Appell ippreżentat fis-26 ta’ Novembru 2012 mir-Repubblika Franċiża mis-sentenza mogħtija mill-Qorti Ġenerali (Ir-Raba’ Awla) fil-11 ta’ Settembru 2012 fil-Kawża T-565/08, Corsica Ferries France SAS vs Il-Kummissjoni Ewropea

(Kawża C-536/12 P)

2013/C 32/10

Lingwa tal-kawża: il-Franċiż

Partijiet

Appellanti: Ir-Repubblika Franċiża (rappreżentanti: G. de Bergues, D. Colas, N. Rouam u J. Rossi, aġenti)

Partijiet oħra fil-proċedura: Corsica Ferries France SAS, Il-Kummissjoni Ewropea, Société nationale maritime Corse-Méditerranée (SNCM) SA

Talbiet tal-appellanti

Aggravji u argumenti prinċipali

L-appellanti tqajjem erba’ aggravji intiżi għall-annullament tas-sentenza tal-Qorti Ġenerali.

Fl-ewwel lok, l-appellanti tqis li l-Qorti Ġenerali kisret l-Artikolu 107(1) TFUE meta ddeċidiet li l-Kummissjoni wettqet żball ta’ liġi meta qieset li t-trasferiment tas-Société Nationale Maritime Corse-Méditerranée għal prezz negattiv ta’ EUR 158 miljun ma kienx jikkostitwixxi għajnuna mill-Istat. L-appellanti tikkritika lill-Qorti Ġenerali, minn naħa, talli qieset li l-Kummissjoni ma setgħetx tieħu inkunsiderazzjoni r-riskju ta’ effett ħażin fuq l-immaġni tal-marka tal-Istat, bħala attur ekonomiku globali fis-settur perivat, fil-kuntest tat-test tal-investitur privat avżat, sabiex tistabbilixxi jekk il-ħlas ta’ allowances addizzjonali ta’ tkeċċija lill-impjegati tas-SNCM f’każ ta’ stralċ ta’ din tal-aħħar kienx jitwettaq ukoll minn investitur privat avżat. Min-naħa l-oħra, hija tikkritika lill-Qorti Ġenerali talli talbet lill-Kummissjoni tagħti l-prova li l-ħlas ta’ allowances addizzjonali ta’ tkeċċija kien jikkostitwixxi prassi suffiċjentement stabbilita, u saħansitra kostanti, fost l-imprendituri privati.

Fit-tieni lok, il-Qorti Ġenerali wettqet żball ta’ liġi bbażat fuq il-ksur tal-Artikolu 107(1) TFUE meta qieset li l-Kummissjoni ma ħaditx inkunsiderazzjoni l-elementi rilevanti kollha fil-kuntest tal-analiżi tagħha tal-komparabbiltà tal-kontribut kapitali ta’ EUR 8,75 miljun imwettaq mill-azzjonist pubbliku tas-SNCM u tal-kontribut kapitali ta’ EUR 26,25 miljun imwettaq mix-xerrejja privati, u li l-Kummissjoni kellha tieħu inkunsiderazzjoni l-klawżola riżolutorja ta’ trasferiment mogħtija lix-xerrejja privati fil-kuntest tal-privatizzazzjoni tas-SNCM.

Fit-tielet lok, il-Qorti Ġenerali kisret l-Artikolu 36, moqri flimkien mal-ewwel paragrafu tal-Artikolu 53 tal-Istatut tal-Qorti tal-Ġustizzja, kif ukoll l-Artikolu 81 tar-Regoli tal-Proċedura tal-Qorti Ġenerali, meta kkwalifikat bħala għajnuna mill-Istat il-miżuri ta’ għajnuna lil individwi ta’ ammont ta’ EUR 38,5 miljun mingħajr ma vverifikat, b’mod sussidjarju, jekk din il-miżura kinitx tissodisfa t-test tal-investitur privat avżat, kif sostnew madankollu l-Kummissjoni fid-deċiżjoni kontenzjuża u l-Gvern Franċiż matul is-seduta quddiem il-Qorti Ġenerali.

Fl-aħħar nett, il-Qorti Ġenerali wettqet żball ta’ liġi meta qieset li l-Kummissjoni wettqet żball manifest ta’ evalwazzjoni meta approvat il-bilanċ tar-ristrutturazzjoni skont l-Artikolu 107(3)(ċ) TFUE u l-linji gwida.

(1)  ĠU 2009 L 225, p. 180