex jiġi kkunsidrat li anki f’dan il-każ il-blata kontinentali hija, funzjonali u b’mod ristrett, territorju tal-Unjoni. Madankollu, fis-sentenza Salemink ġiet stabbilita relazzjoni ta’ neċessità bejn il-profitt ta’ “prerogattivi ekonomiċi ta’ esplorazzjoni u/jew sfruttament tar-riżorsi eżerċitati fuq il-parti tas-sikka [blata] kontinentali li tinsab maġenbu [Stat Membru]” u l-impossibbiltà li tiġi evitata “l-applikazzjoni tad-dispożizzjonijiet tad-dritt tal-Unjoni intiżi sabiex jiggarantixxu l-moviment liberu tal-ħaddiema li jeżerċitaw l-attività professjonali tagħhom fuq tali installazzjonijiet” ( 11 ). Għalhekk, jidher ċar li l-“funzjonalità” tas-sovranità tal-Istat Membru kostali fuq il-blata kontinentali tapplika biss meta din tal-aħħar tkun is-suġġett ta’ attività ta’ esplorazzjoni u/jew sfruttament li għaliha jkun meħtieġ l-l-użu ta’ ħaddiema, u mhux, għall-kuntrarju, meta din il-blata tkun biss l-ispazju li fuqha ssir attività separata mill-esplorazzjoni u/jew l-isfruttament tagħha, u li fir-rigward tagħha huwa l-Istat kostali biss li għandu fakultà ta’ kunsens u li l-eżerċizzju tagħha ma jeħtieġ ebda attività ta’ xogħol.

39.

Dak li ntqal iktar ’il fuq, madankollu, ma huwiex rilevanti għall-każ inkwistjoni, u għaldaqstant nemmen li r-Regolament Nru 1408/71 japplika anke fil-każ li jiġi kkunsidrat li L. Kik ħadem il-ħin kollu, matul il-perijodu inkwistjoni, barra mit-territorju tal-Unjoni.

40.

Fil-fatt, u skont ġurisprudenza stabbilita, din iċ-ċirkustanza ma hijiex rilevanti jekk ir-relazzjoni tax-xogħol ikollha rabta suffiċjentement stretta mat-territorju ta’ Stat Membru ( 12 ). Il-Qorti tal-Ġustizzja kienet tal-fehma li, fil-każ ta’ ħaddiem li jaħdem fuq bastiment, rabta ta’ dan it-tip tista’ tirriżulta mill-post fejn l-impjegat ikun ġie ingaġġat, mil-liġi applikabbli għall-kuntratt tal-impjieg, mill-affiljazjoni għal sistema ta’ sigurtà soċjali u mill-post tat-tassazzjoni tas-salarji tiegħu ( 13 ). F’dan il-każ, fil-fehma tiegħi, hemm rabta suffiċjentement stretta mat-territorju tal-Unjoni peress li L. Kik jiġi intaxxat fil-Pajjiżi l-Baxxi u, skont l-osservazzjonijiet tal-Gvern tal-Pajjiżi l-Baxxi ( 14 ), jirċievi l-paga tiegħu fil-Pajjiżi l-Baxxi u fl-Isvizzera, u għalhekk jista’ jiġi preżunt – peress li L. Kik ma pproduċiex provi li jistgħu jwasslu għal konklużjoni differenti – li l-leġiżlazzjoni applikabbli għall-kuntratt ta’ impjieg hija dik ta’ wieħed minn dawk l-Istati.

41.

Konsegwentement, u bħala l-ewwel konklużjoni intermedja, nipproponi li r-risposta tal-Qorti tal-Ġustizja għall-ewwel waħda mid-domandi preliminari magħmula mill-Hoge Raad tkun fis-sens li, fiċ-ċirkustanzi tal-każ, ir-Regolament Nru 1408/71 huwa applikabbli għall-perijodu kollu inkwistjoni, jiġifieri bejn l-1 ta’ Ġunju u l-24 ta’ Awwissu 2004.

42.

Dan premess, issa għandu jiġi ddeterminat liema, skont ir-Regolament Nru 1408/71, għandha tkun il-liġi li tapplika għal impjegat fiċ-ċirkustanzi ta’ L. Kik matul il-perijodu inkwistjoni fil-kawża prinċipali.

43.

Id-diffikultà ta’ din it-talba hija bbażata fuq il-fatt li ma jidhirx li r-Regolament Nru 1408/71 jinkludi fost ir-regoli tal-kunflitt tiegħu regola li tapplika speċifikament għal sitwazzjoni bħal dik f’din il-kawża. Għalhekk, għandna nivverifikaw l-eżattezza ta’ din l-ewwel impressjoni.

44.

Fost il-ħafna każijiet previsti fit-Titolu II (“Determinazzjoni tal-leġislazzjoni applikabbli”; l-Artikoli 13 sa 17a) tar-Regolament Nru 1408/71 hawnhekk jinteressawna biss dawk li jinsabu fl-Artikolu 13 (“Regoli Ġenerali”) u fl-Artikolu 14b (“Applikazzjoni ta’ regoli speċjali għan-nies tal-baħar”). ( 15 ) Minn dawn kollha, fl-opinjoni tiegħi, dawn li ġejjin ma humiex relatati maċ-ċirkustanzi ta’ L. Kik:

45.

Minħabba l-impossibilità li jintużaw is-soluzzjonijiet previsti fil-każijiet esposti iktar ’il fuq, tista’ tiġi kkunsidrata l-opportunità li jintużaw, b’analoġija, id-dispożizzjonijiet tal-Artikolu 14 ta’ dak ir-regolament. Fil-fatt, il-Gvern tal-Pajjiżi l-Baxxi jissuġġerixxi li jiġi applikat b’analoġija l-Artikolu 14(2)(b), li jirrigwarda l-każ fejn persuna impjegata li normalment teżerċita attività fit-territorju ta’ żewġ Stati Membri jew iktar u li ma tkunx parti minn “personnel” vjaġġanti jew tat-titjir ta’ impriża li twettaq trasport internazzjonali.

46.

L-użu tal-analoġija jkun, ovvjament, soluzzjoni leġittima fil-każ fejn ir-regoli li japplikaw immedjatament għal dawk li jaħdmu fuq il-baħar, bħal L. Kik, ma jippermettux li tiġi ddeterminata l-leġiżlazzjoni applikabbli għal każ inkwistjoni.

47.

Madankollu, dispożizzjoni li hija parti mir-Regolament, u li għaliha jagħmel riferiment f’mument partikolari l-Gvern tal-Pajjiżi l-Baxxi, tneħħi n-neċessità li jsir sforz biex tinstab soluzzjoni f’termini ta’ analoġija. Dan huwa, fil-fatt, l-Artikolu 13(2)(f) tar-Regolament Nru 1408/71 li jgħid li “persuna li għaliha tispiċċa li tkun valida il-leġislazzjoni ta’ Stat Membru, mingħajr ma ssir applikabbli għaliha leġislazzjoni ta’ Stat ieħor skond waħda mir-regoli stipulata fis-sottoparagrafi li għaddew [...] tkun suġġetta għal-leġislazzjoni ta’ l-Istat Membru li fit-territorju tiegħu tkun tabita skond id-dispożizzjonijiet ta’ dik il-leġislazzjoni biss”. L-applikazzjoni ta’ din id-dispożizzjoni għal dan il-każ tqajmet waqt is-seduta u, fl-opinjoni tiegħi, taqbel eżattament mal-każ ta’ L. Kik.

48.

Fil-fatt, skont dak li ġie stabbilit u li huwa paċifiku bejn il-partijiet, L. Kik kien suġġett għal-leġiżlazzjoni tal-Pajjiżi l-Baxxi sal-31 ta’ Mejju 2004. Minn dik id-data, dik il-leġiżlazzjoni ma baqgħetx tapplika, bħala prinċipju, peress li ebda waħda mir-regoli stabbiliti fir-Regolament Nru 1408/71 u diskussi hawn fuq ma twassal għall-applikazzjoni tal-liġi tal-Pajjiżi l-Baxxi. Madankollu, dawk ir-regoli lanqas ma jiddeterminaw l-applikazzjoni tal-liġi ta’ Stat Membru ieħor, peress li ċ-ċirkustanzi tal-impjieg ta’ L. Kik ma jaqblu mal-ebda wieħed minn dawk il-każijiet.

49.

F’sitwazzjoni bħal din, jiġifieri, in-nuqqas ta’ applikazzjoni tal-liġi li sa issa dejjem ġiet applikata u n-nuqqas ta’ applikabbiltà ta’ xi liġi oħra – eżattament il-każ tal-fatt imsemmi fl-Artikolu 13(2)(f) –, ir-Regolament Nru 1408/71, b’mod ġenerali, juża l-kriterju tar-residenza tal-impjegat biex jiddetermina l-leġiżlazzjoni applikabbli. Skont dan il-kriterju, L. Kik, residenti fil-Pajjiżi l-Baxxi, għandu jkun suġġett għal-leġiżlazzjoni ta’ dak l-Istat Membru.

50.

Ċertament, il-bidu tar-regola (“persuna li għaliha tispiċċa li tkun valida il-leġislazzjoni ta’ Stat Membru[...]”) intuwittivament jissuġġerixxi li r-riżultat diffiċilment jista’ jkun l-applikabbiltà tal-leġiżlazzjoni li preċiżament ma għadhiex applikabbli. Fi kliem ieħor, jekk il-leġiżlazzjoni tal-Pajjiżi l-Baxxi ma baqgħetx valida għall-każ ta’ L. Kik sa mill-31 ta’ Mejju 2004, jista’ jidher xokkanti li r-Regolament Nru 1408/71 jistipula li għandha tiġi applikata dik l-istess leġiżlazzjoni, li ma għadhiex applikabbli b’konsegwenza, preċiżament, tal-istess regolament.

51.

Madankollu, peress li fil-fatt, hija l-istess leġiżlazzjoni – dik tal-Pajjiżi l-Baxxi – li ma tibqax tapplika mill-31 ta’ Mejju 2004 u li, bħala riżultat ta’ dan, terġa’ ssir applikabbli permezz tar-Regolament Nru 1408/71, fi kwalunkwe każ, it-titolu legali huwa differenti u għalhekk din il-leġiżlazzjoni tirriżulta, konsekuttivament, inapplikabbli u ta’ applikazzjoni obbligatorja.

52.

Fil-fatt, il-liġi tal-Pajjiżi l-Baxxi kienet applikabbli sal-31 ta’ Mejju 2004 peress li sa dik id-data L. Kik kien jaħdem ma’ kumpannija b’uffiċċju rreġistrat fil-Pajjiżi l-Baxxi, fejn huwa kien ukoll jgħix, jaħdem u jħallas it-taxxi. Skont il-liġi tal-Pajjiżi l-Baxxi, din ma baqgħetx tkun applikabbli minn meta L. Kik għalaq tliet xhur kontinwi jaħdem barra mill-Pajjiżi l-Baxxi u ma’ persuna li timpjega residenti fl-Isvizzera. F’dawn iċ-ċirkustanzi, peress li ġiet issodisfatta l-kundizzjoni li “tispiċċa li tkun valida il-leġislazzjoni ta’ Stat Membru” skont kif prevista fl-Artikolu 13(2)(f) tar-Regolament Nru 1408/71 (u “mingħajr ma ssir applikabbli għaliha leġislazzjoni ta’ Stat ieħor”), il-kriterju determinanti, skont din id-dispożizzjoni, biex tiġi identifikata l-leġiżlazzjoni li għandha tiġi applikata huwa dak tar-residenza tal-impjegat. Inċidentalment, fiċ-ċirkustanzi tal-każ, dan il-kriterju jerġa’ jindika l-leġiżlazzjoni tal-Pajjiżi l-Baxxi, jiġifieri, l-istess liġi li l-inapplikabbiltà tagħha rrendiet neċessarja t-tfittxija ta’ leġiżlazzjoni applikabbli oħra. Issa, għalkemm fil-fatt materjalment din hija l-istess liġi, l-inapplikabbiltà tagħha hija dovuta għal raġuni legali differenti: spiċċat tkun applikabbli meta nbidlu ċ-ċirkustanzi tal-impjieg ta’ L. Kik (fil-31 ta’ Mejju 2004) u reġgħet bdiet tkun applikabbli meta dan ġie impost mill-kriterju ta’ identifikazzjoni tal-liġi applikabbli previst fir-Regolament Nru 1408/71 għall-każ ta’ L. Kik wara l-31 ta’ Mejju 2004. Fl-ewwel każ, il-liġi tal-Pajjiżi l-Baxxi kienet applikabbli minħabba li L.Kik għex u ħadem fil-Pajjiżi l-Baxxi għal kumpannija stabbilita f’dak l-Istat Membru u fit-tieni każ minħabba li, wara li ma baqgħetx applikabbli minħabba bidla f’dawn iċ-ċirkustanzi, kienet il-liġi tal-post tar-residenza tiegħu.

53.

Fl-aħħar nett, mingħajr ma jkun hemm bżonn li ssir l-applikazzjoni b’analoġija tad-dispożizzjonijiet fir-Regolament Nru 1408/71 li ma humiex maħsuba għal każ bħal dak li jikkonċerna lilna hawn, nemmen li l-imsemmi Artikolu 13(2)(f), jipprovdi, b’mod immedjat u prinċipali, ir-risposta għad-domanda dwar il-liġi applikabbli għal dan il-każ.

54.

Għalhekk, u bħala t-tieni konklużjoni intermedja, nipproponi li r-risposta tal-Qorti tal-Ġustizzja għat-tieni domanda tkun fis-sens li, skont l-Artikolu 13(2)(f) tar-Regolament Nru 1408/71, il-leġiżlazzjoni applikabbli għal L. Kik hija dik tal-Pajjiżi l-Baxxi, peress li dan huwa t-territorju tar-residenza tiegħu.

55.

Fid-dawl tal-kunsiderazzjonijiet preċedenti, nipproponi li r-risposta tal-Qorti tal-Ġustizzja għad-domanda preliminari magħmula tkun is-segwenti: