17.12.2011   

MT

Il-Ġurnal Uffiċjali tal-Unjoni Ewropea

C 370/19

(1)

Sabiex ġenitur ikun jikkwalifika bħala “il-persuna li għandha effettivament il-kustodja tat-tfal” bil-għan li jakkwista dritt ta’ residenza minn fuq tfal li għandhom iktar minn 21 sena u li qegħdin jeżerċitaw dritt ta’ aċċess għall-edukazzjoni skont l-Artikolu 12 tar-Regolament Nru 1612/68 [ara issa l-Artikolu 10 tar-Regolament (UE) Nru 492/2011 (1) ], huwa neċessarju li dawk it-tfal ikunu (i) dipendenti fuq il-ġenitur; (ii) jirrisjedu fl-istess dar tal-ġenitur; u (iii) jirċievu appoġġ emozzjonali minn dak il-ġenitur?

(2)

Jekk ma jkunx meħtieġ li l-ġenitur iressaq prova li huma sodisfatti t-tliet rekwiżiti msemmija iktar ’il fuq biex dan ikun jista’ jikkwalifika għal dan id-dritt ta’ residenza derivat, huwa biżżejjed li jressaq prova li huma sodisfatti wieħed jew tnejn biss minn dawn ir-rekwiżiti?

(3)

Fir-rigward tal-punt (ii) iktar ’il fuq, it-tfal li huma studenti adulti jibqgħu jiġu kkunsidrati bħala li jirrisjedu fl-istess dar tal-ġenitur(i) tagħhom anki meta dawn it-tfal ikunu jgħixu ’l bogħod mid-dar matul l-istudji tagħhom (ħlief għall-vaganzi u matul tmiem il-ġimgħa xi kultant)?

(4)

Fir-rigward tal-punt (iii) iktar ’il fuq, huwa neċessarju li l-appoġġ emozzjonali pprovdut mill-ġenitur ikun ta’ kwalità partikolari (jiġifieri mill-qrib jew fiżikament mill-viċin) jew huwa biżżejjed jekk ikun jikkonsisti f’rabta emozzjonali normali bejn il-ġenitur u t-tfal adulti?

(5)

Meta persuna kellha dritt għal residenza fl-UE skont l-Artikolu 12 tar-Regolament Nru 1612/68 [ara issa l-Artikolu 10 tar-Regolament (UE) Nru 492/2011] għal perjodu kontinwu ta’ iktar minn ħames snin, din ir-residenza tikkwalifika għal għan li jiġi akkwistat dritt ta’ residenza permanenti skont il-Kapitolu IV tad-Direttiva 2004/38/KE (2) (Id-Direttiva taċ-Ċittadini dwar id-“Dritt ta’ residenza permanenti”) u għall-ħruġ ta’ karta ta’ residenza permanenti skont l-Artikolu 19 tal-istess Direttiva?