EUR-Lex Access to European Union law
This document is an excerpt from the EUR-Lex website
Document 62011TN0304
Case T-304/11: Action brought on 16 June 2011 — Alumina v Council
Kawża T-304/11: Rikors ippreżentat fis- 16 ta’ Ġunju 2011 — Alumina vs Il-Kunsill
Kawża T-304/11: Rikors ippreżentat fis- 16 ta’ Ġunju 2011 — Alumina vs Il-Kunsill
ĠU C 226, 30.7.2011, p. 29–30
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
30.7.2011 |
MT |
Il-Ġurnal Uffiċjali tal-Unjoni Ewropea |
C 226/29 |
Rikors ippreżentat fis-16 ta’ Ġunju 2011 — Alumina vs Il-Kunsill
(Kawża T-304/11)
2011/C 226/58
Lingwa tal-kawża: il-Franċiż
Partijiet
Rikorrenti: Alumina d.o.o. (Zvornik, il-Bosnja-Ħerzegovina) (rappreżentanti: J.-F. Bellis u B. Servais, avukati)
Konvenut: Il-Kunsill tal-Unjoni Ewropea
Talbiet
Ir-rikorrenti titlob li l-Qorti Ġenerali jogħġobha:
— |
tannulla d-dazju antidumping impost fuq ir-rikorrenti mir-Regolament ta’ Implimentazzjoni tal-Kunsill (UE) Nru 464/2011 tal-11 ta’ Mejju 2011 li jimponi dazju antidumping definittiv u li jiġbor definittivament id-dazju provviżorju impost fuq importazzjonijiet tat-trab żeolit A li joriġinaw mill-Bosnja-Ħerzegovina; |
— |
tikkundanna lill-Kunsill għall-ispejjeż. |
Motivi u argumenti prinċipali
Insostenn tar-rikors, ir-rikorrenti tinvoka żewġ motivi.
L-ewwel nett, ir-rikorrenti tikkunsidra li d-dazju antidumping stabbilit fir-regolament ikkontestat huwa illegali sa fejn il-metodu użat għall-kalkolu tal-valur normali maħdum jikser l-Artikolu 2(3) u (6) tar-regolament bażiku. Fil-mod kif inħadem il-valur normali, il-konvenut uża marġini ta’ profitt ta’ 58,89 % ikkalkolat abbażi tal-prezzijiet tal-bejgħ domestiċi li ma humiex rappreżentattivi tar-rikorrenti. L-użu ta tali marġni ta’ profitt huwa inkompatibbli mal-Artikolu 2 tar-regolament bażiku. Fil-fatt, il-mod ta’ kif inħadem il-valur normali huwa affettwat minn kontradizzjoni fundamentali safejn il-metodu użat mill-konvenut sabiex jaħdem il-valur normali għandu l-istess riżultat bħal jekk il-valur normali kien ibbażat fuq il-prezzijiet ta’ bejgħ domestiku mhux rappreżentattiv. Tali metodu huwa kuntrarju għall-prattika kostanti tal-Kummissjoni u tal-Kunsill kif ukoll għall-ġurisprudenza tat-Qorti Ġenerali u tal-Qorti tal-Ġustizzja. Barra minn hekk, il-marġni ta’ profitt ta’ 58,89 % ikkunsidrat ma huwiex “raġonevoli”. Fl-aħħar nett, huwa b’mod żbaljat li l-konvenut jibbaża fuq ġurisprudenza meħuda minn deċiżjonijiet tad-WTO sabiex japplika marġni ta’ profitt li ma huwiex “raġonevoli” fil-mod ta’ kif jinħadem il-valur normali applikabbli għall-esportazzjonijiet tar-rikorrenti.
It-tieni nett, ir-rikorrenti tikkunsidra wkoll li l-metodu użat għall-kalkolu tal-valur normali maħdum jikser id-dispożizzjonijiet tal-Artikolu 2(6) tar-regolament bażiku safejn il-bejgħ domestiku tar-rikorrenti ma sarx matul “tmexxija ordinarja tal-kummerċ” fis-sens tat-tielet subparagrafu tal-Artikolu 2(1) u tat-tieni subparagrafu tal-Artikolu 2(3) tar-regolament bażiku.